အင်မော်တယ်ဓား အဆင့်သတ်မှတ်ချက်ပြိုင်ပွဲ

"အမည်ခံ ဓားအင်မော်တယ်"

မရေမတွက်နိုင်သော အော်ဟစ်အားပေးသံများက လည်ချောင်းကွဲမတတ်နီးပါး ပေါက်ကွဲ ထွက်လာသည်။ ကောင်းကင် နှင့် မြေကြီးကို တုန်လှုပ်စေကာ ဒဏ္ဍာရီမှာ လက်တွေ့ ဖြစ်လာခဲ့သည်။ ဓားကျင့်ကြံသူပေါင်းများစွာက စိတ်ညို့ခံထားရသကဲ့သို့၊ မီးခိုးရောင်ဝတ် ပြိုင်ဘက်ကင်း လူငယ်ထံ စိုက်ကြည့်နေကြပြီး သူ၏ လက်ရှိ ခမ်းနားမှု နှင့် တည်ရှိမှုမှာ သူတို့အားလုံး၏ စိတ်ထဲတွင် တစ်သက်တာ မှတ်ဉာဏ်အဖြစ် စွဲထင်သွားကြ၏။ ဒဏ္ဍာရီတစ်ခု၏ မွေးဖွားလာခြင်းကို ကိုယ်တိုင်ကိုယ်ကျ မြင်တွေ့ရခြင်းမှာ သမိုင်းတွင်လောက်သော အံ့ဖွယ်တစ်ခုပင်။

"လင်းချန်"

တစ်ချိန်က လျစ်လျူရှု ခံခဲ့ရသော လင်းမျိုးနွယ်ရှိ စွန့်ပစ်ခံ လူငယ်၏ အမည်မှာ ယခုအခါ ငရဲ ကိုးထပ်တစ်ခွင် ပဲ့တင်ထပ်နေသည်။ ဓားအပျက်အစီးနယ်မြေ၏ ဓား တောင်ထွတ် ၉၉၉ ခုလုံးသည် သူ့ကို ဂုဏ်ပြုရန်အတွက် တောက်လောင်နေသော နေတစ်စင်းကဲ့သို့ ပြင်းထန်စွာ ထွန်းလင်း၍ ကောင်းကင်ကို လှပစေကာ ထာဝရ ဓားအကျဉ်းထောင်တစ်ခုလုံး၏ ဓားဝိညာဉ်များကို ပေါ်ထွက်လာစေခဲ့သည်။

"လင်းချန်။ ငရဲဘုံ ကိုးထပ်ရဲ့ သမိုင်းအသစ်က မင်းနဲ့အတူ စတင်လိမ့်မယ်။ မင်းက ရှေးခေတ်ကတည်းက ပြိုင်ဘက်ကင်း အမည်ခံ ဓားအင်မော်တယ် ဖြစ်လာတယ်။ ဒီအချိန်ကနေစပြီး ထာဝရ ဓားအကျဉ်းထောင်က မင်းအတွက် တိုက်ခိုက်ပေးလိမ့်မယ်"

နက်ရှိုင်းသော စကားသံတစ်ခုက ဓားအစောင့်အရှောက် တံခါးမှ ထွက်ပေါ်လာသည်။ ဓားအစောင့်အရှောက်၏ စကားလုံးများက အမည်ခံ ဓားအင်မော်တယ်၏ တရားဝင်မှုကို အတည်ပြုလိုက်သည်။ ၎င်းမှာ လုံးဝ ရူးသွပ်ဖွယ်ဖြစ်ကာ ဓားအပျက်အစီးနယ်မြေအတွင်း ဓားစီရင်သူ တစ်သိန်း ထွက်လာကာ မီးခိုးရောင်ဝတ် လူငယ်ကို အံ့ဩဖွယ်ရာတစ်ခုအလား စိုက်ကြည့်နေသည်။ အဆင့်တိုင်းမှ တပည့်များအားလုံးက လင်းချန်ကို နက်ရှိုင်းစွာ ချီးကျူး၍ ကြည်ညိုလေးစားစွာ မော့ကြည့်ခဲ့သည်။ သာမန်လူများအတွက် ပုံမှန်အားဖြင့် မြင်တွေ့ခွင့်မရှိသော ထိပ်တန်း တရားသူကြီးများ နှင့် ကြီးကြပ်သူများ ပင် ဓားနှစ်ခြင်းအခမ်းအနား၏ ယဇ်ပလ္လင်အောက်တွင် ပေါ်လာကြသည်။ သူတို့၏ ဓားများက တိမ်တိုက်များ နှင့် မိုးကြိုးများကို လှုံ့ဆော်နိုင်သဖြင့် အားလုံးကို အံ့ဩစေသည့်တိုင်အောင် ထာဝရ ဓား၏ ပဲ့တင်သံ ကိုးခုရှေ့တွင် သိမ်ငယ်နေပုံရသည်။ မြင့်မြတ်သော ဓားတာအို၏ အထွတ်အထိပ် သခင်များပင် ဤ အခိုက်အတန့်တွင် သာမန် တပည့်များကဲ့သို့ပင် လင်းချန်ကို မော့ကြည့်လာကြသည်။

"အမည်ခံ ဓားအင်မော်တယ်"

နားကွဲလုမတတ် ကျယ်လောင်သော အားပေးသံများက နောက်တစ်ကြိမ် ထွက်ပေါ်လာကာ ထာဝရ ဓားအကျဉ်းထောင်တစ်ခွင် လွှမ်းခြုံသွားသည်။ ဤမြင်ကွင်းအရ ထာဝရ ဓားအကျဉ်းထောင်သည် အမည်ခံ ဓားအင်မော်တယ်အပေါ် လေးစားကြည်ညိုကြောင်း နားလည်နိုင်သည်။ ဓားအစောင့်အရှောက်၊ ကြီးကြပ်သူများ နှင့် ဓားအပျက်အစီးနယ်မြေ၏ အခြား ပုံရိပ်များက လင်းချန်ကို သစ္စာစောင့်သိကြောင်း ကိုယ်တိုင်ကိုယ်ကျ ကြေညာခဲ့ကြသဖြင့် မည်သူမှ ထိခိုက်အောင် လုပ်ရဲမည်မဟုတ်ချေ။

လင်းချန်၏ မျက်နှာအထက်၌ လှောင်ပြုံးတစ်ခု ဖြစ်ပေါ်လာကာ ဤအရာအားလုံးမှာ သူ၏ ထိန်းချုပ်မှုအတွင်း ရှိနေပြီး ထာဝရ ဓား၏ နတ်ဘုရားအလင်းအောက်တွင် လွှမ်းခြုံ၍ ချင်ထျန်းအပေါ် ရုတ်တရက် စိုက်ကြည့်လိုက်သည်။

ဘန်း

"မြင့်မြတ်သော အမည်ခံ ဓားအင်မော်တယ်။ ကျွန်တော်က မျက်စိကန်းခဲ့ပြီး ခင်ဗျားအပေါ် မှားယွင်းစွာ ပြုမူခဲ့ပါတယ်။ ချင်မျိုးနွယ်ရဲ့ ဓားအပျက်အစီးနယ်မြေအပေါ် မျိုးဆက်များစွာ အကျိုးပြုမှုကို ထောက်ထားပြီး ကျွန်တော့်ရဲ့ တန်ဖိုးမရှိတဲ့ အသက်ကို ချမ်းသာပေးဖို့ တောင်းပန်ပါတယ်"

ချင်ထျန်းက ချက်ချင်း ဝပ်တွားပြီး မြေကြီးပေါ်တွင် ဒူးထောက်ချလိုက်သည်။ သူ၏ မျက်လုံးများ စိတ်ပျက်အားငယ်မှုဖြင့် မှိန်ဖျော့နေကာ သူ၏ ဦးခေါင်းကို မြေကြီးနှင့် ဆောင့်လျက် တောင်းပန်နေသည်။

"ပါးစပ်ပိတ်ထားစမ်း။ ချင်ထျန်း၊ မင်းက ထိပ်တန်း တရားသူကြီးတစ်​ယောက်ဖြစ်နေတာတောင် ဓားအပျက်အစီးနယ်မြေက သူရဲကောင်း နှစ်ဦးရဲ့ သားကို မကောင်း ကြံစည်ရဲတယ်။ ဒီပြစ်မှုက ဓားအပျက်အစီးနယ်မြေမှာ သေဒဏ် ထိုက်တယ်"

ကြောက်မက်ဖွယ်ရာ အစွမ်းထက် ပုံရိပ်များ၏ အုပ်စုအကြားမှ ဆံပင်ဖြူသော်လည်း လူငယ် မျက်နှာနှင့် အဘိုးကြီးတစ်ဦး ရှေ့တက်လာသည်။ ကြီးကြပ်သူ စစ်ခုံးက ချင်ထျန်းအပေါ် စိုက်ကြည့်၍ အေးစက်စွာ ပြောခဲ့သည်။ ဓားကျင့်ကြံသူများစွာအတွက် ကြီးကြပ်သူ စစ်ခုံးမှာ ဒဏ္ဍာရီလာ ပုံရိပ်တစ်ခု ဖြစ်၍ သူ၏ ဇာတ်လမ်းများအကြောင်း ရေးရန် စာအုပ်ထူထူတစ်အုပ် လိုအပ်ပေလိမ့်မည်။

"ကျုပ်က အမည်ခံ ဓားအင်မော်တယ်ရဲ့ တရားစီရင်မှုကို တောင်းခံပါတယ်။ ဒီကောင်က သူရဲ့ ကံကြမ္မာနဲ့ ထိုက်တန်ပါတယ်။ ကျွန်တော် သူ့ကို ကွပ်မျက်လိုက်ရမလား"

ကြီးကြပ်သူ စစ်ခုံးက လင်းချန်ထံ လေးစားစွာ ချဥ်းကပ်လာ၍ ခွင့်ပြုချက် တောင်းခံလိုက်၏။ ချင်ထျန်းမှာ တစ်ချိန်က အဆင့်အတန်းမြင့်မားခဲ့သော်လည်း ယခုအခါ သေခြင်းနှင့် ရင်ဆိုင်နေရပြီး အမည်ခံ ဓားအင်မော်တယ်ကြောင့် ဖြစ်သည်။ လောကကြီး၏ ကြမ်းတမ်းသော လက်တွေ့တရားပင်။

"အခု ကြောက်နေပြီလား။ ဘယ်လောက် ငြီးငွေ့စရာကောင်းလဲ။ လုပ်လိုက်"

လင်းချန်က တစ်ချက်ပြုံး၍ ကြီးကြပ်သူ စစ်ခုံးကို အရေးမစိုက်ဟန်ဖြင့် လက်ဝှေ့ယမ်းပြလိုက်သည်။

"ဟုတ်ကဲ့"

ကြီးကြပ်သူ စစ်ခုံးမှာ တပည့်ဖြစ်သူ ချင်ထျန်း၏ ကံကြမ္မာအတွက် သက်ပြင်းချလိုက်မိသည်။ သို့သော် အမှားလုပ်ခဲ့သောကြောင့် လျင်မြန်စွာ ရှင်းမပစ်လျှင် သူ့ကို ဂယက်ရိုက်လာနိုင်သည်။ အပြောင်းအလဲတစ်ခု ဓားအပျက်အစီးနယ်မြေတွင် ဖြစ်ပွားနေပြီး သူက ခေါင်းညိတ်၍ ဓားမြှောင်ကို ချက်ချင်း ပစ်ခတ်လိုက်ရာ ချင်ထျန်း၏ ဦးခေါင်းကို ထိုးဖောက်သွားသည်။

ဘန်း

ချင်ထျန်း၏ ဦးခေါင်း ပေါက်ကွဲထွက်သွားကာ တုန်ရီနေသော ခန္ဓာကိုယ် အသက်မဲ့၍ လဲပြိုသွားသည်။ ကျယ်လောင်သော ပေါက်ကွဲမှုတစ်ခုနှင့်အတူ ဓားမြှောင်၏ အရှိန်အဟုန်က ကောင်းကင်သို့ ထိုးတက်သွားကာ အရောင်များ ပြောင်းလဲ၍ မိုးကြိုး နှင့် လျှပ်စီး မုန်တိုင်းတစ်ခု ကောင်းကင်တစ်ခွင် ပျံ့နှံ့သွားသည်။

"ဒါ....ဒါက ဓားရဲ့ အနှစ်သာရပဲ"

ယွမ်ရှောင်၏ မျက်လုံးများက ထိုဓားချက်ကြောင့် တောက်ပနေစဥ် ချင်ထျန်း သေဆုံးသွားသဖြင့် ချင်မျိုးနွယ်ဝင်များ ဒူးများ ပျော့ခွေသွားသည်။ မြေကြီးပေါ်သို့ ပြိုလဲသွားကာ အသက်ချမ်းသာပေးရန် စိတ်ပျက်အားငယ်စွာ တောင်းပန်ကြသည်။

"ကျွန်တော်တို့ အမည်ခံ ဓားအင်မော်တယ်ကို သနားကရုဏာ တောင်းခံပါတယ်"

"ချင်ထျန်းနဲ့ သူ့သား ချင်လော့က ပြစ်မှုတွေအတွက် သေဒဏ် ထိုက်ပါတယ်။ ဒါပေမယ့် ကျွန်တော်တို့က အပြစ်မဲ့ပါတယ်…"

ချင်လော့သည် ဖခင်၏ခေါင်းပြတ် အလောင်းအနားတွင် တစ္ဆေတစ်ကောင်ကဲ့သို့ ဖြူဖျော့နေကာ တစ်ကိုယ်လုံး တုန်ရီနေ၏။ အနီးအနားတွင် ရပ်နေသော ပိုင်ချင်းရွှယ် နှင့် သူမ၏ သား ပိုင်ဝူချွဲသည်လည်း ကြောက်ရွံ့မှုကြောင့် ဖြူဖျော့နေပြီဖြစ်သည်။

"သေချာတာပေါ့၊ ပြန်လည်မွေးဖွားလာတာက ပိုပြီး အားကောင်းလေလေ၊ လက်စားချေရတာ ပိုမြန်လေလေပဲ။ ပြန်လည်မွေးဖွားပြီး ရုန်းကန်နေရတာတွေက အရှုံးသမားတွေပဲ"

လင်းချန်၏ အပြုံးက ပျောက်ကွယ်သွားကာ ချင်မျိုးနွယ်ဝင်များကို အေးစက်စက် တစ်ချက်ကြည့်၍ အမိန့်ချလိုက်၏။

"ချင်ထျန်းကို ကူညီတဲ့သူတွေ အဓိက ကြံရာပါဖြစ်လို့ အပြစ် ခံရမယ်။ ငါက ချင်မျိုးနွယ်ကို မျိုးတုန်းသတ်ဖြတ်ဖို့ အမိန့်ပေးတယ်။ ဘယ်သူ ကန့်ကွက်ချင်လဲ"

လူအုပ်က ဆတ်ခနဲ တုန်ခါသွားကာ တောင်းပန်နေသော ချင်မျိုးနွယ်ဝင်များအတွက် အမည်ခံ ဓားအင်မော်တယ်မှာ ကြင်နာမပေးခဲ့ပေ။

"ခင်ဗျားရဲ့ အမိန့်အတိုင်းပါ"

ကြီးကြပ်သူ စစ်ခုံးက သစ္စာရှိ နောက်လိုက်တစ်ယောက်ပမာ ခေါင်းညိတ်၍ ရူးသွပ်မတတ်ဖြစ်နေသော ချင်မျိုးနွယ်ဝင်များကို ကွပ်မျက်ရန် အမိန့်ပေးလိုက်သည်။ ကွပ်မျက်မိန့်​ကြောင့် ချင်လော့မှာ ဒူးထောက်ကျသွား၍ လင်းချန်ကို ကူရာမဲ့စွာ ကြည့်နေရင်း ကျောရိုးတလျှောက် အေးစက်တောင့်တင်းသွားသည်။

"ချင်လော့ကို ချမ်းသာပေးလိုက်"

ကြီးကြပ်သူ စစ်ခုံး ချင်မျိုးနွယ်ကို ကွပ်မျက်ရန် အစပျိုးနေစဥ် လင်းချန်က ရုတ်တရက် မျက်ခုံးပင့်ပြီး ပြုံးလိုက်သည်။ ချင်လော့၏ မျက်လုံးများ မှိန်ဖျော့သွားကာ တစ်ချိန်က သူ နှိပ်စက်ခဲ့သော လင်းမျိုးနွယ်ဝင်ကို မျက်ဝန်းဗလာဖြင့် စိုက်ကြည့်နေသည်။

"ငါက အမည်ခံ ဓားအင်မော်တယ် ဖြစ်ပေမယ့် ချင်မျိုးနွယ်အပေါ် လက်စားချေပြီးနောက် အခွင့်အရေးတွေကို အလွဲသုံးစားလုပ်ဖို့ ဆန္ဒမရှိဘူး။ ဓားအပျက်အစီးနယ်မြေက ပါရမီရှင်တွေ ဓားသိုင်းပညာမှာ ယှဉ်ပြိုင်ဖို့ အချိန်တန်ပြီ။ အင်မော်တယ် ဓားအဆင့်သတ်မှတ်ချက်တွေ ခွဲခြားမယ့် အချိန်မှာ ငါလည်း သာမန်ဓားကျင့်ကြံသူတွေနဲ့အတူ ပြိုင်ပွဲမှာ ပူးပေါင်းပါဝင်မယ်"

ဤကြေညာချက်က လင်းချန်ကို လေးစားမှု ရရှိစေခဲ့ပြီး အာဏာကို ဆန္ဒအလျောက် စွန့်လွှတ်ကာ အရည်အချင်း ယှဉ်ပြိုင်ရန်သာ ဆန္ဒရှိကြောင်း ဖော်ပြနေသည်။

"ချင်လော့ အသင့်ပြင်ထား။ အင်မော်တယ် ဓားအဆင့်သတ်မှတ်ချက်ပြိုင်ပွဲမှာ ငါက မင်းကို တိုက်ခိုက်ပြီး အနိုင်ယူမယ်"

လင်းချန်၏ ကြုံးဝါးသံက ပရိသတ်ကို တုန်လှုပ်သွားစေခဲ့သည်။

"အမည်ခံ ဓားအင်မော်တယ်က သူတော်စင် နယ်ပယ်မှာ၊ ချင်လော့ကတော့ သူ့ရဲ့ တာအို နှလုံးသားကို နိုးထစေခဲ့ပြီး အင်မော်တယ် ဓားအဆင့်သတ်မှတ်ချက်မှာ ထိပ်တန်းတစ်ယောက် ဖြစ်နေပြီးသားပဲ။ သူက ချင်လော့ကို အချိန်တိုအတွင်း တကယ် အနိုင်ယူနိုင်မှာလား"

"သူ့ကိုယ်သူ အထင်ကြီးလွန်းနေတာလား။"

လူအုပ်က လင်းချန်ကို ရောထွေးသော ခံစားချက်များဖြင့် ကြည့်နေမိသည်။

"ဒီလို အဆင့်အတန်း နဲ့ အာဏာကို စွန့်လွှတ်ပြီး ဓားသိုင်းပညာရဲ့ ယှဉ်ပြိုင်မှုတစ်ခုမှာ ပါဝင်တယ်ဆိုတာက လှည့်ကွက်တစ်ခုပါပဲ"

ယွမ်ရှောင်က ဤအကွက်မျိုးကို ရင်းနှီးကျွမ်းဝင်သော်လည်း ပြောင်ပြောင်တင်းတင်း မကစားပေ။ သို့သော် လင်းချန် တွက်ထားသည့်အတိုင်း ဇာတ်ကွက်ဆန်ဆန် စကားလုံးများက စိတ်နှလုံးကို အနိုင်ယူခဲ့သည်။ လင်းချန်က အင်မော်တယ် ဓားအဆင့်သတ်မှတ်ချက်အပေါ် အာရုံစိုက်နေသဖြင့် ဓားကျင့်ကြံသူများအကြားတွင် မျှော်လင့်ချက်ကို ဖြစ်ပေါ်စေခဲ့သည်။ ကမ္ဘာကို တုန်လှုပ်စေသော အရည်အချင်းပင် အင်အားအဖြစ်သို့ ပြောင်းလဲသက်သေပြရန် လိုအပ်သည်။

"ကြီးကျယ်ခမ်းနားတဲ့ အမည်ခံ ဓားအင်မော်တယ်၊ သူ့ရဲ့ လမ်းကြောင်းပေါ်က ဘယ်လို စိန်ခေါ်မှုကိုမဆို ဘာကြောင့် စိုးရိမ်နေရမှာလဲ။ စိတ်ချ၊ သူက အင်မော်တယ် ဓားအဆင့်သတ်မှတ်ချက်မှာ သေချာပေါက် ထိပ်ဆုံး ရောက်လိမ့်မယ်"

"ဘယ် ပြိုင်ဘက်ကင်း ဓားသမားက ထိပ်ဆုံးကို ရောက်ဖို့ မတိုက်ခိုက်ခဲ့ဖူးလို့လဲ"

"မှန်တယ်"

ဆူညံပွက်လောရိုက်နေသော ဆွေးနွေးသံများ အကြားတွင် ချင်လော့သည် နောက်ဆုံး၌ အရှိတရားသို့ ပြန်လည် ရောက်ရှိလာသည်။

"ကောင်းပြီ။ ကောင်းပြီ။ မင်းက သေချင်နေရင်လည်း ငါ့ကို အပြစ်မတင်နဲ့"

သူက ရုတ်တရက် မတ်တပ်ရပ်ပြီး ချင်မျိုးနွယ်၏ အလောင်းများကို ကျော်လွှားကာ အနိမ့်ကျဆုံးသော အခြေအနေဖြင့် ထွက်ခွာသွားခဲ့သည်။

"ဓားနှစ်ခြင်းအခမ်းအနား ဆက်လက် ကျင်းပနိုင်မယ်"

ဓားအစောင့်အရှောက်၏ အသံက တံခါးမှ ထွက်ပေါ်လာသည်။

"ဟုတ်ကဲ့"

အခမ်းအနားကို ကြီးကြပ်သော အကြီးအကဲက ခေါင်းညိတ်သည်။

"အမည်ခံ ဓားအင်မော်တယ်၊ ကျေးဇူးပြုပြီး ကြွပါ"

ကြီးကြပ်သူ စစ်ခုံးက အထိပ်တန်း တရားသူကြီးအားလုံး နှင့် အခြား အကြီးအကဲများကို ဦးဆောင်၍ လင်းချန်အား ယဇ်ပလ္လင်အထက်မှ ဆင်းသက်ရန် နှင့် တောက်ပသော ခရီးကို စတင်ရန် ဓားအပျက်အစီးနယ်မြေသို့ လေးစားစွာ ဖိတ်ခေါ်လိုက်သည်။

"လေးစားရပါသော အကြီးအကဲတို့၊ ခင်ဗျားတို့က မြှောက်ပင့်နေတာပဲ"

လင်းချန်က ပြုံးရယ်၍ အကြီးအကဲများနှင့်အတူ ထွက်ခွာသွားသောအခါ အာရုံစိုက်မှု အားလုံးကို ယူဆောင်သွားကာ ဓားနှစ်ခြင်းအခမ်းအနားပင် မှေးမှိန်သွား၏။ ကိုးဆယ်ရာခိုင်နှုန်းသော လူငယ်များက ယခုထိ မစမ်းသပ်ရသေးသော်လည်း အမည်ခံ ဓားအင်မော်တယ်အကြောင်း သတင်း ဖြန့်ရန် ကျင့်ကြံသူများစွာ စိတ်အားထက်သန်စွာ ထွက်ခွာသွားကြသဖြင့် ထာဝရဓားပင် ခဏတာ မှိန်ဖျော့သွားပုံရသည်။

" အသက်ကယ်ထားတဲ့ ကျေးဇူးရှင်ကို ဒီလို မေ့သွားတယ်ပေါ့။ အနည်းဆုံးတော့ ဟန်ဆောင်ပန်ဆောင် လုပ်သင့်တယ် မဟုတ်ဘူးလား"

ယွမ်ရှောင်က ရယ်ရလွန်းသဖြင့် မျက်ရည်ကျလုနီးပါး ဖြစ်နေသည်။

"မင်းက ဒီဇာတ်လမ်းမှာ သာမန် ဇာတ်ပို့တစ်ယောက် လုပ်နေတာပဲ။ ဘာတွေ မျှော်လင့်နေတာလဲ"

ကြယ်ပြာက နှာခေါင်းရှုံ့၍ စနောက်သည်။

"မြန်မြန်၊ ကိုယ့်ဘာသာကို ဇာတ်ညွှန်းထဲ ရေးထည့်လိုက်"

လနီက အော်ဟစ် ရယ်မောသည်။

"ထားလိုက်ပါ"

ယွမ်ရှောင်အနေဖြင့် သူ၏သားကောင် တဟုန်ထိုး ကျော်ကြားသွားခြင်းကို စိတ်မဆိုးခဲ့ပေ။ လင်းချန်က အရင်းအမြစ် သယံဇာတများကို ပို၍ လျင်မြန်စွာ စုဆောင်းထားလျှင် ရိတ်သိမ်းချိန်၌ သူ့အတွက် ကောင်းကျိုးချည်းသာ ဖြစ်၏။

ထာဝရ ဓား၏ ပဲ့တင်ထပ်မှု ကိုးကြိမ်က ကောင်းကင် နတ်ဓားဧကရာဇ်၏ စစ်မှန်သော ကျွမ်းကျင်မှုဖြစ်၍ ပြောလောက်စရာ မဟုတ်ပေ။

"ဓားအစောင့်အရှောက် တံခါး၊ ဘိုးဘေး ဓားသင်္ချိုင်းဂူကို ဝင်ရောက်ခွင့်။ ဒီလောက်ဆိုရင်ကို မဆိုးပါဘူး"

ယွမ်ရှောင်က သက်ပြင်းချ၍ ထိုသို့သော အဆင့်အတန်း၊ ရာထူး၊ နှင့် သယံဇာတများမှာ သူကိုယ်တိုင် လှုပ်ရှားရန်ပင် မလိုအပ်ချေ။ ထာဝရ ဓားအကျဉ်းထောင်တွင် ခြေကုပ်တစ်ခု ရှိရုံဖြင့် သူက လင်းချန်ကို ဝါးမျိုလိုက်လျှင် အဆင့်တက်ရန် လုံလောက်သည် မဟုတ်ပါလော။

"ဒါပေမယ့် ငါကိုယ်တိုင်လည်း စမ်းသပ်ကြည့်ဦးမယ်။ ဒါက ထာဝရ ဓား ဘယ်နှစ်ကြိမ် ပဲ့တင်ထပ်မလဲဆိုတာအပေါ် မူတည်တယ်"

ယွမ်ရှောင် အတွေးများနေစဥ် ဓားနှစ်ခြင်းအခမ်းအနားကို ဆက်လက် ကျင်းပခဲ့သသော်လည်း စိတ်လှုပ်ရှားစရာ ပျောက်ကွယ်သွားခဲ့သည်။ ထာဝရ ဓားကို ခြောက်ကြိမ် ပဲ့တင်ထပ်စေသော တပည့်တစ်ဦး ပေါ်ထွက်လာသည့်တိုင်အောင် ပျင်းရိငြီးငွေ့စရာ ဖြစ်လာခဲ့၏။ လူတိုင်း၏ စိတ်တွင် အမည်ခံဓားအင်မော်တယ်ဟူသော အမည်နာမ တစ်ခုတည်းသာ စွဲထင်နေပြီး လူငယ်ဓားကျင့်ကြံသူများအပေါ် ဖိအားကြီးစွာ ကျရောက်နေသည်။

"ရိုးရိုးသားသား ပြောရရင် အမည်ခံ ဓားအင်မော်တယ်ကို ဖယ်လိုက်ရင် ဒါက ဆယ်စုနှစ်အတွင်း အကောင်းဆုံး အသုတ်ပဲ"

"သနားစရာပဲ၊ ဒီကလေးတွေရဲ့ အလင်းရောင်ကို အမည်ခံ ဓားအင်မော်တယ်က ယူသွားတယ်"

"ပြောမနေပါနဲ့။ အမည်ခံ ဓားအင်မော်တယ်တစ်ရဲ့ တန်ဖိုးက မရေမတွက်နိုင်တဲ့ ပါရမီရှင် ဓားကျင့်ကြံသူတွေနဲ့ ညီမျှတယ်"

"မှန်တယ်"

ဆွေးနွေးသံများအကြားတွင် အချိန် ကုန်လွန်သွားကာ ယဇ်ပလ္လင်အထက်ရှိ လူအုပ် တစ်စတစ်စ လျော့နည်းသွားသည်။ ခဏအတွင်း နေ့အချိန် ကုန်ဆုံးသွားကာ

ယွမ်ရှောင်ပင် ငြီးငွေ့လွန်းသဖြင့် နောက်ဆုံးအဆင့် သူတော်စင် နယ်ပယ်သို့ပင် အဆင့်တက်သွားခဲ့သည်။ သူ သတိပြန်ဝင်လာသောအခါ လူငယ်ဓားကျင်ကြံသူများစွာ စမ်းသပ်မှု ပြီးဆုံး၍ ပရိသတ်များလည်း အိမ်ပြန်သွားကြပြီ ညနေစောင်း ရောက်နေပြီဖြစ်သည်။ ဓားအပျက်အစီးနယ်မြေအတွင်း၌ အော်ဟစ်အားပေးသံများ ဆူညံနေဆဲဖြစ်ကာ အမည်ခံ ဓားအင်မော်တယ် ရောက်ရှိလာမှုအပေါ် စိတ်လှုပ်ရှားနေကြသည်။ အပြင်ဘက်တွင် ကျန်ရစ်ခဲ့သူများမှာ မေ့လျော့ခြင်း ခံရသော အဖြစ်သို့ ရောက်သွားခဲ့၏။

"ယွမ်ရှောင်"

ဓားအပျက်အစီးနယ်မြေအတွက် အခမ်းအနားကို ကြီးကြပ်ရသော အကြီးအကဲက သူ၏ နာမည်ကို ခေါ်လိုက်သောအခါ ယွမ်ရှောင်သည် နောက်ဆုံးတစ်ယောက်အဖြစ် ကျန်ရစ်ခဲ့ကြောင်း သိလိုက်ရလေသည်။