နောက်ဆုံး သင်္ကေတ

ခီရက်ဇ်ဆာ၏ ဆုံးဖြတ်ချက်သည် မှားယွင်းခြင်းမရှိခဲ့ပေ။ ချန်လွေ့သည် အမှန်တကယ်ပင် မိစ္ဆာမျက်ဆံ၏ စွမ်းအားကို အသုံးပြုခဲ့သည်။

သူ၏ မိစ္ဆာမျက်ဆံသည် မူလက [အထူးစိစစ်မှု] ဖြင့် ပေါင်းစပ်ထားသောကြောင့် ၎င်း၏စွမ်းအားနှင့် ထိန်းချုပ် နိုင်စွမ်းမှာ သာမန် မိစ္ဆာမျက်ဆံထက် များစွာသာလွန်သည်။ ခီရက်ဇ်ဆာ၏ ခွန်အားသည် နတ်ဘုရားတစ်ပိုင်း ဖြစ်သော်လည်း မိစ္ဆာမျက်ဆံ၏ “အရည်အသွေး”မှာ ချန်လွေ့ထက် များစွာနိမ့်ကျသည်။ ချန်လွေ့၏ တိုက်ခိုက်မှုက [ကြယ်နီပိုင်နက်] နှင့် [ဆောင်းပိုင်နက်] တို့ ပေါင်းစပ်ထားရာ၊ ၎င်းသည် အဆင့်မြင့် ဖိနှိပ်မှုတစ်ခုကဲ့သို့ ခီရက်ဇ်ဆာ၏ အဆုံးစွန်လှုပ်ရှားမှုကို တိုက်ရိုက် တန်ပြန်ခဲ့သည်။

ခီရက်ဇ်ဆာ၏ အဆုံးသတ်တိုက်ကွက်မှာ ပျက်ပြယ် သွားခဲ့ပြီး မိစ္ဆာမျက်ဆံ၏ စွမ်းအားအရှိန်အဝါ ပျောက်ကွယ် သွားကာ သူ၏ မျက်လုံးများ ခဏတာ မှုန်မှိုင်းသွားသော်လည်း သူသည် အလွန်လျင်မြန်စွာ တုံ့ပြန်ခဲ့သည်။ သူသည် ပတ်ဝန်းကျင်တွင် တိုင်းပြည်စွမ်းအားကို စုစည်းကာ အချိန်တိုအတွင်း အကာအကွယ် ပုံစံတစ်ခု ဖန်တီးခဲ့သည်။ သူသည် အမှန်တကယ်ပင် စစ်ပွဲအတွေ့အကြုံများစွာ ရှိသော နတ်ဘုရားတစ်ပိုင်း အဆင့် အစွမ်းထက်ပုဂ္ဂိုလ်တစ်ဦး ဖြစ်သည်။

ချန်လွေ့ မဖြေခဲ့ပေ။ ဤပြိုင်ဘက်၏ ရက်စက်မှုနှင့် ကောက်ကျစ်မှုကို သူ ကောင်းစွာသိရှိပြီး ဆာရီရယ်က သူတို့ကို အစွမ်းထက်သော [အသစ်ပြန်ဖြစ်ခြင်း] စွမ်းရည်ကို ပေးထားသည့်အတွက် သူကို ပေါ့ပေါ့တန်တန် သဘော မထားသင့်ပေ။

ချန်လွေ့၏ လက်ထဲမှ ဖျက်ဆီးခြင်းအငွေ့အသက်သည် အရှိန်အဟုန်ဖြင့် စတင်သိပ်သည်းလာပြီး သူ၏ညာဘက် လက်မောင်းက အနီရောင်အလင်းဖြင့် တောက်ပလာသည်။ ၎င်းသည် အစွမ်းအထက်ဆုံးသော [အစစ်အမှန် အနီရောင် ကွယ်ပျောက်ခြင်း] ပင် ဖြစ်သည်။

[အစစ်အမှန် အနီရောင် ကွယ်ပျောက်ခြင်း] ၏ နက်နဲသော အဓိပ္ပာယ်မှာ အထူးနည်းလမ်းဖြင့် စွမ်းအားကို ဖိသိပ်ပြီးနောက် ပေါက်ကွဲစေခြင်း ဖြစ်သည်။ ၎င်းသည် ရိုးရှင်းသော စွမ်းအားဖိသိပ်မှုမဟုတ်ဘဲ၊ ဥပဒေသနှင့် ယုံကြည်မှုစွမ်းအားကို ဖိသိပ်ခြင်းဖြစ်သည်။ ဖိသိပ်ပြီးနောက် ပေါက်ကွဲသော စွမ်းအားသည် နှစ်ဆလိုက် တိုးပွားလာမည် ဖြစ်သည်။

ထိုတိုက်ခိုက်မှုအတွက် လိုအပ်သော ကြယ်စွမ်းအားမှာ [ဓူဝံကြယ်မုန်တိုင်း] ထက် အဆပေါင်းများစွာ ပိုများသည်။ ၎င်းသည် ကြီးမားသော ပမာဏဖြင့် ရွေးချယ်မရသော တိုက်ခိုက်မှု မဟုတ်သော်လည်း တစ်ခုတည်း ပစ်မှတ်အပေါ် အာရုံစိုက်ထားသော ဖျက်ဆီးနိုင်စွမ်းသည် [ဓူဝံကြယ် မုန်တိုင်း] ထက် များစွာသာလွန်သည်။

ချန်လွေ့သည် ဤအကြီးမားဆုံးသော အဆုံးသတ် တိုက်ကွက်ကို အားဖြည့်နေခြင်းဖြစ်ရာ၊ တစ်ချက်တည်းဖြင့် သတ်ဖြတ်ရန် ရည်ရွယ်နေကြောင်း ထင်ရှားသည်။ အစွမ်းထက်သောသူများကို အပြည့်အဝ ဖယ်ရှားရန် ခက်ခဲတတ်သည်မှာ အမှန်ပင်။ လက်ရှိတွင် တစ်ဖနီ ပတ်ဝန်းကျင်ရှိ ခရမ်းရောင်မြူများ အများစု ပျောက်ကွယ် သွားပြီဖြစ်ရာ “တံခါး” ပွင့်ရန် မကြာတော့ပေ။ အန်ကွစ်နှင့် ဗက်ဇယ်နာတို့လည်း မည်သည့်အချိန်မဆို ပြန်ရောက် လာနိုင်သောကြောင့် ခီရက်ဇ်ဆာကို အတတ်နိုင်ဆုံး အမြန်ဆုံး ဖြေရှင်းရမည် ဖြစ်သည်။

ခီရက်ဇ်ဆာသည် နတ်ဘုရားတစ်ပိုင်း အစွမ်းထက်ပုဂ္ဂိုလ် တစ်ဦးဖြစ်သည်။ မယ်ဒူဆာမျိုးနွယ် နတ်ဘုရားတစ်ပိုင်းပင် ဖြစ်သည်။ သူသည် [ရက်ရက်စက်စက်အကြည့်] ၏ တန်ပြန်အားဖြင့် ပြင်းပြင်းထန်ထန် ထိမှန်ခဲ့သော်လည်း အလွန်လျင်မြန်စွာ ပြန်လည် နလန်ထူလာခဲ့သည်။ မိစ္ဆာမျက်ဆံ ကို ခဏတာ အသုံးမပြုနိုင်တော့သော်လည်း သူ၏ အမြင် အာရုံမှာ ပြန်လည်ကောင်းမွန်လုနီးပါး ရှိနေပြီဖြစ်သည်။ ဤအချိန်တွင် သူသည် အလွန်အမင်း အန္တရာယ်ကို အလိုလို ရုတ်တရက် ခံစားမိသည်။ ၎င်းသည် သူ ယခင်က လှည့်စားခဲ့သော ခြေသလုံးအိမ်တိုင် ဝိညာဉ်များစွာဖြင့် ဝန်းရံခံထားရသကဲ့သို့ပင်။ မဟုတ်ပေ။ ထိုအရာက ပိုမို၍ ကြောက်မက်ဖွယ်ကောင်းသည်။

သူ စုဆောင်းထားတဲ့ စွမ်းအားကို ထုတ်လွှတ် လိုက်တာနဲ့ ငါ သေမှာ သေချာတယ်။ ခီရက်ဇ်ဆာသည် ထိုအရာကို ရှင်းရှင်းလင်းလင်း ခံစားခဲ့ရပြီး အမြဲ ခိုင်မာတည်ကြည်ခဲ့သော စိတ်ဓာတ်က အလိုအလျောက် တုန်လှုပ်လာခဲ့သည်။ သူ၏ အရှိန်အဝါသည် ရုတ်တရက် အားနည်းသွားခဲ့သည်၊ [အစစ်အမှန် အနီရောင် ကွယ်ပျောက်ခြင်း] ၏ ဖျက်ဆီးခြင်း ဥပဒေသသည် အလွန်အစွမ်းထက်သောကြောင့် သာမက “အရှိန်အဟုန်” ၏ နက်နဲသော စွမ်းအားကြောင့်လည်း ဖြစ်သည်။

လူမသတ်ခင်မှာပင် ခြိမ်းခြောက်နေခြင်းပင်။

[အစစ်အမှန် အနီရောင် ကွယ်ပျောက်ခြင်း]က အားဖြည့်နေပုံ ရသော်လည်း ၎င်းသည် တကယ်ပင် အသက်ဝင်နေပြီဖြစ်သည်။

ချန်လွေ့သည် ရုတ်တရက် ခေါင်းလှည့်ကာ ဘယ်ဘက်လေထဲသို့ ကြည့်လိုက်ရာ ပုံရိပ်တစ်ခု ပေါ်လာပြီဖြစ်သည်။ ၎င်းမှာ အန်ကွစ်ဖြစ်ပြီး နေရာ ရွှေ့ပြောင်းလာခြင်း ဖြစ်သည်။

အန်ကွစ်သည် အံ့ဩတကြီးဖြင့် နှစ်ဖက်စလုံးကို ကြည့်ပြီး မယ်ဒူဆာပုံစံဖြင့်ရှိနေသော ခီရက်ဇ်ဆာကို တစ်ချက် ကြည့်လိုက်သည်။ ထို့နောက် သူသည် ချန်လွေ့ကို ကြည့်လိုက်သည်။ “ ရိုင်ကိုနန်... မဟုတ်ဘူး။ မင်းက ရိုင်ကိုနန် မဟုတ်ဘူး။ မင်း ဘယ်သူလဲ။”

ရိုင်ကိုနန်သည် တိုင်းပြည်အဆင့်၏ ကနဦးပိုင်းသာ ရှိသည်။ ထိုပုဂ္ဂိုလ်၏ ပုံပန်းသဏ္ဌာန်သည် ရိုင်ကိုနန်နှင့် တူသော်လည်း သူ၏စွမ်းအား အငွေ့အသက်သည် နတ်ဘုရားတစ်ပိုင်း အဆင့်တွင် ရှိနေသည်။ အထူးသဖြင့် သူ၏ ညာဘက်လက်မောင်းတွင် အားဖြည့်နေသော ကြောက်မက်ဖွယ်အငွေ့အသက်က နတ်ဘုရားတစ်ပိုင်း အဆင့် ဖြစ်သော သူ့ကိုပင် အမြင့်ဆုံးအဆင့် အန္တရာယ်ကို ခံစားရစေသည်။

ဒီလူက ရိုင်ကိုနန်အနေနဲ့ ဟန်ဆောင်ပြီးတော့ အဖွဲ့ထဲမှာ ပုန်းနေခဲ့တာပဲ။ သူ့မှာ လျို့ဝှက် အကြံအစည်တွေ ရှိရမယ်။ ကံကောင်းချင်တော့ သူက အရင် ထုတ်ဖော်လာခဲ့တယ်။ မဟုတ်ရင် အကျိုးဆက်တွေက ဒုက္ခအကြီးအကျယ် ရောက်သွားနိုင်တယ်။

အန်ကွစ်သည်လည်း စဉ်းလဲသော သူတစ်ဦး ဖြစ်သည်။ ထိုရန်သူနှစ်ဦး၊ 'ရိုင်ကိုနန်'နှင့် ခီရက်ဇ်ဆာတို့သည် အခြားအချိန်တွင် တိုက်ခိုက်နေမည် ဆိုပါက သူသည် ကောင်းမွန်သော အစီအစဉ်တစ်ခု ပြုလုပ်ကာ အခွင့်အရေး ယူမည်မှာ သေချာသည်။ သို့သော် ယခုအခြေအနေသည် အလွန်ပင် အရေးတကြီး ဖြစ်နေသည်။ နောက်ကွယ်မှ ခြေသလုံးအိမ်တိုင် ဝိညာဉ်တပ်များသည် မည်သည့် အချိန်မဆို ချဉ်းကပ်လာနိုင်ပြီး တစ်ဖနီ၏ အစီအရင်လည်း ပြီးဆုံးတော့မည်ဖြစ်သည်။ ၎င်းသည် အရေးကြီးဆုံးအချိန်ပင် ဖြစ်လေသည်။

တစ်ဖက်လူရဲ့ နောက်ခံက ဘာပဲဖြစ်ဖြစ် ပြဿနာတွေ ပိုမဖြစ်လာအောင် အမြန်ဆုံး ဖယ်ရှားရမယ်။

အန်ကွစ်သည် ထိုသို့ တွေးလိုက်သည်နှင့် သူ၏ ကိုယ်ခန္ဓာမှ မီးတောက်များ ထွက်ပေါ်လာပြီး ကိုယ်ခန္ဓာကို လွှမ်းခြုံကာ အနက်ရောင်နှင့် အနီရောင် ချပ်ကာ တစ်ပိုင်း ဖြစ်လာသည်။ [ယုံကြည်မှုချပ်ကာ] ပေါ်လာသည်နှင့် သူ၏ အရှိန်အဝါတစ်ခုလုံး ရုတ်တရက် မြင့်တက်လာသည်။ မီးတောက်သည် ရုတ်တရက် အေးခဲသောလေအဖြစ်သို့ ပြောင်းလဲသွားပြီး အနီးနားရှိ နေရာလွတ်များသည် လေထဲတွင်ပင် သလင်းကျောက်များ ဖြစ်ပေါ်လာပြီး ထိုသလင်းကျောက်များသည် ချန်လွေ့နှင့် ခီရက်ဇ်ဆာဆီသို့ လျင်မြန်စွာ ပျံ့နှံ့သွားသည်။

အန်ကွစ်၏ စွမ်းအား ၈၀%ကျော်သည် ချန်လွေ့ကို ပစ်မှတ်ထားသည်။ ရိုင်ကိုနန်အဖြစ် ဟန်ဆောင်ထားသော ထိုရန်သူသည် အန်ကွစ်အတွက် အကြီးမားဆုံးသော ခြိမ်းခြောက်မှုဖြစ်သည်။ ဗက်ဇယ်နာနှင့် သူ့ကို အန္တရာယ်ထဲသို့ လှည့်စားခဲ့သော ခီရက်ဇ်ဆာပင် ထိုသူ၏ လက်ထဲတွင် ကြီးမားသော ဆုံးရှုံးမှုကို ခံစားခဲ့ရပုံ ပေါ်သောကြောင့် သူသည် ပထမဆုံး ဖယ်ရှားရမည့် ပစ်မှတ် ဖြစ်ပေသည်။

ချန်လွေ့သည် ပြိုင်ဘက်၏ သတ်ဖြတ်လိုစိတ်ကို ရှင်းရှင်းလင်းလင်း ခံစားမိသည်။ ထိုအချိန်တွင် [အစစ်အမှန် အနီရောင် ကွယ်ပျောက်ခြင်း]၏ ဥပဒေသ ဖိသိပ်မှုသည် အမြင့်ဆုံးအဆင့်သို့ ရောက်လုနီးပါး ရှိနေပြီဖြစ်သည်။ တပြိုင်နက်တည်းတွင် သူသည် အသံကျယ်လောင်စွာ အော်ဟစ်ကာ သူ၏လက်ထဲမှ စွမ်းအားကို ထုတ်လွှတ် လိုက်သည်။ သူသည် ခီရက်ဇ်ဆာကို စွန့်လွှတ်ကာ အန်ကွစ်ထံသို့ ပစ်လွှတ်လိုက်သည်။

ခီရက်ဇ်ဆာသည် သူ၏ အမြင်အာရုံကို ပြန်လည် ရရှိလုနီးပါး ဖြစ်နေပြီဖြစ်သည်။ အနီရောင် အလင်းတစ်ခုက သူ၏ကိုယ်ခန္ဓာကို ကျော်လွန်ကာ အန်ကွစ်ဆီသို့ ပျံသန်းသွားသည်ကို မြင်လိုက်ရသည်။ အလင်းသည် အလွန် တောက်ပခြင်းမရှိ၊ အံ့ဩဖွယ်ကောင်းသော အရှိန်အဝါလည်း မရှိပေ။ ၎င်း၏ အရှိန်လည်း မမြန်ပေ။ ၎င်းသည် သာမန် တိုက်ခိုက်မှုတစ်ခုကဲ့သို့ ဖြစ်နေသော်လည်း ခီရက်ဇ်ဆာ၏ မြွေမျက်လုံးများက အလင်းရောင်ထဲတွင် စဉ်ဆက်မပြတ် ဖျက်ဆီးခံနေရသော “လောက”တစ်ခု ရှိနေပုံရသည်ကို ရှင်းရှင်းလင်းလင်း မြင်နိုင်သည်။

ထိုကြောက်ရွံ့ဖွယ် ခံစားချက်က ခီရက်ဇ်ဆာကို တုန်လှုပ်စေခဲ့ပြီး သူ၏ခန္ဓာကိုယ်တွင် အပ်ချွန်များစွာဖြင့် ထိုးသွင်းခံရသကဲ့သို့ စပ်ဖျဉ်းဖျဉ်းနာကျင်မှုကို ရုတ်တရက် ခံစားလိုက်ရသည်။ သူ စိတ်ကို စုစည်းလိုက်သောအခါ သူ၏ သံချပ်ကာတွင် ကြီးမားသော အက်ကွဲကြောင်းများ ပေါ်လာသည်ကို သိလိုက်ရသည်။ အလွန်သန့်စင်သော ဖျက်ဆီးခြင်းစွမ်းအား၏ အကြွင်းအကျန်များ သူ၏ခန္ဓာကိုယ် အတွင်းသို့ ကျူးကျော်ဝင်ရောက်ခဲ့သည်။ ဤသည်မှာ ဘေးမှ ဖြတ်သွားသော စွမ်းအားအကြွင်းအကျန်မျှသာ။

အန်ကွစ်သည် တိုက်ခိုက်မှု ပြုလုပ်ရန် ရည်ရွယ်ခဲ့သော်လည်း သူသည် ရုတ်တရက် အလွန်အမင်း အန္တရာယ်၏ သတိပေးလက္ခဏာကို ရရှိခဲ့သည်။ သူ၏ ကိုယ်ပေါ်ရှိ အမွှေးများ ထောင်ထလာခဲ့သည်။ ထိုအန္တရာယ် အဆင့်သည် ယခင်က “ဗုံးခန္ဓာ”ထက်ပင် ပိုမို၍ အန္တရာယ်ရှိသည်။ သူသည် အားဖြည့်နေသောစွမ်းအားကို ကာကွယ်ရေး စွမ်းအားအဖြစ်သို့ ပြတ်ပြတ်သားသား ပြောင်းလဲလိုက်သည်။

နောက်ထပ်စက္ကန့်တွင် သူသည် အနီရောင်အလင်းကို မြင်လိုက်ရသည်။

၎င်းသည် အနီရောင်အလင်းမဟုတ်ဘဲ လွှမ်းမိုးနေသော ဖျက်ဆီးမှုပင် ဖြစ်သည်။

အန်ကွစ်သည် သူ၏လက်ကို ကြက်ခြေခတ်ပုံစံ ပြုလုပ်ကာ ခံစစ် အနေအထားကို ပြုလုပ်လိုက်သည်။ သူ၏ကိုယ်ခန္ဓာပတ်လည်ရှိ နေရာလွတ်သည် ရုတ်တရက် ကြီးမားသော သလင်းကျောက်စက်လုံး အဖြစ် ပြောင်းလဲ သွားသည်။ သလင်းကျောက်စက်လုံးသည် အပြန်အလှန် ဖြတ်သန်းနေသော ရေခဲသလင်းကျောက် အချွန်အထက် များစွာကို ဆန့်ထုတ်ကာ ကြီးမားသော ဒိုင်းကြီးတစ်ခု ဖန်တီးခဲ့သည်။ ၎င်းသည် သူ၏ အစွမ်းအထက်ဆုံး ကာကွယ်ရေး စွမ်းရည် ဖြစ်သည်။ မှော်ပညာနှင့် ရုပ်ပိုင်းဆိုင်ရာ တိုက်ခိုက်မှုနှစ်မျိုးစလုံးသည် ထိုဧရာမဒိုင်းကြီး ရှေ့တွင် ပြန်လည် ယိုင်ထွက်သွားမည်ဖြစ်သည်။

သို့သော်လည်း အနီရောင်အလင်းသည် ထိုလမ်းကြောင်း အတိုင်း တိုက်ရိုက် ထိုးဖောက် ဝင်ရောက်သွားသည်။ ၎င်းဖြတ်သန်းသွားရာတိုင်းတွင် အတားအဆီးအားလုံးသည် ပျောက်ကွယ်သွားခဲ့သည်။

အန်ကွစ်သည် မယုံကြည်နိုင်သော အမူအရာကို ပြသခဲ့ပြီး ယခုတွင် သူသည် အနီရောင်အလင်း၏ ဖျက်ဆီးခြင်း အငွေ့အသက်ဖြင့် ပိတ်ဆို့ခံထားရပြီ ဖြစ်သည်။ ရွှေ့ပြောင်းခြင်း မပြောနှင့်၊ သာမန်ရွှေ့ပြောင်းခြင်းပင် မလုပ်ဆောင်နိုင်တော့ပေ။ ၎င်းသည် လုံးဝရှောင်လွှဲ၍ မရနိုင်သော အခြေအနေပင်။

ဟိန်းသံကြားတွင် အန်ကွစ်၏ ခန္ဓာကိုယ်သည် ရုတ်တရက် နှစ်ဆကြီးထွားလာသည်။ တိုင်းပြည်၏ ယုံကြည်မှုနှင့် အသက်စွမ်းအားသည် အမြင့်ဆုံးအဆင့်သို့ ရောက်ရှိသွားသည်။ ရေခဲတိုင်းပြည်ရှိ မရေမတွက်နိုင်သော ခိုင်မာပြီး ချွန်ထက်သော ရေခဲသလင်းကျောက်များသည် ဟထားသော သွားများကဲ့သို့ပင် အနီရောင်အလင်းကို သူတို့၏ စွမ်းအားအပြည့်ဖြင့် ရင်ဆိုင်ခဲ့သည်။

အနီရောင်အလင်းသည် ရေခဲသလင်းကျောက် တိုင်းပြည်ကို တည်ငြိမ်သောအရှိန်ဖြင့် ထိုးဖောက် သွားခဲ့သည်။ ခီရက်ဇ်ဆာသည် ပြင်းထန်သော အအေးဓာတ်ကို ထုတ်လွှတ်နေသော ဧရာမရေခဲစက်လုံးကြီး တုန်ယင်သွားသည်ကို မြင်လိုက်ရသည်။ ထို့နောက် ၎င်းသည် ကျောက်စရစ်ခဲကဲ့သို့သော အရာဝတ္ထုများအဖြစ် လျင်မြန်စွာ ပြိုကျသွားခဲ့သည်။ ထိုပြိုကျမှုသည် ကီလိုမီတာ ၁၀၀၀နီးပါး အထိ ဆက်လက်ဖြစ်ပေါ်ခဲ့သည်။ အန်ကွစ်၏ ခန္ဓာကိုယ်သည် အဝေးသို့ တွန်းပို့ခံခဲ့ရလေ၏။

အန်ကွစ်၏ရှေ့တွင် အနီရောင် အလင်းသည် တစ်မီတာခန့်ပင် မဝေးတော့သော်လည်း အလင်းရောင်သည် များစွာ မှိန်ဖျော့သွားခဲ့သည်။ ပြင်းထန်သော စွမ်းအား တစ်ခုဖြင့် သူသည် နောက်ဆုံးတွင် ကြောက်မက်ဖွယ် ကောင်းသော အနီရောင်အလင်းကို လုံးဝ သလင်းကျောက် အဖြစ် ပြောင်းလဲကာ သူ၏လက်ထဲတွင် ဖိနှိပ်ချုပ် ကိုင်နိုင်ခဲ့သည်။

အနီရောင်အလင်းသည် သလင်းကျောက်တုံးအဖြစ်သို့ ပြောင်းလဲသွားသောအခါ အန်ကွစ်၏ ကိုယ်အပေါ်ပိုင်းရှိ [ယုံကြည်မှုချပ်ကာ]မှာ လုံးဝပျက်စီးသွားခဲ့ပြီး သူ၏ စွမ်းအားတိုးမြှင့်ထားသော အခြေအနေသည် မူလ အခြေအနေသို့ တဖြည်းဖြည်း ပြန်လည်ရောက်ရှိသွားခဲ့သည်။ သူ၏မျက်နှာသည် ဖြူဖျော့သွားပြီး အသက်ရှုမဝဖြစ်ကာ သူ၏လက်များမှာ အလိုအလျောက် တုန်ယင်လာခဲ့သည်။ ခြေသလုံးအိမ်တိုင်ဝိညာဉ်များကို ရင်ဆိုင်ရာမှ ခံစားခဲ့ရသော အတွင်းဒဏ်ရာများမှာ နှစ်ဆပိုများလာသည်ဟု သူခံစား လိုက်ရသည်။ သူသည် အလွန်အမင်း ထိတ်လန့်တုန်လှုပ် နေပုံရသည်။

ဒီတိုက်ခိုက်မှုစွမ်းအားက တကယ်ပဲ ကြောက်စရာ ကောင်းလွန်းတယ်။ ငါ့လို နတ်ဘုရားတစ်ပိုင်းအဆင့် ထိပ်သီးပိုင်းကတောင် ဒါကို ခုခံနိုင်ဖို့ အင်အားအကုန် ထုတ်လိုက်ရတယ်။ ခုနက ငါ အမှားနည်းနည်းလေးတောင် လုပ်လိုက်မိမယ်ဆိုရင်.....

ဒီလိုမျိုး နောက်ထပ် တိုက်ခိုက်မှုတစ်ခု ထပ်ပြီးတော့ ရှိလာမယ်ဆိုရင်တော့....

အန်ကွစ်သည် ချန်လွေ့ကို မဟာရန်သူ တစ်ဦးကဲ့သို့ ကြည့်နေခဲ့ပြီး မည်သည့် ပေါ့ဆမှုမှ မရှိပေ။ ခီရက်ဇ်ဆာမှာမူ ထို့ထက်ပင် ပိုမိုကြောက်လန့်နေခဲ့သည်။ ခုနက ငါသာဆိုရင် ရေခဲစက်လုံး တိုင်းပြည်လိုမျိုး ချေမှုန်းခံလိုက်ရမှာပဲ။

မယ်ဒူဆာက မျက်လုံးလှန် လိုက်သည်။ “သူ့ကို သတ်ဖို့ အဖွဲ့ဖွဲ့ရအောင်။”

အန်ကွစ်သည် တဖြည်းဖြည်း ပိုမိုနီးကပ်စွာ ပျံသန်းလာပြီး စိတ်လှုပ်ရှားသွားခဲ့သည်။ ဒီ”ရိုင်ကိုနန်”ရဲ့ စွမ်းအားက ကြီးမားလွန်းတယ်။ သူ့ကို အကြီးမားဆုံး ခြိမ်းခြောက်မှုလို့ သတ်မှတ်လို့တောင် ရနိုင်တယ်။ အခုလက်ရှိ အခြေအနေမှာ ဒီမိန်းမနဲ့ ပူးပေါင်းတာက ပိုကောင်းမယ်။

ချန်လွေ့သည် အန်ကွစ်ကို အေးစက်စက် ကြည့်လိုက်သည်။ အမှန်တကယ်၌ ခုနက [အစစ်အမှန် အနီရောင် ကွယ်ပျောက်ခြင်း] တိုက်ခိုက်မှုသည် သာမန် လေ့ကျင့်မှု ကာလထက် စွမ်းအားပိုမိုကုန်ဆုံးစေခဲ့သည်။ ပြိုင်ဘက် ပိုမိုအားကောင်းလေ၊ ထိုလှုပ်ရှားမှုသည် ကြယ်စွမ်းအားနှင့် ဥပဒေသစွမ်းအားကို ပိုမိုစုပ်ယူလေ ဖြစ်ပုံရသည်။ ထိုလှုပ်ရှားမှုသည် နတ်ဘုရားတစ်ပိုင်း အဆင့်၏ အမြင့်ဆုံးအစွမ်းထက်ပုဂ္ဂိုလ်ကို များစွာ ဒုက္ခပေး ခဲ့သော်လည်း သူသည်လည်း သူ၏စွမ်းအား ၈၀% ကို အကုန်အစင် သုံးစွဲခဲ့ရသည်။

တကယ်လို့ ဒီတစ်ခေါက် အန်ကွစ်က ငါ့ကို တန်ပြန် တိုက်ခိုက်မယ်ဆိုရင် ခုခံဖို့ ခက်ခဲလောက်တယ်။ ပြီးတော့ ဉာဏ်များပြီးတော့ ရက်စက်တဲ့ မယ်ဒူဆာကလည်း ငါ့ကို စိုက်ကြည့်နေတယ်။

အရေးအကြီးဆုံးကတော့ အခုက တံခါးပွင့်ဖို့ နောက်ဆုံး အခိုက်အတန့် ဖြစ်နေတာပဲ။ ငါ ထွက်ပြေးလို့ မဖြစ်ဘူး။

ချန်လွေ့ စိတ်ပြောင်းသွားပြီး အကြံတစ်ခု ရရှိခဲ့သည်။ သူသည် အေးစက်စက် နှာခေါင်းရှုံ့ကာ လက်ထဲမှ တစ်စုံတစ်ရာကို ကိုင်ထားရင်း အန်ကွစ်ဆီသို့ မြှောက်ပြလိုက်သည်။

၎င်းသည် မြွေပုံစံကွက် တံဆိပ်တစ်ခု ဖြစ်သည်။

အန်ကွစ် ထိတ်လန့်သွားခဲ့ပြီး ချန်လွေ့က အေးစက်စက် မေးလိုက်သည်။ “မင်း ခုထိ သူနဲ့ပူးပေါင်းပြီး ငါ့ကို သတ်ချင်တုန်းပဲလား။”

“ဒါဆို မင်းက ဆာ-စေတန်ရဲ့ လူယုံပေါ့။” အန်ကွစ်က ခါးသက်သက် ပြုံးလိုက်သည်။ “ခုနက...”

“ခုနက မင်း ငါ့ကို သတ်ဖို့မကြိုးစားခဲ့ဘူးဆိုရင် ငါ မင်းကို စပြီး တိုက်ခိုက်မှာ မဟုတ်ဘူး။” ချန်လွေ့သည် ခီရက်ဇ်ဆာကို တစ်ချက်ကြည့်လိုက်သည်။ “အခုအချိန်က ဖိအားများနေပြီ။ ဒီကောက်ကျစ်တဲ့မိန်းမကို အရင်ရှင်းပစ်လိုက်။ မစ်-တစ်ဖနီ တံခါးဖွင့်မယ့် အချိန်ကို ထိခိုက်စေလို့ မဖြစ်ဘူး။”

“ကောင်းပြီလေ။” အန်ကွစ်၏ သတ်ဖြတ်လိုစိတ် မြင့်တက်လာပြီး သူ၏ ပတ်ဝန်းကျင်ရှိ ရေခဲ သလင်းကျောက်များ ထပ်မံ သိပ်သည်းလာကာ ခီရက်ဇ်ဆာကို ပစ်မှတ်ထားလိုက်သည်။

အမှန်တကယ်၌ ချန်လွေ့ပြသခဲ့သော ကြောက်မက်ဖွယ် ခွန်အားကြောင့် အန်ကွစ်၌ ကြောက်လန့်စိတ်များ ကျန်ရှိနေခဲ့ခြင်းမရှိပါက သူသည် “အဖွဲ့ဝင်များ”၏ အထောက်အထား သက်သေပြနိုင်ခဲ့လျှင်ပင် အန်ကွစ်သည် ၎င်းကို အသိအမှတ်ပြုမည်မဟုတ်ပေ။ သူက ချန်လွေ့ကို သတ်ပစ်မည်သာ ဖြစ်သည်။

ဤကမ္ဘာတွင် လက်သီးသည် အကြီးမားဆုံးသော အမှန်တရားပင်။

ခီရက်ဇ်ဆာသည် မူလက ချန်လွေ့သည် ဆာရီရယ်နှင့် ဆက်စပ်နေသည်ဟု ယူဆခဲ့သောကြောင့် သူ့ကို အနိုင်ယူရန် အန်ကွစ်ကို အသုံးချပြီး အတွင်းမှ အကျိုးအမြတ်အချို့ ရယူလိုခဲ့သည်။ သို့သော် ချန်လွေ့သည် ဆာတန်အဖွဲ့၏ “တံဆိပ်”ကို အမှန်တကယ်ပင် ထုတ်ပြလိမ့်မည်ဟု သူ မမျှော်လင့်ခဲ့ပေ။ သူသည် အလွန် အန္တရာယ်များသော အခြေအနေသို့ ရောက်ရှိသွားခဲ့သည်။

--- ငါက တစ်ယောက်စီရဲ့ ပြိုင်ဘက်တောင် မဟုတ်ဘူး။ နှစ်ယောက်ဆို ပြောမနေနဲ့တော့။

ခီရက်ဇ်ဆာ၏ တုံ့ပြန်မှုက အလွန်လျင်မြန်သည်။ သူသည် ချက်ချင်းပင် တစ်ဖနီဆီသို့ ပျံသန်းကာ ဓားစာခံကို ဖမ်းရန် ရည်ရွယ်လိုက်သည်။

ချန်လွေ့နှင့် အန်ကွစ်တို့က သူ၏ကြိုးစားမှုကို နားလည်သွားပြီး သူကို ရပ်တန့်ရန် ပြင်ဆင်နေစဉ် တစ်ဖနီ၏ လက်သည် လေထဲရှိ တစ်နေရာကို ထိလိုက်သည်။ ထို “နေရာ”သည် ရုတ်တရက် တောက်ပလာပြီး ပတ်ဝန်းကျင်ရှိ ကျယ်ပြန့်၍ ရှေးကျသော စွမ်းအားသည် ဆယ်ဆ၊ အဆတစ်ရာ တိုးလာခဲ့သည်။ အစွမ်းထက်ပြီး သန့်စင်သော အသက်စွမ်းအားသည် လျင်မြန်စွာ ပျံ့နှံ့လာခဲ့သည်။

ဝေးကွာသောနေရာမှ ခီရက်ဇ်ဆာ၊ ချန်လွေ့၊ အန်ကွစ် သို့မဟုတ် လက်စလီတို့ မည်သူမဆို ပြင်းထန်သော ငလျင်ကြောင့် လွင့်စင်သွားခဲ့သည်။ ချန်လွေ့နှင့် ကျန်နှစ်ဦးမှာ မီတာရာပေါင်းများစွာ အကွာအဝေးတွင် သူတို့၏ ခန္ဓာကိုယ်ကို မနည်းထိန်းထားနိုင်ခဲ့ပြီး တစ်လှမ်းမျှပင် ရှေ့သို့ တိုးနိုင်ခြင်းမရှိပေ။ လက်စလီမှာ ၂ ကီလိုမီတာ အကွာသို့ နောက်ပြန်တွန်းပို့ခံခဲ့ရသည်။

ထိုအနေအထားသည် သင်္ကေတစွမ်းအား မြင့်တက် လာသည်နှင့် အမျှ နောက်ပြန်လှုပ်ရှားနေဆဲ ဖြစ်သည်။

ဥပဒေသစွမ်းအား၏ ခရမ်းရောင်မြူများအရ ၎င်းသည် နောက်ဆုံး သင်္ကေတဖြစ်ပြီး အစွမ်းအထက်ဆုံးတစ်ခု ဖြစ်လောက်သည်။

ထိုအချိန်တွင် နောက်ဘက်မှ အော်သံတစ်ခု ထွက်ပေါ်လာသည်။ ချန်လွေ့နှင့် အခြားသူများအားလုံး တစ်စုံတစ်ရာကို ခံစားမိပြီး ရုတ်တရက် လှည့်ကြည့်လိုက် သောအခါ သူတို့ရှေ့မှ မြင်ကွင်းကြောင့် ထိတ်လန့်သွား ကြသည်။

အဆုံးမဲ့သော ခြေသလုံးအိမ်တိုင်ဝိညာဉ်ပင်လယ်။

ခြေသလုံးအိမ်တိုင် ဝိညာဉ်များသည် သင်္ကေတမှ ထွက်ပေါ်လာသော အစွမ်းထက်သော အသက်စွမ်းအားဖြင့် ဆွဲဆောင်ခံရပုံရပြီး ၎င်းဆီသို့ အရူးအမူး ပြေးဝင်လာခဲ့သည်။

အနီးဆုံး လက်စလီမှာ ခြေသလုံးအိမ်တိုင်ဝိညာဉ်များဖြင့် ဝန်းရံခံထားရပြီဖြစ်သည်။ မျက်စိတစ်မှိတ်အတွင်း သူသည် ခြေရာလက်ရာမရှိ ပျောက်ကွယ်သွားခဲ့သည်။