အပျက်အစီးများကို စူးစမ်းရှာဖွေခြင်း၊ နတ်နဂါးနှင့် တွေ့ဆုံခြင်း၊ ကိုယ်ခန္ဓာ ပေါင်းစည်းမှု အဆင့်တွင် စစ်မှန်သော မသေမျိုး တစ်ပါး၏ အံ့ဩဖွယ် ပုံရိပ် ပေါ်ထွက်လာခြင်း!

"ဟွမ်ချွမ်ဆေးပြားက ဘာကြောင့် အလုပ်မလုပ်တာလဲ၊ သူ ဘာလို့ ရှင်လျက်နဲ့ သေသွားတာလဲ... အသက်ရှည်ဖို့ဆိုရင် သက်ရှိဝိညာဉ်တွေကို စားသုံးရမယ်..." ဟု သူ၏နှုတ်ခမ်းလှုပ်ရှားမှုကို ကြည့်ပြီး သူပြောသည်ကို သင် နားလည်လိုက်သည်။

[ဒင်၊ ဤသရုပ်ပြခြင်း ပြီးဆုံးပါပြီ။]

သရုပ်ပြခြင်း ပြီးဆုံးပြီးနောက် စုရှင်းသည် နက်နက်နဲနဲ တွေးတောရင်း မျက်မှောင်ကြုတ်နေသည်။ သူ တစ်စုံတစ်ခုကို စဉ်းစားနေပုံရသည်။

ဤသရုပ်ပြခြင်းသည် ရှေးဟောင်းသင်္ချိုင်း အပျက်အစီးများကြားမှ လျှို့ဝှက်ချက်ကြီး တစ်ခုကို တကယ်ပင် ဖော်ထုတ်ပေးခဲ့သည်။

"ဒီရှေးဟောင်း သင်္ချိုင်းပျက်ကြီးက ရတနာက တကယ်ကို အံ့မခန်းပဲ... ဝိညာဉ်ဆေးပင်တွေရှိတဲ့ ဧကအနည်းငယ်ရှိတဲ့ ဝိညာဉ်လယ်တွေ..."

"ပြီးတော့ ဝိညာဉ်သွေးကြော နဂါးငယ်! အကယ်၍သာ ရနိုင်မယ်ဆိုရင်... မသေမျိုးဖြစ်ပြီး နတ်ဘုရားဖြစ်ဖို့ မျှော်မှန်းချက်တွေ အကောင်အထည် ပေါ်လာနိုင်တယ်!"

စုရှင်းသည် စိတ်မလှုပ်ရှားဘဲ မနေနိုင်တော့ပေ။

ထို့နောက် သူ၏မျက်ခုံးများ ထပ်ပြီး ကျုံ့သွားသည်။ စုရှင်း၏ လက်ရှိခွန်အားနှင့်ဆိုလျှင်

ထို ရတနာကို ရဖို့ဆိုသည်မှာ တကယ်ကို မဖြစ်နိုင်ပေ။

အဘယ်ကြောင့်ဆိုသော် ထိုနေရာ၌ အိပ်ပျော်နေသည့် စစ်မှန်သော မသေမျိုး တစ်ပါး ရှိနေ၍ ဖြစ်သည်။

"အဲ့ဒီအပြာရောင် ဝတ်ထားတဲ့ ကျင့်ကြံသူ... သူက တကယ်ပဲ စစ်မှန်သော မသေမျိုးအဆင့် အားကောင်းသူလား"

စုရှင်း၏ စိတ်ထဲတွင် ဝမ်းနည်းစိတ် ပေါ်လာသည်။ ကိုယ်ခန္ဓာ ပေါင်းစည်းမှု အဆင့်ရှိသည့် ကျင့်ကြံသူများသည်ပင်လျှင် တိုးတက်မှု မလုပ်နိုင်ပါက နောက်ဆုံးတွင် သက်တမ်း ကုန်ဆုံးရပေမည်။

"ဒီတစ်ခါတော့ သေခြင်းမှာ လက်မလျှော့လိုသူ စွမ်းရည်ကနေ အရေးကြီးတဲ့ သတင်းအချက်အလက်ကို ရခဲ့တာပဲ..."

စုရှင်း တီးတိုး ရေရွတ်လိုက်သည်။

"ဒါဆို မသေမျိုး စစ်သည်တော်ခေတ် အကျဉ်းခန်းထဲမှာ ဝိညာဉ်စွမ်းအင် ခန်းခြောက်ရတဲ့ အကြောင်းရင်းက ကမ္ဘာကြီးရဲ့ ဝိညာဉ်သွေးကြော အားလုံးကို အဲ့ဒီ ဝိညာဉ်သွေးကြော နဂါးငယ်ထဲ စုစည်းလိုက်လို့ပေါ့... တိုးတက်မှုအတွက် ကြိုးစားရင်းလေ၊ ဟုတ်တယ် မဟုတ်လား?"

"ဒါပေမယ့်... တာအိုရှင် ဝမ်မူက မအောင်မြင်ခဲ့ပုံပဲ၊ သူက ဟွမ်ချွမ်ဆေးပြားကို သောက်ခဲ့ပေမယ့် ချို့ယွင်းချက်တွေရှိတော့ ရှင်လျက်နဲ့သေသလို ဖြစ်သွားပြီး သူရဲ့ အသက်ဓာတ်‌တွေလည်း အဆုံးမှာ ပျောက်ကွယ်သွားတယ်။ အာ့တော့ သတိရှိပြီး ဝိညာဉ်မရှိတဲ့ ရုပ်သေးရုပ် ဖြစ်သွားတာပေါ့..."

"ဒီလို ကြီးမားတဲ့ ဆုံးရှုံးမှုမျိုးနဲ့ဆိုရင် တာအိုကျင့်ကြံသူ ဝမ်မူ ရဲ့ တာအိုစိတ်ဓာတ် ပြိုလဲသွားနိုင်တယ်... အဆုံးကျတော့ မကောင်းဆိုးဝါး ကျင့်ကြံမှုဘက်ကို ရောက်သွားတာပဲ‌လေ၊ မဟုတ်ဘူးလား"

စုရှင်းသည် ဤသရုပ်ပြခြင်းမှ ရရှိသည့် အချက်အလက်များအပေါ် အခြေခံ၍ လွန်ခဲ့သည့် နှစ် သုံးထောင်ခန့်က မသေမျိုး စစ်သည်တော်ခေတ် အကျဉ်းခန်းတွင် ဖြစ်ခဲ့သည်များကို ခန့်မှန်းကြည့်လိုက်သည်။

ထို့ပြင် ခွေးကောင်ကျုံး၏ ဒိုင်ယာရီထဲတွင်လည်း နှစ်ပေါင်း တစ်ထောင့်နှစ်ရာခန့်က မသေမျိုး စစ်သည်တော်ခေတ်တွင် ဝိညာဉ်စွမ်းအင်များ အလျင်အမြန် ခမ်းခြောက်လာပြီး ကျင့်ကြံသူများပင် အသက်ရှင်ရန် မျှော်လင့်ချက်များ ဆုံးရှုံးနေကြသည်ဟု မှတ်တမ်းတင်ထားသည်။

ဖြစ်နိုင်သည်မှာ ထိုစဥ်က တာအိုကျင့်ကြံသူ ဝမ်မူသည် ကမ္ဘာကြီး၏ ဝိညာဉ်သွေးကြောများကို ယူသွားပြီးသား ဖြစ်နိုင်သည်။ ထို့ကြောင့် သဘာဝ၏ ဝိညာဉ်စွမ်းအင်များ လျော့နည်းလာပြီး ခွေးကောင်ကျုံးကိုလည်း နှစ်နှစ်ခြိုက်ခြိုက် အိပ်ပျော်သွားစေခဲ့ခြင်း ဖြစ်နိုင်သည်။

"ဒါဆို... ကမ္ဘာကြီးရဲ့ ဝိညာဉ်စွမ်းအင်တွေ ခမ်းခြောက်တာက တာအိုကျင့်ကြံသူ ဝမ်မူ ကြောင့်ပဲလား"

စုရှင်းက သူ့ဘာသာ တီးတိုးရေရွတ်ကာ ခေါင်းကို အနည်းငယ် ခါယမ်းလိုက်သည်။

လက်ရှိ အချက်အလက်များ အပေါ် အခြေခံပြီး ကောက်ချက်ချဖို့ဆိုသည်မှာ မဖြစ်နိုင်သေးပေ။

ဖြစ်နိုင်သည်မှာ တာအိုကျင့်ကြံသူ ဝမ်မူ ကြောင့်ပင် ဖြစ်နိုင်သည်…

သို့မဟုတ် သဘာဝ၏ ဝိညာဉ်စွမ်းအင်များ ကျဆင်းလာခြင်းကြောင့် တာအိုကျင့်ကြံသူ ဝမ်မူ က သူ၏ တိုးတက်မှုအပေါ် စိတ်ပျက်အားငယ်သွားပြီး ကမ္ဘာကြီး၏ ဝိညာဉ်သွေးကြောများကို သိမ်းယူကာ တိုးတက်မှုအတွက် ကြိုးစားရင်း အိပ်ပျော်သွားခြင်း ဖြစ်နိုင်သည်။

စုရှင်းတွင် တိကျသည့် ဖြစ်စဉ်ကို သိရန် နည်းလမ်းမရှိပေ။

"ကောင်းပြီ... အဲ့ဒီ ဝိညာဉ်သွေးကြော နဂါးငယ်က နတ်ဘုရားတွေတောင် အရမ်းလိုချင်ကြတဲ့ အရာပဲ၊ ဟုတ်တယ်ဟုတ်။"

စုရှင်း၏ မျက်လုံးထဲတွင် တောင့်တသည့် အကြည့်တစ်ချက် ပေါ်လာသည်။

သူ့တွင် လက်ရှိ၌ ဝိညာဉ်သွေးကြော နဂါးငယ်ကို လိုချင်နိုင်မည့် ခွန်အား မရှိသေးပေ။ သို့သော်လည်း၊ စုရှင်းသည် အချိန်တန်သည့်အခါ ဤဝိညာဉ်နဂါးကို သိမ်းပိုက်ရန် ကြိုးစားမည်ဟု ဆုံးဖြတ်ထားလိုက်သည်။

"ဘယ်လိုပဲဖြစ်ဖြစ် ငါက အခုထိ အားမကောင်းသေးဘူး!"

"ငါ့ရဲ့ လက်ရှိခွန်အားက လွတ်မြောက်ခြင်း ဖြိုခွင်းနယ်ပယ်နဲ့ မဝေးတော့ပေမယ့်... ကာကွယ်ဖို့ကတော့ လုံလောက်ပါတယ်၊ သန့်စင်တဲ့ တိုက်ခိုက်ရေး စွမ်းအားကတော့ လိုအပ်နေတုန်းပဲ"

စုရှင်းသည် ခေါင်းကို အနည်းငယ် ခါယမ်းလိုက်သည်။ ထို့နောက် သူ၏ မျက်လုံးများသည် သရုပ်ပြခြင်း ဖန်သားပြင်ပေါ်ရှိ ဆုလာဘ်များဆီသို့ လှည့်သွားသည်။

[သစ်-မီး နှစ်မျိုးစပ် ဝိညာဉ်ရင်းမြစ်]: ခရမ်းရောင် စွမ်းရည်၊ စွမ်းအင်မှတ် ၁ သန်း။

[ဆယ်နှစ်တာ ဆေးပညာ အတွေ့အကြုံ]: ဆေးပညာဆိုင်ရာ ထိုးထွင်းသိမြင်မှုများ၊ စွမ်းအင်မှတ် ၅ သိန်း။

[မူလအင်အား ကျင့်ကြံမှုဆိုင်ရာ ထိုးထွင်းသိမြင်မှု (မဟာယာနအဆင့်)]: မူလအင်အားကို ကျွမ်းကျင်ပိုင်နိုင်မှု တတိယအဆင့် မဟာယာန သို့ တိုးတက်ခြင်း၊ ခန္ဓာကိုယ်အတွင်း ဝိညာဉ်အင်အား မျိုးစေ့ကို ကျင့်ကြံခြင်း၊ မူလအင်အားကို မရပ်မနား ဆက်လက် ဖြစ်ပေါ်စေခြင်း၊ ပြီးပြည့်စုံမှုနှင့် မဝေးတော့ခြင်း၊ စွမ်းအင်မှတ် သန်း ၅၀။

[အဆင့်နိမ့် ဝိညာဉ်အရည် ၁ သန်း]: စွမ်းအင်မှတ် သန်း ၁၀၀။

[ကာကွယ်ရေး ဂန်ချီ (မဟာယာနအဆင့်)]: မူလအင်အား နတ်စွမ်းရည်၊ မဟာယာနအဆင့် ကာကွယ်ရေး ဂန်ချီ၊ ဂန်ချီ၏ သုံးပေပတ်လည်အတွင်း မည်သည့်အရာမျှ မဝင်ရောက်နိုင်ပါ၊ ဂန်ချီ မပျက်စီးပါက လူ့အတွက် အန္တရာယ်ကင်းသည်။ စွမ်းအင်မှတ် သန်း ၅၀။

[ဆန္ဒပြည့်ဝ ပုံဖော်နည်း (အစပြုသူ အဆင့်)]: ဆန္ဒပြည့်ဝ ပုံဖော်ခြင်း နည်းလမ်းဆိုင်ရာ ထိုးထွင်းသိမြင်မှုများ ပါဝင်သည်။ ဝိညာဉ်အာရုံခံစားမှု အကွာအဝေးကို ပေ ၉၉၀၀ (ပဉ္စမအာရုံခံစားမှုနယ်ပယ်) အထိ တိုးမြှင့်ပေးသည်၊ ဝိညာဉ်အာရုံခံစားမှုနယ်ပယ်၏ အနုစိတ်မှုများထဲသို့ ဝင်ရောက်ရန် မဝေးတော့ချေ၊ စွမ်းအင်မှတ် ၂၉ သန်း။

သူ့ရှေ့ရှိ သရုပ်ပြခြင်း ရွေးချယ်စရာများကို ကြည့်ရင်း စုရှင်း စဉ်းစားခန်းဝင်သွားသည်။

ဤသရုပ်ပြခြင်းမှ ရသည့်ဆုလာဘ်များသည် စုရှင်း မကြာသေးမီက ကြုံတွေ့ခဲ့ရသမျှထဲတွင် အများဆုံးဟု ဆိုရပေမည်။

မူလအင်အား နတ်စွမ်းရည်များပင် ဖြစ်စေ၊ မူလအင်အားပင် ဖြစ်စေ၊ သို့မဟုတ် ဝိညာဉ်အာရုံခံစားမှုပင် ဖြစ်စေ...အားလုံးသည် ထိပ်တန်းဆုလာဘ်များ ဖြစ်ကြသည်။

"ကုန်ကျစရိတ်-ထိရောက်မှုအရဆိုရင် ဒီမဟာယာနအဆင့် မူလအင်အား ထိုးထွင်းသိမြင်မှုက မဖြစ်မနေ ရွေးချယ်ရမယ့် အရာပဲ!"

"ဘာလို့လဲဆိုတော့ ဒီသရုပ်ပြခြင်း အမှတ်မထင် ဉာဏ်ပွင့်သွားတာကို အစပျိုးပေးခဲ့တာလေ၊ အာ့တော့ မူလအင်အား ကျွမ်းကျင်မှုကို တတိယအဆင့် ပြီးစီးဖို့က သိပ်မလိုတော့ဘူး..."

ဤသရုပ်ပြခြင်းတွင် သုံးရက်ကြာ ဉာဏ်ပွင့်ခြင်းသည် စုရှင်းအတွက် အပိုဆယ်နှစ်စာ ကျင့်ကြံခွင့်ရလိုက်လိုပင်။

နောက်တစ်ကြိမ် သရုပ်ပြခြင်းတွင် သူသည် မူလအင်အားကို တတိယအဆင့်ထန ပြီးဆုံးအောင် အပြည့်အဝ ကျွမ်းကျင်နိုင်လိမ့်မည်ဟု စုရှင်းက ယုံကြည်သည်။

"ကျန်တဲ့ရွေးချယ်စရာတွေက... ဝိညာဉ်အာရုံခံစားမှု၊ မူလအင်အား နတ်စွမ်းရည်၊ ပြီးတော့ ခရမ်း‌ရောင် စွမ်းရည်၊ အကုန်လုံးကို လိုချင်တယ်လေကွာ!"

စုရှင်းသည် ခဏတာ တုံ့ဆိုင်းနေပြီး နက်နက်နဲနဲ စဉ်းစားလိုက်သည်။ ထို့နောက် ဝိညာဉ်အမြစ် စွမ်းရည်ကိုသာ ရွေးချယ်ရန် ဆုံးဖြတ်လိုက်သည်။

အဘယ်ကြောင့်ဆိုသော် ယင်းမှာ ဒဏ္ဍာရီလာ ကောင်းကင် ဝိညာဉ်အမြစ် ဖြစ်နေ၍ ဖြစ်သည်! စုရှင်းက မရွေးချယ်ဘဲ နေလို့မရပေ!

ဒီတစ်ခါ မရွေးချယ်ဘူးဆိုလျှင် နောက်တစ်ကြိမ် သရုပ်ပြခြင်းတွင် ဆုလာဘ်များမှ ရယူရန် အတွက် စွမ်းအင်များ ထပ်သုံးရဦးမည်။ ထိုအချိန်ကျလျှင် သန်းပေါင်းများစွာ သို့မဟုတ် သန်းဆယ်ဂဏန်းလောက် ပိုကုန်ကျမည်ဟု ဆိုလိုခြင်း ဖြစ်သည်။

ဒါ့အပြင် စောစီးစွာ ရရှိလေလေ၊ စောစီးစွာ ခံစားခွင့်ရလေလေပင်။ စုရှင်း လွတ်မြောက်ခြင်း ဖြိုခွင်းနယ်ပယ်သို့ တိုးတက်သည့်အခါ၌ အကျိုးကျေးဇူးများ ရနိုင်သည်ကို မည်သူ သိနိုင်မည်နည်း။

ကာကွယ်ရေး ဂန်ချီ အတွက်မူ စုရှင်းတွင် ယခုအခါ မဟာယာနအဆင့် မူလအင်အား ကျွမ်းကျင်မှု ရှိနေပြီး သူ၏ ခန္ဓာကိုယ်ထဲတွင် မူလအင်အား မျိုးစေ့လည်း ရှိနေသည့် အတွက် မူလအင်အား နတ်စွမ်းရည်များကို ပိုကြာကြာ အသုံးပြုနိုင်မည် ဖြစ်သည်။

ထို့ကြောင့် နောက်တစ်ကြိမ် ကာကွယ်ရေး ဂန်ချီ ကို ကျင့်ကြံသည့်အခါ ပိုမိုလွယ်ကူသင့်သည်။ ထို့ပြင် အစပြုကတည်းက မဟာယာနအဆင့်ကိုပင် ရောက်နိုင်ပါမည်။ ကံကောင်းစွာ ဉာဏ်ပွင့်ခဲ့ပါက ပြီးပြည့်စုံမှုအထိပါ တိုက်ရိုက် ရောက်နိုင်မည်!

ဝိညာဉ်အာရုံခံစားမှု အတွက်ကတော့... ရိုးရိုးသားသားပြောရလျှင် စုရှင်းသည် အနည်းငယ် နှမြောတသ ဖြစ်မိသည်။

နောက်ထပ် အနည်းငယ် ကြိုးစားလိုက်ပါက သူ၏ ဝိညာဉ်အာရုံခံစားမှုသည် ပေတစ်သောင်းကို ကျော်ဖြတ်နိုင်တော့မည် ဖြစ်သည်။

ဖြစ်နိုင်သည်မှာ ထိုအချိန်ကျလျှင် အပြောင်းအလဲအသစ်များ ပေါ်လာပြီး ဝိညာဉ်အာရုံခံစားမှု၏ နောက်ထပ် နယ်ပယ်ကို ဝင်ရောက်နိုင်ပေမည်။

"သိမ်မွေ့တဲ့ နယ်ပယ်ရဲ့ ဝိညာဉ်အာရုံခံစားမှု... တကယ်ကို မျှော်လင့်စရာပဲ..."

စုရှင်းက ခေါင်းကို အနည်းငယ် ခါယမ်းကာ တိတ်တိတ်လေး ပြောလိုက်သည်-

"ငါ တတိယအဆင့် မဟာယာန မူလအင်အား ကျွမ်းကျင်မှု နဲ့ သစ်-မီး နှစ်မျိုးစပ် ကောင်းကင် ဝိညာဉ်အမြစ် စွမ်းရည်ကို ရွေးချယ်မယ်!"

သူ၏စကားဆုံးသည်နှင့် သရုပ်ပြစက်၏ သတိပေးသံသည် စုရှင်း၏ နားထဲတွင် မြည်ဟည်းလာသည်။

[သင်သည် မူလအင်အား ကျင့်ကြံခြင်း အောင်မြင်မှုများ (မဟာယာန သုည-အကွာအဝေး ထုတ်လွှတ်မှု) ကို အောင်မြင်စွာ ထုတ်ယူခဲ့ပြီး စွမ်းအင်မှတ် သန်း ၅၀ သုံးစွဲခဲ့သည်၊ ကျန်ရှိသော စွမ်းအင်မှတ် ၅၃၆.၀၅ သန်း။]

[သင်သည် ခရမ်းရောင် စွမ်းရည် သစ်-မီး နှစ်မျိုးစပ် ကောင်းကင် ဝိညာဉ်အမြစ် ကို အောင်မြင်စွာ ထုတ်ယူခဲ့ပြီး စွမ်းအင်မှတ် ၁ သန်း သုံးစွဲခဲ့သည်၊ ကျန်ရှိသော စွမ်းအင်မှတ် ၅၃၅.၀၅ သန်း။]

…