စုရှင်း၏ ပန်းတိုင်ငယ်၊ လွတ်မြောက်ခြင်း ဖြိုခွင်းနယ်ပယ်အား ပစ်မှတ်ထားခြင်း!

မြို့ရိုးထိပ်သို့ တက်လာသည့် နတ်ဆိုးဧကရာဇ် တစ်ပါးနှင့် သင် တွေ့ဆုံခဲ့သည်။

[မဆိုင်းမတွပင် မူလစွမ်းအားဖြင့် သင်၏ မင်ရေခဲဓားကို ဝန်းရံထားပြီး သင်သည် ထိုးခုတ်လိုက်သည်။]

[ဤထိုးနှက်ချက်သည် နတ်ဆိုးဧကရာဇ်ကို နှစ်ပိုင်း ဖြစ်သွားစေသည်။ သင်သည် နတ်ဆိုးဧကရာဇ်၏ အသားဓာတ်ကို စုဆောင်းပြီး ပတ်ဝန်းကျင်ရှိ စစ်သားများ၏ ဒဏ်ရာများကို စတင် စစ်ဆေးသည်။]

[အံ့အားသင့်စရာမှာ ချောင်းမြောင်း တိုက်ခိုက်ခံခဲ့ရသော စစ်သားများထဲတွင် သင်၏ သူငယ်ချင်းကောင်း ယုယန် ပါဝင်နေသည်။]

[ဆယ်စုနှစ်ကျော် ကြာပြီးနောက် ယုယန်သည် နတ်ဆိုး နှိမ်နှင်းရေး စခန်းတွင် အသက်ရှင်ရုံ သာမက ကောင်းကင်ဘုံ ဘုရင်အဆင့်သို့ပင် ရောက်ရှိခဲ့သည်။]

[ဤအရာကို မြင်သည်နှင့် စုရှင်း၏ နှုတ်ခမ်းထောင့်စွန်းသည် အနည်းငယ် ကွေးညွှတ်သွားသည်။]

"ဖက်တီးယုက အဲ့လောက်လွယ်လွယ်နဲ့ သေမယ့်လူမျိုးမှ မဟုတ်တာ!"

"သူက ဆယ်နှစ်ကြာပြီးတဲ့အထိ နတ်ဆိုး နှိမ်နှင်းရေး စခန်းမှာ အသက်ရှင်နေသေးတယ်၊ ခုမှဘဲ စိတ်အေးသွားသလိုပဲ..."

စုရှင်းက သက်ပြင်းချပြီး ပြန်လည် သုံးသပ်လိုက်သည်။

သူတို့ ဘွဲ့ရပြီးသည်မှာ တစ်လပင် ကျော်ခဲ့ပြီ။

ယုယန်သည်လည်း အောင်မြင်စွာဖြင့် နတ်ဆိုး နှိမ်နှင်းရေး စခန်းရှိ စစ်တပ်များတွင် ပါဝင်ခဲ့ပြီး ရှားနိုင်ငံ စစ်တပ်အတွက် တိုက်ပွဲဝင်ခဲ့သည်။

ဤအချိန်အတွင်း စုရှင်းသည် ယုယန်နှင့် တစ်ခါတစ်ရံ အဆက်အသွယ် ပြုလုပ်ခဲ့သည်။ စစ်မြေပြင်၏ စမ်းသပ်မှုများ အပြီးတွင် စုရှင်းက ယုယန်သည် ပိုမို တည်ငြိမ်လာသည်ဟု ရှင်းရှင်းလင်းလင်း ခံစားမိသည်။

ယခင်က စုရှင်းသည်လည်း ကျင်းချုံးရွှယ် မှတစ်ဆင့် ကျင်း ကုန်သည်အသင်း၏ အမည်ဖြင့် နတ်ဆိုး နှိမ်နှင်း‌ရေး စခန်းရှိ စစ်သားများကို ကူညီထောက်ပံ့ခဲ့သည်။

ထိုအထဲတွင် သူသည် ယုယန်အား ခရမ်းရောင်အဆင့် ပစ္စည်းအချို့ကို ပေးခဲ့သည်။

ယုယန်သည် သူ၏ သူငယ်ချင်း အနည်းငယ်ထဲမှ တစ်ဦးဖြစ်သည့် အလျောက် စုရှင်းသည် သူ အခက်အခဲ တွေ့မည်ကို မမြင်လိုပေ။

ထို့ကြောင့် သူတတ်နိုင်သလောက် ကူညီခဲ့သည်။ ဤခရမ်းရောင် ပစ္စည်းများသည် ယုယန်၏ အသက်ရှင်နိုင်စွမ်းကို သိသိသာသာ တိုးမြှင့်ပေးခဲ့သည်။

"ပြောရရင်... ဒီအချိန်ဆို နောက်နှစ်ကျရင် ငါ့ညီမလေးလည်း ဘွဲ့ရတော့မှာပေါ့နော်၊ ဟုတ်လား?"

စုရှင်းက သက်ပြင်းချလိုက်သည်။ လွန်ခဲ့သည့် တစ်နှစ်တာ ကာလအတွင်း သရုပ်ပြခြင်းများနှင့် သူ့စွမ်းအားကို တိုးမြှင့်ခြင်းများဖြင့် အလုပ်များနေခဲ့သည်။ အားလပ်ရက်များ၌ပင် အိမ်သို့ မပြန်ခဲ့ပေ။

စုရှင်း၏ ညီမလေးသည်လည်း တောင်ပိုင်းရှိ ထိပ်တန်းကျောင်း တစ်ခုသို့ တက်ရောက်ခဲ့သည်။ သူ၏ ရရှိထားသော စည်းစိမ်ဥစ္စာ အသစ်များဖြင့် စုရှင်းသည် တစ်ခါတစ်ရံ သူမထံ ငွေအချို့ လွှဲပို့ပေးခဲ့သည်။

ကျင်း ကုန်သည်အသင်း၏ လွှမ်းမိုးမှုသည် တောင်ပိုင်းတွင် သေးငယ်ခြင်း မရှိပေ။

ရလဒ်အနေဖြင့် စုရှင်းသည် ကျင်း ကုန်သည်အသင်းအား သူ့ညီမလေးကို ခန့်အပ်ရန်ပင် တောင်းဆိုခဲ့ပြီး တစ်ခါတစ်ရံ ရက်ရောသော ဆုလာဘ်များဖြင့် ဘေးကင်းသော မစ်ရှင်အချို့ကို လုပ်ဆောင်စေခဲ့သည်။

ဤအရာက သူ့ညီမလေး၏ စွမ်းအားကို သိသိသာသာပင် မြန်ဆန်စွာ ကြီးထွားစေခဲ့သည်။

ဤအတိတ်ဖြစ်ရပ်များ အားလုံးကို ပြန်လည် သတိရမိသောအခါ စုရှင်း၏ မျက်လုံးများတွင် ခံစားချက်ပေါင်းစုံ ရောနှောလာသည်။

သူသည်လည်း နေ့တိုင်း မိသားစုနှင့် သူငယ်ချင်းများနှင့် အချိန်ဖြုန်းချင်ခဲ့သည်။

သို့သော် ကမ္ဘာပျက်ခြင်းသည် စုရှင်း၏ စိတ်ကို တောင်ကဲ့သို့ ဖိစီးစေခဲ့သည်။

စုရှင်းက သူသာ မသေမျိုးအဖြစ်သို့ ရောက်ရှိအောင် ကျင့်ကြံလျှင် သူ၏ စွမ်းအားသည် လုံလောက်မည်ဟု တွေးတောခဲ့သည်။

ထိုအခါ သူ၏ မိဘများနှင့် မိသားစုကို နှစ်တစ်ရာ၊ သို့မဟုတ် နှစ်တစ်ထောင် သို့မဟုတ် နှစ်တစ်သောင်းပင် အတူနေရန် ခက်ခဲပါ့မလား?

ဤအတွေးဖြင့် လမ်းကြောင်းကို လိုက်စားရန် စုရှင်း၏ စိတ်ပိုင်းဖြတ်မှုသည် ပိုမိုခိုင်မာလာပြီး သူ၏ အကြည့်သည် သရုပ်ပြခြင်း ဖန်သားပြင်ဆီသို့ လှည့်သွားသည်။

[ယုယန်ကို ကယ်တင်ပြီးနောက် သင်သည် စစ်မြေပြင်ရှိ အခြေအနေကို စတင် လေ့လာခဲ့သည်။]

[မျှော်လင့်ထားသည့်အတိုင်း နှစ်များစွာအတွင်း သင့်ကြောင့် လူသားမျိုးနွယ်တွင် ပိုမိုအားကောင်းသော ကျင့်ကြံသူများစွာ ရှိလာသော်လည်း တိုင်းတစ်ပါးမျိုးနွယ်၏ တန်ခိုးနှင့် နှိုင်းယှဉ်ပါက ၎င်းတို့သည် အလွန် နောက်ကျ ကျန်နေသေးသည်။]

[အများအားဖြင့် လူသားတို့သည် နတ်ဆိုးသားရဲများ၏ ကျူးကျော်မှုများကို ခုခံရန် အစွမ်းထက်သော နတ်ဆိုး နှိမ်နှင်းရေး စခန်းကိုသာ အားကိုးနိုင်ခဲ့သည်။]

[ဤအရာအားလုံးကို မျက်မြင်တွေ့ရှိပြီး သင်သည် ပိုမိုကြိုးစားစွာ ကျင့်ကြံခဲ့သည်။]

[တစ်ဆယ့်တစ်နှစ်မြောက်တွင် သင်သည် မူလအင်အားကို ဆက်လက် ကျင့်ကြံခဲ့သည်။ သင့်တွင် မူလအင်အား မျိုးစေ့များ ရှိနေသော်လည်း နေ့စဉ် မူလအင်အားကို ကျင့်ကြံနိုင်သည့် အချိန်မှာ ငါးနာရီသာ ရှိသည်။]

[ကျန်အချိန်များကို နတ်ဆိုး နှိမ်နှင်းရေး စခန်းတွင် ရန်သူများကို တိုက်ခိုက်ခြင်း၊ လူသားမျိုးနွယ်၏ ဆုံးရှုံးမှုများကို လျှော့ချခြင်းတို့တွင် အသုံးပြုခဲ့သည်။]

[ယင်းမှာ ပုံရိပ်ယောင် ဖန်တီးမှုသပ်သပ်သာ ဖြစ်သည်ဟု သိသော်လည်း သင်၏ သူငယ်ချင်းများနှင့် လူသားများ သင့်ရှေ့တွင် သေဆုံးသည်ကို သင် မကြည့်နိုင်ခဲ့ပါ။]

[သင်သည် နတ်ဆိုးဧကရာဇ်များစွာကို သတ်ခဲ့သော်လည်း ယခုအချိန်တွင် နတ်ဆိုးဧကရာဇ်များ၏ အသားဓာတ်များသည် သင့်အတွက် အသုံးမဝင်တော့ပါ။]

[ထို့ကြောင့် သင်သည် နတ်ဆိုးဧကရာဇ်၏ အသားဓာတ်က လူသားပညာရှင်များ၏ စွမ်းအားကို တိုးမြှင့်ပေးနိုင်ခြင်း ရှိမရှိကို စတင် လေ့လာခဲ့သည်။]

[သင်၏ လေ့လာမှုအရ သာမန် လူသားပညာရှင်များသည် နတ်ဆိုးဧကရာဇ်၏ အသားဓာတ်ကို စားသုံးသောအခါ ၎င်းတို့သည် အတွင်းရှိ စွမ်းအင်ကို ကောင်းစွာ မချေဖျက်နိုင်ကြပေ။ ထို့ကြောင့် ၎င်းတို့၏ စွမ်းအားသည် အနည်းငယ်သာ တိုးလာသည်။]

[ထို့ကြောင့် ဤနည်းဖြင့် လူသားမျိုးနွယ်၏ စွမ်းအားကို တိုးမြှင့်နိုင်ရန် မျှော်လင့်လျက် သင်သည် အသားဓာတ်ကို ဆေးဖော်စပ်ခြင်းအဖြစ် ပြောင်းလဲရန် ကြိုးစားခဲ့သည်။]

[တစ်ဆယ့်နှစ်နှစ်မြောက်တွင် သင်သည် သင်၏ အားလပ်ချိန်များတွင် အသားဓာတ်၏ ဆေးဖက်ဝင် ဂုဏ်သတ္တိများကို လေ့လာခဲ့ပြီး သင်၏ နေ့စဉ်ကျင့်ကြံမှုကို ထိန်းသိမ်းထားသည်။]

[လီမီး နည်းပညာ အရ အဆင့်နိမ့်သာရှိသော ပြန်လည် မွေးဖွားခြင်းဆေး ဟုခေါ်သည့် ဆေးတစ်မျိုး ရှိသည်။]

[၎င်း၏ အကျိုးသက်ရောက်မှုသည် ချီသန့်စင်ခြင်း ကျင့်ကြံသူများ၏ မွေးရာပါ ချို့ယွင်းချက်များကို လျှော့ချပေးနိုင်သည်။ ကိုယ်ခန္ဓာ အားနည်းသူများပင် အချို့ကို စားသုံးပြီးနောက် ၎င်းတို့၏ ခန္ဓာကိုယ်ကို များစွာ တိုးတက်စေနိုင်ပြီး ခန္ဓာသန့်စင်ခြင်း ကျင့်ကြံသူများ၏ အစောပိုင်း အဆင့်များနှင့် နှိုင်းယှဉ်နိုင်သည်။]

[ထို့ပြင် အဓိကပါဝင်ပစ္စည်းမှာ အသက်ဓာတ်၏ အနှစ်သာရများ ပါဝင်သော အဖိုးတန် ဝိညာဉ် အိမ်မွေးတိရစ္ဆာန် အချို့၏ အသားဖြစ်သည်။]

[သင့်၏ အကြံအစည်အရ အဓိက ပါဝင်ပစ္စည်းကို အနည်းငယ် ပြောင်းလဲပါက နတ်ဆိုးသားရဲ အသားဓာတ်၏ အကျိုးသက်ရောက်မှုသည် ပိုမိုကောင်းမွန်နိုင်မည် ဖြစ်သည်။]

[ထို့ကြောင့် ဆေးအသစ်များ ဖော်စပ်ရန် ကြိုးစားရင်း သင်သည် သင်၏ ကျင့်ကြံမှုကို ဆက်လက် လုပ်ဆောင်ခဲ့သည်။]

[တစ်ဆယ့်နှစ်နှစ်မြောက်တွင် သင်သည် မဟာယာန အဆင့်သို့ နီးကပ်လာသော ကာကွယ်ရေး ဂန်ချီ ကျင့်ကြံမှုတွင် အနည်းငယ် တိုးတက်မှု ရရှိခဲ့သည်။]

[ထိုနှစ်တွင်ပင် သင်၏ ပြန်လည် မွေးဖွားခြင်းဆေးနှင့် ပတ်သက်သည့် သုတေသနသည်လည်း ပိုမိုတိုးတက်လာခဲ့သည်။ ပထမဦးစွာ သင်သည် နတ်ဆိုးဘုရင် အသားဓာတ်ကို အဓိက ပါဝင်ပစ္စည်းအဖြစ် အသုံးပြုခဲ့သည်။ အကျိုးသက်ရောက်မှုသည် ထူးခြားသော်လည်း စွမ်းအားသည် အလွန်ရိုင်းစိုင်းရာ သိသာထင်ရှားသော ဘေးထွက်ဆိုးကျိုးများ ရှိခဲ့သည်။]

[သင်သည် စမ်းသပ်မှုအတွက် လူသားများကို မသုံးခဲ့ဘဲ ပုံရိပ်ယောင် ဖန်တီးမှုများမှ နတ်ဆိုးအချို့ကိုသာ ဖမ်းယူခဲ့သည်။]

[ဆေးကို စားသုံးပြီးနောက် နတ်ဆိုးအချို့ အားကောင်းလာသည်ကို တွေ့ရှိရသော်လည်း အချို့မှာ ပွင့်ထွက်သေဆုံးခဲ့သည်။]

[ရလဒ်ကို မကျေနပ်သောကြောင့် နေ့စဉ် လေ့ကျင့်မှုမှ အားလပ်ချိန်များတွင် ဆေး၏ ဖော်မြူလာကို တိုးတက်အောင် ကြိုးစားခဲ့သည်။]

[တစ်ဆယ့်သုံးနှစ်မြောက်တွင် သင့် ကာကွယ်ရေး ဂန်ချီ၏ နတ်စွမ်းအင်သည် မဟာယာနအဆင့်နှင့် ပိုမိုနီးကပ်လာခဲ့သည်။]

[တစ်ချိန်တည်းမှာပင် ပြန်လည် ပြင်ဆင်မှုများစွာ ပြုလုပ်ပြီးနောက် ပြန်လည် မွေးဖွားခြင်းဆေး၏ ဘေးထွက်ဆိုးကျိုးများနှင့် မတည်ငြိမ်မှုများကို များစွာ လျှော့ချနိုင်ခဲ့သည်။ သို့သော်လည်း ပညာရှင်များအတွက် အသုံးပြုရန် လုံခြုံမှုမရှိသေးပါ။]

[နှစ်နှစ်အတွင်း ခက်ခဲကြမ်းတမ်းသော ကျင့်ကြံမှုနှင့် ဆေးဖော်စပ်ခြင်း၏ မရေမတွက်နိုင်အောင် ပြန်လည် ပြင်ဆင်မှုများကြားတွင် အချိန်သည် တဖြည်းဖြည်း ကုန်ဆုံးသွားသည်။]

[တစ်ဆယ့်ငါးနှစ်မြောက်တွင် နေသာသော ငြိမ်းချမ်းသည့် နေ့လည်ခင်းတစ်ခု၌ သင်၏ နှစ်ပေါင်းများစွာ ကြိုးစားအားထုတ်မှုသည် အကျိုးခံစားလာရသည်။ သင်၏ နတ်စွမ်းအင် ကာကွယ်ရေး ဂန်ချီသည် နောက်ဆုံးတွင် မဟာယာန အဆင့်သို့ ရောက်ရှိခဲ့သည်!]

[တစ်ပြိုင်နက်တည်းပင် သင်၏ မူလအင်အားကို ကျွမ်းကျင်မှုသည် ပြီးပြည့်စုံမှုသို့ ပိုမိုနီးကပ်လာပြီး တတိယအဆင့် ပြီးဆုံးရန်ပင် ချဉ်းကပ်လာခဲ့သည်။]

[ထိုနှစ်တွင်ပင် သင်သည် နောက်ဆုံးတွင် ပြန်လည် မွေးဖွားခြင်းဆေးကို ဖော်စပ်နိုင်ခဲ့သည် - ၎င်း၏ စွမ်းအားသည် အလွန်အားကောင်းပြီး အလယ်အလတ်အဆင့် ဆေးနှင့်ပင် နှိုင်းယှဉ်နိုင်သည်!]

…