ဆွေမျိုးများ

ဒူဒူနှင့် ကျောက်ဟုန်လင်းတို့သည် လင်းယန်၏ စကားကို ပြန်မချေပနိုင်ခဲ့ကြပေ။ နောက်ဆုံးတော့ သူတို့ မည်သို့ပင် ခွဲခြမ်းစိတ်ဖြာကြည့်ကြည့် ပေရှုနန်က လင်းယန်ကို ကြိုက်သွားစရာ အကြောင်းကို မရှိခဲ့ပေ။

ဖျော်ဖြေရေးလောကတွင် သူတို့၏ အဆင့်အတန်းကို နှိုင်းယှဉ်ရမည်ဆိုပါက ပေရှုနန်က ပွဲဦးထွက်ပြီးသည်နှင့် ချက်ချင်းဆိုသလို A-list အဆင့်သို့ တက်လှမ်းနိုင်ခဲ့သည်။ သူ၏ အရည်အချင်းနှင့် သရုပ်ဆောင်စွမ်းရည်များက အသိအမှတ်ပြုခံရပြီး ဖျော်ဖြေရေးလောက၏ ထိပ်တန်းနာမည်ကြီးဘွဲ့နှင့် လုံးဝကို ထိုက်တန်သူတစ်ဦး ဖြစ်သည်။ ထို့အပြင် သူက Summit Entertainment ၏ ရှယ်ယာရှင်များထဲမှ တစ်ဦးလည်း ဖြစ်သည်။

သူတို့၏ မိသားစုနောက်ခံနှင့် ပတ်သက်လာပါက ကွာခြားချက်မှာ ပို၍ သိသာထင်ရှားသည်။ သူက မြို့တော်တွင် သြဇာအရှိဆုံးနှင့် ဂုဏ်သိက္ခာအရှိဆုံး သူဌေးမျိုးနွယ်စု၏ ဒုတိယသားငယ် ဖြစ်သည်။ သူ့မိခင်၏ နိုင်ငံခြားမှ မိသားစုကလည်း အလားတူပင် အင်မတန် အင်အားကြီးမားသည်။ သူ၏အစ်ကို ပေယွီချန်ကမူ စီးပွားရေးလောကတွင် ဒဏ္ဍာရီဆန်သည့် ပုဂ္ဂိုလ်တစ်ဦးဖြစ်ပြီး နိုင်ငံတကာကုမ္ပဏီကြီး JM ကော်ပိုရေးရှင်း၏ ဥက္ကဋ္ဌ ဖြစ်သည်။

စီးပွားရေးလောကတွင် ထူးကဲသည့်အောင်မြင်မှုများနှင့် ဒဏ္ဍာရီလာ ပုဂ္ဂိုလ်တစ်ဦးဖြစ်သည့် ပေယွီချန်အကြောင်း ပြောရမည်ဆိုပါက ဖျော်ဖြေရေးလောကတွင် သူဖြစ်စေခဲ့သည့် လှုပ်လှုပ်ရှားရှားဖြစ်မှုမှာ ဘယ်တုန်းကမှ မကြုံဖူးသည့် အဖြစ်အပျက်ပင်။ ပေယွီချန်က ဖျော်ဖြေရေးလောက၏ တစ်စိတ်တစ်ပိုင်း မဟုတ်သော်လည်း သူ၏နာမည်ကျော်ကြားမှုက အခြားမည်သည့်မင်းသား၏ နာမည်ကျော်ကြားမှုနှင့်မျှ မယှဉ်နိုင်ခဲ့ပေ။

ဖျော်ဖြေရေးလောကတွင် အမျိုးသားအိုင်ဒေါအသစ်များ အကြိမ်ကြိမ် အစားထိုးခံနေရသော်လည်း ပေယွီချန်၏ ထိပ်ဆုံးက နေရာကမူ တောင်ကြီးတစ်လုံးကဲ့သို့ပင် အမြဲတည်မြဲနေခဲ့သည်။ တစ်ခါတုန်းက သတင်းထောက်များက ပေရှုနန်နောက်ကို လိုက်ရင်း ပေယွီချန်၏ ဓာတ်ပုံကို မတော်တဆ ရိုက်မိခဲ့သည်။ ၎င်းက ပေယွီချန်၏ ပုံရိပ်ကို လူအများမြင်အောင် ပထမဆုံး ဖော်ထုတ်ခဲ့သည့် အကြိမ်ပင်။

ဓာတ်ပုံထဲတွင်မူ သူက ငွေရောင်အားကစားကားပေါ်မှ မှီပြီး မျက်မှန်တပ်ထားခြင်း ဖြစ်သည်။ သူ၏မျက်နှာတစ်ဝက်သာ မြင်ရသော်လည်း အမျိုးသားနာမည်ကြီးများအားလုံးကို သူတို့၏ ပရိသတ်များက တစ်ညတည်း စွန့်ပစ်သွားခဲ့ကြသည်။ ပေယွီချန်ကို ရူးရူးမိုက်မိုက်စွဲလမ်းခဲ့ကြသည့် အမျိုးသမီးပရိသတ်အများအပြားက သူ၏အကြောင်း သတင်းအချက်အလက်များ ရှာဖွေရန် ကြိုးစားခဲ့ကြသည်။ JM ကော်ပိုရေးရှင်း၏ Weibo အကောင့်ကို သန်းပေါင်းများစွာသော Follower များ ဝိုင်းအုံခဲ့ကြပြီး ဘဏ္ဍာရေးသတင်းလိုင်း၏ ကြည့်ရှုသူအရေအတွက်လည်း တိုးလာခဲ့သည်။

ရလဒ်အနေဖြင့် ပေရှုနန်က သူ၏ပရိသတ်များရှေ့တွင် ရယ်စရာလုပ်ပြီး မကြာခဏ ပြောလေ့ရှိသည်မှာ သူတို့က သူ၏ ပရိသတ်များ ဖြစ်နေရသည့်အကြောင်းက သူ့အစ်ကို၏ ဓာတ်ပုံများ သူတင်ခြင်းကို သူတို့လိုချင်သောကြောင့်ပင်။

ပေယွီချန် ဆိုးရွားစွာဖျားနာနေသည်ဆိုသည့် သတင်းထွက်ပေါ်လာသောအခါ ဖျော်ဖြေရေးလောကတစ်ခုလုံးကို ကြီးမားသည့် လှုပ်လှုပ်ရှားရှားဖြစ်မှု ဖြစ်ပေါ်စေခဲ့သည်။ ပရိသတ်ထောင်ပေါင်းများစွာက ငိုကြွေးပြီး သူ့အတွက် ဆုတောင်းပေးခဲ့ကြသည်။ ဆေးရုံတွင်ရိုက်ထားသည့် သူ၏ ရှားပါးဓာတ်ပုံတစ်ပုံကိုလည်း ကျောက်မျက်ရတနာကဲ့သို့ မြတ်နိုးစွာ သိမ်းဆည်းထားခဲ့ကြသည်။

ထို့ကြောင့် ပေရှုနန်၊ ရှန်းချောင်မူ၊ ဝေရွှီဖုန်း၊ ထန်ကျားရဲ နှင့် ဟန်ရီရွှမ်တို့၏ ပရိသတ်အားလုံးကို ပေါင်းလိုက်လျှင်ပင် ပေယွီချန်၏ ပရိသတ်များ တစ်ဦးတည်းက သူတို့ကို အသာစီးရနေဦးမည်ဆိုသည်ကို စိတ်ကူးကြည့်နိုင်ပေသည်။ မည်သို့ပင်ဖြစ်စေ သူက အမျိုးသမီးပရိသတ်အားလုံးအား သူတို့၏ Idol များကို စွန့်ပစ်စေနိုင်သည့် စွမ်းရည်ရှိသူပင်။

ဤသို့ဆိုလျှင် မိသားစုနောက်ခံနှင့် အဆင့်အတန်းက မည်သူ၏လက်လှမ်းမီရာမှ မဟုတ်သည့် ပေရှုနန်ကဲ့သို့ လူတစ်ယောက်က ပုံရိပ်ညစ်ညမ်းနေသည့် နာမည်ကြီးတစ်ယောက်သက်သက်ဖြစ်သော လင်းယန်ကို ကြိုက်သွားစရာ လုံးဝကို မရှိခဲ့ပေ။

ဒူဒူက လင်းယန်ကို ယုံကြည်ခဲ့သည်။ သူမက ပေရှုနန်၏ ရွေးချယ်မှုကို လုံးဝယုံကြည်မှုရှိခဲ့သည်မို့ စိတ်နည်းနည်း ငြိမ်သက်သွားပြီး “ဒါဆို ပေရှုနန်က ဘာလို့ အစ်မကို ကူညီနေတာလဲ” ဟု မေးလိုက်သည်။

“အမ်…”

လင်းယန်က ဤမေးခွန်းအတွက် အဖြေရှာမရဘဲ ဆွံအသွားတော့သည်။

ပေရှုနန် ဘာကြောင့် သူမကို ကူညီသည်ဆိုသည်မှာ ပြောစရာမလိုဘဲ ပေယွီချန်ကြောင့်ပင် ဖြစ်ရမည်။

ဒါပေမဲ့ ငါကတခြားသူတွေကို ဘယ်လိုရှင်းပြရမလဲ။

သူ့အစ်ကိုက သူမ၏ ရည်းစားဖြစ်ပြီး ၎င်းကြောင့် ပေရှုနန်က သူမကို ကူညီနေခြင်းဖြစ်သည်ဟု ဝန်ခံသင့်သလား။

ပေယွီချန်တွင် မည်မျှကြီးမားသည့် သြဇာလွှမ်းမိုးမှုရှိသည်ကို လင်းယန် ကောင်းကောင်းသိသည်။ သူမ ပေယွီချန်ကို ဘာတွေလုပ်ခဲ့သည်ကို သူ၏ပရိသတ်များသာ သိသွားလျှင် မည်သို့ဖြစ်လာမည်ကို သူမ စိတ်ကူးပင် မယဉ်ရဲပေ။ သူမ ပြာပုံဖြစ်သွားနိုင်ပေသည်။ ပေယွီချန်နှင့် သူမ၏ ဆက်ဆံရေးကို မည်သူ့ကိုမျှ ပြောပြမည်မဟုတ်ပေ။

ဤသို့ဆိုလျှင် ဤကဲ့သို့ အခြေအနေတွင် ပေရှုနန်နှင့် သူမ၏ ဆက်ဆံရေးကို ဘယ်လိုရှင်းပြရမလဲ။

သူတို့ သူငယ်ချင်းများပါဟု ပြောလျှင်ပင် လုံးဝမယုံကြည်နိုင်စရာ ဖြစ်နေလိမ့်မည်။ ထို့အပြင် သူမ အစ်မလင်းကို လိမ်လိုစိတ် မရှိပေ။

အရမ်းခက်ခဲတာပဲ… အို ဘုရားရေ…

ထိုအရာက သူမအတွက် အရမ်းခက်ခဲလှသည်။

လင်းယန်က သင့်တော်သည့် ရှင်းပြချက်တစ်ခု ရှာရန် ဦးနှောက်ခြောက်ခံ စဉ်းစားခဲ့သည်။

“ပေရှုနန်နဲ့ ကျွန်မရဲ့ ဆက်ဆံရေးကို ဖော်ပြရမယ်ဆိုရင်တော့ ကျွန်မတို့က… ဆွေမျိုးတွေလို့ သတ်မှတ်လို့ရပါတယ်”

ဆက်ဆံရေးနှင့် ဝါစဉ်အရဆိုလျှင် သူက သူမရည်းစား၏ ညီလေးပင်။ ထို့ကြောင့် သူ့ကို ခဲအို (ယောက်ျားဘက်က ညီအစ်ကို) ဟု သတ်မှတ်၍ရသည် မဟုတ်လား။

သူတို့နှစ်ဦးသာ ဆွေမျိုးများဟု ပြောလိုက်လျှင် လုံးဝလိမ်ညာရာ ရောက်မည်မဟုတ်ပေ။