နဂါးများ၏ အကြီးအကဲကောင်စီ

နဂါးတောင်ကြား ဆိုသည်မှာ တောင်ကြားမဟုတ်ဘဲ ကြီးမားသော တောင်တန်းတစ်ခုလုံး၏ စုပေါင်းအမည် ဖြစ်သည်။ နတ်ဆိုးဘုံမှ သီးခြားကျွန်းများရှိသော နဂါးကျွန်းနှင့်မတူဘဲ နဂါးတောင်ကြားရှိ နဂါးများသည် ၎င်းတို့၏ ဂူအနီးတွင် နေထိုင်ကြပြီး မျိုးနွယ်စု ဆက်ဆံရေး ပိုမိုနီးစပ်ကြသည်။

နဂါးတောင်ကြား၏ အဓိကဗဟိုချက်မှာ အလယ်ပိုင်း တောင်ပေါ်ရှိ သိဒ္ဓိဝိညာဉ်တောင်ထွတ် ဖြစ်ပြီး မော့ကြည့် ရလောက်သော တောင်ထွတ်တစ်ခုဖြစ်သည်။

ထိုနေရာသည် နဂါးတောင်ကြား၏ အုပ်ချုပ်သူဖြစ်သော နဂါးဧကရာဇ် ပါဂရစ်ဇ်၏ နန်းတော်တည်ရှိရာနေရာဖြစ်သည်။

နဂါးများ၏ နန်းတော်သည် နတ်သူငယ်မျိုးနွယ်စု၏ နူးညံ့သိမ်မွေ့သော အလှအပနှင့် ဆံပင်တစ်မျှင်မျှပင် သေသပ်မှု ရှိခြင်းတို့နှင့် လုံးဝကွာခြားသည်။ ၎င်းသည် ပိုမိုခမ်းနား ထည်ဝါပြီး… ‘အကြမ်းထည်ဆန်’ သော ပုံစံမျိုး ဖြစ်သည်။

“အကြမ်းထည်” ဟူသော အဓိပ္ပာယ်မှာ သူဌေးလက်သစ် တစ်ဦး၏ ခံစားချက်မျိုး ဖြစ်သည်။ မြေပြင်ပေါ်ရှိ ပစ္စည်းတိုင်းသည်ပင် တန်ဖိုးရှိသော ရတနာများဖြစ်ပြီး ကြည်လင် တောက်ပနေသည်။ မည်သူဆို ၎င်းသည် တန်ဖိုးရှိသော ကုန်ပစ္စည်းဖြစ်ကြောင်း သိနိုင်သည်။ ထိုအရာမှာ နဂါးများ၏ ပုံမှန်ပုံစံပင် ဖြစ်၏။

နန်းတော်တွင် ပုံမှန် အကြီးအကဲကောင်စီ အစည်းအဝေး ကျင်းပနေသည်။

အကြီးအကဲကောင်စီကို ကျင်းပခြင်းသည် နဂါးများ အတွက် အရေးကြီးသော ကိစ္စဖြစ်သည်။ ယေဘုယျအားဖြင့် နှစ်၅၀၀၀လျှင် တစ်ကြိမ် ကျင်းပလေ့ရှိသည်။ နဂါးဧကရာဇ်နှင့် အကြီးအကဲများအားလုံး တက်ရောက်ကြပြီး အဓိကအားဖြင့် နဂါးများ၏ ပုဂ္ဂိုလ်ရေးဆိုင်ရာ အပြောင်းအလဲများ၊ အနာဂတ် ဖွံ့ဖြိုးတိုးတက်မှုတို့ကို ဆွေးနွေးကြပြီး အရေးကြီးသော ကိစ္စရပ်အချို့ကို မဲခွဲဆုံးဖြတ်ကြသည်။

ပုဂ္ဂိုလ်ရေးဆိုင်ရာ အပြောင်းအလဲများတွင် အကြီးအကဲများ ရာထူးတိုးမြှင့်ခြင်း၊ ထူးချွန်သူများ ရွေးချယ်ခြင်း စသည်တို့ ပါဝင်သည်။ ယနေ့ အစည်းအဝေးသည် ယခင်ကထက် နဂါးများ၏ ပိုမို အာရုံစိုက်မှုကို ရရှိခဲ့သည်၊ အဘယ်ကြောင့်ဆိုသော် ထိုပုဂ္ဂိုလ်ရေးဆိုင်ရာ အပြောင်းအလဲသည် မကြုံစဖူး ကြီးမားသော အပြောင်းအလဲတစ်ခု ဖြစ်မည်ဟု ဆိုထား သောကြောင့်ဖြစ်သည်။

မဟာအကြီးအကဲ နဲရင့်စ်၏ တပည့်ရင်းဟောင်းဖြစ်သော လက်ရှိ မဟာအကြီးအကဲ မာရီယာသည် ရာထူးမှ ဆင်းရဖွယ် ရှိသည်။ ထိုမျှသာမက မာရီယာသည် နှစ်ပေါင်း ၃၀၀၀၀ နီးပါး မဟာအကြီးအကဲအဖြစ် ထမ်းဆောင်ရာတွင် မှားယွင်းမှု အများအပြား ပြုလုပ်ခဲ့သည်။ ပြစ်ဒဏ်ချမှတ် ခံရပါက မဟာအကြီးအကဲသည် ထောင်ဒဏ် သို့မဟုတ် ပြည်နှင်ဒဏ်ပင် ရင်ဆိုင်ရနိုင်သည်။

နဂါးတောင်ကြားမှ နဂါးများအတွက် မဟာအကြီးအကဲ မာရီယာသည် တစ်ခါတစ်ရံ အလွန်အမင်း ဗိုလ်ကျပုံရသည်။ တစ်ခါတစ်ရံတွင် သူသည် နောက်ပြောင်မှုများပင် ပြုလုပ် တတ်သဖြင့် နဂါးများစွာက မကျေမနပ်ဖြစ်ကြရသည်။ သို့သော် မဟာအကြီးအကဲအဖြစ် မာရီယာသည် သူ၏ ဘွဲ့နှင့် ထိုက်တန်သူဖြစ်သည်။ နှစ်ပေါင်းများစွာအတွင်း သူသည် နဂါးများကို ကူညီရန် အကြိမ်ကြိမ် ပံ့ပိုးကူညီခဲ့သည်။ နဂါးတောင်ကြားတစ်ခုလုံးရှိ မှော်ဌာနမှ ဧရာမနဂါးတိုင်း နီးပါးသည် သူထံမှ အနည်းနှင့်အများ လမ်းညွှန်မှုများ ရရှိခဲ့ကြသည်။ ထို့ကြောင့် သူတွင် ဂုဏ်သတင်း အလွန်ကြီးမားသည်။

ယခုတစ်ကြိမ် မာရီယာကို မဟာအကြီးအကဲအဖြစ် အစားထိုးရန် အလားအလာ အကောင်းဆုံး ကိုယ်စားလှယ်လောင်းမှာ စတန်ဝဲလ်ဖြစ်သည်။ စတန်ဝဲလ်သည် နဂါးဧကရာဇ် ပါဂရစ်ဇ် နန်းတက်ပြီးနောက် ရာထူး တိုးမြှင့်ခံရသော ‘လူသစ်’ တစ်ဦးဖြစ်ပြီး သူ၏ ရာထူးတိုးနှုန်းသည် အလွန်မြန်ဆန်သည်။ နှစ် ၂၀၀၀၀ အတွင်းတွင်ပင် မာရီယာပြီးနောက် အကြီးအကဲကောင်စီတွင် ဒုတိယမြောက်ပုဂ္ဂိုလ် ဖြစ်လာခဲ့သည်။ နဂါးများအတွက် နှစ် ၂၀၀၀၀ သည် အမှန်တကယ် ဘာမှမဟုတ်ပေ။ ၎င်းသည် အခြေခံမရှိဘဲ နိုင်ငံရေးတွင် ၁၀နှစ်ပင် မပြည့်သေးသော လူတစ်ဦးက ဒုဝန်ကြီးချုပ်ကဲ့သို့ အရေးကြီးသော ရာထူးကို ရယူထားသကဲ့သို့ ဖြစ်နေသည်။

တကယ်တမ်းဆိုရလျှင် စတန်ဝဲလ်နောက်ကွယ်တွင် တော်ဝင်နဂါးဧကရာဇ် ရှိနေကြောင်း လူတိုင်းနားလည်သည်။ ခေ-တ်အဆက်ဆက်တွင် နဂါးတောင်ကြား၏ အကြီးအကဲ ကောင်စီနှင့် နဂါးဧကရာဇ်ကြားတွင် အံ့ဖွယ်မျှတမှုတစ်ခု ရှိခဲ့သည်။ အကြီးအကဲကောင်စီ၏ ဆုံးဖြတ်ချက်ချမှတ် ပိုင်ခွင့်သည် တစ်ခါတစ်ရံတွင် နဂါးဧကရာဇ်ကိုပင် ကန့်သတ် ထားသည်။ ၎င်းသည် ချန်လွေ့၏ ယခင်ဘဝမှ ဘုရင်နှင့် ပါလီမန်အကြား ဆက်ဆံရေးနှင့် အနည်းငယ်ဆင်တူသည်။ သေချာသည်မှာ ထို ‘ဘုရင်’ တွင် အာဏာပိုရှိသည်။

လက်ရှိ နဂါးဧကရာဇ် ပါဂရစ်ဇ် သည် သူရဲကောင်း ဆန်သော ပါရမီရှင်အမျိုးအစားဖြစ်ပြီး ပိုမိုအာဏာရှင်ဆန် သည်။ သူသည် ထိုကန့်သတ်မှုကို ပယ်ဖျက်ပြီး သူ၏ အကြွင်းမဲ့အုပ်စိုးမှုကို အကောင်အထည်ဖော်ရန် အမြဲတမ်း လိုလားနေခဲ့သည်။ သူ နန်းတက်ခါစ လွန်ခဲ့သော နှစ် ၂၀၀၀၀ က အခြေခံ မတည်ငြိမ်သေးသောကြောင့် သူသည် အကြီးအကဲ ကောင်စီအပေါ် ပိုမိုနူးညံ့သော ချဉ်းကပ်မှုကို အသုံးပြုခဲ့သည်။ ဇိုလာ၏ လက်ထပ်ပွဲသည် သူ မဟာအကြီးအကဲ မာရီယာကို ဖျန်ဖြေရန် အသုံးပြုခဲ့သော နည်းလမ်းများထဲမှ တစ်ခုဖြစ်သည်။

ရလဒ်အနေဖြင့် ဇိုလာသည် လက်ထပ်ပွဲမှ ထွက်ပြေးခဲ့ပြီး နတ်သူငယ်ဘုရင်သည် ဒေါသဖြင့် ပီလင် ကို ရိုက်နှက်ခဲ့သည်။ မာရီယာသည် အလွန်ထက်မြက်သောသူဖြစ်သည်။ စဉ်းစား ပြီးနောက် သူသည် အခြေအနေကို မငြိမ်သက်စေခဲ့ပေ။ ဆန့်ကျင်ဘက်အနေဖြင့် သူသည် ‘အာဏာ’ ကို နဂါးဧကရာဇ်အား အရင်ဦးစွာ ပေးအပ်ခဲ့သည်။ ပါဂရစ်ဇ်က ထိုလုပ်ဆောင်မှု၏ ရည်ရွယ်ချက်ကို သိသည်။ သူသည် မာရီယာကို အပြစ်မတင်ရုံသာမက ‘အတင့်ရဲစွာ အောင်သွယ် ပေးခဲ့သော’ အမှားကိုလည်း ဝန်ခံခဲ့ပြီး မာရီယာစုံတွဲကို ပိုမို နှစ်သိမ့်ပေးခဲ့သည်။

ထိုကိစ္စ၏ ရလဒ်သည် နှစ်ဦးနှစ်ဖက် အကျိုးရှိခဲ့သည်။ မာရီယာသည် ပါဂရစ်ဇ်၏ ယုံကြည်မှုကို ရရှိခဲ့ပြီး နဂါးဧကရာဇ်၏ ရာထူးသည် ပိုမိုခိုင်မာလာခဲ့သည်။ သို့သော် မဟာအကြီးအကဲ ရာထူးတွင် မူဝါဒကြီးတိုင်းကို ဝင်ရောက် စွက်ဖက်ပိုင်ခွင့်ရှိပြီး မာရီယာသည် နဂါးများကြားတွင် အလွန် ဂုဏ်သတင်းကြီးမားသည်။ ၎င်းသည် ထိန်းချုပ်လိုစိတ် ပြင်းပြသော ပါဂရစ်ဇ် အတွက် အမြဲတမ်း စိတ်မသက်မသာ ဖြစ်စေခဲ့သည်။

ဆိုရိုးစကားအတိုင်း ဘုရင်အသစ် နန်းတက်လျှင် မိမိ၏ ကြိုက်နှစ်သက်ရာများကို ခေါ်ဆောင်လာပြီး ဘုရင်ဟောင်း၏ လူများကို နှင်ထုတ်တတ်သည်။ နှစ် ၂၀၀၀၀ ကြာအောင် ပါဂရစ်ဇ်သည် သူ၏ ကိုယ်ပိုင်အာဏာကို စုဆောင်းခဲ့သည်။ ယုံကြည်ရသော စတန်ဝဲလ်သည် ထိုအကြောင်းကြောင့် ပေါ်ထွက်လာသော ကိုယ်စားလှယ်တစ်ဦးဖြစ်သည်။

ထိုအကြီးအကဲကောင်စီသည် စတန်ဝဲလ်၏ ‘ဓားကို ပြသရန်’ အချိန်ဖြစ်သည်။ တိကျစွာပြောရလျှင် ဓားကို တကယ်ပြသသူမှာ နှစ် ၂၀,၀၀၀ ကြာ စီမံကိန်းဆွဲထားသော နဂါးဧကရာဇ် ပါဂရစ်ဇ်ပင် ဖြစ်သည်။

မာရီယာ၊ ပီလင် နှင့် ဂွေရိုအက်စ်တို့က နန်းတော်ခန်းမသို့ ရောက်ရှိပြီးနောက် အကြီးအကဲကောင်စီကို တရားဝင် ကျင်းပခဲ့သည်။

ပထမဦးစွာ နဂါးဧကရာဇ် ပါဂရစ်ဇ် သည် လွန်ခဲ့သော နှစ် ၅၀၀၀ အတွင်း နဂါးတောင်ကြားမှ နဂါးများ၏ ဖွံ့ဖြိုး တိုးတက်မှုကို ပုံမှန် အကျဉ်းချုပ်တင်ပြပြီး အကြီးအကဲ ကောင်စီ၏ ထောက်ခံမှုအတွက် ကျေးဇူးတင်ကြောင်း ဖော်ပြခဲ့သည်။

မဟာအကြီးအကဲ မာရီယာက အကြီးအကဲကောင်စီ ကိုယ်စား နဂါးဧကရာဇ်ကို ဂုဏ်ပြုပြီးနောက် စတန်ဝဲလ်က မာရီယာ ကျူးလွန်ခဲ့သော ပြစ်မှုများစွာကို စတင်ဖော်ထုတ် ခဲ့သည်။ စတန်ဝဲလ်၏ လုပ်ဆောင်မှုကို အကြီးအကဲများက ကြိုတင်ခန့်မှန်းထားသည်။ အမှန်တကယ်တွင် ဧကရာဇ်ကို လှည့်စားခြင်း၊ မလျော်ကန်သော အပြုအမူ၊ ကိုယ်ကျိုးရှာခြင်း၊ လူသစ်များကို ဖိနှိပ်ခြင်းစသည့် ‘ပြစ်မှု’ဟု ခေါ်ဆိုသော အများစုသည် တစ်စိတ်တစ်ပိုင်းအားဖြင့် မာရီယာ၏ ဗိုလ်ကျမှုကြောင့် ဖြစ်သော်လည်း အများစုမှာ အခြေအမြစ်မရှိကြောင်း လူတိုင်းသိကြသည်။

“ဒီစွဲချက်တွေက မှတ်တမ်းအပြည့်အစုံရှိတယ်။ လူတိုင်း သက်သေပြနိုင်တယ်။ ဥပမာ တစ်ခုပဲ ပေးပါ့မယ်” စတန်ဝဲလ်က ပီလင် ကို ကြည့်လိုက်သည်။ “မာရီယာနဲ့ ပီလင် တို့ရဲ့ မဟာမိတ်လက်ထပ်ပွဲတုန်းက မာရီယာရဲ့သမီး ဇိုလာက လက်ထပ်ပွဲကနေ ထွက်ပြေးခဲ့တယ်။ ပီလင် ကို တောင်းပန်မယ့် အစား မာရီယာက သူ့ခင်ပွန်း စပန်ကို ပီလင် အိမ်ဆီသွားပြီး ပြင်းပြင်းထန်ထန် ဒဏ်ရာရအောင်လုပ်ဖို့နဲ့ သူ့ရဲ့ စည်းစိမ်ဥစ္စာတွေကို ခိုးယူဖို့ပါ လှုံ့ဆော်ခဲ့တယ်။ ဒီလို အာဏာနဲ့ ဖိနှိပ်တဲ့ ရိုင်းစိုင်းမှုက လုံးဝ သည်းမခံနိုင်စရာပဲ။ အကြီးအကဲ ပီလင်၊ ခင်ဗျားအနေနဲ့ သားကောင်ဖြစ်တဲ့ အတွက် ဒီလိုကိစ္စမျိုးရှိခဲ့လားဆိုတာ ပြောပေးပါ။”

ပီလင်က မာရီယာကို မကြည့်ရဲပေ။ သူက ခေါင်းညိတ်ပြီး ပြောလိုက်သည်။ “ဟုတ်ပါတယ်။”

“မဟာအကြီးအကဲ” စတန်ဝဲလ်က အနည်းငယ် ပြုံးလိုက်သည်။ “ဘာများပြောစရာရှိသေးလဲ?”

မာရီယာသည် စတန်ဝဲလ်ကိုပင် မကြည့်ဘဲ သူ၏ အကြည့်ကို နဂါးဧကရာဇ် ပါဂရစ်ဇ် ထံ လှည့်လိုက်သည်။ “အရှင်မင်းကြီး၊ အရှင်လည်း ဒီလိုပဲထင်တာလား။”

ပါဂရစ်ဇ် က ပခုံးတွန့်ပြပြီး တိတ်ဆိတ်စွာ ပြုံးနေသည်။

“စတန်ဝဲလ်၊ ဆက်ပြောပါ။” မာရီယာက စတန်ဝဲလ်ထံ ခေါင်းလှည့်ကာ ပေါ့ပေါ့ပါးပါး ပြောလိုက်သည်။

မဟာအကြီးအကဲ နတ်မိမယ်နဂါး၏ မျက်လုံးနှစ်လုံးက သူ့၏ ဝိညာဉ်ကို ပြင်းထန်သော မြှားများကဲ့သို့ ထိုးဖောက် ဝင်ရောက်သွားသည်ဟု စတန်ဝဲလ် ခံစားလိုက်ရပြီး အနည်းငယ် တုန်ယင်သွားသည်။ သူက တိုက်ရိုက် မကြည့်ရဲတော့ဘဲ အကြည့်လွှဲကာ ဆက်လက်ပြောကြား ခဲ့သည်။ နောက်ပိုင်း ‘ပြစ်မှု’ အများအပြားသည် မှန်ကန်သည့် အမှားများဖြစ်သည်။ ထိုမှန်ကန်သော အချက်အလက် အများစုကို ထိုစဉ်က ပါဂရစ်ဇ်သည် တမင်တကာ ခွင့်လွှတ်ခဲ့ခြင်းဖြစ်သော်လည်း မာရီယာက ရှင်းပြခြင်းမရှိပေ။ နဂါးဧကရာဇ် ပါဂရစ်ဇ်ကလည်း ပါးစပ်မဟခဲ့ပေ။

နောက်ဆုံးတွင် စတန်ဝဲလ်သည် သူ၏ အစွယ်များကို ပြသခဲ့သည်။ “မာရီယာက မဟာအကြီးအကဲအဖြစ် ဆက်လက်ထမ်းဆောင်ရန် မသင့်လျော်တော့ပါဘူး။ သူ့ရဲ့ လုပ်ဆောင်ချက်တွေက လုံးဝလက်ခံနိုင်စရာမရှိဘူး။ သူကို အနှစ် ၁၀၀၀၀ အကျဉ်းချဖို့ ဒါမှမဟုတ် နဂါးတောင်ကြား ကနေ ပြည်နှင်ဒဏ်ပေးရန် အဆိုပြုပါတယ်။”

ထောင်ချသည် ဖြစ်စေ၊ ပြည်နှင်ဒဏ်ပေးသည်ဖြစ်စေ အပြင်းထန်ဆုံး ပြစ်ဒဏ်ဟု သတ်မှတ်ပြီး ပြန်လည် ထူထောင်ရန် မဖြစ်နိုင်ပေ။ နဂါးဧကရာဇ်သည် ယခုတစ်ကြိမ် မဟာအကြီးအကဲကို ဖယ်ရှားရန် ဆုံးဖြတ်ထားပုံရသည်။ သို့သော် မာရီယာ၏ ဂုဏ်သတင်းသည် ထင်ရှားသည်။ ထို့အပြင် ထိုနှစ်များအတွင်း သူသည် ကြိုးစား အားထုတ်မှုများ သာမက သူ၏ ဂုဏ်ကျေးဇူးများကိုလည်း ငြင်းပယ်၍မရပေ။ သူကို ထိုသို့အပြစ်ပေးပါက အကြီးအကဲများ စိတ်ပျက်အားငယ်မည်ဖြစ်သည်။ ခဏတာ အတွင်း ဆွေးနွေးငြင်းခုံသံများ ဆူညံသွားသည်။

“အရှင်မင်းကြီး။ အရေးကြီးတဲ့ ကိစ္စတစ်ခု သတင်းပို့စရာ ရှိပါတယ်” စတန်ဝဲလ် စကားဆုံးပြီးနောက် ဂွေရိုအက်စ် ထွက်လာ၏။ “မုန်တိုင်းကျွန်းက စမ်းသပ် လေ့ကျင့်ရေးကွင်း ဖျက်ဆီးခံလိုက်ရပြီ။”

“ဘာ....” ပါဂရစ်ဇ် မျက်မှောင်ကြုတ်လိုက်သည်။ “ဘယ်သူလုပ်တာလဲ...”

ဂွေရိုအက်စ်သည် မာရီယာကို ကြည့်လိုက်သည်။ “မဟာအကြီးအကဲ မာရီယာရဲ့ သားမက်ပါ။”

ဂွေရိုအက်စ်သည် ခံစားချက်မရှိ၊ တိတ်ဆိတ်နေပုံ ရသော်လည်း သူသည် ရိုးအသူ တစ်ဦးမဟုတ်ပေ။ မုန်တိုင်းကျွန်းတွင် တိုက်ပွဲဖြစ်ပွားပြီးနောက် သူ၏ ပထမဆုံး တုံ့ပြန်မှုမှာ သတင်းများကို ပိတ်ဆို့ပြီး ပီလင် အပါအဝင် နဂါးတောင်ကြားနှင့် မည်သူတစ်ဦးတစ်ယောက်မျှ ဆက်သွယ်ခြင်း မပြုရန် တားမြစ်ခဲ့ခြင်းဖြစ်သည်။ မာရီယာနှင့် အခြားသူများသည် အကြီးအကဲကောင်စီတွင် ပါဝင်ရန် နန်းတော်သို့ အချိန်ကိုက် ဝင်ရောက်လာခြင်းသည်လည်း ဂွေရိုအက်စ်၏ စိတ်ကူးဖြစ်သည်။ ရည်ရွယ်ချက်မှာ စတန်ဝဲလ်အား ပြင်ဆင်ရန် သို့မဟုတ် တုံ့ပြန်ရန် အချိန်မပေးရန် ဖြစ်သည်။ ထိုကိစ္စကို ယခုအခါ အရင် ‘ဖော်ထုတ်’ခြင်းသည် အားသာချက်များ ရရှိရန်အတွက် အလျှော့ပေးခြင်း နည်းလမ်းတစ်ခုပင် ဖြစ်သည်။

“နောက်ထပ် မာရီယာပဲ ဖြစ်ပြန်ပြီ။” စတန်ဝဲလ်က ချက်ချင်းပင် ထွက်ပေါ်လာပြီး ဝေဖန်ခဲ့သည်။ “ဒီစမ်းသပ် လေ့ကျင့်ရေးကွင်းက နဂါးတွေအတွက် အတော်လေးကို အရေးကြီးတယ်၊ ဒါက မာရီယာရဲ့ မှန်ကန်တဲ့ ဆုံးဖြတ်ချက်တွေ ထဲက တစ်ခုပဲ။ မထင်မှတ်ဘဲနဲ့…”

“ခဏလေးနေပါဦး။” ပါဂရစ်ဇ် သည် အဓိကပြဿနာကို ကြားလိုက်ရပြီး စတန်ဝဲလ်၏ စကားကို ဖြတ်တောက် လိုက်သည်။ “မင်းက သူရဲ့ သားမက်လို့ ပြောလိုက်တာလား။”

အကြီးအကဲများလည်း သဘောပေါက်သွားသည်။ ဆွေးနွေးသံများ ရုတ်တရက် တိတ်ဆိတ်သွားပြီး မျက်လုံးများအားလုံး ဂွေရိုအက်စ်ကို ကြည့်နေကြသည်။

“ဇိုလာ ပြန်ရောက်လာပါပြီ။” ဂွေရိုအက်စ်၏ နောက်ထပ် စကားတစ်ခွန်းက ပရိသတ်ကို တုန်လှုပ်စေခဲ့သည်။ “သူက အကြီးအကဲ ပီလင် ကို အနိုင်ယူခဲ့တယ်။”

“ဇိုလာ…က ပီလင် ကို အနိုင်ယူခဲ့တာလား?” ပါဂရစ်ဇ် အံ့အားသင့်သွားပြီး နားကြားမှားသည်ဟု ထင်လိုက်သည်။ “ဇိုလာဆိုတာ သေချာလား၊ မာရီယာ ဒါမှမဟုတ် စပန် မဟုတ်ဘူးလား။”

“ဟုတ်ပါတယ်။ ဇိုလာပါ။ သူက လုံးဝအနိုင်ယူခဲ့တာ။” ဂွေရိုအက်စ်က ပီလင် ကို ကြည့်လိုက်သည်။ “အကြီးအကဲ ပီလင်....”

ပီလင်သည် လူတိုင်း၏ အံ့အားသင့်နေသော မျက်လုံးများကို ခံစားလိုက်ရပြီး မြေကြီးထဲ တွင်းတူးပြီး တိုးဝင်သွားချင်စိတ် ပေါက်သွားသည်။ သို့သော် အမှန်တရားမှာ ထင်ရှားပေသည်။ ဇိုလာနှင့် ပြန်တိုက်ခိုက် ရဦးမည်ဆိုလျှင် ပို၍ပင် ရှက်စရာကောင်းမည်သာ ဖြစ်သည်။ သူငြင်းပယ်၍ မရသဖြင့် ခေါင်းညိတ်လိုက်ရသည်။

“ဇိုလာက အကြီးအကဲ ပီလင် ကို သူ့ရဲ့ အကျွမ်းဆုံး လျှပ်စီးစွမ်းအားနဲ့ အနိုင်ယူခဲ့တာပါ။ အကြီးအကဲ ပီလင် ကို မရယ်ပါနဲ့။ တူညီတဲ့ အဆင့်မှာဆိုရင် ကျုပ်ပဲဖြစ်ဖြစ်၊ စပန်ပဲဖြစ်ဖြစ်၊ မာရီယာပဲဖြစ်ဖြစ်၊ ဇိုလာနဲ့ တိုက်ခိုက်ရင် အကြီးအကဲ ပီလင် လိုပဲ ရလဒ်ထွက်လာမှာပါ။”

စတန်ဝဲလ်က ထိတ်လန့်စွာဖြင့် ပြောလိုက်သည်။ “မင်းပြောတာက ဇိုလာက တိုင်းပြည်အဆင့်ရဲ့ အထွတ်အထိပ်ကို ရောက်နေပြီဆိုတဲ့ သဘောလား။”

“ဒါဟာ ပုံမှန် တိုင်းပြည် အဆင့်ရဲ့ အထွတ်အထိပ် သက်သက်ပဲ မဟုတ်ဘူး! အဲဒီတုန်းက ကျုပ် စမ်းသပ် လေ့ကျင့်ရေးမှာ ပါဝင်ခဲ့တဲ့ နဂါးတွေကို ကာကွယ်ပေးနေတာ၊ အကြောင်းအရာကို မသိဘဲ သူ့ကို တိုက်ခိုက်ခဲ့တယ်။ ရလဒ်အနေနဲ့…” ဂွေရိုအက်စ်က သက်ပြင်းချပြီး ခဏရပ်လိုက်သည်။ “ဇိုလာက ကျုပ်ရဲ့ စွမ်းအား ၇၀%နဲ့ တိုက်ခိုက်မှုကို ဒဏ်ရာမရဘဲ တကယ်ပဲ ခံနိုင်ခဲ့တယ်။ အကြီးအကဲ ပီလင် အပါအဝင် စမ်းသပ်မှုတွေမှာ ပါဝင်ခဲ့တဲ့ လက်ရွေးစင်နဂါးတွေအားလုံး သက်သေခံနိုင်တယ်။ ဇိုလာက ကျုပ် မြင်ဖူးသမျှ နဂါးတွေထဲမှာ တခြားသူတွေနဲ့ မတူဘဲ အထူးချွန်ဆုံး ပါရမီရှင်ပဲ။”

ပီလင်ကလည်း ခေါင်းကို အမြန်ညိတ်လိုက်သည်။ အထူးချွန်ဆုံးသူကို ရှုံးနိမ့်ခြင်းသည် ရှက်စရာကိစ္စ မဟုတ်ပေ။ အထူးသဖြင့် ဂွေရိုအက်စ်ကိုယ်တိုင်ကပင် သူသည် ဇိုလာကို တူညီသော အဆင့်တွင် ယှဉ်ပြိုင်နိုင်ခြင်းမရှိဟု ဝန်ခံပြီး နောက်ပိုင်းတွင် ဖြစ်သည်။

နှစ် ၂၀၀၀၀ အတွင်းမှာပဲ သူက တိုင်းပြည် အဆင့်ရဲ့ အထွတ်အထိပ်ကို ရောက်ရှိခဲ့တယ်။ အဆင့်တူတွေထဲမှာ ပြိုင်ဘက်ကင်း။ ပြီးတော့ သူက အဆင့်ပိုမြင့်တဲ့သူ တစ်ယောက်နဲ့တောင် တိုက်ခိုက်နိုင်ခဲ့တယ်။

မဖြစ်နိုင်လုနီးပါး ကိစ္စ၃ခုလုံးက လူတစ်ယောက်ထဲမှာ စုစည်းနေတယ်!

ဂွေရိုအက်စ်က “အထူးချွန်ဆုံး ပါရမီရှင်။ အခြားသူတွေနဲ့ မတူ....” ဟူသော စကားလုံးများကို သုံးစွဲခဲ့သည်မှာ အံ့သြစရာ မဟုတ်ပေ။

အကြီးအကဲများ သာမက ပါဂရစ်ဇ် ပင် စိတ်လှုပ်ရှား သွားသည်။ စတန်ဝဲလ်သည် ထိုသို့သော အလှည့် အပြောင်းကို မမျှော်လင့်ထားဘဲ ခဏတာ ကြောင်သွား ခဲ့သည်။

“မာရီယာ၊ ဒါ အမှန်ပဲလား။”

ထိုအကျိုးသက်ရောက်မှုသည် မာရီယာ မျှော်မှန်းထားသည့် အတိုင်းပင် ဖြစ်သည်။ မာရီယာက ပေါ့ပေါ့ပါးပါး ပြုံးလိုက်သည်။ “တခြားအရာတွေနဲ့ ယှဉ်ရင် ကျွန်မ သမီးနဲ့ ပြန်ဆုံစည်းရတာကို ပိုပျော်ပါတယ်။ စွမ်းအားကတော့… ဇိုလာ အခု နန်းတော်အပြင်မှာ။ အရှင်မင်းကြီး မယုံကြည်ရင် ချက်ချင်း ခေါ်လို့ရပါတယ်။”

“ကောင်းပြီလေ။” ပါဂရစ်ဇ် က ခေါင်းညိတ်လိုက်သည်။ “ဂွေရိုအက်စ်၊ ဇိုလာကို ချက်ချင်း ခန်းမထဲ ခေါ်လာလိုက်။ ငါတစ်ယောက်တည်း မဟုတ်လောက်ဘူး။ အကြီးအကဲ အကုန်လုံးက အထူးချွန်ဆုံး နဂါးပါရမီရှင်ကို မြင်ဖို့ စိတ်မရှည် ဖြစ်နေကြပြီလို့ ထင်တယ်။”