အခန်း (၁၇၃)

လေထဲတွင် ပျံဝဲနေသော ပညာရှင် သို့မဟုတ် နန်းတော်အစောင့်များနှင့် နံရံပေါ်တွင် ရပ်နေသော ပညာရှင် (၇) ယောက် (၈) ယောက်ခန့် ရှိသည်။ သူတို့အားလုံးက အပြင်သို့ ထွက်မသွားကြဘဲ တစ်ကြိမ်တည်းနှင့် လီအာ့ကို တိုက်ခိုက်ရန်အတွက် ဘုရင်ကြီးဆီမှ အမိန့်တစ်ခုသာ လိုအပ်သည်။

အင်မော်တယ်အိုကြီးများနှင့် သိုင်းသခင်အဆင့် သိုင်းပညာရှင်များအားလုံးက တစ်ယောက်နှင့်တစ်ယောက် အလွန်ရင်းနှီးနေကြသည့်အတွက် အလွန်အကျိုးသက်ရောက်မှုရှိစွာ ပူးပေါင်းတိုက်ခိုက်နိုင်ကြသည်။ တစ်ယောက်ချင်း တိုက်ခိုက်ရမည်ဆိုလျှင် သူတို့အားလုံးက လီအာ့အတွက် ပြိုင်ဘက်မဟုတ်ကြောင်း သိနေကြ၏။ သို့သော် သူတို့ကတော့ အရေအတွက်အရ အနိုင်ယူနိုင်သည် ဆိုသော်ငြားလည်း ဂုဏ်သိက္ခာကို တန်ဖိုးထားနေခဲ့ကြခြင်း မရှိကြပေ။

သိုင်းလေ့ကျင့်ရေး ခန်းမအပြင်ဘက် မြေကွက်လပ် ပတ်ပတ်လည်၌ ရှိနေသော နံရံအပြင်ဘက်တွင် မိန်းမစိုးခေါင်းဆောင်က မတ်တပ်ရပ်လိုက်၏။ လက်ရှိအချိန်တွင် သူ၏ အနီရောင် စပါးအုံးဝတ်ရုံက တစ်စစီ ပျက်စီးနေပြီး သူ၏ နှုတ်ခမ်းလေးများက တစ်စုံတစ်ခုနှင့် ဆက်သွယ်နေသည့်အလား အနည်းငယ် လှုပ်ရှားနေခဲ့သည်။

ဘုရင်ကြီးက ခေါင်းညိတ်ပြလိုက်ပြီး သူ့ကို သတိပေးလိုက်၏။

"သတိထားပါ…"

တစ်ချိန်တည်းတွင် နန်းတော်တစ်ခုလုံးနှင့် တာ့ဆွေတိုင်းပြည်၏ မြို့တော်တစ်ခုလုံးတွင် တစ်စုံတစ်ခုကို ဖန်တီးနေသလို ဖြစ်နေခဲ့သည်။

နက္ခတ်ရေးရာဌာန၏ အပေါ်ဘက်တွင် …

ပတ်ပတ်လည် မြေကြီးထဲမှနေ၍ ရွှေရောင်တလက်လက် တောက်ပနေသော ရွှေရောင်ချပ်ဝတ်အင်္ကျီ ဝတ်ဆင်ထားသည့် ရဲမက် (၁၂) ယောက် ထွက်ပေါ်လာခဲ့သည်။ သူတို့အားလုံး၏ ခန္ဓာကိုယ်တစ်ခုလုံးတွင် အင်းကွက်များစွာ ပြည့်နှက်နေပြီး သူတို့က အရပ် ပေ(၃၀)၊ (၄၀) နီးပါးခန့် အရပ်မြင့်သည်။ သူတို့တစ်ယောက်ချင်းဆီက မတူညီသော နတ်ဘုရားလက်နက်တစ်ခုဆီကို ကိုင်ဆောင်ထားကြ၏။

ဘုန်းကြီးကျောင်းတစ်ခု၏ အပေါ်ဘက်တွင် ရှိနေသော ခေါင်းလောင်းကြီးတစ်ခုကို တီးခတ်လိုက်သည့်အချိန်တွင် ဓမ္မရွတ်ဆိုသံများ ကြားလိုက်ရသည်။

တစ်ချိန်တည်းတွင် တာအိုကျောင်းဆောင်တစ်ခုထဲမှနေ၍ ခရမ်းရောင် မြူခိုးများ ထွက်ပေါ်လာပြီး အလွန်ကြီးမားသော အဆောင်ကြီးတစ်ခု ဖြစ်ပေါ်လာခဲ့သည်။

တစ်ချိန်တည်းတွင် အဖြူရောင်ရေနဂါးကြီးတစ်ကောင်က ကျောက်တုံးတံတား၏ အောက်ခြေမှ ထွက်ပေါ်လာခဲ့သည်။ သူက တံတား၏ လက်ရန်းအပေါ်ဘက်မှနေ၍ တဖြည်းဖြည်း တက်လာခဲ့၏။

နန်းတော်အတွင်းထဲတွင် နဂါးနံရံဝင်္ကပါက တော်ဝင်မိသားစုကို ကာကွယ်ပေးနေပြီး နန်းတော်အပြင်ဘက်တွင်တော့ တာ့ဆွေတိုင်းပြည်က နှစ်ရာပေါင်းများစွာ ဝင်္ကပါကို အားဖြည့်လာခဲ့သည်။ ထိုဝင်္ကပါ၏ ရည်ရွယ်ချက်ကတော့ မြို့တော်တစ်ခုလုံးကို ကာကွယ်ပေးရန်ဖြစ်၏။ ထိုသို့ဆိုလျှင် သူတို့က အစွမ်းထက်သော ပြင်ပအန္တရာယ်များကို ရင်ဆိုင်နိုင်ပါလိမ့်မည်။

အကယ်၍ ထိုဝင်္ကပါကိုသာ အသက်သွင်းလိုက်မည်ဆိုလျှင် မြို့တော်ထဲ၌ ရှိနေသော ကျင့်ကြံသူများနှင့် သိုင်းပညာရှင်များအားလုံးက နန်းတွင်းကလန်၏ နဂါးချီစွမ်းအင်များနှင့် ဖိနှိပ်ခြင်းကို ခံရနိုင်ပြီး သူတို့၏ ကျင့်စဉ်အဆင့် တစ်ခု သို့မဟုတ် နှစ်ခုခန့် နိမ့်ကျသွားနိုင်သည်။ အထက်ဘုံ(၅)ဆင့်မှ ကျင့်ကြံသူတစ်ယောက်က မြို့တော်ကို ဖျက်ဆီးရန် ကြိုးစားမည်ဆိုလျှင် အကယ်၍ ထိုကျင့်ကြံသူက လိုက်လံသတ်ဖြတ်ခံရမည်ဆိုလျှင်ပင် မြို့တော်ထဲတွင် သူတို့ကြောင့် ဖြစ်ပေါ်လာသော အပျက်အစီးများက တိုင်းတာ၍ မရနိုင်ပေ။

သို့သော် အထက်ဘုံ(၅)ဆင့်မှ ထိုကဲ့သို့သော ကျင့်ကြံသူများက အဆင့် (၁၀) ကိုသာ ဖိနှိပ်နိုင်စွမ်းရှိသည်။ သူတို့က တာ့ဆွေတိုင်းပြည်အတွက် ရင်ဆိုင်ရန် အဆပေါင်းများစွာ ပို၍လွယ်ကူပါလိမ့်မည်။ အကယ်၍ လူတိုင်း၏ ကျင့်စဉ်အဆင့်က ဖိနှိပ်ခံရမည်ဆိုလျှင်ပင် အခြေအနေကတော့ တာ့ဆွေအင်ပါယာအတွက် အကျိုးသက်ရောက်မှုများ ရှိနေသေးသည်။ အဘယ်ကြောင့်ဆိုသော် သူတို့ဆီတွင် အရေအတွက်များပြားခြင်းကြောင့် ဖြစ်သည်။

အကယ်၍ အဆင့် (၁၀) ကျင့်ကြံသူတစ်ယောက်က အစွမ်းကုန်ကြိုးစားပြီး သူတို့၏ အသက်ကို ဂရုမစိုက်ဘဲ ဖျက်ဆီးဖို့ ကြိုးစားမည်ဆိုလျှင်ပင် သူတို့ထိခိုက်ဖျက်ဆီးနိုင်သော အပျက်အစီးများက ကန့်သတ်ချက်များ ရှိနေသေးသည်။ အထူးသဖြင့် ထိုဝင်္ကပါက လူတစ်ယောက်၏ သက်ရှည်တံတားကို နှောင့်ယှက်နိုင်ပြီး ကျင့်ကြံသူများနှင့် သိုင်းပညာရှင်များ၏ ခန္ဓာကိုယ်ထဲတွင် ရှိနေသော ချီစွမ်းအားလှည့်ပတ်မှုကို နှောင့်ယှက်နိုင်ပြီး သူတို့၏ အစွမ်းကို ကန့်သတ်နိုင်သည်။

လီကျူးသုခဘုံက တာ့လီအင်ပါယာ၏ ကောင်းကင်ကြီးပေါ်၌ ပျံဝဲနေခဲ့သည့်အချိန်တွင် သူတော်စင်(၄)ပါး ဖန်တီးထားခဲ့သော ဝင်္ကပါက ကမ္ဘာငယ်လေးထဲတွင် ရှိနေသည့် ထူးခြားဆန်းကြယ်သော အစွမ်းမျိုးစုံကို ဖိနှိပ်ထားနိုင်သည်။ ကမ္ဘာငယ်လေးထဲတွင် သူတို့၏အစွမ်းများကို အတင်းအကျပ် သုံးရသည့် လူတိုင်းက အလွန်ပြင်းထန်သော ထိခိုက်မှုမျိုးကို ခံစားရနိုင်၏။

ထိုအချိန်တွင် မြစ်ဖြတ်အင်မော်တယ် လျှိုကျင့်မောက်က တွက်ချက်မှုအနည်းငယ် လုပ်ဆောင်ခဲ့သည်။ ထိုသို့ဆိုရလျှင် သူ၏သက်တမ်းက ဆယ်စုနှစ်ပေါင်းများစွာ ပျက်စီးသွားခဲ့ရသည့်အတွက် ထိုဝင်္ကပါက မည်မျှအစွမ်းထက်ကြောင်း ရှင်းရှင်းလင်းလင်း ညွှန်ပြနေ၏။

ပြန်ထလာပြီးနောက် မိန်းမစိုးခေါင်းဆောင်က သူ၏လက်သီးထဲသို့ အလွန်ကြောက်စရာကောင်းသော စွမ်းအားများ ပေါင်းထည့်လိုက်သည်။ သူ၏ မျက်နှာပေါ်တွင်လည်း ကြောက်စရာကောင်းသော အမူအရာတစ်ခုပေါ်လာပြီး ကျယ်လောင်စွာ အော်ပြောလိုက်သည်။

"ငါ့ဆီကို လာခဲ့ကြစမ်း…"

ပုံရိပ်ယောင် ရွှေနဂါး (၉)ကောင်က ပတ်ပတ်လည်မှနေ၍ မိန်းမစိုးခေါင်းဆောင်ဆီသို့ ချက်ချင်း စုစည်းလာကြပြီး အလွန်သေးငယ်သော ရွှေရောင်မြွေငယ်လေးများအဖြစ် ပေါင်းစည်းပြောင်းလဲသွားခဲ့သည်။ သူတို့တစ်ကောင်ချင်းဆီက လူသားတစ်ယောက်၏ လက်ညှိုးအရွယ်အစားခန့် ရှိနေသည်။ ထိုမြွေငယ်လေးများက မိန်းမစိုးခေါင်းဆောင်၏ ကိုယ်တွင်းပေါက် (၇) ခုမှနေ၍ သူ၏စိတ်ဝိညာဉ်ထဲသို့ ဝင်ရောက်ပေါင်းစည်းသွားခဲ့သည်။

ရုတ်တရက်ဆိုသလို မိန်းမစိုးခေါင်းဆောင်က ရှေးဟောင်း ကောင်းကင်ခုံရုံးမှ ရွှေရောင်နတ်ဘုရားတစ်ပါးအဖြစ် ပြောင်းလဲသွားသလို ထင်မှတ်ရ၏။ သူက နံရံထဲတွင် ရှိနေသော အပေါက်ထဲသို့ ဝင်လိုက်သည်။ သူ၏ခြေလှမ်းတစ်ခုချင်းဆီတိုင်းတွင် မြေပြင်ပေါ်၌ ရွှေရောင်ဝဲကတော့များ ပြန့်နှံ့လာခဲ့၏။

သူက အောက်သို့ ခေါင်းငုံ့ရမည့်အစား နံရံမှ ဖြတ်ကျော်လာခဲ့သည်။ သူက လက်ချောင်းလေးတစ်ခုကို လှုပ်ရှားလိုက်ရုံနှင့် နံရံတစ်ခုလုံးက ပျက်စီးသွားခဲ့ပြီး သိုင်းလေ့ကျင့်ရေးခန်းမ၏ အပြင်ဘက်တွင် ရှိနေသော ကွင်းပြင်ကြီးထဲသို့ ပြန်ရောက်လာခဲ့၏။

ဘုရင်ကြီးကို ကူညီပေးနေကြသော နန်းတွင်းအရာရှိများကို နဂါးအကူအညီများဟု ခေါ်ဆိုကြသည်။ ဘုရင်ကြီးကို အမှုတော်ထမ်းရွက်နေကြသော မိန်းမစိုးများကတော့ နဂါးအစေခံများဟုခေါ်၍ သူတို့က တစ်ဆင့်ပိုနိမ့်ကြသည်။ သူတို့နှစ်ယောက်လုံးက ဘုရင်ကြီး၏ နဂါးချီစွမ်းအားများကို အာရုံခံနိုင်ကြသော်လည်း မိန်းမစိုးခေါင်းဆောင်က နန်းတွင်းကလန်၏ နဂါးချီစွမ်းအားများကို ထိန်းချုပ်ပြီး အသုံးပြုနိုင်သည်မှာ အတော်လေး အံ့ဩစရာကောင်းနေသေးသည်။

သိုင်းပညာရှင်များက နန်းတော်၏အစွန်တွင် စုစည်းနေကြပြီး ထိုမြင်ကွင်းကို မြင်သည့်အခါ အလွန်ထိတ်လန့်နေကြ၏။ ထိုအရာ၏ နောက်ကွယ်တွင် အလွန်အမင်းကို အရေးပါသော လျှို့ဝှက်ချက်တချို့ ရှိနေပုံရသည်။

"ငါတို့က နောက်တစ်ကြိမ် တိုက်ခိုက်ကြရင် ဘယ်လိုလဲ…"

မိန်းမစိုးခေါင်းဆောင်က လီအာ့ကို တည့်တည့်စိုက်ကြည့်ပြီး စိန်ခေါ်လိုက်၏။

အကယ်၍ မူလတုန်းကတော့ သူက အားနည်းသော အဆင့်(၉) သိုင်းပညာရှင် တစ်ယောက် ဖြစ်နေမည်ဆိုလျှင် နဂါးချီစွမ်းအင်များ ပေါင်းစပ်လာပြီးနောက် သူ၏ စွမ်းရည်များက သိသိသာသာ တိုးတက်လာပြီး သူက တာ့ဆွေတိုင်းပြည်ထဲရှိ အဆင့်(၉) အရာရှိများထဲတွင် အစွမ်းထက်ဆုံးတစ်ယောက် ဖြစ်လာနိုင်သည်။

လီအာ့က မိန်းမစိုးခေါင်းဆောင်ကို ပြန်လှည့်ကြည့်လိုက်သည်။ သူ့ခန္ဓာကိုယ်ထဲတွင် အလွန်များပြားသော ရွှေရောင်အရည်များ ပြည့်နှက်နေသလို ဖြစ်နေခဲ့သည့်အတွက် စစ်ကျောင်းတော်၏ နတ်ဘုရားဆင့်ခေါ်ခြင်း ကျင့်စဉ်နှစ်ခုကို အသုံးပြုလိုက်သကဲ့သို့ ဖြစ်နေသည်။ သို့သော် ထိုအရာက အနည်းငယ်တော့ ကွဲပြားသည်။

လီအာ့က ထိုကိစ္စကို စဉ်းစားမနေဘဲ ခေါင်းညိတ်၍ ပြောလိုက်သည်။

"ဒါကမှ ပိုကောင်းသွားသေးတယ်…"

လီကျူးသုခဘုံထဲတွင် သူနှင့် စုန့်ချန်ကျင့်၏ တိုက်ပွဲအတောအတွင်း လီအာ့က စကတည်းက အသာစီးရခဲ့သည့်အတွက် သူ့ဆီတွင် တိုက်ခိုက်ချင်စိတ် များများစားစား မရှိခဲ့ပေ။ ထိုအစား သူ့ဆရာ၏အမိန့်အတိုင်း လုပ်ဆောင်ခဲ့ခြင်းသာ ဖြစ်သည်။ ထို့ပြင် သူက အဆင့်(၉) အထွဋ်အထိပ် သိုင်းပညာရှင်တစ်ယောက်နှင့် မည်သို့ရင်ဆိုင်ရမည်ဖြစ်ကြောင်း သိချင်ရုံသက်သက်သာ ဖြစ်သည်။

တိုက်ပွဲ၏အဆုံးသတ် အခြေအနေက ကျေနပ်လောက်စရာကောင်းသော်လည်း အမှန်အတိုင်းပြောရလျှင်တော့ လီအာ့က ထိုကဲ့သို့ တိုက်ပွဲမျိုးကို တိုက်ခိုက်နေရသည်ဟု လုံးဝမခံစားမိခဲ့ချေ။ သို့သော် လက်ရှိအချိန်တွင်တော့ သူက တာ့ဆွေတိုင်းပြည်တစ်ခုလုံးကို ရင်ဆိုင်နေရခြင်း ဖြစ်သည်။

သူက ဤနေရာကို ရောက်လာရသည်မှာ သူ့သားအတွက် ရပ်တည်ပေးရန် အကြောင်းပြချက်နှင့် ဖြစ်၏။ သို့သော် ယခုတော့ သူက ရန်သူ့ပိုင်နက်ထဲသို့ ရောက်ရှိလာပြီး ကြောက်စရာကောင်းသော ရန်သူပေါင်းများစွာ ဝိုင်းရံနေသည်။ ထို့ကြောင့် ထိုအချိန်တွင် သူက လွတ်လပ်ပေါ့ပါးစွာ အားရပါးရ ရယ်လိုက်၏။

အရှေ့ပိုင်းခမ်းနားခြင်းတောင်ထိပ်၏ အပေါ်တွင် သူက တစ်စုံတစ်ခု ပြောချင်နေခဲ့သော်လည်း ပြောစရာစကားလုံးကို ရှာမတွေ့ခဲ့ပေ။ အဆုံးတွင်တော့ သူက စကားမပြောဘဲ ထွက်ခွာလာခဲ့၏။

လီကျူးသုခဘုံထဲတွင် တစ်ဘဝလုံးနေခဲ့ရသော လီအာ့က ရုတ်တရက် ထုတ်ဖော်ပြသခဲ့သည်။ သူ့သားက အလွန်စဉ်းစားတတ်ပြီး အမိန့်ကို နာခံတတ်သော ကလေးတစ်ယောက် ဖြစ်သော်လည်း အနိုင်ကျင့်ခံနေရသေးသည်။ လီဟွိုင်၏ အဖေတစ်ယောက်ဖြစ်ပြီး သူ၏ လက်ရှိအစွမ်းဖြစ်သည့် အဆင့်(၉) သိုင်းပညာရှင် တစ်ယောက်ဟူသော အခြေအနေက ပြိုင်ဘက်ကို သိမ်းသွင်းရန် လုံလောက်သည်ဟု အာမခံချက်မရှိသော်လည်း သူက အဆင့်တက်ရန် ကြိုးစားပြီး အဆင့်(၉)ကို ချန်ထားခဲ့ရမည်ဖြစ်၏။

လီအာ့က လေပူများကို မှုတ်ထုတ်လိုက်သည်။ ပတ်ပတ်လည်မှနေ၍ သူ့ဆီသို့ ကျဆင်းလာသော ဖိအားများကို ခံစားမိသည့်အခါ တစ်ယောက်တည်း တွေးလိုက်မိသည်။

"အခြေအနေတွေကို အလျင်မလိုနဲ့။ အရာအားလုံးကို ခြေတစ်လှမ်းချင်းဆီပဲ လုပ်ဆောင်ရမယ်။ ဒီဓားသွေးကျောက်က လုံလောက်အောင် မလေးလံသေးဘူး။ အခုထိ လုံလောက်အောင် မလေးလံသေးဘူး…"

လီအာ့ဆီတွင် ရှိနေသည်မှာ လက်သီးတစ်စုံသာ ဖြစ်သည်။ သို့သော် သူကတော့ အနည်းငယ်လေးပင် တွေဝေနေခဲ့ခြင်း မရှိချေ။ သူက တာ့ဆွေတိုင်းပြည်၏ နဂါးချီစွမ်းအင်များ ကျေးဇူးကြောင့် နတ်ဘုရားခန္ဓာကိုယ် ရထားသော မိန်းမစိုးခေါင်းဆောင်ဆီသို့ ပြေးသွားခဲ့သည်။

တစ်ဖက်လူကလည်း လီအာ့ဆီသို့ ပြေးဝင်လာခဲ့၏။ သိုင်းပညာတာအို၏ အထွဋ်အထိပ်တွင် ပြောပလောက်စရာ ကျင့်စဉ်များများ မရှိခဲ့ပေ။ အရာအားလုံးက အရှိန်၊ စွမ်းအားနှင့် တိကျမှု လျော့ကျသွားခြင်းသာ ဖြစ်၏။ အဓိက ရည်ရွယ်ချက်ကတော့ အလွန်ကြီးမားသော စွမ်းအားများနှင့်အတူ ပြိုင်ဘက်၏ အားနည်းချက်ကို အလျင်မြန်ဆုံး တိုက်ခိုက်ရန်သာ ဖြစ်သည်။

သူတို့က အချင်းချင်း တိုက်ခိုက်နေကြသည်မှာ ကျောက်တုံးထဲမှ ဖြတ်သန်းစီးဆင်းလာသော ရေစက်များကဲ့သို့ ဖြစ်နေသည်။ ထိုအရာက တခြားသူများကို အံ့ဩသွားစေနိုင်သော တိုက်ပွဲတစ်ခု ဖြစ်၏။ လူတိုင်းကတော့ အသက်ရှင်ရန် ဘေးတွင် ရပ်ကြည့်နေကြရသည်။ ကျန်ရှိနေသူက အသက်ရှင်ရမည်ဖြစ်ပြီး လဲကျသွားသူက သေဆုံးရမည်ဖြစ်၏။ ထိုအရာက အလွန်ရိုးရှင်းလှ၏။

တိုက်ခိုက်သူနှစ်ယောက်လုံးက အဆင့်(၉) အထွဋ်အထိပ်တွင် အစွမ်းထက်သော သိုင်းပညာရှင်များ ဖြစ်ကြသည်။ သူတို့၏တိုက်ခိုက်မှုတစ်ခုချင်းဆီတိုင်းက နန်းတော်၏ အစွန်တွင် ရှိနေသော ကျင့်ကြံသူများနှင့် သိုင်းပညာရှင်များအားလုံးကို အစီအစဉ်မကျ ဖြစ်သွားစေနိုင်ပြီး သူတို့၏ ချီစွမ်းအားနှင့် စိတ်ဝိညာဉ်စွမ်းအားများက တုန်လှုပ်သွားသလို ခံစားမိစေခဲ့၏။

လီအာ့နှင့် မိန်းမစိုးခေါင်းဆောင်၏ တိုက်ပွဲက အင်မော်တယ်များ၏ တိုက်ပွဲထက် နိမ့်ကျခြင်းတော့ မရှိချေ။ ထိုအရာက ကျင့်စဉ်အဆင့်နိမ့်ကျသော သိုင်းပညာရှင်များ၏ တိုက်ပွဲကဲ့သို့ မဟုတ်ဘဲ ထိုအရာက အထက်ဘုံမှ တိုက်ပွဲများကဲ့သို့ အလွန်ကြောက်စရာကောင်းသည်ဟု သတ်မှတ်နိုင်သည်။

အင်မော်တယ်များကြားထဲတွင် ပြောပြရန် မလိုအပ်သော စည်းမျဉ်းတစ်ခု ရှိနေ၏။ ထိုကဲ့သို့ အဆင့်ရှိသော တိုက်ပွဲတစ်ခုကို ကြည့်နေသည့်အချိန်တွင် အနီးတွင် ရပ်နေခြင်းက လူတစ်ယောက်၏ အသက်ကို အလွယ်တကူ ရှုံးနိမ့်သွားနိုင်သည်။ ထိုတိုက်ပွဲအကြောင်း လက်ခုပ်တီးခြင်း၊ ဝမ်းသာအားရ အော်ဟစ်ခြင်း၊ မှတ်ချက်ပေးခြင်းများက ပို၍ပင် ဆိုးရွား၏။

ကျင့်ကြံသူများ၏ တိုက်ပွဲများထဲတွင် ရတနာဝင်္ကပါမျိုးစုံ ပါဝင်ပတ်သက်နေတတ်သည်။ ကြီးမားသော နယ်မြေအတွင်း သက်ရောက်နိုင်သော တိုက်ခိုက်မှုများလည်း ပါဝင်နေတတ်သည်။ တိုက်ပွဲက ပို၍ကြောက်စရာကောင်းလေလေ တိုက်ခိုက်သူများက ပို၍ ခရီးရောက်လေလေ ဖြစ်သည်။

သူတို့က တိုက်ပွဲတစ်ပွဲ အတွက်ကြောင့် တိုက်ပွဲကွင်းပြင်ပေါင်းများစွာကို အလွယ်တကူ ဖြတ်ကျော်သွားတတ်ကြ၏။ ထိုအရာက ကီလိုမီတာပေါင်းများစွာတွင် ရှိနေသော အရာအားလုံးကိုပင် ဖျက်ဆီးပစ်တတ်သည်။ ထို့ကြောင့် ထိုကဲ့သို့ တိုက်ပွဲကို ဖျော်ဖြေရေးသက်သက် ကြည့်ရှုခြင်းက ကိုယ့်ကိုယ်ကို သတ်သေရန် ကြိုးစားခြင်းနှင့် အတူတူသာ ဖြစ်ပါလိမ့်မည်။

အစွမ်းထက်သော ကျင့်ကြံသူများနှင့် သိုင်းပညာရှင်များက စွန့်စားမှုများပြုလုပ်ပြီး ထိုကဲ့သို့ တိုက်ပွဲမျိုးကို ကြည့်ရှုကြသည်မှာ တိုက်ပွဲကို လေ့လာရန် ရည်ရွယ်နေခြင်းကြောင့် ဖြစ်သည်။ တချို့ကတော့ ထိုတိုက်ပွဲကို လေ့လာပြီး သူတို့၏ ကိုယ်ပိုင်အားနည်းချက်များ၊ ဟာကွက်များကို စစ်ဆေးဖော်ထုတ်တတ်ကြသည်။ ထိုအရာကို ဖျော်ဖြေရေးသက်သက် ကြည့်ရှုကြခြင်း မဟုတ်ဘဲ ပြိုင်ဘက်များက မည်သည့်အရာမျိုးလုပ်လျှင် ပိုကောင်းသည်ဟု မှတ်ချက်ပေးကြခြင်းဖြစ်၏။

ထို့ကြောင့် သူက ထိုကဲ့သို့ ပြင်းထန်သော တိုက်ပွဲတစ်ခုတွင် ရှိနေလင့်ကစား မိန်းမစိုးခေါင်းဆောင်ကတော့ ကြည့်ရှုသူများ၏ ဘေးကင်းလုံခြုံမှုအတွက် လီအာ့နှင့် စည်းမျဉ်းတစ်ခု ကန့်သတ်ခဲ့ကြရ၏။

"ဒီကွင်းပြင်ထဲကနေ ထွက်သွားတဲ့သူက အလိုလို ရှုံးတယ်လို့ သတ်မှတ်နိုင်တယ်…"

လီအာ့က ထိုသဘောတူညီချက်ကို ခေါင်းညိတ်ခဲ့သည်မှာ ကျေးဇူးတင်စရာ ကောင်းလှသည်။ ထို့ကြောင့် သူတို့၏ အံ့ဩစရာတိုက်ပွဲက ဆက်လက် ထွက်ပေါ်လာခဲ့ကြ၏။ သိုင်းလေ့ကျင့်ရေးခန်းမ၏ အပြင်ဘက် မြေကွက်လပ်ကြီးက အလွန်ပြန့်ပြူးပြီး ညီညာနေသည်။ သို့သော် လက်ရှိအချိန်တွင်တော့ ထိုနေရာတွင် အက်ကွဲကြောင်းကြီးများ၊ အပေါက်အပြဲများ ပြည့်နှက်နေသည့်အတွက် လုံးဝကို မှတ်မိစရာ မရှိတော့ချေ။

ထိုကွင်းပြင်၏ နှစ်ဖက်လုံးတွင် ရှိနေသော မြင့်မားသော နံရံကြီးများကပင် အပေါက်ကြီးများစွာ ပြည့်နှက်နေခဲ့၏။ လီအာ့၏ နောက်တွင် ရှိနေသော နံရံတွင် အပေါက် (၄)ခု (၅)ခုခန့်သာ ရှိသည်။ သို့သော် မိန်းမစိုးခေါင်းဆောင်၏ နောက်ကျောတွင် ရှိနေသော နံရံကတော့ ပို၍ ထိခိုက်မှုများပြား၏။ ထိုအရာက တစ်ခုနှင့်တစ်ခု လက်သီးချက်များကြောင့် ဖြစ်၏။ နံရံတစ်ပိုင်းတွင် အပေါက် (၃)ပေါက်စာခန့် ရှိနေသည့်အတွက် ထိုနံရံက လုံးဝကို ပြိုကျသွားခဲ့သည်။ တံခါးတစ်ခု ဖန်တီးလိုက်သလိုပင် ထင်မှတ်ရ၏။ သို့သော် သူတို့တွေ တစ်ယောက်မျှ နံရံ၏ စည်းအပြင်ဘက်ကို ထွက်မသွားခဲ့ကြပေ။

ထို့ကြောင့် တိုက်ပွဲ၏ ရလဒ်က ယခုအချိန်ထိ ထွက်မလာသေးပေ။ မိန်းမစိုးခေါင်းဆောင်က နောက်ခြေထောက်ကို သေချာပေါက် အားပြုထားရ၏။ တိုက်ပွဲက ကြာလာသည်နှင့်အမျှ သူက တဖြည်းဖြည်းပို၍ အစွမ်းထက်လာပြီး ပင်ပန်းသွားသည့် လက္ခဏာမျိုး မပြခဲ့ပေ။ သူ၏အနီရောင် စပါးအုံးဝတ်စုံက ပို၍ပျက်စီးလာသော်လည်း ဖျက်စီး၍မရနိုင်သော နတ်ဘုရားခန္ဓာကိုယ်ကတော့ ယခင်တုန်းကထက် ပို၍ တောက်ပလာနေသေးသည်။

နန်းတွင်းထဲတွင် မိန်းမစိုးခေါင်းဆောင်က အသာစီးရနေခဲ့၏။ သူကတော့ အားနည်းသော အဆင့်(၉) သိုင်းပညာရှင်အဆင့်မှနေ၍ အလွန်အစွမ်းထက်သော ပညာရှင်တစ်ယောက်အဖြစ် မြင့်တက်လာခဲ့ပြီး ဆက်တိုက်ပေါင်းစပ်လာနေသော နဂါးချီစွမ်းအင်များကြောင့် သူက ပြိုင်ဘက်ကင်း ဖြစ်နေခဲ့သည်။

နောက်ဆုံး တိုက်ခိုက်မှုများအတောအတွင်း မိန်းမစိုးခေါင်းဆောင်က လီအာ့၏ ခေါင်းကို လက်သီးနှင့် တိုက်ခိုက်မိခဲ့သည်။ တစ်ချိန်တည်းတွင် လီအာ့၏ လက်သီးချက်က သူ့ရင်ဘတ်ကို တိုက်ခိုက်မိခဲ့၏။

လီအာ့က နောက်သို့ လွင့်သွားသော်လည်း သူ့နောက်တွင် ရှိနေသော နံရံကို ခြေထောက်နှင့်ကန်ပြီး အလွန်လျင်မြန်စွာ ရှေ့သို့ ပျံသန်းလာခဲ့သည်။ သူ ခြေကန်ရန် အသုံးပြုခဲ့သော နံရံကတော့ ချက်ချင်း ပြိုကျသွားခဲ့၏။

ထိုအချိန်တွင် မိန်းမစိုးခေါင်းဆောင်ကလည်း တိုက်ခိုက်မှုကြောင့် နောက်ဆုတ်သွားခဲ့ရသည်။ နောက်ပြန်ဆုတ်ရသည့် သူ၏ခြေတစ်လှမ်းချင်းဆီက မြေကြီးထဲသို့ တဖြည်းဖြည်းပို၍ နက်ရှိုင်းလာပြီး ထိုအရာက ပေ ၁၀၀ ခန့် ရှည်လျားသော မြောင်းကြီးတစ်ခုပင် ဖြစ်လာစေခဲ့သည်။

လီအာ့က အလွတ်မပေးသေးဘဲ လေထဲသို့ ခုန်တက်သွားခဲ့ပြီး လက်နှစ်ဖက်ကို တင်းတင်းဆုပ်၍ မိန်းမစိုးခေါင်းဆောင်ကို အကြိမ်ကြိမ် တိုက်ခိုက်နေခဲ့သည်။ တွင်းနက်ကြီးထဲမှနေ၍ ကျယ်လောင်သော အသံများ ထွက်ပေါ်လာနေသည်မှာ မြင်းခွာသံများကဲ့သို့ ထင်မှတ်ရသည်။

အလွန်ပြင်းထန်သော တုန်လှုပ်မှုတစ်ခုချင်းဆီတိုင်းက မြေကြီးထဲတွင် ပြန့်နှံ့သွားခဲ့ပြီး တွင်းပေါက်ကြီးက တဖြည်းဖြည်း ဆက်၍ ကျယ်ပြန့်လာခဲ့သည်။ အုတ်ကျိုးများကလည်း ကွင်းပြင်၏ မျက်နှာပြင်မှနေ၍ ပတ်ပတ်လည်သို့ လွင့်ပျံသွားခဲ့၏။ လီအာ့က မိန်းမစိုးခေါင်းဆောင်ကို အသုံးချပြီး မြေကြီးထဲသို့ ရေတွင်းတစ်တွင်း တူးနေသလို ထင်မှတ်ရသည်။

မိန်းမစိုးခေါင်းဆောင်ကတော့ တုံ့ပြန်ရန် လုံးဝအစွမ်းမရှိသလို ဖြစ်နေခဲ့၏။ သူက မြေကြီးထဲသို့ တဖြည်းဖြည်းပို၍ နက်ရှိုင်းလာပြီး သူ့ခန္ဓာကိုယ်ထဲမှ ထွက်ပေါ်လာနေသော ရွှေရောင်အလင်းတန်းများကလည်း တဖြည်းဖြည်း လှုပ်ရှားလာခဲ့သည်။

ဓားပျံတစ်ချောင်းပေါ်တွင် ရပ်နေသော အဆင့် (၁၀) ချီကျင့်ကြံသူ၏ မျက်နှာပေါ်တွင် ခပ်ယဲ့ယဲ့အပြုံးတစ်ခု ပေါ်လာခဲ့သည်။ သူက သက်ပြင်းချလိုက်၏။

"ငါက အဆင့်(၉) အထွဋ်အထိပ် သိုင်းပညာရှင်တစ်ယောက်ရဲ့ ရက်စက်ကြမ်းကြုတ်တဲ့ တိုက်ခိုက်ရေးပုံစံကို အခုမှ ပထမဆုံးအကြိမ် မြင်ဖူးတာပဲ…"

သူက ထိုသို့ပြောလိုက်သည့်အချိန်တွင် သူ့ခြေထောက်အောက်၌ ရှိနေသော ဓားပျံကတော့ ပင်လယ်ပြင်ကြီးထဲတွင် လှုပ်ရှားနေသော ဖောင်တစ်ခုကဲ့သို့ အနည်းငယ် လှုပ်ရှားနေခဲ့သည်။ ဤနေရာတွင် အဆင့်နိမ့်သော ကျင့်ကြံသူတစ်ယောက်သာ ဆိုလျှင် သူတို့က ထိန်းချုပ်နိုင်စွမ်းမရှိတော့ဘဲ အဝေးသို့ လွင့်သွားမည်သာ ဖြစ်သည်။

ထိပ်တန်းချီကျင့်ကြံသူတစ်ယောက်ဖြစ်သည့်အတွက် သိုင်းပညာရှင်များ၏ တိုက်ပွဲကို ကြည့်ရှုရခြင်းက သူ့အတွက် အကျိုးကျေးဇူးမရှိချေ။ မည်သို့ဖြစ်စေကာမူ သူက တာဝန်အရ ရှိနေရခြင်းဖြစ်ပြီး အကယ်၍ သူက တာဝန်ကြောင့်သာ မဟုတ်လျှင် ထွက်သွားသည်မှာ ကြာခဲ့ပါပြီ။

တာ့ဆွေတိုင်းပြည်၏ နန်းတွင်းထဲတွင် ဌာနကြီး(၆)ခု၏ ရုံးတော်များနှင့် အရှေ့ပိုင်းခန်းနားခြင်းတောင်ထိပ်ပေါ်၌ ရှိနေသော ချောက်ကမ်းပါးကျောင်းတော် ကဲ့သို့သော နေရာများကို ဆက်သွယ်ထားသည့် လျှို့ဝှက်လမ်းကြောင်းတစ်ခုဆီ ရှိသည်။

ဘုရင်ကြီးက နန်းတွင်းထဲတွင် ရှိနေသော အရာရှိများ သို့မဟုတ် မြို့ထဲတွင် ရှိနေသူများကို သတိမပေးဘဲ ထိုလျှို့ဝှက်လမ်းကြောင်းများထဲမှ ဖြတ်သန်းသွားလာနိုင်စွမ်းရှိသည်။ မဟုတ်လျှင် သူက နန်းတော်ထဲမှ ထွက်သွားသည့် အချိန်တိုင်းအလွန်ကြီးမားသော အရှုပ်အထွေးများ ဖြစ်လာနိုင်ပြီး မြို့ထဲတွင် ရှိနေသူများအားလုံးက သူ ရောက်လာသည်ကို မျှော်လင့်ပြီး လမ်းမများအားလုံးကို ရှင်းလင်းထားပါလိမ့်မည်။

လက်ရှိအချိန်တွင် မောက်ရှောင်တုံက လျှို့ဝှက်လမ်းကြောင်းမှနေ၍ ဖြည်းညင်းစွာ လျှောက်လာပြီး သူနှင့်အတူ တစ်ကိုယ်လုံး ချွေးများ စိုရွှဲနေသော မိန်းမစိုး ခေါင်းဆောင်တစ်ယောက် ပါလာခဲ့သည်။ သိုင်းလေ့ကျင့်ရေးခန်းမအပြင်ဘက်ရှိ မြေကွက်လပ်တွင် လီအာ့နှင့် တိုက်ခိုက်နေသော မိန်းမစိုးခေါင်းဆောင်ကဲ့သို့ သူကလည်း အနီရောင်စပါးအုံးဝတ်စုံတစ်ခုကို ဝတ်ဆင်ထားခဲ့သည်။

သို့သော် သူတို့နှစ်ယောက်လုံးက တူညီသောရာထူးကို ပိုင်ဆိုင်ထားကြသော်လည်း အဆင့်အတန်းကွာဟမှုက အလွန်ကြီးမားလှသည်။ မိန်းမစိုးခေါင်းဆောင်က မောက်ရှောင်တုံကို ပြဿနာမရှာရဲပေ။ ထို့ကြောင့် သူက မြန်မြန်လမ်းလျှောက်ရန်သာ မောက်ရှောင်တုံကို ဂရုတစိုက် တိုက်တွန်းနေနိုင်သည်။

သို့သော် မောက်ရှောင်တုံက အချိန်တိုင်းတွင် စကားနှင့် တုံ့ပြန်နေသော်လည်း သူကတော့ မြန်မြန်လမ်းလျှောက်လာခဲ့ခြင်းမရှိချေ။ သူက မောက်ရှောင်တုံကို ပွေ့ချီပြီး နန်းတော်ထဲသို့ သယ်ဆောင်သွားရန်ပင် အလေးအနက် စဉ်းစားနေခဲ့၏။

…………..

ထိုအချိန်တွင် ချောက်ကမ်းပါးကျောင်းတော်ထဲ၌ ချွေးတုံရှန်းက အရှေ့ပိုင်းခမ်းနားခြင်းတောင်ထိပ်ပေါ်မှ ထွက်ခွာလာပြီးနောက် သူ၏အိပ်ခန်းဆောင်ထဲသို့ လျှောက်လှမ်းလာခဲ့သည်။

သူက ငြိမ်းချမ်းသော ခြံဝန်းငယ်လေးထဲတွင် တစ်ယောက်တည်း ရှိနေခဲ့၏။ လက်ရှိအချိန်တွင် ရှဲ့ရှဲ့၏အဆင့်အတန်းက လုတိုင်းပြည်မှ ပါရမီရှင် ကျင့်ကြံသူတစ်ယောက်ဖြစ်ပြီး ရှဲ့လင်းယွဲ့ဟူသော နာမည်ကိုလည်း ထုတ်ဖော်ခဲ့ပြီးသား ဖြစ်သည်။ သူမက ချွေးတုံရှန်း၏တပည့်အဖြစ် ကြေညာထားခဲ့သည့်အတွက် သူမကလည်း သူနှင့်ခြံဝန်းတစ်ခုတည်းသို့ ရွှေ့ပြောင်းပေးထားခဲ့သည်။

ချွေးတုံရှန်းက ခြံဝန်းထဲသို့ လျှောက်လှမ်းလာခဲ့ပြီး အလွန်သိမ်မွေ့စွာ အင်္ကျီလက်ကို ဝှေ့ယမ်းလိုက်သည်။ ထို့နောက် ကျားကွက်ခုံတစ်ခုနှင့် ကျောက်တုံးဘူးလေးနှစ်ခု ပေါ်လာခဲ့သည်။ ထို့နောက် ကျားကွက်ခုံပေါ်တွင် ကျောက်တုံးလေးများကို နေရာချထားပြီးသားဖြစ်ပြီး ထိုအရာက အလွန်အမင်းကို ရှုပ်ထွေးသော ကစားပွဲပုံစံတစ်ခုရှိသည်။

ချွေးတုံရှန်းက ကျောက်တုံးစားပွဲ၏ ရှေ့တွင် ရပ်နေပြီး အဖြူရောင်ကျောက်တုံးတစ်ခုကို ကောက်ယူ၍ သေချာစဉ်းစားနေပုံရသည်။ သူက အကောင်းဆုံးနေရာချရန် စဉ်းစားနေပုံရ၏။

ခန္ဓာကိုယ်ထဲတွင် ရှိနေသော နဂါးထိန်းချုပ်ခြင်း လက်သည်းတစ်ဝက်ခန့် ဖယ်ရှားလိုက်သည့်အတွက် ရှဲ့ရှဲ့က အဆင့်(၅)ကို ပြန်ရောက်နေပြီဖြစ်သည်။ အကယ်၍ လူတစ်ယောက်ကသာ သူမကို အနီးကပ်ကြည့်လိုက်မည်ဆိုလျှင် သူမ၏ခန္ဓာကိုယ်တစ်ခုလုံး၌ အလင်းရောင်များ ထွက်ပေါ်လာနေသည်ကို မြင်တွေ့ရပါလိမ့်မည်။

ချွေးတုံရှန်းက သက်ပြင်းချလိုက်ပြီး အဖြူရောင်ကျားစေ့လေးကို ဘူးထဲသို့ ပြန်ထည့်လိုက်သည်။ ထို့နောက် သူက ထိုနေရာမှ ပြန်လှည့်ပြီး အခန်းဆီသို့ လျှောက်သွားခဲ့၏။ သူက ထိုနေရာတွင် ထိုင်လိုက်ပြီး ကွန်ဖြူးရှပ်စာအုပ်တစ်ခုကို လက်နှစ်ဖက်နှင့် ကိုင်ပြီး လက်နှစ်ဖက်ကို ခြေထောက်ပေါ်သို့ တင်လိုက်သည်။ လေပြေလေညှင်းတစ်ခု တိုက်ခတ်လာသည့်အချိန်တွင် သူ့ရှေ့၌ ရှိနေသော စာရွက်တစ်ခုက အလိုလိုလှန်သွားခဲ့သည်။

ရှဲ့ရှဲ့က အခန်းဝင်ပေါက်တွင် ရပ်နေပြီး မျက်လုံးထဲတွင်တော့ လေးစားအားကျမှုများ ပြည့်နှက်နေခဲ့၏။ ထိုလေပြေလေညှင်းလေးက ကွန်ဖြူးရှပ်ကျောင်းတော်နှင့် ကျောင်းဆောင်များထဲတွင်သာ တွေ့နိုင်သော စာရွက်လှန်သည့် လေလှိုင်းတစ်ခုလည်း ဖြစ်သည်။ ထိုအရာက ခန့်မှန်း၍မရသလို တွက်ချက်၍လည်း မရနိုင်ပေ။

ထိုအရာက ချွေးတုံရှန်းကို သူမနှင့် ယုလုတို့နှစ်ယောက်လုံး လေးစားရသည့် အချက်လည်းဖြစ်သည်။ သူက မည်သည့်အရာကို စဉ်းစားနေကြောင်း သို့မဟုတ် သူက မည်သည့်အရာကို လုပ်မည်ဖြစ်ကြောင်း သူတို့ လုံးဝမသိကြပေ။

ရုတ်တရက်ဆိုသလို သူမ၏ခေါင်းထဲတွင် ချမ်းပင်အန်းကို တွေးခဲ့မိသည်။ ချမ်းပင်အန်းက ဘာကြောင့် ချွေးတုံရှန်းကို တစ်ချိန်လုံး အညံ့ခံလာအောင် လုပ်နိုင်ကြောင်း သူမလည်း မနေနိုင်ဘဲ စဉ်းစားမိခဲ့သည်။ ထိုအရာက ဆရာဟူသော နာမည်ကြောင့်များ ဖြစ်နိုင်မည်လော။

စိတ်စွမ်းအားယှဉ်ပြိုင်ပွဲဟူသည်မှာ တိုက်ပွဲတစ်ခုနှင့် မကွာခြားချေ။ ထိုအရာက ပြတ်သားသောရလဒ်တစ်ခု ထွက်လာနိုင်သည်။

ချွေးတုံရှန်းက ငြိမ်သက်နေသော်လည်း စာရွက်လှန်လေလှိုင်းကတော့ သူ့ရှေ့တွင် ရှိနေသော စာရွက်များကို လှန်ပေးနေခဲ့သည်။ သူက စာမျက်နှာပေါ်တွင်ရှိနေသော ကွန်ဖြူးရှပ်သူတော်စင်၏ သင်ကြားမှုများကို ငုံ့ကြည့်ပြီး အပြုံးနှင့် ပြောလိုက်၏။

"အိုက်လျန်က မန္တန်တစ်ခုကို ရွတ်ခဲ့ဖူးတယ်။ 'ကမ္ဘာကြီးထဲမှာ ရှိနေတဲ့အချိန် ငါတို့တွေက ငါတို့ရဲ့ကိုယ်ကျင့်တရားတွေနဲ့ လူတွေကို အနိုင်ယူရမယ်။ ငါတို့ရဲ့ ချောမောခန့်ညားမှုနဲ့ ရန်သူတွေကို အနိုင်တိုက်ခိုက်ရမယ်။ ငါ့ဆရာကတော့ ဒီမန္တန်ကို ပြည့်စုံသွားအောင် လုပ်ခဲ့တယ်။ သူ့တပည့်တစ်ယောက်ဆိုမှတော့ ငါကလည်း သူ့ကို အလွယ်တကူ အရှုံးမပေးချင်တာပေါ့…' "

ရှဲ့ရှဲ့က ခေါင်းငုံ့ပြီး သူမ၏ခံစားချက်များကို ပြသရဲခြင်းမရှိချေ။

ချွေးတုံရှန်းက ခေါင်းငုံ့နေပြီး ပြောလိုက်၏။

"ငါ့ဆီကနေ ဝေးဝေးသွားစမ်း ရုပ်ဆိုးမ။ နင်က ငါ့လိုရုပ်ချောတဲ့လူတစ်ယောက်နဲ့ တစ်ခန်းတည်းနေပြီး အရှက်ရသလို ခံစားချင်နေတာလား။ တကယ်လို့ ငါသာ နင့်နေရာမှာဆိုရင် အစောကြီးကတည်းက ကိုယ့်ကိုယ်ကို သတ်သေလောက်ပြီ.."

ရှဲ့ရှဲ့က တလေးတစားပြန်ပြောလိုက်သည်။

"ဒေီအစေခံမလေးကို ခွင့်လွှတ်ပေးပါ…"

"နင် သေချင်တယ်ဆိုရင်လည်း ခြံဝန်းထဲမှာတော့ မသေနဲ့…"

ချွေးတုံရှန်းက ထပ်ဖြည့်ပြောလိုက်သည်။

"တောင်ထိပ်ပေါ်မှာ ဂျင်ဂိုပင်ကြီးတစ်ပင်ရှိတယ်။ နင်က အဲဒီကို သွားပြီးတော့ ကိုယ့်ကိုယ်ကိုယ် ဆွဲကြိုးချသေလိုက်…"

ရှဲ့ရှဲ့က တိတ်တဆိတ် ထွက်ခွာသွားခဲ့သည်။ ထို့နောက် ခြံဝန်းထဲတွင် ရှိနေသော ကျောက်တုံးထိုင်ခုံတစ်ခုပေါ်တွင် ထိုင်ချလိုက်၏။ သူမက ကျားကွက်ခုံ၏ နေရာချမှုများကိုကြည့်ပြီး သူမ၏လက်ရှိပြဿနာများထဲမှ ထွက်ပေါက်တစ်ခုကို တွေးမိသွားသည်လား မျက်လုံးများက ဝင်းလက်တောက်ပလာခဲ့သည်။

ရှဲ့ရှဲ့၏ အငွေ့အသက်မူမမှန်မှုကို ခံစားမိသည့်အခါ အခန်းထဲတွင် ရှိနေသော ချွေးတုံရှန်းက အားရပါးရရယ်လိုက်၏။ သူက ဗိုက်ကို လက်နှင့်ဖိထားပြီး မျက်လုံးထဲမှကျဆင်းလာသော မျက်ရည်များကို သုတ်လိုက်သည်။

"မင်းက ငါ့ဆရာရဲ့ဇနီးဖြစ်လာဖို့ ချန်းပင်အန်းကို လက်ထပ်နိုင်တယ်လို့ တွေးနေတာလား။ မကောင်းဆိုးဝါးမ။ ငါကတော့ ရယ်ရလွန်းလို့ သေတော့မှာပဲ.."

ရှဲ့ရှဲ့က စိတ်ဓာတ်ကျစွာ ချက်ချင်း ပြန်ပြောချင်ခဲ့သော်လည်း ချွေးတုံရှန်းကတော့ ကြမ်းပြင်ပေါ်တွင် လူးလှိမ့်နေခဲ့လေသည်။

Translated by Hein Htet.