အလုပ်တစ်ခုတည်ထောင်ပြီး မျိုးနွယ်တစ်ခုကို စတင်ခြင်း

ကပ်ဘေးအဆင့် နတ်ဆိုးဝိဉာဉ်၏ကြီးမားသည့်စွမ်းအားက ကုချင်းဖန်ကို သူ့ကိုယ်ပိုင်စွမ်းအားကိုမြှင့်တင်ရန် စိတ်အားထက်သန်စေခဲ့သည်။

အပြင်လောက၏ပြောင်းလဲမှုတွေကိုတောင် သူစိတ်ဝင်စားဖို့ အစီအစဉ်မရှိပေ။

ကုချင်းဖန်ထင်ထားသည့်အတိုင်း ကွမ်းယန်ပြည်နယ်ထဲက မျိုးနွယ်တွေနှင့် ဂိုဏ်းပေါင်းများစွာက ကြီးကြီးမားမားဆုံးရှုံးခဲ့ရပြီး အင်အားကြီးပုဂ္ဂိုလ်များစွာ နတ်ဆိုးဗုဒ္ဓ၏လက်ချက်ဖြင့် ကျဆုံးခဲ့ကြရသည်။

ထို့ကြောင့် ကွမ်းယန်ပြည်နယ်၏သိုင်းလောကစွမ်းအားက ရုတ်တရတ် သိသိသာသာလျော့ကျသွားခဲ့သည်။

ဤကဲ့သို့ ရှုပ်ထွေးသည့်ကာလများတွင် နယ်မြေနှင့်သယံဇာတက အလွန်အရေးကြီးသည်။

ကွမ်းယန်ပြည်နယ်၏စွမ်းအားလျော့နည်းလာတာကြောင့် ကွမ်းယန်ပြည်နယ်နှင့်မသက်ဆိုင်သည့် အခြားသိုင်းလောကအင်အားစုများက ဒီနေရာကို မျက်စိကျလာကြသည်။

ဒီလိုနှင့် အခြားပြည်နယ်က သိုင်းလောကအင်အားစုတွေက ကွမ်းယန်ပြည်နယ်ထဲကို လျို့ဝှက်လူလွှတ်ပြီး တဖြည်းဖြည်းကျူးကျော်ဖို့ ကြိုးစားလာကြသည်။

ဒီလို အခြေအနေမျိုးကို ကွမ်းယန်ပြည်နယ်နှင့်သက်ဆိုင်သည့် နှစ်ထောင်ချီသက်တမ်းရှိသည့် မျိုးနွယ်စုတွေနှင့် ဂိုဏ်းတွေက သဘောတူမည်မဟုတ်ပေ။

ထိုဂိုဏ်းတွေနှင့် မျိုးနွယ်စုတွေက နှစ်ပေါင်းများစွာအမြစ်တွယ်နေခဲ့ပြီးဖြစ်တာကြောင့် တခြားအပြင်လူအင်အားစုတွေကို ကျူးကျော်ခွင့်ပေးလိုက်ရင် သူတို့ကိုယ်ပိုင်အမြစ်ကို တူးဆွတာနှင့်တူသည်။

ဤသို့သောအခြေအနေမျိုးကို သူတို့လုံးဝသည်းမခံနိုင်ပေ။

ပဋိပက္ခတွေကို ရှောင်လွှဲလို့မရပေ။

ကွမ်းယန်ပြည်နယ်၏သိုင်းလောကစွမ်းအားက ပြင်းပြင်းထန်ထန်ထိခိုက်ခဲ့ရပေမယ့် နှစ်ပေါင်းတစ်ထောင်ကျော်သက်တမ်းရှိသည့် အမွေအနှစ်မို့လျှော့တွက်လို့မရပေ။ သူတို့လောလောဆယ်အခြေအနေကို မနည်းထိန်းထားကြရသည်။

တစ်ဖက်မှာ ကျောက်ဖြူဒေသမှာလည်း အခြားအင်အားစုတွေက လှုပ်ရှားချင်နေသည်။

သို့သော် ကုချင်းဖန်ကိုယ်တိုင်ပါဝင်ပြီး မိုးကြိုးပစ်ချသလို အင်အားကြီးပုဂ္ဂိုလ်တွေကို တစ်ချက်တည်းနှိမ်နင်းလိုက်တော့ ပြိုင်ဘက်ကင်းဓားသိုင်းရှင်ဂုဏ်သတင်းက တဖန်ပြန့်နှံ့သွားပြီး ကျောက်ဖြူဒေသကို ပစ်မှတ်ထားလိုသည့် သိုင်းလောကအင်အားစုတွေက ရှုံးနိမ့်သွားကြသည်။

သိုင်းဆရာအဆင့်တစ်ဝက်၏ဂုဏ်သတင်းကို လျော့တွက်လို့မရပေ။

ထို့အပြင် ကွမ်းယန်ပြည်နယ်အတွင်း ကျောက်ဖြူဒေသ၏အဆင့်သတ်မှတ်ချက်သည် ထိပ်ဆုံးတွင် မပါဝင်သည့်အပြင် အကန့်အသတ်ရှိသော သယံဇာတများကိုသာပိုင်ဆိုင်သောကြောင့် သိုင်းဆရာအဆင့်တစ်ဝက်ရှိသူနှင့် ကျောက်ဖြူဒေသအတွက် အသေခံတိုက်ရန် မထိုက်တန်ပေ။

မျက်စိတစ်မှိတ်အတွင်း နှစ်နှစ်တာကာလကုန်လွန်ခဲ့သည်။

ယနေ့ ကုမိသားစုအိမ်တော်သည် မီးရောင်စုံများဖြင့် ထွန်းလင်းကာ ဧည့်သည်များဖြင့် စည်ကားနေသည်။

ယနေ့သည် ကုမိသားစုအိမ်တော်၏ သခင်လေး မင်္ဂလာပွဲကြီးကျင်းပသည့်နေဖြစ်သောကြောင့် ဖြစ်သည်။

ပွဲနေရာတွင် ကွမ်းယန်ပြည်နယ်အတွင်းမှ နာမည်ကျော်သိုင်းလောကအင်အားကြီးများစွာ ရောက်ရှိလာကြသည်။

“ဒီတစ်ခါ ကုချင်းဖန်လက်ထပ်မယ့်သူက သာမန်နောက်ခံကလာတာလို့ ကြားတယ်”

“ဟုတ်တယ် အင်အားကြီးတွေက ကုမိသားစုအိမ်တော်နဲ့ မဟာမိတ်ဖွဲ့ဖို့ကြိုးစားပေမယ့် ကုချင်းဖန်မျက်လုံးထဲကို တစ်ယောက်မှမဝင်ခဲ့ဘူးလို့ ကြားတယ် ဒီအမျိုးသမီး ကုမိသားစုအိမ်တော်ထဲကို လက်ထပ်ဝင်နိုင်တာ သူတကယ်ပဲ ဖီးနစ်ငှက်အကိုင်းအခက်ပေါ်တက်လာတာပဲဖြစ်မယ်”

“ဒီနှစ်အနည်းငယ်အတွင်းမှာ ကုမိသားစုအိမ်တော်နာမည်က ပိုပြီး နာမည်ကြီးလာတယ် ပြိုင်ဘက်ကင်းဓားသိုင်းရှင် ကုချင်းဖန်ဆိုတဲ့နာမည်ကို မသိတဲ့သူ ဘယ်သူရှိလို့လဲ ကွမ်းယန်ပြည်နယ်က ရှုပ်ထွေးနေပေမယ့် ကျောက်ဖြူဒေသက အရင်လိုတည်ငြိမ်နေတာ မတွေ့ဘူးလား”

“အင်း ကုချင်းဖန်မျက်လုံးထဲဝင်နိုင်တဲ့ ကောင်းကင်ဘုံက နတ်သမီးမျိုးဆို ဘယ်လိုဖြစ်မလဲမသိဘူး”

ပွဲနေရာတွင် လူတော်တော်များများက အချင်းချင်း တီးတိုးပြောဆိုကာ တက်တက်ကြွကြွဆွေးနွေးနေကြသည်။

သူတို့စကားများတွင် ကုမိသားစုအိမ်တော်သို့ လက်ထပ်ဝင်ရောက်မည့် အမျိုးသမီးကို မနာလိုနေသည်မှာ ပေါ်လွင်နေသည်။

ယခု ကုမိသားစုအိမ်တော်က ထိပ်တန်းအင်အားကြီးတစ်ခုဖြစ်နေပြီ။

အနည်းဆုံးတော့ ကွမ်းယန်ပြည်နယ်အတွင်း ကုမိသားစုအိမ်တော်ဂုဏ်သတင်းသည် ကျယ်လောင်စွာ ပဲ့တင်ထပ်နေပြီး နှစ်ထောင်ချီသက်တမ်းရှိသည့် ဂိုဏ်းကြီးများနှင့် အတူတူပဲဖြစ်သည်။

သိုင်းဆရာအဆင့်တစ်ဝက်သည် ရယ်စရာမဟုတ်ပေ။

အင်အားကြီးများစွာက ကုမိသားစုအိမ်တော်နှင့် မဟာမိတ်ဖွဲ့ချင်ပေမယ့် မဆက်သွယ်နိုင်ခဲ့ပေ။

အခြားအင်အားကြီးများနှင့်မတူဘဲ ကုမိသားစုအိမ်တော်၏လက်ရှိထင်ပေါ်ကျော်ကြားမှုနှင့်ဆို မဟာမိတ်ဖွဲ့ပြီး ကိုယ့်အခြေခံအုတ်မြစ်ကို ခိုင်မာအောင်လုပ်နိုင်သလို မဟာမိတ်မဖွဲ့ဘဲနှင့်လည်း တည်ငြိမ်စွာ ဖွဲ့ဖြိုးတိုးတက်နိုင်သည်။

ပြိုင်ဘက်ကင်းဓားသိုင်းရှင် အသက်ရှင်နေသရွေ့ မည်သူက ကုမိသားစုအိမ်တော်ကို ထိခိုက်နိုင်မည်နည်း။

“မင်္ဂလာမောင်နှံ ရောက်ရှိလာပါပြီ”

ကြေညာလိုက်သည်နှင့် တီးတိုးစကားသံများတိတ်ဆိတ်သွားပြီး လူတိုင်းတစ်နေရာတည်းကို လှည့်ကြည့်လိုက်သည်။ စုံတွဲတစ်တွဲသည် ဖြေးညှင်းစွာ လျှောက်လှမ်းလာသည်။

ယောကျာ်းလေးမှာ အရပ်ရှည်သွယ်လျပြီး မျက်ခုံးထူထူ၊ တောက်ပသောမျက်လုံးများနှင့် နဖူးပြင်တစ်လျှောက်တွင် သူရဲကောင်းဆန်သောအငွေ့အသက်များ ထွက်ပေါ်လာနေသည်။

မည်သူမဆို ဤမြင်ကွင်းကို မြင်လိုက်သည်နှင့် “ထူးချွန်တဲ့လူငယ်လေးပဲ”ဟုတိတ်တိတ်လေး ချီးကျူးမိကြသည်။

သို့သော် ချောမောပြီး ဖော်ရွေပုံရသော်လည်း ကုမျိုးနွယ်စုသခင်လေးသည် အလွန်ပင်ရက်စက်ပြီး ငယ်စဉ်ကတည်းက ကျော်ကြားကာ သိုင်းလောကမှ သိုင်းသမားမြောက်များစွာ သူ့လက်ချက်ဖြင့် သေဆုံးခဲ့ကြရသည်။

အနီရောင်ခြုံလွှာအောက်က မျက်နှာကိုတော့ လောလောဆယ်ရှင်းရှင်းလင်းလင်းမမြင်ရသေးပေ။

သို့သော် ညင်သာသောလေညှင်းသည် တစ်ခါတစ်ရံ ခြုံလွှာကို အနည်းငယ်မတင်လိုက်ရာ သိမ်မွေ့လှပသောမျက်နှာလေးပေါ်လာသည်။

ထိုမျက်နှာကို မြင်တွေ့လိုက်ရသောအခါ လူများသည် စိတ်ပျက်အားငယ်သွားကြသည်။

သူမက ရုပ်ဆိုးနေတာကြောင့်မဟုတ်ပေ။

သူမ့အလှကို မှတ်ချက်ပေးရမည်ဆိုလျှင် ဤအမျိုးသမီးသည် အတော်လေးဆွဲဆောင်မှုရှိသည်။

သို့သော် သူမ့ခင်ပွန်သည် ကုမျိုးနွယ်စု၏သခင်လေး ဖြစ်သည်ကို ထည့်သွင်းစဉ်းစားလျှင် သူမသည် တစ်စုံတစ်ရာကွာခြားနေသည်ဟုထင်ရသည်။

“ကောင်းကင်နဲ့ မြေကြီးကို ဦးညွှတ်ပါ”

“မိဘများကို ဦးညွှတ်ပါ”

“ဇနီးမောင်နှံနှစ်ဦး အချင်းချင်း ဦးညွှတ်ကြပါ”

“မင်္ဂလာအခမ်းအနား ပြီးမြောက်ပါပြီ”

မင်္ဂလာပွဲတစ်ခုလုံးသည် ရှုပ်ထွေးမှုမရှိဘဲ ချောချောမွေ့မွေ့ ပြီးဆုံးသွားသည်။ ထိုင်ခုံတွင် ထိုင်နေသည် ကုချင်းဖန်သည် ကျေနပ်အားရမှုအနည်းငယ်ဖြင့် ကြည့်နေခဲ့သည်။

ပွင့်ပွင့်လင်းလင်းပြောရလျှင် ကုယန်သည် သူကိုယ်တိုင်ပြုစုပျိုးထောင်ခဲ့ရသူဖြစ်သည်။

ယခုသူ့သား အိမ်ထောင်ကျပြီးအလုပ်စတင်လုပ်ကိုင်နေသည်ကို မြင်ရတော့ အဖေတစ်ယောက်အနေဖြင့် စိတ်မလှုပ်ရှားဘူးဟုမပြောနိုင်ပေ။

သူ့ဘေးက ရွှီယူလန်က ပြုံးရယ်နေပြီး နှစ်တွေကြာလာသည်နှင့် သူမ့ရုပ်ရည်က ပိုပြီးဆွဲဆောင်မှုရှိလာသည်။

“သင့်မျိုးဆက် ကုယန်သည် မိသားစုတည်ထောင်ပြီ(တစ်ကြိမ်သာ ရရှိနိုင်သည်)”

“ဆုကြေး အဆင့်မြှင့်တင်ရေးမှတ် ၃၀”

ကုချင်းဖန်မျက်နှာသည် အနည်းငယ်ပြောင်းလဲသွားပြီး အချက်အလက်ပြဇယားတွင် ပေါ်လာသောစာကို ကြည့်လိုက်ရာအနည်းငယ်အံ့အားသင့်သွားသော်လည်း စိတ်သက်သာရာရသွားသည်။

မျိုးဆက်တစ်ခု မိသားစုတည်ထောင်ခြင်းသည် အမှန်တကယ်အရေးပါသော အဖြစ်အပျက်တစ်ခုဖြစ်ပြီး ပေးထားသောဆုကြေးသည်လည်း သင့်လျော်သည်။

အနည်းဆုံးတော့ အဆင့်မြှင့်တင်ရေးမှတ် သုံးဆယ်က အတော်များများကို လုပ်ဆောင်နိုင်သည်။

ဧည့်ခံပွဲသည် ခုနစ်ရက်တိုင်အောင် ကြာမြင့်ခဲ့ပြီးမှ ဧည့်သည်များအားလုံး နောက်ဆုံးတွင် ပြန်သွားကြသည်။

မူလက စည်ကားခဲ့သော ကုမိသားစုအိမ်တော်သည် ပုံမှန်အတိုင်း တိတ်ဆိတ်ငြိမ်သက်မှုဆီသို့ တစ်ဖန် ပြန်ရောက်ရှိလာခဲ့သည်။

ကုချင်းဖန်သည် ဓားသွေးခန်းမတွင် တစ်ယောက်တည်းထိုင်နေပြီး အချက်အလက်ပြဇယားကို ကြည့်နေသည်။

အမည်: ကုချင်းဖန်

အသက်: ၃၉/၂၀၀

နယ်ပယ်: ကိုယ်အင်္ဂါ သန့်စင်ခြင်း ဒုတိယအဆင့်

သိုင်းပညာများ: ဂူမိသားစုလက်သီး (မကျိုးပဲ့နိုင်သော အဆင့်တစ်)၊ သံကိုယ်ထည် ကျင့်စဉ်များ (သံကဲ့သို့ မာကျောသော ကိုယ်ထည် အဆင့်တစ်)၊ ကျောက်တုံးဖြိုခွဲလက်သိုင်း (ပြည့်စုံခြင်း)၊ သံခြေထောက်ကျင့်စဉ် (ပြည့်စုံခြင်း)၊ သံသန့်စင်လက်ချောင်း (ပြည့်စုံခြင်း)၊ နေမီးနတ်ဘုရားလက်ဝါး (ပြင်းထန်သောနေလက်ဝါးစွမ်းအား အဆင့်လေး)၊ ကောင်းကင်မိုးကြိုးဓားကျင့်စဉ်များ (အစပျိုး)၊ သံသန့်စင်ရွှေရောင်ကိုယ်ထည် (ရွှေရောင်ကိုယ်ထည် မကျိုးပဲ့နိုင်သော အဆင့်ကိုး၊ ခုနစ်သတ်ဓားကျင့်စဉ်များ (သတ်ဖြတ်စစ်မှန်သော သိုင်းသတ္တိ အဆင့်နှစ်)၊ ကောင်းကင်ဂန်းလွှမ်းမိုးကိုယ်ထည် (ချီစွမ်းအင် အဆင့်လေး)၊ ကောင်းကင်ဂန်းနတ်ဘုရားကိုယ်ထည် (မသေနိုင်သော နတ်ဘုရားကိုယ်ထည် အဆင့်တစ်)၊ အစိမ်းရောင်နေကျင့်စဉ် (နဝမအဆင့် ပြည့်စုံခြင်း၊ စင်ကြယ်သော ယန် ချီသွေး အဆင့်ရှစ်)၊ ကိုယ်တွင်းအင်္ဂါငါးပါး ကျမ်း (ဒုတိယအဆင့်၊ နတ်ဘုရားကဲ့သို့ အင်္ဂါငါးပါး အဆင့်နှစ်)၊ ယွမ်ရတနာကျမ်း (ဒုတိယအဆင့်၊ သံကဲ့သို့ ကိုယ်တွင်းအား သန့်စင်ခြင်း၊ အဆင့်နှစ်)၊ ပြိုင်ဘက်ကင်းဓားခုတ်ချက် (အသေးစားအောင်မြင်ခြင်း၊ ပြိုင်ဘက်ကင်းဓားစစ်မှန်သော သိုင်းသတ္တိ အဆင့်ခုနစ်)

အဆင့်မြှင့်တင်ရေးမှတ်များ: ၃၄

နှစ်နှစ်တာ ကာလတင် ယေဘူယျအားဖြင့် ကုချင်းဖန် သိသိသာသာ မပြောင်းလဲခဲ့ပေ။

ကိုယ်တွင်းအင်္ဂါငါးပါး ကျမ်းဖြစ်စေ ယွမ်ရတနာကျမ်းဖြစ်စေ ထူးထူးခြားခြားမအောင်မြင်ခဲ့ပေ။

ဤအရာက ရှောင်လွှဲလို့မရသည့် အခြေအနေဖြစ်သည်။

ကိုယ်အင်္ဂါသန့်စင်ခြင်းခြေလှမ်းတိုင်းက လုံးဝကွဲပြားခြားနားသည်။

ထူးချွန်သည့် သူတွေတောင် ကိုယ်တွင်းအင်္ဂါတစ်ခုကို သန့်စင်ဖို့ အချိန်ကြာမြင့်စွာ ယူရပြီး တဖြည်းဖြည်းပြီးပြည့်စုံအောင် လုပ်ဆောင်ရကာ မတော်တဆတစ်ခုခုဖြစ်လို့မရပေ။

မဟုတ်လျှင် ကိုယ်တွင်းအင်္ဂါသန့်စင်တာ ပြဿနာတက်ရင်ပြင်းပြင်းထန်ထန် ထိခိုက်နိုင်ပြီး အဆိုးဆုံးက သေဆုံးနိုင်သည်။

ထို့အပြင် ကုချင်းဖန်ပါရမီက ထူးချွန်သူအဖြစ် မသတ်မှတ်နိုင်တာကြောင့် ကိုယ်အင်္ဂါသန့်စင်ခြင်းမှာ ထူးခြားသည့် တိုးတက်မှုများစွာမရှိသည်မှာသဘာဝကျသည်။

သို့သော် အစိမ်းရောင်နေကျင့်စဉ်အပိုင်းတွင် ကုချင်းဖန်က ထိုနှစ်နှစ်ကို အသုံးချပြီး ဤအဆင့်မြင့်ဆုံးကျင့်စဉ်ကို ပြည့်စုံခြင်းအဆင့်ထိ ကျင့်ကြံနိုင်ခဲ့သည်။