အခန်း (၁၅၄)

သန့်စင်သော အောက်ဆီဂျင်၏ အကူအညီဖြင့် ကုသရေး မှော်ပညာများနှင့် ရောဂါဝေဒနာတို့အကြား အားပြိုင်မှုက နောက်ဆုံးတွင် အကျပ်အတည်းမှ လွတ်မြောက်သွားခဲ့သည်။ အကြီးအကဲ ဝုဒ်သည် သန့်စင်သော အောက်ဆီဂျင် ပူဖောင်း မှော်ပညာကို ထိန်းသိမ်းထားပြီး သူ၏ဘေးမှ အဆင့် ၅ ဘုန်းတော်ကြီးကမူ လူနာ၏ ရောဂါလက္ခဏာများကို အောင်မြင်စွာ ထိန်းချုပ်နိုင်ရန် ကုသရေး မှော်ပညာများကို ဆက်တိုက် ရွတ်ဆိုနေခဲ့သည်။

ကုသမှု ပြီးစီးပြီး လူနာကို ပြန်လွှတ်ပြီးနောက် အကြီးအကဲ ဝုဒ်သည် ဂါးရက် နော့ဒ်မတ်ခ်ကို ရုတ်တရက် ၆၀ ဒီဂရီ စင်တီဂရိတ် မြင့်တက်လာသော မျက်လုံးများဖြင့် ကြည့်လိုက်သည်။

ယခင်က ၄၀ ဒီဂရီခန့် နွေးထွေးသောရေကဲ့သို့ သက်တောင့်သက်သာရှိပြီး "အော် ဝေးကွာတဲ့ နေရာက တပည့်တစ်ဦးပါလား" ဟူသော အထင်ဖြင့် ကြည့်ရှုခဲ့သော်လည်း ဂါးရက်က သူ၏အရည်အချင်းကို ပြသပြီးနောက် ချက်ချင်းဆိုသလို ၁၀၀ ဒီဂရီ စင်တီဂရိတ်အထိ မြင့်တက်သွားကာ ဆူပွက်လုနီးပါးပင်။

အကြီးအကဲ ဝုဒ်သည် မူလကပင် စိတ်ထားနူးညံ့သူဖြစ်သည်။ ဤချစ်ခင်ဖွယ်ရာ အဖိုးအိုသည် သူ၏လက်ထဲရှိ မှန်ပြွန်ကို စိုက်ကြည့်နေပြီး မျက်လုံးများက ပြွန်အတွင်းရှိ ဓာတ်ငွေ့ကို သူ့လက်ချောင်းထိပ်များဖြင့် စစ်ဆေးကြည့်ချင်လွန်း၍ ပြူးထွက်လုမတတ်ပင်။ သို့သော် အကြိမ်အနည်းငယ် ကြည့်ပြီးနောက် မျက်နှာလွှဲကာ မှန်ပြွန်ကို ပြန်ပေးလိုက်သည်။

"ကျေးဇူးတင်ပါတယ်။ ဟွန်း မင်းက ဂါးရက် နော့ဒ်မတ်ခ်လား။ အယ်လ်ဝင်းရဲ့ တပည့်ပဲ မဟုတ်လား"

ဂါးရက် လျင်မြန်စွာ စာကို ကမ်းပေးလိုက်သည်။ အကြီးအကဲ ဝုဒ်သည် စာကို တစ်မျက်နှာချင်းစီ သေချာဖတ်ပြီး အံ့ဩလည်း အံ့ဩသလို ရယ်လည်း ရယ်မောနေသည်။

"ဘုန်းတော်ကြီးရော၊ မှော်ဆရာရော နှစ်မျိုးလုံး လုပ်ဆောင်နေတာလား။ ကပ်ရောဂါကို တိုက်ခိုက်ဖို့ မှော်ကောင်စီရဲ့ လေ့ကျင့်မှုကို ရပ်ဆိုင်းထားတာလား။ စစ်မြေပြင်ကိုပါ သွားခဲ့သေးတာလား။ မဆိုးဘူး မဆိုးဘူး။ အယ်လ်ဝင်းက တပည့်ကောင်းတစ်ယောက်ကို ရထားတာပဲ"

သူ့၏ ဂါးရက်အပေါ် အကြည့်က ပိုပြီး ချစ်ခင်တွယ်တာလာသည်။

"မင်းရဲ့ ဆရာက ငါ့ရဲ့ နှစ်ပေါင်းများစွာ မိတ်ဆွေကောင်းပဲ။ သူက မင်းကို ဘုရားသခင်ရဲ့ မှော်ပညာ ဆက်သင်ပေးဖို့ ပြောခဲ့တယ်။ အခုကစပြီး မင်း ငါနဲ့အတူ ရှိနေတာက မင်းရဲ့ ဆရာ့ဘေးမှာ ရှိနေတာနဲ့ တူတူပဲ။ ဘာသံသယရှိရှိ ဘာအကူအညီလိုလို မေးလို့ရတယ်"

"အကြီးအကဲရဲ့ အကူအညီ တောင်းချင်တာ တစ်ခုတော့ ရှိပါတယ်"

ဂါးရက်က ထိုအခွင့်အရေးကို ဆုပ်ကိုင်လိုက်ပြီး စကားဆက်ရန် စိတ်အားထက်သန်နေသည်။

"ဒီနေ့ အကယ်ဒမီမှာ ကျွန်တော့်ဆရာက သုတေသန ပရောဂျက်တစ်ခု ပေးခဲ့တယ်..."

သူသည် သူ၏ ယနေ့ အတွေ့အကြုံများကို အသေးစိတ် ပြောပြခဲ့သည်။ အကြီးအကဲ ဝုဒ်သည် စတင်တွင် ပြုံးရွှင်သော မျက်နှာဖြင့် နားထောင်ခဲ့သော်လည်း ဂါးရက်က သူ၏ ခန့်မှန်းချက်များနှင့် စိုးရိမ်ပူပန်မှုများကို ပြောပြသောအခါ သူ့မျက်နှာအမူအရာ ပြောင်းလဲသွားခဲ့သည်။ ဂါးရက် သူ၏ ထင်မြင်ချက်များနှင့် စိုးရိမ်မှုများကို ပြောပြပြီးသောအခါ အကြီးအကဲ ဝုဒ်သည် မျက်မှောင်ကြုတ်ကာ တံခါးကို တစ်ချက်ကြည့်လိုက်ပြီး သူ၏ ဖြူဖြူဖွေးဖွေး မျက်နှာဖူးဖူးလေးမှ ကြင်နာသော အပြုံး ပျောက်ကွယ်သွားသည်။

"မင်းပြောတာ မှန်တယ်။ မကြာသေးခင်က ငါ လင်းနို့ဖမ်းဖို့ တောင်ပေါ်သွားခဲ့တဲ့ လူနာအတော်များများကို ကုသပေးခဲ့ရတယ်။ အခု ကောင်စီက မိတ်ဆွေတွေကို သတိပေးဖို့ စာတစ်စောင် ရေးလိုက်မယ်"

"အကြီးအကဲက စာတစ်စောင် ရေးပေးမယ်ဆိုရင် ကောင်းတာပေါ့"

ဂါးရက် သက်ပြင်းချလိုက်သည်။

"ဒါပေမဲ့ ကျွန်တော်တို့ ဒီရောဂါတွေနဲ့ လင်းနို့တွေကြားက ဆက်စပ်မှုကို သက်သေပြဖို့ ဒါမှမဟုတ် လင်းနို့တွေနဲ့ နီးကပ်စွာ ထိတွေ့တဲ့အခါ ဖျားနာဖို့ အခွင့်အလမ်းများတယ်ဆိုတာကို အနည်းဆုံး ပြသဖို့ လိုသေးတယ်လို့ ထင်ပါတယ်။ မဟုတ်ရင် အဲဒီ မှော်ဆရာတွေကို ဆွဲဆောင်ဖို့ ခက်ခဲလိမ့်မယ်လို့ ကျွန်တော် စိုးရိမ်တယ်။ သူတို့က စွန့်စားရှာဖွေသူတွေ ဖျားနာတာ တခြားအကြောင်းတွေကြောင့်လို့ ထင်နေနိုင်တယ်"

"ဟွန်း..."

အကြီးအကဲ ဝုဒ် စဉ်းစားနေသည်။ သူသည် သူ၏ မုတ်ဆိတ်ကို စဉ်းစားရင်း အလိုလို လှည့်နေမိသည်။ အနက်ရောင်နှင့် အဖြူရောင် ရောယှက်နေသော မုတ်ဆိတ်သည် သူ၏ လက်ညှိုးတွင် ပတ်ပတ်လည် လိမ်နေပြီး ပိုမို တင်းကျပ်လာသည်။ ဤအရာကို မြင်သောအခါ ဂါးရက်က သူ့မုတ်ဆိတ်ကို တိုက်ရိုက် နုတ်ပစ်လိုက်မည်ကို စိုးရိမ်နေမိသည်။

ကံကောင်းစွာဖြင့် အကြီးအကဲ ဝုဒ်သည် ဤလှုပ်ရှားမှုကို အကျွမ်းတဝင်ရှိပြီးသား ဖြစ်သည်။ နာရီလက်တံအတိုင်း ခုနစ်ကြိမ် သို့မဟုတ် ရှစ်ကြိမ် ပတ်ပြီးနောက် မုတ်ဆိတ်မှာ အဆုံးစွန်ထိ ရောက်ရှိလာချိန်တွင် သူသည် နာရီလက်တံပြောင်းပြန် လှည့်ရန် စတင်လိုက်သည်။ အကြိမ်များစွာ ပြန်လှည့်ပြီးနောက် နောက်ဆုံးတွင် သူသည် မော့ကြည့်ကာ ဂါးရက်ကို တိုက်ရိုက်မေးလိုက်သည်။

"မင်းရဲ့ အစီအစဉ်က ဘာလဲ"

"ကျွန်တော့်မှာ အစီအစဉ်တွေတော့ ရှိတယ်။ ဒါပေမဲ့ တစ်ယောက်တည်းတော့ မလုပ်နိုင်ဘူး။ အကူအညီလိုတယ်" ဟု ဂါးရက်က ပြောကြားခဲ့သည်။ သူသည် မထွက်ခွာမီကတည်းက အစီအစဉ်တစ်ခုကို ချမှတ်ထားပြီး လမ်းတစ်လျှောက်တွင် အကြိမ်ကြိမ် ပြန်လည်ပြင်ဆင်ကာ ချဲ့ထွင်ခဲ့သည်။ ယခုမူ သူသည် ချောမွေ့စွာ မထစ်မငေါ့ဘဲ တင်ပြလိုက်သည်။ သူ ပြောကြားရင်း သူကိုယ်တိုင်လည်း တိတ်တိတ်လေး အံ့ဩမိသည်။

ယခင်က သုတေသန ပရောဂျက်များ လျှောက်ထားစဉ်ကသာ ဤကဲ့သို့ စကားပြောကျွမ်းကျင်မှုရှိခဲ့ပါလျှင် သုတေသနနယ်ပယ်တွင် အသက်မွေးဝမ်းကျောင်းပြုခဲ့မိမည်ဟု။

"ကျွန်တော့် အစီအစဉ်က နှစ်ပိုင်းခွဲထားတယ်။ ပထမပိုင်းအနေနဲ့ လက်ရှိ လူနာတွေကို သုတေသနလုပ်ဖို့ပါ။ အကြီးအဲကခင်ဗျာ၊ အနီးအနားက ဆရာဝန်တွေကို ဆက်သွယ်ပြီး သူတို့ရဲ့ လူနာမှတ်တမ်းတွေကို စုံစမ်းပေးပါ။ မကြာသေးခင်က လင်းနို့တွေနဲ့ နီးနီးကပ်ကပ် ထိတွေ့ခဲ့တဲ့ လူနာတွေထဲမှာ ရောဂါလက္ခဏာ ဆင်တူတဲ့ လူနာအုပ်စုတစ်စုကို ရှာတွေ့နိုင်မယ်ဆိုရင် လင်းနို့တွေက ရောဂါဖြစ်စေနိုင်တယ်လို့ ကနဦး ကောက်ချက်ချနိုင်ပါပြီ"

"အထူးသဖြင့် တောင်ပေါ်ကို လင်းနို့ဖမ်းဖို့ သွားခဲ့တဲ့ စွန့်စားရှာဖွေသူတွေ၊ လင်းနို့ရောင်းတဲ့ ဆိုင်ရှင်တွေနဲ့ ဝန်ထမ်းတွေ၊ လင်းနို့တွေနဲ့ ပတ်သက်ပြီး သုတေသနလုပ်နေတဲ့ မှော်ဆရာတွေအားလုံးမှာ ဒီလိုပဲ ဆင်တူတဲ့ ရောဂါဖြစ်ပွားမှုတွေ ရှိနေမယ်ဆိုရင် သက်သေအထောက်အထားတွေက ပိုပြီး ရှင်းလင်းလာပါလိမ့်မယ်"

အကြီးအဲက ဝုဒ်က ညင်သာစွာ ခေါင်းညိတ်လိုက်သည်။ သူသည် လိမ်ထားသော မုတ်ဆိတ်ကို လွှတ်ပြီး သူ၏ လက်ချောင်းများကို မှုတ်ထုတ်လိုက်ရာ မုတ်ဆိတ်မွေး အဖြူတစ်ပင် အမှန်ပင် ကျလာသည်။ အဖိုးကြီးက သူ၏ လက်ချောင်းထိပ်ကို နောင်တရစွာ ကြည့်လိုက်ပြီးမှ ခေါင်းမော့ကာ တည်ငြိမ်ပြီး ယုံကြည်စိတ်ချရသော မျက်နှာအမူအရာဖြင့် ပြန်လည်ဖြေကြားသည်။

"ဒါ မှန်ကန်တယ်။ မင်းက ဒေသခံ ဆရာဝန်တွေကို မသိဘူး။ ငါ ဆက်သွယ်ပေးမယ်။ ဒုတိယပိုင်းကကော"

"စမ်းသပ်မှုပါပဲ" ဟု ဂါးရက်က နောက်ဆုံးတွင် သူ၏ တောင်းဆိုမှု အနှစ်သာရကို ပြောကြားလိုက်သည်။

"ကျွန်တော့်ရဲ့ အစီအစဉ်ကတော့ အရှင်လင်းနို့အမျိုးမျိုးကို ရှာပြီး ကျန်းမာတဲ့ တိရစ္ဆာန်အမျိုးမျိုးနဲ့ အတူထားပြီး အဲဒီတိရစ္ဆာန်တွေ ဖျားနာလားဆိုတာ ကြည့်ဖို့ပါ။ တိရစ္ဆာန်အမျိုးမျိုးကို ရွေးချယ်ဖို့လိုပါတယ်။ ယုန်တွေ၊ သိုးတွေ၊ မြင်းတွေ၊ ဝက်တွေ၊ ပြီးတော့ ဖြစ်နိုင်ရင် မျောက်တွေပေါ့"

"ဒါ့အပြင် လင်းနို့တွေက ဘယ်လို ရောဂါကူးစက်လဲဆိုတာ ကျွန်တော်တို့ မသိသေးတဲ့အတွက် တခြားတိရစ္ဆာန်တွေကို ရှာပြီး လင်းနို့တံတွေး၊ ဆီး၊ မစင်တွေနဲ့ ထိတွေ့ခွင့်ပေးတာ ဒါမှမဟုတ် သွေးစုပ်လင်းနို့တွေ ကိုက်တာမျိုး လုပ်ခွင့်ပေးဖို့ အကြံပြုချင်ပါတယ်..."

ဂါးရက်သည် မိနစ်အတော်ကြာ ပြောဆိုသွားခဲ့သည်။ အကြီးအဲက ဝုဒ်၏ အံ့ဩမှုများ တိုးပွားလာသည်နှင့်အမျှ သူက ခွင့်လွှတ်ပေးရန် အပြုံးဖြင့် ပြုံးပြကာ သူ၏ စကားကို နောက်ဆုံးတွင် နိဂုံးချုပ်လိုက်သည်။

"အခုဆိုရင် ဈေးထဲက လင်းနို့တွေက တစ်ကောင်ကို ရွှေ ၅ ဒင်္ဂါးအထိ တက်နေပြီ... ကျွန်တော် မတတ်နိုင်ဘူး။ ပြီးတော့ သိမ်းထားဖို့ နေရာလည်း မရှိဘူး။ တိရစ္ဆာန်အများကြီးကိုလည်း မတတ်နိုင်ဘူး။ ဂရုစိုက်ဖို့လည်း လူမရှိဘူး။ ဒါကြောင့်..."

သူသည် လက်နှစ်ဖက်ကို ဖြန့်ကာ အကြီးအဲက ဝုဒ်ကို ပြင်းပြပြီး တောင်းဆိုနေသည့် အကြည့်

ဖြင့် ကြည့်လိုက်ပြီး ရှင်းရှင်းလင်းလင်း သတင်းစကားတစ်ခုကို ဖော်ပြလိုက်သည်။

"ကျွန်တော် အကြီးအကဲကို အားကိုးပါတယ်"

အကြီးအဲက ဝုဒ်သည် နောက်တစ်ဖန် သူ၏ မုတ်ဆိတ်ကို လိမ်စတင်ပြန်သည်။ သူသည် အခန်း၏ အလျားတစ်လျှောက် အရှေ့မှ အနောက်သို့ ထို့နောက် အနောက်မှ အရှေ့သို့ နှစ်ကြိမ် တိုင်းတာ လျှောက်သွားသည်။ ရုတ်တရက် လှည့်ကာ မေးလိုက်သည်။

"စွန့်စားရှာဖွေသူတွေ ရောဂါဖြစ်တာ လင်းနို့နဲ့ ဘာမှ မဆိုင်ဘူး ဖြစ်နိုင်တယ်"

"ဟုတ်ပါတယ် ကျွန်တော် သိပါတယ်" ဟု ဂါးရက်က တည်ငြိမ်စွာ ပြန်ဖြေသည်။ အကြီးအဲက ဝုဒ် ခေါင်းညိတ်လိုက်သည်။

"လင်းနို့အများကြီးနဲ့ တိရစ္ဆာန်အများကြီးကို ဖမ်းပြီး သုတေသနလုပ်ပေမယ့် နောက်ဆုံးမှာ ဘာရလဒ်မှ မရတာမျိုး ဖြစ်နိုင်တယ်နော်"

"ဖြစ်နိုင်ခြေများပါတယ်" ဟု ဂါးရက်က သူ၏အမြင်ကို သဘောတူလိုက်သည်။ ရလဒ်မရရှိခြင်းက အဖြစ်နိုင်ဆုံး ရလဒ်ပင်။

သဘာဝနတ်ဘုရားဂိုဏ်းတွင် ငွေကြေးအရင်းအနှီး နည်းပါးပြီး သူတို့ အသုံးပြုသော စမ်းသပ်တိရစ္ဆာန်များ မသင့်လျော်ခြင်း သို့မဟုတ် ရောဂါသည် လင်းနို့များမှ လူသို့ ကြားခံမရှိဘဲ တိုက်ရိုက်ကူးစက်ခြင်းတို့ ဖြစ်နိုင်သည်။

ဒါမှမဟုတ် ကံဆိုးတာပဲ ဖြစ်ကောင်းဖြစ်နိုင်တယ်။

ကူးစက်နိုင်ခြေနဲ့ မကြုံတာ ဒါမှမဟုတ် တိရစ္ဆာန်တွေ ဖျားနာတဲ့ လက္ခဏာကို မတွေ့တာ ….

ဂါးရက်၏ အကြည့်က အလွန်ရှင်းလင်းပြီး အလွန်တည်ငြိမ်သည်။ အကြီးအဲက ဝုဒ်က သူ့ကို ခဏကြာအောင် ထပ်ကြည့်မိပြီး တတိယမြောက် မေးခွန်းကို မေးလိုက်သည်။

"အဲဒီ မှော်ဆရာတွေ လင်းနို့တွေနဲ့ လျှောက်လုပ်ပြီးတဲ့နောက်မှာ ဘယ်သူမှ မဖျားတာမျိုးလည်း ဖြစ်နိုင်တယ်နော်"

"အဲဒါဆို အကောင်းဆုံး အခြေအနေပါပဲ" ဟု ဂါးရက်က မတွန့်ဆုတ်ဘဲ ဖြေလိုက်သည်။ နောက်ဆုံးတွင် လင်းနို့များကြောင့် မည်သူမျှ မဖျားနာပါက ဤကြိုးပမ်းမှုတစ်ခုလုံးကို လှောင်ပြောင်ခံရလျှင်ပင် သူ ပျော်ရွှင်မည်ဖြစ်သည်။

အကြီးအဲက ဝုဒ်က သူ့ကို ထပ်မံ၍ နက်နက်ရှိုင်းရှိုင်း ကြည့်လိုက်သည်။ ထို့နောက် အဖိုးကြီးက ဝက်သစ်ချသား လှံကို သူ၏ ဘယ်လက်သို့ ပြောင်းကိုင်လိုက်ပြီး ညာလက်ဖဝါးကို ဆန့်တန်းကာ ဂါးရက်ကို ပြင်းထန်စွာ ပုတ်လိုက်သည်။

"မင်းတော်တယ်။ တကယ့်ကို ကုသပေးနိုင်တဲ့သူပဲ။ ဒါဆို လင်းနို့တွေ၊ တခြားတိရစ္ဆာန်တွေ၊ ပြီးတော့ သူတို့ကို ဂရုစိုက်ပေးမယ့် လူတွေကို ငါပဲ စီစဉ်ပေးပါ့မယ်။ မင်း ဒီမှာ နေရာချထားပါ။ အို မဟုတ်ဘူး။ မင်း မှော်ကောင်စီရဲ့ လေ့ကျင့်ရေးကို တက်ရဦးမယ်..."

"ဒါဆို ပြန်ပြီး အိမ်တစ်လုံး ငှါးလိုက်ပါ။ တိရစ္ဆာန် နှစ်ရာလောက် ဆံ့နိုင်အောင် ကျယ်ဝန်းတာ သေချာပါစေ။ မနက်ဖြန်၊ သန်ဘက်ခါ၊ အများဆုံး သုံးရက်အတွင်းမှာ လူရော ပစ္စည်းရော ရောက်လာပါလိမ့်မယ်"

"ကျေးဇူးတင်ပါတယ် အကြီးအကဲ" ဟု ဂါးရက်က တကယ်ကို ကျေးဇူးတင်မိသည်။ အကြီးအဲက ဝုဒ်က ပေါ့ပေါ့ပါးပါး လက်ဝှေ့ယမ်းလိုက်သည်။

"ဘာမှ မဟုတ်ပါဘူး။ ဂိုဏ်းက ဒီပိုက်ဆံကို တတ်နိုင်တယ်။ ပြီးတော့ မင်း တစ်ခုခု အောင်မြင်ခဲ့ရင် မှော်ကောင်စီကနေ လျော်ကြေး ပြန်တောင်းလို့ရတယ်"

"အာ"

အဖြူရောင် ဝံပုလွေနှင့် လက်ဗလာဖြင့် အောင်မြင်စွာ ညှိနှိုင်းခဲ့သော ဂါးရက်က ခဏတာ မှင်တက်သွားပြီး ကမ်းလှမ်းချက်ကို နှိမ့်ချစွာ လက်ခံလိုက်သည်။

"ကောင်းပြီလေ မင်း လူတွေနဲ့ ပစ္စည်းတွေ စုဆောင်းဖို့ပဲ စောင့်နေ။ တခြားဘာတွေ လိုအပ်သေးလဲ"

"အင်း လူတွေကို လင်းနို့တွေနဲ့ ဝေးဝေးထားဖို့ နည်းလမ်းအချို့လည်း လိုအပ်ပါတယ်။ သူတို့က အန္တရာယ်ရှိတယ်ဆိုတာ သိထားတဲ့အတွက် ကျွန်တော် ကိုယ်တိုင် ကူးစက်ခံရရင် မကောင်းပါဘူး။ သူတို့ ကျွန်တော့်ကို မကိုက်နိုင်သလို မတံတွေးထွေးနိုင်ရင် အကောင်းဆုံးပါပဲ။ တိရစ္ဆာန်တစ်ကောင် နှာချေရင် ဘာမှ ရှူမိမှာ မဟုတ်ဘူး..."

ဂါးရက်က စိုးရိမ်တကြီး ပြန်လည်ဖြေကြားလိုက်သည်။ တကယ်တမ်းတွင် သူ P4 ဓာတ်ခွဲခန်းတစ်ခု သို့မဟုတ် အနည်းဆုံး မျောက်ပုံစံ ဓာတ်ခွဲခန်းတစ်ခု ဆောက်လုပ်ချင်သည်။

ဥပမာအားဖြင့် လေလုံသော အခန်း၊ လေစစ်ထုတ်စက်၊ မီးခိုးငွေ့စုပ်စက်၊ စစ်ထုတ်ခြင်း၊ ပြီးတော့ အန္တရာယ်ဇုန်မှ ဓာတ်ငွေ့များကို မီးရှို့ခြင်း စသည်တို့ ပါဝင်သည့် လေလုံခန်းမျိုးပင်။ သဘာဝဓာတ်ငွေ့မရှိပါက ဂါးရက် ပြုပြင်ထားသော မီးလောင်နေသည့်လက်ကဲ့သို့သော အပူပေးမီးရှို့ခြင်းကို စဉ်းစားနိုင်သည်။

သို့သော် ငှားထားသည့် အိမ်သည် ဤကဲ့သို့သော ပြုပြင်မွမ်းမံမှုများကို လုံးဝ လုပ်ဆောင်၍မရပေ။ အိမ်အသစ် ဝယ်ယူနိုင်လျှင်ပင် ပြုပြင်မွမ်းမံခြင်းက ကြီးမားသည့် ပရောဂျက်ကြီး ဖြစ်နေမည်။

ထားပါတော့…

ကာကွယ်ဝတ်စုံများ ရှိမရှိ မေးကြည့်လို့ ရသေးသည်။

"မင်း သေချာ စဉ်းစားထားတာပဲ" ဟု အကြီးအဲက ဝုဒ်က ချီးကျူးလိုက်သည်။ သူ ခဏတာ မျက်မှောင်ကြုတ်ကာ စဉ်းစားနေပြီး "မင်းပြောတာ မှန်တယ်။ ခဏစောင့်ပါဦး ငါ သွားယူ..."

သူသည် လှည့်ကာ အတွင်းသို့ ဝင်ရောက်သွားသည်။ ခဏအကြာတွင် ဖုန်တက်နေသော အဝတ်ပုံတစ်ပုံနှင့် ပြန်လာကာ ဂါးရက်အား ပေးရင်း "ဒါတွေ ဝတ်ကြည့်ပါဦး။ ကိုက်လား မကိုက်လား ကြည့်လိုက်" ဟု ပြောကြားသည်။

ဂါးရက်က အဝတ်တစ်ခုချင်းစီကို စစ်ဆေးလိုက်သည်။

မျက်လုံးကို ဖုံးလုနီးပါး ကျယ်ဝန်းသော နှုတ်ခမ်းရှိသည့် အနက်ရောင်နှင့် ထူထဲသော ဦးထုပ်တစ်လုံး။

ဝတ်လိုက်သည်နှင့် ဘာမှ လုပ်နိုင်တော့မည်မဟုတ်ဟု ထင်ရလောက်အောင် ထူထဲသော လက်အိတ်များပင်။

ကြည်လင်သော မှန်မျက်မှန်တစ်လက်ရှိပြီး မှန်၏ အရည်အသွေးမှာ မေးခွန်းထုတ်စရာဖြစ်ပြီး ပူဖောင်းများနှင့် အက်ကွဲကြောင်းများ ပါဝင်နေသည်။

ကြမ်းတမ်းသော အနက်ရောင် ကုတ်အင်္ကျီ ထူထူတစ်ထည်၊ ကင်းဗတ်စ် ဖြစ်နိုင်ပြီး အနည်းငယ် တောက်ပသော မျက်နှာပြင်မှာ ဖယောင်းဖြင့် အုပ်ထားသကဲ့သို့ပင်။

ဂါးရက် မကောင်းသော ခံစားချက် ရလာသည်။ ကုတ်အင်္ကျီကို ဖွင့်လိုက်သောအခါ ဤဝတ်စုံ၏ အနှစ်သာရ ပေါ်လွင်လာပြီး သူ၏ သံသယများကို အတည်ပြုလိုက်သည်။

ငှက်နှုတ်သီးပုံစံ မျက်နှာဖုံးပင်။

ရှည်လျားသော ငွေရောင် ငှက်နှုတ်သီးသည် နှစ်ပေါင်းများစွာ အသုံးမပြုရသေး၍ အရောင်မှိုင်းနေသည်။ ဂါးရက်သည် ၎င်းကို သူ၏လက်မနှင့် လက်ညှိုးကြားတွင် ဆန့်ထုတ်ကြည့်ရာ သူ ထင်ထားသည်ထက် ပိုတိုနေသည်ကို တွေ့ရသည်။ ၎င်းတွင် ဦးခေါင်းတွင် လုံခြုံစွာ ချိတ်ဆွဲရန် အသုံးပြုပုံရသော ကြိုးအချို့ ပါရှိသည်။

ဂါးရက် ၎င်းကို ကောက်ယူကြည့်လိုက်သည်။ မျက်နှာဖုံးအတွင်းတွင် လုံးဝ ပျက်စီးသွားသော အမှုန်အမွှားများဖြင့် ပြည့်နေပြီး ၎င်း၏ မူရင်းပါဝင်ပစ္စည်းများကို ခွဲခြားသိမြင်ရန် မဖြစ်နိုင်တော့ပေ။

သူ၏ ယခင်ဘဝမှ အသိပညာများ မှန်ကန်ပါက အတွင်းတွင် ပူဒီနာရွက်နှင့် နှင်းဆီပွင့်ချပ်များကဲ့သို့သော ဆေးဖက်ဝင်အပင်များ ပါဝင်နိုင်ပြီး ကံကောင်းပါက လေးညှင်း၊ ကန့် ကူ၊ ဗန်ဇိုအင်နှင့် နဂါးသွေးကဲ့သို့သော အမွှေးအကြိုင်များလည်း ပါဝင်နိုင်သည်။

ကာဗွန်ပေးတာက ပိုကောင်းဦးမယ်။ ဈေးသက်သာပြီး အနံ့မရှိပေမယ့် ဒီအမွှေးအကြိုင်တွေထက် ပိုယုံကြည်စိတ်ချရတယ်။

ဂါးရက် ငိုချင်စိတ် ပေါက်လာသည်။ အကြီးအကဲ ဝုဒ်က ဆက်ပြောသည်။

"ဒါက အပြင်းထန်ဆုံး ကပ်ရောဂါတွေကို ကိုင်တွယ်ဖို့ အသုံးပြုတာ။ အစကတော့ မလိုအပ်ဘူးလို့ ထင်ခဲ့တယ်။ မင်း လိုအပ်တယ်လို့ ထင်ရင် ယူသွားပြီး စမ်းသုံးကြည့်လို့ရတယ်"

ကျွန်တော်...

latex လက်အိတ်တွေ လိုချင်တယ်။

ကာကွယ်ဝတ်စုံတွေ လိုချင်တယ်။

N95 mask တွေ လိုချင်တယ်။

မျက်နှာအကာအကွယ်တွေ။

ဘေးကင်းရေး မျက်မှန်တွေ။

တောင်းပန်ပါတယ်ဗျာ ဆေးရုံက ပေးတဲ့ ကာကွယ်ရေးဝတ်စုံတွေ ဘယ်လောက် ပူလောင်

တယ်ဆိုတာ နောက်တစ်ခါ ဘယ်တော့မှ မညည်းညူတော့ပါဘူး။ ချွတ်လိုက်တိုင်း ချွေးတွေနဲ့ စိုရွှဲနေတာ...

ဂါးရက်၏ မျက်နှာပေါ်တွင် မျက်ရည်များ စီးကျလာတော့သည်။