အခန်း ၇၂-၇၃

အခန်း ၇၂

လော်ကျယ်ရဲ့ စကားတွေက ခမ်းမထဲက အကြီးအကဲတွေအားလုံးကို ဝေခွဲမရခြင်း ဖြစ်ပေါ်စေခဲ့တယ်။ သူတို့ နားမလည်နိုင်ခဲ့ဘူး။ ကောင်းကင်တိမ်တိုက်ပြာဂိုဏ်း ရဲ့ ဂုဏ်သိက္ခာရှိတဲ့ ဂိုဏ်းချုပ်က ဒီလို မေးခွန်းမျိုးကို ဘယ်လိုလုပ် မေးနိုင်တာလဲ။ ဘာပဲပြောပြော ယဲ့ယွီက အတွင်းဂိုဏ်းတပည့်လေး တစ်ယောက်ပဲ။ သူက ကောင်းကင်တိမ်တိုက်ပြာဂိုဏ်း တစ်ခုလုံးနဲ့ ဘယ်လိုလုပ် ယှဉ်နိုင်မှာလဲ။ မဟာချင်မင်းဆက်တိုင်းပြည်ကနတ်ခန္ဓာပြောင်းလဲခြင်းအဆင့် ကကျင့်ကြံသူ ငါးဆယ်ကို စေလွှတ်တာက ဒီလို ခမ်းနားတဲ့ ဟန်ပန်ပဲ။ ဘယ်သူမှမသိတဲ့ သာမန် တပည့်တစ်ယောက်အတွက်ပဲဆိုရင် ပြန့်ပွားသွားရင် ကြီးမားတဲ့ ဟာသတစ်ခု ဖြစ်လိမ့်မယ်။ ခဏလေး။ မဟုတ်ဘူး၊ အခု ယဲ့ယွီကိုသာမန်လူလို့ ခေါ်လို့ မရတော့ဘူး။ အနည်းဆုံးတော့ ကောင်းကင်တိမ်တိုက်ပြာဂိုဏ်း ထဲမှာ သူက ကြီးမားတဲ့ ဂုဏ်သတင်း ရှိနေပြီ။ ရက်အနည်းငယ်အတွင်းမှာပဲ သူကဂိုဏ်းနတ်သမီး ရဲ့ နှလုံးသားကို ဖမ်းစားနိုင်တဲ့ လူသား ဖြစ်လာခဲ့တယ်။ သူက လူငယ်တပည့်တွေရဲ့ နှလုံးသားထဲမှာ ရုပ်တုတစ်ခုလို ဖြစ်နေခဲ့တယ်။ ဟုတ်တာပေါ့၊ဂိုဏ်းနတ်သမီး ကို လျှို့ဝှက်စွာ ချစ်ခင်မြတ်နိုးပြီး သူ့ကို စိန်ခေါ်ဖို့ အသင့်ဖြစ်နေတဲ့ လူအများအပြားလည်း ရှိတယ်။ ဘယ်လိုပဲဖြစ်ဖြစ် ယဲ့ယွီရဲ့ ဂုဏ်သတင်းက တည်ရှိနေပြီ။ သို့သော် အကြီးအကဲ အများအပြားက မဟာချင်မင်းဆက်တိုင်းပြည်ကို ဒီလို အစွန်းရောက်အောင် လုပ်ဖို့ ယဲ့ယွီမှာ အရည်ချင်းလုံလောက်တယ်လို့ မယုံကြည်ခဲ့ကြဘူး။ သူတို့ထဲမှာ အကြီးအကဲ လေကျမ်ရှန်က အထူးသဖြင့် မလေးမစား ပြုမူခဲ့တယ်။ သူက ဟိုဘူကျယ်ကို သတ်ခဲ့တဲ့အတွက် ယဲ့ယွီကို အမြဲတမ်း မကျေနပ်ခဲ့ဘူး။ အရင်တုန်းက ဟုန်လွမ်ရဲ့ လွှမ်းမိုးနိုင်တဲ့ ခွန်အား မရှိခဲ့ရင် လေကျမ်ရှန်က ယဲ့ယွီကိုသုတ်သင်တာ လုပ်ပစ်ခဲ့မှာ ကြာပြီဖြစ်တယ်။ ကံမကောင်းစွာပဲ အခြေအနေတွေက သူ့ဘက်မှာ မရှိခဲ့ဘူး။ လေကျမ်ရှန်က အံကြိတ်ပြီး ခဏတာ သည်းခံခဲ့ရတယ်။ အခု ဂိုဏ်းချုပ် လော်ကျယ်ရဲ့ စကားတွေကို ကြားတော့ သူက ပြင်းထန်တဲ့ မလေးမစားမှုကို မခံစားနိုင်တော့ဘူး။ သူက စကားလုံးတွေနဲ့ လှောင်ပြောင်တော့မလို့ရှိသေး ယဲ့လျန်ယန်ရဲ့ တည်ငြိမ်တဲ့ အသံကို ကြားလိုက်ရတယ်။ "ဂိုဏ်းချုပ်ပြောတာမှန်ပါတယ်။ မဟာချင်မင်းဆက်တိုင်းပြည်က ဒီလိုလုပ်ရတဲ့ အကြောင်းရင်းက **ယဲ့ယွီ ** ကြောင့်ပါပဲ။"

"သူက ကျွန်တော်တို့ရဲ့ ဧကရီမင်းမြတ်အတွက် အရမ်း အရေးကြီးတဲ့ ပုဂ္ဂိုလ်တစ်ဦးပါ။ ဒါကြောင့် ခင်ဗျားတို့ ဂိုဏ်းက သူ့ဘေးကင်းရေးကို သေချာစေဖို့ တောင်းဆိုပါတယ်။ အဲ့ဒီလိုမှသာ မဟာချင်မင်းဆက်တိုင်းပြည်နဲ့ ကောင်းကင်တိမ်တိုက်ပြာဂိုဏ်း တို့ရဲ့ ချစ်ကြည်ရေးက ခိုင်မြဲနိုင်မှာပါ" ဒီစကားတွေ ပြောလိုက်တာနဲ့ အခန်းထဲက လူတိုင်း အံ့ဩမှင်တက်သွားကြတယ်။ မဟာချင်မင်းဆက် ရဲ့ သံတမန်က ဒါကို ပွင့်ပွင့်လင်းလင်း ဝန်ခံလိမ့်မယ်လို့ သူတို့ မမျှော်လင့်ခဲ့ကြဘူး။ ပြီးတော့ ယဲ့ယွီက ဧကရီအတွက် အရေးကြီးတယ်လို့ ရဲရဲဝံ့ဝံ့ ပြောခဲ့တယ်။ သူက တိတိကျကျ ဘယ်သူလဲ။ သူ ဘာလုပ်ခဲ့တာလဲ။ လော်ကျယ်ရဲ့ မျက်နှာအမူအရာက အလွန် လေးနက်သွားခဲ့တယ်။ သူ ရုတ်တရက် ထရပ်ပြီး "ဂုဏ်ထူးဆောင် သံတမန်၊ ကျေးဇူးပြုပြီး ကျွန်တော်တို့ကို ရှင်းပြပါ။ ယဲ့ယွီနဲ့ ခင်ဗျားတို့ ဧကရီတို့ကြားက ဆက်ဆံရေးက တိတိကျကျ ဘာလဲ?" လို့ ပြောလိုက်တယ်။ ယဲ့လျန်ယန် စကားပြောတော့မလို့ရှိသေး။ ရုတ်တရက် သူက လော်ကျယ်ရဲ့ နောက်က အကြီးအကဲတွေအားလုံး မျက်လုံးပြူးပြီး စိတ်အားထက်သန်နေကြတာကို တွေ့လိုက်ရတယ်။ ဒါကြောင့် ယဲ့လျန်ယန်က တိုးတိုးလေး ပြောလိုက်တယ်၊ "တချို့ကိစ္စတွေက ဒီလောက်ပဲ ပြောလို့ရပါတယ်။ ဂိုဏ်းချုပ်၊ ခွင့်လွှတ်ပါ" တခါတရံမှာ စကားကို တစ်ဝက်တစ်ပျက် ချန်ထားတာက လူတွေကို စိတ်ဝင်စားအောင် လုပ်ဖို့ အကောင်းဆုံးနည်းလမ်းပဲ။ အခုလိုပဲ လူတိုင်းကို စိတ်ထဲမှာ တစ်ခုခု အောင့်ထားသလို၊ တော်တော်လေး မသက်မသာ ဖြစ်စေတယ်။ လော်ကျယ်က အသံကာကွယ်ရေးအတားအဆီးတစ်ခုကို အလွယ်တကူ တည်ဆောက်လိုက်တယ်။ ပြီးတော့ သူက ဆက်ပြောတယ်၊ "ကောင်းကင်တိမ်တိုက်ပြာဂိုဏ်း ရဲ့ ဂိုဏ်းချုပ်အနေနဲ့ ယဲ့ယွီနဲ့ ဧကရီတို့ကြားက ဆက်ဆံရေးကို တကယ် သိချင်ပါတယ်။" "ကျွန်တော် သိရမယ်ဆိုရင် နောင်အနာဂတ်မှာ ကျွန်တော်တို့ကြားက ပိုမို ချစ်ကြည်ရင်းနှီးတဲ့ ဖလှယ်မှုတွေကိုလည်း အထောက်အကူပြုပါလိမ့်မယ်။ သံတမန်၊ ကျေးဇူးပြုပြီး ရှင်းပြပါ" ယဲ့လျန်ယန် ချက်ချင်း အူမြူးသွားခဲ့တယ်။ အတင်းအဖျင်း ကြိုက်တဲ့သူတိုင်းမှာ ဝေမျှချင်တဲ့ နှလုံးသား ရှိတယ်။(ယဲ့ယွီအဖေပဲလေမွှေချင်စိတ်ကအပြည့်) သူတို့က ကြီးမားတဲ့ ရတနာကို သယ်ဆောင်ထားသလိုပဲ: တခြားသူတွေကို မသိစေချင်ဘူး၊ ဒါပေမယ့် တစ်ခုခု သိပြီးနောက် တခြားသူတွေရဲ့ အံ့ဩသွားတဲ့ မျက်နှာကို မြင်ချင်ကြတယ်။ ဒါကြောင့် ယဲ့လျန်ယန်ရဲ့ နှလုံးသားက တကယ်ပဲ ကလိကလိ ဖြစ်နေခဲ့တယ်။ နောက်ဆုံးမှာတော့ အများကြီး စဉ်းစားပြီးနောက် ယဲ့လျန်ယန်က လေးနက်စွာ ပြောလိုက်တယ်၊ "ဂိုဏ်းချုပ်၊ ကျွန်တော် တစ်ခု ပြောပါ့မယ်။ ဒါပေမယ့် ခင်ဗျား ဘယ်သူ့ကိုမှ မပြောဘူးလို့ ကတိပေးရမယ်။" လော်ကျယ်က ချက်ချင်း ခေါင်းညိတ်ပြီး သဘောတူလိုက်တယ်။ " မဟာချင်မင်းဆက် ဧကရီမှာ သမီးတစ်ယောက် ရှိတယ်၊ သူ့အမည်က ယဲ့! ကျွန်တော် ဒါပဲ ပြောနိုင်ပါတယ်!" ယဲ့လျန်ယန် တိုးတိုးလေး ပြောပြီးတာနဲ့ သူက ချက်ချင်း နောက်ဆုတ်ပြီး ဆက်ပြောတယ်၊ "ဂိုဏ်းချုပ်၊ ကျွန်တော် ခုနက အဓိပ္ပာယ်မရှိတာတွေ ပြောနေတာပါ။ ကျေးဇူးပြုပြီး အတည်မယူပါနဲ့။"

"ဒါနဲ့ ယဲ့ယွီက ဘယ်မှာလဲ။ ကျွန်တော် သူ့အတွက် တစ်ခုခု ယူလာတာ ရှိတယ်၊ ကိုယ်တိုင် ပေးရမှာ။" လော်ကျယ်ရဲ့ မျက်နှာအမူအရာက အလွန် ထူးခြားနေတယ်။ သူက အတားအဆီးကို ချက်ချင်း ဖယ်ရှားလိုက်ပြီး ယဲ့လျန်ယန်ကို **ဝူကျီတောင်ထိပ် ** ကို ခေါ်သွားဖို့ တစ်စုံတစ်ယောက်ကို အမိန့်ပေးခဲ့တယ်။ မဟာချင်မင်းဆက် သံတမန် ထွက်ခွာသွားတာကို ကြည့်ပြီးနောက် အကြီးအကဲတွေ တစ်ယောက်ပြီးတစ်ယောက် စုဝေးလာကြတယ်။ သူတို့က အလျင်အမြန် မေးလိုက်တယ်၊ "ဂိုဏ်းချုပ်၊ ခုနက သံတမန် ဘာပြောသွားတာလဲ။ ဘာလို့ ယဲ့ယွီက မဟာချင်မင်းဆက် ကို ဒီလို လှုပ်ရှားအောင် လုပ်နိုင်တာလဲ?" လော်ကျယ်က မပြောဘူး။ သူ့ပုံရိပ်က လျှပ်ခနဲ ကောင်းကင်ကို တန်းတန်းမတ်မတ် ပျံတက်သွားခဲ့တယ်၊ သူ့မျက်နှာအမူအရာက အလွန် ဒေါသထွက်နေတယ်။ ကိုယ့်သမီးကို ခက်ခက်ခဲခဲ ပြုစုပျိုးထောင်ပြီးမှ ရုတ်တရက် သူ့သမီးက အလိမ္မာမရှိတဲ့ ချစ်သူရည်းစားတစ်ယောက် ရှာတွေ့သွားတယ်ဆိုတာ သိလိုက်ရတဲ့ အဖေကြီးတစ်ယောက်လိုပဲ။ ဘယ်လောက် ဒေါသထွက်စရာကောင်းလဲ! နှစ်တွေကြာအောင် ယွမ်ရိုမု အရမ်း ငယ်ငယ်တုန်းကတည်းက လော်ကျယ်က သူမကို တပည့်အဖြစ် ခေါ်ယူခဲ့တယ်၊ စိတ်ရှည်လက်ရှည် သိုင်းပညာ သင်ကြားပေးခဲ့ပြီး ကြိုးစားပမ်းစား လမ်းညွှန်ခဲ့တယ်။ သူမကို သူ့သမီးအရင်းလိုတောင် သဘောထားတယ်လို့ ပြောလို့ရတယ်။ ကောင်းကင်တိမ်တိုက်ပြာဂိုဏ်း မှာရှိတဲ့ လူတိုင်းက လော်ကျယ်က ယွမ်ရိုမုကို အရမ်း ချစ်တယ်ဆိုတာ သိတယ်။ မနေ့ညက ဂူထဲက မြင်ကွင်းကို မြင်လိုက်တာက လော်ကျယ်ရဲ့ ဖခင်စိတ်ကို နက်နက်ရှိုင်းရှိုင်း ထိခိုက်စေခဲ့တယ်။ ပြန်ရောက်လာပြီးနောက် လော်ကျယ်က သူ့ကိုယ်သူ နှစ်သိမ့်နေခဲ့တယ်။ ယွမ်ရိုမု ကြီးလာပြီ၊ တစ်ယောက်ယောက်ကို ကြိုက်တာက ပုံမှန်ပဲ။ ယဲ့ယွီဆိုတဲ့ ကောင်လေးကတော့ နာမည်မကြီးသေးပေမယ့် အမကြီး ဟုန်လွမ်ရဲ့ သင်ကြားမှုအောက်မှာ ရှိနေတယ်။ နောင်အနာဂတ်မှာ သူ ကြိုးစားရင်ကျင့်ကြံခြင်းကမ္ဘာမှာ သူ့နေရာသူ ထူထောင်နိုင်မှာ သေချာတယ်။ ဒီလူနှစ်ယောက် အချင်းချင်း ချစ်ကြိုက်မယ်ဆိုရင် သူတို့ကို နတ်စုံတွဲလို့ ခေါ်လို့ရတယ်။ တစ်ညလုံး ကိုယ့်ကိုယ်ကိုယ် ဆင်ခြင်ပြီးနောက် လော်ကျယ်က ယဲ့ယွီကို လက်ခံစပြုနေပြီ။ ဒါပေမယ့် အခု ယဲ့ယွီက မဟာချင်မင်းဆက်တိုင်းပြည်ရဲ့ ဧကရီနဲ့တောင် ကလေးရနေပြီဆိုတဲ့ သတင်း ထွက်ပေါ်လာခဲ့တယ်။ ဒါ ဘာတွေ ဖြစ်နေတာလဲ။ နှစ်ခုစလုံးကို ပိုင်ဆိုင်နိုင်သေးတယ်လို့ ထင်နေတာလား။ မဟုတ်ဘူး! ဒီလို နှစ်ခွဖြစ်နေတဲ့ လူမျိုးကို ယွမ်ရိုမု လက်ထပ်ခွင့် လုံးဝ မပေးနိုင်ဘူး။

မဟုတ်ရင် နောင်အနာဂတ်မှာ သူမ ရင်ကွဲနာကျလိမ့်မယ်။ ဒီအကြောင်းကို တွေးမိတော့ လော်ကျယ်ရဲ့ အကြည့်က ပြတ်သားလာခဲ့တယ်။ သူက ယဲ့ယွီနဲ့ ယွမ်ရိုမုကို ခွဲရမယ်! အစ်မကြီးရဲ့ သဘောမတူတာကို ခံရရင်တောင်မှပဲ! ...... ဝူကျီတောင်ထိပ်။ ရှေ့မူလင်က ယဲ့ယွီကို " ဖုံးကွယ်ခြင်းအသက်ရှူနည်းပညာ" ကို သင်ကြားပေးခဲ့တယ်။ ဒီကာလအတွင်း သူမက ဘယ်လို မသင့်တော်တဲ့ လုပ်ဆောင်မှုမျိုးမှ မလုပ်ခဲ့ဘူး။ ဒါက ယဲ့ယွီကို သက်ပြင်းချမိစေခဲ့တယ်။ ပြီးတော့ သူ အလွန်အကျွံ တွေးနေတာလားလို့ စဉ်းစားမိတယ်။ အစ်မကြီးက နောက်ပြောင်နေတာပဲ ဖြစ်မှာ။ "မောင်လေး၊ ငါ အခု သွားတော့မယ်။ ဒီမှာ ဖြည်းဖြည်းချင်း လေ့ကျင့်ပါ!" ရှေ့မူလင်က လက်ကို ဝှေ့ယမ်းလိုက်တယ်။ မထွက်ခွာခင်မှာ သူမက အခန်းထဲက ပြတင်းပေါက်တွေကိုလည်း အဆင်ပြေအောင် ဖွင့်သွားခဲ့တယ်။ တကယ်တော့ ရှေ့မူလင်က ဒီမှာ ကြာကြာနေဖို့ မလိုချင်တာ မဟုတ်ဘူး။ သူမက ယဲ့ယွီရဲ့ မျက်လုံးထဲမှာ သတိထားမှု အရိပ်အယောင်တစ်ခုကို မြင်လိုက်ရလို့ပဲ။ ဒါက ရှေ့မူလင်ကို အရမ်း စိုးရိမ်ပူပန်စေခဲ့တယ်၊ သူမ မောင်လေးကို ကြောက်လန့်စေမှာကို စိုးရိမ်ခဲ့တယ်။ နောင်အနာဂတ်မှာ သူမ ဒီလို မွှေးကြိုင်တဲ့ ရနံ့ကို ထပ်မခံစားရတော့မှာ မဟုတ်ဘူး။ ဒါကြောင့် သူမက ပိုပြီး အဝေးကို မသွားချင်တဲ့ စိတ်ဆန္ဒကို ဖိနှိပ်ပြီး နာခံစွာ ထွက်ခွာသွားခဲ့တယ်။ ဒါကို မြင်တော့ ယဲ့ယွီလည်း အမြန် ထွက်လာပြီး သူမကို လိုက်ပို့ခဲ့တယ်။ ရှေ့မူလင် သူ့ရဲ့ ဝါးအိမ်ကို ပြန်သွားတာကို ကြည့်ပြီးနောက် သူက ဝူကျီတောင်ထိပ်ပေါ်က နေရောင်ခြည်က လုံးဝ ပျောက်ကွယ်သွားတာကို အံ့ဩစွာ တွေ့လိုက်ရတယ်။ ပတ်ဝန်းကျင် အရာအားလုံးက အရိပ်တွေနဲ့ ဖုံးလွှမ်းနေတယ်။ ဒါက ယဲ့ယွီကို အရမ်း ထူးဆန်းတယ်လို့ ခံစားရစေခဲ့တယ်။ သူ မော့ကြည့်လိုက်တယ်။ ရုတ်တရက် သူက ဝူကျီတောင်ထိပ်အပေါ်မှာ ကြီးမားလွန်းတဲ့ ဝိညာဉ်လှေကြီးတစ်စင်း ပျံဝဲနေတာကို တွေ့လိုက်ရတယ်။ ဒါက ကောင်းကင်တိမ်တိုက်ပြာဂိုဏ်း ရဲ့ ဝိညာဉ်လှေတွေထက် ဆယ်ဆကျော် ပိုကြီးတယ်။ ဒါ့အပြင် အဲ့ဒီပေါ်မှာ တာအို ပုံစံတွေ အများကြီး ထွင်းထုထားတယ်။ ကြည့်ရုံနဲ့တင် လူတွေကို ရှင်းမပြနိုင်တဲ့ လုံခြုံမှု ခံစားချက်ကို ပေးတယ်။ ပြီးတော့ ဒီအချိန်မှာစည်းကမ်းထိန်းသိမ်းရေးခမ်းမ ရဲ့ အကြီးအကဲ လီနီအန် နဲ့ ယဲ့လျန်ယန်တို့က ဝိညာဉ်လှေပေါ်ကနေ ခုန်ဆင်းလာပြီး ယဲ့ယွီရဲ့ ရှေ့ကို ရောက်လာကြတယ်။ "ဒါက မဟာချင်မင်းဆက်တိုင်းပြည်ရဲ့ သံတမန် ယဲ့လျန်ယန်ပါ။ သူ မင်းကို အထူးတလည် ရှာလာတာပါ။ မင်းတို့ စကားပြောလို့ရပြီ။" သူ ဒီလိုပြောရင်း လီနီအန်ရဲ့ မျက်နှာအမူအရာက အရမ်း ထူးဆန်းနေခဲ့တယ်။

၇၃ ဆက်ရန်

အခန်း ၇၃

တကယ်တော့ ဒါက လီနီအန်ရဲ့ အမှားမဟုတ်ပါဘူး။ ကိုယ့်မျက်စိနဲ့ ကိုယ်မမြင်ခဲ့ရင် ဘယ်သူ ယုံနိုင်မှာလဲ။ နိုင်ငံကြီးတစ်နိုင်ငံကနတ်ခန္ဓာပြောင်းလဲခြင်းအဆင့် ကကျင့်ကြံသူ ငါးဆယ်ကို စေလွှတ်ဖို့ ဆန္ဒရှိခဲ့တယ်၊ ဂိုဏ်းတပည့်တစ်ယောက်အတွက် ရန်ငြိုးကို လက်စားချေဖို့ သက်သက်။ ဒါ့အပြင် သူတို့က ဒီဂိုဏ်းတပည့်က သူတို့ ဧကရီမင်းမြတ်အတွက် အရမ်း အရေးကြီးတဲ့သူတစ်ယောက် ဖြစ်တယ်လို့ ပွင့်ပွင့်လင်းလင်း ပြောခဲ့တယ်။ သူတို့ကြားက ဆက်ဆံရေးက လီနီအန်ကို လုံးဝ စိတ်ရှုပ်ထွေးစေခဲ့တယ်။ ယဲ့ယွီ ယဲ့လျန်ယန် ရောက်လာတာကို မြင်တော့ သူ တော်တော်လေး အံ့အားသင့်သွားခဲ့တယ်။ "ခင်ဗျား ကျွန်တော့်ကို လာရှာတာလား၊ကိစ္စရှိလို့လား?" ယဲ့လျန်ယန် စကားပြောတော့မလို့ရှိသေး၊ ရုတ်တရက် လီနီအန်က အနီးအနားမှာ ရပ်နေသေးတာကို သတိထားမိခဲ့တယ်။ ဒါကြောင့် သူက တိုးတိုးလေး ပြောလိုက်တယ်၊ "အကြီးအကဲ လီ၊ လမ်းပြပေးတာ ကျေးဇူးတင်ပါတယ်" ဒီစကားကို ကြားတော့ လီနီအန်က သူ့ကို ထွက်သွားဖို့ တောင်းဆိုနေတယ်ဆိုတာ ဘယ်လိုလုပ် နားမလည်ဘဲ ရှိနိုင်မှာလဲ။ သူက ချက်ချင်းပဲ ကျွမ်းကျင်စွာ ထွက်သွားခဲ့တယ်။ သူ ထွက်သွားပြီးနောက် ယဲ့လျန်ယန်က ငါးခူပြုံး ပြုံးလိုက်တယ်။သူ့ရဲ့တောက်ပတဲ့ဝတ်ရုံကိုဝဲလိုက်ပြီး "မိတ်ဆွေ ယဲ့၊ သွေးမိစ္ဆာဂိုဏ်းရဲ့ တိုက်ခိုက်မှုနဲ့ ပတ်သက်ပြီး ဧကရီမင်းမြတ် သိပြီးသားပါ။ သူက ခင်ဗျားအတွက် သိုလှောင်လက်စွပ်တစ်ခု ပို့ပေးဖို့ အထူးတလည် စေလွှတ်ခဲ့တာပါ" "အတွင်းမှာ ကာကွယ်ရေးပစ္စည်းတွေ အများကြီး ရှိတယ်။ ဒါ့အပြင် ဒီဝိညာဉ်လှေကို ခင်ဗျား သုံးဖို့ ချန်ထားခဲ့မယ်။" ယဲ့လျန်ယန် စကားပြောရင်း သူ့ဝတ်ရုံထဲကနေ သိုလှောင်လက်စွပ်တစ်ခုကို ထုတ်လိုက်တယ်။ ယဲ့ယွီ ယူလိုက်ပြီးတော့ ကောင်းကင်ပေါ်က ကြီးမားတဲ့ ဝိညာဉ်လှေကို မော့ကြည့်လိုက်တယ်။အဲ့ဒါကနေရောင်အောက်မှာဖိတ်ဖိတ်လက်နေတယ်။ တကယ့်ကို ထူးခြားတဲ့အရောင်ဝါတွေနဲ့ သူက "ဒီအရာက အရမ်းကြီးတယ်။ ဘယ်မှာ ထားရမှန်းတောင် မသိဘူး" လို့ မအော်ဘဲ မနေနိုင်ခဲ့ဘူး။ "ဒါကို သိပ် စိတ်ပူစရာ မလိုပါဘူး။ ဒီပစ္စည်းက ကျွန်တော်တို့မဟာချင်မင်းဆက်တိုင်းပြည် ရဲ့ အစီရင်ခမ်းမက နောက်ဆုံးပေါ် ထုတ်ကုန်ပါ" "အဲ့ဒီပေါ်က ဖွဲ့စည်းပုံအစီရင်တွေကနတ်ခန္ဓာပြောင်းလဲခြင်းအဆင့် ဆယ်ဦးရဲ့ ပူးပေါင်းတိုက်ခိုက်မှုကိုတောင် ခံနိုင်ရည်ရှိတယ်။" "အတွင်းထဲက နေရာကလည်း ကျယ်ဝန်းတယ်။ လူကိုးရာအထိ ဆန့်ပြီး တစ်ယောက်စီမှာ ကိုယ်ပိုင်အခန်းတွေ ရှိတယ်။ သူ့ရဲ့ မြန်နှုန်းနဲ့ တည်ငြိမ်မှုအတွက် နာမည်ကြီးတယ်။" "အရေးအကြီးဆုံးကတော့ သယ်ရလွယ်ကူတာပဲ!" ယဲ့လျန်ယန်က သူ့လက်ညှိုးတွေကိုဝှေ့ရမ်းလိုက်တယ်။

အပေါ်က ဝိညာဉ်လှေက ရုတ်တရက် တောက်ပတဲ့ အလင်းတန်းကို ထုတ်လွှတ်ပြီးနောက် လျင်မြန်စွာ ကျုံ့ဝင်သွားကာ လက်သီးဆုပ်အရွယ် သတ္တုသေတ္တာလေးတစ်ခုအဖြစ် ပြောင်းလဲပြီး ပြုတ်ကျလာခဲ့တယ်။ဝုစ်ကနဲအသံတိုးတိုးကိုကြားလိုက်ရတယ် "အသုံးပြုဖို့ဆိုရင် ဝိညာဉ်စွမ်းအင် ထည့်သွင်းလိုက်ရုံပါပဲ၊ မူရင်းပုံစံကို ပြန်ရောက်သွားပါလိမ့်မယ်။ အသုံးမပြုတဲ့အခါ သိုလှောင်လက်စွပ်ထဲမှာ နေရာမယူဘဲ အလွယ်တကူ သိမ်းဆည်းထားနိုင်ပါတယ်။ အိမ်သွားလာရေးနဲ့ မရှိမဖြစ် သယ်ယူပို့ဆောင်ရေးအတွက် ပထမဆုံး ရွေးချယ်မှုပါပဲ!" ဝိညာဉ်လှေကို မိတ်ဆက်ရင်း ယဲ့လျန်ယန်ရဲ့ အမူအရာက အလွန် ယုံကြည်မှု ရှိလာခဲ့တယ်။ မဟာချင်မင်းဆက်တိုင်းပြည် က လောကီမော်တယ်လူ့ပြည်က မင်းဆက်တစ်ခု ဖြစ်ပေမယ့် သူ့ရဲ့ အခြေခံအုတ်မြစ်က ကြီးကျယ်ခမ်းနားတဲ့ မြင့်မြတ်နယ်မြေ ငါးခုနဲ့ ဘယ်လိုမှ မနိမ့်ကျဘူး။ ဒါ့အပြင် အင်ပါယာရဲ့ ကြီးမားတဲ့ လူဦးရေနဲ့အတူ ပါရမီရှင်တွေ အများအပြား ပေါ်ထွက်လာတယ်။ ထူးဆန်းပြီး ပုံမှန်မဟုတ်တဲ့ အရာမျိုးစုံကို ဖန်တီးနိုင်တယ်။ ပြီးတော့ ဒီဖန်တီးမှုတွေကို တခြားဂိုဏ်းတွေနဲ့ကျင့်ကြံခြင်း ကျောက်စိမ်းတွေ ဒါမှမဟုတ် လက်နက်တွေနဲ့ လဲလှယ်နိုင်တယ်။ ဒါကလည်းမဟာချင်မင်းဆက်တိုင်းပြည် ရဲ့ ခွန်အား တိုးတက်လာရတဲ့ အဓိက အကြောင်းရင်းပဲ။ ဟုတ်တာပေါ့၊ ဒီဝိညာဉ်လှေက နောက်ဆုံးပေါ် နည်းပညာမြင့် ထုတ်ကုန်ပဲ။ အင်ပါယာတစ်ခုလုံးမှာ တစ်ခုပဲ ထုတ်လုပ်ထားသေးတယ်။ ဒါပေမယ့် ယဲ့ယွီကို မတွန့်ဆုတ်ဘဲ ပေးခဲ့တယ်။ ဒါကလည်း ဧကရီ လီရူမန်က သူ့ကို ဘယ်လောက် အလေးထားလဲဆိုတာ ပြသတယ်။ ယဲ့ယွီက သူ့လက်ထဲက သိုလှောင်လက်စွပ်နဲ့ သတ္တုသေတ္တာလေးကို ကြည့်ပြီး သူ့နှလုံးသားထဲမှာ နွေးထွေးမှုကို ခံစားလိုက်ရတယ်။ သူက တိုးတိုးလေး ပြောလိုက်တယ်၊ "အစ်ကိုကြီး ယဲ့၊ ပြန်ရောက်ရင် ဧကရီမင်းမြတ်ကို ကျွန်တော့်အစား ကျေးဇူးတင်ပေးပါ" "သေချာပါတယ်၊ သေချာပါတယ်!" "မိတ်ဆွေ ယဲ့၊ ဘာပဲ လိုအပ်သည်ဖြစ်စေ ကျွန်တော့်ကို ပြောပါ။ ကျွန်တော် အမြန်ဆုံး ပို့ပေးပါ့မယ်။" ယဲ့လျန်ယန်ရဲ့ ယဲ့ယွီရှေ့က အမူအရာက အရမ်း နိမ့်ကျတယ်။ လီနီအန်ကို ပြသခဲ့တဲ့ အေးစက်မှုနဲ့ လုံးဝ ကွာခြားတယ်။ ဘာပဲပြောပြော ယဲ့လျန်ယန် ကောင်းကောင်းသိတယ်။ သူ့ရှေ့က လူက ဧကရီရဲ့ အနာဂတ်ခင်ပွန်း။ ဒီလို အဆင့်အတန်းနဲ့ ဘယ်လိုလုပ် မလေးမစား လုပ်နိုင်မှာလဲ။ သူ့အတွေးတွေကို ဖော်ပြပြီးနောက် ယဲ့လျန်ယန်က ကြာကြာ မနေဘူး၊ စကားအနည်းငယ် လဲလှယ်ပြီးတော့ သူ့ရဲ့ ပြန်ခရီးကို စတင်ခဲ့တယ်။ သူက အခြေအနေကို လုံးဝ ထိန်းချုပ်နိုင်တယ်။ စိတ်အားထက်သန်ပေမယ့် စိတ်အနှောင့်အယှက် မဖြစ်စေဘူး။ ဒါက ယဲ့လျန်ယန် နန်းတွင်းမှာ နှစ်ရာပေါင်းများစွာ ရှင်သန်နိုင်ခဲ့တဲ့ အကြောင်းရင်းတွေထဲက တစ်ခုပဲ။

နောက်ပိုင်းမှာ ယဲ့ယွီ ဝါးအိမ်ကို ပြန်သွားခဲ့တယ်။ သူက သိုလှောင်လက်စွပ်ထဲက အရာတွေကို စစ်ဆေးကြည့်တယ်။ အတွင်းမှာ ကာကွယ်ရေး ရတနာများစွာကို သူ တွေ့လိုက်ရတယ်။ ကျောက်စိမ်းဆွဲသီးတွေ၊ ဝတ်ရုံတွေ စသဖြင့် အမျိုးမျိုးသော ပစ္စည်းတွေ ရှိတယ်။ လင်ချွန်ကျောက်စိမ်း လောက် မစွမ်းဆောင်နိုင်ပေမယ့် ရှားပါးတဲ့ လက်နက်တွေ ဖြစ်နေတုန်းပဲ။ ရှင်းရှင်းလင်းလင်းပဲ၊ လီရူမန်က ဒီအတွက် အများကြီး စဉ်းစားထားခဲ့တယ်။ ဒါ့အပြင် လီရူမန်ရဲ့ လက်ရေးစာတစ်စောင်လည်း အတွင်းထဲမှာ ရှိတယ်။စာကအမွှေးနံ့ကသင်းမြမြနဲ့ထွက်နေတယ်။ 【ယဲ့ယွီသို့။】 【သွေးမိစ္ဆာဂိုဏ်းနဲ့ ပတ်သက်တဲ့ ကိစ္စကို ငါ ကူညီ ဖြေရှင်းပေးမယ်။】 【မင်းငါ့နားမှာ မရှိတဲ့အချိန်မှာ မင်း ဘေးကင်းရေးကို သေချာ ဂရုစိုက်ပါ။ နူအာ က ငယ်သေးတယ်၊ မင်းရဲ့ အဖော်ပြုမှုကို လိုအပ်တယ်။】 【တစ်နေ့ကျ မင်းမဟာချင်မင်းဆက်တိုင်းပြည် ကို လာချင်တယ်ဆိုရင် ငါ အရမ်း ပျော်ရွှင်မှာပါ။】 【ဒီမှာ မင်း အရမ်း ဘေးကင်းလိမ့်မယ်၊ ငါတို့ သုံးယောက်မိသားစု ပျော်ရွှင်စွာ နေထိုင်နိုင်လိမ့်မယ်။】 【ဒါ့အပြင် မင်း ဘာမဆို လုပ်ချင်ရာ လုပ်နိုင်တယ်၊ ဘယ်သူမှ ဝင်ရောက် စွက်ဖက်မှာ မဟုတ်ဘူး။】 【ဒါကို ငါ အာမခံနိုင်တယ်။】 စာထဲက ဒီစကားအနည်းငယ်က ယဲ့ယွီကို နွေးထွေးမှု ခံစားချက် ပေးခဲ့တယ်။ ဂရုစိုက်ခံရတဲ့ ခံစားချက်က တကယ်ကို အံ့ဩစရာပဲ။ ဒါပေမယ့် နန်းတော်ကို ပြန်သွားဖို့ကတော့ မဖြစ်နိုင်ဘူး။ ကမ္ဘာကြီးက အရမ်း ကျယ်ပြန့်တယ်၊ ကြည့်စရာတွေ အများကြီး ရှိသေးတယ်။ နန်းတော်ထဲမှာ တစ်သက်လုံး ပိတ်လှောင်နေလို့ ဘယ်ဖြစ်မလဲ။ ဒီပစ္စည်းတွေကို သေချာ သိမ်းဆည်းပြီးနောက် ယဲ့ယွီက ဒီနေ့ရဲ့ အိပ်မက်ပုံစံတူခြင်းကို စတင်ခဲ့တယ်။ 【အိပ်မက်တိုင်းက မင်းအတွက် ဘဝသစ်တစ်ခု!】 【မြေပုံနှင့် ဇာတ်ကောင်များ တင်နေသည်...】 【ရွေးချယ်မှု ပြီးစီးပါပြီ!】 【ဒီအိပ်မက်ရဲ့ ပါရမီ: ကောင်းကင်နတ်ဆိုးခန္ဓာကိုယ် (ရွှေရောင်)】 【အထူးကံကြမ္မာအောက်မှာ မွေးဖွားလာသူ၊ မည်သည့် နတ်ဆိုးကျင့်ကြံခြင်းနည်းလမ်းကိုမဆို ထူးခြားစွာ နားလည်ပြီး ထိုးထွင်းသိမြင်နိုင်စွမ်းရှိသူ။】 【နောင်အနာဂတ်မှာ နတ်ဆိုးလမ်းစဉ်ရဲ့ ခေါင်းဆောင် ဖြစ်လာမယ့် ကံကြမ္မာ ရှိသူ။】

ဒီပါရမီကို မြင်တော့ ယဲ့ယွီရဲ့ မျက်နှာက ထပ်ပြီး ဝမ်းသာအားရ ဖြစ်လာခဲ့တယ်။ ရွှေရောင်ပါရမီ၊ ရွှေရောင်ပါရမီနဲ့ နောက်ထပ် တွေ့ကြုံမှု။ ဒီအိပ်မက်ပုံစံတူခြင်းမှာ သူက သူ့နှလုံးသားကို ခိုင်မာအောင် လုပ်ပြီး အချစ်လမ်းစဉ်ကို ရှောင်ရှားရမယ်။ ဒီလိုမှသာ သူက ကြာရှည် အသက်ရှင်သန်နိုင်ပြီး နောက်ဆုံးမှာ တက်ကြွနိုင်ဖို့ အခွင့်အရေး ပိုများလိမ့်မယ်။ 【တွေ့ရှိသည်: သာမန်+ အဆင့် အိပ်မက်အကဲဖြတ်မှု ငါးခု ပြီးစီးခဲ့ပြီ။】 【Dream system အဆင့်မြှင့်တင်ပြီးပြီ။】 【ဒီအိပ်မက်ကစပြီး ပိုင်ရှင် က အိပ်မက်ထဲကို ကိုယ်တိုင်ဝင်ရောက်ပြီး ပုံစံတူ စမ်းသပ်လိမ့်မယ်။】 【ကြည့်ရှုသူအဖြစ် မဟုတ်တော့ပါ။】(အရင်အိပ်မက်တွေတုန်းကယဲ့ယွီက ရုပ်ရှင်ကြည့်နေရသလိုပုံမှန်အိပ်မက်မက်နေရသလိုမျိုးပဲကိုယ်တိုင်ထိန်းချုပ်မှုနဲစွာမက်ခဲ့ရပေမဲ့ ဒီအိပ်မက်ကစပြီးကိုယ်တိုင်လှုပ်ရှားဆုံးဖြတ်ရမှုပိုများလာတော့မှာပါ) သတင်းအချက်အလက်တွေ သူ့ရှေ့မှာ ပေါ်လာတာကို မြင်တော့ ယဲ့ယွီရဲ့ မျက်လုံးတွေ ပြူးကျယ်သွားခဲ့တယ်။ ချက်ချင်းပဲ သူ့ကို ကြီးမားတဲ့ အင်အားတစ်ခုက ရှေ့ကို ဆွဲဆောင်ပြီး သူ့ကို လွှမ်းခြုံသွားခဲ့တယ်။ 【အသက် 0 နှစ်၊ ယဲ့ယွီကို အရှေ့ပင်လယ်တိုက်ကြီးက တိုင်းငယ်လေးတစ်ခုမှာ မွေးဖွားခဲ့တယ်။】 【သူ မွေးတဲ့နေ့မှာ ကောင်းကင်ဖြစ်စဉ်တွေ ဖြစ်ပေါ်ခဲ့တယ်။】 【ကြည်လင်တဲ့ ညကောင်းကင်မှာ မှောင်မိုက်တဲ့ တိမ်တွေက ရုတ်တရက် နေကို ဖုံးအုပ်သွားပြီး ငိုယိုသံတွေ၊ အော်ဟစ်သံတွေ ထွက်ပေါ်ခဲ့တယ်။】 【ကောင်းကင်မှာ အနက်ရောင် ကြာပန်းပုံရောင်ခြည်တွေ လင်းလက်နေတယ်။】 【သူတို့က ကြယ်ရောင်ခြည်အဖြစ် ပြောင်းလဲပြီး အောက်ကို ကျလာခဲ့တယ်။】 【မျက်လုံးနီရဲနေတဲ့ ကျီးကန်း ထောင်ပေါင်းများစွာက အိမ်ပေါ်မှာ ဝဲပျံနေတယ်။】 【ဒီလို ဖြစ်စဉ်တွေက နာရီဝက်ကြာခဲ့တယ်။】 【ကံကောင်းစွာပဲ မွေးရာနေရာက အရမ်း ဝေးလံခေါင်သီတဲ့ တောင်ပေါ်ရွာလေးဖြစ်တယ်။】 【ဒါ့အပြင် ညဘက်လည်း ဖြစ်တာကြောင့် သိပ်ပြီး ဂယက်မရိုက်ခဲ့ဘူး။】 【ယဲ့ယွီက မရင်းနှီးတဲ့ ပတ်ဝန်းကျင်ကို ကြည့်ပြီး အနည်းငယ် မျက်မှောင်ကြုတ်လိုက်တယ်။】 【သူ တကယ်ပဲ ကလေးငယ်လေး ဖြစ်သွားပြီလား။】 【သူ ဒါကို အကြိမ်ကြိမ် ကြုံဖူးပေမယ့် အမြဲတမ်း ကြည့်ရှုသူအဖြစ်ပဲ ရှိခဲ့တယ်။】 【အခု ရုတ်တရက် ပထမလူမြင်ကွင်းနဲ့ မြင်ရတော့ ခံစားချက်က လုံးဝ ကွာခြားတယ်။】 【ဒီအချိန်မှာ ယဲ့ယွီက အိပ်မက်ထဲက သူ့မွေးမိခင်က အရမ်း အားနည်းနေပေမယ့် အရမ်း စိုးရိမ်ပူပန်နေတာကို သတိထားမိခဲ့တယ်။】 【ကလေးက မငိုတာ ပြဿနာရှိနိုင်တယ်၊ မြန်မြန် ငိုရမယ်လို့ တိုးတိုးလေး ရေရွတ်နေတယ်။】 【သူမ လက်ကို မြှောက်ပြီး တင်ပါးကိုရိုက်ပီး ထိတွေ့မှုနဲ့ ငိုအောင် လုပ်ဖို့ ပြင်ဆင်နေတယ်။】 【ဒါကို မြင်တော့ ယဲ့ယွီ ချက်ချင်း ကျယ်လောင်စွာ ငိုကြွေးလိုက်တယ်။】 【ဘာဟာသလဲ၊ ဂုဏ်သိက္ခာရှိတဲ့ ရွှေရောင်ပါရမီ၊ ကောင်းကင်နတ်ဆိုးခန္ဓာကိုယ် ပိုင်ရှင်၊ ပထမဆုံး နေ့မှာပဲ ဘယ်လိုလုပ် ရိုက်နှက်ခံရမှာလဲ။】 【သတင်းထွက်ရင် လုံးဝ ရှက်စရာ မကောင်းဘူးလား။】