လင်းယွမ်၏ လေ့ကျင့်မှု....

Vol. 27 Ch. 418

နှစ်ပေါင်းနှစ်သန်းကျော်အတွင်း လူသားမျိုးနွယ်၏ မရေတွက်နိုင်သော ဆင့်ကဲပြောင်းလဲသူများက ထျန်းယုမျိုးနွယ်နှင့် အပြင်းအထန် တိုက်ခိုက်ခဲ့ပြီး ထိုပြင်းထန်မှုက လူသားမျိုးနွယ်နှင့် ထျန်းယုမျိုးနွယ်တို့ကြား တိုက်ပွဲများထက်ပင် ကျော်လွန်ခဲ့သည်။

နေ့စဉ်နှင့်အမျှ လူသားဆင့်ကဲပြောင်းလဲသူများစွာက အင်အားကြီးမားသော ထျန်းယုမျိုးနွယ်ဝင်များ၏ လက်ချက်နှင့် သေဆုံးခဲ့ရပြီး အလားတူပင် ထျန်းယုမျိုးနွယ်ဝင်များစွာကလည်း လူသားမျိုးနွယ်၏ ဆင့်ကဲပြောင်းလဲသူများ၏ လက်ထဲတွင် သေဆုံးခဲ့ရသည်။

ယခုအချိန်တွင် စစ်မြေပြင်၏ တစ်ဖက်တွင် အဋ္ဌမအလွှာ တားဆီးမရသူဆယ်ယောက်ကျော်က စုစည်းနေပြီး ထျန်းယုမျိုးနွယ်ကို ဆန့်ကျင်တိုက်ခိုက်မည့် စစ်ပွဲဗျူဟာများကို ဆွေးနွေးနေကြသည်။

" နောက်ထပ်နှစ်အနည်းငယ်အတွင်းမှာ ထျန်းယုမျိုးနွယ်က အဲ့ဒီကြယ်နယ်မြေကို အဆုံးအဖြတ်စစ်ပွဲကို မလွှဲမသွေ ဆင်နွှဲလာလိမ့်မယ်။ " အရပ်ပုပုနှင့် အဋ္ဌမအလွှာ တားဆီးမရသူတစ်ယောက်က တည်ငြိမ်သော အသံနှင့်ပြောလိုက်သည်။

လူသားမျိုးနွယ်က စစ်ပွဲ၏ သက်ရောက်မှုကို ဖြစ်နိုင်သမျှ ကန့်သတ်ချက်များအတွင်း ထိန်းချုပ်ရန်အတွက် စစ်မြေပြင်များစွာကို တည်ဆောက်ခဲ့ကြသည်။ သူတို့က စစ်မြေပြင်များတွင် မတိုက်ခိုက်ဘဲ ကြယ်စကြာဝဠာထဲတွင် ဂြိုလ်များစွာ ပျက်ဆီးခြင်းကို ဖြစ်ပေါ်စေမည်ဖြစ်သည်။

စစ်ပွဲကို အနိုင်ရခဲ့လျှင်တောင် ပျက်ဆီးနေသော ကြယ်နယ်မြေများကိုသာ ရရှိပေလိမ့်မည်။

လင်းယွမ်က ကြယ်သခင်ရာထူးကို ယူပြီး သွားခဲ့သော နဂါးငွေ့တန်းကြယ်နယ်မြေကလည်း ယခင် အရိပ်မျိုးနွယ်က ပိုင်ဆိုင်ခြင်းဖြစ်သည်။

အရိပ်မျိုးနွယ်က စစ်မြေပြင်ရှိ တိုက်ပွဲတွင် လူသားမျိုးနွယ်ကို ရှုံးနိမ့်ခဲ့ပြီး ကြယ်နယ်မြေတစ်ခုကို ဆန္ဒအလျောက် စွန့်လွှတ်ခဲ့သည်။ ၎င်းက အထွတ်အထိပ်မျိုးနွယ်များကြား သဘောတူညီထားသော အချက်တစ်ခုလည်း ဖြစ်သည်။

ယခုလည်း လူသားမျိုးနွယ်နှင့် ထျန်းယုမျိုးနွယ်တို့ကြား ထိပ်တိုက်ရင်ဆိုင်မှုက ကြယ်နယ်မြေတစ်ခု၏ ပိုင်ဆိုင်မှုကို ဆုံးဖြတ်ပေးမည်ဖြစ်သည်။

" ထျန်းယုမျိုးနွယ်က သေချာပြင်ဆင်ထားတယ်။ သူတို့က အဋ္ဌမအလွှာ တားဆီးမရသူအများကြီးကို စုစည်းထားပြီး အဲ့ဒီကြယ်နယ်မြေကို ပိုင်ဆိုင်ဖို့ စိတ်ပိုင်းဖြတ်ထားတဲ့ပုံပဲ။ ကျွန်မတို့က အနိုင်ရနိုင်ချေနည်းတယ်။ " အပြာရောင်ဝတ်ရုံနှင့် အမျိုးသမီးတစ်ယောက်က ပြောလိုက်သည်။

လူသားမျိုးနွယ်က ထျန်းယုမျိုးနွယ်ထက် နိမ့်ကျနေခြင်းမဟုတ်ပေ။ ယခု လူသားမျိုးနွယ်က အခြားအထွတ်အထိပ်မျိုးနွယ်တစ်ခုနှင့် တိုက်ခိုက်ရန် ဆင့်ကဲပြောင်းလဲသူအများအပြားကို စေလွှတ်ခဲ့သောကြောင့် ဖြစ်သည်။

" ကျုပ်မှာ အကြံတစ်ခုတော့ရှိတယ်။ " အဋ္ဌမအလွှာတားဆီးမရသူတစ်ယောက်က ပြောလိုက်သည်။

" ပြောပါ။ " အရပ်ပုပုနှင့် လူက ချက်ချင်း ပြောလိုက်သည်။ သူကလည်း ထျန်းယုမျိုးနွယ်နှင့် လာမည့်စစ်ပွဲအတွက် စိုးရိမ်နေသည်။

" မကြာသေးခင်က နဂါးငွေ့တန်းကြယ်သခင်က အဋ္ဌမအလွှာ တားဆီးမရသူ မျိုးနွယ်ခြားငါးယောက်နဲ့ တိုက်ခိုက်ခဲ့တယ်။ သူက သုံးယောက်ကို ထွက်ပြေးစေပြီး နှစ်ယောက်ကို သတ်နိုင်ခဲ့တယ်။ "

" ဒါကြောင့် ကျုပ်ပြောချင်တာက..." အဋ္ဌမအလွှာ တားဆီးမရသူက လှည့်ပတ်ကြည့်လိုက်သည်။ " ဘယ်လိုအဖိုးအခမျိုးနဲ့ ဖြစ်ဖြစ် နဂါးငွေ့တန်းကြယ်သခင်ကို ဖိတ်ခေါ်ဖို့ပဲ။ "

" နဂါးငွေ့တန်းကြယ်သခင်ကို ဖိတ်ခေါ်မယ်။ "

အဋ္ဌမအလွှာ တားဆီးမရသူများက တစ်ယောက်နှင့်တစ်ယောက် ကြည့်လိုက်ကြသည်။

စစ်မြေပြင် B0001 က သက်တမ်းအကြာဆုံး အလတ်စားစစ်မြေပြင်တစ်ခုဖြစ်ပြီး လူသားမျိုးနွယ်၏ ဆင့်ကဲပြောင်းလဲသူများစွာနှင့် ထျန်းယုမျိုးနွယ်၏ အင်အားကြီးပုဂ္ဂိုလ်များကို စုစည်းထားသည်။ စစ်ပွဲ၏ ပြင်းထန်မှုက စစ်မြေပြင်ကြီးများထက် အနည်းငယ်သာ နိမ့်ကျလေသည်။

အဋ္ဌမအလွှာ တားဆီးမရသူများကြား တိုက်ပွဲများကို မကြာခဏ မြင်တွေ့ရပြီး ထိုစစ်မြေပြင်တွင် လူသားမျိုးနွယ်မှ စေလွှတ်ထားသော အဋ္ဌမအလွှာ တားဆီးမရသူအရေအတွက်ပင် အလွန်များလေသည်။ ထို့အပြင် အဋ္ဌမအလွှာ တားဆီးမရသူများသာမက နဝမအလွှာ အင်အားကြီးသူများကလည်း အာရုံစိုက်နေကြသည်။

လူသားမျိုးနွယ်မှဖြစ်စေ ထျန်းယုမျိုးနွယ်မှဖြစ်စေ နဝမအလွှာ အင်အားကြီးသူများက အာရုံစိုက်နေရုံသာဖြစ်ပြီး အခြေခံအားဖြင့် ဝင်ရောက်စွက်ဖက်ခြင်းမရှိပေ။

နဝမအလွှာ အင်အားကြီးသူများ စစ်ပွဲထဲသို့ ဝင်ရောက်လာသည်နှင့် တပြိုင်နက် စစ်ပွဲ၏ အခြေအနေက ပြောင်းလဲသွားပြီး စစ်မြေပြင်တစ်ခုလုံး ပျက်ဆီးသွားနိုင်လေသည်။

ကြယ်စကြာဝဠာရှိ အထွတ်အထိပ်မျိုးနွယ်များနှင့် မဟာမိတ်အဖွဲ့များက နဝမအလွှာ အင်အားကြီးသူများ၏ လုပ်ဆောင်မှုများကို ဖြစ်နိုင်သမျှ ကန့်သတ်ထားကြပြီး စစ်မြေပြင်ကြီးများမှ လွဲ၍ အခြားနေရာများတွင် နဝမအလွှာများ လှုပ်ရှားသည်ကို တွေ့ရခဲလေသည်။

ယခင်က လူသားမျိုးနွယ်က အင်းဆက်မျိုးနွယ်ကို တိုက်ခိုက်ရန်အတွက် နဝမအလွှာ ဆင့်ကဲပြောင်းလဲသူများကို စေလွှတ်ခဲ့ရသည့်အကြောင်းရင်းမှာ အင်းဆက်မျိုးနွယ်က သဘောတူညီမှုကို ချိုးဖောက်သောကြောင့်ဖြစ်သည်။

" နဂါးငွေ့တန်းကြယ်သခင်ကို ဖိတ်ခေါ်တာက တကယ် ဖြေရှင်းချက်တစ်ခုပဲ။ "

အဋ္ဌမအလွှာ တားဆီးမရသူများက ခေါင်းညိမ့်လိုက်ကြသည်။ သူတို့က သဘာဝအတိုင်း အလွန်မာနကြီးကြသော်လည်း နဂါးငွေ့တန်းကြယ်သခင်အပေါ်တွင် သံသယမရှိကြပေ။

နဂါးငွေ့တန်းကြယ်နယ်မြေအတွင်း နဂါးငွေ့တန်းကြယ်သခင်က အဋ္ဌမအလွှာတားဆီးမရသူငါးယောက်ကို တစ်ယောက်တည်း ရင်ဆိုင်ပြီး နှစ်ယောက်ကိုပင် သတ်ဖြတ်ခဲ့သည်။

နဂါးငွေ့တန်းကြယ်သခင်က သူ၏ ကိုယ်ပိုင်စွမ်းအားဖြင့် အဋ္ဌမအလွှာ တားဆီးမရသူများ၏ ကန့်သတ်ချက်ကို မြှင့်တင်ခဲ့သည်။ သူက အဋ္ဌမအလွှာ တားဆီးမရသူများ၏ ဒဏ္ဍာရီကိုပင် ချိုးဖျက်ခဲ့ပြီး လူသားမျိုးနွယ်၏ နံပါတ်တစ် အဋ္ဌမအလွှာ ဆင့်ကဲပြောင်းလဲသူအဖြစ် ချီးကျူးခြင်းခံခဲ့ရသည်။

" ဒါပေမယ့် ကျွန်မတို့က နဂါးငွေ့တန်းကြယ်သခင်ကို ဖိတ်ခေါ်ဖို့အတွက် ဘယ်လိုကမ်းလှမ်းမှုမျိုး ပေးမှာလဲ။ " အပြာရောင်ဝတ်ရုံနှင့် အမျိုးသမီးက မေးလိုက်သည်။

နဂါးငွေ့တန်းကြယ်သခင်၏ ခွန်အားဖြင့် တိုက်ပွဲ၏ အခြေအနေကို ပြောင်းလဲပစ်ရန် မျှော်လင့်ချက်ရှိလေသည်။ အနည်းဆုံးတော့ သူက ထျန်းယုမျိုးနွယ်၏ အဋ္ဌမအလွှာ တားဆီးမရသူ အများအပြားကို တားဆီးထားနိုင်ပေလိမ့်မည်။ ထိုသို့သော အခြေအနေများအောက်တွင် လူသားမျိုးနွယ်က မရှုံးနိမ့်နိုင်ပေ။

ပြဿနာက ဘယ်လိုကမ်းလှမ်းမှုမျိုး ပေးမှာလဲ။ တန်ဖိုးနည်းသွားလျှင်လည်း နဂါးငွေ့တန်းကြယ်သခင်က လာလိမ့်မည်မဟုတ်ပေ။ သူတို့က နဂါးငွေ့တန်းကြယ်သခင်ကို ဖိတ်ခေါ်ရန် ဘယ်လောက်မြင့်မားသော ကမ်းလှမ်းမှုမျိုး လိုအပ်သလဲဆိုတာ မသိသောကြောင့် ဖြစ်သည်။

" ငါဆုံးဖြတ်လိုက်မယ်။ ဒီစစ်မြေပြင်ရဲ့ လာမည့်စစ်ပွဲတွေက ရရှိမယ့် စုစုပေါင်းကောင်းမှုအမှတ်ရဲ့ ဆယ်ပုံတစ်ပုံကို ပေးလိုက်မယ်။ " အရပ်ပုပုနှင့် လူက ခဏစဉ်းစားပြီး ပြောလိုက်သည်။

" စုစုပေါင်းကောင်းမှုအမှတ်ရဲ့ ဆယ်ပုံတစ်ပုံလား။ " အဋ္ဌမအလွှာ တားဆီးမရသူများက အံ့အားသင့်သွားကြသည်။

စစ်မြေပြင်တစ်ခု၏ စုစုပေါင်း ကောင်းမှုအမှတ်များက အလွန်များပြားလှသည်။ ကြယ်နယ်မြေများ၏ ကြယ်သခင်များက မျိုးနွယ်ခြားစစ်မြေပြင်များကို ဘာကြောင့် စီမံခန့်ခွဲချင်ကြတာလဲ။ လူသားမျိုးနွယ်ကို အကျိုးပြုဖို့ သက်သက်ပဲလား။

အဓိကအကြောင်းရင်းမှာ စစ်မြေပြင်တစ်ခုကို စီမံခန့်ခွဲခြင်းက များပြားသော အကျိုးကျေးဇူးများ ရရှိပြီး ၎င်းတို့ထဲတွင် ကောင်းမှုအမှတ်များက အရေးကြီးသော အခန်းကဏ္ဍတွင် ပါဝင်လေသည်။

" ထျန်းယုမျိုးနွယ်ကို ရင်ဆိုင်နိုင်လို့ကတော့ အဲ့ဒီဆယ်ပုံတစ်ပုံကို ပေးလို့ရတယ်။ "

အဋ္ဌမအလွှာ တားဆီးမရသူများက ခဏစဉ်းစားပြီး သဘောတူလိုက်ကြသည်။ ထျန်းမျိုးနွယ်ကို စစ်ရှုံးသွားလျှင် စစ်မြေပြင်တွင် အမြဲတမ်းနေထိုင်သော သူတို့အတွက် ကြီးမားသော တန်ဖိုးကို ပေးဆပ်ရမည်ဖြစ်ပြီး လက်ရှိကိုယ်ပွားကိုပင် ဆုံးရှုံးနိုင်လေသည်။

" ဒါဆိုရင် ငါ လွတ်လပ်ခြင်းနတ်ဘုရားကနေတစ်ဆင့် နဂါးငွေ့တန်းကြယ်သခင်ကို ဆက်သွယ်လိုက်မယ်။ " အရပ်ပုပုနှင့်လူက ပြောလိုက်သည်။

လင်းယွမ်ကဲ့သို့ ဒဏ္ဍာရီဆန်သော အဋ္ဌမအလွှာတားဆီးမရသူတစ်ယောက်ကို စေလွှတ်ရန် လွတ်လပ်ခြင်းနတ်ဘုရား၏ ခွင့်ပြုချက်ကို လိုအပ်လေသည်။ တစ်ချိန်တည်းတွင် သူတို့သဘောတူထားသည့်အပေးအယူကို လွတ်လပ်ခြင်းနတ်ဘုရားက အတည်ပြုရန် လိုအပ်ပြီး ၎င်းက နဂါးငွေ့တန်းကြယ်သခင်အပေါ် သူတို့၏ စိတ်ရင်းကို ဖော်ပြသည့် နည်းလမ်းဖြစ်သည်။

နတ်ဆိုးကျောက်စိမ်းနေရာ။

အနက်ရောင်မျှော်စင်၏ ဒုတိယအထပ်။

လင်းယွမ်က ပေါ်လာပြီး ပြင်းထန်သော ဖိအားတစ်ခုက သူ့ကို လေးဘက်လေးတန်မှ တိုက်ခိုက်လေသည်။

" ဒီဖိအားကို စကြာဝဠာစွမ်းအားအမျိုးမျိုးနဲ့ ရင်ဆိုင်တာက ငါ့အတွက် စကြာဝဠာစွမ်းအား အသုံးပြုပုံတွေကို ပိုမိုတိုးတက်စေတယ်။ " လင်းယွမ်က တွေးလိုက်သည်။

အနက်ရောင်မျှော်စင်၏ ဒုတိယအထပ်ကို ပထမဆုံး ကြိုးစားပြီးနောက် လင်းယွမ်က နတ်ဆိုးကျောက်စိမ်းအမှတ်အသားကို အသုံးပြုပြီး အနက်ရောင်မျှော်စင်ထဲသို့ မကြာခဏ ဝင်ရောက်ခဲ့သည်။

ဒုတိယအထပ်၏ ဖိအားကို အသုံးပြုပြီး စကြာဝဠာစွမ်းအားအမျိုးမျိုး၏ အသုံးပြုပုံကို လေ့ကျင့်ခဲ့သည်။ မူလကမ္ဘာတွင် အဋ္ဌမအလွှာများအတွက် စကြာဝဠာစွမ်းအားများက ထူးခြားသောကြောင့် အသုံးချရန် နည်းစနစ်များ မရှိပေ။

သို့သော် စိတ်ဝိညာဉ်ကမ္ဘာတွင် အထွတ်အထိပ် အင်မော်တယ်ဘုရင်များက ဖန်တီးခြင်းစွမ်းအားအမျိုးမျိုးကို ကျွမ်းကျင်ကြပြီး ၎င်းတို့ကို ပေါင်းစပ်၍ ကြီးမားသော စွမ်းအားကို ထုတ်လွှတ်နိုင်ကြသည်။

အနက်ရောင်မျှော်စင်၏ အတွင်းပိုင်းက စကြာဝဠာစွမ်းအားများနှင့် လေဟာနယ်မိယာမကို နားလည်ရန် အထူးပြုလုပ်ထားခြင်းဖြစ်ပြီး လင်းယွမ်က ကောင်းကင်ကိုဆန့်ကျင်သော နားလည်နိုင်စွမ်းဖြင့် ပေါင်းစပ်လိုက်သောအခါ စကြာဝဠာစွမ်းအားများ၏ အသုံးပြုသော နည်းစနစ်များကို ပိုမိုနားလည်လာခဲ့သည်။

" ဒီကောင်လေးက သခင်ထားခဲ့တဲ့ ရတနာကို လေ့ကျင့်ဖို့ အသုံးချနေတာလား။ " ကျောက်ရုပ်တုရှန်းကျိက ခေါင်းခါလိုက်သည်။

" ဒါပေမယ့် အဲ့ဒါ ကောင်းပါတယ်။ အနာဂတ်မှာ မင်းဘယ်လိုအောင်မြင်မှုတွေရမလဲ ငါကြည့်ချင်ပါသေးတယ်။ " ကျောက်ရုပ်တုရှန်းကျိက လင်းယွမ်ကိုပြသနေသည့် အလင်းမျက်နှာပြင်ကို ကြည့်နေသည်။