အိမ်ဟောင်းထဲက အမျိုးသမီး (အပိုင်း ၅)

တစ်ပြိုင်နက်တည်းမှာပဲ သူ့လည်ပင်းကို တင်းကျပ်ထားတဲ့ အားက လျော့သွားပြီး နောက်တစ်စက္ကန့်မှာ အမျိုးသမီးရဲ့ လက်တွေက လွှတ်ပေးလိုက်လေသည်။

"အဆင်ပြေသွားပါပြီ၊ အဆင်ပြေသွားပါပြီ" ယန်ကျွင်းဇဲက သူ့ရင်ဘတ်ကို ပုတ်လိုက်ပြီး ခေါင်းမလှည့်ဘဲ ပြောလိုက်သည်၊ "မင်းရဲ့လျှာကို ငါ ပြန်ထည့်ပေးလိုက်ပြီ။

ဒီလိုဆို မင်း နည်းနည်း ပိုလှလာမယ်၊ ငါ ဘာအန္တရာယ်မှ မရည်ရွယ်ပါဘူး"။

"ကျေးဇူး... ကျေးဇူးတင်ပါတယ်"။

သူ့နောက်က အမျိုးသမီးရဲ့ အသံက အလွန်ကြည်လင်လာသည်၊ သူမရဲ့ ပါးစပ်ထဲကနေ ထွက်နေတဲ့လျှာကလည်း ပြန်ဝင်သွားပြီဖြစ်ကြောင်း သိသာထင်ရှားပေသည်။

"အခု မင်းကို ငါကြည့်လို့ရပြီလား" ယန်ကျွင်းဇဲက သတိထားပြီး မေးလိုက်သည်၊ လှည့်မကြည့်သေးပေ။

"ခုနက မင်းကို ကြောက်အောင်လုပ်မိလို့ တောင်းပန်ပါတယ်" လို့ ယဲကျဲနန်က ပြောလိုက်သည်၊ "ရပါတယ်၊ ကြည့်လို့ရပါပြီ"။

ယန်ကျွင်းဇဲက ဒီလို ယဉ်ကျေးတဲ့ ထူးဆန်းတဲ့အရာမျိုးကို ပထမဆုံးအကြိမ် တွေ့ဖူးခြင်းဖြစ်သည်၊ ဒါကြောင့် ခဏတာလောက်အထိ ရန်လိုတဲ့အဖွားနဲ့ အရင်က ခေးအာကြောင့် နှိပ်စက်ခံခဲ့ရတဲ့ သူအဖို့ ဒါက နည်းနည်းတော့ စိတ်ရှုပ်ထွေးစေသည်။

ဒီအချိန်မှာ သူက လူ့သဘာဝကိုယ်တိုင်မှာ မတော်တဆ ပေါ်လာတဲ့ "နိမ့်ကျမှု" ရဲ့ အဓိပ္ပာယ်ကို နားလည်သွားသည်။

ပထမဆုံးအနေနဲ့ သူက ခေါက်လှေကားပေါ်ကို ပြုတ်ကျနေတဲ့ ဓာတ်မီးကို ကုန်းယူလိုက်သည်၊ ပြီးတော့မှ ယန်ကျွင်းဇဲက သူ့ခေါင်းကို လှည့်ကြည့်လိုက်သည်။

ယဲကျဲနန်ရဲ့ ဝိညာဉ်က သူ့နောက်မှာ တကယ်ပဲ ပျံဝဲနေသည်၊ အခုဆို လွင့်ပျံနေတဲ့ ဆံပင်တွေနဲ့အတူ ဖြူဖွေးတဲ့ဝတ်စုံကို ဝတ်ထားပြီး သူမရဲ့ မျက်နှာက ပုံမှန်ပြန်ဖြစ်သွားပြီ၊ နည်းနည်းတော့ ဖြူဖျော့နေပေမယ့် သရဲမနဲ့မတူဘဲ နတ်သမီးလေးလို ပိုတူနေသည်။

"ဟွန်း၊ မင်း ပုံမှန်ပြန်ဖြစ်သွားပြီ၊ အပြည့်အဝ ပုံမှန်ပြန်ဖြစ်သွားပြီ" ယန်ကျွင်းဇဲက ခေါင်းညိတ်ပြီး သဘောတူလိုက်သည်။

ပြီးနောက် သူက နောက်ထပ်တာဝန်ကို သတိရသွားပြီး ပြောလိုက်သည်၊ "အခု ငါ မင်းလည်ပင်းက ကြိုးကို ဖြုတ်ပေးတော့မယ်။ မင်း သဘောတူမယ်ဆိုရင် မင်းရဲ့ ခန္ဓာကိုယ်ကို ပြန်သယ်ပြီး ခေါင်းတလားထဲမှာ သေချာထားပေးလို့ရတယ်"။

ယဲကျဲနန်က ညင်သာစွာ ခေါင်းခါလိုက်သည်။

ယန်ကျွင်းဇဲအဖို့ ဒီအမျိုးသမီးက သူ ခုချိန်အထိ တွေ့ဖူးသမျှထဲမှာ လူနဲ့အနီးစပ်ဆုံး သရဲဖြစ်သည်၊ သူမရဲ့လျှာကို ပါးစပ်ထဲ ပြန်ထည့်လိုက်တာနဲ့ သူမက သာမန်လူတစ်ယောက်လို ပြုမူနေသည်။

သူ ဘာပြောပြော "အယ်"၊ "အာ"၊ ဒါမှမဟုတ် "အု" လိုမျိုး မဟုတ်ဘဲ သူမဆီကနေ ချက်ချင်း တုံ့ပြန်မှုကို ရနိုင်သည်။

"ဘာလို့ ဖြုတ်လို့မရတာလဲ" ယန်ကျွင်းဇဲက အနည်းငယ် ဇဝေဇဝါဖြစ်သွားသည်။

[ကြိုးဆွဲချထားသောအမျိုးသမီး] လို့ခေါ်တဲ့ တာဝန်က ယဲကျဲနန်ရဲ့ လည်ပင်းက အရမ်းနာကျင်နေပြီး အဆင်မပြေဖြစ်နေတာကို ဖြုတ်ပေးဖို့ တောင်းဆိုခဲ့သည်။

အခုကြည့်ရတာ ယဲကျဲနန်ရဲ့ ဝိညာဉ်က သူ့အပေါ် ဆိုးဆိုးရွားရွား သဘောထားမရှိတာကြောင့် ဒီတာဝန်ကို လုပ်ဖို့က လက်လှုပ်လိုက်ရုံလောက်ပဲ မဟုတ်လား။ ပြီးတော့ အလောင်းကို သယ်ပေးတဲ့ အပိုဝန်ဆောင်မှုပါ သူက ကမ်းလှမ်းနေသေးသည်။

ယဲကျဲနန်က ခေါင်းကို ဆက်ခါနေတုန်း၊ "ငါ အပြစ်ရှိပါတယ်၊ ငါ့သား... အခွင့်မသင့်ဘဲ သေဆုံးသွားတာ။ ဒါ ငါ့အပြစ်!"

ယန်ကျွင်းဇဲ စတင်နားလည်လာသည်၊ ယဲကျဲနန်ရဲ့သားက ရော့ခ် ရေလှောင်ကန်ထဲမှာ ရေနစ်သေဆုံးခဲ့သည်၊ သူမက ကလေးကို ကောင်းကောင်းမစောင့်ရှောက်ခဲ့ဘူးလို့ ခံစားရတာကြောင့် သူ့ကိုယ်သူ အဆက်မပြတ် အပြစ်တင်နေမိသည်။

သူမရဲ့ ကိုယ့်ကိုယ်ကို သတ်သေမှုက အကြောင်းရင်းနှစ်ခုရှိသည်၊ တစ်ခုက သူမရဲ့ ခင်ပွန်းက မကြာခဏ ရိုက်နှက်တာဖြစ်ပြီး ဒုတိယတစ်ခုက ကလေးကိုကောင်းကောင်းမကြည့်ရှုခဲ့တဲ့အပြစ်အတွက် ကိုယ့်ကိုယ်ကို သေဆုံးချင်တာ ဖြစ်နိုင်သည်။

လူတစ်ယောက်နဲ့ သရဲတစ်ကောင်က တိတ်ဆိတ်စွာ တစ်ယောက်နဲ့တစ်ယောက် ကြည့်နေကြသည်။

ခဏကြာပြီးနောက် ယန်ကျွင်းဇဲက ပြောလိုက်သည်၊ "ဒါဆို မင်းပြောချင်တာက ငါက မင်းရဲ့ခန္ဓာကိုယ်ကို အခုဆင်းပြီး ခေါင်းတလားထဲ ပြန်ထားပေးလိုက်ရင်တောင် ရက်အနည်းငယ်အတွင်း မင်းက သူ့ဘာသာသူ ပြန်ထွက်လာပြီး ဒီမှာ ကြိုးပြန်ဆွဲချနေဦးမှာလား"။

ယဲကျဲနန်က ခေါင်းညိတ်လိုက်သည်။

"ဒီလိုဆိုရင်ရော" ယန်ကျွင်းဇဲက အကူအညီမဲ့စွာ ပြောလိုက်သည်၊ "မင်းသားဆီကို အပြစ်ဖြေချင်တယ်ဆိုရင် ငါ နည်းလမ်းရှာပေးပါ့မယ်။ ဒါပေမယ့် အခုတော့ မင်းရဲ့ ခန္ဓာကိုယ်ကို ဆင်းပြီး ခေါင်းတလားထဲ ပြန်ထားဖို့လိုသေးတယ်။ မင်း ဘယ်လိုထင်လဲ"။

ဒီတစ်ကြိမ်မှာတော့ ယဲကျဲနန်က ဘာမှ တုံ့ပြန်ခြင်း မရှိတော့ပေ။

ယန်ကျွင်းဇဲက သူမကို ဂရုမစိုက်တော့ဘဲ နောက်ပြန်လှည့်လိုက်ပြီး သူ့လက်ကို ဆန့်ထုတ်ကာ အရိုးစုရဲ့လည်ပင်းမှာ ပတ်ထားတဲ့ ကြိုးကို ဆုပ်ကိုင်လိုက်သည်။

ကြိုးက တကယ်တမ်းမှာ အရမ်းဟောင်းနွမ်းနေပြီး အချို့နေရာတွေမှာ စုတ်ပြဲနေကာ ပြတ်တော့မလို ဖြစ်နေသည်။ ဒါပေမယ့် နားမလည်နိုင်စွာနဲ့ ဒါက တကယ်တမ်း ပြတ်သွားမှာမဟုတ်ဘူးလို့ ထင်ရသည်။

ကြိုးကို ဆုပ်ကိုင်ပြီးနောက် ယန်ကျွင်းဇဲက အလောင်းကို ညင်သာစွာ ပွေ့ဖက်လိုက်ပြီး အပေါ်ကို အနည်းငယ် မြှင့်လိုက်သည်၊ သူမရဲ့ လည်ပင်းက ကြိုးနဲ့ ကင်းလွတ်သွားသည်။

ကံကောင်းစွာနဲ့ပဲ အရိုးစုက သိပ်မလေးပေ။ ယန်ကျွင်းဇဲက ခေါက်လှေကားကို ဖြည်းဖြည်းချင်း ဆင်းလာပြီးနောက် အရိုးစုကို သူ့ကျောပေါ်ကို တင်ဖို့ လှည့်လိုက်သည်။

သူက ဓာတ်မီးနဲ့ ဝေ့ကြည့်လိုက်ပေမယ့် ယဲကျဲနန်ရဲ့ ဝိညာဉ်ကို မတွေ့ရတော့ပေ။

လောလောဆယ်တော့ ထားလိုက်ပါတော့၊ သူမရဲ့ အလောင်းကို ငါ့ကျောပေါ်တင်ပြီး ခေါင်းတလားထဲ ထည့်လိုက်တော့မယ်၊ အလောင်းက သူ့ဘာသာသူ ပြန်ဆင်းပြီး ကြိုးဆွဲမချခင်ပေါ့။ ငါ ယဲကျဲနန်ရဲ့သားကို ရှာတွေ့နိုင်မယ်ဆိုရင် ငါ၊ ယန်ကျွင်းဇဲက သူမရဲ့ဆန္ဒကို ချက်ချင်းကူညီဖြည့်ဆည်းပေးလိုက်

မယ်။

ကံကောင်းစွာနဲ့ အရိုးစုက ပေါ့ပါးတာကြောင့် သူက အလောင်းကို တတိယထပ်အထိ သယ်ဖို့ ငါးမိနစ်တောင် မကြာဘဲ ဖွင့်ထားတဲ့ ခေါင်းတလားထဲကို ဂရုတစိုက် ထည့်ပေးလိုက်သည်။

မူလကတော့ ယန်ကျွင်းဇဲက ခေါင်းတလားကို အဖုံးပြန်အုပ်ဖို့ ပြင်ဆင်ထားပေမယ့် ပြန်စဉ်းစားပြီးနောက်မှာတော့ သူ အုပ်ထားရင်တောင် ယဲကျဲနန်ရဲ့ ခန္ဓာကိုယ်က လိုအပ်တဲ့အခါ ပြန်ထွက်လာဦးမှာဖြစ်ပြီး အဖုံးကလည်း ဒါကို သေချာပေါက် တားဆီးထားနိုင်မှာ မဟုတ်ပေ။

ဒါကြောင့် သူ အုပ်မထားဖို့ ဆုံးဖြတ်လိုက်သည်။

ဒီတာဝန်တွေကို ပြီးစီးပြီးနောက်မှာလည်း သူက ယဲကျဲနန်ရဲ့ ဝိညာဉ်ကို မတွေ့ရသေးပေ။

ယန်ကျွင်းဇဲက သူ့လက်တွေကို ဖုန်ခါလိုက်သည်။ အခု ဒီကြိုးဆွဲချထားတဲ့အမျိုးသမီးရဲ့ တာဝန်က တစ်ဝက်ပဲ ပြီးတယ်လို့ သတ်မှတ်နိုင်သေးသည်။ ယဲကျဲနန်ရဲ့ လည်ပင်းက ကြိုးကို တကယ်တမ်း "ဖြေ" ပေးဖို့အတွက် သူမရဲ့ သေဆုံးသွားတဲ့သားကို အရင်ရှာရမည်။

သူက ခေါင်းတလားထဲမှာ လဲလျောင်းနေတဲ့ အဖြူရောင်ဝတ်စုံနဲ့ အရိုးစုကို ကြည့်ပြီး ပြောလိုက်သည်၊ "နှစ်ရက်လောက်တော့ သည်းခံပြီး အပြင်မထွက်ပါနဲ့။ ငါ သတင်းရတာနဲ့ မင်းရဲ့သားကို ချက်ချင်း ရှာပေးပါ့မယ်"။

ဒီလိုပြောပြီးနောက် ယန်ကျွင်းဇဲက လှည့်ထွက်သွားလေသည်။

အခြေအနေတွေက ဒီလောက် ရှုပ်ထွေးလိမ့်မယ်လို့ သူ မမျှော်လင့်ခဲ့ပေ။ "လျှာ" တာဝန်က ပြီးစီးသွားပေမယ့် သူက ကြိုးဆွဲချထားတဲ့အမျိုးသမီးရဲ့ ဒုတိယတစ်ဝက်မှာ ပိတ်မိနေပြီး အပြင်ထွက်ကာ တခြားနည်းလမ်းတစ်ခု ရှာရပေမည်။

ယန်ကျွင်းဇဲရဲ့ ခန့်မှန်းချက်အရ ယဲကျဲနန်ရဲ့ ခန္ဓာကိုယ်က တစ်ရက်၊ နှစ်ရက်အတွင်း ပြန်ကြိုးဆွဲချမှာ မဟုတ်သေးပေ။

စဉ်းစားနေရင်း သူက လှေကားကို ဆင်းလာပြီး ပထမထပ်ကို အမြန်ရောက်လာသည်။

အဆောက်အအုံရဲ့ အပြင်ဘက်ကို ဦးတည်တဲ့ ပရိဘောဂမရှိတဲ့ အခန်းထဲကို သူ ဝင်လာသည်။ ဒီအချိန်မှာ လရောင်က တံခါးမှာရှိတဲ့ အပေါက်ကြီးကနေ ဝင်လာပြီး အခန်းထဲမှာ လုံလောက်တဲ့ အလင်းရောင်ကို ပေးနေသည်။

ဓာတ်မီးမရှိရင်တောင် သူ လှုပ်ရှားနိုင်သေးသည်။

ဒါပေမယ့် ယန်ကျွင်းဇဲက ခြေလှမ်းအနည်းငယ်သာ လှမ်းလိုက်သေးချိန်မှာ ရပ်တန့်သွားပြီး ရှေ့ဆက်မသွားတော့ပေ။

သူ့ရဲ့မြင်ကွင်းမှာ၊ ကွဲနေတဲ့တံခါးရဲ့ အပြင်ဘက်နဲ့ လရောင်အောက်မှာ၊ အဖြူရောင်ဘောင်းဘီတိုနဲ့ လက်တိုအင်္ကျီဝတ်ထားတဲ့ ပိန်လှီနေတဲ့လူတစ်ယောက်ရဲ့ပုံရိပ်က သူ့ရှေ့မှာ ပေါ်လာလေသည်။

ဒီအချိန်မှာ အဲ့ဒီလူက သူ့ကို ကျောခိုင်းထားသည်။

"ကျောပေးထားတဲ့အမျိုးသမီး"။

ယန်ကျွင်းဇဲရဲ့ နှလုံးသားထဲမှာ တုန်လှုပ်မှုတစ်ခု ဖြတ်သန်းသွားသည်။

သူ မြင်ယောင်မှားတယ်လို့ ထင်ခဲ့ပေမယ့် သေချာကြည့်ပြီးနောက်မှာတော့ ဒါက ကျောခိုင်းထားတဲ့အမျိုးသမီးဖြစ်

ကြောင်း သူ အတည်ပြုလိုက်နိုင်သည်။

ကျန်းရှောင်မိုက သူ့နဲ့ခုနစ်ရက်နေခဲ့တဲ့အချိန်မှာ ကျောခိုင်းထားတဲ့အမျိုးသမီးက ယန်ကျွင်းဇဲရဲ့ရှေ့မှာ ဘယ်တုန်းကမှ မပေါ်လာခဲ့ပေ။

ဒါပေမယ့် အခုတော့ ပေါ်လာသည်။

ယန်ကျွင်းဇဲရဲ့အမြင်မှာ ကျောခိုင်းထားတဲ့အမျိုးသမီးက ကြယ်သုံးပွင့် သရဲမောင်းထုတ်သူ ကျန်းရှောင်မိုကို စိုးရိမ်မှုရှိတာကြောင့် ပုန်းအောင်းနေခဲ့တာ ဖြစ်နိုင်သည်လို့ ယူဆခဲ့သည်။

အခု ကျန်းရှောင်မိုက ထွက်သွားတာကြောင့် သူမရဲ့ လှုပ်ရှားမှုတွေက ချက်ချင်း ပုံမှန်ပြန်ဖြစ်လာသည်။

ဒါပေမယ့် ဒါက သူမ ပေါ်လာဖို့ အချိန် ကောင်းမဟုတ်ပေ။

ကျောခိုင်းထားတဲ့အမျိုးသမီးက သူ အပြင်ထွက်ဖို့ ဖြတ်သွားရမယ့်နေရာမှာ ရပ်နေသည်၊ သူ အဲ့ဒီကနေ သွားမယ်ဆိုရင် သူမနဲ့ အရမ်းနီးကပ်သွားရမည် - ယန်ကျွင်းဇဲက ခြေတစ်လှမ်းလှမ်းလိုက်တာနဲ့ ကျောခိုင်းထားတဲ့အမျိုးသမီးနဲ့ အနီးကပ်ဖက်ထားသလို ဖြစ်သွားနိုင်သည်၊ ချစ်သူတွေ နောက်ကနေ ပွေ့ဖက်ထားသလိုမျိုးပေါ့။

"မဖြစ်ဘူး၊ ငါ ဒီလမ်းက မသွားနိုင်ဘူး"။

တစ်စက္ကန့်လေးတောင် မဆိုင်းဘဲ ယန်ကျွင်းဇဲက ချက်ချင်း လှည့်ပြန်လိုက်သည်။

သူက ကြိုးဆွဲချထားတဲ့အမျိုးသမီးရဲ့ တာဝန်ကိုတောင် မပြီးသေးပေ၊ "သူမရဲ့ မျက်နှာကို ကြည့်ခြင်း" တာဝန်ကို အလွယ်တကူ စတင်ဖို့ သေချာပေါက် မလိုချင်ပေ။

ဘာပဲဖြစ်ဖြစ် ခုချိန်အထိ သူက "အမွေးတွေထောင်သွားလောက်အောင် (အနိမ့်)" အဆင့် တာဝန်မျိုးကို မတွေ့ဖူးသေးပေ။ အလွန်အန္တရာယ်ရှိတဲ့ ‌မကောင်းဆိုးဝါးစားသုံးခြင်း တာဝန်မှာ အငြိုးကြီးတဲ့အဖွားလို သရဲမျိုးနဲ့တောင် အဲ့ဒီတာဝန်ရဲ့အဆင့်က "ကြောက်လန့်တုန်လှုပ်ခြင်း (အမြင့်)" အဆင့်သာ ရှိသည် - "သူမရဲ့မျက်နှာကို ကြည့်ခြင်း" ထက် တစ်ဆင့်နိမ့်သည်။

ဟုတ်ပေသည်။ ‌မကောင်းဆိုးဝါးစားသုံးခြင်းတာဝန်မှာ အငြိုးကြီးတဲ့တဲ့အဖွားရဲ့ ပစ်မှတ်က သူကိုယ်တိုင်မဟုတ်ဘဲ လျူကျိယန် ဖြစ် နေသည်။

ဒါကြောင့် သက်ဆိုင်ရာအရဆိုရင် ‌မကောင်းဆိုးဝါးစားသုံးခြင်းတာဝန်က ယန်ကျွင်းဇဲအတွက် နည်းနည်းတော့ လွယ်ကူနေလေသည်။