သူမရဲ့မျက်နှာကိုကြည့်ပါ (အပိုင်း ၁၀)

“ဟွမ်ချန်နဲ့ တခြားလူတွေ ရောက်တာ မဟုတ်ဘူး” ယန်ကျွင်းဇဲက ပတ်ဝန်းကျင်ကို ကြည့်လိုက်ပြီး သူ့နောက်ကနေ ထွက်ပေါ်လာတဲ့ နောက်ပြန်လှည့်မျက်နှာအမျိုးသမီးရဲ့ သတိပေးသံကို ကြားလိုက်ရတဲ့အခါ ချက်ချင်းဆိုသလို စိုးရိမ်ပူပန်သွားခဲ့သည်။

“ရန်ငြိုးကြီးအဖွားအိုက မ‌ သေသေးသေးဘူးလား”

တကယ်လို့ သူမသာ မသေသေးဘူးဆိုရင်တော့ အဖွားအိုကို ‘အကောင်းဆုံး သေသွားတဲ့ ဇာတ်ပို့ဇာတ်ရံ’ ဆု ချီးမြှင့်သင့်ပြီ။

ဒီအတွေး တွေးမိပြီး မကြာခင်မှာပဲ တစ်စုံတစ်ယောက်ရဲ့ ရယ်သလိုလို ငိုသံလိုလို ထူးဆန်းတဲ့ အသံတစ်ခုက အပေါ်ထပ်ကနေ ထွက်ပေါ်လာခဲ့သည်။

ယန်ကျွင်းဇဲက အပေါ်ကို မော့ကြည့်လိုက်တဲ့အခါ လှေကားထစ်ရဲ့ မျက်နှာကျက်မှာ ပင့်ကူတစ်ကောင်လို တွယ်ကပ်နေတဲ့ လွီရှင်းကို တွေ့လိုက်ရသည်။

သူ့ခန္ဓာကိုယ်က အထဲဘက်ကို မျက်နှာမူပြီး တက်နေတာ မဟုတ်ဘဲ နံရံကို ကျောပေးလျက် မျက်နှာက အောက်ဘက်ကို ဦးတည်ကာ မျက်နှာကျက်မှာ ကပ်နေတာ ဖြစ်သည်။

သူ့မျက်နှာက ယန်ကျွင်းဇဲနဲ့ နောက်ပြန်လှည့်မျက်နှာအမျိုးသမီးရဲ့ အပေါ်တည့်တည့်မှာ ရှိနေသည်။

ယန်ကျွင်းဇဲကို အကြောက်ဆုံး ဖြစ်စေခဲ့တာကတော့ လွီရှင်းရဲ့ ရင်ဘတ်နေရာတစ်ခုလုံးက ကွဲထွက်နေပြီး ရင်ဘတ်ရဲ့ အရေပြားအလယ်ကနေ မီးခိုးရောင် ဆံပင်တွေနဲ့ ဖျော့တော့တဲ့ မျက်နှာတစ်ခုက ပေါ်ထွက်လာနေတာ ဖြစ်သည်။

သေချာကြည့်လိုက်တဲ့အခါမှာတော့ ဒါက ရန်ငြိုးကြီးအဖွားအို ကိုယ်တိုင် ဖြစ်နေပြီး သူမရဲ့ မျက်နှာက ပုံပျက်ပန်းပျက် ဖြစ်နေကာ အဲ့ဒီငိုသံက သူမရဲ့ ပါးစပ်ထဲက ထွက်ပေါ်လာတာ ဖြစ်သည်။

တစ်ချိန်တည်းမှာပဲ လွီရှင်းက အရင်လို ရန်ငြိုးကြီးအဖွားအို ဝင်ပူးခံထားရသလိုမျိုး မဟုတ်တော့ပေ။ သူ့ရဲ့ သတိက အလွန်ကြည်လင်နေသလိုမျိုး ပေါ်နေပြီး သူ့မျက်နှာက ပြင်းပြင်းထန်ထန်ကို ပုံပျက်နေကာ ယန်ကျွင်းဇဲကို စူးစူးစိုက်စိုက် ကြည့်နေခဲ့ပေသည်။

အဲဒီအချိန်မှာ ယန်ကျွင်းဇဲက လုံးဝကို စိတ်ရှုပ်ထွေးသွားခဲ့ရသည်။

ရန်ငြိုးကြီးအဖွားအိုကို ဖယ်ရှားပစ်နိုင်ခဲ့ခြင်း မရှိသေးတာက မှန်ပေမယ့် ဘာကြောင့် လွီရှင်းရဲ့သတိက ဘာလို့ရှိနေသေးတာလဲ။ ပြီးတော့ အဲဒီလူက အဖွားအိုက ရုန်းကန်နေရချိန်မှာ အဓိက ထိန်းချုပ်နေတဲ့လူ ဖြစ်နေသလိုမျိုး ပေါ်နေသည်။

နောက်တစ်စက္ကန့်မှာ ယန်ကျွင်းဇဲက ဘာတုံ့ပြန်မှုမှ မလုပ်နိုင်ခင်မှာပဲ ကြောက်မက်ဖွယ်ကောင်းတဲ့ ပုံစံပြောင်းသွားတဲ့ လွီရှင်းက သူ့ဆီကို အလွန်လျင်မြန်စွာ ခုန်ဝင်လာခဲ့လေသည်။

ဝှစ်!

နောက်ပြန်လှည့်မျက်နှာအမျိုးသမီးရဲ့ ဆံပင်တွေက ကြမ်းတမ်းစွာထွက်ပေါ်လာခဲ့ပြီး လွီရှင်းရဲ့ ကိုယ်ခန္ဓာကို ပတ်လိုက်ကာ အတင်းအကျပ် ဆွဲတင်လိုက်တာကြောင့် လမ်းကြောင်းပြောင်းသွားစေပြီး ယန်ကျွင်းဇဲနဲ့ သူမကြားက လှေကားထစ်ပေါ်ကို ကျရောက်သွားခဲ့သည်။

ယန်ကျွင်းဇဲက ချက်ချင်း ရှေ့ကိုပြေးသွားပြီး လေးထပ်အထိ လှေကားကို အဆင့်အနည်းငယ်တည်းနဲ့ ခုန်တက်ကာ စင်္ကြံလမ်းထဲကို ပြေးဝင်သွားခဲ့သည်။

သူ့နောက်မှာတော့ နောက်ပြန်လှည့်မျက်နှာအမျိုးသမီးနဲ့ လွီရှင်းလား၊ ဒါမှမဟုတ် ရန်ငြိုးကြီးအဖွားအိုလားဆိုတာ မသေချာတဲ့ သတ္တဝါတို့ကြားက ပြင်းထန်တဲ့ တိုက်ခိုက်သံကို ကြားနေရပြီ ဖြစ်သည်။

မီးခိုးရောင် မြူခိုးတွေ အများအပြားကလည်း ပြန်လည် ထလာခဲ့ပြီး လေးထပ်ရဲ့ လှေကားထစ်ကို လုံးဝ ဖုံးလွှမ်းသွားစေသည်။

ယန်ကျွင်းဇဲက လှေကားထစ်နဲ့ အနီးဆုံး အိမ်ခန်းတံခါးဆီကို ပြန်ဆုတ်သွားခဲ့သည်။

လီမိသားစုက အဲဒီမှာ နေထိုင်ကြပြီး အိမ်ထောင်ဦးစီးအမျိုးသားက ယန်ကျွင်းဇဲရဲ့ဖခင် ယန်တာ့ကောနဲ့ သက်တူရွယ်တူ ဖြစ်သည်။ သို့သော်လည်း လွန်ခဲ့တဲ့ နှစ်လကတည်းက ရေရှည် ဖျားနာခွင့်ယူခဲ့ပြီး အိမ်မှာ အနားယူနေတယ်လို့ ကြားသိရသည်။

ဒီအချိန်မှာ ယန်ကျွင်းဇဲက အဘိုးကြီးလီသာ အပြင်မထွက်ဘူးဆိုရင် အပြင်က ဆူညံသံကို သေချာပေါက် သိလိမ့်မယ်လို့ ခန့်မှန်းလိုက်သည်။ သူ့ခေါင်းကို လှည့်လိုက်တဲ့အခါ အိမ်ခန်းထဲကလိုက်ကာ လှုပ်သွားတာကို မြင်လိုက်ရပြီး ကြောက်လန့်နေတဲ့ အဘိုးကြီးလီရဲ့ မျက်နှာက ပေါ်လာခဲ့သည်။

ယန်ကျွင်းဇဲက သူအဆင်ပြေကြောင်း အချက်ပြဖို့ သူ့လက်ကို ဝှေ့ယမ်းပြလိုက်သည်။

အဘိုးကြီးလီက ပြတင်းပေါက်ကို အက်ကြောင်းလေးတစ်ခု ဖွင့်လိုက်ပြီး “ကျွင်းဇဲ၊ မင်း ဘာကြောင့် အဲဒီလောက် ရက်စက်ကြမ်းကြုတ်တဲ့ ထူးဆန်းတဲ့အရာတွေကို သွားနှိုးဆွလိုက်တာလဲ။ ငါက ၄၇၄၇ ကို ဖုန်းခေါ်ထားပြီးပြီ” လို့ ပြောလိုက်လေသည်။

“ဦးလေးလီ၊ ခင်ဗျား အခုလေးတင် အပြင်မထွက်တာ ကောင်းပါတယ်” ယန်ကျွင်းဇဲက တိုက်ရိုက် မဖြေဘဲ အခြားအကြောင်းအရာကို ပြောင်းလိုက်သည်။

“အဲဒီလူငယ်၊ ထူးဆန်းတဲ့တစ်ယောက်က အခုလေးတင် သေမသွားဘူးလား…” အဘိုးကြီးလီက ကြောက်လန့်စွာနဲ့ ထစ်အပြီး ပြောလိုက်သည်၊ “ဒါပေမယ့် မင်းတို့ အကုန်လုံး ထွက်သွားပြီး မကြာခင်မှာပဲ သူက ရုတ်တရက် ပြန်ထိုင်လိုက်ပြီး သူ့ရင်ဘတ်... ရင်ဘတ်... ဒီနေရာကနေ ခေါင်း... ခေါင်းတစ်ခု ပေါက်လာတယ်”

အဘိုးကြီးလီက ပြောနေရင်းနဲ့ ပြတင်းပေါက်ထဲမှာ လက်ဟန်ခြေဟန်တွေ လုပ်နေပြီး သူ့ခန္ဓာကိုယ်ကလည်း တုန်ယင်နေသည်။

အဲဒီမြင်ကွင်းကို နားမလည်နိုင်တဲ့ ယန်ကျွင်းဇဲက “ဦးလေးလီ၊ ကျေးဇူးပြုပြီး ပြတင်းပေါက်ကို မြန်မြန် ပိတ်လိုက်ပါ၊ အပြင်မထွက်ပါနဲ့၊ ပြီးတော့ နတ်ဆိုးနှိမ်နင်းသူတွေ ရောက်လာဖို့ကို စောင့်နေပါ” လို့ ပြောလိုက်လေသည်။

“ကောင်းပြီ!” အဘိုးကြီးလီက ချက်ချင်း ပြတင်းပေါက်ကို ပိတ်လိုက်ပြီး လိုက်ကာကို ပိတ်လိုက်သည်။

ဒီအချိန်မှာ လှေကားထစ်ထဲက မြူတွေက ပိုပြီးထူလာပြီး နံရံတွေပေါ်က နံရံဆေးတွေ အများအပြား ကွာကျလာကာ အိုဟောင်းနေသလိုမျိုး အစက်အပြောက်တွေ ပေါ်လာပြီး မှိုတွေ အများကြီး စတင်ပေါက်ပွားလာခဲ့သည်။

ဒီအချိန်မှာ နံစော်တဲ့ အနံ့တစ်ခုက ပျံ့လွင့်လာခဲ့သည်။

ဘယ်လိုပဲ ဖြစ်ဖြစ် နောက်ပြန်လှည့်မျက်နှာအမျိုးသမီးက ရုပ်ထုဝိညာဉ်အဆင့် စွမ်းအားရှင် မဟုတ်ဘူးဆိုရင်တောင် သူမက အနည်းဆုံးတော့ ရန်ငြိုးကြီးအဖွားအိုထက် ပိုအားကောင်းတဲ့ ရုပ်ထုညာဉ်တစ်ပိုင်းအဆင့် စွမ်းအားရှင် ဖြစ်လိမ့်မယ်လို့ ယန်ကျွင်းဇဲက ခန့်မှန်းလိုက်သည်။

သူမက သူမရဲ့ကလေးကို မတွေ့သေးတဲ့အတွက် သူ့အပေါ်မှာ ဒေါသ ရှိနေဆဲ ဖြစ်ပေမယ့် လက်ရှိအခြေအနေမှာ နောက်ပြန်လှည့်မျက်နှာအမျိုးသမီးက တခြား ထူးဆန်းတဲ့အရာတွေက သူ့ကို သတ်တာကို တားဆီးဖို့အတွက် ယန်ကျွင်းဇဲရဲ့ ကာကွယ်ပေးသူ ဖြစ်လာခဲ့ပေသည်။

ယန်ကျွင်းဇဲက စိတ်ထဲမှာ သက်သာရာရသွားခဲ့ပြီး အဲဒီထူးဆန်းတဲ့ကလေးငယ်လေးနှစ်ယောက်က သူမရဲ့ကလေးတွေ မဟုတ်ခဲ့တာကို ကျေးဇူးတင်မိသည်။ တကယ်လို့ သူတို့သာ သူမရဲ့ကလေးတွေ ဖြစ်ခဲ့မယ်ဆိုရင် အခုအချိန်မှာ နောက်ပြန်လှည့်မျက်နှာအမျိုးသမီးက သူမရဲ့ကလေးတွေနဲ့အတူ ပျောက်ကွယ်သွားလိမ့်မည်။

အခုအချိန်မှာ တစ်ယောက်တည်း အကာအကွယ်မဲ့ အပေါ်ထပ်ကို တက်သွားမယ်ဆိုရင် လွီရှင်း ဒါမှမဟုတ် ရန်ငြိုးကြီးအဖွားအိုရဲ့ လက်ချက်နဲ့ သေဆုံးရမှာက သေချာပေသည်။

လက်ရှိမှာ အခြေအနေက မရှင်းလင်းသေးပေ။ ဒါပေမယ့် အားလုံးခြုံပြီး ကြည့်မယ်ဆိုရင်တော့ အခွင့်အရေးတွေက သူ့ဘက်မှာ ရှိနေသလို ပုံပေါ်နေသည်။

အနည်းဆုံးတော့ သူမြင်ရသလောက် ရန်ငြိုးကြီးအဖွားအိုက နောက်ပြန်လှည့်မျက်နှာအမျိုးသမီးနဲ့ ရင်ဆိုင်နိုင်ခြင်း မရှိခဲ့ပေ။

ဒီအတွေး တွေးမိပြီး မကြာခင်မှာပဲ မီးခိုးရောင် မြူခိုးတွေထဲကနေ အရိပ်တစ်ခုက ရုတ်တရက် ပြင်းပြင်းထန်ထန် တုန်ခါသွားပြီး လွင့်စင်ထွက်သွားကာ လေးထပ် စင်္ကြံလမ်းကို ပျံတက်လာပြီး စင်္ကြံလမ်းရဲ့ ကျောက်တိုင်ကို ပြင်းပြင်းထန်ထန် ရိုက်ခတ်သွားခဲ့သည်။

ယန်ကျွင်းဇဲက ကြောက်လန့်နေတဲ့ မျက်နှာနဲ့ အပေါ်ကို ပစ်တင်ခံလိုက်ရတဲ့ အရိပ်ကို စိုက်ကြည့်ပြီး “နောက်ပြန်လှည့်မျက်နှာအမျိုးသမီး!” လို့ အံ့အားသင့်စွာနဲ့ အော်လိုက်မိသည်။

ဗြုန်း!

လှေကားထစ်က မြူတွေက လျင်မြန်စွာ ပျံ့လွင့်သွားပြီး လှေကားမှာ တက်နေတဲ့ လွီရှင်း ပေါ်လာခဲ့သည်။ သူ့ရင်ဘတ်ပေါ်မှာတော့ ရန်ငြိုးကြီးအဖွားအိုရဲ့ ခေါင်းက နာကျင်စွာနဲ့ ဆက်တိုက် ငိုကြွေးနေရင်း ဘေးတစ်ဖက်စီကို လှုပ်ယမ်းနေသည်။

ခဏတာအတွင်းမှာ ယန်ကျွင်းဇဲက ရန်ငြိုးကြီးအဖွားအိုက လွီရှင်းရဲ့ ကိုယ်ခန္ဓာထဲမှာ ပိတ်မိနေပြီး လွတ်မြောက်လို့မရတဲ့ နာကျင်မှုကို ခံစားနေရတယ်လို့ ထင်မြင်ခဲ့သည်။

ဘယ်လောက်တောင် ထူးဆန်းတဲ့ မြင်ကွင်းလဲ။

ယန်ကျွင်းဇဲက မျှော်လင့်မထားတာက နောက်ပြန်လှည့်မျက်နှာအမျိုးသမီးက ရှုံးနိမ့်နေပုံ ပေါ်နေသည်။ အရင်တုန်းက သူတို့ရဲ့ တိုက်ပွဲမှာ နောက်ပြန်လှည့်မျက်နှာအမျိုးသမီးက ရန်ငြိုးကြီးအဖွားအိုကို အမြဲတမ်း လွှမ်းမိုးထားခဲ့တာ ဖြစ်သည်။

အခြေအနေက ပိုပြီးဆိုးရွားလာနေတာကို မြင်လိုက်တဲ့အခါ ယန်ကျွင်းဇဲက နောက်တစ်ကြိမ် နောက်ဆုတ်သွားပြီး သူ့ရဲ့အိမ်တံခါးရှေ့ကို ပြန်ရောက်သွားပေမယ့် သူက သူ့အိမ်ထဲကို မဝင်ဘဲ စင်္ကြံလမ်းရဲ့အဆုံးထိ ဆက်သွားနေခဲ့သည်။

နောက်ပြန်လှည့်မျက်နှာအမျိုးသမီးက တိတ်ဆိတ်စွာနဲ့ မတ်တပ်ရပ်လိုက်ပြီး သူမရဲ့ ကိုယ်ခန္ဓာက နောက်တစ်ကြိမ် ထူးဆန်းစွာနဲ့ ကွေးညွတ်သွားခဲ့ကာ ရေတံခွန်တစ်ခုလို သူမရဲ့ ဆံပင်ရှည်တွေက ချဉ်းကပ်လာနေတဲ့ လွီရှင်းဆီကို ဆန့်ထွက်သွားခဲ့သည်။

ဒီတစ်ကြိမ်မှာတော့ လွီရှင်းက ရှောင်တိမ်းခြင်း မပြုလုပ်ခဲ့ပေ။ ဆံပင်ရှည်တွေက သူ့ခန္ဓာကိုယ်ကို ဖောက်ထွင်းသွားစေခဲ့ပြီး ရန်ငြိုးကြီးအဖွားအိုရဲ့ ခေါင်းကိုပါ ဖောက်ထွင်းသွားစေခဲ့သည်။

ဒါပေမယ့် နောက်တစ်စက္ကန့်မှာတော့ သူမရဲ့ကိုယ်ခန္ဓာကို ဖောက်ထွင်းသွားခဲ့တဲ့ ဆံပင်တွေက ညှိုးနွမ်းပြီး အရည်ပျော်သွားခဲ့ကာ နောက်ပြန်လှည့်မျက်နှာအမျိုးသမီးကို သူ့ဆီကို တစ်လှမ်းချင်းစီ ဆွဲငင်ယူလာတဲ့ ပြင်းထန်တဲ့ ဆွဲငင်အားတစ်ခုကို ဖန်တီးခဲ့သည်။

နောက်ပြန်လှည့်မျက်နှာအမျိုးသမီးက အားနည်းနေသလိုမျိုး ပေါ်နေတဲ့အတွက် ယန်ကျွင်းဇဲရဲ့ မျက်လုံးအိမ်တွေ ကျုံ့ဝင်သွားခဲ့သည်။

ဘာတွေ ဖြစ်နေတာလဲ။

ရန်ငြိုးကြီးအဖွားအိုက ပြန်ပြီး ပြောင်းလဲတိုးတက်လာခဲ့ပြီး လွီရှင်းနဲ့ ပေါင်းစပ်သွားတာလား။ လွီရှင်းက အရင်တုန်းက သာမန်လူတစ်ယောက် မဟုတ်ဘူးလား။

ဒါပေမယ့် သူမက မနိုင်ဘူးဆိုရင် ဒီနေရာမှာ ဆက်နေတာက သေချာပေါက် သေဆုံးရမှာပဲ ဖြစ်သည်။

ယန်ကျွင်းဇဲက မြေအောက်ကားဂိုဒေါင်ထဲမှာ နောက်ပြန်လှည့်မျက်နှာအမျိုးသမီးနဲ့အတူ ရှိနေတဲ့အချိန်ကို ပြန်လှည့်နိုင်ပေမယ့် အခု ကြောက်မက်ဖွယ်ကောင်းတဲ့ လွီရှင်းကို ရှောင်ရှားတာက ယာယီအစီအစဉ်တစ်ခုသာ ဖြစ်သည်။ ရေရှည်အတွက်တော့ ဒီခြိမ်းခြောက်မှုက ခန့်မှန်းလို့မရအောင်ကို အလွန်ကြီးထွားလာခဲ့သည်။

ခဏတာ တွေးတောနေရင်းနဲ့ နောက်ပြန်လှည့်မျက်နှာအမျိုးသမီးက လွီရှင်းရဲ့ ရှေ့ကို လုံးဝ ဆွဲခေါ်သွားခံခဲ့ရသည်။

လွီရှင်းက သူမရဲ့ လက်မောင်းကို ဆွဲကိုင်လိုက်ပြီး ပြင်းပြင်းထန်ထန် ဆွဲလိုက်တဲ့အခါ သူမရဲ့ ဘယ်ဘက်လက်မောင်းက ပြုတ်ကျသွားခဲ့သည်။ ကန်လိုက်တဲ့အခါ နောက်ပြန်လှည့်မျက်နှာအမျိုးသမီးက လွင့်စင်မသွားဘဲ သူမရဲ့ ဗိုက်ကို ဖောက်ထွင်းသွားခဲ့ပြီး လွီရှင်းရဲ့ ခြေထောက်က တစ်ဖက်ကနေ တိုက်ရိုက် ထွက်လာခဲ့သည်။

“မကောင်းတော့ဘူး၊ သူမက ဒီတစ်ယောက်နဲ့ တကယ်ပဲ မယှဉ်နိုင်တော့ဘူး!”

ဒီမြင်ကွင်းကို မျက်မြင်ကိုယ်တွေ့ မြင်လိုက်ရတဲ့ ယန်ကျွင်းဇဲက ဖြစ်လာတော့မယ့် အဖြစ်အပျက်ကို ယုံကြည်သွားလုနီးပါး ဖြစ်ခဲ့သည်။

နောက်ပြန်လှည့်မျက်နှာအမျိုးသမီးက ပြိုင်ဘက်ကို မနိုင်ဘူးဆိုရင်တော့ အဲဒီရဲ့ အကျိုးဆက်က သူတို့အားလုံး လုံးဝ ပျက်စီးဆုံးရှုံးရမှာ ဖြစ်သည်။ ရန်ငြိုးကြီးအဖွားအိုကို ဖယ်ရှားလိုက်တာနဲ့ လွီရှင်းက ချက်ချင်းဆိုသလို သူ့အပေါ်ကို မျက်စိကျလာမှာက သေချာသည်။

ဒီအချိန်လောက်မှာ ထူးဆန်းတဲ့သတ္တဝါနှစ်ကောင်ရဲ့ ခြေထောက်ပတ်လည်မှာ ဝေ့ဝဲနေခဲ့တဲ့ မီးခိုးရောင် မြူတွေက သူတို့ကို ဝန်းရံထားခြင်း မရှိတော့ပေ။

ယန်ကျွင်းဇဲက စင်္ကြံလမ်းရဲ့ အဆုံးမှာ ထိုင်ချပြီး အချိန်ကို ပြန်လှည့်ဖို့ စဥ်းစားနေခဲ့သည်၊ ပြီးတော့ ဘယ်အချိန်ကို ပြန်သွားရမလဲ။

ဘယ်လိုပဲဖြစ်ဖြစ် သူက လက်ရှိ အကျပ်အတည်းကို ဖြတ်ကျော်နိုင်ဖို့အတွက် နောက်ပြန်လှည့်မျက်နှာအမျိုးသမီးလို ထူးဆန်းတဲ့သတ္တဝါရဲ့ အကူအညီကို လိုအပ်နေသည်။

ဟုတ်ပေသည်၊ ဒီအမျိုးသမီးက သူမရဲ့ကလေးကို ရှာတွေ့နိုင်မယ်ဆိုရင်တော့ အကောင်းဆုံးပဲ ဖြစ်လိမ့်မည်။ ကလေးကို မတွေ့ရသေးရင် သူမရဲ့ မကျေနပ်ချက်တွေကို ပေါက်ကွဲဖို့ ပစ်မှတ်ကလည်း သူ့ဆီကို တိုက်ရိုက် ဦးတည်လာလိမ့်မည်။

နောက်ပြန်လှည့်မျက်နှာအမျိုးသမီးက သူမရဲ့ကလေးကို အခုလေးတင် ရှာတွေ့နိုင်ခဲ့မယ်ဆိုရင်တော့ သူက မြေအောက်ကားဂိုဒေါင်ထဲက အဖွားအိုဆီကို ချဉ်းကပ်ပြီး ဒီလက်ရှိ အကျပ်အတည်းကို ဖြေရှင်းပေးဖို့ သူမကို တောင်းဆိုဖို့ အခွင့်အရေးကို ယူနိုင်ခဲ့လိမ့်မည်။

နောက်ပြန်လှည့်မျက်နှာအမျိုးသမီးက ဒီအဖွားအိုနဲ့ နီးနီးကပ်ကပ်နေရဲတာမျိုး မရှိဘူးဆိုတာကို ထည့်သွင်းစဉ်းစားမယ်ဆိုရင်တော့ လွီရှင်း ဖြစ်ဖြစ်၊ ရန်ငြိုးကြီးအဖွားအို ဖြစ်ဖြစ် ဒီသတ္တဝါကို ဖယ်ရှားပစ်ဖို့က သူမအတွက် လွယ်ကူလိမ့်မည်။

ဒါပေမယ့် ပြဿနာက နောက်ပြန်လှည့်မျက်နှာအမျိုးသမီးရဲ့ ကလေးက ဒီမှာ မရှိဘူး၊ တောက်၊ ဒီမှာ မရှိဘူးဆိုရင် ဘာကြောင့် သူမက ငါ့နောက်ကို လိုက်နေတာလဲ။

ရုတ်တရက် ယန်ကျွင်းဇဲက ရုတ်တရက် သဘောပေါက်သွားခဲ့ပြီး သူက ဖြစ်နိုင်ချေတစ်ခုကို ခန့်မှန်းမိခဲ့သလိုမျိုး ဖြစ်နေခဲ့လေသည်။