ထျန်းဟယ်မဟာအကြီးအကဲ၏ အစုလိုက်အပြုံလိုက် သတ်ဖြတ်ခြင်း

ထျန်းဟယ်မဟာအကြီးအကဲသည် ယခင်က ရှန်ကလန်တွင် အစုလိုက်အပြုံလိုက် သတ်ဖြတ်ခြင်းကို ကျူးလွန်ခဲ့ဖူးသည်။ ရှန်ကလန်မှ တန်ခိုးရှင်များစွာက သူ့လက်ထဲ၌ ကျဆုံးခဲ့ရသည်။ အကြီးအကဲချုပ် ရှန်ကျဲ့သည်ပင် ယခင်က ထျန်းဟယ်မဟာအကြီးအကဲကြောင့် ဒဏ်ရာရရှိခဲ့ပြီးနောက် ရှန်ကလန်ခေါင်းဆောင်က ထျန်းဟယ်မဟာအကြီးအကဲအား ဒဏ်ရာရစေကာ ဆုတ်ခွာရန် ဖိအားပေးခဲ့သည်။ ကောင်းကင်အာဏာစက်ကျောင်းတော်က သူတို့၏ လူများကို ဦးဆောင်ပြီး ရှန်ကလန်နှင့် ထိပ်တိုက်တွေ့ခဲ့သည့် တိုက်ပွဲကတည်းက ထျန်းဟယ်မဟာအကြီးအကဲ ပေါ်မလာတော့ခြင်း ဖြစ်လေသည်။

အချို့က ပြောကြသည်မှာ ထျန်းဟယ်မဟာအကြီးအကဲက မိစ္ဆာလမ်းစဥ်အတွင်း ကျရောက်သွားပြီး သူ့ကိုယ်သူ ဖျက်ဆီးပစ်လိုက်သည်ဟူ၍ ဖြစ်ကာ အချို့က ပြောသည်မှာ သူက ရူးသွပ်ကာ ပျောက်ဆုံးသွားသည်ဟူ၍ ဖြစ်လေသည်။

သို့သော်လည်း ယခုတွင် သူက လမ်းစဥ်ပင်လယ်အတွင်း တိတ်ဆိတ်စွာ ထွက်ပေါ်လာပေသည်။ သူက ပင်လယ်၏ အလယ်မှ လှေတစ်စင်းပေါ်တွင် တည်ငြိမ်စွာ ရှိ​နေခဲ့သည်။ သူတို့ ရောက်နေသည့်နေရာမှာ လမ်းစဥ်ပင်လယ်အတွင်းသာ မဟုတ်ပါက လူစိမ်းများသည် ထျန်းဟယ်မဟာအကြီးအကဲအား သာမန်လူတစ်ဦးကဲ့သို့ ဆက်ဆံမိပေလိမ့်မည်။

ထျန်းဟယ်မဟာအကြီးအကဲသည် အတိတ်တုန်းကနှင့်စာလျှင် အများကြီး ကွာခြားသွားပေသည်။ ရှန်ကလန်မှ တန်ခိုးရှင်များသည် သူ့ကို မြင်သောအခါ သူတို့ ပထမ​ဆုံးဝင်လာသည့်အသိ ထျန်းဟယ်မဟာအကြီးအကဲရှေ့မှ ထွက်ပြေးရန် ဖြစ်သည်။ ထိုအချိန်၌ ထိပ်သီးပုဂ္ဂိုလ်ကြီးများက ဤနေရာသို့ ရောက်မလာသေးပေ။ ထျန်းဟယ်မဟာအကြီးအကဲကဲ့သို့သော တန်ခိုးရှင်မျိုးနှင့် ရင်ဆိုင်ရသည့်အခါ သူတို့၌ လူမည်မျှ များသည်​ဖြစ်စေ အသုံးမဝင်ချေ။ သူတို့က မဟာအကြီးအကဲ လက်အောက်၌ လွယ်ကူစွာ ရှုံးနိမ့်သွားပေလိမ့်မည်။ သူတို့က မဟာအကြီးအကဲနှင့် ထိပ်တိုက်ရင်ဆိုင်မည်ဆိုပါက ကြီးမားသော ဆုံးရှုံးမှုနှင့် ရင်ဆိုင်ရပေလိမ့်မည်။

"အဲဒါ ထျန်းဟယ်မဟာအကြီးအကဲပဲ။" ရွှေရောင်နတ်ပြည်ထောင်မှ တန်ခိုးရှင်များနှင့် အခြားသောအင်အားစုတို့သည်လည်း အလျင်အမြန် တုံ့ပြန်လာသည်။ သူတို့သည် ကသုတ်ကရက် ပြန်ဆုတ်ခွာပြီး ဤနေရာမှ လွတ်မြောက်ရန် ကြိုးစားလိုက်ကြသည်။

ကြောက်မက်ဖွယ် သွေးနီရောင်အလင်းတန်းက ထျန်းဟယ်မဟာအကြီးအကဲ၏ မျက်လုံးထဲမှ ထွက်ပေါ်လာသည်။ သူက ထိုနေရာ၌ ရပ်နေရုံသာ ဖြစ်သော်လည်း ကျယ်ပြောသည့် လေဟာနယ်အတွင်း ထိတ်လန့်တုန်လှုပ်ဖွယ် အရှိန်အဝါတို့ဖြင့် ဖုံးလွှမ်းလာသည်။ အဆုံးမဲ့ သွေးနီရောင် မိစ္ဆာအလင်းက ကောင်းကင်နှင့် မြေကြီးတခွင်တွင် ပြည့်နှက်နေပြီး သွေးနီရောင် မိုးကြိုးလျှပ်စီးများ လင်းလက်နေသည်။

ဘုန်း ထျန်းဟယ်မဟာအကြီးအကဲသည် ရှေ့သို့ ခြေတစ်လှမ်းလှမ်းလိုက်ကာ တန်ခိုးရှင်အုပ်စုထံ တိုက်ရိုက် လျှောက်သွားခဲ့သည်။ လူအုပ်ကြီး၏ စွမ်းအားများက ပေါက်ကွဲထွက်လာပြီး သူတို့က လျင်မြန်သွက်လက်စွာ ပြန်ဆုတ်ခွာရန် ပြင်ဆင်လိုက်ကြ၏။ သို့သော် သွေးနီရောင် မိုးကြိုးလျှပ်စီးများက သွေးချင်းချင်းနီနေသည့် ဓားများကဲ့သို့ သူတို့ထံ တိုးဝင်လာခဲ့သည်။ အားနည်းသော တန်ခိုးရှင်အများအပြား၏ ခန္ဓာကိုယ်များက လေထုအလယ်တွင် ပိတ်ဆို့ခံရကာ သွေးနီရောင် မိုးကြိုးလျှပ်စီးများ ထိုးဖောက်ခြင်းကို ခံလိုက်ရသည်။

ထိုလူများထဲမှ အများစုသည် ရှန်ကလန်မှ တန်ခိုးရှင်များဖြစ်ကြပြီး သူတို့က ကြေကွဲဖွယ်အကောင်း​ဆုံးသော ကံကြမ္မာနှင့် ရင်ဆိုင်ခဲ့ရသည်။

ထျန်းဟယ်မဟာအကြီးအကဲသည် ယခင်က ရှန်ကလန်သားများကို သတ်​ဖြတ်ခဲ့သေးလျှင်ပင် သူသည် အတိတ်ကာလက ရန်ကြွေးများကို ယခုထိတိုင်းမမေ့ပျောက်သေးချေ။ သူသည် သူ့သမီး၏ သေခြင်းတရားနှင့် သူ့တပည့် သုံးထောင်၊ ထျန်းဟယ်ဘုံကျောင်းမှ အခြားသူများ၏ သေခြင်းတို့အား မည်သည့်အခါမှ မေ့လပျောက်လိမ့်မည် မဟုတ်ပေ။

ထိုရန်ကြွေးရန်စကို ရှန်ကလန်သားများ၏ လတ်ဆတ်သော သွေးနှင့်သာ လျော့နည်းသွားစေနိုင်သည်။

ရှန်ကလန် တိုက်ပွဲပြီးသွားသည့်နောက် သူသည် ထိုမိစ္ဆာပစ္စည်းကို တဖြေးဖြေး ထိန်းချုပ်လာနိုင်ပြီးမှ ပြန်ထွက်လာခြင်း ဖြစ်သည်။ သို့သော် သူသည် သူ၏ဇနီး ရှန်လော့ရွှီအား သွားမတွေ့သေးပေ။ ထိုသည်မှာ သူက ဇနီး​ဖြစ်သူအား မလွမ်း၍ မဟုတ်ဘဲ သူ့တွင် နောင်တတရားများနှင့် ပြည့်နေသောကြောင့် ​သူ့ဇနီးအား ရင်မဆိုင်ရဲခြင်း ​ဖြစ်လေသည်။ သူသည် ရှန်လော့ရွှီအပေါ် အပြစ်ရှိသလို ခံစားနေရပြီး သူသည် အတိတ်ရော ယခုအချိန်၌ပါ တွေ့ဆုံရန် ရှက်ရွံ့နေမိသည်။

အတိတ်တွင် သူသည် ရှန်လော့ရွှီနှင့် သူတို့သမီး နုန်ယွဲ့ကို ကာကွယ်မပေးနိုင်ခဲ့ပေ။ သူတို့၏ သမီးက အသတ်ခံလိုက်ရပြီး ရှန်လော့ရွှီသည် ရှန်ကလန်၌ နှစ်ပေါင်းများစွာ အကျဥ်းချခံထားရသည်။ သို့သော်လည်း သူက မည်သည်ကိုမှ လုပ်ဆောင်နိုင်စွမ်းမရှိဘဲ တစ်ကိုယ်တည်း တိတ်ဆိတ်စွာသာ ကျင့်ကြံနေခဲ့ရ၏။ သူ၏ မာနကို ခဝါချကာ ဒုက္ခသုက္ခများကို တောင့်ခံခဲ့ရသည်။ သူက ရည်မှန်းချက်ကို အနည်းငယ်မျှပင် ထုတ်ဖော်ပြသခြင်း မရှိခဲ့ပေ။ သူက လူပေါင်းများစွာအပေါ် တာဝန်မကျေခဲ့ပေ။

ယနေ့တွင် သူသည် ရှန်ကလန်မှ ကလန်သားများကို အစုလိုက်အပြုံလိုက် သတ်​ဖြတ်ရန် ရည်ရွယ်ထားသည်။ သူ အသက်ရှင်နေသရွေ့ သူ၏ အကြီးမားဆုံး ရည်မှန်းချက်မှာ ရှန်ကလန်တွင် တစ်ယောက်မှ မကျန်တော့အောင် ရှင်းလင်းပစ်ရန် ဖြစ်လေသည်။ သူသည် အမုန်းတရားများအား မစွန့်လွှတ်နိုင်ပေ။ သို့သော်လည်း သူ၏ဇနီး ရှန်လော့ရွှီက ရှန်ကလန်မှ ဆင်းသက်လာသည်ကို သူ ကောင်းစွာ သတိပြုမိသည်။ သူမက ကလန်နှင့် ဆက်ဆံရေး ဖြတ်တောက်လိုက်ပြီး ကလန်အပေါ် မည်သည့်တွယ်တာမှုမှ မရှိတော့လျှင်ပင် ခန္ဓာကိုယ်ထဲ၌ ရှန်ကလန်သွေးများ စီးဆင်းနေခြင်းက ပြောင်းလဲသွားမည် မဟုတ်ပေ။ ရှန်ကလန်သားများ၏ သွေးက ရှန်လော့ရွှီ၏ သွေးကြောများထဲ စီးဆင်းနေပြီး ဇစ်မြစ်က တူညီနေ၏။

ထိုသို့သော အခြေအနေမျိုးတွင် သူက ရှန်လော့ရွှီအား ရှန်ကလန်သားများကို သတ်ဖြတ်လိုသည်ဟု တောင်းဆိုပါက သူမ အမှန်တကယ် ခွင့်ပြုနိုင်ပါမည်လား။

သူက သူ့ဇနီး၏ ကလန်သားများ​ဖြစ်သော ရှန်ကလန်ကို သုတ်သင်ရန် ဆုံးဖြတ်ခဲ့သည်။ ထို့ကြောင့် သူသည် အတိတ်အနာဂတ်အားလုံး၌ သူ့ဇနီးအား မျက်နှာပြရန် မဖြစ်နိုင်ပါချေ။

လက်ရှိ ကစဥ့်ကလျားခေတ်တွင် ကောင်းကင်အာဏာစက်ကျောင်းတော်နှင့် ရီဖူရှင်းတို့ အန္တရာယ်ကြုံနေရသည့်အခါ သူသည် ထွက်ပေါ်လာပြီး ရီဖူရှင်းကို လာရှာခဲ့သည်။ အများစုက ထိုအ​ကြောင်းကို မသိရှိကြသလို ရှန်လော့ရွှီသည်လည်း သူ၏ ထွက်ပေါ်လာမှုကို မသိရှိထားပေ။ ရီဖူရှင်းသည် သူနှင့် ဆက်သွယ်နိုင်ရန်နှင့် သူ့အား စောင့်ရှောက်ရန်အတွက် နတ်ဆိုးကြွက်တစ်ကောင် ချန်ထားပေးခဲ့သောကြောင့် သူက အခြေအနေတို့အား သိရှိခဲ့ပြီး ရောက်လာခြင်း ဖြစ်သည်။

ခရမ်းရွှေကြွက်ကလန်မှ ကြွက်နတ်ဆိုးသည် သူ၏ ထိန်းချုပ်မှုအောက်၌ ရှိနေသည်။ ၎င်းက အခုချိန်တွင် တုန်ရီနေ၏။

ဘုန်း...

အဆုံးမဲ့ သွေးနီရောင်မိုးကြိုးလျှပ်စီးများက ကောင်းကင်ယံမှ ကျဆင်းလာကာ ကြောက်မက်ဖွယ် သွေးနီရောင်မီးပြင်းဖိုတစ်ခုသဖွယ် ဖြစ်တည်လာ၏။ ​ကြောက်ရွံထိတ်လန့်နေသော အော်သံများ ထွက်ပေါ်လာပြီး သွေးနီရောင် မိုးကြိုးလျှပ်စီးများဖြင့် ထိုးဖောက်ခံလိုက်ရသော တန်ခိုးရှင်များသည် အရည်ပျော်သွားကြကာ မြင်ကွင်းက အလွန် ထိတ်လန့်ဖွယ် ကောင်းနေသည်။

"ထျန်းဟယ်မဟာအကြီးအကဲ" ရှန်ကလန်မှ တန်ခိုးရှင်တစ်ဦးက အော်လိုက်သည်။ သူ့ခန္ဓာကိုယ်မှ ကြောက်မက်ဖွယ် ရွှေရောင်နတ်ရောင်ဝါတို့ ထွက်ပေါ်လာ၏။ အလွန် တောက်ပသည့် ရွှေရောင် အလင်းတန်းတို့က လေဟာနယ်ကို တိုက်ရိုက်ဖြတ်သန်းသွားသည်။ ထိုသည်မှာ ထျန်းရှင်းခုတ်ချက်ပင် ​ဖြစ်၏။

သို့သော် ကြောက်မက်ဖွယ် သွေးနီရောင် အလင်းတန်းများက လေဟာနယ်ကို ဖြတ်သန်းလာသော ရွှေရောင်အလင်းတို့ကို တိုက်ရိုက်တိုက်ခိုက်လိုက်ပြီး အပိုင်းအစများအဖြစ် ပေါက်ကွဲသွားစေသည်။

ထျန်းဟယ်မဟာအကြီးအကဲသည် ရှေ့သို့ ခြေလှမ်းလာပြီး သူ့လက်ကို လေဟာနယ်အား ဖြတ်သန်း ဆန့်ထုတ်လိုက်သည်။ သူသည် ရှန်ကလန်မှ စီနီယာအတော်များများကို မှတ်မိ၏။ သူသည် ယခင်က ရှန်ကလန်၏ သားမက်ဖြစ်ခဲ့ဖူးပြီး ရှန်ကလန်၌ အချိန်တချို့ နေထိုင်ကာ ကျင့်ကြံခဲ့ဖူးသည်။ သူက ရှန်ကလန် စီနီယာတချို့နှင့် ရင်းနှီးပေသည်။

မည်သို့ပင်​ဖြစ်စေ ယခု သူတို့က ရန်သူများ ဖြစ်နေကြပြီး ထျန်းဟယ်မဟာအကြီးအကဲသည် သူတို့အားလုံး မသေမချင်း ရပ်တန့်မည် မဟုတ်ပေ။

ထျန်းဟယ်မဟာအကြီးအကဲသည် သူ၏ လက်ကို ရှန်ကလန်မှ တန်ခိုးရှင်ထံ ဆန့်ထုတ်လိုက်ပြီးနောက် ရုတ်တရက် လက်သီးဆုပ်လိုက်သည်။ စူးရှကျယ်လောင်သော အော်သံထွက်ပေါ်လာပြီး ထိုတန်ခိုးရှင်၏ မျက်နှာက အလွန်နာကျင်ဟန်​ဖြင့် ရှုံ့မဲ့သွားလေသည်။ သွေးနီရောင် မိစ္ဆာအလင်းတို့က ထိုသူ၏ ပုံရိပ်ကို ထိုးဖောက်သွားပြီးနောက် ထိုသူက အစိတ်စိတ်အမြွှာမြွှာ ပေါက်ကွဲထွက်သွားပြီး ဝိညာဥ်သည်ပင် လွင့်ပါးပျောက်ကွယ်သွားတော့သည်။

အခြားသော အင်အားစုများမှ အဖွဲ့သားများသည် ချက်ချင်းပင် အရပ်မျက်နှာအနှံ့သို့ ကစဥ့်ကလျား ထွက်ပြေးသွားတော့၏။ သူတို့ထက် မြင့်မားသော အဆင့်ရှိ တန်ခိုးရှင်တစ်ဦးနှင့် ရင်ဆိုင်ရသည့်အခါ သူတို့က တိုက်ပွဲတွင် ပါဝင်တိုက်ခိုက်ပေးမည်ဆိုလျှင်ပင် အရင်ဆုံး သေဆုံးရမည့်သူက သူတို့သာ ဖြစ်သွားပေလိမ့်မည်။ ထိုသို့သော အခြေအနေနှင့် ရင်ဆိုင်ရသည့်အခါ လူတိုင်းသည် ကိုယ့်အသက်ကိုယ် ကယ်တင်နိုင်ရန်သာ အရင်ဆုံး ကြိုးစားကြပေတော့သည်။

ထျန်းဟယ်မဟာအကြီးအကဲ၏ ပုံသဏ္ဌာန်က ကြောက်မက်ဖွယ် သွေးနီရောင် မိုးကြိုးလျှပ်စီးကဲ့သို့ ဖြစ်လာသည်။ လမ်းစဥ်ပင်လယ်အထက်တွင် လတ်ဆတ်သည့် သွေးများက မိုးများသဖွယ် အဆက်မပြတ် ကျဆင်းလာနေ၏။ လမ်းစဥ်ပင်လယ်အထက် ကောင်းကင်မှ လူအများကြီးက သုတ်သင်ခံလိုက်ရကာ သူတို့သည် ဤနေရာ၌ ထာဝရမြှုပ်နှံခံရတော့မည် ဖြစ်သည်။

ရီဖူရှင်းနှင့် အခြားသူများသည်လည်း ထိုမြင်ကွင်းကို မြင်သည့်အခါ အနည်းငယ် အံ့အားသင့်နေကြသည်။ ရီဖူရှင်းမှလွဲလျှင် အခြားကျန်ရစ်သူ အနည်းငယ်သာ ရှိသောကြောင့် ထျန်းဟယ်မဟာအကြီးအကဲ ဤနေရာ၌ ရှိ​နေသည်ကို သိသည့်သူ များများစားစား မရှိတော့ပေ။ ရီဖူရှင်းက ထိုသည်ကို ရည်ရွယ်ချက်ရှိရှိ စီစဥ်ခဲ့ခြင်း ဖြစ်သည်။ ဤနည်းလမ်းဖြင့် သူတို့က ထိပ်သီးပုဂ္ဂိုလ်များ၏ အမဲလိုက်ခြင်း ခံရလျှင်ပင် ထိုသူတို့ကို ထိန်းထားနိုင်မည့် တန်ခိုးရှင် တစ်ဦးနှစ်ဦး ရှိနေပေလိမ့်ဦးမည်။

သို့ပေမဲ့ သူတို့၏ ကွာဟချက်က အလွန်ကြီးမားနေလျှင် ထျန်းဟယ်မဟာအကြီးအကဲက အစွမ်းထက်ပုဂ္ဂိုလ်အနည်းငယ်အား သတ်ဖြတ်လိုက်လျှင်ပင် အခြေအ​နေက မပြောင်းလဲနိုင်ပေ။ သူတို့သည် သူတို့၏ ကံကြမ္မာကို လက်ခံရုံသာ တတ်နိုင်ပေသည်။

သို့သော်လည်း ထျန်းဟယ်မဟာအကြီးအကဲ၏ နည်းလမ်းများက အလွန် ပြောင်မြောက်လှကာ ရ​က်စက်သည်ဟုပင် ဆိုနိုင်သည်။ သူသည် ထျန်းဟယ်ဘုံတွင် ပညာသင်ကြားပေးခဲ့သော ကျော်ကြားသည့်ပုဂ္ဂိုလ်တစ်ဦးနှင့် မတူတော့ပေ။ ထို့အစား သူသည် နတ်ဆိုးတစ်ကောင်နှင့် တူနေပေသည်။

သို့သော် လူအုပ်ကြီးသည် ထျန်းဟယ်မဟာအကြီးအကဲ ဖြတ်သန်းခံစားခဲ့ရသမျှကို တွေးကြည့်သောအခါတွင် သူတို့သည် သူ့ကို ကိုယ်ချင်းစာနာနိုင်ကြသည်။ သူသည် နှစ်ပေါင်းများစွာ သည်းခံ၍ ကျင့်ကြံခဲ့သည်။ ထျန်းဟယ်မဟာအကြီးအကဲသည် ထိုမျှ ဒုက္ခသုက္ခများကို ခံစားခဲ့ရသော်လည်း အခုထိ ရူးမသွားသေးသည်ကို ကြည့်ခြင်းဖြင့် သူ၏ သည်းခံနိုင်စွမ်းက အလွန်မြင့်မားသည်ကို သိနိုင်သည်။ မဟုတ်လျှင် သူသည် ယနေ့ထိတိုင် ရှိနေလိမ့်မည် မဟုတ်ပေ။

ယခု သူသည် မိစ္ဆာလမ်းစဥ်အတွင်းသို့ ကျရောက်သွားရခြင်းမှာလည်း ထိုအချိန်က ရှန်ကလန်ကြောင့် ဖြစ်သည်။

ရှန်ကလန်သည် အလွန် ရက်စက်စွာ ပြုမူခဲ့ကြသည်။ သူတို့သည် ဘုံကိုဖျက်ဆီးရန် စစ်ပွဲစတင်ခဲ့ပြီး ထျန်းဟယ်ဘုံ၏ မရေတွက်နိုင်သော တန်ခိုးရှင်များအား သတ်ဖြတ်ခဲ့သည်။

သူတို့သာ ထျန်းဟယ်မဟာအကြီးအကဲ၏ နေရာ၌ ရှိခဲ့လျှင် မည်သူမှ ပိုကောင်းအောင် လုပ်ဆောင်နိုင်မည် မဟုတ်ပေ။

ရှန်ကလန် ယခု ရင်ဆိုင်နေကြရသမျှ အရာအားလုံးသည် သူတို့လုပ်ဆောင်ခဲ့သော အကြောင်းတရား၏ အကျိုးဆက်ပင် ဖြစ်သည်။

အကယ်၍ သူတို့သာ ထိုမျှ မရက်စက်ခဲ့ပါလျှင် သူတို့က ထျန်းဟယ်မဟာအကြီးအကဲအား ယနေ့ အခြေအနေထိ ရောက်လာစေရန် တွန်းအားပေးခဲ့မိမည် မဟုတ်ပေ။

ရီဖူရှင်းသည်လည်း တိုက်ပွဲကို စောင့်ကြည့်နေသည်။ ဆရာဘိုးဘိုးသည် အမှန်တကယ်ပင် မိစ္ဆာလမ်းစဥ်သို့ ဝင်ရောက်သွားသည်။ သူသည် နတ်မိစ္ဆာရတနာအားသင်ယူလေ့လာခဲ့သည်။ သူသည် နတ်ဆိုးစွမ်းအားများ ပြည့်ဝနေသည့် ရတနာအား ထိန်းချုပ်နိုင်ရန်မှာ သူ့အတွက် မလွယ်ကူခဲ့ပေ။

ရီဖူရှင်းသည် လွန်ခဲ့သည့် နှစ်အနည်းငယ်အတွင်း သူ၏ ဆရာဘိုးဘိုး မည်သည့်နေရာ၌ ရှိနေသည်ကို မသိရှိခဲ့ပေ။ သူသည် ယခင်က ကောင်းကင်အာဏာစက်ဘုံသို့ သွားရောက်လည်ပတ်ခြင်း မပြုခဲ့ပေ။ ရီဖူရှင်းသည် သူ၏ ဆရာဘိုးဘိုးက စိတ်ရောကိုယ်ပါ နာကျင်ခံစားနေရသည်ဟု မှန်းဆထားခဲ့သည်။

သူ၏ ဆရာဘိုးဘိုးသည် သူ၏ ဇနီးက ကောင်းကင်အာဏာစက်ကျောင်းတော်တွင် သင်ကြားပေးရန် ပူးပေါင်းခဲ့ပြီးနောက်၌ပင် သူက လာရောက်လည်ပတ်ခြင်း မရှိခဲ့ပေ။

ဆရာဘိုးဘိုးက သူတို့အား ယခုတိုင် ရှောင်​နေဆဲဖြစ်သော်လည်း ရီဖူရှင်း အခက်အခဲနှင့် ရင်ဆိုင်ရသောအခါ ရောက်ရှိလာခဲ့ပေသည်။

ဆရာဘိုးဘိုးသည် ရှန်ကလန်နှင့် အခြားရန်သူများကို ရင်ဆိုင်သည့်အခါ နတ်ဆိုးတစ်ကောင်ကဲ့သို့ ဖြစ်သော်လည်း ဆရာဘိုးဘိုး သူ့အား ဆက်ဆံသည့်အပေါ်တွင် မည်သည့် အပြစ်မှ ရှာမတွေ့နိုင်ပေ။ ရီဖူရှင်းသည် သူ ယခင်က မည်သည့်အခါမှ သူ၏ ဆရာဘိုးဘိုးကို နားလည်ခဲ့ဖူးခြင်းမရှိဟု ခံစားမိလိုက်သည်။ သူသည် ဆရာဘိုးဘိုးအား လုံးလောက်စွာ သိရှိခြင်း မရှိခဲ့ပေ။

ရီဖူရှင်း ထျန်းဟယ်ဘုံတွင် သင်ယူလေ့လာခဲ့စဥ်က သူ၏ ဆရာဘိုးဘိုးသည် ထိုအချိန်ကာလများ၌ အမုန်းတရားတို့နှင့် ရှင်သန်နေထိုင်နေခဲ့ပုံရလေသည်။

ထိုအခိုက်အတန့်၌ ကြောက်မက်ဖွယ် အရှိန်အဝါတစ်ခုက တဖြေးဖြေး နီးကပ်လာခဲ့သည်။ ရီဖူရှင်းက မျက်မှောင်ကြုတ်လိုက်ပြီး သူနှင့် သူ့အဖွဲ့သည် ထိုအရှိန်အဝါ လာနေသည့်ဘက်သို့ မော့ကြည့်လိုက်ကြသည်။ အဖြူရောင်ဝတ်စုံ ဝတ်ဆင်ထားသည့် ပုံရိပ်တစ်ခုက တဟုန်ထိုးလာနေခြင်း ဖြစ်သည်။ ထိုသူမှာ ကောင်းကင်အာဏာစက်ကျောင်းတော်သို့ အဖွဲ့ကို ဦးဆောင် ချီတက်လာသည့် ထိုက်ချူတော်ဝင်မြေမှ တန်ခိုးရှင် ဖြစ်လေသည်။

ဤတန်ခိုးရှင်သည်လည်း ထိပ်သီးပုဂ္ဂိုလ်တစ်ဦး ဖြစ်သည်။ အောက်ဘုံမှ လာခဲ့သည့် ခရမ်းစစ်ဘုရင်အင်ပါယာကဲ့သို့ အစွမ်းမထက်သော်လည်း သူသည် ထိုက်ချူတော်ဝင်မြေမှ ထိပ်သီးပုဂ္ဂိုလ်တစ်ဦး ဖြစ်သည်။

ဤတန်ခိုးရှင်က သူ၏ အခွင့်အရေးကို စောင့်ဆိုင်းနေခဲ့သည်။ သူသည် အခြားတစ်ဖက်ရှိ စစ်မြေပြင်မှ ထွက်ပြေးခဲ့ပြီးနောက် ဤနေရာသို့ အပြေးရောက်လာခဲ့၏။

တွေဝေနေခြင်း မရှိဘဲ သူသည် တိုက်ပွဲအလယ်တွင် ရှိနေသည့် ထျန်းဟယ်မဟာအကြီးအကဲထံသို့ ခုန်ဝင်လိုက်သည်။ ထျန်းဟယ်မဟာအကြီးအကဲသည် သူ့ထံသို့ လျှောက်လာနေသောသူကို တစ်ချက်မျှ လှမ်းကြည့်လိုက်၏။ ကောင်းကင်တွင် ကမ္ဘာပျက်ကပ်ဆိုက်ရောက်လာသကဲ့သို့ သွေးနီရောင်နတ်ဆိုးအလင်းများ စွန်းထင်း​နေသည်။

"သွားစို့" ရီဖူရှင်းက ပြောလိုက်ပြီး နောက်ပြန်ဆုတ်၍ လှည့်ထွက်လိုက်သည်။  ယနေ့ စစ်ပွဲသည်  ထိုက်ချူ တော်ဝင်မြေမှရန်စ ကျူးကျော်ခြင်းကြောင့် ဖြစ်ပွားခဲ့ရခြင်းဖြစ်သည်။ သူတို့ကို ရပ်တန့်ရန်မှာ အလွန်ပင် နောက်ကျသွားခဲ့ပြီ ဖြစ်၏။ သူတို့၏ ထိပ်သီးပုဂ္ဂိုလ်များက အင်အားနည်းနေပြီး ဤအခြေအနေသို့ပင် ရောက်နေပြီဖြစ်ရာ သူတို့က အထိအခိုက်မရှိ ထွက်ခွာသွားနိုင်ရန် အကောင်းဆုံး ကြိုးစားရမည် ​ဖြစ်သည်။

နတ်နန်းတော်သည် လမ်းစဥ်ပင်လယ်အတွင်းသို့ နစ်မြုပ်သွားသော်လည်း နတ်နန်းတော်မှ တန်ခိုးရှင်များ အသက်ရှင်နေသေးသရွေ့ နတ်နန်းတော်က ဆက်လက်တည်ရှိနေမည် ဖြစ်သည်။

လက်ရှိတွင် ရီဖူရှင်းသည် တစ်ဖက်စစ်မြေပြင်အတွက် အရေးအပါဆုံးဖြစ်သည်။ အင်ပါယာနန်က သူ၏ ပြိုင်ဘက်ကို ရင်ဆိုင်နိုင်ခြင်း ရှိမရှိ သူမသိပေ။

ထျန်းဟယ်မဟာအကြီးအကဲနှင့် ထိုက်ချူတော်ဝင်မြေမှ ဝတ်ရုံဖြူတန်ခိုးရှင်တို့ အချင်းချင်း တိုက်ခိုက်လိုက်ကြသည်။ ထိတ်လန့်အံ့အားသင့်ဖွယ် ဖျက်ဆီးခြင်းအလင်းတို့က ပတ်ဝန်းကျင်ကို လွှမ်းခြုံသွားသည်။ ကြောက်မက်ဖွယ် တိုက်ပွဲအလွန်မှ ရီဖူရှင်းနှင့် အခြားသူတို့သည် ကတိုက်ကရိုက် ထွက်ပြေးလိုက်ကြ၏။

"ရီဖူရှင်းကို မလွတ်စေနဲ့။" ရက်စက်ယုတ်မာသည့် အသံတစ်ခု ထွက်ပေါ်လာသည်။

ချက်ချင်းပင် နေရာအနှံ့တွင် ပြန့်ကျဲနေသော တန်ခိုးရှင်များက တစ်ယောက်ပြီးတစ်ယောက် ရီဖူရှင်းရှိရာသို့ ပြေးလာကြသည်။ သူတို့သည် ရီဖူရှင်းနှင့် သူ့အဖွဲ့အား အမဲလိုက်ရန် ပြန်လည်စုစည်းလာကြ၏။

"လူခွဲလိုက်" ရီဖူရှင်းက အမိန့်ပေးလိုက်သည်။

"အဲဒီလိုမလုပ်ပါနဲ့။ သူတို့ရဲ့ ပစ်မှတ်က မင်းကိုပဲလေ။" တန်ခိုးရှင်တစ်ဦးက ငြင်းဆန်လိုက်သည်။ သူတို့၏ အဖွဲ့က မတူညီသော အရပ်မျက်နှာများသို့ ထွက်ပြေးသွားပါက ရန်သူများအားလုံးက ရီဖူရှင်းနောက်သို့သာ လိုက်ကြမည်မှာ မလွဲဧကန်​ဖြစ်သည်။

ထိုအင်အားစုများသည် အခြားသူများကို သတ်ဖြတ်ခြင်းထက် ရီဖူရှင်းအား သတ်ဖြတ်ရန်ကသာ သူတို့အတွက် အရေးကြီးဆုံး ရည်ရွယ်ချက် ဖြစ်လေသည်။

"နန်းတော်သခင်နဲ့ အင်ပါယာထန်က နတ်နန်းတော်ကို ကာကွယ်နေတယ်။ အဲဒီမှာ အင်ပါယာနန်လည်း ရှိတယ်။" ကောင်းကင်နတ်တံခါးမှ ကျန့်ချန်ကျီက ပြောလိုက်သည်။ "သူတို့က လူအရေအတွက်အရ အရေးမသာရင်တောင် ရှုံးမှာတော့ မဟုတ်ဘူး။ ငါတို့ ဒီတိုက်ပွဲကနေ ပထမတစ်သုတ်ကို သွားခိုင်းလိုက်ပြီ။ တခြားထိပ်သီးပုဂ္ဂိုလ်တွေ လိုက်မလာသရွေ့ ငါတို့ တိုက်ခိုက်နိုင်စွမ်းရှိတယ်။" ကျန်သူများက သဘောတူကာ ခေါင်းညိတ်လိုက်သည်။

"ကောင်းပြီလေ။" ရီဖူရှင်းက စိတ်ထဲ၌ နွေးထွေးမှုကို ခံစားလိုက်ရသည်။ သူသည် အခြားသူများ၏ ကောင်းမွန်သော အကြံဉာဏ်ကို ငြင်းပယ်မည် မဟုတ်ပေ။ သူက အရေးကြီးဆုံးတိုက်ပွဲ၌ နတ်နန်းတော်မှ မရှုံးနိမ့်ရန်သာ မျှော်လင့်မိသည်။

***