ဝိညာဉ်မရှိသော မရဏနက်နောက်လိုက်

ရှီအွန်နန်းတော်ရှိ မြေပြင်များက ကွဲအက်သွားပြီး သွေးရောင် အလင်းတန်းများစွာ ထွက်လာကာ ကြယ်နိမိတ်ပုံရိပ်များကို ခုခံနေသည်။ အင်အား နှစ်ခုက တင်းမာနေ၏။

ဗာရိုနီကာ။ မဟုတ်ဘူး။ အခုတော့ ခီလီယာနာ ဖြစ်လောက်သည်။ သူ၏ မျက်ဝန်းများက မူလ အပြာရောင်မှ သွေးနီရောင်သို့ ပြောင်းလဲသွားခဲ့ပြီး ချွန်ထက်သော လက်သည်းက ပြင်းထန်သော မီးတောက်များဖြင့် ဝှေ့ရမ်းကာ ကြယ်များရှိ ရေလှိုင်း အဝိုင်းများကို ဖြတ်တောက်ပစ် လိုက်သည်။ သို့သော် မီးတောက်များက လှိုင်းများကို ဖြတ်တောက်ပြီးနောက် ၎င်း၏ စွမ်းအား ကုန်ဆုံးသွားသည်။ ၎င်းကို [အရှိန်အဝါဓားသွား]၏ ချွန်ထက်သော စွမ်းအားဖြင့် ဘာမှ မရှိတော့အောင် ဖယ်ရှားပစ်ခြင်းပင်။

[အရှိန်အဝါဓားသွား] သည် အရှိန် မလျော့ဘဲ ခီလီယာနာ၏ ဦးခေါင်းကို ခုတ်ပိုင်းလိုက်သည်။ ခီလီယာနာက လက်သည်းဖြင့် ခုခံကာကွယ်သည်။ မီးပွားများ ပျံ့လွင့်သွားရင်း သတ္တုချင်း ထိခိုက်သံ ထွက်ပေါ်လာသည်။ လက်သည်းပေါ်တွင် အရာတိမ်တိမ် တစ်ခု ကျန်ရစ်နေခဲ့သည်။

ခီလီယာနာ၏ လက်မောင်းက မီးတောက်ဖြင့် ပွက်ပွက်ဆူနေ၏။ ချန်လွေ့၏ ခန္ဓာကိုယ်ပတ်လည်တွင် လှိမ်ယှက်နေသော အလင်းတန်း များစွာ ပေါ်လာသည်။ အဝေးမှ ကြည့်လျှင် ၎င်းက သေးငယ်သော ‘ဓားသွားများ’ဖြင့် ဖွဲ့စည်းထားသော ကြီးမားသော လက်သည်း တစ်ခုက သူ့ကို အလယ်တွင် ကိုင်ထားသကဲ့သို့ ဖြစ်နေသည်။

ချန်လွေ့က အလျင်အမြန် ရှောင်တိမ်းလိုက်သည်။ ကြောက်စရာ ကောင်းသော အင်အားများ လှိမ်ယှက် နေသော ထိုကဲ့သို့ နေရာလွတ်တွင် သူက ရိုးရိုးရှင်းရှင်း ရွေ့လျားခြင်း သို့မဟုတ် ရွှေ့ပြောင်းခြင်းကို အသုံးပြုပါက ဓားသွားများဆီသို့ ပြန်လှည့်သွားပေမည်။ ထို့ကြောင့် သူသည် ပုံမှန် လှုပ်ရှားမှုဖြင့်သာ ရှောင်တိမ်းနိုင်သည်။ သူ အနည်းငယ် နှေးသွား၍ သူ့မျက်နှာတွင် သွေးစ အချို့ ပေါ်လာခဲ့သည်။

‘ချွန်ထက်သော လက်သည်းများ’ က ခန္ဓာကိုယ်ကို ထိရန် မလိုအပ်ပေ။ ကြောက်မက်ဖွယ်ကောင်းသော ချွန်ထက်မှုက အကွာအဝေးကိုဖြတ်၍ အရာအားလုံးကို ဖြတ်တောက်နိုင်၏။

ခီလီယာနာ၏ တိုက်ခိုက်မှုပုံစံက ‘ထက်မြက်’၏။ အပြင်းအထန် တိုက်ခိုက်မှုများက စုစည်းထားပြီး အမှတ်နှင့် မျဉ်းဖြင့် တိုက်ခိုက်ခြင်း ဖြစ်သည်။ [အရှိန်အဝါဓားသွား] ၏ တိုက်ခိုက်မှုနှင့် ဆင်တူသော်လည်း ပိုထက်မြက်ကာ ပိုမို၍ ပြောင်းလဲ နိုင်ပေသည်။

ချန်လွေ့က [ဓူဝံကြယ်နီအသွင်ပြောင်းခြင်း]ကို အသက်သွင်းခဲ့သောအခါ နတ်ဘုရား တစ်ပိုင်းကိုပင် သတ်နိုင်ခဲ့သည်။ သို့သော် နတ်ဘုရားတစ်ပိုင်း အဆင့်ကို ကျော်လွန်ရုံသာ ရှိနေသော ခီလီယာနာကို ရင်ဆိုင်ရသောအခါ သူက လုံးဝ ဖိနှိပ်ခံနေရသည်ဟု ခံစားခဲ့ရသည်။ အကြောင်းမှာ ခီလီယာနာ၏ စွမ်းအား အစစ်အမှန်က သာမန် နတ်ဘုရား-ယောင်ကို ကျော်လွန်နေပြီ ဖြစ်၍ပင်။ အဆုံးသတ် တိုက်ကွက်များကသည် ပြင်းထန်ပြီး ဖမ်းရခက်နေသည်။ ထိုခန္ဓာကိုယ်တွင်ပင် သူ့စွမ်းအားက အစစ်အမှန်အရှိန်အဝါနှင့် အနည်းငယ် နီးစပ်နေ၏။

အတုမရှိသော အစွမ်းထက် ပုဂ္ဂိုလ် တစ်ဦးကဲ့သို့ပင်။ သူ၏ စွမ်းအားကို သာမန် အစွမ်းထက်ပုဂ္ဂိုလ် အဆင့် အထိ ကန့်သတ်လိုက်လျှင်ပင် သာမန် အစွမ်းထက်ပုဂ္ဂိုလ်များက သူ့ကို မယှဉ်နိုင်ပေ။

ကြီးမားသော လက်သည်းသည် ပိတ်သွားခဲ့ပြီး ဓားသွားများစွာက မျက်စိတစ်မှိတ်အတွင်း ထပ်သွား၏။ ၎င်းတို့က ချန်လွေ့ကို အမှုန့်ကြိတ်ရန် ပြင်ဆင်နေကြသည်။ ချန်လွေ့က ထပ်ပြီး မရှောင်တိမ်း နိုင်တော့ပေ။ နောက်ကျောရှိ ကြယ်အလင်းတန်း အတောင်ပံ နှစ်စုံက သူ့ကို ရစ်ပတ် ထားလိုက်သည်။

မီးလျှံ၏ အလင်းနှင့် ကြယ်အလင်း တိုက်မိသည့်အချိန်တွင် နေရာလွတ် တစ်ခုလုံးပြင်းထန်စွာ တုန်ခါသွား၏။ ဝိညာဉ်ကို ဖောက်သည့် အသံတစ်ခု ထွက်ပေါ်လာသည်။ မီးပွားများစွာ ထဲတွင် ကြယ်ရောင် တောင်ပံများ၏ အပိုင်းအစများစွာ ကွဲကြေသွား၏။ အတောင်ပံများက ဖိအား မည်မျှ ခံစားခဲ့ရသည်ကို တွေးနိုင်ပေ၏။

ထိုအချိန် ခီလီယာနာ၏ လှုပ်ရှားမှု ရုတ်တရက် ရပ်တန့်သွား၏။ ထို ‘ဓားသွားများ’၏ အရှိန် ရုတ်တရက် နှေးကွေးသွားပြီး စွမ်းအားလည်း သိသိသာသာ လျော့ကျသွားသည်။ သူ့ကို တစ်စုံတစ်ခုကို အသည်း အသန် တိုက်ခိုက်နေသကဲ့သို့ သူ၏ မျက်နှာတွင် နာကျင်သော အမူအရာ တစ်ခု ရှိနေသည်။

ထိုဖြစ်စဉ်က ယခုမှ ပေါ်လာခြင်း မဟုတ်ပေ။ ချန်လွေ့ အန္တရာယ် ကြုံတိုင်း ခီလီယာနာ၏ စွမ်းအားက အကြောင်းမဲ့ ရပ်တန့်သွားခဲ့သည်။ ခီလီယာနာက လွှမ်းမိုးသော စွမ်းအားဖြင့် ထိန်းချုပ်ထားသော်လည်း ဗာရိုနီကာက ရုန်းကန်ရန် ဝိညာဉ်ကို အသည်းအသန် လောင်ကျွမ်းနေခဲ့ခြင်း ဖြစ်သည်။

ငါ့ရဲ့ နှလုံးသားထဲက နောက်ဆုံး နေရောင်ခြည်အတွက် -

ငါ့အတွက် အပြန်လမ်း မရှိလည်း နေပါစေ -

ထိုအခွင့်အရေးကို အသုံးချပြီး ငွေဖြူရောင် တောက်ပနေသော ခွက်တစ်ခုက မီးပွားများ ရောယှက် နေသော ကောင်းကင်၌ ပေါ်လာပြီး ၎င်းသည် ရေစီးကြောင်း အဖြစ်သို့ ပြောင်းလဲသွားပြီး အောက်ဘက်တွင် ပေါင်းစည်းသွား၏။

သိဒ္ဓိခွက်၏ [သိဒ္ဓိအကာအကွယ်]!

[သိဒ္ဓိအကာအကွယ်]က အချိန်တို အတွင်း ကောင်းချီးပေးခံရသူများ၏ ‘ကံ’ကို တိုးမြှင့်ပေးနိုင်ပြီး ရုပ်ပိုင်း ဆိုင်ရာနှင့် မှော်ဆိုင်ရာ ထိခိုက်မှုကို လျှော့ချနိုင်သည်။ အမျိုးမျိုးသော အားလျှော့အခြေအနေများ၏ အချိန် သိသိသာသာ တိုတောင်းသွားမည် ဖြစ်ပြီး အားတိုး အခြေအနေများ၏ အချိန်က တိုးလာလိမ့်မည်။

[သိဒ္ဓိအကာအကွယ်]၏ တိုးမြှင့်မှု အောက်တွင် ကြယ်အလင်းက ရုတ်တရက် တောက်ပလာသည်။ ကြယ်တောင်ပံ ၄စုံကိ ဖြန့်လိုက်၏။ ရောယှက်နေသည့် ချွန်ထက်သော အလင်းတန်းများစွာ ဖယ်ရှားခံရပြီး ခီလီယာနာဆီသို့ ပြန်၍ ပစ်ခတ် လိုက်သည်။ထိုအရာက [ကြယ်အစောင့်အရှောက်တောင်ပံ] ၏ ထိခိုက်မှုကို တန်ပြန်ခြင်းပင်။

ခီလီယာနာသည် သတိလတ်လွတ် ဖြစ်သွားခဲ့ပြီး မိမိ၏ ကိုယ်ပိုင် အဆုံးသတ် တိုက်ကွက်ဖြင့် ရစ်ပတ် ခံလိုက်ရသည်။ သူ၏ ခန္ဓာကိုယ် တစ်ခုလုံးတွင် သွေးများစွန်းနေ၏။ ကြောက်မက်ဖွယ်ကောင်းသော ဒဏ်ရာများစွာက သူ၏ခန္ဓာကိုယ် တစ်ခုလုံးကို ရှိနေပြီး သူ၏ အရေပြားများ လှိမ့်တက်နေ၏။

“ရူးမိုက်ပြီးတော့ နိမ့်ကျတဲ့ အရာ။ အရှင်သခင်ရဲ့ အကြီးမြတ်ဆုံးဆန္ဒကို ခုခံရတယ်ပေါ့!” ခီလီယာနာက ခနဲ့လိုက်သည်။ “မင်းရဲ့ ဝိညာဉ်ကို လောင်ကျွမ်းတာက ငါ့ကို ရပ်တန့် နိုင်မယ်လို့ မထင်နဲ့။ ဒီလိုရှားပါးတဲ့ အကောင်းဆုံး ဝိညာဉ်မျိုးကွဲကို စတေးရရင်တောင်မှ ဒီနေ့ အဲဒီ ခွေးကောင်ကို လုံးဝ ဖျက်ဆီး ပစ်ရမယ်!”

ပြောပြီးနောက် ခီလီယာနာ၏ ခန္ဓာကိုယ်ပတ်လည်ရှိ မီးတောက်များ ပို၍ပင် ပြင်းထန်ကာ အဝတ်အစား အားလုံး လောင်ကျွမ်းသွားပြီး အဝတ် ဗလာ ခန္ဓာကိုယ် ပေါ်လာခဲ့သည်။

ထင်ထားသည့်အတိုင်းပင် ပြီးပြည့်စုံပြီး ဆွဲဆောင်မှုရှိသော ခန္ဓာကိုယ် ဖြစ်သင့်သော်လည်း ကြောက်မက်ဖွယ်ကောင်းသည့် ထူးဆန်းသော ‘ပုံစံကွက်များ’ ဖြင့် ဖုံးလွှမ်းနေ၏။ ထိုပုံစံကွက်များက အလျင်အမြန် ယိုယွင်းသွားပြီး ချဲ့ထွင်လာကာ ‘လူသား’ ကိုယ်ကို သံချပ်ကာကဲ့သို့ လုံးဝရစ်ပတ်ထား လိုက်သည်။ ဓားသွားကဲ့သို့ လက်သည်းများလည်း ရှည်ထွက်လာပြီး အေးစက်ပြီး ချွန်ထက်သောအစွန်းကို ပြသနေ၏။

ထိုကဲ့သို့ ပြောင်းလဲမှု အပြီးတွင် ဗာရိုနီကာ၏ စိတ်ဆန္ဒက လုံးဝဖိနှိပ်ခံ လိုက်ရသည်။ ခီလီယာနာက အသံ တိုးတိုးဖြင့် ဟိန်းဟောက်လိုက်သည်။ သွေးရောင်တိုင်းပြည်တစ်ခုလုံးသည် ကြယ်များ၏ တောက်ပမှုကိုပင် ဖုံးလွှမ်းသွားအောင် တောက်ပစွာ လင်းလက်လာခဲ့သည်။

ချန်လွေ့က ဖိအား ရုတ်တရက် နှစ်ဆ တိုးသွားကြောင်း ခံစားမိသည်။ ပို၍ပင် ကြောက်မက်ဖွယ် ကောင်းသည်မှာ ခီလီယာနာ၏ စွမ်းအားက တဖြည်းဖြည်း တိုးလာနေခြင်းပင်။ မူလခန္ဓာကိုယ်၏ စွမ်းအားက လျှို့ဝှက်ပညာရပ် တစ်မျိုးမျိုးဖြင့် ထိုဝိညာဉ်မျိုးကွဲ ခန္ဓာကိုယ်ထဲသို့ စဉ်ဆက်မပြတ် ပေးပို့နေသကဲ့သို့ ဖြစ်နေသည်။

၎င်းက နတ်ဘုရားတစ်ပိုင်း အဆင့် အစွမ်းထက် ပုဂ္ဂိုလ် တစ်ဦး ဖြစ်ပါက ထိုကြောက်မက်ဖွယ်ကောင်းသော စွမ်းအားအောက်တွင် ပြိုလဲသွားပြီ ဖြစ်သည်။ သို့သော် ချန်လွေ့တွင် စူပါစနစ်နှင့် နည်းလမ်းအမျိုးမျိုး ရှိသည်။ အရေးနိမ့်ပြီး ဖိနှိပ်ခံနေ ရသော်လည်း သူက ခီလီယာနာနှင့် အမြဲယှဉ်ပြိုင်နိုင်သည်။ ထိုအရာက ခီလီယာနာအတွက် မထူးဆန်းပေ။ သူက ငွေလကောင်းကင်မြို့တော်၏ သဘာဝသစ်ပင်တိုက်ပွဲ၌ ထိုရန်သူသည် မည်မျှ ထူးခြားကြောင်း ကြုံတွေ့ခဲ့ပြီးဖြစ်သည်။ သူ့တွင် နတ်ဘုရားတိုင်းပြည်ပင် ရှိနေနိုင်၏။ ထို့ကြောင့် ယခုတစ်ကြိမ်တွင် ခီလီယာနာက ချန်လွေ့ကို ထိန်းချုပ်ရန် သို့မဟုတ် နှိမ်နင်းရန် သူ၏စွမ်းအင်ကို မဖြုန်းတီးတော့ဘဲ အမြန်ဆုံးနည်းလမ်းဖြစ်သော ဖျက်ဆီးခြင်းကို အသုံးပြုခဲ့သည်။

အဓိကယဇ်ပလ္လင်၏ ယဇ်ပူဇော်ခြင်း စွမ်းအားကြောင့် ဝိညာဉ်မျိုးကွဲ ခန္ဓာကိုယ် ဖြစ်သော ဗာရိုနီကာ လက်ခံရရှိသော ဆန္ဒက အမြင့်ဆုံး ဖြစ်နိုင်၏။ ခီလီယာနာက ထိုရှားပါးသော သယ်ဆောင်သူကိုပင် စတေး၍ ချန်လွေ့ကို ဖယ်ရှားရန် ဆုံးဖြတ်ခဲ့သည်။ သူက အစွမ်း အထက်ဆုံး ဝိညာဉ်မျိုးကွဲဖြင့် ထိုခက်ခဲသော ရန်သူကို အမှုန့် ချေပစ်ရန် အပြည့်အဝ ယုံကြည်ချက် ရှိနေသည်။

မီယာစ် အင်ပါယာ တော်ဝင် ဂူသင်္ချိုင်းအောက်ရှိ ‘အမုန်းတရား’ အဓိကယဇ်ပလ္လင်၌ -

လေထဲရှိ အလွန်ကြီးမားသော နိမိတ်ပုံရိပ်သည် ဘာသာဝင်များက ဆက်လက်ရွတ်ဆိုပြီး ယဇ်ပူဇော် နေသည်နှင့်အမျှ ပိုမိုခိုင်မာလာသည်။

လူတိုင်းနှင့်အတူ ရွတ်ဆိုနေခဲ့သော အသူရာက ယဇ်ပလ္လင်ပတ်လည်တွင် ပူဇော်ပသထားသော ‘နတ်ဘုရား’ ရုပ်တုများအနက် အလတ်နှင့် အနိမ့်ဆင့် အသူရာချောက်နက် သတ္တဝါများဖြစ်ကြသော ပါးစပ်ကြီး နတ်ဆိုး၊ ဒေါသအိုး နတ်ဆိုး၊ မီးလျှံစုန်းမများအပြင်၊ အမြင့်ဆုံး ဖြစ်ပြီး မူလက ဝေဝါးနေခဲ့သော တတိယထပ် ‘နတ်ဘုရားရုပ်ထု’က နောက်ဆုံးတွင် ရှင်းလင်းလာသည်ကို တွေ့ရှိခဲ့ရသည်။

ထိုအရာက နိမိတ်ပုံရိပ်၏ ‘လက်ဆောင်’ကို ရရှိပြီးသော အဓိက မရဏနက်နောက်လိုက်မှသာ မြင်နိုင်သောအရာ ဖြစ်လောက်သည်။

အလယ်တွင် အမျိုးသမီးပုံစံများ ထင်ရှားသော သက်ရှိ တစ်ယောက် ရှိနေသည်။ မို့မောက်နေသော ရင်သားများ၊သွယ်လျသောခန္ဓာကိုယ်၊ နောက်ကျောတွင် အမြီးတစ်ခုနှင့် ဓားကဲ့သို့ ချွန်ထက်သော လက်သည်းရှည်များ ရှိနေသည်။ ခန္ဓာကိုယ်ပေါ်ရှိ အရိုးဆူးများနှင့် အဖုအထစ်များက ချပ်ကာ တစ်ထည်နှင့် ပိုတူသည်။ ‘အမုန်းတရား’၏ ပြင်းထန်သော ခံစားချက်က အသူရာ၏နှလုံးသားမှ အလိုလို ထွက်ပေါ်လာခဲ့သည်။

ထိုပုံရိပ်က လေထဲမှ စိတ်ပုံရိပ်နှင့် ရေးရေးလေး ကိုက်ညီနေလေသည်။ ချန်လွေ့က ငွေလကောင်းကင် မြို့တော်ရှိ သဘာဝသစ်ပင် နေရာလွတ်တွင်လည်း ၎င်းကို မြင်ဖူးသည်။ ၎င်းက အမုန်းတရား အရှင်သခင် ခီလီယာနာပင်။

‘အမုန်းတရား’ ဘေးနားတွင် အမျိုးသားရုပ်ထု နှစ်ခု ရှိနေသည်။ အားကောင်းသော ခန္ဓာကိုယ်နှင့် လက်၆ချောင်းရှိသော ရုပ်ထုက ‘အကြောက်တရား’ ဖြစ်သည်။ အခြား တစ်ခုမှာ ကင်းမြီးကောက် ကဲ့သို့ အလွန်ကြီးမားသော ‘မျှော်လင့်ချက်မဲ့’ ဖြစ်သည်။

အသူရာ ချောက်နက်၏ အုပ်စိုးသူ သုံးဦးပင်!

အမုန်းတရား အရှင်သခင် ခီလီယာနာ၊ အကြောက်တရား အရှင်သခင် ဆိုစဘတ် နှင့် နာမည် မသိရသေးသော မျှော်လင့်ချက်မဲ့ အရှင်သခင်တို့ ဖြစ်လေသည်။

အခြား အသူရာ ချောက်နက် အုပ်စိုးသူနှစ်ဦး ကဲ့သို့ပင် ‘မျှော်လင့်ချက်မဲ့’ အဓိက ယဇ်ပလ္လင် တစ်ခု ရှိနေသေးသည်မှာ သေချာ၏။ သို့သော် မည်သူမျှ နေရာ အတိအကျကို မသိကြပေ။

သွေးနီမြူခိုးများက မရဏနက် နောက်လိုက်များ ပတ်ပတ်လည်တွင် ပျံ့လွင့်နေပြီး စွမ်းအင်ကို အဆက်မပြတ် ထုတ်လွှတ်ကာ မရဏနက်နောက်လိုက်များ၏ ခန္ဓာကိုယ်ထဲသို့ ထိုးဖောက် ဝင်ရောက်နေခဲ့သည်။ အမှန်တကယ်၌ ၎င်းတို့သည် သွေးစတေးခြင်း စွမ်းအားကို နိမိတ်ပုံရိပ် စုပ်ယူကာ သန့်စင်ပြီး ထုတ်လွှတ်သော ‘အညစ်အကြေးများ’ သာ ဖြစ်သည်။ သို့သော်လည်း ၎င်းက ထိုခိုင်မာသော ယုံကြည်သူများ အတွက် သက်ဆိုင်ရာ စွမ်းအားကို ရရှိစေရန် လုံလောက်ပေသည်။

သွေးနီမြူခိုးများက ခဏတာမျှ ကခုန်နေပြီးနောက် တဖြည်းဖြည်း နှေးကွေးလာကာ အသူရာဘေးတွင် သိပ်သည်းလာခဲ့သည်။

ထိုမြင်ကွင်းသည် ကျန်မရဏနက် နောက်လိုက်များကို မနာလိုသော အမူအရာများ ဖြစ်စေခဲ့သည်။ ဂိုဏ်းချုပ် နှစ်ဦးပင် ခြွင်းချက်မရှိပေ။ အကြောင်းမှာ ယခုတစ်ကြိမ်တွင် အသူရာက ‘အရှင်သခင်မျိုးဆက်’၏ အမြင့်ဆုံး ကောင်းချီးခံရသူ တစ်ဦး ဖြစ်လာမည်ဟု အဓိပ္ပာယ်ရ၍ပင်။ သူက ‘အရှင်သခင်’မှ ကြီးမားသော အကျိုးကျေးဇူးကို ပေးအပ်ခံရနိုင်၏။

“မင်းက တခြားသူအားလုံးထက် ကျော်လွန်ပြီးတော့ အံ့သြစရာ ကောင်းလောက်တဲ့ ဖျက်ဆီးခြင်း ယုံကြည်မှု ရှိတယ်။ မင်းကို အစွမ်းအထက်ဆုံး ဝိညာဉ်မျိုးကွဲ စွမ်းအားနဲ့ လွှမ်းမိုးခြင်း နှလုံးသားကို ပေးအပ်မယ်။” ခီလီယာနာ၏ နိမိတ်ပုံရိပ်က အဝေးမှ အသံတစ်ခု ပြုလုပ်ပြီး အဓိက ယဇ်ပလ္လင် တစ်ခုလုံးကို တုန်ခါသွားစေသည်။

တချိန်တည်းမှာပင် ထိုအသံက မငြင်းနိုင်သော စီရင်ချက် ယူဆောင် လာခဲ့သည်။ ၎င်းက လူတိုင်း၏ စိတ်ထဲတွင် ‘အလိုလို သဘောတူ’ သွားစေသည်။ မည်သူမျှ မကန့်ကွက် ကြပေ။ အထူးသဖြင့် ဆိုရန်လီပင်။ သူက စိတ်ထဲတွင် လျှို့ဝှက်စွာ တွေးတောနေ၏။ အသူရာက အရှင်သခင်ရဲ့ အာရုံစိုက်မှုကို ရရှိပြီး သဘောအကျခံရဆုံး ဖြစ်လာမယ်လို့ ငါ တစ်ခါမှ မတွေးခဲ့မိဘူး။ သူ့ရဲ့ အသုံးဝင်မှု တန်ဖိုးက ပိုပြီးတော့ တိုးတက်လာမှာပဲ။ နောက်ပိုင်း သူက လျှို့ဝှက်သာဘာရေးဂိုဏ်း အမြင့်ဆုံး အဆင့်ထဲ ဝင်နိုင်လောက်သည်။ အဲဒါကြောင့် ငါ အခု ဆက်ဆံရေးကို အသုံးချပြီးတော့ သူ့ကို ဆက်ပြီး ဆွဲဆောင်ရမယ်။ သူ့ကို တိမ်စီးနင်း အင်ပါယာအုပ်စု၏ အဓိက ကျောရိုး ဖြစ်လာစေရမည်။

ထို့နောက် ဝိညာဉ်တစ်ခုတည်းကို စတေးခြင်းဖြင့် အသူရာက အစွမ်း အထက်ဆုံး ဝိညာဉ်မျိုးကွဲ ဖြစ်လာပြီး အမုန်းတရားနှလုံးသားကို ရရှိနိုင်မည် ဖြစ်သည်။

အသူရာက ရှေ့သို့ အနည်းငယ် လှမ်းသွားပြီး အနားရှိ သွေးရောင် မြူခိုးများက သူ့ကို ဖြည်းဖြည်းချင်း ဖုံးလွှမ်းသွား၏။

ထိုအချိန် အမုန်းတရား အရှင်သခင် နိမိတ်ပုံရိပ်၏ အသံက ရုတ်တရက် ပြောင်းလဲသွားသည်။

“မင်း... မင်းမှာ ဝိညာဉ်မရှိဘူး!”

ထိုစကားများ ထွက်လာသည်နှင့် တပြိုင်နက် မရဏနက်နောက်လိုက် အားလုံး ကြောက်လန့်တုန်လှုပ်သော အမူအရာများ ပြသလိုက်ကြသည်။ လူတစ်ဦးတွင် ဝိညာဉ်မရှိဘဲ မည်သို့ ရှိနိုင်မည်နည်း။

“မင်းက ဘယ်သူလဲ။” နိမိတ် ပုံရိပ်၏ အသံတွင် အထူး ခြိမ်းခြောက် နိုင်သော စွမ်းအားတစ်ခု ပါရှိနေ၏။

အသူရာ၏ မျက်နှာဖုံးက ချက်ချင်း ကွဲထွက်သွားသည်။ မျက်နှာဖုံး သာမက မျက်နှာ တစ်ခုလုံးနှင့် ခန္ဓာကိုယ်ပါ မေးခွန်းထုတ်မှုကြောင့် ကွဲအက်သွားသော်လည်း အက်ကွဲကြောင်းမှ သွေးများ ယိုစီးကျမလာပေ။

အသူရာက ခေါင်းမော့လိုက်ပြီး လေထဲရှိ နိမိတ်ပုံရိပ်ကို ကြည့်ကာ ထူးထူးဆန်းဆန်း ပြုံးလိုက်သည်။ သူ ရယ်လိုက်သောအခါ သူ့မျက်နှာပေါ်ရှိ အရေပြားများ ကွဲထွက်သွားပြီး ကြောက်မက်ဖွယ်ကောင်းနေသည်။

“ခွေးမ။ မင်း ငါနဲ့ တခြားနေရာမှာ တိုက်ခိုက်နေတာ မဟုတ်ဘူးလား။”

ထိုစကားများ၏ အဓိပ္ပာယ်က အတော်လေး ရှင်းလင်းပေသည်။ မရဏနက်နောက်လိုက်များက အုတ်အော်သောင်းတင်း ဖြစ်သွားကြသည်။ ‘အသူရာ’သည် အမှန်တကယ်၌ သူလျှိုတစ်ဦး ဖြစ်နေ၏။

“ချီးပဲ!” ခီလီယာနာက နောက်ဆုံး နားလည်သွားခဲ့သည်။ သူက ရန်သူ၏ ကိုယ်ပွားကို အဓိက ယဇ်ပလ္လင်ထဲသို့ ရောနှောဝင်ခွင့်ပေးခဲ့မိသည်ဟု မထင်ထားခဲ့ပေ။ သူ၏မျက်လုံးများ တောက်ပသွား၏။ သူက အရှိန်အဝါ ထုတ်လွှတ်ပြီး အသူရာ၏ ခန္ဓာကိုယ်ကို ဘာမှမရှိတော့အောင် ဖျက်ဆီးပစ်လိုက်သည်။

သို့သော် ကွဲအက်နေသော ခန္ဓာကိုယ်၏ အလယ်တွင် ထူးဆန်းသော စက်ဝိုင်းပုံအရာတစ်ခု လွင့်ပျံနေသည်။

၎င်းက ရှေးမှော်စာအမှတ်အသား ထွင်းထုထားသော အဖြူရောင် ပိုလီဟီဒရွန် ဖြစ်သည်။ ၎င်း၏ ပတ်လည်တွင် ရောင်စုံအလင်း ၆ခု ရှိပြီး ခီလီယာနာအား အလွန်အမင်း အန္တရာယ်ရှိသော ခံစားချက်မျိုးကို ပေးစွမ်းနေသည်။

အန္တိမ တမန်တော် ရာဖယ်ရယ် ကိုယ်တိုင် ပြုလုပ်ထားသော နတ်ဘုရား-ယောင်ကို သတ်နိုင်သည့် အလင်းမိုးကြိုးတောက်ပပင်။

ထိုအရာမျှသာမက ချန်လွေ့က ဒြပ်စင်ဘုရင် သင်ကြားပေးထားသော ‘စကြဝဠာပျက်သုဉ်း’ ကို အသုံးပြုပြီး ၎င်းကို အလင်းမိုးကြိုးတောက်ပ၏ စွမ်းအားကို မြှင့်တင်ရန် သုံးကာ မမျှော်လင့်ထားသော အဆင့်အထိ မြှင့်တင်နိုင်ခဲ့သည်။

ခီလီယာနာက မျက်မှောင်ကြုတ် လိုက်ပြီး အဖြူရောင် ပိုလီဟီဒရွန်၌ စိမ်ထားသော ရောင်စုံအလင်း ၆ခုကို မြင်လိုက်ရ၏။ နောက်စက္ကန့်ပိုင်းတွင် အရာအားလုံးက အဖြူရောင်အလင်း အဖြစ်သို့ ပြောင်းလဲသွားတော့သည်။