ဝိုင်းထားခြင်း

"အင်ပါယာလေးခုက ငါတို့ကို လာတိုက်မယ်တဲ့လား..."

ယီထျန်းယွမ်၏အကြည့်များသည် တခဏအတွင်း အေးစက်သွားပြီး မျက်ဝန်းနှစ်ဖက်ထဲတွင် သတ်ဖြတ်လိုစိတ်တစ်ခုက တောက်လောင်လာသည်။ ဤအရေးတကြီးအခိုက်အတန့်တွင် မည်သူကမျှ သူ့အား အကြံအစည်ဖြင့် လာရောက်တိုက်ခိုက်ဝံ့မည်ဟု မထင်ထားခဲ့ပေ။ မည်သူကမျှ ဤမျှရဲတင်းသည့်သတ္တိကို ပေးအပ်ခဲ့သနည်း။

"ဟုတ်ကဲ့... အင်ပါယာလေးခုက စုပေါင်းပြီး အင်ပါယာမဟာမိတ်တစ်ခုဖွဲ့ထားပြီး ကျွန်တော်တို့ ကောင်းကင်နဂါးအင်ပါယာကို တိုက်ခိုက်ဖို့ ပြင်ဆင်နေပါပြီ... ပြောရရင် သူတို့ဟာ အခုဆို ဒီနယ်မြေဘက်ကို တရွေ့ရွေ့ချီတက်လာနေပြီဖြစ်ပါတယ်..." ထိုတမန်တော်သည် နဖူးပေါ်က ချွေးစီးများကို သုတ်လိုက်ရင်း ပြောလိုက်သည်။ ရန်သူများသည် ယခုဆိုလျှင် ထိုးဖောက်လာနေပြီဖြစ်ပြီး အနည်းငယ်နှေးကွေးသွားပါက ကောင်းကင်နဂါးဧကရာဇ်မြို့တော်သို့ပင် ရောက်ရှိလာနိုင်ပြီဖြစ်သည်။

"သူတို့ဘာကြောင့် ငါတို့ကို တိုက်ခိုက်တာလဲ..." ယီထျန်းယွမ်က မေးလိုက်သည်။ "ဘာကြောင့်လဲဆိုတာ သေချာစုံစမ်းထားရဲ့လား..."

ဖြစ်နိုင်သည်မှာ နယ်မြေအတွက်ဖြစ်နိုင်သလို ရတနာများအတွက်လည်း ဖြစ်နိုင်သည်။ သို့မဟုတ် သိုင်းပညာကျမ်းများ အတွက်လည်း ဖြစ်နိုင်သည်။ သူ့အနေဖြင့် အဘယ်ကြောင့် ဤအင်ပါယာများက ကောင်းကင်နဂါးအင်ပါယာကို တိုက်ခိုက်ရန် ရွေးချယ်ခဲ့သည်ကို သိရှိလိုသည်။ ယခင်က အင်ပါယာများအကြား တစ်ဖက်နှင့်တစ်ဖက် မထိမခိုက်ဘဲ အေးချမ်းစွာ နေထိုင်ခဲ့ကြသည်မဟုတ်ပါလား။ ထို့ပြင် အခြားအင်ပါယာများသိမ်းပိုက်ထားသည့် နယ်မြေများသည်လည်း သူတို့နယ်မြေထက် မညံ့ပေ။

ယခုမူ အင်ပါယာလေးခုက ပူးပေါင်းပြီး သူတို့အား တိုက်ခိုက်ရန်ပြင်ဆင်နေသည်မှာ ထူးဆန်းလှသည်။ အကယ်၍ ယီထျန်းယွမ်မရှိခဲ့ပါက ဤအင်ပါယာလေးခု၏ ပူးပေါင်းတိုက်ခိုက်မှုအောက်တွင် ကောင်းကင်နဂါးအင်ပါယာသည် ရှုံးနိမ့်မည်မှာ သေချာသည်။ သို့သော် ဤတိုက်ခိုက်မှုသည် ရန်သူများအတွက်လည်း မသေးသိမ်သည့် ဆုံးရှုံးမှုများကို ယူဆောင်လာမည်ဖြစ်သည်။ ဤဆုံးရှုံးမှုများကို ခံနိုင်စွမ်းရှိသည်ဟု ယူဆထားသော်လည်း ရည်ရွယ်ချက်မရှိဘဲ ဤမျှထိခိုက်မှုကြီးမားသော တိုက်ခိုက်မှုကို ပြုလုပ်ရန်မှာ အဆင်မပြေလှပေ။

ထို့အပြင် အင်ပါယာများအကြား ဆက်ဆံရေးရှိသည်မှာ သေချာသော်လည်း အလွန်ရင်းနှီးပြီး မဟာမိတ်ဖွဲ့ရန်အထိဖြစ်လာသည်မှာ ရှားပါးလှသည်။ အထူးသဖြင့် အင်ပါယာလေးခုက တစ်ပြိုင်နက်တည်း မဟာမိတ်ဖွဲ့လာခြင်းသည် သာမန်အင်အားဖြင့် မဖြစ်နိုင်သည့်ကိစ္စဖြစ်သည်။

"အဲဒါကို သေချာမသိရသေးပါဘူး... ရုတ်တရက်ကြီး ထိုးဖောက်လာတာပါ။ အခုဆို ကျွန်တော်တို့ရဲ့ နယ်စပ်တစ်ခုလုံး ကျဆုံးသွားပြီဖြစ်ပြီး ရက်ပိုင်းအတွင်း ကောင်းကင်နဂါးဧကရာဇ်မြို့တော်ထိ ရောက်လာတော့မှာပါ..."

နတ်တမန်တော်သည် နဖူးပေါ်က ချွေးစီးများကို ထပ်မံသုတ်လိုက်ရင်း မျက်နှာမှာ ဖြူဖျော့လျက်ရှိသည်။

သူ၏ဤအခြေအနေသည် ထိတ်လန့်မှုကြောင့်မဟုတ်ဘဲ ဤသို့ရောက်ရှိလာရန် အလျင်အမြန်ပြေးလွှားလာခဲ့ရသဖြင့် စိတ်ဝိညာဉ်စွမ်းအင်များ ပြင်းထန်စွာ ကုန်ခမ်းသွားခြင်းကြောင့်သာ ဖြစ်သည်။ ဤသည်မှာ အလွန်အရေးတကြီးကိစ္စဖြစ်သည့်အတွက် သူသည် အနားယူရန်ပင် မရဲခဲ့ဘဲ တစိုက်မတ်မတ် ပြေးလွှားလာခဲ့ရခြင်းဖြစ်သည်။

"စံအိမ်တော်သခင်... သခင်လေးမရှိတုန်းက ကောင်းကင်နဂါးအင်ပါယာက ကျွန်မတို့ကို အမြဲဂရုစိုက်ပေးခဲ့ပြီး သယံဇာတတွေလည်း မကြာခဏပို့ပေးခဲ့ပါတယ်... ပုန်ကန်သူတွေ ဒါမှမဟုတ် ဓားပြတွေကို နှိမ်နင်းတဲ့အခါမှာလည်း သူတို့က အမြဲတမ်း ကူညီပေးခဲ့ပါတယ်..."

ဇီယူဝေ့က မျက်ဝန်းများထဲတွင် ခိုင်မာသောဆုံးဖြတ်ချက်ဖြင့် ပြောလိုက်သည်။ အကယ်၍ ယီထျန်းယွမ်ဤနေရာတွင်မရှိခဲ့ပါက သူမတို့သည် ကောင်းကင်နဂါးအင်ပါယာသို့ အင်အားဖြည့်ကူညီရန် ချီတက်သွားပြီးဖြစ်လိမ့်မည်။

"အဲဒါကို ကျွန်တော်သိပါတယ်... မင်း ဒီမှာ အေးအေးဆေးဆေး အနားယူထား... ကျွန်တော်တစ်ယောက်တည်း သွားလိုက်မယ်..." ယီထျန်းယွမ်၏မျက်ဝန်းများထဲတွင် အေးစက်သောအလင်းတန်းတစ်ခုက တောက်ပလျက်ရှိပြီး ကောင်းကင်နဂါးအင်ပါယာသို့ ချက်ချင်းထွက်ခွာရန် ပြင်ဆင်လိုက်သည်။

ထျန်းလုံသည် သူ၏သွေးသောက်ညီအစ်ကိုဖြစ်သည်ကို ဘေးဖယ်ထားလျှင်ပင် ရန်ကျိရို့တစ်ယောက်တည်းကို ကြည့်ရုံဖြင့်ပင် သူသည် ကယ်တင်ရန်အတွက် သွားရောက်ရမည်ပြီဖြစ်သည်။ ထို့အပြင် ကောင်းကင်နဂါးအင်ပါယာသည် ယခင်က သူတို့အား မကြာခဏ ကူညီပေးခဲ့သည်ကို သူကြားသိထားရသည်။

"ကျွန်မတို့ လိုက်စရာ မလိုဘူးလား..."

သူတို့အားလုံး မှင်တက်မိသွားကြသည်။ သူတို့အနေဖြင့် အင်အားကြီးမားသူတစ်စုကို ခေါ်ဆောင်သွားရန် ပြင်ဆင်ထားခဲ့သည်ဟု ထင်ထားခဲ့သော်လည်း ယီထျန်းယွမ်က သူတစ်ယောက်တည်း သွားမည်ဟု ပြောလိုက်ခြင်းဖြစ်သည်။

"မလိုပါဘူး... မင်းတို့ရောက်တဲ့အခါဆိုရင် အရာအားလုံး နောက်ကျသွားလိမ့်မယ်..."

ယီထျန်းယွမ်၏ အမူအရာက လေးနက်နေ၏။

"ယီအကြီးအကဲ... ဒါ... ဒါပေမဲ့..."

နတ်တမန်တော်သည် စကားမပြောနိုင်တော့ဘဲ မှင်တက်မိသွားသည်။ ယီထျန်းယွမ်သည် အလွန်ထူးချွန်သည်ဟု သူကြားဖူးထားသော်လည်း ထိုအင်အားသည် ကောင်းကင်နဂါးဧကရာဇ်မြို့တော်အတွင်းတွင်သာ ထိရောက်မှုရှိသည်ဟု ယူဆထားသည်။

အကယ်၍ ဧကရာဇ်မြို့တော်အပြင်ဘက်သို့ ထွက်ခွာသွားပါက ကောင်းကင်နဂါးရတနာကို ထိန်းချုပ်နိုင်စွမ်းမရှိတော့ဘဲ သူ၏အင်အားသည် သိသိသာသာ လျော့ကျသွားမည်ဖြစ်သည်။ ထိုသို့ဆိုလျှင် မည်သို့လျှင် တိုက်ခိုက်နိုင်မည်နည်း။ ယခုမူ ရန်သူများသည် လေးဘက်လေးတန်မှ ဝိုင်းဝန်းထိုးဖောက်လာနေခြင်းဖြစ်သည့်အတွက် တစ်ယောက်တည်းဖြင့် အနိုင်ယူနိုင်ရန်မှာ မဖြစ်နိုင်ပေ။

"ဘာမှ ဒါပေမဲ့လုပ်စရာမရှိဘူး... စိတ်ချပြီး ငါ့ကို လွှဲပေးထားလိုက်..." ယီထျန်းယွမ်က တည်ငြိမ်စွာ ပြောလိုက်သည်။ "မပြောပေမယ့် မင်းတို့ အင်အားဖြည့်သွားမယ်ဆိုရင် ဒါဟာ ရန်သူရဲ့ ဆင်ဖမ်းကျားဖယ်လှည့်စားမှုဖြစ်သွားနိုင်တယ်... ဒါကြောင့် မင်းတို့အားလုံး ဒီမှာ ကောင်းကောင်းမတ်မတ် နေရာစောင့်ထားပြီး ဒီနေရာကို ကာကွယ်ထားရင်ပဲ လုံလောက်ပြီ..."

အားလုံးသည် မှင်တက်မိသွားကြသည်။ ဤအချက်မှာ တကယ်ပင် ဖြစ်နိုင်ချေရှိသည်။

ယီထျန်းယွမ်သည် သူမတို့အား ထပ်မံစကားများပြောခွင့်မပေးဘဲ ခြေတစ်လှမ်းဖြင့် တစ်ချက်နင်းလိုက်ရင်း ရွှီးခနဲအသံတစ်ခုနှင့်အတူ ကောင်းကင်ယံထဲသို့ တိုးဝင် ပျောက်ကွယ်သွားသည်။ သူ၏အရှိန်သည် စိတ်ကူးထဲတွင်ပင် မထင်မှတ်နိုင်လောက်အောင် လျင်မြန်လှသည်။ သူမတို့အားလုံး မျက်လုံးအပြူးသားဖြင့် ကြည့်နေမိကြပြီး ဤအလျင်အမြန်သည် ယုံကြည်ရန်ပင် ခက်ခဲလှသည်။

"ဒါ... ဒါက အကြီးအကဲရဲ့ စွမ်းအားလား..."

တမန်တော်သည် မျက်လုံးအပြူးသားဖြင့် ကြည့်နေမိသည်။ ဇီယူဝေ့တို့လည်း ထိုနည်းတူ မှင်တက်မိသွားကြသည်။ ဤမျှတိုတောင်းသောအချိန်အတွင်း ယီထျန်းယွမ်သည် နောက်ထပ်အင်အားတစ်ဆင့် တက်လှမ်းပြီးသွားပြီလား။

သူမတို့သည် အတုအယောင်စိတ်ဝိညာဉ်နယ်ပယ်အဆင့်ရှိ ကျင့်စဉ်သမားများ၏ ပျံသန်းနိုင်စွမ်းကို မြင်တွေ့ဖူးခဲ့ဖူးသော်လည်း ယီထျန်းယွမ်၏အရှိန်သည် ၎င်းတို့၏အရှိန်ထက် ဆယ်ဆမက သာလွန်လှသည်။

ယီထျန်းယွမ်သည် ဖီးနစ်ငှက်ကိုပင် ဆင့်ခေါ်မထားခဲ့ပေ။ အကြောင်းရင်းမှာ ရိုးရှင်းလှသည်။ ဖီးနစ်ငှက်၏အရှိန်သည် သူ၏အရှိန်ထက် နှေးကွေးနေသည့်အတွက် အဘယ်ကြောင့် ဖီးနစ်ငှက်ကို ဆင့်ခေါ်ရမည်နည်း။

"ဖီးနစ်သွေးရိုးဗီဇ... ဖွင့်လိုက်..."

ထိုအခိုက်တွင် သူ၏ခန္ဓာကိုယ်တစ်ခုလုံးမှ တာအိုမီးလျှံများ ထွက်ပေါ်လာပြီး ဖီးနစ်အတောင်ပံများသည်လည်း တစ်ခုပြီးတစ်ခု ပေါ်ထွက်လာသည်။ သူ၏အရှိန်သည် တစ်ချက်တည်းတွင် ခုနစ်ဆမက မြင့်တက်သွားပြီး ဝှစ်ခနဲအသံတစ်ခုနှင့်အတူ လေထုကိုပင် ဖောက်ထွင်းသွားကာ မျက်စိတစ်မှိတ်အတွင်း မိုင်ရာချီအကွာအဝေးသို့ ရောက်ရှိသွားသည်။ ဤအရှိန်သည် ထိတ်လန့်ဖွယ်ရာ ဖြစ်လှသည်။

ထိုစဉ်အခါတွင် ကောင်းကင်နဂါးအင်ပါယာဘက်တွင်မူ အရာအားလုံး ပရမ်းပတာဖြစ်နေပြီဖြစ်သည်။ မြို့အများစုသည် ကျဆုံးသွားခဲ့ပြီဖြစ်ပြီး ယခင်အချိန်များထက် ပိုမိုဆိုးရွားလှသည်။ ယခင်က နဂါးဝန်ကြီးချုပ်လက်ထက်တွင် ရန်သူများသည် အခြားမြို့များကို သိမ်းပိုက်ရန်မလိုအပ်ဘဲ ဧကရာဇ်မြို့တော်ကိုသာ သိမ်းပိုက်ရန် လိုအပ်ခဲ့သည်။ အကြောင်းမှာ နဂါးဝန်ကြီးချုပ်သည် ဤအင်ပါယာကို အလုံးစုံထိန်းချုပ်လိုသူဖြစ်ပြီး မြို့များကို တစတစသိမ်းပိုက်ရင်း ချီတက်လာပါက ၎င်းတို့အင်အားများ များစွာကုန်ခမ်းသွားမည်ဖြစ်သည်။

သို့သော် ယခုမူ အင်ပါယာလေးခုသည် နယ်စပ်မြို့များမှ စတင်ကာ လေးဘက်လေးတန်မှ ဝိုင်းဝန်းသိမ်းပိုက်ရင်း ချီတက်လာနေသည်။ အင်ပါယာလေးခုသည် မိမိတို့၏ ဦးတည်ရာနယ်မြေမှ စတင်တိုက်ခိုက်လာပြီး နောက်ဆုံးတွင် ကောင်းကင်နဂါးဧကရာဇ်မြို့တော်တွင် စုဝေးကြမည်ဖြစ်သည်။ မည်သည့်အင်ပါယာက ပိုမိုလျင်မြန်စွာ ရောက်ရှိလာမည်ကိုမူ မသိရှိရသေးပေ။ သို့သော် အင်ပါယာလေးခုစလုံး ဤနေရာသို့ ရောက်ရှိလာသည့်အခါ ဆိုလျှင် ၎င်းတို့လမ်းကြောင်းပေါ်ရှိ မြို့အားလုံး ကျဆုံးသွားပြီဖြစ်သည်ဟု ပြောရပေမည်။

သူတို့သည် ကောင်းကင်နဂါးအင်ပါယာကို အပိုင်းပိုင်းဖျက်ဆီးကာ အကြွင်းအကျန်တစ်ခုမျှ မကျန်အောင် သိမ်းပိုက်လိုကြသည်။

ကောင်းကင်နဂါးဧကရာဇ်မြို့တော်အတွင်းရှိ နန်းတော်ခန်းမထဲတွင် ရန်ကျိရို့နှင့် ထျန်းလုံတို့သည် မျက်နှာများတင်းမာလျက်ရှိပြီး အောက်တွင် ဝန်ကြီးများအားလုံးလည်း မျက်နှာများတင်းမာလျက်ရှိကြသည်။ ဤသည်မှာ သေရေးရှင်ရေးအခိုက်အတန့်ဖြစ်ပြီး အင်ပါယာလေးခု၏ တိုက်ခိုက်မှုကို မည်သို့လျှင် ခုခံနိုင်မည်နည်း။

"ထျန်းယွမ်အိမ်တော်ကို အင်အားဖြည့်ကူညီဖို့ တမန်တော်တစ်ဦးကို စေလွှတ်ပြီးပြီ... မကြာခင်မှာ အင်အားဖြည့်တပ်တွေ ရောက်လာမယ်လို့ ယုံကြည်ပါတယ်..." ထျန်းလုံက နန်းမြင့်ပေါ်မှ လေးနက်သောအသံဖြင့် ပြောလိုက်ပြီး အောက်ရှိလူအုပ်ကို အနည်းငယ်စိတ်သက်သာရာရစေရန် ကြိုးစားလိုက်သည်။

"ထျန်းယွမ်အိမ်တော်တဲ့လား..."

အောက်ရှိလူအုပ်သည် ခေါင်းများကို ယမ်းလိုက်ကြပြီး မျက်ဝန်းများထဲတွင် မျှော်လင့်ချက်မဲ့မှုများဖြင့် ပြည့်နှက်နေသည်။ ထျန်းယွမ်အိမ်တော်ဆိုသည်မှာ အင်ပါယာအဆင့်ပင်မဟုတ်သည့် သာမန်အိမ်တော်တစ်ခုသာဖြစ်သည်။ ထိုသို့သောအိမ်တော်ကို အင်အားဖြည့်ရန်ခေါ်လာခြင်းသည် မည်သည့်အဓိပ္ပါယ်ရှိမည်နည်း။ ယခုမူ အင်ပါယာလေးခုက ပူးပေါင်းတိုက်ခိုက်နေသည့်အခါ ထျန်းယွမ်အိမ်တော်လေးတစ်ခုက မည်သည့်အခန်းကဏ္ဍမျှ ထမ်းဆောင်နိုင်မည်မဟုတ်ပေ။

"ကျွန်တော်တို့မှာ ယီအကြီးအကဲရှိတယ်မဟုတ်လား... သူပြန်လာရင် အနိုင်ရဖို့ အခွင့်အလမ်းရှိပါတယ်..." ဝန်ကြီးတစ်ဦးက ယီထျန်းယွမ်ကို သတိရလိုက်ပြီး သူ၏စွမ်းအားကို ကိုယ်တိုင်မျက်မြင်တွေ့ဖူးသူဖြစ်သည့်အတွက် သူ့အား ထောက်ခံလိုက်သည်။

"ယီအကြီးအကဲက ထူးချွန်တာမှန်ပါတယ်... ကောင်းကင်နဂါးရတနာကိုလည်း ထိန်းချုပ်နိုင်တယ်... ဒါပေမဲ့ အခုက အင်ပါယာလေးခုရဲ့ တိုက်ခိုက်မှုပဲလေ... ယုံမင်အင်ပါယာထက်တော့ အနည်းငယ်အားနည်းပေမယ့် အင်ပါယာလေးခုရဲ့ ပူးပေါင်းအင်အားဆိုရင် ယုံမင်အင်ပါယာတောင် မခံနိုင်ပါဘူး..."

"ဟုတ်တယ်... ဒီတစ်ခေါက်ဆို အင်ပါယာတွေရဲ့ ဘိုးဘေးအဆင့်ကျင့်စဉ်သမားတွေတောင် ထွက်လာတယ်လို့ ကြားတယ်... အတုအယောင်စိတ်ဝိညာဉ်နယ်ပယ် အထွဋ်အထိပ်ကျင့်စဉ်သမားတွေသာမက စိတ်ဝိညာဉ်ဘုရင်နယ်ပယ်ကျင့်စဉ်သမားတွေပါ ပါလာတယ်တဲ့... သခင်လေးလာရင်တောင် ဘာလုပ်နိုင်မှာလဲ... ဟူး... ကောင်းကင်နဂါးရတနာတောင် မကာကွယ်နိုင်တော့ဘူး..."

လူအုပ်သည် နက်နက်ရှိုင်းရှိုင်း သက်ပြင်းချကြပြီး မျက်ဝန်းများထဲတွင် မျှော်လင့်ချက်တစ်စက်မျှ မရှိတော့ပေ။ သူတို့သည် ယီထျန်းယွမ်ကို ယုံကြည်မှုမရှိသည်မဟုတ်သော်လည်း ရန်သူ၏အင်အားသည် အလွန်ကြီးမားလွန်းသဖြင့် မျှော်လင့်ချက်မဲ့သွားရခြင်းဖြစ်သည်။

ထျန်းလုံနှင့် ရန်ကျိရို့တို့မောင်နှမ နှစ်ဦးလည်း ထိုနည်းတူပင် နက်နက်ရှိုင်းရှိုင်း သက်ပြင်းချလိုက်ကြသည်။

"ယီညီငယ်... အင်အားဖြည့်ဖို့ မလာပါစေနဲ့တော့..."

ထျန်းလုံက ခေါင်းယမ်းလိုက်ပြီး ယီထျန်းယွမ်ကို အကူအညီတောင်းရန် လူစေလွှတ်ခဲ့ခြင်းသည် မတော်မတရားဖြစ်သွားပြီဟု ခံစားလိုက်ရသည်။

ဤသည်မှာ သေမလွဲသည့်အခြေအနေဖြစ်သည်။ ထိုသို့ဆိုလျှင် အင်အားဖြည့်လာရန် ခေါ်ဆောင်ခြင်းသည် မည်သည့်အဓိပ္ပါယ်ရှိမည်နည်း။

"အစ်ကို... ဒီတစ်ခေါက်တော့ ကောင်းကင်နဂါးအင်ပါယာကို ထိန်းသိမ်းထားနိုင်တော့မယ် မထင်တော့ဘူး..." ရန်ကျိရို့က ခါးသီးသောအပြုံးတစ်ခုဖြင့် ပြောလိုက်သည်။ ဤတစ်ကြိမ်တွင် သူမတို့သည် တကယ်ပင် ထိန်းသိမ်းထားနိုင်ရန် မဖြစ်နိုင်တော့ပေ။

"ဟုတ်တယ်..." ထျန်းလုံက သက်ပြင်းတစ်ချက်ချလိုက်ပြီး မျက်ဝန်းများထဲတွင် အေးစက်သောအလင်းတန်းတစ်ခုက ထွက်ပေါ်လာကာ လေးနက်စွာ ပြောလိုက်သည်။ "ဒါပေမယ့်လည်း သေရမယ်ဆိုရင်တောင် နောက်ဆုံးအချိန်ထိ တိုက်ပွဲဝင်သွားရမှာပဲ..."

"ဟုတ်တယ်..." ရန်ကျိရို့က ခေါင်းကို အားပြင်းစွာ ညိတ်လိုက်သည်။ ရလဒ်မည်သို့ဖြစ်စေကာမူ သူမတို့သည် နောက်ဆုံးအချိန်ထိ တိုက်ပွဲဝင်သွားမည်ဖြစ်သည်။

သူမသည် စကားပြောပြီးသည်နှင့် အထက်သို့ မော့ကြည့်လိုက်ပြီး သက်ပြင်းတစ်ချက်ချကာ ရေရွတ်လိုက်သည်။

"ယီအစ်ကို... နှုတ်ဆက်ပါတယ်..."

အခန်း (၅၆၈) ပြီးပါပြီ။