နတ်ဘုရားမျိုးနွယ်အရှင်လေးယောက်

"ငါ့ကို မနှောင့်ယှက်နဲ့၊ ငါ သူ့ကို အရင်စမ်းသပ်လိုက်မယ်"

အလင်းနတ်ဘုရားအရှင်က ရှေ့သို့ ခြေတစ်လှမ်းတိုးကာ လီဖူချန်းကို အထင်သေးစွာ ကြည့်လိုက်တယ်။

"ကောင်းပါပြီ"

ရေခဲမီးနတ်ဘုရားအရှင်နဲ့ဆည်းဆာနတ်ဘုရားအရှင်တို့က လီဖူချန်း ထွက်ပြေးတာကို တားဖို့ ဘယ်နဲ့ညာမှာ နေရာယူလိုက်တယ်။ မီးသူ‌တော်ကောင်းနတ်ဘုရားအရှင်ကတော့ လက်ပိုက်လျက် တည်ငြိမ်စွာ ကြည့်နေတယ်။

"အလင်းနတ်ဘုရားပိုင်နက်"

"မူလအဆုံးစွန်းဓားတာအိုစကြာဠာ"

သူတို့နှစ်ယောက်က သူတို့ရဲ့နတ်ဘုရားပိုင်နက်နဲ့ဓားတာအိုစကြာဝဠာအသီးသီးကို ပေါက်ကွဲထွက်စေလိုက်တယ်။

ဝုန်း ဝုန်း ဝုန်း.....

နတ်ဘုရားပိုင်နက်နဲ့ဓားတာအိုစကြာဝဠာတွေ ပွတ်တိုက်သွားပြီး ကမ္ဘာကြီးက အရောင်တလက်လက်ဖြစ်သွားတယ်။ စကြာဝဠာဥပဒေသတွေ ပေါက်ကွဲထွက်သွားပြီး ဓားတာအိုဥပဒေသနဲ့အလင်းတာအိုဥပဒေသတို့သာ ယှဉ်ပြိုင်လျက် ကျန်ရှိတော့တယ်။

"သူက ပိုပိုသန်မာလာတာပဲ" ဆည်းဆာနတ်ဘုရားအရှင်ရဲ့မျက်လုံးတွေက ကျုံ့သွားတယ်။ အရင်က လီဖူချန်းရဲ့ဓားတာအိုစကြာဝဠာက သူ့ရဲ့ဆည်းဆာနတ်ဘုရားပိုင်နက်ထက် ပိုနိမ့်ကျတာကို သူက မှတ်မိနေတယ်။ ဒီတစ်ကြိမ်မှာတော့ လီဖူချန်းရဲ့ဓားတာအိုစကြာဝဠာက သူ့ကို ကျော်ဖြတ်သွားပြီး အလင်းနတ်ဘုရားအရှင်ရဲ့အလင်းနတ်ဘုရားပိုင်နက်နဲ့တောင် ညီမျှနေပြီ။ ဒီလီဖူချန်းရဲ့တိုးတက်မှုအရှိန်က တကယ်ကို မယုံနိုင်စရာပါပဲ။

ကံကောင်းတာကတော့ အလင်းနတ်ဘုရားပိုင်နက်က သိသိသာသာပိုသန်မာပြီး လီဖူချန်းရဲ့ဓားတာအိုစကြာဝဠာကို ဖိနှိပ်နေတာပဲ။

"မင်းက အရှင်သတ်မှတ်ချက်ရဲ့နံပါတ်တစ်ဖြစ်နေတာ အံ့ဩစရာမရှိဘူးပဲ"

လီဖူချန်းက အံ့အားသင့်ခြင်းမရှိပါဘူး။ တကယ်တော့ သူ့ရဲ့ကျင့်ကြံခြင်းအချိန်က တိုတောင်းပြီး သူ့မှာ ကမ္ဘာသစ်သီးရှိရင်တောင် နှစ်ပေါင်းမရေမတွက်များစွာကျင့်ကြံခဲ့တဲ့အလင်းနတ်ဘုရားအရှင်ကို ကျော်ဖြတ်ဖို့မဖြစ်နိုင်ဘူး။

"အလင်းနတ်ဘုရားလက်ဝါး...."

အလင်းနတ်ဘုရားအရှင်က လီဖူချန်းကို ခုတ်ပိုင်းလိုက်တယ်။ တောက်ပစွာလင်းလက်နေတဲ့နေအလင်းရောင်တစ်ခုပမာ ပြင်းထန်တဲ့အလင်းဖြာထွက်ခြင်းတစ်ခုဖြစ်လာတယ်။

ဒီလက်ဝါးက အလွန်အားကောင်းတာကို လီဖူချန်းက မြင်နိုင်ပြီး သူက မူလအဆုံးစွန်းဓားပညာရဲ့စတုတ္ထကွက်ဖြစ်တဲ့မူလပြန်သွားဓားပြောင်းလဲခြင်းကို တိုက်ရိုက်ဖော်ထုတ်လိုက်တယ်။

ဝုန်း......

လီဖူချန်းက သတ်ဖြတ်ကွက်တစ်ခုကို ထုတ်ဖော်ခဲ့ပေမယ့် သူက အလင်းနတ်ဘုရားအရှင်ထက် နိမ့်ကျနေသေးသည်ဖြစ်ရကာ လွင့်ထွက်သွားရတယ်။

"အနန္တဓားခန္ဓာကိုယ်"

ရွေးချယ်စရာမရှိဘဲ လီဖူချန်းက အနန္တဓားခန္ဓာကိုယ်လျှို့ဝှက်နည်းစနစ်ကို အသက်သွင်းလိုက်ရပြီး ခွန်အားနှစ်ဆပေါက်ကွဲထွက်စေလိုက်တယ်။

"မင်းက ငါ့လက်ဝါးကို ကာကွယ်နိုင်တာဆိုတော့ မဆိုးဘူးပဲ။ ငါ့ရဲ့လက်ဝါးရိုက်ချက်နောက်တစ်ချက်ကို ခံယူကြည့်စမ်း၊ မဟာအလင်းနတ်ဘုရားလက်ဝါး"

အလင်းနတ်ဘုရားအရှင်က လက်ဝါးနှစ်ဖက်လုံးနဲ့ လီဖူချန်းကို ရိုက်ချလိုက်တယ်။ ပြင်းထန်တဲ့အလင်းဥပဒေသတွေက ယှက်နွယ်ပေါင်းစည်းကာ ကြောက်စရာကောင်းတဲ့စွမ်းအားတစ်ခုကို ထွက်ပေါ်လာစေတယ်။

"အချိန်ကျပြီ"

လီဖူချန်းက မူလပြန်သွားဓားပြောင်းလဲခြင်းကိုပဲ ထပ်မံဖော်ထုတ်လိုက်တယ်။

ဝုန်း......

ဒီတစ်ခါမှာတော့ သရေပွဲဖြစ်တယ်။

"စိတ်ဝင်စားစရာပဲ" လီဖူချန်းက စွမ်းအားပေါက်ကွဲရေးလျှို့ဝှက်နည်းစနစ်တစ်ခုကို အသုံးပြုခဲ့မှန်း အလင်းနတ်ဘုရားအရှင်က မြင်နိုင်တယ်။ ဒီလျှို့ဝှက်နည်းစနစ်က လီဖူချန်းရဲ့စွမ်းအားကို အဆဒါဇင်ကျော်တိုးစေခဲ့ပုံပဲ။ ဒီအတိုင်းသာဆက်သွားရင် လီဖူချန်းက သေချာပေါက် စွမ်းအားအရင်ကုန်ခန်းရလိမ့်မယ်။

ဒါပေမယ့် ဒါက သူ့ရဲ့ပုံစံမဟုတ်ဘူး။

သူက အလင်းနတ်ဘုရားအရှင်ဖြစ်ပြီး သူလိုချင်တာက ရန်သူကို ထိပ်တိုက်အနိုင်ယူဖို့ပဲ။

သူက သူ့လက်ဝါးကို ဖွင့်လိုက်တယ်၊ အလင်းစိတ်ဝိညာဥ်ပုတီးစေ့က လွင့်မျောလာတယ်။ ကြီးမားတဲ့အလင်းရင်းမြစ်အဆီအနှစ်တွေက အလင်းနတ်ဘုရားအရှင်ရဲ့ခန္ဓာကိုယ်ထဲသို့ တိုးဝင်လာတယ်။ တစ်ချိန်တည်းမှာပဲ အလင်းနတ်ဘုရားအရှင်ရဲ့အရှိန်အဝါက စတင်တည်ငြိမ်လာတယ်။

"အဆင့်နိမ့်စကြာဝဠာရတနာလား"

လီဖူချန်းက မျက်မှောင်ကြုတ်လိုက်တယ်။ ရန်သူမှာ တိုက်ခိုက်ရေးခွန်အားကိုတိုးစေတဲ့အဆင့်နိမ့်စကြာဝဠာရတနာတစ်ခုရှိပေမယ့် သူ့မှာ တစ်ခုမှ မရှိဘူး။

"အလင်းနတ်ဘုရားလက်ဝါး"

အလင်းနတ်ဘုရားအရှင်က လီဖူချန်းထံ ခုတ်ပိုင်းလိုက်တယ်။

"အကန့်အသတ်မဲ့ဓားပင်လယ်"

လီဖူချန်းက ဓားပင်လယ်တစ်ခုကို ထုတ်လွှတ်ကာ သူ့ကိုယ်သူကာကွယ်လိုက်တယ်။

‌ဖြောက်.......

ဓားပင်လယ်က ဆုတ်ပြဲသွားပြီး ကျန်ရှိနေတဲ့လက်ဝါးအားက လီဖူချန်းဆီ ရောက်ရှိလာပါသေးတယ်။

"အံ့အားသင့်စရာပဲ"

လီဖူချန်းရဲ့ပုံရိပ်က ပေါက်ကွဲထွက်လာတယ်။

သူ့ရဲ့ဓားပင်လယ်မိုးကုတ်စက်ဝိုင်းက ဓားတာအိုစကြာဝဠာတစ်ခုနဲ့ဓားကွက်တစ်ခုတို့ ပေါင်းစပ်ခြင်းနဲ့ ညီမျှတယ်။ အခုတော့ ၎င်းကို တိုက်ရိုက်ဆုတ်ဖြဲနိုင်ခဲ့တာပဲ။

"အထွတ်အထိပ်ပြိုင်ဘက်ကင်းခန္ဓာကိုယ်အပြင်အားအရှင်တစ်ယောက်လား"

လီဖူချန်းက တိုက်ခိုက်မှုတွေကို အလွန်ခံနိုင်ရည်ရှိတယ်လို့ အလင်းနတ်ဘုရားအရှင်က ဆည်းဆာနတ်ဘုရားအရှင်မှ ကြားသိထားတယ်။ တိကျတဲ့တိုက်ခိုက်ရေးအဆင့်တစ်ခုမရှိရင် လီဖူချန်းရဲ့ခုခံမှုကို ချိူးဖြတ်နိုင်မှာမဟုတ်ဘူး။

"ဒါဆိုလဲ မင်း ဘယ်လောက်ထိ ခံနိုင်မလဲကို ကြည့်ရတာပေါ့၊ မဟာအလင်းနတ်ဘုရားလက်ဝါး"

အလင်းလက်ဝါးအားက လီဖူချန်းရဲ့ခန္ဓာကိုယ်ကို ရက်ရက်စက်စက်တိုက်ခိုက်လာတယ်။ ကြယ်သန်းတစ်ရာက တစ်ချိန်တည်းမှာ ပေါက်ကွဲနေသလို ခံစားရတယ်။

"အံ့အားသင့်စရာပဲ၊ သူက ငါ့ကပ်ဘေးစွမ်းအားရဲ့တစ်ဆယ်ရာခိုင်နှုန်းကို လျော့ကျစေခဲ့တာပဲ"

လီဖူချန်းက ဘာမှမဖြစ်ခဲ့ပေမယ့် စောစောကတိုက်ခိုက်မှုအတွင်း သူ့ကပ်ဘေးစွမ်းအားရဲ့တစ်ဆယ်ရာခိုင်နှုန်းလျော့ကျသွားတာကို သူသိတယ်။

"ဘယ်လိုတောင်သန်မာတဲ့ခံစစ်လဲ"

ရေခဲမီးနတ်ဘုရားအရှင်နဲ့အလင်းနတ်ဘုရားအရှင်တို့ရဲ့အမူအရာက ပြောင်းလဲသွားတယ်။ အလင်းနတ်ဘုရားအရှင်ရဲ့တိုက်ခိုက်ရေးစွမ်းအားဘယ်လောက်တောက်ကြောက်ဖို့ကောင်းတာကို သူတို့က ကောင်းကောင်းသိတယ်။ မူလဘူတမြေပြင်မှာ ရှေးဟောင်းဆန်းကြယ်နဂါးကသာ အလင်းနတ်ဘုရားအရှင်ရဲ့တိုက်ခိုက်မှုကို ဒဏ်ရာအနာတရတစ်ခုမှမရှိဘဲ ခုခံနိုင်တယ်။

"အကန့်အသတ်မဲ့အလင်း"

အလင်းနတ်ဘုရားအရှင်ရဲ့မျက်လုံးတွေက ပိုပိုပြီးအေးစက်လာတယ်၊ သူက လီဖူချန်းကို အထင်သေးမိတယ်ဆိုတာ ဝန်ခံရမှာပဲ။

ဒါပေမယ့် ကိစ္စမရှိဘူး၊ အရေးကြီးဆုံးက နောက်ဆုံးမှာ ဘယ်သူက ရယ်မောနိုင်မယ်ဆိုတာပါပဲ။

လက်ဝါးရိုက်ချက်ကို ထုတ်ဖော်လိုက်တဲ့အခါ အလင်းနတ်ဘုရားအရှင်က အလင်းရင်းမြစ်တစ်ခုအဖြစ်သို့ ပြောင်းသွားတယ်။ အကန့်အသတ်မဲ့အလင်းစွမ်းအားတွေက လီဖူချန်းကို တိုက်ခိုက်လာတယ်။ ပေါက်ကွဲမှုစွမ်းအားက အစကနေအဆုံးအထိ ပိုပိုတိုးလာတယ်။ ပေါက်ကွဲမှုစွမ်းအားက အစမှာ ၁ဆိုရင် မကြာမီမှာပဲ ၅ဖြစ်လာပြီး ပြီးနောက် ၁၀၊ လက်ရှိမှာတော့ ၂၀အထိ တက်လာတယ်။

ဒါပေမယ့် ဒီအကွက်က ထိတ်လန့်တုန်လှုပ်စရာစွမ်းအားပမာဏကို ကုန်ဆုံးစေခဲ့တယ်။ ပေါက်ကွဲမှုစွမ်းအားက အကန့်အသတ်မဲ့သလို အလင်းနတ်ဘုရားအရှင်ရဲ့သက်စောင့်စွမ်းအားကလည်း ရက်အနည်းငယ်သာ ကျန်တော့တယ်။

ဒါပေမယ့် ဒီအကွက်က ထိတ်လန့်တုန်လှုပ်စရာစွမ်းအားပမာဏကို ကုန်ဆုံးစေခဲ့တယ်။ ပေါက်ကွဲမှုစွမ်းအားက အကန့်အသတ်မဲ့သလို အလင်းနတ်ဘုရားအရှင်ရဲ့သက်စောင့်စွမ်းအားကလည်း ရက်အနည်းငယ်သာ ကျန်တော့တယ်။

"ဟမ့်၊ ငါတို့နတ်ဘုရားမျိုးနွယ်ရဲ့စွမ်းအားက နက္ခတ်တာရာဧရာမသားရဲတွေနဲ့‌တောင် နှိုင်းယှဉ်နိုင်တယ်။ မင်း အကြာကြီးခံမယ်လို့ ငါ မယုံကြည်ဘူး" အလင်းနတ်ဘုရားအရှင်က သူ့ရဲ့သက်စောင့်စွမ်းအားအပေါ် အလွန်ယုံကြည်ချက်ရှိတယ်။

၂၀ရာခိုင်နှုန်း၊ ၃၀ရာခိုင်နှုန်း၊ ၄၀ရာခိုင်နှုန်း၊ ၅၀ရာခိုင်နှုန်း......

လီဖူချန်းရဲ့ကပ်ဘေးစွမ်းအားက ရေစီးကြောင်းပမာ တစ်ဝက်ကျော် လျင်မြန်စွာ ကုန်ဆုံးလာတယ်။

"ဒြပ်စင်ငါးခုအကာအကွယ်"

လီဖူချန်းက ဒြပ်စင်ငါးခု‌ကောင်းကင်ဘုံပျက်သုန်းခြင်းကျောက်တုံးကို ယူထုတ်လိုက်ပြီး ဖရိုဖရဲဒြပ်စင်ငါးခုရင်းမြစ်အဆီအနှစ်ကို အသက်သွင်းလိုက်တယ်။ ရောင်စုံငါးခုဥခွံက လီဖူချန်းကို ကာကွယ်လိုက်တယ်။

"အဆင့်နိမ့်စကြာဝဠာရတနာလား"

အလင်းနတ်ဘုရားအရှင်က မျက်မှောင်ကြုတ်လိုက်တယ်။ အကြိုနတ်ဘုရားနယ်ပယ်အောက်တစ်‌ယောက်ယောက်မှာ စကြာဝဠာရတနာတစ်ခုရှိတာမရှိတာက ကြိီးမားတဲ့ကွာခြားချက်တစ်ခုကို ဖြစ်စေလိမ့်မယ်။ ဥပမာအားဖြင့် အထွတ်အထိပ်ပြိုင်ဘက်ကင်းအရှင်တစ်ယောက်မှာ စကြာဝဠာရတနာတစ်ခုရှိရင် သူ့ခွန်အားက အထွတ်အထိပ်ပြိုင်ဘက်ကင်းအရှင်ထက် တစ်ဆင့်တိုးမြင့်လာလိမ့်မယ်။ အားကောင်းတဲ့ပြိုင်ဘက်ကင်းအရှင်တစ်‌ယောက်မှာ စကြာဝဠာရတနာတစ်ခုရှိရင် သူ့ခွန်အားက အထွတ်အထိပ်ပြိုင်ဘက်ကင်းအရှင်နဲ့ညီမျှမယ်ဒါမှမဟုတ် အနည်းငယ်ပိုမြင့်မားပေလိမ့်မယ်။ ဒါပေမယ့် စကြာဝဠာရတနာက တိုက်ခိုက်ရေးခွန်အားကို တိုးမြင့်စေနိုင်တဲ့စကြာဝဠာရတနာမျိုးဖြစ်ရမယ်။ အဲဒါက ထောက်ပံ့ရေးအမျိုးအစားစကြာဝဠာရတနာတစ်ခုဆိုရင် အသုံးဝင်မှာမဟုတ်ဘူး။

ဝုန်း ဝုန်း ဝုန်း......

အကန့်အသတ်မဲ့အလင်းအားက ရောင်စုံငါးခုဥခွံအပေါ်ကို ပေါက်ကွဲထွက်လာပြီး ၎င်းကို အနည်းငယ်တုန်ခါနေစေတယ်။

ဒါလည်းပဲ စကြာဝဠာရတနာတစ်ခုပဲလေ။ ဒါပေမယ့် နောက်ကျိရေဘိုးဘေးနဲ့လီဖူချန်းတို့ရဲ့လက်ထဲမှာတော့ ဒြပ်စင်ငါးခု‌ကောင်းကင်ဘုံပျက်သုန်းခြင်းကျောက်တုံးရဲ့သက်ရောက်မှုက ကွဲပြားတယ်။

လီဖူချန်းရဲ့စွမ်းအားက နောက်ကျိရေဘိုးဘေးထက် ပိုသန်မာတယ်၊ ဒါကြောင့် သူက ဖရိုဖရဲဒြပ်စင်ငါးခုရင်းမြစ်အဆီအနှစ်တွေကို ပိုအသက်သွင်းနိုင်တယ်။

ဒါက လီဖူချန်းက ဓားတာအိုစွမ်းအားကို ကျွမ်းကျင်လို့ပဲ။ သူက ဒြပ်စင်ငါးခုစွမ်းအားတွေထဲကတစ်ခုကိုပါ ကျွမ်းကျင်ရင် ဖရိုဖရဲဒြပ်စင်ငါးခုရင်းမြစ်အဆီအနှစ်ရဲ့ပမာဏက ဆယ်ဆဒါမှမဟုတ်အဆဒါဇင်အနည်းငယ်ပိုတိုးလာလိမ့်မယ်။

ဖြောက်......

အချိန်တစ်ခုကြာပြီးနောက် ငါးရောင်စုံဥခွံက ကြေမွသွားတယ်။ ထိုအချိန်မှာ အလင်းနတ်ဘုရားအရှင်နဲ့အတူပေါက်ကွဲထွက်လာတဲ့အလင်းစွမ်းအားက အလွန်အမင်းကြောက်စရာကောင်းတဲ့အဆင့်ကို ရောက်ရှိနေပါပြီ။

၇၀ရာခိုင်နှုန်း၊ ၈၀ရာခိုင်နှုန်း၊ ၉၀ရာခိုင်နှုန်း၊ ၁၀၀ရာခိုင်နှုန်း......

ဝုန်း......

လီဖူချန်းက ဒဏ်ရာရသွားတယ်။

ကပ်ဘေးမသေမျိုးခန္ဓာကိုယ်ကို ချိူးဖြတ်ပြီးတာနဲ့ လီဖူချန်းရဲ့ခန္ဓာကိုယ်မှာ ဒဏ်ရာတွေ စတင်ထွက်ပေါ်လာတယ်။

"ခံစစ်က ကျိုးပျက်သွားပြီ၊ နောက်တစ်ဆင့်က မင်း သေဖို့ပဲ"

အလင်းနတ်ဘုရားအရှင်က နှာခေါင်းရှုံ့လိုက်တယ်။

"ငါ ဒါကို စောင့်နေတာ"

သူ့ရဲ့ခန္ဓာကိုယ်ကို ပြန်ပြုပြင်ဖို့ လီဖူချန်းက သူ့ရဲ့ကိုယ်ပိုင်စွမ်းအားကို အသုံးမပြုခဲ့ပါဘူး။ သူ့ခန္ဓာကိုယ်ကို ပြုပြင်ဖို့ အသက်သစ်ပင်က အသက်စွမ်းအားကို အလိုအလျောက်ထုတ်လွှတ်လာတယ်။

လက်ရှိအချိန်မှာ လီဖူချန်းရဲ့ခန္ဓာကိုယ်ထဲရှိအသက်သစ်ပင်က မိုင်ဆယ်သန်းအမြင့်ရှိနေပြီ။ မိုင်ဆယ်သန်းမြင့်တဲ့နက္ခတ်တာရာဧရာမသားရဲတစ်ကောင်မှာ ကြောက်စရာကောင်းတဲ့အသက်စွမ်းအားပါဝင်တယ်။ နက္ခတ်တာရာဧရာမသားရဲနဲ့နှိုင်းယှဉ်ရင် အသက်သစ်ပင်မှာပါဝင်တဲ့အသက်စွမ်းအားက နက္ခတ်တာရာဧရာမသားရဲတွေထက်  အနည်းဆုံးအဆတစ်ရာဒါမှမဟုတ်အဆတစ်ထောင်ပိုတယ်။

အလင်းနတ်ဘုရားအရှင်က အသက်သစ်ပင်ရဲ့အသက်စွမ်းအားကို ကုန်ခန်းစေနိုင်မယ်လို့တော့ လီဖူချန်းက မတွေးထားပါဘူး။

နှစ်နာရီ၊ လေးနာရီ၊ ခြောက်နာရီ.....

တစ်ရက်၊ တစ်ရက်နဲ့တစ်ဝက်.....

တစ်ခုခုမှားနေသလားလို့ အလင်းနတ်ဘုရားအရှင်က တဖြည်းဖြည်းခံစားမိလာတယ်။

လီဖူချန်းရဲ့စွမ်းအားဘယ်လောက်ပဲအားကောင်းကောင်း၊ အခုလောက်ဆို ကုန်ဆုံးသင့်ပါပြီ။

"ကြည့်ရတာ သူ့မှာ အခြားစကြာဝဠာရတနာတွောရှိပုံပဲ၊ သူတို့က အသက်အမျိုးအစားစကြာဝဠာရတနာတွေပဲဖြစ်ရမယ်"

အလင်းနတ်ဘုရားအရှင်ရဲ့မျက်နှာက ရုပ်ဆိုးသွားတယ်။

"အတူတူတိုက်ကြရအောင်"

ရေခဲမီးနတ်ဘုရားအရှင်က အလင်းနတ်ဘုရားရဲ့အကျပ်အတည်းကို မြင်လိုက်ရပြီး သူ့ရဲ့ရေခဲမီးနတ်ဘုရားပိုင်နက်နဲ့အတူ ချက်ချင်းဖိနှိပ်လာတယ်။ တစ်ချိန်တည်းမှာ ဆည်းဆာနတ်ဘုရားအရှင်ကလည်း သူ့ရဲ့ဆည်းဆာနတ်ဘုရားပိုင်နက်ကို ပေါက်ကွဲထွက်စေလိုက်တယ်။

နတ်ဘုရားမျိုးနွယ်အရှင်သုံးယောက်ရဲ့ဖိနှိပ်မှုအောက်မှာ လီဖူချန်းရဲ့ဓားတာအိုစကြာဝဠာကို ပေအနည်းငယ်အရွယ်အစားအထိ ဖိနှိပ်သွားခဲ့တယ်။

"မီးနတ်ဘုရားပိုင်နက်"

အခြားနတ်ဘုရားပိုင်နက်သုံးခုမှာ အဆုံးမဲ့ဖိအားတွေ ပါဝင်တယ်ဆိုရင် မီးသူတော်ကောင်းနတ်ဘုရားအရှင်ရဲ့မီးနတ်ဘုရားပိုင်နက်မှာ အဆုံးမဲ့ဖျက်ဆီးခြင်းစွမ်းအားတစ်ခုပါဝင်တယ်။ ထိတွေ့မှုတစ်ခုက လီဖူချန်းရဲ့ဓားတာအိုစကြာဝဠာကို ပြိုလဲပျက်ဆီးသွားစေတယ်။

"မီးသတ်ဖြတ်ခြင်းလက်သီး"

ပြီးနောက် ချက်ချင်းပဲ ရဲရဲတောက်လက်သီးတစ်ခုက လီဖူချန်းရဲ့ခန္ဓာကိုယ်အပေါ် ကျရောက်လာတယ်။

ဝုန်း.....

လီဖူချန်းရဲ့ရင်ဘက်က လောင်ကျွမ်းသွားပြီး သူ့ရဲ့ရင်ညွန့်ရိုးက လုံးဝပျက်ဆီးသွားတယ်။

"သူက သေချာပေါက် အကြိုနတ်ဘုရားနယ်မြေကပဲ ဖြစ်ရမယ်။ ဒါ့အပြင် သူက မီးတာအိုအကြိုနတ်ဘုရားအသုံးအဆောင်ပစ္စည်းအစအနတစ်ခုနဲ့ ပေါင်းစပ်ထားတာပဲဖြစ်ရမယ်"

လီဖူချန်းရဲ့မျက်နှာက မကောင်းတော့ပါဘူး။

တစ်ဖက်လူရဲ့သာမန်ကာလျှံကာလက်သီးတစ်ချက်က အလင်းနတ်ဘုရားအရှင်ကို ကျော်လွန်သွားတယ်။ ဒါ့ပြင် အားက ပိုပြီးစုစည်းသိပ်သည်းပြီး ဖျက်ဆီးခြင်းစွမ်းအားတွေ ပိုများတယ်။

"ကံကောင်းတာက ငါ့မှာ အဆင့်မြင့်စကြာဝဠရတနာအသက်သစ်ပင်ရှိလို့ပဲ"

လီဖူချန်းက ပျော်ရွှင်သွားတယ်။

အသက်သစ်ပင်သာမရှိရင် သူက ဖရိုဖရဲမီးကြာပန်းကို ဖော်ထုတ်နေရလောက်ပြီ။

"နတ်ဓားတည်နေရာရွှေ့ပြောင်းခြင်း"

လီဖူချန်းက ထွက်ပြေးဖို့ ကြိုးစားခဲ့ပေမယ့် နတ်ဘုရားပိုင်နက်လေးခုရဲ့ဖိနှိပ်မှုအောက်မှာ သူ့ရဲ့နတ်ဓားတည်နေရာရွှေ့ပြောင်းခြင်းက လုံးဝအသုံးမဝင်ဘူးဖြစ်နေတယ်။

"ငါ ဒီလိုပဲ အချိန်ဖြုန်းနေလို့မဖြစ်ဘူး"

လီဖူချန်းက လက်ရှိအနေအထားအပေါ် မကျေနပ်နိုင်ပါဘူး။

"ဓားအရိုးကျောက်ဖြစ်ရုပ်ကြွင်း၊ ကြေမွစမ်း"

ရွေးချယ်စရာမရှိဘဲ လီဖူချန်းက ထူးကဲအဆင့်အသုံးအဆောင်ပစ္စည်းတစ်ခုဖြစ်တဲ့ဓားအရိုးကျောက်ဖြစ်ရုပ်ကြွင်းကို ပေါက်ကွဲစေလိုက်တယ်။ နောက်အခိုက်အတန်မှာ ကြောက်စရာကောင်းတဲ့ဓားတာအိုရင်းမြစ်စွမ်းအားက လီဖူချန်းရဲ့ခန္ဓာကိုယ်ထဲကို တိုးဝင်လာပြီး လီဖူချန်းရဲ့ချီတည်ရှိမှုကို တည်ငြိမ်လာစေတယ်။

"ချိုးဖြတ်ချင်နေတာလား၊ အိမ်မက်မက်နေ၊ မီးလျှံဖျက်ဆီးခြင်းလက်သီး"

ရုတ်တရက် မီး‌သူတော်ကောင်းနတ်ဘုရားအရှင်ရဲ့ခန္ဓာကိုယ်က အဖြူရောင်မီးလျှံတွေနဲ့ ပြည့်လျှံလာပြီး လီဖူချန်းထံ လက်သီးတစ်ချက်ထုတ်ဖော်လိုက်တယ်။

ဝုန်း ဝုန်း ဝုန်း.......

လီဖူချန်းက ထူးကဲအဆင့်အသုံးအဆောင်ပစ္စည်းတစ်ခုကို ပေါက်ကွဲထွက်ထားစေပေမယ့် သူက မီးသူတော်ကောင်းနတ်ဘုရားအရှင်နဲ့ ရင်ဆိုင်ရမှာ အောက်စည်းမှာရှိနေတုန်းပဲ။ သူက ပြန်တိုက်ဖို့ခွန်အားတောင် မရှိဘူး။

"ထူးကဲအဆင့်အသုံးအဆောင်ပစ္စည်းတွေကတောင် အသုံးမဝင်ဘူးလား"

သူ့မှာ နောက်ထပ်ရှိပေမယ့် လီဖူချန်းက ထူးကဲအဆင့်အသုံးအဆောင်ပစ္စည်းတွေကို ထပ်ပြီးမဖောက်ခွဲတော့ဘူး။

"ဖရိုဖရဲမီးကြာပန်းကိုပဲ ဖော်ထုတ်ရမယ့်ပုံပဲ"

ဝုန်း.......

ဖရိုဖရဲမီးကြာပန်းထွက်ပေါ်လာတာနဲ့ မီးသူတော်ကောင်းနတ်ဘုရားအရှင်နဲ့အခြားသူတွေရဲ့နတ်ဘုရားပိုင်နက်တွေက လောင်ကျွမ်းလာတယ်။

"အလယ်အဆင့်စကြာဝဠာရတနာဖရိုဖရဲမီးကြာပန်းလား"

မီးသူတော်ကောင်းနတ်ဘုရားအရှင်ရဲ့မျက်လုံးတွေက အံ့ဩမှင်တက်ခြင်းတွေ ဖြစ်ပေါ်လာတယ်။

သူက မီးတာအိုကို ကျင့်ကြံပြီး ဖရိုဖရဲမီးကြာပန်းက မီးတာအိုအကြိုနတ်ဘုရားအသုံးအဆောင်ပစ္စည်းအောက်သာ နိမ့်ကျတယ်။ ဖရိုဖရဲမီးကြာပန်းနဲ့ဆိုရင် သူ့ခွန်အားက အဆများစွာ တိုးလာပါလိမ့်မယ်။ ပြီးရင်တော့ အကြိုနတ်ဘုရားနယ်မြေမှာ သူလုပ်ချင်တာ ဘာမဆို ပြုလုပ်နိုင်လာလိမ့်မယ်။ အကြိုနတ်ဘုရားစစ်မြေပြင်ကို ဝင်ရောက်ပြီးနောက် သူ့မှာ အကြိုနတ်ဘုရားအသုံးအဆောင်ပစ္စည်းတစ်ခုကိုရရှိဖို့ ကြီးမားတဲ့အခွင့်အလမ်းတစ်ခု ရှိလာပါလိမ့်မယ်။

ဖရိုဖရဲမီးကြာပန်းကို အရယူဖို့ သူက ဆုံးဖြတ်ထားတယ်။

"သူ့မှာ အကြိုနတ်ဘုရားအသုံးအဆောင်ပစ္စည်းတွေ ဘယ်လောက်တောင်ရှိတာလဲ"

ဆည်းဆာနတ်ဘုရားအရှင်နဲ့အခြားသူတွေက အလွန်အံ့အားသင့်သွားတယ်။

သူ့ခန္ဓာကိုယ်ပေါ်မှာ စကြာဝဠာရတနာတစ်ခုဒါမှမဟုတ်နှစ်ခုရှိတဲ့အထွတ်အထိပ်ပြိုင်ဘက်ကင်းအရှင်တစ်ယောက်က အလွန်အမင်းကြွယ်ဝတယ်။  လီဖူချန်းက စကြာဝဠာရတနာသုံးခုတောင် ဖော်ထုတ်ခဲ့တာပဲ၊ သူတို့က ဘယ်လိုလုပ်ပြီး အံ့အားမသင့်ပဲနေရမှာလဲ။

ဒါ့ပြင် စကြာဝဠာရတနာသုံးခုထဲကတစ်ခုက အလယ်ဆင့်စကြာဝဠာရတနာတစ်ခုဖြစ်နေတယ်။

အလယ်ဆင့်စကြာဝဠာရတနာတစ်ခုက အဆင့်နိမ့်စကြာဝဠာရတနာဆယ်ခုဒါမှမဟုတ်ဒါဇင်ကျော် အနည်းဆုံးထိုက်တန်တယ်ဆိုတာကို သိရမယ်။