မိုက်မဲသူများလား
Vol. 39 Ch. 572
“ယီညီငယ်...”
“ယီအစ်ကို...”
ထျန်းလုံတို့သည် ယီထျန်းယွမ်ကို မြင်လိုက်ရသောအခါ မှင်တက်မိသွားကြသည်။ သူတို့ထင်ထားသည်မှာ ယီထျန်းယွမ်သည် ပြန်လာရန် ဖြစ်နိုင်ချေမရှိဟု ယူဆထားခဲ့သည်။ ယခင်က သူတို့ရရှိခဲ့သော သတင်းအရ ယီထျန်းယွမ်သည် ယုံမင်ဘုံသို့ သွားရောက်ခဲ့သည်ဖြစ်ပြီး သူတို့တွင် ယုံမင်ဘုံသို့ ဆင်းသွားကာ သတင်းပို့ရန် နည်းလမ်းမရှိခဲ့ပေ။
သို့ရာတွင် ဤအန္တရာယ်ကြီးမားသော အခိုက်အတန့်တွင် ယီထျန်းယွမ်သည် ရုတ်တရက် ပေါ်ထွက်လာခဲ့သည်။ သူတို့၏ နှလုံးသားထဲတွင် ဝမ်းသာမှုအနည်းငယ်ပေါက်ဖွားလာသော်လည်း မကြာမီပင် ထိုဝမ်းသာမှုသည် မှေးမှိန်သွားသည်။ ယီထျန်းယွမ်ပြန်လာသည်ဆိုသော်လည်း ဤသည်မှာ အလွန်အန္တရာယ်များသည်မဟုတ်လား။ သူသည် ကောင်းကင်နဂါးရတနာကို ထိန်းချုပ်နိုင်သည်မှန်သော်လည်း အင်ပါယာလေးခု၏ အင်အားစုများကို မည်သို့လျှင် ရင်ဆိုင်နိုင်မည်နည်း။
“ဝမ်ရှင်...”
ထိုအချိန်တွင် ဝန်ကြီးများစွာသည် ယီထျန်းယွမ်ကို မြင်လိုက်ရသောအခါ မှင်တက်မိသွားကြသည်။ ဤအကြပ်အတည်းအခိုက်အတန့်တွင် ဝမ်ရှင်ပြန်လာမည်ဟု မထင်မှတ်ထားခဲ့ပေ။ သို့သော် သူသည် တစ်ဦးတည်း ရောက်ရှိလာခဲ့သည်။ အင်အားဖြည့်တင်းမှုများကရော မည်သည်မှာ ရှိသနည်း။
ရှောင်ဧကရာဇ်နှင့် ကျူကျီဧကရာဇ်တို့သည်လည်း အနည်းငယ် မှင်တက်သွားကြသည်။ သူတို့သည် ကောင်းကင်နဂါးရတနာကို ထိန်းချုပ်နိုင်သည့် ဝမ်ရှင်တစ်ဦးအကြောင်း ကြားဖူးခဲ့သည်။ သို့သော် မည်သည့်နေရာမှ ပေါ်ထွက်လာသူမှန်း မသိရှိခဲ့ပေ။ ကောင်းကင်နဂါးရတနာကို ထိန်းချုပ်ရန်မှာ အလွန်ခက်ခဲပြီး အလွန်သန်မာသော ကောင်းကင်နဂါးသွေးစွမ်းအင်လိုအပ်သည်ဟု သူတို့သိထားသည်။ ဆိုလိုသည်မှာ ဤဝမ်ရှင်သည် ကောင်းကင်နဂါးသွေးစွမ်းအင်ရှိသူဖြစ်ပြီး ကောင်းကင်နဂါးအင်ပါယာ၏ ဆွေမျိုးတစ်ဦးဖြစ်နိုင်သည်ဟူ၍ဖြစ်သည်။
သို့သော် ဤသည်မှာ ခန့်မှန်းချက်မျှသာဖြစ်ပြီး အမှန်တကယ်အခြေအနေကို သူတို့မသိရှိခဲ့ပေ။
ယခုအခါ လူငယ်တစ်ဦးသည် သူတို့ရှေ့တွင် ပေါ်ထွက်လာသောအခါ အားလုံးသည် မှင်တက်မိသွားကြသည်။ ဒဏ္ဍာရီထဲက ဝမ်ရှင်သည် ဤလူငယ်ဖြစ်နေသည်တဲ့လား။ ဤသည်ကို ပြောလိုက်ပါက မည်သူမျှ ယုံကြည်မည်မဟုတ်ပေ။
သို့သော် သူသည် ကောင်းကင်ထဲတွင် ပျံသန်းနိုင်သောကြောင့် သူ၏ ကျင့်စဉ်အဆင့်မှာ အနည်းဆုံး အားနည်းသူမဟုတ်ကြောင်း သက်သေပြသည်။ ရှောင်ဧကရာဇ်နှင့် ကျူကျီဧကရာဇ်တို့သည် မျက်လုံးများကို မှေးကျဉ်းကာ ယီထျန်းယွမ်ကို စူးစိုက်ကြည့်လိုက်ကြသည်။ သူတို့အတွက် ဤမြင်ကွင်းသည် အနည်းငယ် ရယ်စရာဖြစ်သည်။ အကြောင်းမှာ မည်မျှပင် သန်မာသည်ဆိုစေကာမူ သူသည် တစ်ဦးတည်းသာဖြစ်သည်။
“မင်းကပဲ ဒဏ္ဍာရီထဲက ဝမ်ရှင်ပေါ့... အတော်ငယ်သေးတာပဲ... ဟား... ဟား... ဟား...”
ရှောင်ဧကရာဇ်သည် ယီထျန်းယွမ်ကို မြင်လိုက်ရသောအခါ မထိန်းနိုင်ဘဲ ကျယ်လောင်စွာ ရယ်မောလိုက်သည်။
“ဒီလောက်ပဲလား... ဝမ်ရှင်တစ်ယောက် ပေါ်လာတယ်ဆိုပြီး ဘာဖြစ်လဲ... ဒီလို အင်အားနဲ့ အခြေအနေကို ပြောင်းလဲပစ်နိုင်မယ်လို့ ထင်နေတာလား...”
“ရှောင်ဧကရာဇ်... ခဏလေး... သူတို့ အခုန ဘာပြောလိုက်တာလဲ...”
ထိုအချိန်တွင် ဘေးတွင်ရှိသော ကျူကျီဧကရာဇ်သည် မျက်လုံးများကို မှေးကျဉ်းလိုက်သည်။ ဤလူငယ်ထက် သူပြောလိုက်သော စကားများက ပို၍ အာရုံစူးစိုက်စရာဖြစ်သည်။
“သူက ဘာပြောလိုက်တာလဲ...”
ရှောင်ဧကရာဇ်သည် ထိုစကားများကို သတိမထားမိခဲ့ပေ။ သူမြင်လိုက်ရသည်မှာ ယီထျန်းယွမ်တစ်ဦးတည်း ရောက်လာခြင်းသာဖြစ်သည်။ ထိုသို့ဖြစ်နေပါက မည်သည့်အဓိပ္ပာယ်ရှိမည်နည်း။
“သူက ကျန်တဲ့ အင်ပါယာနှစ်ခုက ဒီကို ရောက်မလာနိုင်တော့ဘူးလို့ ပြောလိုက်တာ...”
ကျူကျီဧကရာဇ်သည် နဂါးရထားပေါ်တွင် ထိုင်လိုက်ရင်း ဘေးတွင်ရှိသော အလှပဂေးနှစ်ဦးကို တွန်းထုတ်လိုက်ပြီး ယီထျန်းယွမ်ကို အေးစက်စွာ စိုက်ကြည့်ကာ ပြောလိုက်သည်။
“မင်း အခုနက အဲ့ဒီလို ပြောလိုက်တာလား...”
“ဟုတ်တယ်... ကျန်တဲ့ အင်ပါယာနှစ်ခုက ဒီကို လုံးဝ ရောက်မလာနိုင်တော့ဘူး... လမ်းမှာ ငါတားဆီးလိုက်ပြီး အားလုံးကို ဖျက်စီးပစ်လိုက်ပြီ...”
ယီထျန်းယွမ်သည် တည်ငြိမ်စွာ ပြောလိုက်သည်။
ဤစကားထွက်လာသည်နှင့်တပြိုင်နက် လူအားလုံးသည် မှင်တက်မိသွားကြသည်။ ထို့နောက် အင်ပါယာနှစ်ခု၏ အင်အားစုများမှ ကျယ်လောင်စွာ ရယ်မောသံများ ထွက်ပေါ်လာသည်။ သူတို့အတွက် ဤစကားသည် တကယ့်ဟာသတစ်ခုဖြစ်သည်။ သူတစ်ဦးတည်းဖြင့် အင်ပါယာနှစ်ခုကို တားဆီးနိုင်သည်တဲ့လား။ ကြွားလုံးထုတ်ရန်ပင်လျှင် အနည်းဆုံးတော့ အခြေအနေကို ကြည့်ပြီး ပြောရမည်မဟုတ်လား။
အင်ပါယာနှစ်ခုမှ လူများသာမက ကောင်းကင်နဂါးအင်ပါယာထဲရှိ ဝန်ကြီးများပင် မျက်နှာများ မည်းမှောင်လာကြသည်။ သူတို့ထင်သည်မှာ ရန်သူတို့ကို ထိတ်လန့်အောင် လုပ်လိုသည်ဆိုပါစေ။ သို့သော် ဤမျှ ဉာဏ်နည်းသော စကားများကို ပြောရန် မလိုအပ်ပေ။ မည်သူက ယုံကြည်မည်နည်း။
“ယီံအစ်ကို တကယ်ပဲ သူတို့ကို တားဆီးလိုက်တာလား...”
ရန်ကျိရို့သည် ယီထျန်းယွမ်၏ စွမ်းအားကို အနည်းငယ်သိထားသူဖြစ်သည်။ ထို့ကြောင့် သူပြောသည်မှာ ဖြစ်နိုင်ချေရှိသည်ဟု တွေးမိသည်။
ရန်ကျိရို့သည် မျက်နှာထား အနည်းငယ်တည်ကြည်လာသည်။ ဤစကားများသည် သူ့နှလုံးသားကို အနည်းငယ် ထိခိုက်စေသည်။ သို့သော် ယီထျန်းယွမ်သည် တကယ်ပင် ထိုသို့လုပ်နိုင်ခဲ့သည်လားဟု သူ တစ်ဝက်တစ်ကျင်း ယုံကြည်မိသည်။ ဖြစ်နိုင်သည်မှာ ဘေးတွင်ရှိသော ဝန်ကြီးများပြောသည့်အတိုင်း ရန်သူများကို ထိတ်လန့်စေရန် ဤစကားများကို ပြောလိုက်ခြင်းလည်းဖြစ်နိုင်သည်။
အချို့သူများက ယုံကြည်သော်လည်း အချို့သူများက မယုံကြည်ပေ။ သို့သော် အင်ပါယာနှစ်ခုမှ လူများကတော့ လုံးဝမယုံကြည်ခဲ့ပေ။
“ထျန်းဧကရာဇ်... မင်းရဲ့ ဝမ်ရှင်က ကြွားလုံးထုတ်တာ လွန်သွားပြီနော်... အင်ပါယာနှစ်ခုကို တားဆီးလိုက်တယ်တဲ့... စိတ်ဝိညာဉ်ဘုရင်နယ်ပယ်အဆင့်ရှိသူ နှစ်ဦးအပြင် အတုအယောင်စိတ်ဝိညာဉ်နယ်ပယ်အဆင့်ရှိသူတွေ အများကြီးကို မင်းတို့ တားဆီးနိုင်တယ်တဲ့လား... ငါတို့ကို ထိတ်လန့်အောင်လုပ်ချင်ရင်တောင် ဒီလိုမိုက်မဲတဲ့ စကားတွေ မပြောသင့်ဘူးနော်... ဥပမာ မင်းတို့ ရှီလုံအင်ပါယာကို အားကိုးထားတယ်လို့ ပြောရင် ဒါမျိုးကမှ ပိုယုံကြည်စရာရှိသေးတယ်...”
ရှောင်ဧကရာဇ်သည် ကျယ်လောင်စွာ ရယ်မောလိုက်သည်။ ယီထျန်းယွမ်သည် ဦးနှောက်ချို့ယွင်းနေသူဖြစ်နိုင်သည်ဟု တွေးမိသည်။ ဤမျှ မယုံကြည်နိုင်စရာ စကားများကို ပြောရဲသည်တဲ့လား။
လူအုပ်ကြီးသည် မိုက်မဲသူကို ကြည့်သည့်အကြည့်ဖြင့် ယီထျန်းယွမ်ကို စိုက်ကြည့်နေကြသည်။ လမ်းတစ်ဝက်တွင် အင်အားကြီးမားသူတစ်ဦး ထွက်ပေါ်လာမည်ဟု ထင်ခဲ့သော်လည်း ယခုမူ လှည့်စားသူတစ်ဦးသာ ထွက်ပေါ်လာသည်။ ထိတ်လန့်စေလိုလျှင်တောင် ယုံကြည်နိုင်စရာ စကားများကို ပြောရမည်မဟုတ်လား။
ဤသည်မှာ သူတို့ရှေ့တွင် ရုတ်တရက် သန်းပေါင်းများစွာသော ငွေကြေးရှိသည်ဟု ပြောလိုက်သော သူတောင်းစားတစ်ဦးနှင့် တူသည်။ မည်သူက ယုံကြည်မည်နည်း။ အကယ်၍ သူသည် သူတောင်းစားဂိုဏ်း၏ ခေါင်းဆောင်ဖြစ်သည်ဟု ပြောလျှင် အနည်းဆုံး ယုံကြည်နိုင်စရာ ဖြစ်နိုင်သည်။
ယခုမူ သူတစ်ဦးတည်းဖြင့် အင်ပါယာနှစ်ခုကို ဖျက်စီးပစ်လိုက်သည်ဟု ပြောနေသည်။ မည်သူက ယုံကြည်မည်နည်း။
“ကောင်းပြီ... အခု မင်းတို့အလှည့်ရောက်ပြီ... တောင်းပန်ရင်တောင် ငါ ခွင့်မလွှတ်ပေးနိုင်ဘူး...”
ယီထျန်းယွမ်သည် တည်ငြိမ်စွာ ပြောလိုက်သည်။
“အခါများစွာမှာ ကိုယ်လုပ်ခဲ့တဲ့အရာတွေအတွက် ပြစ်ဒဏ်ခံရမယ်...”
“ဟားဟား... မိုက်မဲတယ်လို့ ပြောတာ တကယ်ပဲ မိုက်မဲတာပဲ... ထျန်းဧကရာဇ်... မင်းရဲ့ ဝမ်ရှင်က ဒီလောက်ထိ ကြွားလုံးထုတ်နေတာပဲ... ငါတို့က တောင်းပန်မယ်လို့ ထင်နေတာလား... ဒါက ဟာသမဟုတ်လား...”
ရှောင်ဧကရာဇ်သည် နဂါးရထားမှ ပျံထွက်လာပြီး ယီထျန်းယွမ်ကို မိုက်မဲသူကို ကြည့်သည့်အကြည့်ဖြင့် စိုက်ကြည့်လိုက်သည်။
“တကယ်ကို ဝမ်းနည်းစရာပဲ... ကောင်းကင်နဂါးအင်ပါယာမှာ ဒီလိုဝမ်ရှင်မျိုး ရှိနေတာ... ကယ်တင်နိုင်ဖို့ ရှိသေးရဲ့လား...”
“ဒီလိုကြည့်ရင်... မင်းတို့ သစ္စာဖောက်တာက မမှားဘူးပေါ့... ဒါက အချိန်ကိုက်နားလည်တတ်သူဟာ ထူးချွန်သူဖြစ်တယ်လို့ ပြောတာပဲ...”
ဘေးတွင်ရှိသော ဝန်ကြီးများသည် ယီထျန်းယွမ်၏ အခြေအနေကို မြင်လိုက်ရသောအခါ မထိန်းနိုင်ဘဲ ခေါင်းခါလိုက်ကြသည်။ သစ္စာဖောက်ခြင်းသည် မှန်ကန်သည်ဟု တွေးမိသည်။ မဟုတ်ပါက မည်သို့သော သေဆုံးမှုမျိုးနှင့် ရင်ဆိုင်ရမည်မသိပေ။
ဝမ်ရှင်အသစ်သည် အလွန်သန်မာသည်ဟု ကြားဖူးသော်လည်း သူတစ်ဦးတည်းဖြင့် အင်ပါယာနှစ်ခုကို ဖျက်စီးနိုင်သည်ဟု မည်သူက ယုံကြည်မည်နည်း။
ကောင်းကင်နဂါးအင်ပါယာထဲရှိ ဝန်ကြီးများစွာသည် မည်သည့်စကားပြောရမည်မသိတော့ပေ။ ဝမ်ရှင်သည် ထျန်းဧကရာဇ်၏ ညီအစ်ကိုဆွေမျိုးဖြစ်သည်ဟု ကြားဖူးသည်။ ထိုသို့ဆိုလျှင် ထျန်းလုံတွင်လည်း တာဝန်အနည်းငယ်ရှိသည်မဟုတ်လား။
ထိုအချိန်တွင် ကျူကျီဧကရာဇ်သည်လည်း ပျံထွက်လာပြီး ခေါင်းခါကာ ပြောလိုက်သည်။
“သူက ငါတို့ကို လာပြီး လှည့်စားနေတာပဲ... တော်တော်ပျော်စရာကောင်းတယ်... ကျန်တဲ့ အင်ပါယာနှစ်ခု ရောက်လာတဲ့အခါ ဒီကောင်လေး ဘယ်လိုဆက်လှည့်စားမလဲဆိုတာ ကြည့်ရမယ်...”
သူတို့အားလုံး ရယ်မောလိုက်ကြသည်။ သူတို့သည် ချက်ချင်းထိုးစစ်ဆင်ရန် မစီစဉ်ထားပေ။ ဧကရာဇ်အားလုံး စုဝေးလာသည်အထိ စောင့်ဆိုင်းပြီး တပြိုင်နက်ထိုးစစ်ဆင်ကာ ဤအင်အားစုကို ဖျက်စီးပစ်ရန် စီစဉ်ထားသည်။ ကောင်းကင်နဂါးရတနာပင်လျှင် ဤမျှသော အင်အားကြီးမားသူများ၏ တိုက်ခိုက်မှုကို ခံနိုင်မည်မဟုတ်ပေ။
ဤသည်မှာ သူတို့ယခင်က ဆွေးနွေးထားသော အစီအစဉ်ဖြစ်သည်။ အကယ်၍ ကောင်းကင်နဂါးအင်ပါယာက အရင်ဆုံး လက်နက်ချလိုက်လျှင် အကောင်းဆုံးဖြစ်မည်။
လူအုပ်ကြီးသည် လှောင်ပြောင်သည့်အကြည့်များဖြင့် ယီထျန်းယွမ်ကို စိုက်ကြည့်နေကြသည်။
“ငါပြောပြီးသားပဲ... သူတို့ ရောက်လာမှာ မဟုတ်ဘူး...”
ယီထျန်းယွမ်သည် ထပ်မံပြောလိုက်ပြီး သူတို့ကို အေးစက်စွာ စိုက်ကြည့်ကာ ဆက်လက်ပြောသည်။
“မိုက်မဲတဲ့ ဧကရာဇ်နှစ်ယောက်... ဒီကိုကြည့်စမ်း...”
“ကောင်လေး... မင်းဘာပြောလိုက်တာလဲ...”
ရှောင်ဧကရာဇ်နှင့် ကျူကျီဧကရာဇ်တို့သည် ဒေါသတကြီး သူ့ကို စိုက်ကြည့်လိုက်ကြသည်။ သေမည့်အခါထိ သူတို့ကို မိုက်မဲသူဟု ခေါ်ရဲသည်တဲ့လား။
သူတို့သည် ယီထျန်းယွမ်၏ မျက်လုံးများကို စိုက်ကြည့်လိုက်သောအခါ ရုတ်တရက် သူတို့၏ စိတ်အစဉ်သည် ရေဝဲထဲသို့ နစ်မြုပ်သွားသလို ခံစားလိုက်ရပြီး မူလ သတိ၊ အသိများ အနည်းငယ် ဝေဝါးလာသည်။
ခဏတာအတွင်းမှာပင် သူတို့သည် မိမိတို့၏ လက်များကို ထိန်းချုပ်နိုင်စွမ်းမရှိတော့ဘဲ ခန္ဓာကိုယ်များသည် သူတို့ပိုင်ဆိုင်ခြင်းမဟုတ်တော့သလို ခံစားလိုက်ရသည်။
“ဟုတ်ပြီ... အတော်လိမ္မာတယ်... သွားစမ်း...”
ယီထျန်းယွမ်သည် လက်တစ်ချက်ဝှေ့ရမ်းလိုက်သည်။
ထိုအခါ ဧကရာဇ်နှစ်ဦးသည် ရုတ်တရက် လှည့်လိုက်ပြီး ၎င်းတို့၏ သီးသန့် သန့်စဉ်လက်နက်များကို ဆင့်ခေါ်ကာ နောက်တစ်ကြိမ်တွင် ၎င်းတို့၏ လက်အောက်ငယ်သားများဆီသို့ တိုက်ခိုက်ရန် ထိုးဖောက်ဝင်ရောက်သွားသည်။
“ဘုန်း...”
စိတ်ဝိညာဉ်ဘုရင်နယ်ပယ်အဆင့်ရှိသူ နှစ်ဦးသည် ၎င်းတို့၏ လက်အောက်ငယ်သားများကို အဆမတန် ပြင်းထန်စွာ တိုက်ခိုက်လာသည်။ ရုတ်တရက် ဖြစ်ပေါ်လာသော အပြောင်းအလဲသည် အားလုံးကို မှင်တက်မိစေသည်။ ဧကရာဇ်နှစ်ဦးသည် ရုတ်တရက် ၎င်းတို့၏ လက်အောက်ငယ်သားများကို တိုက်ခိုက်လာသည်တဲ့လား။
---
အခန်း (၅၇၂) ပြီးပါပြီ။