ဝိညာဉ်စွမ်းအင် မှေးမှိန်သောခေတ်၏ ဝမ်းနည်းမှုများ၊ ကျဆုံးသွားသော ပါရမီရှင်!_၂

[သူ၏ နောက်ဆုံးလှုပ်ရှားမှုကို မြင်ပြီးပြီဟု သင် ထင်ထားသော်လည်း ဒြပ်စင်ငါးပါး ပိုင်ရှင်သည် နောက်ထပ် လှည့်ကွက် တစ်ခုကို ထုတ်ဖော်ခဲ့သည်။]

[သူ၏နက်နဲသော မှော်ပညာကို ထုတ်သုံးပြီး သတ္တု၊ သစ်သား၊ ရေ၊ မီး၊ မြေ ဟူသော ဒြပ်စင်ငါးမျိုး၏ ဝိညာဉ်စွမ်းအင်များကို လေထဲမှတစ်ဆင့် သူ့ခန္ဓာကိုယ်ထဲသို့ စုပ်ယူကာ အရောင်အသွေး စုံလင်သော အလင်းတန်းများအား သင့်ဆီသို့ ပစ်လွှတ်လိုက်သည်ကိုသာ သင် တွေ့မြင်လိုက်ရသည်။]

[ဤသည်ကို မြင်သောအခါ သင်သည် မိုးကြိုး ဝိညာဉ်ပေါက်ကွဲခြင်း နည်းစနစ်ကို လျင်မြန်စွာ အသက်သွင်းပြီး လက်နှစ်ဖက်ဖြင့် ပုံသဏ္ဍာန်ဖော်ကာ ဒြပ်စင်ငါးပါးပိုင်ရှင်၏ ဒြပ်စင်ငါးပါး မှော်ပညာကို တိုက်ခိုက်ခဲ့သည်။]

[ဒိုင်း! ကြောက်မက်ဖွယ်ကောင်းသော ဆူညံသံသည် ရှေးဟောင်းသင်္ချိုင်း တစ်ခုလုံးကို ချက်ချင်းပင် စစ်မြေပြင်အဖြစ် ပြောင်းလဲစေခဲ့သည်။ အပျက်အစီးများ အတွင်းရှိ ကာကွယ်ရေး အစီအရင်သည် မှော်ပညာများ ထိခိုက်မိရာမှ ထွက်ပေါ်လာသည့် နောက်ဆက်တွဲ ရိုက်ခတ်မှုများကြောင့် ပွင့်ထွက်သွားသည်။ ကြီးမားသော အပေါက်များ ဖြစ်ကျန်ခဲ့ကာ သင်္ချိုင်းတစ်ခုလုံး မရပ်မနား တုန်ခါလာခဲ့သည်။]

[ဤသို့ဆက်သွားပါက ရှေးဟောင်းသင်္ချိုင်းသည် မလွဲမသွေ ပြိုကျသွားတော့မည်ကို သင်၏စိတ်ထဲတွင် သိရှိခဲ့သည်။]

[ထို့ကြောင့် သင်သည် ဝိညာဉ်အရည် တစ်ပုလင်းကို ထုတ်ယူပြီး ကုန်ဆုံးသွားသော ဝိညာဉ်စွမ်းအင်များကို ပြန်လည် ဖြည့်တင်းကာ ဒြပ်စင်ငါးပါး ပိုင်ရှင်ကို ပိုမိုပြင်းထန်သော ထိုးစစ်ဆင်၍ တိုက်ခိုက်ခဲ့သည်။]

[သို့သော် ဒြပ်စင်ငါးပါး ပိုင်ရှင်သည် လွန်ခဲ့သော နှစ်ထောင်ပေါင်းများစွာက ရှန်းဝူခေတ်တွင် ထိပ်တန်းပါရမီရှင် သုံးဦးထဲမှ တစ်ဦးဖြစ်သည့် အလျောက် ဒြပ်စင်ငါးပါး မှော်ပညာကို နက်နဲသော အဆင့်အထိ ကျွမ်းကျင် ပိုင်နိုင်ထားခဲ့သည်။]

[မြေဒြပ်စင် မှော်ပညာသည် ကာကွယ်မှု အလွန် အားကောင်းပြီး သင်၏ထိုးစစ် အများစုကို ၎င်းတို့က ပိတ်ဆို့ခဲ့သည်။]

[သတ္တုဒြပ်စင် မှော်ပညာသည် အထူးသဖြင့် ပြတ်သားပြီး သတ္တုဝိညာဥ်စွမ်းအင်ဖြင့် ဖွဲ့စည်းထားသော ဓားတစ်ချောင်းသည် သင်၏ မင်ရေခဲဓားနှင့် ခဏတာ ယှဉ်ပြိုင်နိုင်ခဲ့သည်။]

[သစ်သားဒြပ်စင် မှော်ပညာသည် ဒဏ်ရာများကို ကုသနိုင်ခဲ့သည်။ မီးဒြပ်စင် မှော်ပညာသည် ပိုမိုအားကောင်းသဖြင့် သင့်ကိုပင် အကွာအဝေးတစ်ခုမှ ထားရှိစေခဲ့သည်။]

[သင့်ကို အထူးတလည် စိတ်အနှောင့်အယှက် ဖြစ်စေသည်မှာ ဒြပ်စင်ငါးပါးပိုင်ရှင်၏ ရေဒြပ်စင် မှော်ပညာဖြစ်သည်။ ၎င်းသည် လီမီးကို သိသိသာသာ ထိန်းချုပ်နိုင်စွမ်း ရှိသည်။ သူသည် ထူးခြားသော ရေဒြပ်စင် နတ်ဘုရား စွမ်းရည် တစ်ခုကိုလည်း ကျွမ်းကျင်ပိုင်နိုင်ထားသည်ဟု ယူဆရသည်။]

[သင်နှင့် ဒြပ်စင်ငါးပါး ပိုင်ရှင်တို့သည် အချီရေ ရာနှင့်ချီ၍ တိုက်ခိုက်ခဲ့ကြသည်။ ထိုတိုက်ပွဲ အတွင်းတွင်ပင် ဒြပ်စင်ငါးပါးဂိုဏ်း၏ "ဒြပ်စင်ငါးပါး အပြန်အလှန် ဖြစ်ပေါ်စေသော ဆုံးဖြတ်ချက်"၏ ကြောက်မက်ဖွယ် ကောင်းသော အချက်များကို သင် သိရှိခဲ့ရသည်။]

[ဒြပ်စင်ငါးမျိုး၏ ဝိညာဉ်စွမ်းအင်များသည် တစ်ခုနှင့်တစ်ခု အပြန်အလှန် အထောက်အပံ့ပေးပြီး အချင်းချင်း ပေါင်းစပ်ထားသောကြောင့် မှော်ပညာများ၏ စွမ်းအားကို အများကြီး မြှင့်တင်ပေးနိုင်သလို ရန်သူ၏ အားနည်းချက်များကိုလည်း လိုက်၍ အသုံးချနိုင်ခဲ့သည်။]

[ထိုသို့ဖြင့် သင်သည် နောက်ထပ် နာရီပေါင်းများစွာ ပြင်းပြင်းထန်ထန် တိုက်ခိုက်ခဲ့သည်။]

[နောက်ဆုံးတွင် ဝိညာဉ်အရည်များဖြင့် ဝိညာဉ်စွမ်းအင်ကို အဆက်မပြတ် ဖြည့်တင်းနေရပြီး သင့်အတွင်းရှိ မူလအင်အား မျိုးစေ့သည်လည်း မူလအင်အား ဆုံးရှုံးမှုကို အမြဲ ဖြည့်တင်းပေးနေရသည်။]

[အခြားတစ်ဖက်တွင်မူ ဒြပ်စင်ငါးပါး ပိုင်ရှင်သည် အစပိုင်းတွင် သင်၏ ဝိညာဉ်ပေါက်ကွဲခြင်း နည်းစနစ်ဖြင့် တိတ်တဆိတ် တိုက်ခိုက်မှုကြောင့် ပြင်းထန်သော ဒဏ်ရာများ ရရှိထားပြီး အဆက်မပြတ် တိုက်ခိုက်နေရသဖြင့် သူ၏ဒဏ်ရာများသည် တဖြည်းဖြည်း ပိုမို ဆိုးရွားလာခဲ့သည်။]

[နာရီပေါင်းများစွာ ပြင်းထန်စွာ တိုက်ခိုက်ပြီးနောက် သင်သည် နောက်ဆုံးတွင် အသာစီး ရလာခဲ့သည်။]

စုရှင်းသည် သူ့ရှေ့ရှိ သရုပ်ပြခြင်း စာသားကို ကြည့်ပြီး သက်ပြင်းရှည်ကြီး တစ်ခုကို ချလိုက်သည်။

"ဒြပ်စင်ငါးပါး အပြန်အလှန် ဖြစ်ပေါ်စေတဲ့ နည်းလမ်း... တကယ်ပဲ ဒီလောက် ဆန်းကြယ်နေတာလား"

"ဒီဒြပ်စင်ငါးပါး ပိုင်ရှင်က ဒီနတ်ဘုရား စွမ်းရည်နဲ့ လျှို့ဝှက်နည်းစနစ်တွေနဲ့ဆိုရင် ခန္ဓာကိုယ် ပေါင်းစည်းခြင်း အဆင့်အောက် ဘယ်သူ့ကိုမှ မရှုံးနိမ့်နိုင်လောက်ဘူး"

"ကံကောင်းတာက သူက အသက်ရှင်လျက် သေနေတဲ့သူ တစ်ယောက် ဖြစ်နေတာရယ်၊ ငါက ဦးဆုံးတိုက်ခိုက်ခဲ့လို့ ပြင်းထန်တဲ့ ဒဏ်ရာတွေ ရနေတာရယ်ကြောင့်သာပေါ့... ဒီလိုမှ မဟုတ်ရင် ငါသူ့ကို ယှဉ်နိုင်မှာ မဟုတ်ဘူး" ထိုသို့ တွေးရင်း စုရှင်းသည် စိတ်ခံစားမှု တစ်မျိုးကို ခံစားခဲ့ရသည်။

ဝိညာဉ်စွမ်းအင် မှေးမှိန်သောခေတ်တွင် ပေါ်ထွက်လာခဲ့သော ထူးခြားသည့် ပါရမီရှင်များသည် သာမန်သူများ မဟုတ်ပေ။

၎င်းတို့သည် ခေတ်တစ်ခုကို လွှမ်းမိုးခဲ့သော ထူးချွန်ထက်မြက်သည့် ပါရမီရှင်များ ဖြစ်သည်မှာ အမှန်ပင် ဖြစ်သည်။

"ဒါပေမဲ့ ဒြပ်စင်ငါးပါး မှော်ပညာကို ထုတ်လွှတ်ဖို့ဆိုရင် သီအိုရီအရ ဒြပ်စင်ငါးမျိုးရဲ့ စိတ်စွမ်းအင်တွေကို စုပ်ယူနိုင်ဖို့ လိုအပ်တယ်..."

"ဒါဆို ဒီဒြပ်စင်ငါးပါး ပိုင်ရှင်မှာ ပေါင်းစပ် ဝိဉာဉ်အမြစ် ရှိနေတာများလား" ဟု သူ တွေးလိုက်သည်။

ဤသို့ တွေးပြီးပြီးချင်းမှာပင် စုရှင်းသည် ခေါင်းကို အနည်းငယ် ခါယမ်းကာ ဖြစ်နိုင်ခြေကို ပယ်ဖျက်လိုက်သည်။

ပေါင်းစပ် ဝိဉာဉ်အမြစ် တစ်ခုသည် နှစ်တစ်ထောင် မပြည့်မီ လွတ်မြောက်ခြင်း ပြန်လည်ရောက်ရှိခြင်း ကြီးမြတ်‌သော ပြီးပြည့်စုံခြင်း အဆင့်အထိ မည်သို့ တိုးတက်နိုင်မည်နည်း။

"သေချာတာကတော့ ဒီဒြပ်စင်ငါးပါး ပိုင်ရှင်မှာလည်း အမျိုးအစားပြောင်း ဝိဉာဉ်အမြစ် ရှိရမယ်... အနည်းဆုံးတော့ စစ်မှန်သော ဝိဉာဉ်အမြစ် ဒါမှမဟုတ် ကောင်းကင် ဝိဉာဉ်အမြစ် ဖြစ်နိုင်တယ်..."

စုရှင်း စဥ်းစားနေခဲ့သည်။

သူသည် ဒြပ်စင်ငါးပါး အပြန်အလှန် ဖြစ်ပေါ်စေတဲ့ နည်းလမ်းက အလွန် ထူးခြားသည်ဟု ပို၍ ခံစားလာရသည်။

ထိုသို့သော လျှို့ဝှက်နည်းစနစ်မျိုးသည် ရှေးခေတ် ကာလတွင်တောင် ဂိုဏ်းတစ်ခုလုံး၏ ဂုဏ်ယူစရာ ရတနာတစ်ခု ဖြစ်နိုင်ချေ ရှိသည်။

ဒြပ်စင်ငါးပါးပိုင်ရှင် ထိုနည်းလမ်းကို ဖန်တီးနိုင်ခဲ့ခြင်းသည် သူ၏ထူးခြားသော အရည်အချင်းကို ပြသနေသည်။

"ငါ ဒီ ဒြပ်စင်ငါးပါး အပြန်အလှန် ဖြစ်ပေါ်စေတဲ့ နည်းလမ်းကို ရကိုရရမယ်"

စုရှင်းသည် စိတ်ထဲ၌ ပြတ်သားစွာ ဆုံးဖြတ်လိုက်ပြီး သရုပ်ပြခြင်း ဖန်သားပြင်ကို ကြည့်လိုက်သည်။

[ဒြပ်စင်ငါးပါး ပိုင်ရှင်၏ ဒဏ်ရာများ တဖြည်းဖြည်း ပိုဆိုးလာပြီး သူ၏အတွင်းက ဝိညာဉ်စွမ်းအင်များသည်လည်း ပြန်လည် မဖြည့်တင်းနိုင်ဘဲ ကုန်ဆုံးလာသောအခါ...]

[သင်သည် တိုက်ပွဲကို ပိုမို လွှမ်းမိုးလာခဲ့သည်။]

[နောက်ထပ် ထောင်ပေါင်းများစွာသော အချီများ ပြင်းပြင်းထန်ထန် တိုက်ခိုက်ပြီးနောက် သင်၏အသာစီးရမှုသည် အနိုင်ရမှု အဖြစ်သို့ ဖြည်းဖြည်းချင်း ပြောင်းလဲလာပြီး ဒြပ်စင်ငါးပါး ပိုင်ရှင်ကို သေစေရန် အပြီးသတ် တိုက်ခိုက်ဖို့ ပြင်ဆင်ခဲ့သည်။]

[သင်သည် ဓားဖြင့်ထိုး၍ ဒြပ်စင်ငါးပါး ပိုင်ရှင်ကို နောက်ဆုတ်စေခဲ့သည်။ ထို့နောက် သင့်လက်ဖဝါးကို ဆန့်တန်းလိုက်ရာမှ ဝိညာဉ်စွမ်းအင်များ ပေါ်ထွက်လာပြီး ဖိသိပ်သွားကာ နောက်ဆုံးတွင် မီးဒြပ်စင် ဝိညာဉ်စွမ်းအင် လေပွေတစ်ခု အဖြစ် ပုံသဏ္ဌာန် ဖြစ်ပေါ်လာခဲ့သည်။]

[မီးဒြပ်စင် လေပွေ ဖွဲ့စည်းပြီးနောက် သင်သည် သစ်သားဒြပ်စင် ဝိညာဉ်စွမ်းအင်ကို အထဲသို့ ထိုးသွင်းခဲ့သည်။]

[ထိုသို့ဖြင့် သင်၏ အားအကောင်းဆုံး တိုက်ခိုက်မှု ဖြစ်သည့် သစ်သား-မီး အပြန်အလှန် ဖြစ်ပေါ်စေသော ဝိညာဉ်ပေါက်ကွဲခြင်း နည်းစနစ်သည် နောက်ဆုံးတွင် ပေါ်ပေါက်လာခဲ့သည်။]

[ဝိညာဉ်ပေါက်ကွဲခြင်း နည်းစနစ်ကို အပြည့်အဝ စုစည်းမိပြီးနောက် သင်သည် အသက်အနည်းငယ် ရှုလိုက်သည်။]

[ဤဝိညာဉ်ပေါက်ကွဲခြင်း နည်းစနစ် တစ်ခုတည်းမှာပင် သင့်အတွင်းရှိ ဝိညာဉ်စွမ်းအင် တစ်ဝက်နီးပါး ပါဝင်နေသည်။ ဤလှည့်ကွက်ဖြင့်ဆိုလျှင် ပြင်းထန်သော ဒဏ်ရာများ ရထားသည့် ဒြပ်စင်ငါးပါး ပိုင်ရှင်ကို အပြီးသတ် သတ်နိုင်မည်ဟု သင် ယုံကြည်မှု ရှိခဲ့သည်။]

[ဒြပ်စင်ငါးပါး ပိုင်ရှင်သည် ကြောက်မက်ဖွယ် ကောင်းသော ခြိမ်းခြောက်မှုကို ခံစားမိပုံရသည်။ သူသည် ဒြပ်စင်ငါးပါး အပြန်အလှန် ဖြစ်ပေါ်စေသည့် နည်းလမ်းကို ထပ်မံ ထုတ်သုံးခဲ့သည်။]

[သတ္တု၊ သစ်သား၊ ရေ၊ မီး၊ မြေ ဟူသော ဒြပ်စင်ငါးမျိုး မှော်ပညာများကို အစီအစဉ်အတိုင်း ထုတ်လွှတ်လိုက်သည်။]

[အရောင်အသွေး စုံလင်သော မှော်အလင်းတန်း ငါးခုသည် သင့်ကို တိုက်ခိုက်လာခဲ့သည်။]

[ထိုအချိန်တွင်ပင် သင်သည် သင်၏ ဝိညာဉ်ပေါက်ကွဲခြင်း နည်းစနစ်ကို ပစ်လွှတ်လိုက်သည်။]

[ဒိုင်း!]

[နတ်ဘုရား စွမ်းရည်နှစ်ခု ထိခိုက်မိရာမှ ကြောက်မက်ဖွယ် ကောင်းသော တုန်ခါမှုလှိုင်းနှင့် စစ်ပွဲ၏ နောက်ဆက်တွဲ ရိုက်ခတ်မှုများ ထွက်ပေါ်လာသည်။ နောက်ဆုံးတွင် အရင်ကတည်းက ကြွပ်ဆတ်နေသော ပျက်စီးနေသည့် ကာကွယ်ရေး အစီအရင်ကို အပြီးအပိုင် ဖျက်ဆီးပစ်လိုက်သည်။]

[ကာကွယ်ရေး အစီအရင် ပျက်စီးသွားသည်နှင့်အမျှ ရှေးဟောင်းသင်္ချိုင်း တစ်ခုလုံးသည် ငလျင်လှုပ်သလို ကြမ်းတမ်းစွာ တုန်ခါလာခဲ့သည်။]

[မြေကြီးများ ပြိုကျပြီး ကျောက်တုံးများ ပြုတ်ကျလာခဲ့သည်။]

[ဤနေရာသည် ကြာကြာနေသင့်သည့် နေရာ မဟုတ်သည်ကို သင် သိခဲ့သည်။ ဒြပ်စင်ငါးပါး ပိုင်ရှင်၏ အမွေအနှစ်ကို လျင်မြန်စွာ ရှာဖွေရမည် ဖြစ်သည်။ မဟုတ်ပါက ဤရတနာများသည် ဒြပ်စင်ငါးပါးဂိုဏ်း၏ အပျက်အစီးများနှင့်အတူ မြေအောက်တွင် ထာဝရ မြှုပ်နှံခံရနိုင်သည်။]

[ကံကောင်းစွာဖြင့် သင်၏ နောက်ဆုံး တိုက်ခိုက်မှု ဖြစ်သော သစ်သား-မီး အပြန်အလှန် ဖြစ်ပေါ်စေသည့် ဝိညာဉ်ပေါက်ကွဲခြင်း နည်းစနစ်ဖြင့် ပြင်းထန်သော ဒဏ်ရာများ ရနေသည့် ဒြပ်စင်ငါးပါးပိုင်ရှင်ကို သတ်နိုင်ခဲ့သည်။]

[သင်သည် ပေဒါဇင်ပေါင်းများစွာ အကွာတွင် လဲလျောင်းနေသော ဒြပ်စင်ငါးပါးပိုင်ရှင်ကို ကြည့်လိုက်သည်။ သူသည် သူ၏ဘဝ နောက်ဆုံးအချိန်တွင် ခဏတာ သတိပြန်ရလာပုံ ရသည်။]

[သူ၏နှုတ်ခမ်းထောင့်မှ အနီရင့်ရင့် သွေးများ စီးကျလာသည်ကို သင် တွေ့လိုက်ရသည်။ သူသည် နောက်ဆုံးအချိန်တွင် စကားတစ်လုံးတည်းကိုသာ ပြောဆိုနိုင်ခဲ့သည်။]

…