မြေဓား အကြီးစား အောင်မြင်မှု၊ ငွေရောင်ဆံပင် နတ်ဆိုးဧကရာဇ်နှင့် နောက်တစ်ကြိမ် တိုက်ပွဲ!

ထိုစကားကို ကြားပြီးနောက် စုရှင်းသည် ချက်ချင်း ငြင်းပယ်ရန် အသင့် ဖြစ်နေခဲ့သည်။

လောရွှေရင်သည် စုရှင်း၏ ရည်ရွယ်ချက်ကို ရိပ်မိပုံရကာ ချက်ချင်းပင် ပြောလိုက်သည်-

"အကြီးအကဲ၊ ကျွန်မ အကြီးအကဲရဲ့ နောက်ကို တကယ်ကြီး လိုက်ချင်တာပါ!"

"ဒီနှစ်တွေ အတွင်းမှာ ဆင်းသက်ဂိုဏ်းမှာ အဆင်မပြေဘဲ နေခဲ့ရပါတယ်... ဒါ့အပြင် အဲဒီလူတွေရဲ့ ယုံကြည်မှုကို ရဖို့အတွက် အရမ်း ရှက်စရာကောင်းတဲ့ အရာတွေ အများကြီးလည်း လုပ်ခဲ့ရပါတယ်..."

"အကြီးအကဲနောက် လိုက်ပြီး တိုင်းတစ်ပါး မျိုးနွယ်စုတွေကို အတူတူတိုက်ခိုက်မှ တစ်ချိန်က ကျွန်မ ကျူးလွန်ခဲ့တဲ့ အပြစ်တွေကို ဆေးကြောနိုင်မှာပါ..."

သူမ ထိုစကားများကို ပြောနေစဉ်တွင် လောရွှေရင်၏ စိတ်ခံစားမှုများသည် အနည်းငယ် တည်ငြိမ်နေပုံ ရသည်။

ထိုစကားကို ကြားပြီးနောက် စုရှင်းသည် သက်ပြင်းချလိုက်သည်။

လောရွှေရင်၏ အတွေးများကို သူမည်သို့ နားမလည်ဘဲ နေနိုင်ပါမည်နည်း။

သူမသည် ဝိညာဉ်မျိုးနွယ်စု ကမ္ဘာအတွက်ကြောင့်သာ ဆင်းသက်ဂိုဏ်းသို့ ဝင်ရောက်ခဲ့ခြင်း ဖြစ်သည်။

သို့သော် ဆင်းသက်ဂိုဏ်းသို့ ဝင်ရောက်ပြီးနောက် သူမသည် ကိုယ့်ဆန္ဒအတိုင်း လွတ်လပ်စွာ မနေရတော့ပေ။ အခွင့်အရေးများကို အမြဲ‌တစေ ရှာဖွေနေသော်လည်း ရလဒ်များမှာ အနည်းငယ်သာ ရှိခဲ့သည်။

သို့သော်လည်း လက်ရှိ စုရှင်းအတွက် အရေးအကြီးဆုံး အရာမှာ တည်ငြိမ်မှု၊ ခိုင်မာသော ချဉ်းကပ်မှုနှင့် သူ မျှော်လင့်နိုင်သော လမ်းကြောင်းအတိုင်း ဖြစ်ပျက်လာမည့် အရာများ ဖြစ်သည်။

ဆင်းသက်ဂိုဏ်းမှ ထွက်ပြီး စုရှင်းနောက်သို့ လောရွှေရင် လိုက်သည့်အခါ ဖြစ်ပေါ်လာမည့် အရာများသည် စုရှင်းအတွက် ခန့်မှန်းရခက်သော လမ်းကြောင်းကို ဖြစ်ပေါ်လာစေနိုင်သည်။

ထိုအချိန်တွင် ၎င်းသည် စုရှင်းအတွက် အကျိုးထက် အဆိုးကိုသာ ပိုမိုဖြစ်စေမည်မှာ သေချာသည်။

သို့သော်လည်း လောရွှေရင်က စိတ်ရင်းမှန်ဖြင့် ထိုသို့ တောင်းဆိုနေသည်ကို မြင်ရသည့်အခါ စုရှင်းအတွက် တိုက်ရိုက်ငြင်းပယ်ရန် ခက်ခဲသည်။

ခဏကြာ တုံ့ဆိုင်းပြီးနောက် စုရှင်းက တိုက်တွန်းခဲ့သည်-

"ညီမငယ်၊ လက်ရှိမှာ ငါတို့ရဲ့ ကြီးမားတဲ့ ရည်ရွယ်ချက် အတွက် အကောင်းဆုံး ရွေးချယ်မှုက မင်း ဆင်းသက်ဂိုဏ်းထဲမှာ ဆက်နေဖို့ပဲ!"

"မင်းသာ ဆင်းသက်ဂိုဏ်းကို ထိုးဖောက်ဝင်ရောက်နိုင်ခဲ့ရင် မင်းရဲ့အခန်းကဏ္ဍက ငါ့ရဲ့ အခန်းကဏ္ဍနဲ့တောင် ယှဉ်နိုင်မှာပါ!"

စုရှင်း၏ စကားကို ကြားပြီးနောက် လောရွှေရင်သည် အံ့အားသင့်သွားသည်။

ထို့ကြောင့် စုရှင်းက ရှင်းပြသည်-

"ဆင်းသက်ဂိုဏ်းကို ဝင်ပြီး သူတို့ရဲ့ ယုံကြည်မှုကို ရဖို့ဆိုတာ မလွယ်ဘူး..."

"ပြီးတော့ မင်းက ဆင်းသက်ဂိုဏ်းရဲ့ အစိတ်အပိုင်း တစ်ခု ဖြစ်တာ ဆယ်စုနှစ်ပေါင်း များစွာရှိပြီ... ယုံကြည်မှု လုံလုံလောက်လောက် ရထားပြီးသားဆိုတော့ နောက်ထပ် သူလျှိုတစ်ယောက် ထပ်ထည့်ဖို့ဆိုတာ အလွယ်လေးဘဲ!"

"ပြီးတော့ ဆင်းသက်ဂိုဏ်းမှာ ဆက်နေပြီး လိုအပ်တဲ့ သတင်းအချက်အလက် အချို့ကို ငါ့ကို ပေးနေတာက ဆင်းသက်ဂိုဏ်းကနေ ထွက်ခွာတာထက် ပိုပြိီး ထိရောက်တယ်!"

အချိန်ကြာမြင့်စွာ စိတ်ရင်းမှန်ဖြင့် တိုက်တွန်းပြောဆိုမှုနှင့်အတူ အောင်မြင်မှုသခင် စွမ်းရည်ကြောင့် စုရှင်းသည် လောရွှေရင်၏ မျက်လုံးများကို ပိုမို တောက်ပလာစေခဲ့သည်။

စုရှင်း၏ ဖော်ပြချက်တွင် လောရွှေရင်သည် တိုင်းတစ်ပါး မျိုးနွယ်စုများကို တိုက်ခိုက်ခြင်း ရည်ရွယ်ချက် အတွက် သူမ၏ ကိုယ်ပိုင် ဘေးအန္တရာယ်ကို ထည့်သွင်းစဉ်းစားခြင်း မရှိဘဲ ဆယ်စုနှစ်များစွာ လျှို့ဝှက် အလုပ်လုပ်ခဲ့သော စစ်သည်တစ်ဦး၊ တကယ်ကို ချီးကျူးထိုက်သူတစ်ဦး ဖြစ်သည်။

သူမသည် တိုင်းတစ်ပါး မျိုးနွယ်စုများကို ဆန့်ကျင်သည့် ကြီးမားသော ရည်ရွယ်ချက်တွင် အစားထိုး၍မရသော အခန်းကဏ္ဍမှ ပါဝင်ခဲ့သည်။

ထိုသို့သော စုရှင်း၏ ဖော်ပြမှုကပင် လောရွှေရင်ကို အနည်းငယ် ရှက်ရွံ့စေခဲ့သည်။

ခဏတာ အတွင်းမှာပင် လောရွှေရင်၏ စိတ်ထဲ၌ သံသယတစ်ခု ပေါ်လာသည်- ဒီနှစ်တွေ အတွင်း ငါက တကယ်ကြီး ဒီလောက် အရေးပါတဲ့ အခန်းကဏ္ဍကနေ ပါဝင်ခဲ့တာလား။

လောရွှေရင် ငါးမျှားချိတ်တွင် မိနေသည်ကို မြင်သောအခါ စုရှင်းသည် ဆက်လက် တိုက်တွန်းခဲ့သည်-

"အဲဒီလိုဆိုရင် မင်းအတွက် နောက်ထပ် တာဝန်တွေကို စီစဉ်ပေးပါ့မယ်..."

"ဆင်းသက်ဂိုဏ်းမှာ နဂါး စောင့်ရှောက်သူ တစ်ဦးရှိတယ်လို့ ငါ ကြားတယ်... သူက စောင့်ရှောက်သူဆိုတဲ့ ဘွဲ့နာမည်လေးပဲ ရှိပေမယ့် သူ့ရဲ့စွမ်းအားကတော့ တိုင်းတာလို့ မရနိုင်ဘူး... သူ့ရဲ့ အဆင့်အတန်းက အဖွဲ့ခေါင်းဆောင်သုံးဦးရဲ့ အထက်မှာတောင် ရှိတယ်!"

"မင်းကို နဂါး စောင့်ရှောက်သူရဲ့ နောက်ကြောင်း ရာဇဝင်ကို စုံစမ်းစေချင်တယ်... ပြီးတော့ ဆင်းသက်ဂိုဏ်းမှာ အဖွဲ့ခေါင်းဆောင်တွေကလွဲလို့ သူ့ထက်ပိုပြီး အင်အားကြီးတဲ့သူ ရှိမရှိလည်း သိချင်တယ်..."

ခဏတာရပ်နားပြီး စုရှင်းက ထပ်ဖြည့်သည်-

"ဟုတ်တယ်၊ ဒီအရာအားလုံးကို မင်းရဲ့ဘေးကင်းရေးကို ထိပ်တန်းဦးစားပေး အဖြစ် ထားပြီး လုပ်ရမယ်!"

"အဆင်ပြေတဲ့အခါမှ စုံစမ်းပါ၊ တစ်ခုခုရှာနိုင်ရင် အကောင်းဆုံး ဆိုပေမယ့်၊ မရရင်လည်း ကိစ္စမရှိပါဘူး..."

စုရှင်း၏စကားကို ကြားသောအခါ လောရွှေရင်သည် ခေါင်းညိတ်ပြီး စကားလုံးတိုင်းကို မှတ်သားထားလိုက်သည်။

စုရှင်း၏ လုပ်ရပ်များသည် သာမန် ဖြစ်သည်။

လောရွှေရင်သည် ဆင်းသက်ဂိုဏ်းတွင် ဆယ်စုနှစ်များစွာ ယုံကြည်မှုကို တည်ဆောက်ခဲ့သည့်အတွက် သူမ၏ ခိုင်မာသော သစ္စာစောင့်သိမှု ပုံရိပ်အား လွယ်ကူစွာ သံသယဝင်နိုင်မည် မဟုတ်ပေ။

သူမသာ နဂါး စောင့်ရှောက်သူနှင့် ပတ်သက်သော အချက်အလက် အချို့ကို ဖော်ထုတ်နိုင်ခဲ့ပြီး ဆင်းသက်ဂိုဏ်း၏ နက်ရှိုင်းသော လုပ်ငန်းဆောင်တာများနှင့် ပတ်သက်၍ ပိုမိုသိရှိလာပါက ၎င်းသည် တကယ်ကို အလွန် ကောင်းမွန်ပေလိမ့်မည်။

နောက်ဆုံးအနေဖြင့် စုရှင်းသည် လောရွှေရင်ကို ကတိတစ်ခုပေးရန်လည်း မမေ့ခဲ့ပေ။

"ညီမငယ်လေး၊ ကြိုးစားပါ... အတိုဆုံး တစ်နှစ် ဒါမှမဟုတ် အကြာဆုံး နှစ်နှစ် သုံးနှစ်လောက်ကြာရင်... အဲဒီအချိန်ကျရင် မင်းရဲ့လျှို့ဝှက်ဘဝကို အဆုံးသတ်နိုင်ပြီ။ တိုင်းတစ်ပါး မျိုးနွယ်စုတွေကို တိုက်ရိုက် ရင်ဆိုင်ရမယ့် စစ်တပ်ထဲကို ဝင်ရောက်နိုင်ပါပြီ!"

"အဲဒီအချိန်ကျရင် မင်းကို ပြန်ကြိုဖို့ ငါကိုယ်တိုင် လာပြီး မင်းရဲ့ ပင်ပန်းနွမ်းနယ်မှုတွေကို ဆေးကြောပေးပါ့မယ်!"

စုရှင်း၏ စကားကို ကြားသောအခါ လောရွှေရင်င်၏ ရင်ထဲတွင် စိတ်လှုပ်ရှားမှုများ ပေါ်ပေါက်လာသည်။

ထို့နောက် စုရှင်းသည် လောရွှေရင်ထံမှ ထွက်ခွာသွားခဲ့သည်။ သူတို့သည် အချိန်အကြာကြီး ဆက်မနေတော့ဘဲ နောက်တစ်ကြိမ် တွေ့ဆုံမည့် အချိန်နှင့် နေရာကိုသာ ညှိနှိုင်းခဲ့ကြသည်။

တောင်ပေါ်မှ ထွက်ခွာပြီးနောက် စုရှင်းသည် သူ၏ခြေရာများကို ဖုံးကွယ်ခဲ့သည်။

ထို့နောက် သူသည် ကျွမ်းကျင်စွာ ဓားစီးနင်း၍ မဟာရှားနိုင်ငံ တစ်ဝက်လောက်ကို လှည့်ပတ်ခဲ့သည်။

ရေကြောင်း၊ ကုန်းကြောင်း၊ လေကြောင်း ခရီးစဉ်များကို ပေါင်းစပ်ကာ သူ၏လှုပ်ရှားမှုများကို အလွန်အမင်း ဝိုးတဝါး ဖြစ်စေခဲ့သည်။

နောက်ဆုံးတွင် စုရှင်းသည် လမ်းကြောင်းရှည်ကြီးကို လှည့်ပတ်ပြီးမှ ကျိုတိုသို့ ပြန်ရောက်လာပြီး ဝိညာဉ်စိုက်ခင်းဂူသို့ ဝင်ရောက်ခဲ့သည်။

"ဟမ်း မဆိုးပါဘူး၊ တကယ့် ဝိညာဉ်စုစည်း သစ်သားနဲ့ဆိုတော့ ဝိညာဉ်စုစည်းဆေးလုံး နှစ်သုတ် ဖော်စပ်နိုင်ပြီ..."

စုရှင်းသည် သူ့ရှေ့ရှိ ဝိညာဉ် စုစည်းသစ်သားကို ကြည့်ပြီး ခေါင်းအနည်းငယ် ညိတ်လိုက်သည်။ ထို့နောက် ဓားငယ်လေး တစ်ချောင်းကို ထုတ်ယူ၍ သစ်သားမှ အမှုန့်အချို့ကို ခြစ်ယူလိုက်သည်။

ထို့နောက် စုရှင်းသည် ဝိညာဉ်စုစည်းဆေးလုံး အသုတ်များစွာကို ဖော်စပ်ရန် နာရီဝက်ခန့် အချိန်ယူခဲ့သည်။

ဟုတ်ပါသည်။ ဤဆေးလုံးများကို နောက်ပိုင်းတွင် လောရွှေရင် ဒဏ္ဍာရီအဆင့်သို့ တိုးတက်နိုင်ရန် အတွက် ပြင်ဆင်ထားခြင်း ဖြစ်သည်။

ဝိညာဉ်စုစည်း ဆေးလုံးများကို ဖော်စပ်ပြီးနောက် စုရှင်းသည် အဆာခံ ဆေးလုံးများကို ဆက်လက် ပြုလုပ်ခဲ့သည်။

မကြာမီပင် တစ်ပတ်ကြာသွားသည်။

တစ်ပတ်အတွင်းမှာပင် စုရှင်းသည် အဆာခံဆေးလုံး ခြောက်ထောင်ကို ဖော်စပ်ခဲ့သည်။

အဆာခံဆေးလုံး ဖော်စပ်ခြင်း လုပ်ငန်းစဉ်သည် မျက်နှာအာဟာရပြု ဆေးလုံး လုပ်ငန်းစဉ်နှင့် ဆင်တူသည်။

နှစ်လအတွင်း စုရှင်းသည် အဆာခံ ဆေးလုံးပေါင်း ငါးသောင်းခန့်ကို ဖော်စပ်နိုင်ပေလိမ့်မည်။

ထိုအချိန်ကျလျှင် သူသည် ရှာစစစ်တပ်၏ လက်ထဲမှ ဒုတိယအဆင့် သတ္တုသိုက်ကို လေလံဆွဲနိုင်ပေလိမ့်မည်။

နိုဝင်ဘာလ ၁၁ ရက်နေ့တွင် ကျင်းချုံးရွှယ်သည် အလုပ်ကိစ္စများဖြင့် အလုပ်ရှုပ်နေပြီး အိမ်တော်တွင် မရှိနေပေ။

ထို့ကြောင့် စုရှင်းသည် သူ့ကိုယ်သူ ရုပ်ဖျက်ပြီး ကိုယ်ပိုင်စွမ်းအင်ကို ဖုံးကွယ်ပြီးနောက် အိမ်တော်မှ တစ်ပတ်စာ ကုန်ပစ္စည်း အသစ်များကို ယူဆောင်လာကာ ဝိညာဉ်စိုက်ခင်းဂူသို့ ပြန်သွားခဲ့သည်။

တစ်ပတ်စာ ကုန်ပစ္စည်း အသစ်များသည် စုရှင်းအတွက် စွမ်းအင်မှတ်ပေါင်း တစ်ရာ့ငါးဆယ်သန်းနီးပါးကို ပေးခဲ့ပြီး သူ၏ စုစုပေါင်း စွမ်းအင်ကို တစ်ဘီလီယံ ငါးရာ့ငါးဆယ်သန်းဝန်းကျင် အထိ ရောက်ရှိစေခဲ့သည်။

"သရုပ်ပြခြင်း အသစ်ကို စတင်ဖို့ အချိန်တန်ပြီ..."

စုရှင်းသည် တီးတိုးရေရွတ်လိုက်သည်-

"ဒီတစ်ခါတော့ မြေဓားနဲ့ပတ်သက်တဲ့ ငါ့ရဲ့နားလည်မှုကို ဆက်ပြီး တိုးတက်အောင် လုပ်မယ်... ပြီးတော့ ငါ့ရဲ့ ကိုယ်ခန္ဓာ သန့်စင်ခြင်း ကျင့်ကြံမှု အဆင့်ကို တတ်နိုင်သမျှ တိုးတက်အောင် ကြိုးစားမယ်!”

…