ဝိညာဉ်စွမ်းအင် မှေးမှိန်သောခေတ်၏ ဝမ်းနည်းမှုများ၊ ကျဆုံးသွားသော ပါရမီရှင်!_၃

[မုန်းတယ်...]

[ဤစကားကို ကြားပြီးနောက် သင်သည် တိတ်ဆိတ်သွားသည်။ ဒြပ်စင်ငါးပါးပိုင်ရှင် မသေဆုံးမီ အချိန်တွင် သူ၏ ကြီးမားလှသော မုန်းတီးမှုကို သင် အမှန်တကယ် ခံစားမိခဲ့သည်။]

[သူ မုန်းတီးသည်မှာ သင့်ကို မဟုတ်ကြောင်း သင် သိသည်။]

[ထိုအစား သူသည် ဝိညာဉ်စွမ်းအင် ခေါင်းပါးသော ခေတ်တွင် ထူးချွန်ထက်မြက်သော ပါရမီရှင်အဖြစ် မွေးဖွားလာရခြင်း အတွက် ဝမ်းနည်းစွာ မုန်းတီးနေခြင်းသာ ဖြစ်သည်။]

[သူသည် သူ၏ ရင်းနှီးသော မိတ်ဆွေ စစ်မှန်သော ဝမ်မူ၏ သစ္စာဖောက်ခြင်းကို မုန်းတီးကာ အသက်ရှင်လျက် သေနေရသူတစ်ဦး ဖြစ်သွားရသည့် ကံကြမ္မာဆိုးကို မုန်းတီးနေခြင်း ဖြစ်သည်။]

[ဒြပ်စင်ငါးပါး ပိုင်ရှင်၏ အသက်ရှုသံသည် တဖြည်းဖြည်း မှေးမှိန်သွားပြီး လွန်ခဲ့သော နှစ်ထောင်ပေါင်းများစွာက ခေတ်တစ်ခုကို လင်းလက် တောက်ပစေခဲ့သည့် ထိပ်တန်း ပါရမီရှင်တစ်ဦး နောက်ဆုံးတွင် သေဆုံးသွားခဲ့သည်။]

[သင်သည် ဒြပ်စင်ငါးပါး ပိုင်ရှင်အပေါ် အဆိုးမြင်သည့် စိတ်များစွာ မရှိပါ။ သူသည် ခေတ်၏ ပြင်းထန်သော ရေစီးကြောင်း အောက်တွင် သေဆုံးသွားရသည့် နောက်ထပ် ဝမ်းနည်းစရာ ပုံရိပ်တစ်ခုမျှသာ ဖြစ်သည်။]

[ထို့ကြောင့် သင်သည် ဒြပ်စင်ငါးပါး ပိုင်ရှင်၏ ခန္ဓာကိုယ်ကို စုဆောင်းယူပြီး မြေကောင်းရာ မြေကွက်တစ်ခုကို ရှာဖွေ၍ မြှုပ်နှံပေးရန် ပြင်ဆင်ခဲ့သည်။]

[ထို့နောက် အပျက်အစီးများ လုံးဝမပြိုကျမီ အခွင့်ကောင်းယူ၍ ရှေးဟောင်းသင်္ချိုင်း၏ အဓိကနေရာသို့ သင် သွားခဲ့သည်။]

[သင်သည် ကြေးနီကျောက်ခေါင်းကို တွန်းဖွင့်လိုက်သည်။ ၎င်းအတွင်း၌ သိုလှောင်လက်စွပ် တစ်ခုကို သင် တွေ့ရှိခဲ့သည်။]

[သင်သည် နတ်အာရုံဖြင့် အဓိက နေရာတစ်ဝိုက်ကို လှည့်ပတ်စစ်ဆေးကာ ဘာမှ ကျန်ရှိခြင်း မရှိကြောင်း အတည်ပြုပြီးနောက် ဒြပ်စင်ငါးပါးဂိုဏ်း၏ အပျက်အစီးများမှ လျင်မြန်စွာ ထွက်ခွာသွားခဲ့သည်။]

[ဒြပ်စင်ငါးပါးဂိုဏ်း၏ အပျက်အစီးများမှ သင် ထွက်ခွာပြီးနောက် ၎င်းသည် လုံးဝ ပြိုကျ ပျက်စီးသွားခဲ့သည်။]

[အပျက်အစီးများ၏ အစီအရင် ပျက်စီးသွားသည်နှင့် တစ်ပြိုင်နက် ဒြပ်စင်ငါးပါးဂိုဏ်း၏ အကြွင်းအကျန်များသည် အာကာသ အက်ကွဲကြောင်းများထဲတွင် ပျောက်ကွယ်သွားသည်။ ၎င်းတို့၏ တည်နေရာကို မသိရှိနိုင်တော့ပေ။]

[သင်သည် မသေမျိုး စစ်သည်တော်ခေတ် အကျဉ်းခန်းမှ လျင်မြန်စွာ ထွက်ခွာခဲ့သည်။ ဒြပ်စင်ငါးပါး ပိုင်ရှင်နှင့် ပြင်းထန်စွာ တိုက်ခိုက်ပြီးနောက် သင့်ခန္ဓာကိုယ်သည် ပြင်းထန်သော ဒဏ်ရာများ ရရှိထားသောကြောင့် စိတ်တည်ငြိမ်စွာဖြင့် အနားယူရန် လိုအပ်ခဲ့သည်။]

[ထို့ကြောင့် နောက်သုံးလတာ ကာလပတ်လုံး သင်သည် ဝိညာဉ်စိုက်ခင်းဂူ အတွင်းတွင် အေးချမ်းစွာ နေထိုင်၍ ဒဏ်ရာများကို ပြန်လည် ကုစားခဲ့သည်။]

[ဤအနားယူချိန်ကို အခွင့်ကောင်းယူ၍ ဒြပ်စင်ငါးပါး ပိုင်ရှင်ထံမှ သင်သည် သင် ရရှိခဲ့သော သိုလှောင်လက်စွပ်ကိုလည်း စစ်ဆေးကြည့်ရှုခဲ့သည်။]

[သိုလှောင်လက်စွပ် အတွင်းတွင် သင် မျှော်မှန်းထားသည့် အတိုင်း များပြားလှသော ဝိညာဉ်စွမ်းအင် ကျောက်တုံးများ မရှိဘဲ အစီအရင်များ ပြုလုပ်ရန် အတွက် ပစ္စည်းများနှင့် ရတနာများစွာသာ ရှိခဲ့သည်။]

[ဤရတနာများ အပြင် သင်သည် အလွန် အရေးကြီးသော ကျောက်ပြား နှစ်ချပ်ကို တွေ့ရှိခဲ့သည်။]

[တစ်ခုမှာ ဒြပ်စင်ငါးပါးဂိုဏ်းက နှစ်တစ်သောင်းကြာ လက်ဆင့်ကမ်းခဲ့သော အစီအရင် ရေးဆွဲနည်းများ ဖြစ်သည့် အစီအရင် နည်းပညာ၏ တာအို ဖြစ်သည်။]

[နောက်တစ်ခုမှာ ဒြပ်စင်ငါးပါး ပိုင်ရှင်ကိုယ်တိုင် တိုးတက်အောင် ပြုပြင်ထားသော နတ်ဘုရား နည်းစနစ် ဖြစ်သည့် ဒြပ်စင်ငါးပါး အပြန်အလှန် ဖြစ်ပေါ်စေသည့် နည်းပညာ ဖြစ်သည်။]

[ဤကျောက်ပြား နှစ်ခုတွင် မှတ်တမ်း တင်ထားသော အရာများသည် သင့်အတွက် အလွန် အကျိုးရှိခဲ့သည်။]

[ဒြပ်စင်ငါးပါး ဖြစ်ပေါ်စေသော နည်းပညာသည် ဒြပ်စင်ချင်း ကိုက်ညီသော စိတ်စွမ်းအင်များကို အချင်းချင်း ပေါင်းစပ်၍ တစ်ခုအပေါင်း တစ်ခုသည် နှစ်ခုထက် ပိုကြီးသော အကျိုးသက်ရောက်မှုကို ရရှိစေနိုင်သည်။]

[ဒြပ်စင် ကိုက်ညီသော ဝိဉာဉ်အမြစ် ရှိသည့် ကျင့်ကြံသူများသည် ၎င်းတို့၏ နည်းပညာများကို ထုတ်လွှတ်သောအခါ စွမ်းအား ပိုမိုရရှိရုံ သာမက ကျင့်ကြံမှုနှုန်း အနည်းငယ်ကိုပါ တိုးတက်လာစေသည်။]

[ထို့အပြင် သင်သည် တာအို အစီအရင်ပညာ၏ အခြေခံများကို သင်ယူပြီးနောက် ဒြပ်စင်ငါးပါးဂိုဏ်းမှ ကျန်ခဲ့သော အစီအရင် လက်စွဲစာအုပ်သည် သင့်အတွက် အဖိုးမဖြတ်နိုင်သော ရတနာကြီးတစ်ခု ဖြစ်လာခဲ့သည်။ ဤအစီအရင် လက်စွဲစာအုပ်သည် နက်နဲဆန်းကြယ်ပြီး သင် လေ့လာရန် အတွက် များစွာ အကျိုးပြုခဲ့သည်။]

ဤသည်ကို မြင်ပြီးနောက် စုရှင်း၏ မျက်နှာ အမူအရာသည် စိတ်ရှုပ်ထွေးမှုနှင့် စိတ်သက်သာရာရမှုတို့ဖြင့် ရောထွေးနေခဲ့သည်။

"ဝိညာဉ်စွမ်းအင် မှေးမှိန်တဲ့ခေတ်မှာ နေထိုင်ရတာက...ကျင့်ကြံသူတွေက အရင်က ခမ်းနားတောက်ပတဲ့ ခေတ်ကာလတွေကို မခံစားရတော့ဘူး"

"ဒီခေတ်ရေစီးအောက်မှာ အလွန်တစ်ရာ အရည်အချင်း ထက်မြက်တဲ့ ပါရမီရှင်တွေက အဖြစ်ဆိုးဆုံးပဲ။"

"သာမန် ကျင့်ကြံမှုခေတ် ရွှေရောင်ခေတ်ကြီးမှာ မွေးဖွားလာခဲ့ရင်တော့ နတ်ဘုရားဖြစ်ဖို့ နီးကပ်နေနိုင်တာပေါ့..."

"ဒါပေမဲ့ အခုတော့ သူတို့ဟာ မြေဆီလွှာအဖြစ် ပြောင်းလဲသွားရပြီ..."

စုရှင်းသည် သက်ပြင်းချရင်း ကျဆုံးသွားသော ပါရမီရှင်များ အတွက် ဝမ်းနည်းလာသည်။

သို့သော် စုရှင်းသည် လျင်မြန်စွာပင် သတိပြန်ဝင်လာသည်။

"ဒါပေမယ့် ဒီလို ကောင်းကင်ဘုံကို ဆန့်ကျင်တဲ့ သရုပ်ပြစက်နဲ့ဆိုရင် ငါကတော့ နတ်ဘုရား ဖြစ်မယ့်လမ်းကို တစ်စွန်းတစ်စ မြင်ရမှာ သေချာတယ်။ ငါသာ အဲဒီကြောက်မက်ဖွယ် ကောင်းတဲ့ သတ္တဝါကြီးကို သတ်နိုင်ခဲ့ရင် ကမ္ဘာသုံးထောင်လုံးကို ငါ့ စိတ်တိုင်းကျ လှည့်လည်သွားလာနိုင်ပြီ" စုရှင်းသည် သူ့ဘာသာ ရေရွတ်လိုက်သည်။

စုရှင်း၏ မျက်လုံးများတွင် မျှော်လင့်ချက် အရိပ်အယောင်များ ပေါ်လာခဲ့သည်။

"လက်ရှိ အခြေအနေ အတွက်ဆိုရင် ဒီ ဒြပ်စင်ငါးပါး အပြန်အလှန် ဖြစ်ပေါ်စေတဲ့ နည်းစနစ် နဲ့ တာအို အစီအရင် ပညာက ငါ့အတွက် တော်တော်လေး အသုံးဝင်နိုင်တယ်။ သရုပ်ပြခြင်းပြီးမှ သူတို့ရဲ့ စျေးနှုန်းကို ကြည့်လိုက်မယ်"

ထိုသို့တွေးရင်း စုရှင်းသည် သရုပ်ပြခြင်း ဖန်သားပြင်ကို ကြည့်လိုက်သည်။

[သင်သည် ဒြပ်စင်ငါးပါး ပိုင်ရှင်ကို ရှုခင်းသာယာ၍ လှပသော တောင်ပေါ်တွင် မြှုပ်နှံပေးခဲ့သည်။ ထူးချွန်သော ဘိုးဘွားတစ်ဦး ဖြစ်သည့် စစ်မှန်သော မသေမျိုး တစ်ဦး၏ လွန်မြောက်ခြင်းနှင့် ကျင့်ကြံခြင်း လမ်းခရီး၏ ကြမ်းတမ်းမှုကို သင် ခံစားခဲ့ရသည်။]

[သင်၏ စိတ်အခြေအနေသည် တိုးတက်လာပြီး နတ်ဘုရားလမ်းကို ရှာဖွေလိုသော ဆန္ဒသည် ပိုမိုခိုင်မာလာခဲ့သည်။]

[တစ်နေ့တွင် နတ်ဆိုးနှိမ်နင်းရေး စခန်းသည် ချိုးဖောက်ခံခဲ့ရပြီး လူသားမျိုးနွယ်သည် မျိုးသုဉ်းလုနီးပါး အခြေအနေသို့ ရောက်ရှိခဲ့သည်။]

[လအနည်းငယ် ကြာပြီးနောက် ဧရာမသားရဲကြီး တစ်ကောင် ဆင်းသက်လာပြီး ရှားနိုင်ငံ တစ်ခုလုံးကို တစ်ငုံတည်းဖြင့် မျိုချပစ်လိုက်သည်။]

[သင်သည်လည်း သားရဲ၏ ဗိုက်ထဲသို့ မျိုချခံလိုက်ရသည်။]

[သင် ချက်ချင်း မသေခဲ့ပါ။]

[သင်သည် အချိန်အတော်ကြာအောင် အသက်ရှင်နေခဲ့သည်။]

[အာကာသ လှိုင်းဂယက်ကြောင့် သင် သေဆုံးခဲ့သည်။]

[သင်၏ နတ်ဝိဉာဉ်သည် လုံးဝ ပျက်စီးသွားခဲ့သည်။]

[သင် သေဆုံးခဲ့သည်။]

[ဒင်! ဤသရုပ်ပြခြင်း ပြီးဆုံးသွားပါပြီ။]

သရုပ်ပြခြင်း ပြီးဆုံးသွားပြီးနောက် စုရှင်းသည် သက်ပြင်းရှည်ကြီး ချလိုက်သည်။

"ဒီသရုပ်ပြခြင်းကနေ ရရှိတဲ့ အကျိုးအမြတ်တွေက တကယ် ကြီးမားတာပဲ။ လက်ရှိ ငါ့ရဲ့ခွန်အားနဲ့ဆိုရင် ဝိညာဉ်ပေါက်ကွဲခြင်း နည်းစနစ်ကို ကျွမ်းကျင်ပြီးတဲ့နောက် ကြီးမြတ်သော ဧကရာဇ်အဆင့် အောက်မှာဆို ငါ ဘယ်သူ့ကိုမှ မရှုံးနိမ့်နိုင်လောက်ဘူး"

"ဒါပေမဲ့ ကျင့်ကြံခြင်းလောကရဲ့ အတိတ်က ပါရမီရှင်တွေကိုတော့ သတိထားရမယ်။ ဒြပ်စင်ငါးပါး ပိုင်ရှင်ကိုတောင် ဒီလောက် ခက်ခက်ခဲခဲ ရင်ဆိုင်ခဲ့ရတယ်ဆိုရင် စစ်မှန်သော ဝမ်မူ က ပိုပြီးတောင် ကြောက်ဖို့ ကောင်းလိမ့်အုံးမယ်"

"ဒြပ်စင်ငါးပါးရဲ့ အပျက်အစီးတွေကို အခုသွား စူးစမ်းတာကတော့ အန္တရာယ် ရှိနိုင်သေးတယ်..."

"ငါ ခန္ဓာကိုယ် ပေါင်းစည်းခြင်း အဆင့်ကို ရောက်တဲ့အခါမှ ဒြပ်စင်ငါးပါး အပျက်အစီးတွေကို သွားစူးစမ်းရမယ်။ အဲဒီအချိန်ကျရင် ဒြပ်စင်ငါးပါး အပြန်အလှန် ဖြစ်ပေါ်စေတဲ့ နည်းစနစ်နဲ့ တာအို အစီအရင် ပညာကို အလွယ်တကူ ရနိုင်မှာပဲ"

စုရှင်းသည် အနည်းငယ် ခေါင်းညိတ်လိုက်ပြီး ဤပန်းတိုင်ကို သူ၏မှတ်စုစာအုပ်တွင် ချရေးလိုက်သည်။ ထို့နောက် ဤသရုပ်ပြခြင်း အတွက် ရရှိသော ဆုလာဘ်စာရင်းကို ကြည့်လိုက်သည်။

[အဆာခံ သုံးရက်၊ အစာကိုးနပ် ပျက်ကွက်ခြင်း]: ခရမ်းရောင် စွမ်းရည်၊ စျေးနှုန်း - စွမ်းအင်မှတ် ၁ သန်း။

[အနှစ် ၂၀ကြာ ဆေးလုံး ဖော်စပ်ခြင်း အတွေ့အကြုံ]: လဲလှယ်ပြီးနောက် လက်ရှိ ဆေးလုံးဖော်ခြင်းဆိုင်ရာ နားလည်နိုင်စွမ်း အနည်းငယ် တိုးတက်လာမည်၊ စျေးနှုန်း - စွမ်းအင်မှတ် ၂ သန်း။

[ဝိညာဉ်ပေါက်ကွဲခြင်း နည်းစနစ် (အကြီးတန်း အောင်မြင်မှု)]: စုရှင်း သူ၏သုတေသနဖြင့် ဖန်တီးခဲ့သော နတ်ဘုရားပညာဖြစ်ပြီး ဝိညာဉ်စွမ်းအင်ကို အစွန်းရောက် ဖိသိပ်ခြင်းဖြင့် ကြီးမားသော စွမ်းအားကို ထုတ်လွှတ်နိုင်သည်။ ပေါက်ကွဲမှု ဖြစ်ပြီးနောက် အံ့မခန်း အကျိုးသက်ရောက်မှုများကို ဖန်တီးနိုင်ပြီး ဝိညာဉ်စွမ်းအင်၏ မတူညီသော ဂုဏ်သတ္တိများနှင့် ပေါင်းစပ်လိုက်သောအခါ အသေးစား နတ်ဘုရား စွမ်းရည်နှင့် နှိုင်းယှဉ်နိုင်သည်။ သို့သော် စိတ်စွမ်းအင်များစွာ ကုန်ဆုံးပြီး ထပ်မံပြုပြင်ရန် လိုအပ်သည်။ စျေးနှုန်း - စွမ်းအင်မှတ် ၁၅၀ သန်း။

[ဆန္ဒပြည့် ရွှေဒယ်အိုး နည်းစနစ် (အကြီးစား အောင်မြင်မှု)]: နတ်အာရုံဖြင့် တိုက်ခိုက်ခြင်းနှင့် ကာကွယ်ခြင်း နည်းစနစ် ဖြစ်ပြီး ဆန္ဒပြည့် ရွှေဒယ်အိုးသည် လူတစ်ဦး၏ နတ်အာရုံကို ဒယ်အိုးတစ်လုံးကဲ့သို့ ခိုင်မာစေသည်။ ထို့ပြင် တိုက်ခိုက်မှုနှင့် ကာကွယ်မှု နှစ်မျိုးစလုံး အတွက် ကောင်းမွန်သည်။ ၎င်းကို နတ်အာရုံ တိုက်ခိုက်ခြင်း နည်းစနစ်များထဲတွင် အကောင်းဆုံးဟု သတ်မှတ်သော်လည်း ရှေးခေတ် နတ်အာရုံ နည်းပညာများနှင့်မူ နှိုင်းယှဉ်၍ မရပေ။ ၎င်း၏ အားသာချက်မှာ အကူးအပြောင်း နည်းစနစ် တစ်ခုအဖြစ် အသုံးပြုနိုင်ပြီး အခြားသော နတ်အာရုံ နည်းစနစ်များနှင့် မတိုက်ဆိုင်ခြင်း ဖြစ်သည်။ စျေးနှုန်း - စွမ်းအင်မှတ် ၁၅၀ သန်း။

[ဒြပ်စင်ငါးပါး အပြန်အလှန် ဖြစ်ပေါ်စေသော နည်းပညာ]: ဒြပ်စင်ငါးပါးပိုင်ရှင် နားလည် သဘောပေါက်ထားသော အသေးစား နတ်ဘုရား စွမ်းရည်တစ်ခု ဖြစ်ပြီး အကြီးစား နတ်ဘုရား စွမ်းရည် အဆင့်နီးပါးရှိကာ အလွန် နက်နဲဆန်းကြယ်သည်။ စျေးနှုန်း - စွမ်းအင်မှတ် ၃၀၀ သန်း။

[တာအို အစီအရင် ပညာ]: ဒြပ်စင်ငါးပါးဂိုဏ်းမှ နှစ်တစ်ထောင်ကြာ လက်ဆင့်ကမ်းလာသော ရှေးဟောင်း အစီအရင် လက်စွဲစာအုပ် ဖြစ်ပြီး ကျင့်ကြံသူများစွာတို့က ပြုပြင်မွမ်းမံထားသောကြောင့် အစီအရင်များ၏ မဟာတာအိုသို့ တိုက်ရိုက် ဦးတည်စေသည်။ စျေးနှုန်း - စွမ်းအင်မှတ် ၂၀၀ သန်း။

…