ရှေးဟောင်း နတ်ဆိုး မင်းသားကို သတ်ဖြတ်ခြင်း

"မဖြစ်နိုင်ဘူး ...”

ငွေရောင် ဝတ်စုံဝတ် နတ်ဆိုး ခေါင်းဆောင်က ရေရွတ်လိုက်သည်။

သူ၏ အမြင်၌ ရှေးဟောင်းနတ်ဆိုး မင်းသားသည် အခြေတည် ဝိညာဉ်အဆင့်နှင့်ပင် ယှဉ်၍ တိုက်ခိုက်နိုင်သည့် ပြိုင်ဘက်ကင်း ပါရမီရှင် ဖြစ်သည်။ ထိုလူသားမှာ အစွမ်းထက်သည် ဆိုသော်လည်း အခြေတည် ဝိညာဉ်အဆင့်သို့ မရောက်သေးသည်မှာ သေချာသည်။ သို့တိုင်အောင် သူသည် ရှေးဟောင်းနတ်ဆိုး မင်းသားကို အနိုင်ယူ နိုင်ခဲ့သည်။

"အား ...”

ကမ္ဘာပျက်မတတ် အော်ဟစ်သံနှင့်အတူ မြေကြီးပေါ်ရှိ တွင်းပေါက်ထဲမှ အနက်ရောင် အလင်းတစ်ခု ထိုးတက်လာ၏။ ထိုအလင်းက ကောင်းကင်တွင်ရပ်ကာ ရှေးဟောင်း နတ်ဆိုး မင်းသားအဖြစ် ပြန်လည် ပြောင်းလဲသွားသည်။

ရှေးဟောင်း နတ်ဆိုး မင်းသား၏ ပါးစပ်ထောင့်တွင် သွေးများ စီးကျနေကာ သံချပ်ကာ ဖုံးအုပ်မထားသော အစိတ်အပိုင်းများမှာ ရှရာများဖြင့် ပြည့်နှက်နေ၏။ ထို့အတူ သူ၏ဦးချို တစ်ဖက်မှာလည်း ကျိုးနေခဲ့ပြီ ဖြစ်သည်။ ချန်းဖန်၏ တိုက်ခိုက်မှုသည် အမတေ သုံးခု လောင်ကျွမ်းသော စွမ်းအား အလုံးစုံကို ထည့်သွင်းထားရာ အခြေတည် ဝိညာဉ်အဆင့်၏ တိုက်ခိုက်မှုအလား ပြင်းထန်ခဲ့သည်။

သို့သော်လည်း ရှေးဟောင်း နတ်ဆိုး မင်းသားက ရယ်မောလိုက်၏။

"လူသား ... မင်းက စွမ်းအင် အမြုတေတွေကို လောင်ကျွမ်းပစ် နေတာပဲ ... မင်း အဲဒီလို တိုက်ခိုက်မှုမျိုး ဘယ်နှကြိမ် လုပ်နိုင်ဦး မှာလဲ ...”

"ငါ့အမြုတေတွေထဲက စွမ်းအား အကုန်လုံး သုံးရမယ် ဆိုရင်တောင် ငါ မင်းကို ရအောင် သတ်မယ် ...”

ချန်းဖန်က လက်ထဲရှိ ဓားအား မြှောက်လိုက်၏။

သူ၏ အမူအရာက နောင်တရခြင်း အလျှင်း ကင်းမဲ့ နေ၏။ ဤတိုက်ပွဲ၌ အမြုတေ ငါးခုစလုံး သုံးရလျှင်ပင် သူသည် နောင်သုံးနှစ်အတွင်း ကောင်းကင် အမြုတေငါးခု ပြန်လည် ဖွဲ့စည်းနိုင်သည်။

"ဘုန်း ...”

ချန်းဖန်၏ ခန္ဓာကိုယ်သည် အဇူရာနှင့် အနက်ရောင် အလင်းများဖြင့် တောက်ပလာ၏။ ထို့နောက် သူသည် ဓားအားချိန်ရွယ်ကာ ရှေးဟောင်း နတ်ဆိုး မင်းသားထံ တိုးဝင်သွားသည်။

"လာစမ်း ...”

ရှေးဟောင်းနတ်ဆိုး မင်းသားက အော်ဟစ်လိုက်သည်။ ထိုအခါ အနက်ရောင် အလင်းတန်းများသည် သူ၏ ခန္ဓာကိုယ်မှ ထွက်ပေါ်လာ၏။ ရှေးဟောင်းနတ်ဆိုး သံချပ်ကာ၏ ပံ့ပိုးမှုတွင် သူ၏ စွမ်းအားမှာ အကန့်အသတ်မရှိ တိုးမြင့်သွားသည်။

"ဘုန်း ... ဘုန်း ... ဘုန်း ...”

သူတို့ နှစ်ယောက်ကား ကောင်းကင်တွင် နောက်တစ်ကြိမ် တိုက်ခိုက်လိုက်ကြပြန်ပြီ ဖြစ်သည်။

ယခု တစ်ကြိမ်၌ ချန်းဖန်၏ စွမ်းအားသည် ပထမ တစ်ကြိမ်ကထက် အနည်းငယ် အားနည်း နေခဲ့သည်။ သို့သော်လည်း ထျန်းမိန်ဓားသည် လေထုတွင် ကခုန်ကာ ထင်မှတ် မထားသော နေရာများကို တိုးဝင်နေသည်။ ထိုအခါ ကောင်းကင်မှာ မတူ ကွဲပြားသော ဟင်းလင်းပြင်များ အဖြစ် ပိုင်းခြားသွား၏။

ရှေးဟောင်းနတ်ဆိုး မင်းသားမှာ တဖြည်းဖြည်း စိတ်ပူ လာခဲ့သည်။ ရှေးဟောင်း နတ်ဆိုး မျိုးနွယ်သည် ၎င်းတို့၏ တိုက်ခိုက်ရေး နည်းစနစ်၊ ကျင့်စဉ်များဖြင့် ထင်ရှားသည်။ လူသားများသည် အစွမ်းထက် ဓမ္မ ရတနာ၊ နတ်ဘုရား စွမ်းအားတို့ကို ပိုင်ဆိုင်သည် ဆိုသော်လည်း တိုက်ခိုက်ရေး နည်းစနစ်၊ ကျင့်စဉ်များတွင် ရှေးဟောင်း နတ်ဆိုး မျိုးနွယ်ကို မယှဉ်နိုင်ချေ။

"ဘယ်လို ဖြစ်နိုင်မှာလဲ ... သူက လူသား တစ်ယောက်မလား ... သူ့ရဲ့ ဓားနည်းစနစ်က ဘာလို့ ဒီလောက်တောင် ဆန်းကြယ် ရတာလဲ ... ဒီလို ဓားကျင့်စဉ်မျိုးက နှစ်သန်းချီ သမိုင်းကြောင်း ရှိတဲ့ ဒဏ္ဍာရီလာ ဂိုဏ်းကြီးတွေမှာပဲ ရှိတာမလား"

ရှေးဟောင်း နတ်ဆိုး မင်းသားက ထိတ်လန့်စွာ တွေးလိုက်မိ၏။

"ခွန်ပန် ကောင်းကင်ခုံရုံးသို့ ...”

ချန်းဖန်က ဓားအား လွှဲယမ်းလိုက်ရာ သူ၏ အနောက်၌ ခွန်ပန် ပေါ်လာခဲ့သည်။

ထိုအချိန်၌ ခွန်ပန် အမြုတေသည် ကွဲအက်သွားပြီ ဖြစ်သည့်တိုင် ချန်းဖန်သည် ခွန်ပန် ပန်းချီကို အောင်မြင်ထားပြီး ဖြစ်ရာ ခွန်ပန်၏သွေးမှာ သူ၏ ကိုယ်တွင်း၌ စီးဆင်းနေဆဲ ဖြစ်သည်။ သို့ဖြစ်ရာ သူသည် ခွန်ပန်၏ စွမ်းအားကို အချိန်မရွေး အသုံးပြုနိုင်သည်။

"ကလန့် ...”

ထျန်းမိန်ဓားသည် ခွန်ပန် အသွင်သို့ ပြောင်းလဲကာ ကောင်းကင်သို့ ပျံတက်၏။

"ဘုန်း ...”

ထိုဓားချက်သည် မည်သို့မျှ မျှော်လင့် မထားသော နေရာသို့ တိုးဝင်သွားသည်။ နတ်ဆိုးဓားသည် ကျိုးကာ ခွန်ပန်၏ အရိပ်က ၎င်းအား ဖြတ်ကျော်သွားသည်။

"ခရက် ...”

ဓားချီ၏ ပိုင်းဖြတ်မှုတွင် ရှေးဟောင်း နတ်ဆိုး မင်းသား၏ ခန္ဓာကိုယ်မှာ နှစ်ပိုင်း ပိုင်းပြတ်သွား၏။ ထိုဓားရာသည် နဖူးမှ နေ၍ ရင်ဘတ်တိုင် အလျားလိုက် ရှည်ကာ ကြီးမားသည်။ နတ်ဆိုး သံချပ်ကာပင်လျှင် ၎င်းကို တားဆီးနိုင်စွမ်း မရှိခဲ့ချေ။

"ဟူး ... ဟူး ...”

သို့သော်လည်း စက္ကန့် အတွင်းမှာပင် နတ်ဆိုး မင်းသား၏ ခန္ဓာကိုယ်သည် ပြန်လည် ပေါင်းစည်းသွားသည်။ ထို့နောက် သူက အေးစက်သော နှာခေါင်းရှုံ့သံ တစ်ခုကို ထုတ်လွှတ်၏။

"လူသား ... ငါတို့ရဲ့ ခန္ဓာကိုယ်တွေက စကြဝဠာမှာ ကျော်ကြားတယ် ... နောက်ပြီး ငါက အမိန့်ပေးသူ ဖြစ်ဖို့ ခြေလှမ်းဝက်ပဲ လိုတော့တဲ့ ရှေးဟောင်း နတ်ဆိုး တစ်ယောက်ပဲ ... မင်း ငါ့ကို မသတ်နိုင်ဘူး ...”

"ဘုန်း ...”

ချန်းဖန်က ဘာမှ ပြန်ပြောဘဲ ထပ်မံ တိုက်ခိုက်လိုက်၏။ သူက ရွှမ်ဝူ အမြုတေကို ပေတစ်သောင်းမျှ ရှည်လျားသော ရွှမ်ဝူ သားရဲအဖြစ် ပြောင်းလဲလိုက်သည်။ အနက်ရောင် ရေများ၏ ဝန်းရံမှုတွင် ၎င်းသည် ကမ္ဘာလောကို ထိန်းချုပ်၏။

"ရွှမ်ဝူသွေး ...”

ရှေးဟောင်း နတ်ဆိုး မင်းသားမှာ အံ့အားသင့် သွားသည်။ သို့သော်လည်း အဆုံး၌ သူက အော်ဟစ် ရယ်မောလိုက်သည်။

"ကောင်းတယ် ... ငါ ရွှမ်ဝူသွေးကို နတ်ဆိုး အရှင်ဆီ ဆက်သနိုင်ရင် သူကငါ့ကို နတ်ဆိုး အမိန့်ပေးသူထက် ပိုတဲ့ စွမ်းအားကို ပေးလိမ့်မယ်"

ထို့နောက် ရှေးဟောင်း နတ်ဆိုး မင်းသားက ခန္ဓာကိုယ်အား လှုပ်ယမ်းကာ ပေတစ်သောင်း အမြင့်ရှိသော နတ်ဆိုးအဖြစ် ပြောင်းလဲလိုက်သည်။

၎င်း၏ ခန္ဓာကိုယ်သည် အနက်ရောင် အကြေးခွံများဖြင့် ဖုံးအုပ်ထားကာ မျက်လုံးများမှာလည်း သွေးရောင်စိန် အလား တောက်ပနေသည်။ ၎င်း၏ ကြီးမားသော အနက်ရောင် အတောင်ပံများမှာမူ ကောင်းကင်ကို ဖုံးလွှမ်းနေ၏။

"ဘုန်း ...”

ချန်းဖန်နှင့် ရှေးဟောင်း နတ်ဆိုး မင်းသားတို့ကား နောက်တစ်ကြိမ် တိုက်ခိုက် လိုက်ကြပြန်ပြီ ဖြစ်သည်။

ရွှမ်ဝူ နယ်မြေနှင့် ရှေးဟောင်းနတ်ဆိုး နယ်မြေတို့သည် ပြန့်ကားနေ၏။ အဆုံးမဲ့ ရွှမ်မင်ချီနှင့် ရှေးဟောင်း နတ်ဆိုးချီတို့သည် တစ်ခုနှင့် တစ်ခု တိုက်စားကြသည်။ ထိုအခါ မိုင်တစ်ရာ ပတ်ဝန်းကျင်မှာ အပျက်အစီး ကမ္ဘာအဖြစ် ပြောင်းလဲ သွားခဲ့၏။

"ဘုန်း ...”

ရွှမ်ဝူသည် ၎င်း၏ လက်သည်းများကို သုံး၍ တိုက်ခိုက်ကာ ရှေးဟောင်း နတ်ဆိုးမင်းသားမှာမူ နတ်ဆိုးဓားကို အနက်ရောင် အလင်း အသွင်သို့ ပြောင်းလဲ တိုက်ခိုက်သည်။ ထိုတိုက်ပွဲသည် အလွန် ပြင်းထန်ကာ တိုက်ခိုက်သူ နှစ်ယောက် စလုံး၏ အသက်ကို လောင်းကြေးထပ် ထားခဲ့သော တိုက်ပွဲ ဖြစ်သည်။

"ဘုန်း ...”

စက္ကန့်ပိုင်း အတွင်းမှာပင် ရွှမ်ဝူနှင့် ရှေးဟောင်း နတ်ဆိုးမင်းသား နှစ်ယောက် စလုံးသည် ဒဏ်ရာများရကာ သွေးစက်များက ကောင်းကင်မှ ပြုတ်ကျလာသည်။ အဆုံး၌ ချန်းဖန်၏ ခန္ဓာကိုယ် တစ်ခုလုံးမှာ သွေးများဖြင့် ရွှဲရွှဲစို သွားတော့၏။

ချန်းဖန်သည် ထူးခြား အောင်မြင်ခြင်း အဆင့် ကောင်းကင် ခန္ဓာကို ပိုင်ဆိုင်ထားသည့်တိုင် မူလ အဆင့်တွင်သာ ရှိနေသေးသူ ဖြစ်သည်။ အခြား တစ်ဖက်၌ ရှေးဟောင်း နတ်ဆိုး မင်းသားမှာမူ ရွှေအမြုတေ ထိပ်ဆုံးအဆင့် တစ်ယောက် ဖြစ်သည်။ သို့ဖြစ်ရာ သူတို့ နှစ်ယောက်အကြား ကျင့်ကြံခြင်း အဆင့် ကွာခြားချက်က ကြီးမားလွန်းသည်။

"လူသား ... မင်းရဲ့ စွမ်းအားက ကျဆင်း လာနေပြီ ... ဒါပေမဲ့ ငါကတော့ ထာဝရ တိုက်ခိုက်နိုင်တယ် ... ငါ့ဆီမှာ အညံ့ခံပြီး ငါ့ အရှင်ဆီ ကမ်းလှမ်းတာကို ခံစမ်း"

ရှေးဟောင်း နတ်ဆိုး မင်းသားက ပြုံးရယ်ရင်း ပြုံးလိုက်သည်။

ကျိုးကျူရှင်းပင်လျှင် တစ်ခုခု လွဲချော်နေကြောင်း သတိထားမိလာ၏။ ချန်းဖန်၏ ခန္ဓာကိုယ်ပေါ်ရှိ အဇူရာနှင့် အနက်ရောင် အလင်းမှာ တဖြည်းဖြည်း မှေးမှိန်လာနေသည် မဟုတ်ပါလား။

"ငါ့ရဲ့ အမြုတေတွေက ရွှေအမြုတေတွေ မဖြစ်သေးတာ ကံဆိုးတာပဲ ...”

ချန်းဖန်မှာ အနည်းငယ် စိတ်ပျက် သွားမိသည်။

အကယ်၍ သူသာ ထပ်မံ တိုက်ခိုက်လိုပါက နောက်ထပ် အမြုတေ တစ်ခုကို လောင်ကျွမ်းပစ်ရန် လိုအပ်ပေသည်။ ထိုသို့ဆိုလျှင် သူ့တွင် နောက်ဆုံးအမြုတေ တစ်ခုသာ ကျန်ရစ်ပေတော့မည်။

"နောက်ဆုံး တစ်ခုပဲ ကျန်တော့ရော ဘာအရေးလဲ ...”

ချန်းဖန်၏ မျက်လုံး၌ ဆုံးဖြတ်ချက် ပြတ်သားခြင်းများက ပြည့်နှက်သွားသည်။

"အဇူရာ သက်ရှည် အမြုတေ ... ပေါက်ကွဲစမ်း ...”

"ဘုန်း ...”

ချန်းဖန်၏ ခန္ဓာကိုယ် အတွင်းရှိ အဇူရာ သက်ရှည် အမြုတေမှာ ပေါက်ကွဲသွား၏။ ဆယ်ဆမျှ ပိုမိုသော စွမ်းအားက သူ၏ သွေးကြောများ အတွင်း စီးဆင်းလာခဲ့သည်။ ထို့နောက် ပေပေါင်း များစွာ ရှည်လျားသော ကမ္ဘာသစ်ပင်က သူ၏ အနောက်တွင် ပေါ်လာခဲ့၏။

"မကောင်းတော့ဘူး ...”

ရှေးဟောင်း နတ်ဆိုး မင်းသားက နောက်ဆုတ်ရန် ပြင်လိုက်သည်။ သို့သော်လည်း ချန်းဖန်က လက်အား ဆန့်ထုတ်လိုက်ရာ ကမ္ဘာသစ်ပင်က အရိပ် အသွင်ပြောင်း၍ သူ၏ နောက်သို့ လိုက်၏။

"ဘုန်း ...”

နတ်ဆိုး သံချပ်ကာက အနက်ရောင် အလင်းများကို ဖြန့်ကြက်ကာ နတ်ဆိုး မင်းသားကို ကာကွယ်သည်။ သို့သော်လည်း ထိုအရာမှာ ချန်းဖန်၏ တိုက်ခိုက်မှုကို တားနိုင်စွမ်း မရှိခဲ့ချေ။

"သွား ...”

ရှေးဟောင်း နတ်ဆိုး မင်းသားက နတ်ဆိုးဓားဖြင့် ခုတ်ပိုင်းလိုက်သည်။ ထိုအခါ ပေတစ်သောင်းခန့် ရှည်သော ဓားအလင်း တစ်ခုက ချန်းဖန်ထံ တိုးဝင်သွား၏။

"ဘုန်း ...”

ထိုသို့သော တိုက်ခိုက်မှုနှင့် ရင်ဆိုင်ရချိန်၌ ချန်းဖန်မှာ အချိန်ဆွဲရန် မဝံ့ရဲတော့ချေ။ သူ၏ ကမ္ဘာသစ်ပင်က လက်အသွင်ဖြင့် နတ်ဆိုး သံချပ်ကာနှင့် နတ်ဆိုး မင်းသား၏ ရင်ဘတ်ကို ဖောက်ကာ ၎င်း၏ မိစ္ဆာ အမြုတေကို ဖျစ်ညှစ်လိုက်သည်။

"ဘုန်း ...”

ချန်းဖန်၏ ဖျစ်ညှစ်မှုတွင် ရှေးဟောင်း နတ်ဆိုးမင်းသား၏ စွမ်းအား အလုံးစုံကို ထောက်ပံ့ပေးသော မိစ္ဆာ အမြုတေမှာ အပိုင်းပိုင်း အစစအဖြစ် ပေါက်ကွဲသွားသည်။

"အား ...”

ရှေးဟောင်း နတ်ဆိုး မင်းသားမှာ နာကျင်စွာ အော်ဟစ်လိုက်၏။ သူ၏ မျက်လုံးများမှာ ဒေါသဖြင့် နီရဲသွားသည်။ သို့သော်လည်း သူ၏ မိစ္ဆာ အမြုတေသည် ပေါက်ကွဲသွားပြီဖြစ်ရာ သူ့တွင် ထပ်မံ တိုက်ခိုက်ရန် အခွင့်အရေး မရှိတော့ချေ။

"ဘုန်း ...”

ထို့နောက် ရှေးဟောင်း နတ်ဆိုးမင်းသား၏ ခန္ဓာကိုယ်က ပေါက်ကွဲကာ မရေ မတွက်နိုင်သော စွမ်းအင်လှိုင်းများ အဖြစ် ပျံ့နှံ့ သွားသည်။

" ...”

ရုတ်တရက် ကမ္ဘာနှစ်ခု ဆုံမှတ်မှာ တိတ်ဆိတ်သွား၏။ ရှေးဟောင်း နတ်ဆိုးများစွာမှာ သူတို့ မြင်တွေ့ရသမျှကို မယုံကြည်နိုင်အောင် ဖြစ်နေခဲ့ကြသည်။ ဗိုလ်ချုပ်များပင်လျှင် ထိုမြင်ကွင်းအား ကြည့်ကာ ကြောက်လန့် နေခဲ့ကြ၏။

ကောင်းကင်တွင်မူ ချန်းဖန် တစ်ဦးတည်းသာ ရှိနေခဲ့၏။ သူ၏ ခန္ဓာကိုယ် တစ်ခုလုံးသည် သွေးများဖြင့် ပေကျံနေသည့်တိုင် နတ်ဘုရား တစ်ပါးအလား ဝင့်ကြွားနေဆဲ ဖြစ်သည်။

***