နားလည်သဘောပေါက်ခြင်း

ရီဖူရှင်းအဖွဲ့က ပုံရိပ်ယောင်ကောင်းကင်လေဟာပြင်သို့ ဝင်ရောက်သွားသည်။ ဖြတ်သန်းသွားပြီးသောအခါ သူတို့က မတူညီသည့် လေဟာနယ်အတွင်းသို့ ရောက်ရှိသွားသည်။ သူတို့ ဝင်လာခဲ့သော ဝင်ပေါက်ကို ရှာမတွေ့တော့ပေ။ ကြည့်ရသည်မှာ ဝင်္ကပါတစ်ခုက ပြင်ပလောကနှင့် သူတို့ကို အဆက်အသွယ်ဖြတ်ထားသကဲ့သို့ ထင်မှတ်ရသည်။

ဤနေရာက နယ်မြေအပိုင်းအစတစ်ခု ​ဖြစ်သည်။ သူတို့၏ နတ်အာရုံစွမ်းအားကို ဖြန့်ကျက်လိုက်သည့်အခါ သူတို့သည် လေဟာနယ်အတွင်းရှိ တန်ခိုးရှင်များ၏ တည်ရှိမှုကို ခံစားမိပေသည်။

"အဲဒီလောက်များတာလား။"

ရီဖူရှင်း၏ စွမ်းအားများက ပုံရိပ်ယောင်ကောင်းကင်လေဟာပြင်ကို ဖြတ်သန်းတိုးဝှေ့သွားသည်။ သူက ဤနယ်မြေသည် ပြင်ပလောကနှင့် မတူညီကြောင်း ရှာဖွေတွေ့ရှိခဲ့ပေသည်။ ထိုကျယ်ပြောသော နေရာတစ်ခုလုံးက တန်ခိုးရှင်များနှင့် ပြည့်နှက်နေသည်။ သူတို့အားလုံးက ကျွန်းတစ်ခုတည်းပေါ်တွင် စုဝေးနေကြသည်။ သူတို့၏ စွမ်းအားများ ဖြန့်ကျက်သွားသည့် နေရာတိုင်းတွင် လူများနှင့် ပြည့်နေသည်။

ပိုင်မုပြောခဲ့သည်မှာ အရှေ့နတ်ဘုရားကျွန်းစုနယ်မြေသို့ ရောက်လာကြသည့် လေးပုံတစ်ပုံက လေဟာပြင်ကို ဝင်ရောက်ကြသည်ဟု ပြောပေသည်။ ဤနေရာတွင် တန်ခိုးရှင် မည်မျှ များနေမည်ကို ခန့်မှန်းနိုင်ပေသည်။ သောင်းချီသည့် အစွမ်းထက်တန်ခိုးရှင်များမှာ အတူတကွ စုစည်းနေကြပြီး သူတို့ကြားတွင် အလွန် အစွမ်းထက်သည့် တန်ခိုးရှင်များ ပါဝင်နေသည်။

အဝေးတစ်နေရာမှ ကောင်းကင်တွင် ကြောက်မက်ဖွယ် ထိခတ်မိသံကို ကြားလိုက်ရသည်။ ရီဖူရှင်းတို့အဖွဲ့က ခေါင်းများကို မော့၍ အသံလာရာသို့ ကြည့်လိုက်ကြသည်။ သူတို့သည် ထိုနယ်မြေ၏ အထက်ကောင်းကင်တွင် တိုက်ပွဲတစ်ခု ဖြစ်ပေါ်နေသည်ကို မြင်လိုက်ရသည်။ ၎င်းက ရန်ဟောင်များအကြား အုပ်စုဖွဲ့တိုက်ပွဲတစ်ခု ဖြစ်နေသည်။ သူတို့ တိုက်ခိုက်သောအခါ ကောင်းကင်နှင့် မြေကြီးမှာ အပိုင်းပိုင်းပျက်စီးသွားသလို ထင်မှတ်ရပေသည်။ ကမ္ဘာပျက်မြင်ကွင်းက အလွန် ကြောက်ရွံ့ထိတ်လန့်ဖွယ် ကောင်းလှသည်။

သို့သော်လည်း ပုံရိပ်ယောင်ကောင်းကင်လေဟာပြင်မှ လူများသည် သာမန်အခြေအနေ၌ ရှိနေသကဲ့သို့ မတုန်မလှုပ် ရှိနေကြ၏။ သူတို့သည် ထိုသို့သော တိုက်ပွဲမျိုးကို ရိုးအီနေပုံရသည်။ ဤလေဟာပြင်အတွင်း တိုက်ပွဲများသည် တစ်နေရာတည်းတွင် ဖြစ်ပေါ်နေခြင်း မဟုတ်ပေ။ မဟာလမ်းစဥ် အခွင့်အလမ်းများကြောင့် ဖြစ်ပေါ်လာသည့် အငြင်းပွားမှုများသည် နေရာအနှံ့တွင် အင်အားစုအသီးသီးကြားမှ ပဋိပက္ခများ ဖြစ်ပေါ်နေသည်။ တိုက်ပွဲများသည် ရီဖူရှင်းတို့ မရောက်ခင်မှာပင် ဖြစ်ပွားနေခဲ့ပြီ ဖြစ်သည်။ လူအများက ဤနေရာ၌ ကျဆုံးသွားကြသည်။

လူအများက ပြင်ပကျွန်းစုများမှ အခွင့်အလမ်းတို့အား မရှာဖွေတော့ဘဲ ဤနေရာသို့ တည့်မတ်စွာ လာကြသည်။ ထိုသူများမှာ အရှေ့နတ်ဘုရားကျွန်းစုနယ်မြေသို့ ပထမဆုံးအကြိမ် လာရောက်ခြင်းမဟုတ်ကြပေ။ အစွမ်းထက် အခွင့်အလမ်းများ ရရှိနိုင်သည့် ထိပ်တန်းအခြေအနေများကို နားလည်ထားသဖြင့် သူတို့က လေဟာပြင်အတွင်းမှ မဟာလမ်းစဥ်အခွင့်အလမ်းများအတွက် ဤနေရာသို့ တိုက်ရိုက်လာရောက်ကြခြင်း ဖြစ်ပေသည်။

ဥပမာအနေနှင့် ကျွင်းချိုးယွင်သည်လည်း ထိုသို့ပင် လုပ်ဆောင်လေသည်။ ရီဖူရှင်း၏ နတ်အာရုံက သူ့ကို သတိပြုမိသည်။ ကျွင်းချိုးယွင်အနီးတွင် ရန်ဟောင်စစ်တပ်ဟုပင် ခေါ်ရလောက်အောင် တန်ခိုးရှင်အများအပြား ရှိနေသည်။

ရီဖူရှင်းက ကျွင်းချိုးယွင် အရှေ့နတ်ဘုရားတံဆိပ်များ စုဆောင်းနေမှုကို ပြန်တွေးမိလိုက်သည်။ သူက ဤလေဟာပြင်အတွင်းသို့ တန်ခိုးရှင်အမြောက်အမြား ခေါ်ဆောင်လာနိုင်ရန် တံဆိပ်များကို စုဆောင်းနေခြင်း ဖြစ်ပေလိမ့်မည်။ ထိုနည်းလမ်းဖြင့် မဟာလမ်းစဥ်အခွင့်အလမ်းများအတွက် တိုက်ခိုက်သည့်အခါ သူတို့သည် အရေအတွက်အရ အရေးသာလိမ့်မည် ​ဖြစ်သည်။

ရီဖူရှင်းအနီးမှ အခြားသော တန်ခိုးရှင်များသည်လည်း သူတို့၏ စိတ်စွမ်းအားများကို ဖြန့်ကျက်လိုက်ကြသည်။ အင်ပါယာဟယ်လျန်က ခပ်တိုးတိုး ပြောလာ၏။ "ဒီနေရာမှာ မဟာလမ်းစဥ်အခွင့်အလမ်းတွေရှိ​​​​​ပေမယ့် ကျုပ်တို့ ဘယ်ကိုသွားသွား တန်ခိုးရှင်တွေနဲ့ ထိပ်တိုက်တွေ့မှာ သေချာတယ်။"

ရီဖူရှင်းသည်လည်း ၎င်းကို သတိပြုမိသည်။ သူ၏ နတ်အာရုံက ကျယ်ပြောလှသော လေဟာပြင်ကို ဖြတ်သန်းသွားသည်။ ထို့နောက် သူက လှုပ်ရှားရင်း ပြောလိုက်သည်။ "သွားစို့။"

သူတို့၏ အဖွဲ့က တစ်နေရာသို့ ဦးတည်သွား၏။ မကြာခင်မှာပင် သူတို့က ရှေးဟောင်းတောင်ထွတ်တစ်ခုသို့ ရောက်ရှိသွားသည်။

၎င်းက ကောင်းကင်ထိ မြင့်မားသော တောင်တစ်လုံး ဖြစ်သည်။ ထိုတောင်သည် ဓားသဏ္ဌာန် ရှိလေသည်။ ထိုတောင်ပေါ်တွင် ရပ်လိုက်သည့်အခါ လွန်စွာဖိနှိပ်နိုင်သော ဓားစွမ်းရည်အရှိန်အဝါတို့ကို ခံစားမိနိုင်ပေသည်။ ဤလေဟာပြင်သည် မမြင်နိုင်သော ဓားစွမ်းရည်များဖြင့် လွှမ်းခြုံထားသော ဓားလေဟာပြင် ဖြစ်သည်။

၎င်းကို ဓားတောင်ထွတ်ဟု ခေါ်လေသည်။

"ဒီဓားတောင်ထွတ်ကနေ ဖိနှိပ်နိုင်တဲ့ စွမ်းအားကို ခံစားလို့ရတယ်။ ထိပ်သီးပုဂ္ဂိုလ်တစ်ယောက်က ချန်ထားခဲ့တာ ဖြစ်နိုင်တယ်။" ပေ့ကုံးအော့က ပြောလိုက်သည်။ သူ၏ ကျင့်ကြံဆင့်နှင့်ပင် ဓားတောင်ထွတ်ပေါ်တွင် တည်ရှိနေသော အစစ်အမှန် ဓားစွမ်းအားများကို ခံစားနိုင်ရန် မလွယ်ကူသောကြောင့် ထိုဓားစွမ်းအားများက မည်မျှ အစွမ်းထက်သည်ကို သိနိုင်ပေသည်။

ဓားတောင်ထွတ်၏ ရှေ့တွင် ကျင့်ကြံခြင်းကျောက်တုံးရင်ပြင်ကိုးခု ရှိသည်။ ထိုကျောက်တုံးများက ဓားတောင်ထွတ်နှင့် ဆက်စပ်နေသည်။ ၎င်းတို့မှ တူညီသော ဓားစွမ်းအင်များ ထုတ်လွှတ်နေပြီး ဓားတောင်ထွတ်နှင့် တသားတည်းဖြစ်နေသကဲ့သို့ ထင်မှတ်ရပေသည်။ တန်ခိုးရှင်အချို့သည် ကျောက်တုံးရင်ပြင်၏ ထိပ်တွင် ထိုင်ကာ ဓားစွမ်းအားများကို နားလည်သဘောပေါက်အောင် အားထုတ်နေသော တန်ခိုးရှင်အချို့ ရှိသည်။

"ကျောက်တုံးရင်ပြင်ကိုးခု။" ရီဖူရှင်းက ၎င်းတို့ကို လှမ်းကြည့်လိုက်၏။ ကျောက်တုံးရင်ပြင်တစ်ခုစီတွင် လူတစ်ယောက်စီ ထိုင်နေကြ၏။ ထိုတန်ခိုးရှင်များက အားလုံးပေါင်း ကိုးယောက်ရှိသည်။ သူတို့က ထိုနေရာတွင် ထိုင်နေကြသော်လည်း သူတို့၏ စိတ်အာရုံများက လွင့်မျောနေပုံရသည်။ ကျန်သည့် အခြားတန်ခိုးရှင်များက သူတို့ဘေးတွင် မတ်တပ်ရပ်ကာ စောင့်ကြပ်ကြည့်ရှုနေကြသည်။

ထိုတန်ခိုးရှင်ကိုးယောက်က မဟာလမ်းစဥ်စွမ်းအားများကို ထုတ်လွှတ်ထားသည်ကို ရီဖူရှင်းက ရှင်းရှင်းလင်းလင်း ခံစားနိုင်သည်။ သူတို့ကိုးယောက်လုံးက မတူကွဲပြားကြသည်။ သူတို့ကြားမှ ကွာခြားမှုက အလွန် ကြီးမားလှသည်။ သူတို့ကြားမှ အသန်မာဆုံးလူက အဋ္ဌမဆင့် အဆင့်မြင့်ရန်ဟောင်တစ်ပါး ဖြစ်သည်။ အခြားတစ်ဖက်တွင် တတိယဆင့် ရန်ဟောင်က အားအနည်းဆုံးဖြစ်သော်လည်း သူ၏ အရှိန်အဝါ ထူးခြားပြောင်မြောက်လှသည်။ သူ့နောက်မှ လိုက်ပါလာသည့် တန်ခိုးရှင်များက သူ့အား စောင့်ကြပ်ပေးနေသည်။ သူက ထူးခြားသော နောက်ခံရှိသည့်အတွက် ထိုသို့ ဆက်ဆံမှုမျိုးကို ခံရခြင်းဖြစ်နိုင်ပေသည်။

"ကျောက်တုံးရင်ပြင်တစ်ခုချင်းစီမှာ ဓားစွမ်းအားတွေ ပါဝင်နေတယ်။" ရီဖူရှင်းက ပြောလိုက်သည်။ အင်ပါယာဟယ်လျန်နှင့် ပေ့ကုံးအော့က သူ့ကို ကြည့်လိုက်သည်။ ရီဖူရှင်းက တစ်ချက်ကြည့်လိုက်ရုံနှင့် ပြောနိုင်သည်ကို သူတို့က အံ့အားသင့်နေကြသည်။

"ကောလာဟလတွေက ပြောကြတာတော့ ဓားတောင်ထွတ်မှာ ဝင်္ကပါတစ်ခုရှိပြီး မတူညီတဲ့ ဓားစွမ်းအားတွေ ပါဝင်နေတယ်တဲ့။ ကျောက်တုံးရင်ပြင်တစ်ခုစီမှာ ဓားစွမ်းအားတစ်မျိုးစီ ပါဝင်နေပြီး ဓားတောင်ထွတ်နဲ့ ဆက်စပ်နေတယ်။ အဲဒီပေါ်မှာ ထိုင်နေတဲ့ တစ်စုံတစ်ယောက်က ဓားစွမ်းရည်ရဲ့ တည်ရှိမှုကို ခံစားနိုင်သလို အဲဒါကို နားလည်သဘောပေါက်နိုင်တယ်။ အဲဒါကြောင့် ဓားစွမ်းရည်ကျင့်ကြံတဲ့ တန်ခိုးရှင်တွေအတွက် အကျိုးအမြတ်ရှိတယ်လေ။" ပေ့ကုံးအော့က ရီဖူရှင်းကို ရှင်းပြလိုက်သည်။ ရီဖူရှင်းက ဓားအင်ပါယာလျှို့နျန်အဖြစ် ကျော်ကြားသည်။ သူ၏ ဓားစွမ်းရည်က ပြိုင်ဘက်ကင်း ထူးချွန်ပြောင်မြောက်သည်ကို ပေ့ကုံးအော့ မျက်မြင်သိရှိခဲ့ပြီး ဖြစ်သည်။

ရီဖူရှင်းက ဓားဆန္ဒသုံးခုနှင့် တိုက်ခိုက်သည့်အခါ အလွန် ကြောက်မက်ဖွယ် နည်းစနစ်တစ်ခု ဖြစ်နေခဲ့ပြီးဖြစ်သည်။

ရီဖူရှင်းက ရှေ့သို့ ခြေလှမ်းလိုက်သည်။ သို့သော်လည်း ကျောက်တုံးရင်ပြင်ကိုးခုကို အခြားသူများက ပိုင်ဆိုင်နှင့်ပြီး ဖြစ်သည်။ သူ့အတွက် ကျင့်ကြံရန် နေရာမရှိပေ။ သူက တစ်နေရာလိုချင်လျှင် စောင့်ဆိုင်းရန် လိုပေသည်။

သို့သော်လည်း ဤနေရာ၌ စောင့်ဆိုင်းနေသော တန်ခိုးရှင် အမြောက်အမြားရှိနေသည်။ သူတို့အားလုံးက ကျင့်ကြံရန်အတွက် ကျောက်တုံးတစ်နေရာကို လိုချင်နေကြပြီး အခွင့်အရေးရရန် စောင့်ဆိုင်းနေကြသည်။ ရီဖူရှင်းတို့အဖွဲ့က သူတို့ အလှည့်ကို ရောက်ရန် မစောင့်ဆိုင်းနိုင်ပေ။

ရီဖူရှင်းက ကျောက်တုံးရင်ပြင်၏ အောက်တွင် ရပ်နေသည်။ သူက ဓားတောင်ထွတ်ကို ကြည့်လိုက်၏။ သူ၏ အကြည့်က ရုတ်တရက် တင်းမာလာကာ ကြောက်မက်ဖွယ် ကောင်းလာပြီး မဟာလမ်းစဥ်ကို ဖြတ်၍ မြင်နိုင်သကဲ့သို့ ဖြစ်လာသည်။ ချက်ချင်းပင် အံ့အားသင့်ဖွယ်ကောင်းသော အရှိန်အဝါက အဆုံးမဲ့လေဟာနယ်ကို လွှမ်းခြုံထားသည်။ ယင်းသည် ဓားတောင်ထွတ်သို့ ချက်ချင်း ဆန့်ထွက်သွားသည်။ အလွန် လျင်မြန်စွာပင် ရီဖူရှင်းက ထူးခြားသော စွမ်းအင်လှိုင်းများကို ခံစားမိလိုက်သည်။ ဓားတောင်ထွတ် ထိပ်တွင် စွမ်းအင်လှိုင်းကိုးလှိုင်း ရှိပုံရသည်။

ထိုစွမ်းအင်လှိုင်းများက ပြည့်စုံစွာ ပေါင်းစပ်သွားပြီး ဓားတစ်လက်သဏ္ဌာန် ဖြစ်တည်လာသည်။ ယခု ရီဖူရှင်း၏ မျက်လုံးထဲတွင် ဤတောင်က တောင်တစ်လုံးမဟုတ်တော့ဘဲ ဓားတစ်လက် ဖြစ်လာသည်။

"ပုံစံကိုးခု။" ရီဖူရှင်းက ရေရွတ်လိုက်သည်။ သူ၏ အကြည့်က ကျောက်တုံးရင်ပြင် ကိုးခုဆီ ရွေ့လျားသွားသည်။ သူက အသံနိမ့်နိမ့်နှင့် ပြောလိုက်၏။ "ဒါက စွမ်းအင်ပုံစံကိုးခုရဲ့ ဖြစ်တည်မှုကနေ ဓားတစ်လက်အဖြစ် ပေါင်းစည်းထားတဲ့ ဓားကျင့်စဥ်တစ်မျိုးပဲ။ သူတို့ရဲ့ ပေါင်းစည်းခြင်းသဏ္ဌာန်က ဓားတောင်ထွတ်ပဲ။"

"မင်းက တည့်တိုးပြောနိုင်လောက်အောင် အမြင်ကောင်းတွေ ရှိတာပဲ။" သူ၏ လက်ကို လက်ပိုက်ထားသည့် ဓားသမားတစ်ယောက်က ပြောလိုက်သည်။ သူ၏ လက်များက သူ့ဓားအနီးတွင် ရှိနေသည်။ သူက ဓားသမားတစ်ယောက် ဖြစ်သည်။ သူက ပြုံးကာ ရီဖူရှင်းကို ကြည့်နေသော်လည်း သူ့အပြုံးက ထူးဆန်းနေသည်။

"ကျောက်တုံးရင်ပြင်ကိုးခုမှာ ဓားစွမ်းရည်ကိုးမျိုး ပါဝင်နေတယ်။ ဒီဓားစွမ်းရည်ကိုးမျိုးက ဓားတောင်ထွတ်ရဲ့ ဓားစွမ်းအားတွေက ဖြစ်တည်လာတယ်ဆိုတာ လူတိုင်း သိတယ်။" တစ်စုံတစ်ယောက်က ပြောလိုက်သည်။ ထိုသူ၏ အကြည့်များက ဓားတောင်ထွတ်တွင် ရှိနေဆဲ ဖြစ်သည်။ သူက တည်ငြိမ်စွာ ပြောလိုက်သော်လည်း ရီဖူရှင်းကို ကြည့်မနေပေ။

"အင်း" ရီဖူရှင်းက ခေါင်းညိတ်ကာ တုံ့ပြန်လိုက်ပြီးနောက် မေးလိုက်သည်။ "အဲဒီဓားနည်းစနစ်ရဲ့ နာမည်က ဘာလဲ။"

"သေချာမသိဘူး" ဘေးမှ လူက ပြန်ဖြေလိုက်သည်။ "အတိုချုပ်ပြောရရင် အဲဒီစွမ်းရည်တွေက အစွမ်းထက်တန်ခိုးရှင်တစ်ယောက် ချန်ရစ်ခဲ့တာပဲ။ နှစ်ပေါင်းများစွာ ကြာတဲ့ထိတောင် ကျောက်တုံးရင်ပြင်ပေါ်က ဓားစွမ်းအားတွေကို အပြည့်အဝနားလည်နိုင်ဖို့ ခက်ခဲနေတုန်းပဲ။ ဓားတောင်ထွတ်အတွက်ကတော့ ဒီနေ့ထိ ဘယ်သူကမှ အပြည့်အဝ နားလည်အောင် မလုပ်နိုင်သေးဘူး။ အဲဒါက ဘယ်သူကမှ ဒီဓားနည်းစနစ်ကို အပြည့်အဝ မကျွမ်းကျင်သေးဘူးလို့ ဆိုလိုတာပဲ။"

ရီဖူရှင်းက ခေါင်းကို ညိတ်လိုက်သည်။ သူသည်လည်း ထိုဓားနည်းစနစ်က အလွန် ထူးခြားပြောင်မြောက်သည်ကို သတိပြုမိသည်။ ဓားတောင်ထွတ်အတွင်း ရှိနေသော ဓားစွမ်းရည်သည် သာမန်မဖြစ်နိုင်ပေ။

ကျောက်တုံးရင်ပြင်ကိုးခု၌ ပါဝင်နေသော ဓားစွမ်းအားကိုးခုကို နားလည်သဘောပေါက်ရန် မခက်ခဲပေ။ ရီဖူရှင်းသည် ဓားစွမ်းအားများကို ရှင်းလင်းစွာ ခံစားနိုင်ပေသည်။

"အဲဒီဓားစွမ်းအားတွေက နားလည်ဖို့ ခက်ခဲတယ်လား။" ရီဖူရှင်းက စဥ်းစားဟန်ဖြင့် အသံထွက်ကာ ခပ်တိုးတိုး ပြောလိုက်သည်။

"ဒါပေါ့။" ဘေးမှ နောက်ထပ် အမျိုးသမီးရန်ဟောင်တစ်ပါးက ဖြေလိုက်သည်။ "ဓားစွမ်းအားကိုးမျိုးက အားလုံးကွဲပြားကြတယ်။ အဲဒီကိုးမျိုးလုံးက မတူညီတဲ့ ဓားတွေလည်း ဖြစ်တယ်။ ဒါကြောင့် မတူညီတဲ့ ဓားနည်းစနစ်တွေကို လေ့လာရတာနဲ့ တူတယ်။ တစ်စုံတစ်ယောက်က ကျောက်တုံးရင်ပြင်မှာ ထိုင်ပြီး ဓားစွမ်းအားတွေကို ခံစားကြည့်ရင် ပိုပြီး လွယ်ကူလာတာကို ခံစားမိလိမ့်မယ်။ ဒါပေမယ့် ဒီနေရာက ဓားစွမ်းအားတစ်ခုတည်းကိုတောင် နားလည်ဖို့ အရမ်း ခက်ခဲတယ်။"

သူမသည် ရုတ်တရက် ကောင်းကင်ထိ ထိုးဖောက်မတတ် တောက်ပလင်းလက်နေသော ဓားစွမ်းအားများကို ထုတ်လွှတ်လိုက်သည်။ သူမ၏ ဓားစွမ်းအားများ ပေါက်ကွဲထွက်လာသောအခါ လူအုပ်ကြီးသည် သူမထံမှ စီးဆင်းလာသော ဓားစွမ်းအင်လှိုင်းတို့ကို ရှင်းလင်းစွာ ခံစားမိလေသည်။

သူမက ဓားစွမ်းအားတစ်မျိုးကို နားလည်သဘောပေါက်ထားသည်။ သူမအနီးရှိ လူများက အလွန် အံ့အားသင့်စွာဖြင့် သူမကို အကဲခတ်နေကြသည်။

"ကျောက်တုံးရင်ပြင်ရဲ့ အောက်ဘက်မှာ ရှိ​နေရင်းနဲ့တောင် သူမက ဓားစွမ်းအားတစ်မျိုးကို နားလည်သဘောပေါက် ခံစားနိုင်တယ်။ သူမရဲ့ နားလည်သဘောပေါက်နိုင်စွမ်းက တကယ်ကို ထူးခြားပြောင်မြောက်တာပဲ။" တစ်ယောက်က ချီးမွမ်းလိုက်သည်။ ထိုအမျိုးသမီး၏ ဓားစွမ်းရည်အရှိန်အဝါတို့က သူမကိုယ်ပေါ်၌ စီးဆင်းနေသည်။ ၎င်းတို့က နှိုင်းယှဥ်၍ မရအောင် တောက်ပနေ၏။ အချိန်တချို့ကြာပြီးနောက်တွင်မှ သူမ၏ အရှိန်အဝါက တဖြေးဖြေး လျော့ပါးလာသည်။ သူမက ရီဖူရှင်းကို ကြည့်ကာ မေးလိုက်သည်။

"ဒီကို လာတာ ပထမဆုံးပဲလား။"

ရီဖူရှင်းက ခေါင်းညိတ်လိုက်သည်။ သူက ပြုံးကာ ပြန်ဖြေလိုက်၏။ "မကြာသေးခင်ကမှ ရောက်တာပါ။"

သူမက ရီဖူရှင်းဘေးမှ လူများကို ကြည့်လိုက်ပြီး ချက်ချင်း နားလည်သဘောပေါက်သွားသည်။ သူက ကုန်းမြေတစ်ခုခု၏ အဓိကအင်အားစုမှ လာခြင်း ဖြစ်နိုင်သည်။ သို့သော်လည်း ထိုကုန်းမြေက အရှေ့နတ်ဘုရားကျွန်းစုနယ်မြေမှ ထိပ်သီးအင်အားစုများနှင့် နှိုင်းယှဥ်၍ရနိုင်မည်မဟုတ်ပေ။ သို့သော် ရီဖူရှင်း၏ အရှိန်အဝါက အလွန် ထူးခြားသည်။ သူက ဂုဏ်သရေရှိ မိသားစုတစ်ခုခုမှ လာခြင်း ဖြစ်နိုင်ပေသည်။

"ပြောရမယ်ဆိုရင် ကျောက်တုံးရင်ပြင်တစ်ခုပေါ်မှာ ကျင့်ကြံချင်တာက မဖြစ်နိုင်ဘူး။ ဘယ်ကျောက်တုံးရင်ပြင်ရဲ့ ဓားစွမ်းအားအမျိုးအစားက ရှင့်အတွက် အောင်မြင်နိုင်မယ့် အခွင့်အရေးရှိမလဲဆိုတာကို စိစစ်ပြီး ဓားစွမ်းအားတစ်မျိုးတည်းကို နားလည်အောင် အာရုံစိုက်ထားလိုက်ပါ။ ဒါက ခက်ခဲတယ်လို့ ခံစားမိရင် လက်လျှော့ပြီး တခြားနေရာမှာ သွားကံစမ်းနိုင်တယ်။" ရန်ဟောင်အမျိုးသမီးက ရီဖူရှင်း၏ အရှိန်အဝါက ထူးခြားသည်ကို မြင်သောအခါ အကြံပေးလိုက်သည်။ ထို့နောက် သူမက နောက်ထပ် ကျောက်တုံးရင်ပြင်အနီးသို့ လျှောက်သွားကာ ဓားစွမ်းအင်နောက်တစ်မျိုးကို နားလည်အောင် ကြိုးစားကြည့်ရန် ပြင်နေသည်။

"ကျေးဇူးတင်ပါတယ်။" ရီဖူရှင်းက ထိုအမျိုးသမီးကို ကျေးဇူးတင်လိုက်သည်။ အမျိုးသမီးက သူမ၏ လက်ကို ဝှေ့ယမ်းလိုက်၏။ သူမက သူ့အား ရိုးရှင်းစွာ အကြံပေးခဲ့ခြင်းသာ ဖြစ်သည်။ ရီဖူရှင်း၏ ကျေးဇူးတင်မှုကို လက်ခံရန် မလိုအပ်ပေ။

"မင်း ကျင့်ကြံဖို့ ကျောက်တုံးရင်ပြင်တစ်နေရာကို ဘာလို့ လုမယူတာလဲ။ အဲဒါဆို ဓားစွမ်းရည်ကို နားလည်သဘောပေါက်ဖို့ မင်းအတွက် အခွင့်အရေး ​ပိုမြင့်သွားလိမ့်မယ်။" နောက်ထပ်ရန်ဟောင်တစ်ယောက်က အပြုံးနှင့် ပြောလိုက်သည်။ သူ့ကို ကြည့်ရသည်မှာ သရော်နေဟန် ထင်မှတ်ရသည်။

"မလိုပါဘူး။" ရီဖူရှင်းက ပြန်ဖြေလိုက်သည်။ "ဒီကျောက်တုံးရင်ပြင်ကိုးခုရဲ့ စွမ်းအားက နေ့အချိန်လို ရှင်းလင်းပြီး နားလည်သဘောပေါက်ဖို့ မခက်ခဲဘူး။ အဲဒါကြောင့် ကျုပ်က ကျောက်တုံးရင်ပြင်မှာ ထိုင်စရာမလိုဘူး။"

သူ၏ စကားများကြောင့် ရန်ဟောင်အများအပြားက သူ့ကို ကြည့်လာကြသည်။ ရန်ဟောင်တစ်ယောက်က အပြုံးနှင့် ပြောလိုက်သည်။ "အဲဒီလိုလား။ ဒါဆိုဘာလို့ မကြိုးစားကြည့်တာလဲ။ ကျုပ် မြင်ရဖို့ မစောင့်နိုင်တော့ဘူး။"

ရီဖူရှင်းကို အကြံပေးသည့် အမျိုးသမီးရန်ဟောင်က လှည့်ကာ ကြည့်လာပြီး သတိပေးလိုက်သည်။ "အရမ်း ယုံကြည်ချက် လွန်ကဲမနေနဲ့။ အဲဒီမှာ မျက်လုံးနဲ့ မြင်ရတာထက် ပိုတဲ့ ဓားစွမ်းအားတွေ ရှိနေတယ်နော်။"

သူမက ပြောပြီးသည်နှင့် ဆက်လက် ကျင့်ကြံနေသည်။

"ဟားဟား၊ သူ့မှာ အရမ်း ထူးချွန်ပြောင်မြောက်တဲ့ ပါရမီနဲ့ ထိပ်တန်းနားလည်သဘောပေါက်နိုင်စွမ်းတွေ ရှိနေတာ ဖြစ်မယ်။ အဲဒါကြောင့် သူက ဓားစွမ်းအားတွေကို ချက်ချင်း နားလည်သဘောပေါက်နိုင်တာပဲ။" ရန်ဟောင်တစ်ပါးက သရော်လိုက်သည်။ သို့သော်လည်း ဤသည်မှာ သူတို့ ကျင့်ကြံမနေစဥ်၌ အပျင်းပြေ စနောက်ခြင်းသာဖြစ်ပြီး အမှန်တကယ် မကောင်းသော ရည်ရွယ်ချက် မရှိပေ။

သူတို့အားလုံးက ဤနေရာတွင် ကျင့်ကြံနေကြသည့်အတွက် ထိုဓားစွမ်းအားများကို နားလည်သဘောပေါက်ရန်မှာ မည်မျှ ခက်ခဲကြောင်း သိကြပေသည်။

ဓားတောင်ထွတ်မှ အချို့သော ဓားစွမ်းအားများက နားလည်သဘောပေါက်ရန် လွယ်ကူသော်လည်း အချို့သော သူများကသာ နားလည်ကြပြီး အနည်းစုအတွက် အလွန် ခက်ခဲနေဆဲပင် ဖြစ်သည်။

ရီဖူရှင်းက ပြုံးကာ ထပ်မပြောတော့ပေ။ သူက ရှေ့သို့ ခြေလှမ်းလိုက်ကာ ဓားတောင်ထွတ်နှင့် မျက်နှာချင်းဆိုင်တွင် ထိုင်ချလိုက်သည်။ ထိုနေရာသည် တိုက်ဆိုင်စွာပင် ကျောက်တုံးရင်ပြင်ကိုးခု၏ အလယ်ဖြစ်နေ၏။

သူက ကျောက်တုံးရင်ပြင်တစ်ခုကို ကြည့်လိုက်သည်။ မဟာလမ်းစဥ်အရှိန်အဝါက သူ့ထံမှ ထွက်ပေါ်လာပြီး ကျောက်တုံးရင်ပြင်ကို လွှမ်းခြုံသွားသည်။ ခဏချင်းပင် ဓားစွမ်းအားများက သူ့ခန္ဓာကိုယ်အနီးတွင် စုစည်းလှည့်ပတ်လာသည်။ ရုတ်တရက် ရီဖူရှင်း၏ ပုံရိပ်အနီးတွင် ဓားစွမ်းအားလှိုင်း အရှိန်အဝါတို့ ပေါ်ပေါက်လာ၏။

ယင်းသည် တန်ခိုးရှင် အများအပြား၏ အကြည့်တို့အား ဆွဲဆောင်လိုက်နိုင်သည်။ သူက အတော်လေး အတည်ပေါက်ဆန်နေသည်။ ကြည့်ရသည်မှာ သူက အမှန်တကယ်ပဲ ကျောက်တုံးရင်ပြင်၏ အောက်မှနေ၍ ဓားစွမ်းအားများကို အချိန်တိုအတွင်း နားလည်သဘောပေါက်နိုင်သည်ဟု ယုံကြည်နေသည်လား။

ကျောက်တုံးရင်ပြင်ထက်တွင် ထိုင်နေသော တန်ခိုးရှင်များအတွက်ပင် ထိုသို့ လုပ်ဆောင်ရန်မှာ ခက်ခဲပေသည်။

အင်ပါယာဟယ်လျန်နှင့် အခြားသူများကလည်း ရီဖူရှင်းကို ကြည့်လိုက်ကြသည်။ သူတို့က မျှော်လင့်ချက်များနှင့် ကြည့်နေခြင်း ဖြစ်သည်။ သူတို့အတွက် ရီဖူရှင်း၏ ထိတ်လန့်ဖွယ် ပါရမီကို သိရှိထားပြီး သူ၏ နားလည်သဘောပေါက်မှုက မည်မျှ ကြောက်မက်ဖွယ် ကောင်းသည်ကို မြင်ချင်နေကြသည်။ အခြားသော တန်ခိုးရှင်များ မလုပ်နိုင်သည့် ဓားစွမ်းအားများကို နားလည်သဘောပေါက်ရန် သူ့အတွက် အချိန်မည်မျှ ယူရမည်နည်း။

ရီဖူရှင်း၏ ပုံရိပ်ပေါ်မှာ ဓားစွမ်းအားများက တဖြေးဖြေး ပိုမိုအစွမ်းထက်လာသည်။ ဓားအလင်းတန်းတို့က သူ့ ခန္ဓာကိုယ်တစ်ခုလုံးတွင် စီးဆင်းနေသည်။ ယင်းတို့က ဓားများ၏ အော်မြည်သံများကိုပင် ထုတ်လွှတ်နေသည်ဟု ထင်မှတ်ရသည်။ လူအများသည် သူ့ကို ​အာရုံစူးစိုက်ကာ ကြည့်နေကြ၏။ သူက အတော်လေး အုတ်အော်သောင်းနင်း ဖြစ်စေရန် ဖန်တီးထားပေသည်။

***