ပိတ်ဆို့ခြင်း

ကျန်းရှောင်မိုရဲ့ စကားတွေက ယန်ကျွင်းဇဲကို အံ့အားသင့်စေပြီး သူ့မျက်နှာအမူအရာက ပြောင်းလဲသွားကာ “ရွာတစ်ရွာလုံးက လူတွေ အားလုံး သေသွားတယ် ဟုတ်လား” လို့ မေးလိုက်မိသည်။

“အင်း” ကျန်းရှောင်မိုက ခေါင်းညိတ်လိုက်သည်။

ထို့နောက် ယန်ကျွင်းဇဲက “'ဝိညာဉ်တံတား'ဆိုတာက ဘာလဲ” လို့ မေးလိုက်သည်။

ကျန်းရှောင်မိုက ပြန်မဖြေဘဲ စားပွဲနှစ်ခုလောက်ကွာတဲ့ နေရာမှာ ထိုင်နေတဲ့ လူငယ်တစ်ယောက်ကို လှမ်းကြည့်လိုက်သည်။ သူက နေကာမျက်မှန်တပ်ထားပြီး ကာပူချီနို ကော်ဖီအေးတစ်ခွက်ကို တစ်ယောက်တည်း သောက်နေလေသည်။

ယန်ကျွင်းဇဲကလည်း လှည့်ကြည့်လိုက်သည်။

ကျန်းရှောင်မိုက “သူ့ကို သံသယဝင်နေစရာ မလိုပါဘူး၊ သူက အခု နင့်ရဲ့ လုပ်ဖော်ကိုင်ဖက်ပဲ။ သူက ငါနဲ့အတူ ဒီကို လာတာ။ သူ့နာမည်က ကျန်းဒီ” လို့ ပြောလိုက်သည်။

“သူက မင်းရဲ့ မောင်လား” ယန်ကျွင်းဇဲက မေးလိုက်သည်။

“သူက ကျန်းဆိုတဲ့နာမည်ခံလို့ ငါနဲ့ ဆွေမျိုးတော်ရမှာလား။ ဒါဆို ကွန်ဖြူးရှပ်ရဲ့ တပည့် ယန်ဟွေးက နင့်ရဲ့ ဘိုးဘေးလား” ကျန်းရှောင်မိုက သူ့ကို စူးရှစွာ ကြည့်လိုက် လေသည်။

ဟုတ်‌ပေသည်၊ဒီစကြာဝဠာရဲ့ ရှေးဟောင်းသမိုင်းက ယန်ကျွင်းဇဲ ပြန်မွေးဖွားလာတဲ့ ကမ္ဘာနဲ့ အခြေခံအားဖြင့် အတူတူပဲ။ ဒါကြောင့် ကွန်ဖြူးရှပ် ရှိသလို ယန်ဟွေးလည်း ရှိခဲ့သည်။

ယန်ကျွင်းဇဲက ကို့ရိုးကားရား ဖြစ်ပေမဲ့ လက်ခံနိုင်တဲ့ အပြုံး ပြုံးပြလိုက်ပြီး “မင်းနဲ့ သိကျွမ်းပြီးနောက်မှာ မင်း စကားပြောရင် ပိုပြီး နာကျင်အောင် ပြောတတ်လာသလိုပဲ” လို့ ပြောလိုက်မိသည်။

“စိတ်မကောင်းပါဘူး” ကျန်းရှောင်မိုက သဘောပေါက်သွားပေမဲ့ သူမရဲ့ နောက်စကားက ယန်ကျွင်းဇဲကို သူ့တံတွေးနဲ့သူ သီးမလို ဖြစ်စေခဲ့သည်၊ “နောင်မှတော့ နင် အသားကျသွားလိမ့်မယ်”

ထို့နောက် အနီးအနားမှာ ထိုင်နေတဲ့ ကျန်းဒီကို ကြည့်လိုက်ပြီး “သူက နင်နဲ့တူတူ ဝိညာဉ်တစ်ပိုင်းပဲ။ အစတုန်းက ထူးဆန်းတဲ့အရာတစ်ခုက သူ့ကို စားဖို့ ကြိုးစားခဲ့တယ်။ ဒါပေမဲ့ ကံကောင်းစွာပဲ၊ အရင်တာဝန်တစ်ခုကြောင့် သူက အလောင်းဝိညာဉ်ရဲ့ အလောင်း ချီတွေကို နှစ်လလောက် စုဆောင်းခဲ့တယ်။ အဲဒါတွေကို ယာယီ ဖယ်ရှားပစ်လို့ မရခဲ့ဘူး။

နောက်ပိုင်းမှာ အလောင်း ချီ တွေက အဲဒီထူးဆန်းတဲ့အရာကို အရည်ပျော်သွားစေခဲ့ပြီး ကျန်းဒီကို ဝိညာဉ်တစ်ပိုင်း ဖြစ်သွားစေခဲ့တယ်”

ယန်ကျွင်းဇဲက နားထောင်ရင်းနဲ့ “'အလောင်းဝိညာဉ်'ဆိုတာ ဘာလဲ” လို့ ဇဝေဇဝါနဲ့ မေးလိုက်မိသည်။

“ဖုတ်ကောင်တစ်ကောင်က ထူးဆန်းတဲ့အရာတစ်ခုကို စားပြီးနောက်မှာ အလောင်းဝိညာဉ်ဖြစ်သွားတဲ့ သတ္တဝါပဲ” ကျန်းရှောင်မိုက ပြောသည်။ “ဒါက ထူးဆန်းတဲ့အရာရဲ့ စွမ်းအားတွေကို ဆက်ခံရုံသာမက ဖုတ်ကောင်ရဲ့ လက္ခဏာရပ်တွေလည်း ရှိနေတယ်၊ အရမ်းကို ပြဿနာများတယ်။ ပြီးတော့ သူ့ရဲ့ စွဲလမ်းမှုက ရှုပ်ထွေးတယ်။ ထူးဆန်းတဲ့အရာတွေကို ဖြေရှင်းဖို့ စွဲလမ်းမှုအပေါ် မူတည်တဲ့ နင် အရင်က အသုံးပြုခဲ့တဲ့ နည်းလမ်းက အလောင်းဝိညာဉ်တွေနဲ့ဆို အခြေခံအားဖြင့် အလုပ်မလုပ်တော့ဘူး။ ဘာလို့လဲဆိုတော့ သူတို့မှာ စွဲလမ်းမှုတစ်ခုထက် ပိုနေလို့ပဲ။

နင်က ပထမတစ်ခုကို မဖြေရှင်းရသေးဘဲ ဒုတိယတစ်ခုက နင့်ကို သတ်ပြီးသား ဖြစ်နေနိုင်တယ်”

“ငါ သိပြီ” ယန်ကျွင်းဇဲက ခေါင်းညိတ်ပြီး “ဒီ အစ်ကိုကျန်းဒီရဲ့ အဓိက အစားအစာက ဘာလဲ” လို့ မေးလိုက်သည်။

ကျန်းရှောင်မိုက ရယ်မောလိုက်ပြီး “နင် ဘာထင်လဲ” လို့ ပြန်ပြောသည်။

“မပြောတော့ဘူး၊ ငါ မခန့်မှန်းတော့ဘူး” ယန်ကျွင်းဇဲက ခေါင်းခါလိုက်ပြီး “နင် ခုနက ပြောတဲ့ 'ဝိညာဉ်တံတား'က ဘာလဲ။ ဒါက ဒီလိုမျိုး ကြီးမားတဲ့ ဖျက်ဆီးမှုတွေဖြစ်စေပြီး ရွာသားတွေအားလုံး သေဆုံးကုန်တာလား” လို့ မေးလိုက်သည်။

“ငါတို့က 'ဝိညာဉ်တံတား'ကို ငရဲနဲ့ လူ့ပြည်ကို ချိတ်ဆက်ပေးတဲ့ တံတားလို့ ခေါ်တယ်။ ဘာလို့လဲဆိုတော့ ဝိညာဉ်တံတားရဲ့ အရိပ် ပေါ်လာတာနဲ့ အဲဒီနေရာမှာ သေဆုံးဖူးတဲ့ လူတွေကို ထူးဆန်းတဲ့အရာတွေအဖြစ် ရွေးချယ်ပြီး ဆင့်ခေါ်လိမ့်မယ်။ အဲဒါက အဲဒီမှာ လွန်ခဲ့တဲ့ နှစ်တစ်ရာ၊ ဒါမှမဟုတ် နှစ်တစ်ထောင်ကတည်းက သေဆုံးသွားတဲ့ လူတစ်ယောက် ပေါ်လာနိုင်တယ်လို့ ဆိုလိုတာပဲ” ကျန်းရှောင်မိုက ရှင်းပြသည်။

“ဘုရားရေ၊ ဒါဆို ငါတို့က ရှေးဟောင်းထူးဆန်းတဲ့အရာတွေနဲ့ ရင်ဆိုင်နေရတာပဲ” ယန်ကျွင်းဇဲက မအော်ဘဲ မနေနိုင်ခဲ့ပေ၊ “ရုပ်ထုဝိညာဉ်တွေထက် ပိုပြီး အားကောင်းတာတွေ ရှိလား”

ကျန်းရှောင်မိုက ခေါင်းခါလိုက်သည်၊ “အခုထိတော့ ရုပ်ထုဝိညာဉ်အဆင့်အထက်မှာ ဘာမှ တွေ့ရှိထားတာ မရှိသေးဘူး။ သူတို့အားလုံးက လောကီဝိညာဉ် အဆင့်ကို မရောက်နိုင်ဘူး။ ဒါပေမဲ့ သူတို့ ပေါ်လာတာနဲ့ ရှေးဟောင်းရုပ်ထုဝိညာဉ် အများအပြား၊ ဒါဇင်နဲ့ချီပြီးတောင် ဖြစ်နိုင်လို့ အရမ်းကို ပြဿနာများတယ်။

ဒါ့အပြင် ငါတို့ နတ်ဆိုးနှိမ်နင်းရေးအဖွဲ့က လောကီဝိညာဉ်တွေက 'ဝိညာဉ်တံတား'တွေ ပေါ်လာအောင် လုပ်တာလို့ သံသယရှိနေတယ်။ အဲဒါက ဧရိယာတစ်ခုလုံးကို ခြိမ်းခြောက်နေတဲ့ အန္တရာယ်ရှိတဲ့ ထူးဆန်းတဲ့အဖြစ်အပျက်တွေဆီကို ဦးတည်သွားစေတယ်”

“နင် ခုနက ပြောသွားတာက ဟွာယင်းမြို့တော်ကြီးမှာ အခုထိ ဝိညာဉ်တံတား လေးခု ပေါ်ပေါက်ခဲ့တယ်၊ ငါတို့က စတုတ္ထမြောက်ဟာပေါ့။ ကျန်တဲ့ သုံးခုက ဘယ်မှာလဲ” ယန်ကျွင်းဇဲက သိချင်စွာ မေးမြန်းလိုက်သည်။

ကျန်းရှောင်မိုက ပြန်ဖြေသည်၊ “ကျန်တဲ့ သုံးခုကတော့ တစ်ခုက ဟွာယင်းခရိုင်မှာ၊ တစ်ခုက ထျန်ရီခရိုင်မှာ၊ နောက်တစ်ခုက ယန်နန်ခရိုင်မှာ ဖြစ်တယ်။

ယန်နန်ခရိုင်မှာရှိတဲ့ဟာက အကြီးဆုံးဖြစ်ပြီး အခုထိ အနီးအနားဒေသကို ပိတ်ဆို့ထားတယ်။ ထျန်မုန့်ဘက်က စတုတ္ထမြောက်ဟာကတော့ အသေးဆုံး 'ဝိညာဉ်တံတား'ပဲ။ ဒါပေမဲ့ ငါတို့က အနောက်ဘက်မြို့ကို ဦးတည်တဲ့ ဆင်ခြေဖုံးလမ်းထွက်ပေါက်ကိုတော့ ပိတ်ထားဆဲပဲ”

“ယန်နန်ခရိုင်က ကြီးမားတဲ့ ဝိညာဉ်တံတားက ဘာအကျိုးသက်ရောက်မှု ဖြစ်စေခဲ့လဲ” ယန်ကျွင်းဇဲက မေးလိုက်သည်။

ကျန်းရှောင်မိုက ခဏတာ အံ့အားသင့်သွားပြီး ခေါင်းခါကာ “အခုတော့ ငါ ပြောလို့မရသေးဘူး၊ ဒါပေမဲ့ အရမ်းကို ဆိုးရွားတယ်။ သတင်းအချက်အလက်ကို ပိတ်ဆို့ထားတယ်။ ဒါကြောင့် ငါက ထူးဆန်းတဲ့ဗီဒီယိုလုပ်ငန်းက မကြာခင်မှာ လုပ်ငန်းတစ်ခုအဖြစ် ဆုံးရှုံးသွားလိမ့်မယ်လို့ သံသယရှိနေတယ်။ ဘာလို့လဲဆိုတော့ 'ဝိညာဉ်တံတား' ပေါ်ပေါက်လာတာနဲ့ အဲဒီထူးဆန်းတဲ့ဗီဒီယိုတွေအားလုံးကို ချက်ချင်း တားမြစ်ပစ်လိမ့်မယ်” လို့ ပြောလိုက်လေသည်။

“တန်ကျန့်ရီက သူ့ရဲ့ လုပ်ငန်းလမ်းကြောင်းကို ပြောင်းလဲရလိမ့်မယ်” ယန်ကျွင်းဇဲက ခေါင်းညိတ်လိုက်ပြီး သူ့စိတ်ထဲမှာ ရှိတဲ့ မေးခွန်းတစ်ခုကို မေးလိုက်သည်၊ “ငါသာ ဝိညာဉ်တစ်ပိုင်းရဲ့ စွမ်းအားကို ဆက်ပြီး အသုံးပြုနေရင် 'အစစ်အမှန်ဝိညာဉ်ခန္ဓာ'အဖြစ် ပြောင်းသွားပြီး ငါ့အတွက် ဂိမ်းပြီးဆုံးသွားမှာလား”

“ဒါကြောင့်ပဲ ငါပြောတာ၊ ဒါက နင် နတ်ဆိုးနှိမ်နင်းရေးသမားတွေနဲ့ ပူးပေါင်းဖို့ ရွေးချယ်တာရဲ့ အကျိုးကျေးဇူးတွေထဲက တစ်ခုပဲ” ကျန်းရှောင်မိုက သူ့ပခုံးကို ပုတ်လိုက်ပြီး သူ့ကို အားပေးတဲ့အကြည့်နဲ့ ကြည့်လိုက်သည်၊ “ဒါက ဆဋ္ဌဂံပုံတံဆိပ်နဲ့ အတူတူပဲ။ ဒါက နင့်ရဲ့ ဝိညာဉ်တစ်ပိုင်းစွမ်းအားတွေ ထွက်ပေါ်လာတဲ့အခါမှာ အဲဒီအခြေအနေကို ဖိနှိပ်နိုင်တယ်။ နင်က ဝိညာဉ်တစ်ပိုင်းရဲ့ စွမ်းရည်တွေကို အသုံးပြုနိုင်သလို နင့်ခန္ဓာကိုယ်ကို ထိခိုက်မှုတွေကနေလည်း ထိရောက်စွာ ကာကွယ်နိုင်တယ်”

“ဟုတ်ပါတယ်၊ နင်သာ တကယ်ကို အစွမ်းကုန်ထုတ်သုံးချင်ရင်တော့ အပြည့်အဝ ထုတ်လွှတ်နိုင်တယ်၊ ဒါပေမဲ့ နင်က မှန်ကန်တဲ့ အချိန်မှာ ရပ်ရမယ်။ ဒီလိုအရာမျိုးကို အလွန်အကျွံ မလုပ်သင့်ဘူး”

ယန်ကျွင်းဇဲက ကြောင်အစွာနဲ့ နားထောင်နေခဲ့သည်။ သူက ကျန်းရှောင်မိုဟာ သူ့ကို နောက်ပြောင်နေသလို ခံစားနေရပေမဲ့ သက်သေအထောက်အထားတော့ မရှိခဲ့ပေ။

“နင် ငါ့ကို ဘာလက်နက်မှ မပေးတော့ဘူးလား။ နင့်ရဲ့ သံလိုက်ဓား ဒါမှမဟုတ် အဲဒီ 'လျှို့ဝှက်ဆွဲသီး'တွေလိုမျိုးလေ”

ကျန်းရှောင်မိုက ပခုံးတွန့်လိုက်သည်၊ “နင်က တကယ်တမ်းကျတော့ ကြယ်သုံးပွင့်နတ်ဆိုးနှိမ်နင်းရေးသမား မဟုတ်တော့ သံလိုက်ဓားကို အသုံးမပြုနိုင်ဘူး။ ငါ့ဆီမှာ 'လျှို့ဝှက်ဆွဲသီး'တွေ မရှိဘူး၊ ဒါပေမဲ့ နင့်ဖုန်းဆီကို ငါပို့လိုက်မယ့် ဒီလိပ်စာမှာ တံဆိပ်ကို အသုံးပြုပြီး နင် သွားယူလို့ရတယ်”

အဲဒီလိုပြောပြီးနောက်မှာ သူမက ဖုန်းကို အကြိမ်အနည်းငယ် နှိပ်လိုက်ပြီး ထျန်မုန့်ရဲ့ အရှေ့ဘက်မှာရှိတဲ့ လိပ်စာတစ်ခုကို ယန်ကျွင်းဇဲဆီ ပို့လိုက်သည်။

လိပ်စာ ပို့ပြီးနောက်မှာ ကျန်းရှောင်မိုက သူမရဲ့ကော်ဖီကို တစ်ကျိုက်တည်း သောက်လိုက်ပြီး ထရပ်လိုက်ကာ အနီးအနားမှာ ထိုင်နေတဲ့ ကျန်းဒီကို ထွက်ခွာဖို့ အချက်ပြလိုက်သည်။ သူမက ယန်ကျွင်းဇဲကို “နင် နောက်မှ ရှင်းပေးလိုက်နော်။ ငါ တခြား အက်စ်ပရက်ဆို နှစ်ခွက်လည်း မှာထားတယ်။ ငါ ဒီည တာဝန်ကျလို့ တစ်ညလုံး ဆောင်ရွက်ရမယ်။ ဒါကြောင့် နင် ရှင်းပေးနိုင်မယ်ဆိုရင် ကျေးဇူးတင်ပါတယ်” လို့ ပြောလိုက်သည်။

ယန်ကျွင်းဇဲကတော့...

ကျန်းရှောင်မိုက ကောင်တာဆီ အလျင်အမြန်သွားပြီး သူမရဲ့ ကော်ဖီတွေကို ယူလိုက်သည်။ သူမ ပြန်လာတဲ့အခါမှာ ယန်ကျွင်းဇဲကို “ဒါနဲ့၊ ဒီရက်ပိုင်းအတွင်းမှာ ထျန်မုန့်က နတ်ဆိုးနှိမ်နင်းရေးသမားတွေအားလုံး 'ဝိညာဉ်တံတား'ဆီကို သွားခဲ့ကြတယ်။

ဒါကြောင့် မြို့ထဲက ထူးဆန်းတဲ့အဖြစ်အပျက်တွေကို ဖြေရှင်းဖို့ အချိန်မရှိဘူး၊ ဒါမှမဟုတ် ဖြေရှင်းဖို့ အချိန်အချို့ ကြာနိုင်တယ်။ နင် ကိုယ့်ဘာသာ သတိထားဖို့ လိုတယ်” လို့ ပြောလိုက်သည်။

“နောက်ဆုံးတော့ လူတစ်ယောက်ရဲ့ အသိဉာဏ်နဲ့ စကားတစ်ခွန်း ပြောလိုက်တော့တယ်” ယန်ကျွင်းဇဲက သူ့ကော်ဖီကို တစ်ငုံသောက်လိုက်ပြီး ကျန်းရှောင်မိုကို ကြည့်လိုက်သည်။

ထို့နောက် ကျန်းရှောင်မိုက “ဘာလို့လဲဆိုတော့ ငါတို့က နင့်ကို တိုက်ရိုက် တာဝန်အချို့ ပေးတော့မှာ” လို့ ထပ်ပြောလိုက်သည်။

ပလွတ်!

ယန်ကျွင်းဇဲက ကော်ဖီတစ်ငုံကို စားပွဲပေါ်ကို ထွေးထုတ်လိုက်မိလေသည်။

ကျန်းဒီကလည်း ကောင်တာဆီ သွားပြီး ကာပူချီနိုကို ယူလိုက်သည်။ မထွက်ခွာခင်မှာ သူက ယန်ကျွင်းဇဲကို ကျေးဇူးတင်ကြောင်း ဘာမှ မပြောခဲ့ဘဲ သူ့ကို နက်နဲတဲ့၊ ခင်မင်ရင်းနှီးတဲ့ အကြည့်တစ်ခုသာ ပေးခဲ့သည်။

ယန်ကျွင်းဇဲကတော့ နတ်ဆိုးနှိမ်နင်းရေးအဖွဲ့ဟာ သူတို့ရဲ့ဝန်ထမ်းတွေကို လစာပေးရာမှာ နောက်ကျနေမှာပဲလို့ တွေးမိခဲ့သည်။ သူတို့အားလုံးဟာ သာမန်လူပဲဖြစ်ပြီူ ကျောင်းသားဖြစ်တဲ့ သူ့ထက်တောင် ပိုပြီး ဆင်းရဲကြပေသည်။

သို့သော်လည်း ကျန်းရှောင်မိုနဲ့ တွေ့ဆုံမှုက သူ့ကို အရေးကြီးတဲ့ အချက်အလက်တွေ အများကြီး ပေးနိုင်ခဲ့ပြီး သူက တရားဝင် ခေါ်ယူခြင်းခံရသလိုမျိုး ဖြစ်ခဲ့သည်။

ကောင်းပြီ၊ အတိအကျတော့ မဟုတ်ပေ။ ဒါက မဖြစ်မနေ လုပ်ရတာမျိုးပဲ။

ဒါပေမဲ့ ယန်ကျွင်းဇဲအတွက် ဒီအခြေအနေက ပုံမှန်ဆေးစစ်ဆေးမှုကနေတဆင့် နတ်ဆိုးနှိမ်နင်းရေးအဖွဲ့ကို ဝင်တာထက် ပိုပြီး ကောင်းတယ်။ အနည်းဆုံးတော့ သူ့ရဲ့ လျှို့ဝှက်ချက်တွေ အများအပြား ပေါ်ပေါက်တော့မှာ မဟုတ်ပေ။

အပြင်ကနေ ငှားရမ်းထားတာက အထူးခန့်အပ်ခံရတာနဲ့ တူပြီး ပုံမှန်ဝန်ထမ်းတစ်ယောက်ဖြစ်တာနဲ့ နှိုင်းယှဉ်ရင် ကန့်သတ်ချက်တွေ အများကြီး နည်းပါးသည်။

ခဏလောက် ထိုင်ပြီးနောက်မှာ ယန်ကျွင်းဇဲက ရှင်းလိုက်ပြီး ထကာ သွေးယူဖို့အတွက် နတ်ဆိုးနှိမ်နင်းရေးသမားရဲ့ စုရပ်ကို သွားဖို့ ပြင်ဆင်လိုက်သည်။

သွေးယူဖို့ တရားဝင် အခွင့်အရေးကို ရရှိခဲ့ပြီးနောက်မှာ သူက အဲဒါကို ကောင်းကောင်း အသုံးချရမှာပဲ။ သူ သွေးအိတ်အများအပြား ယူဖို့ စီစဉ်ထားသည်။ သူ အပြင်ထွက်တုန်းက ကျောပိုးအိတ်အနက်ရောင်တစ်လုံး ယူလာခဲ့ပြီး အဲဒါကို ဖြည့်ဖို့ သူ ဆုံးဖြတ်လိုက်သည်။