ပူးပေါင်းခြင်း

Vol. 020 Ch. 1927

စစ်တုရင်စေ့ ၂၇ လုံးသည် တစ်ခုတည်းအဖြစ်သို့ ပေါင်းစပ်သွားသလို ထင်ရပေသည်။ စစ်တုရင်စေ့များမှ ရွှေရောင်အလင်းတန်းများ ဖြာထွက်လာကာ အနှိုင်းမဲ့ ပုံရိပ်ယောင်တစ်လု ထွက်ပေါ်လာသည်။ စစ်တုရင်စေ့များက ရှေ့သို့ ရွေ့လျားသွားကာ ရန်သူများကို ချေမှုန်းရန် ကြီးမားသော ဘုရားတစ်ဆူ ရောက်လာသကဲ့သို့ ခံစားလိုက်ရစေသည်။

ဘန်း.. ဘန်း… လူငယ်ကို တိုက်ခိုက်ရန် အသုံးပြုခဲ့သော အခြားစစ်တုရင်စေ့များက မည်သည်မှ မကျန်သည်ထိ ကြေမွပျက်စီးသွားလေသည်။ လူငယ်က သူ၏ လက်ချောင်းကို ဝှေ့ယမ်းလိုက်လျှင် စစ်တုရင်စေ့ ၂၇ လုံးသည် နေရာအနှံ့သို့ သွေးရူးသွေးတန်း ပြေးထွက်ကာ ပျံသန်းသွားသည်။ စစ်တုရင်စေ့များ အက်ကွဲသံတို့က လေထုထဲမှ ဖြတ်သန်းထွက်ပေါ်လာသည်။ အခြားကျင့်ကြံသူရှစ်ဦး၏ မဟာလမ်းစဥ် စစ်တုရင်စေ့များ အားလုံးက ဖုန်မှုန့်များအဖြစ်သို့ ပြောင်းလဲသွားခဲ့သည်။

ပြိုင်ဘက်ကင်း ပုံရိပ်ယောင်က လူတိုင်းကို အထင်အမြင်သေးစွာ ငုံ့မိုးကြည့်နေသည်။ မဟာလမ်းစဥ် ပြိုင်ပွဲက မျက်စိတစ်မှိတ်အတွင်း ပြီးဆုံးသွားလေသည်။ လူငယ်သည် ပြိုင်ဘက်များကို အပြတ်အသတ် ချေမှုန်းကာ ပြိုင်ဘက်ကင်းအောင်ပွဲခံနိုင်ခဲ့သည်။ ထို့အပြင် တိုက်ခိုက်ရာတွင် အသုံးပြုသည့် စစ်တုရင်စေ့ ၂၇ ခုအနက် တစ်ခုတစ်လေမျှပင် ပျက်စီးဆုံးရှုံးခဲ့ခြင်း မရှိပေ။

စစ်တုရင်စေ့ ၃၆ ခုတွင် ၃၅ ခုကျန်ရစ်ခဲ့သည်။

"ဂုဏ်ယူပါတယ်" တိုက်ပွဲပြီးနောက် အရှေ့နတ်ဘုရားကျွန်းစုနယ်မြေမှ ကြီးကြပ်သူနတ်မိမယ်က လူငယ်အား ဂုဏ်ပြုပေးခဲ့သည်။ ထို့နောက် သူမက ပြောလိုက်၏။ "ဘေးမှာစောင့်နေပေးပါ။ ပြီးမှ အရှေ့နတ်ဘုရားဂိတ်ကို အတူတူ ဝင်ကြမယ်။"

“ကောင်းပြီ။” လူငယ်က ခေါင်းညိတ်လိုက်သည်။ ခဏအတွင် သူ့ခန္ဓာကိုယ် ပျောက်ကွယ်သွားသည်။ သူက အရှေ့နတ်ဘုရားဂိတ်ဘက်သို့ လျင်မြန်စွာ ရွေ့လျားသွားလိုက်ပြီး လွတ်နေသော နေရာတစ်ခုတွင် စောင့်ဆိုင်းနေရင်း တင်ပလ္လင်ခွေထိုင်ကာ ကျင့်ကြံမှုကို ပြန်လည်စတင်လိုက်သည်။

ပြိုင်ဘက်ကင်းပဲ ဟု စစ်တုရင်ခုံရှေ့တွင် ရပ်နေသော ကျင့်ကြံသူများက တွေးလိုက်သည်။ မည်သူကမှ ထိုလူငယ်ကို ခြိမ်းခြောက်နိုင်စွမ်းမရှိဘဲ ရလဒ်က အထင်ကြီးလောက်စရာပင် ဖြစ်သည်။ သူက စစ်တုရင်စေ့ တစ်ခုကိုသာ ဆုံးရှုံးခဲ့သည်။ ယခင်က သူ့ကဲ့သို့ လုပ်ဆောင်နိုင်သူ တစ်ယောက်ယောက်များ ရှိခဲ့သေးလားဟု သူတို့က သိချင်နေကြပေသည်။

ထိုအချိန်တွင် အရှေ့နတ်ဘုရားကျွန်းစုနယ်မြေမှကြီးကြပ်သူနတ်မိမယ်က ထပ်ပြောလိုက်သည်။ "နောက်ထပ် ဘယ်သူလာမလဲ?"

သူမ မေးလိုက်သည်နှင့် တစ်စုံတစ်ယောက်က ချက်ချင်းပင် ရှေ့သို့တက်ကာ စစ်တုရင်ခုံသို့ လျှောက်သွားလိုက်သည်။ ထိုသူက စစ်တုရင်ခုံပေါ်ရှိ နေရာခြောက်နေရာမှ တစ်နေရာတွင် ဆင်းသက်ခဲ့၏။ နောက်တခဏတွင် မဟာလမ်းစဉ် စစ်တုရင်စေ့ ၃၆ ခု ထွက်ပေါ်လာပြီး သူ့ခန္ဓာကိုယ်အနီးတွင် ပျံဝဲနေသည်။

"သူက ဝူရှန်မြို့ရဲ့ သခင်ငယ်ပဲ။" ဟု အံ့အားသင့်သည့် အမူအရာနှင့် လူတစ်ယောက်က ပြောလိုက်သည်။ ဝူရှန်မြို့သည် ဖန်းလိုင်ကုန်းမြေရှိ အဓိကမြို့များထဲမှ တစ်ခုဖြစ်သည်။ ဝူရှန်မြို့၏ မြို့သခင်က အလွန်အစွမ်းထက်သည်။ ထို့အတူ မြို့သခင်ငယ်၏ ကျင့်ကြံရေးသည်လည်း ကြောက်မက်ဖွယ်အဆင့်သို့ ရောက်နေခဲ့ပြီးဖြစ်သည်။ သူသည် အနိမ့်ဆုံး ဆဋ္ဌမဆင့်နတ်ဝင်ရိုးနှင့် ရန်ဟောင်တစ်ပါးဖြစ်ကာ သူ၏ တိုက်ခိုက်ရေးစွမ်းရည်မှာ ထူးချွန်ပြောင်မြောက်လှကာ ပါရမီကလည်း မြင့်မားလှသည်။

သူသည် စစ်တုရင်ခုံပေါ်သို့ ပထမဆုံးဝင်ရောက်သူဖြစ်ရန် ရွေးချယ်ခဲ့ခြင်းမှာ သူသည် အခြားသူများကို တိတ်တဆိတ် အံ့သြသွားစေရန်နှင့် အခြားသော အစွမ်းထက်တန်ခိုးရှင်များက သူနှင့် မယှဥ်ပြိုင်ဘဲ ရှောင်သွားနိုင်စေရန်အတွက် ဖြစ်နိုင်သည်။

"သူက ဖန်းလိုင်ကုန်းမြေမှာ အားအကောင်းဆုံး အင်အားစုတွေထဲက တစ်ခုဖြစ်တဲ့ ဝူရှန်မြို့ရဲ့ သခင်ငယ် လျှိုချင် ပဲ။" စန့်ကွမ်းချိုးရယ်က ရီဖူရှင်းကို ရှင်းပြလိုက်သည်။ သူမက ဆက်ကာ ပြောလိုက်၏။ "သူကလည်း ဖန်းလိုင်ကုန်းမြေက အတော်ကျော်ကြားတဲ့သူတစ်ယောက်ပဲ။ ကျွင်းချိုးယွင်နဲ့ ယှဥ်ရင် သူက အများကြီးသာတယ်။ သူ့ရဲ့ အဆင့်အတန်းက ကျွန်မနဲ့အတူတူလောက်ပဲ။ သူက ဝူရှန်မြို့ရဲ့ ဆက်ခံသူတစ်ယောက် ဖြစ်တယ်။ သူက စစ်တုရင်ခုံကို ပထမဆုံး ဝင်လာဖို့ ဆုံးဖြတ်လိုက်တာက ဒုတိယမြောက်ဝင်ခွင့်ရသူက သူ ဖြစ်ရမယ်လို့ ကြေညာလို့တာနဲ့ အတူတူပဲ။"

"ဒါဆို အခု မင်းအဲဒီကို တက်သွားရင် မင်း ရှုံးမယ်လို့ ဆိုလိုတာလား။" ရီဖူရှင်းက မေးလိုက်သည်။

"ဒါက ဖြစ်နိုင်ခြေရှိတဲ့ကိစ္စပဲ" ဟု စန့်ကွမ်းချိုးရယ်က ပြန်ပြောခဲ့သည်။ "ရှင့်ဘက်က အလျင်လိုမနေဘူးဆိုရင်တော့ သူ့ကို ရှောင်တာက ကောင်းမွန်တဲ့ရွေးချယ်မှု ဖြစ်လိမ့်မယ်။ ရှင်က သူ့ထက် အားကောင်းတယ်ဆိုပေမယ့် နောက်ထပ်ပွဲစဥ်မှာ တခြား အစွမ်းထက်တဲ့ တန်ခိုးရှင်တွေ ပါလာမှာစိုးမိတယ်။ ရှင့်ရဲ့ ခွန်အားကို အခု ထုတ်ပြလိုက်ရင် မင်းဟာ ပို အစွမ်းထက်တဲ့ အုပ်စုရဲ့ ပစ်မှတ်ဖြစ်လာနိုင်တယ်။ ရှင့်ကို ဝိုင်းပြီး ပစ်မှတ်ထားလာရင် ဖိအားဖြစ်လာလိမ့်မယ်။"

စန့်ကွမ်းချိုးရယ်၏ ရှုထောင့်မှကြည့်လျှင် ရီဖူရှင်းပြသခဲ့သော လွှမ်းမိုးနိုင်စွမ်းရှိသည့် ခွန်အားက လျှိုချင်ကိုပင် အနိုင်ရရန် လုံလောက်ပေသည်။ သို့သော်လည်း လျှိုချင်သည် ရီဖူရှင်းအား ဖိအားပေးနိုင်စွမ်းရှိသော အားကောင်းသည့် ပြိုင်ဘက်ဖြစ်နေဆဲပင်ဖြစ်သည်။

"ဝူရှန်မြို့ရဲ့ သခင်ငယ်က ဒီတစ်ခေါက်ပထမပွဲစဥ်မှာ အနိုင်ရဖို့ ကျိန်းသေပုံတယ်။" တစ်စုံတစ်ယောက်က ပြောလိုက်သည်။ အချိန်တစ်ခုကြာသည်ထိ မည်သူမှ စစ်တုရင်ခုံပေါ် တက်မလာကြပေ။

"ဝူရှန်မြို့ရဲ့ သခင်ငယ်လေးတဲ့လား။" ကျက်သရေရှိသော အသွင်အပြင်နှင့် လူငယ်တစ်ယောက်က မျက်စိတစ်မှိတ်အတွင်း စစ်တုရင်ခုံပေါ်တွင် ထွက်ပေါ်လာသည်။ ထိုလူသည် အလွန်ချောမောသော မျက်နှာနှင့် ဖြူစင်သော အသားအရေကို ပိုင်ဆိုင်ထားသည်။ သူသည် ယောက်ျားလေးတစ်ယောက်လို သန့်စင်ပြီး ပြေပြစ်သော မိန်းမတစ်ယောက်ဖြစ်သည်။ သူက မိန်းကလေးတစ်ယောက်ကဲ့သို့ သန့်စင်ပြီး ကျက်သရေရှိသည့် ရှားရှားပါးပါး လှပသော ကောင်လေးတစ်ယောက် ဖြစ်သည်။

"ပေ့ယွမ်ကုန်းမြေက ပိုင်ကု" ထိုလူငယ်က မိန်းကလေးဆန်သော အသွင်အပြင်နှင့် နူးညံ့ဟန်ရှိသော်လည်း သူ၏ နက်ရှိုင်းသော အသံက လူအများကို ကျောရိုးထဲမှပင် အေးစိမ့်သွားမှုအား ခံစားလိုက်ရစေသည်။

အမည်ရှိသော ကုန်းမြေမှ လူများသည် မည်သည့်အခါမှ အားမနည်းကြပေ။ ပေ့ယွမ်ကုန်းမြေသည် ဖန်းလိုင်ကုန်းမြေနှင့် ယှဉ်လျှင် တူညီသော အင်အားရှိသည်။ သို့သော်လည်း လူအများစုသည် မည်သည့်အခါကမှ ဝေးလံသောနေရာများကို မရောက်ဖူးသောကြောင့် ပေ့ယွမ်ကုန်းမြေ၏ အမည်ကို သိပ်မရင်းနှီးကြပေ။

သို့သော် အချို့သော အစွမ်းထက်သည့် အဓိကအင်အားစုမှ အချို့သောသူများက ပေ့ယွမ်ကုန်းမြေမှ ပိုင်မိသားစုဟူသော အမည်၏ အဓိပ္ပါယ်ကို သိရှိကြသည်။

ပေ့ယွမ်ကုန်းမြေမှ ပိုင်မိသားစုသည် ပေ့ယွမ်ကုန်းမြေတစ်ခုလုံးကို အုပ်စိုးထားသူများဖြစ်သည်။ ဖန်းလိုင်ကုန်းမြေနှင့်မတူဘဲ သူတို့က အကြွင်းမဲ့အုပ်စိုးနိုင်သူများ ဖြစ်ကြသည်။

လျှိုချင်ပင် ရပ်တန့်ကာ ပိုင်ကုကို ကြည့်လိုက်သည်။ သူက ပိုင်ကုအား အလွန်တည်ငြိမ်စွာ ကြည့်နေခဲ့သည်။ သူ့ကို ထိုအဖြစ်က အနှောက်အယှက်ဖြစ်စေပုံမရပေ။ အကယ်၍ သူက ပိုင်ကုနှင့် ယခုတစ်ကြိမ် မတွေ့ခဲ့လျှင်လည်း နောက်တစ်ကြိမ် တိုက်ပွဲ၌ ရင်ဆိုင်ရမည်သာ ဖြစ်သည်။ ထို့ကြောင့် ဤကိစ္စက သူ့အတွက် သိပ်အရေးမကြီးပေ။

"အရှေ့နတ်ဘုရားကျွန်းစုနယ်မြေကို ကျင့်ကြံဖို့ လာရောက်ကြတဲ့ ကျင့်ကြံသူတွေက အားကောင်းမယ်ဆိုတာ ကျုပ် သိနေတယ်။ ဝူရှန်မြို့က ဖန်းလိုင်ကုန်းမြေရဲ့ တစ်စိတ်တစ်ပိုင်းကို လွှမ်းမိုးထားနိုင်ပြီး တော်ဝင်ပိုင်မိသားစုက ပေ့ယွမ်ကုန်းမြေတစ်ခုလုံးကို အုပ်စိုးတယ်။ ဒီလူအိုကြီးက အမည်မရှိပေမယ့် အပျော်သဘောနဲ့ ပါဝင်ချင်မိရဲ့။" နောက်ထပ်လူတစ်ယောက်က စစ်တုရင်ခုံပေါ် တက်လာပြန်သည်။ သူက အသက်ကြီးသော်လည်း သူ၏ အရှိန်အဝါက လွှမ်းမိုးနိုင်စွမ်းရှိသည့် အဆင့်မြင့်ရန်ဟောင်တစ်ယောက် ဖြစ်လေသည်။

"ဒီအကြီးအကဲက တခြားနေရာတွေမှာ မဟာလမ်းစဥ်အခွင့်အလမ်းတွေအတွက် ယှဥ်ပြိုင်တုန်းက လူတွေအများကြီးကို အနိုင်ယူပြ အခွင့်အလမ်းကောင်းတွေ ရရှိခဲ့တယ်။ သူက အစွမ်းထက်တယ်။" အချို့၏ အမူအရာက တည်ငြိမ်နေသေးသော်လည်း အချို့က အနည်းငယ် တုန်လှုပ်သွားကြသည်။ ပြောဆိုနေကြသည့် မှတ်ချက်များမှ ပိုင်ကု၏ အင်အားကို စတင်နားလည်လာကြသည်။

ပထမတိုက်ပွဲသာလျှင် ရှိသေးသော်လည်း အားကောင်းသည့် ကျင့်ကြံသူအားလုံး စစ်တုရင်တိုက်ပွဲသို့ ပြေးဝင်ချင်နေကြသည်လား။

"ဒီလိုဆိုမှတော့ ကျွန်မလည်း အပျော်သဘောနဲ့ ပါချင်တာပေါ့။" ဟု နောက်ထပ်အသံတစ်ခုက ပြောလိုက်သည်။ ဤတစ်ကြိမ်၌ ထွက်လာသူက အမျိုးသမီးရန်ဟောင်တစ်ဦးဖြစ်သည်။ သူမသည် အနီရောင် ၀တ်စုံရှည်ကို ၀တ်ဆင်ထားပြီး မည်သည့်အခါတွင်မှ ဆန့်ကျင်ရန်မသင့်သော ဘုရင်မတစ်ပါးကဲ့သို့ ကျက်သရေရှိပြီး စွဲမက်ဖွယ်ကောင်းသည့် အရှိန်အဝါကို ပိုင်ဆိုင်ထားသည်။

"သွေးဘုရင်မ" စန့်ကွမ်းချိုးရယ်က တိုးတိုးလေးပြောလိုက်သည်။ ဖန်းလိုင်ကုန်းမြေမှ ကျင့်ကြံသူတိုင်း သူမကိုမြင်ပြီးနောက် တုန်လှုပ်သွားပုံရသည်။ မည်သည်တို့ ဖြစ်ပျက်နေသနည်း။

အစွမ်းထက်တန်ခိုးရှင်များက တစ်ယောက်ပြီးတစ်ယောက် စစ်တုရင်ခုံထက် တက်လာကြသည်။ သူတို့က စစ်တုရင်တိုက်ပွဲ၌ သူတို့ကိုယ်သူတို့ သက်သေပြရန် ထိုမျှ အလျင်လိုနေကြသည်လား။

သူတို့က နောက်ထပ်ပွဲစဥ်ထိ မစောင့်ဆိုင်းနိုင်တော့သည်လား။

ပါဝင်လာသော ကျင့်ကြံသူတိုင်းသည် အစွမ်းထက်သော တန်ခိုးရှင်များ ဖြစ်ကြသည်။ သူတို့က ဂုဏ်ယူဖွယ်ရာများပင် ဖြစ်၏။ ယခင် လျှို့ဝှက်ဆန်းကြယ်သော လူငယ်လေးက အလွန် အစွမ်းထက်ပြီး လူများစွာက သူ့ကို ရည်ရွယ်ချက်ရှိရှိ ရှောင်ရှားခဲ့သည်။ ထိုသည်က သူတို့၏ စည်းမျဥ်းများကို ချိုးဖောက်နေခဲ့ပြီး ဖြစ်သည်။

ယခု ထိုလျှို့ဝှက်ဆန်းကြယ်သော လူငယ်လေးက အနိုင်ရရှိခဲ့ပြီး ဖြစ်သည်။ သူက တိုက်ပွဲတွင် နောက်တစ်ကြိမ် ပါဝင်တော့မည် မဟုတ်ပေ။ သူတို့က တိုက်ပွဲကို မည်သည့်အတွက် နောက်တစ်ကြိမ် ရှောင်ရှားရမည်နည်း။

ထို့အပြင် ဤဂိတ်ကို ဖြတ်ကျော်နိုင်ရန် တိုက်ပွဲများတွင် ကုန်းမြေများစွာမှ ထောင်ပေါင်းများစွာသော ကျင့်ကြံသူများ ကျန်ရှိနေသေးသည်။ အစွမ်းထက် တန်ခိုးရှင်များက ကောင်းကင်မှ တိမ်များကဲ့သို့ တွေ့နေကြ အခြေအနေတစ်ခုလို ဖြစ်လာသည့်အခြေအနေ၌ နောက်ပွဲစဥ်၌ မည်သို့သော ပြိုင်ဘက်မျိုး ပေါ်လာမည်ကို မည်သူက သိပါမည်နည်း။

တိုက်ပွဲတိုင်းတွင် အစွမ်းထက်သော တစ်စုံတစ်ယောက် ရှိသည်။

ပုံမှန်အားဖြင့် အနိုင်ရရှိသူက အခြားအနိုင်ရလာသည့် ရှစ်ယောက်နှင့် ထပ်မံရင်ဆိုင်ရမည်ဖြစ်ရာ ရှောင်လွှဲ၍ မရနိုင်ပေ။

သူတို့က အခြားသူများကို ရှောင်ရှား၍ ဆက်လက်စောင့်ဆိုင်းနေရမည်ကို မလိုလားကြပေ။ ထို့ကြောင့် လက်ရှိအခြေအနေကို ဖန်တီးခဲ့ကြပေသည်။

အစွမ်းထက်သော တန်ခိုးရှင်များစွာက ထိုကဲ့သို့ လုပ်ဆောင်နေပြီဖြစ်သောကြောင့် အခြားသူများသည်လည်း ရှောင်တိမ်းလိုစိတ် မရှိတော့ပေ။ ထို့ကြောင့် စစ်တုရင်ခုံပေါ်သို့ တစ်ယောက်ပြီးတစ်ယောက် တက်လာကြတော့သည်။

အစပိုင်းတွင် လူအများစုက အရှေ့နတ်ဘုရားကျွန်းစုနယ်မြေ၏ ပင်မကျွန်းစုသို့ ဝင်ရောက်ရန် စိတ်မဝင်စားခဲ့ကြပေ။ သူတို့က ကိုယ့်အကန့်အသတ်ကိုယ် သိကြပြီး ဤနေရာသို့ အတွေ့အကြုံ ရရန်အတွက်သာ လာခဲ့ကြခြင်း ဖြစ်သည်။ သို့သော် အခြေအနေက ထို့သို့ဖြစ်လာသည့်အတွက် သူတို့က တက်ကြွလာကြသည်။ မည်သည့်အတွက် ကြောက်ရွံ့နေရမည်နည်း။ ကြောက်စရာမည်သည့်အရာမှ မရှိပေ။

ထို့ပြင် သူတို့က ထိုနေရာတွင် လေ့ကျင့်လျှင် အစွမ်းထက်တန်ခိုးရှင်များစွာ ရှိနေသည့်အတွက် ပိုကောင်းပေသည်။

သူတို့ရှေ့က မြင်ကွင်းကို ကြည့်ရင်း သည်တိုက်ပွဲက ထိုအစွမ်းထက်သည့်သူအနည်းငယ်အတွက် တိုက်ပွဲဖြစ်သည်ဟု လူအများက သိရှိခဲ့ကြသည်။ ကျန်သောသူများမှာ ပါဝင်ရုံသက်သက်သာ ဖြစ်လေသည်။

"သူတို့ထဲမှာ တချို့က အရမ်းအားကောင်းတယ်။ ဒီတစ်ကြိမ်ကို ရှောင်လိုက်ကြမလား။" စန့်ကွမ်းချိုးရယ်က ပြောလိုက်သည်။ သို့သော်လည်း သူမ၏ စကားကို အဆုံးမသတ်ရသေးခင်မှာပင် ရီဖူရှင်းက ရှေ့သို့လှမ်းကာ ပြောလိုက်သည်။ "သူ့ကို သေချာ စောင့်ကြည့်ပေးထားပါ။"

ကျွင်းချိုးယွင်ကို နောက်တွင် ထားခဲ့ပြီး ရီဖူရှင်းက ရှေ့သို့ လျှောက်လာကာ စစ်တုရင်ခုံပေါ်ကို တက်လိုက်ပြီး ပြူးကျယ်နေသော မျက်လုံးများနှင့် စိုက်ကြည့်နေသည့် စန့်ကွမ်းချိုးရယ်ကို ချန်ရစ်ထားခဲ့သည်။

"ဒီလူကတော့...."

သို့သော် ရီဖူရှင်း မည်မျှ အစွမ်းထက်သည်ကို သူမ သိသည်။ ဆန့်ကျင်ဘက်အနေနှင့် လျှိုချင်နှင့် ပိုင်ကုဖြစ်စေ ထိုစစ်တုရင်ခုံပေါ်မှ မည်သူပင်ဖြစ်စေ မည်သူကမှ ရီဖူရှင်းအား အနိုင်ယူနိုင်မည် မဟုတ်ပေ။

သို့သော်လည်း ရီဖူရှင်းက သူ၏စစ်မှန်သော စွမ်းအားကို ပြသပြီးနောက် ပစ်မှတ်ထားခံရမည်ကို သူမ စိုးရိမ်နေပြီး ထိုအခြေအနေတွင် မည်သို့ဖြစ်လာမည်ကို မည်သူက သိနိုင်ပါမည်နည်း။

"ဟိုတစ်ယောက်လည်း အဲဒီကို တက်သွားတာပဲ။" ဖန်းလိုင်ကုန်းမြေမှ ရန်ဟောင် အများအပြားက ရီဖူရှင်းကို သတိပြုမိကြသည်။ သူက ကျွင်းချိုးယွင်အား ဆွဲခေါ်ကာ နေရာအနှံ့ လျှောက်သွားနေသည့်အတွက် လူတွေက သူ့ကို အာရုံစိုက်ကြသည်မှာ သဘာဝကျပေသည်။ ထို့ပြင် အစောပိုင်းက ချောက်ကမ်းပါး၌ ရှိနေခဲ့သော ကျင့်ကြံသူများ၏ မျက်နှာထက်တွင် ရွှင်မြူးသည့် အမူအရာတို့ ရှိခဲ့သည်။

'အဲဒီတော့ သူက လှုပ်ရှားပြီလား' ဟု သူတို့က တွေးလိုက်သည်။

အစောပိုင်းတွင် ထူးချွန်သော တန်ခိုးရှင်အများအပြား စစ်တုရင်ခုံပေါ်သို့ တက်ရောက်လာသည့်အခါ လူအများစုမှာ အနိုင်ရရှိသူသည် ၎င်းတို့ထဲမှ တစ်ဦးဖြစ်မည်ဟု ထင်မြင်ခဲ့ကြသည်။ သို့သော်လည်း ရီဖူရှင်း ထွက်ပေါ်လာသောအခါတွင် နောက်ဆုံးအနိုင်ရမည့်သူမှာ ရီဖူရှင်းသာဖြစ်မည်ကို သူတို့ သေချာ သိခဲ့ကြပေသည်။

သူတို့ကြားမှ တစ်ယောက်က ယုံကြည်ချက်အပြည့်နှင့် ပြောလိုက်သည်။ "ကြည့်ရတာ ဒီတိုက်ပွဲရဲ့ အနိုင်ရသူက ဆုံးဖြတ်ပြီးသွားပုံပဲ။"

"အနိုင်ရသူကို ဆုံးဖြတ်ပြီးပြီလား။ လျှိုချင်၊ သွေးဘုရင်မ၊ ပိုင်ကု အကုန်လုံးက အစွမ်းထက်တဲ့ သူတွေချည်းပဲ။ ကျုပ်ကတော့ သူတို့ကြားမှာ အရေးသာမယ့်သူ မရှိသေးဘူးလို့ ထင်တယ်... မဟုတ်ဘူးလား။"

"သူတို့ နိုင်မှာ မဟုတ်ဘူး" အစောပိုင်းက ပြောခဲ့သည့် အမျိုးသားက ပြန်ဖြေလိုက်သည်။ သူသည် ဝံ့ကြွားနေသော အပြုံးဖြင့် တစ်ဖက်လူအား စိုက်ကြည့်လိုက်သည်။

"ဟမ်" ထိုလူက စိတ်ရှုပ်သွားပုံရပြီး မေးလိုက်သည်။ "ဒါဆို ဘယ်သူက အနိုင်ရမှာလဲ။"

"သူ။" ဂုဏ်ယူဝံ့ကြွားနေသူက ရီဖူရှင်းအား လက်ညှိုးထိုးပြလိုက်လျှင် လူအများက သူ့ကို ဝိုင်းကြည့်လာကြ၏။

အဖြူရောင်ဆံပင်နှင့် ရီဖူရှင်းက အဖြူရောင်ဝတ်စုံကို ၀တ်ထားသည်။ သူ၏ အရှိန်အဝါနှင့် အသွင်အပြင်က ထူးကဲလှသည်။ နတ်ဆိုးဆန်လောက်အောင် ချောမောသော ရီဖူရှင်း၏ မျက်နှာက ပိုင်ကုထက်ပင် ချောမောသည်ဟု မှတ်ယူနိုင်သည်။ အချိန်တိုအတွင်းမှာပင် သူက လူအများ၏ အကြည့်များကို သေချာပေါက် ဆွဲဆောင်နိုင်ခဲ့သည်။

သို့ပေမယ့် သူက စစ်တုရင်ခုံထက်ရှိ အားကောင်းသော တန်ခိုးရှင်အားလုံးကို အနိုင်ယူနိုင်သည်ဟု အခိုင်အမာဆို၍ ရနိုင်သည်လား။ ထိုသည်က အနည်းဆုံး မေးခွန်းထုတ်စရာတစ်ခု ဖြစ်နေသေးပေသည်။

တစ်စုံတစ်ယောက်က ထိုသို့ ကြွေးကြော်ခဲ့သည့်အတွက် သူက ကျိန်းသေ ထူးချွန်သော နယ်ပယ် ရှိရပေမည်။ သို့ဆိုလျှင် သူက မည်သူနည်း။

စစ်တုရင်ခုံပေါ်တွင် ရီဖူရှင်းက နေရာတစ်ခုသို့ ဆင်းသက်လာသည်။ ချက်ချင်းပင် စစ်တုရင်စေ့ ၃၆ ခု ထွက်ပေါ်လာပြီး သူ့ခန္ဓာကိုယ်အနီးတွင် ဝဲပျံနေသည်။ ၎င်းတို့ကို ဝင်္ကပါမန္တာန်နှင့် ဖန်တီးထားသကဲ့သို့ ထင်မှတ်ရပြီး အလွန် ကြောက်မက်ဖွယ် ကောင်းလှသည်။

ရီဖူရှင်းသည် သူ၏ နတ်အာရုံနှင့် မဟာလမ်းစဥ် စွမ်းအားများကို စစ်တုရင်စေ့များထဲသို့ သွင်းလိုက်သည်။ ထို့နောက် တခဏအတွင်း စစ်တုရင်စေ့များထံမှ ဟူးခနဲ ဝီခနဲ ဆူညံသံများ ထွက်ပေါ်လာတော့သည်။ စစ်တုရင်စေ့လေးများမှ မဟာလမ်းစဥ်စွမ်းအားများ ထုတ်လွှတ်လာပြီး ၎င်းတို့က အလွန် သဘာဝကျနေသလို ထင်မှတ်ရသည်။

ထို့နောက် ရီဖူရှင်းက မျက်မှောင်ကြုတ်လိုက်သည်။ သူသည် တစ်စုံတစ်ယောက်က သူ့အပေါ်တွင် အာရုံစိုက်နေသကဲ့သို့ ခံစားလိုက်ရသည်။

သူ ခေါင်းကို မော့ကာ ကြည့်လိုက်သည်။ စစ်တုရင်ခုံပေါ်ရှိ သူ့ဘေးမှ တစ်စုံတစ်ယောက်က သူ့ကို စတင် တိုက်ခိုက်ရန် ဆုံးဖြတ်လိုက်ပုံရသည်။ စစ်တုရင်စေ့ကိုးခုက ရှေ့သို့ တဟုန်ထိုး ပြေးဝင်လာ၏။ စစ်တုရင်စေ့များတွင် ပြင်းထန်သော မိုးကြိုးစွမ်းအားများ ပါဝင်နေသည်။ ၎င်းတို့သည် မိုးကြိုးစွမ်းအင် လျှပ်စီးအလင်းတန်းကိုးခုအဖြစ် ပြောင်းလဲသွားပြီး ရီဖူရှင်းဆီသို့ တည့်မတ်စွာ ပျံသန်းလာကြသည်။

မဟာလမ်းစဥ်မိုးကြိုးစွမ်းအား အလင်းတန်း ကိုးခုက ရီဖူရှင်းထံ တိုးဝင်လာသည်။ ရီဖူရှင်းက လက်ကို မြှောက်ကာ ဝှေ့ယမ်းလိုက်သည်။ ထို့နောက် ချက်ချင်းပင် စစ်တုရင်စေ့တစ်ခုက ပျံထွက်သွားပြီး ပြီးပြည့်စုံ လှပသော ဓားဆန္ဒတစ်ခုအဖြစ် ပြောင်းလဲသွားကာ လေဟာနယ်ကို လှီးဖြတ်လိုက်သည်။

ဓားဆန္ဒသည် ပြိုင်ဘက်၏ စစ်တုရင်စေ့ ကိုးခုကို တိုက်ရိုက် ထိုးဖောက်ကာ တစ်ခုချင်းစီအား ချက်ချင်း ဖျက်ဆီးပစ်လိုက်သည်။

စစ်တုရင်စေ့ ကိုးခုက ပြုတ်ကျသွားသည်။ ကျင့်ကြံသူက ရီဖူရှင်းကို ကြည့်လိုက်၏။ ရီဖူရှင်း ရှေ့တွင် ကျန်ခဲ့သောအရာမှာ စစ်တုရင်စေ့မှ ထုတ်လွှတ်နေသော ကြောက်မက်ဖွယ် အရှိန်အဝါသာဖြစ်ပေသည်။

သူသည် စစ်တုရင်စေ့ကိုးခုကို အနိုင်ယူရန် စစ်တုရင်စေ့တစ်ခုကိုသာ အသုံးပြုခဲ့သည်။

စစ်တုရင်ခုံပေါ်မှ အခြားတန်ခိုးရှင်များက ရီဖူရှင်းဘက်သို့ လှည့်ကြည့်လိုက်ကြသည်။ သည်လူက အလွန်အားကောင်းပုံရလေသည်။

***