အခန်း ၂၆၅-၂၆၇

အခန်း ၂၆၅ - ရန်ဟွမ်နယ်မြေ တိုးတက်လာခြင်း

ကြယ်အစုအဝေးတပ်ဖွဲ့ကိုတည်ထောင်ခြင်းက တာ့ယွီအင်မော်တယ်မင်းဆက်၏ အင်အားကို သိသိသာသာ မြှင့်တင်ပေးခဲ့သည်။ သို့သော် ရီရှောင်းရှောင်းသည် ၎င်းတပ်ဖွဲ့၏တည်ရှိမှုကို ထုတ်ဖော်ပြောဆိုခြင်းမရှိဘဲ အနာဂတ်ရန်သူများကို အံ့အားသင့်စေရန်ကြံရွယ်ထားသည်။

တကယ်တမ်းတွင် လက်ရှိကြယ်တာရာအစုအဝေးတပ်သည် မပြည့်စုံသေးချေ။ မီးငှက်နှင့် လိပ်နက်တို့၏ တပ်ဖွဲ့ဝင်များပါဝင်သော ကြယ်နှစ်ဆယ့်ရှစ်လုံးတပ်ဖွဲ့ကို ဖွဲ့စည်းပြီးမှသာ ပြီးပြည့်စုံမည်ဖြစ်သည်။

ရီဖန်ပင်လျှင် ကျန်ကြယ်ပွင့်နေရာများကို မည်သည့်အချိန်မှရနိုင်မည်ကို မခန့်မှန်းနိုင်ချေ။ စနစ်က ပိုမိုကူညီပေးရန်သာ မျှော်လင့်ပါ၏။ တာ့ယွီအင်မော်တယ်မင်းဆက်နှင့် ရီမိသားစုတို့ ကြီးထွားနေချိန်တွင် ချန်မင်ကမ္ဘာရှိ အခြားသောအင်အားစုများအတွက် မလွယ်ကူလှချေ။

အချိန်ကြာလာသည်နှင့်အမျှ ချန်မင်ကမ္ဘာသည်လည်း ပို၍ပျက်ဆီးလာခဲ့သည်။

ယင် ယန်တံခါးဟုခေါ်ဆိုသည့် အင်အားစုတစ်ခုသည် ချန်မင်ကမ္ဘာကျင့်ကြံသူများ၏ မျက်စိရှေ့သို့ တဖြည်းဖြည်း ထွက်ပေါ်လာသည်။ကြည့်ရသည်မှာ ဤအင်အားစုသည် နှစ်ပေါင်းများစွာကြာမြင့်သော စစ်ပွဲများနှင့်ပဋိပက္ခများနောက်ကွယ်မှ တရားခံဖြစ်ပုံရသည်။

‘ယင်ယန်တံခါး၊ ရှင်သန်ခြင်းနှင့် သေဆုံးခြင်းတံခါး’ ရီဖန် အံ့ဩသွား၏။ ဤအင်အားစုနှစ်ခုကြားတွင် ဆက်စပ်မှုရှိနိုင်သလား။ ရီဖန်က စုယန်ကိုမေးခဲ့သော်လည်း ရှင်သန်ခြင်းနှင့် သေဆုံးခြင်းတံခါးက ထို ယင်ယန်တံခါးအကြောင်းကို ဖော်ပြထားခြင်းမရှိချေ။

ယင်ယန်တံခါး ရုတ်တရက်ထွက်ပေါ်လာခြင်းကို ကြည့်ခြင်းအားဖြင့် ချန်မင်ကမ္ဘာတွင် လျှို့ဝှက်ဆန်းကြယ်သော အင်အားစုအများအပြား ရှိနေပုံရသည်။ ထို ယင်ယန်တံခါးကို ရီဖန်တိုက်ခိုက်ရန် ရည်ရွယ်ချက်မရှိပေ။ အဓိကအကြောင်းရင်းမှာ ယင်ယန်တံခါးသည် ရီမိသားစု၏လွှမ်းမိုးမှုပိုင်နက်ကို ရန်မစခဲ့သောကြောင့်ဖြစ်ကာ၊ ရီဖန်သည်လည်း ၎င်းတို့ကို ဦးစွာတိုက်ခိုက်လိမ့်မည်မဟုတ်ချေ။

ရီမိသားစုသည် လက်ရှိအခွင့်အရေးကို အသုံးချလျက် လျင်မြန်စွာဖွံ့ဖြိုးတိုးတက်ရန် လိုအပ်သည်။ နှစ်များကြာလာသည်နှင့်အမျှ ယင်ယန်တံခါးကြောင့် ဖြစ်ပေါ်လာသော မငြိမ်သက်မှုများမှလွဲ၍ ချန်မင်ကမ္ဘာတွင် သိသာထင်ရှားသောပြောင်းလဲမှုများမရှိခဲ့ပေ။

နှစ်ပေါင်းခြောက်ရာကျော်ကြာပြီးနောက် ရီဖန်သည် ၎င်း၏ငါးထောင်မြောက်မွေးနေ့ကို မသိဘာသာ ကျင်းပခဲ့သည်။ ကျင့်ကြံမှုကြောင့် အချိန်၏ပျက်စီးယိုယွင်းမှုများမရှိတော့ရာ ရီဖန်သည် သူ့ကိုသူအင်မော်တယ်ကြီးတစ်ဦးအဖြစ် မှတ်ယူနိုင်ပြီဟုခံစားမိသည်။

ယခင်က ရီဖန်သည် သူ့မွေးနေ့ပွဲများကို ကျင်းပလေ့ရှိသည်။ သို့သော် ယခုအချိန်တွင် ထိုကဲ့သို့သော အတွေးမျိုးမရှိတော့ပေ။ သူ့မွေးနေ့ကိုသာ နေ့တိုင်းကျင်းပရလျှင် ရီဖန်မထိန်းချုပ်နိုင်မည်ကို စိုးရိမ်မိပါ၏။

အချိန်အကြာကြီးနေထိုင်ခြင်းက အမှန်တကယ်ပင် စိတ်အနှောင့်အယှက်ဖြစ်စရာကောင်းသည်။ ရီဖန် ၅၀၀၁နှစ်တွင်၊ သူ့စိတ်ထဲရှိ တိတ်ဆိတ်နေသောကမ္ဘာ့နှလုံးသားသည် ရုတ်တရက်တုန်လှုပ်သွား၏။ အခြားကမ္ဘာ့သခင်များနှင့် နှိုင်းယှဉ်ပါက ရီဖန်သည် ကျွမ်းကျင်သူမဟုတ်ချေ။

ထို့ကြောင့် ကမ္ဘာ့နှလုံးသည်လည်း ရီဖန်အတွက် များစွာအရေးမပါလှပေ။ ဤအချိန်တွင် ရီဖန်အလိုရှိပါက ရန်ဟွမ်နယ်မြေကိုမထိဘဲ အလယ်ကမ္ဘာတစ်ထောင်ကို တိုက်ရိုက်ချေမှုန်းနိုင်သည်။ ရန်ဟွမ်နယ်မြေ၏ ကမ္ဘာ့သခင်က အလယ်ကမ္ဘာတစ်ထောင်နှစ်ခုက ရန်ဟွမ်နယ်မြေကို မကြာမီအချိန်အတွင်း ချဉ်းကပ်လာမည်ဟု ရုတ်တရက်ကြေညာခဲ့သည်။

၎င်းကမ္ဘာနှစ်ခုအကြောင်းကြားသောအခါတွင် ရန်ဟွမ်၏မျက်နှာသည် စိတ်ဆန္ဒများဖြင့် ပြည့်နေ၏။ အကယ်၍ သူသာ ဤအလယ်ကမ္ဘာတစ်ထောင်နှစ်ခုကိုစုပ်ယူနိုင်ပါက သူ၏စွမ်းအားသည် သူမပျက်ဆီးမီက မဟာကမ္ဘာတစ်ထောင်အဆင့်သို့ ပြန်လည်ရောက်ရှိသွားနိုင်သည်။

ရန်ဟွမ်နယ်မြေကို မဟာကမ္ဘာတစ်ထောင်အဖြစ် ပြန်လည်ထူထောင်နိုင်ပါသလား။ ရီဖန်ကိုယ်တိုင်လည်း ၎င်းကိုစိတ်ဝင်စားသည်။ အလယ်ကမ္ဘာတစ်ထောင်သည် ကမ္ဘာ့သခင် ရီဖန်အတွက် အနည်းငယ်သာအသုံး၀င်သော်လည်း ၎င်းတို့ကို ရန်ဟွမ်နယ်မြေကို မဟာကမ္ဘာတစ်ထောင်အဖြစ်သို့ ပြန်လည်ထူထောင်နိုင်ပါက၊ ၎င်းသည် မတူညီသောကိစ္စတစ်ခု ဖြစ်လာလိမ့်မည်။

မဟာကမ္ဘာတစ်ထောင်၏စွမ်းအားဖြင့် ကမ္ဘာ့သခင် ရီဖန်သည် ရန်ဟွမ်နယ်မြေအတွင်းရှိ ကမ္ဘာ့စွမ်းအားကိုစုစည်းကာ အင်မော်တယ်ဧကရာဇ်များစွာကို သူကိုယ်တိုင် စိန်ခေါ်နိုင်မည်ဖြစ်သည်။

အကယ်၍တာအိုဘိုးဘေးများက ရန်ဟွမ်နယ်မြေတွင် ရီဖန်ကိုရန်စဝံ့ပါက ရီဖန်သည်စိန်ခေါ်မှုကို လက်ခံလိုက်ဦးမည်။ တာအိုဘိုးဘေးများကို အနိုင်ရရှိခြင်းသည် ရီဖန်အတွက် သွေးဆောင်မှုတစ်ခုဖြစ်၏။ ရီဖန်အတွက် အလယ်ကမ္ဘာတစ်ထောင်ကို ကျော်ဖြတ်ခြင်းသည် သိသာထင်ရှားသော စိန်ခေါ်မှုတစ်ခုမဟုတ်ပေ။

ရီဖန်က ရီရှောင်းရှောင်းကို ချက်ချင်းဆင့်ခေါ်လိုက်ကာ စစ်တပ်ကိုရန်ဟွမ်နယ်မြေသို့ ပြန်ပို့ပြီး တိုက်ပွဲအတွက် ပြင်ဆင်ခိုင်းလိုက်သည်။

တစ်ဖက်တွင် နတ်ဆိုးကမ္ဘာတစ်ထောင်၊ ပင်လယ်တောအုပ်ကမ္ဘာ၊ အလယ်ကမ္ဘာတစ်ထောင်တို့မှ အမျိုးမျိုးသော ကျူးကျော်မျိုးနွယ်စုများက စတင်လှုပ်ရှားလာကြသည်။

၎င်းတို့၏ ကမ္ဘာ့သခင်က လှမ်းအကြောင်းကြားကာ အလယ်ကမ္ဘာတစ်ထောင်ကို ရှာဖွေတွေ့ရှိပြီးနောက် အခြားကမ္ဘာ့သခင်များနှင့်ပူးပေါင်းပြီး ၎င်းကို သိမ်းပိုက်ရန် စီစဉ်ခဲ့သည်။ ၎င်းတို့ ထိုကဲ့သို့ပြုလုပ်ကြသည်မှာ ပထမဆုံးအကြိမ်မဟုတ်ချေ။

ကမ္ဘာ့နှလုံးသားကိုသန့်စင်ပေးသော ကမ္ဘာ့သခင်များအနေဖြင့် ၎င်းတို့၏ကျင့်ကြံမှုလမ်းကြောင်းသည် ကမ္ဘာ့သခင်များအတွက်ပုံမှန်ဖြစ်သည်။ ၎င်းတို့၏ကမ္ဘာကြီး ပိုအားကောင်းလေ၊ ၎င်းတို့၏ကျင့်ကြံမှု အရှိန်မြန်လေ၊ ၎င်းတို့၏စွမ်းအားများ ပိုအားကောင်းလေဖြစ်သည်။

ဤနှစ်များအတွင်း ၎င်းတို့နှစ်ဦးသည် ၎င်းတို့၏ကိုယ်ပိုင်ကမ္ဘာကို မြှင့်တင်ရန် အလယ်ကမ္ဘာထောင်ပေါင်းများစွာကို သိမ်းပိုက်နိုင်ခဲ့သည်။ ရန်ဟွမ်နယ်မြေသည် ၎င်းတို့၏ မြေပုံပေါ်တွင် နှစ်ပေါင်းများစွာ တည်ရှိနေခဲ့ခြင်းဖြစ်သည်။

အကန့်အသတ်မရှိသော စကြဝဠာကြီးတွင် အနီးနားရှိကမ္ဘာတစ်ခုကို ရှာတွေ့ရန် မလွယ်ကူချေ။ ရှာဖွေတွေ့ရှိချိန်မှစ၍ ချဉ်းကပ်နိုင်သည့်အချိန်ထိ နှစ်ထောင်ပေါင်းများစွာ ကုန်ဆုံးခဲ့သည်။

"ဒါပြီးရင် မင်း နတ်ဆိုးတစ်ထောင်က၊ နတ်ဆိုးဧကရာဇ်နယ်မြေကို ဖြတ်ကျော်နိုင်ရမယ်!"

"ပင်လယ်တောအုပ်၊ မင်းလည်း ရောက်တော့မှာ မဟုတ်ဘူးလား" နှစ်ယောက်သား တစ်ယောက်ကို တစ်ယောက်ကြည့်ကာ ရယ်မောလိုက်ကြသည်။ ၎င်းတို့အတွက် ကမ္ဘာကြီးကိုဝါးမြိုပြီးနောက် ၎င်းတို့၏ကျင့်ကြံမှုအဆင့်ကိုမြှင့်တင်ရန်မှာ အရေးကြီးဆုံးဖြစ်သည်။ ထို့နောက်တွင် ဘာဆက်ဖြစ်မည်ကို သူတို့ဂရုမစိုက်ပေ!

သူတို့ရွေးချယ်ခဲ့သော ကမ္ဘာအများစုသည် လူသားမျိုးနွယ်စု၏ အလယ်ကမ္ဘာတစ်ထောင်များဖြစ်ကြသည်။ နတ်ဆိုးမျိုးနွယ်စုနှင့် လူသားမျိုးနွယ်စုတို့သည် သဘာဝရန်သူများဖြစ်ကြသောကြောင့် လူသားမျိုးနွယ်စု၏အလယ်ကမ္ဘာတစ်ထောင်ကို ဖျက်ဆီးပစ်လျှက် နတ်ဆိုးဘိုးဘေးများက ၎င်းတို့ကိုပင် ချီးကျူးနေပေလိမ့်မည်။

"အားလုံး အဆင်သင့်ဖြစ်ပြင်ထား၊ တိုက်ပွဲစကြမယ်" ကမ္ဘာ့သခင်နှစ်ယောက်၏ စကားကိုကြားသောအခါ အောက်ဘက်မှလူတိုင်းသည် စိတ်လှုပ်ရှားစွာအော်ဟစ်လိုက်ကြသည်။ ၎င်းတို့သည် လူသားများကိုသတ်ဖြတ်ရာ၌ မွေ့လျော်ကြသူများဖြစ်၏။

ကမ္ဘာသစ်တစ်ခုကို တိုက်ခိုက်သည့်အခါတိုင်း မည်သူက လူသားမည်မျှပိုသတ်နိုင်မည်ကို သိရလိမ့်မည်။ ယခုအကြိမ်တွင်လည်း ခြွင်းချက်မရှိဘဲ အစုလိုက်အပြုံလိုက် သတ်ဖြတ်ရန် ကောင်းမွန်စွာပြင်ဆင်ထားပြီးဖြစ်သည်။ ယခုအချိန်တွင် ၎င်းတို့သည် ကမ္ဘာ့သခင်များမှ ကမ္ဘာ့လမ်းကြောင်းတည်ဆောက်ရန်သာ စောင့်ဆိုင်းနေကြသည်။

နောက်ဆုံးတွင် ဆယ်နှစ်ကြာပြီးနောက် ဤကမ္ဘာကြီးသုံးခု အပြန်အလှန်ဆက်သွယ်လိုက်ကာ ကမ္ဘာ့သခင်နှစ်ဦးသည် ကမ္ဘာ့လမ်းကြောင်းကို တည်ဆောက်ပြီးနောက် ၎င်းတို့၏စစ်တပ်များကို ရန်ဟွမ်နယ်မြေသို့ဦးဆောင်လာခဲ့သည်။

သို့သော် ၎င်းတို့နှစ်ဦး ရန်ဟွမ်နယ်မြေထဲသို့ ဝင်ရောက်လာသည့်အခါတွင် ကမ္ဘာ့သခင်နှစ်ဦးသည် တစ်ခုခုလွဲမှားနေသည်ကို ချက်ချင်းသတိပြုမိလိုက်သည်။ ရန်ဟွမ်နယ်မြေမှ ကျင့်ကြံသူများသည် ၎င်းတို့ရောက်ရှိလာခြင်းအတွက် အံ့သြပုံမရဘဲ သူတို့ကိုပင် စောင့်ကြည့်နေသေးသည်။

‘ဘာတွေဖြစ်နေတာလဲ?’

မကြာမီတွင် သူတို့နှစ်ဦးနားလည်သွားသည်မှာ ရန်ဟွမ်နယ်မြေတွင် ကမ္ဘာ့သခင်ရှိသည်။ သို့မဟုတ်ပါက ကမ္ဘာနှစ်ခု၏ အရိပ်အယောင်များကို ကြိုတင်တွေ့ရှိရန်မှာ မဖြစ်နိုင်ချေ။

သို့သော်လည်း ကမ္ဘာ့သခင်ရှိလျှင်ပင် ဂရုမစိုက်ချေ။ ၎င်းတို့သည် ယခင်က ကမ္ဘာ့သခင်များစွာနှင့် ကြုံတွေ့ခဲ့ဖူးပါ ၎င်းတို့အားလုံးအဖမ်းခံရပြီးနောက် ပျက်သုဉ်းသွားခဲ့သည်။ အတွေ့အကြုံရှိသော ကမ္ဘာ့သခင်များကို သာမန်ကမ္ဘာ့သခင်များက ယှဉ်နိုင်လိမ့်မည်မဟုတ်ချေ။

"သူတို့ကိုသတ်ပစ်!"

နတ်ဆိုးကမ္ဘာတစ်ထောင်သခင်သည် အလွန်ကြီးမားသော မျက်လုံးတစ်ထောင်ရှိသည့် ရေဘဝဲတစ်ကောင်အဖြစ် တိုက်ရိုက်သွင်ပြောင်းလိုက်သည်။ ပင်လယ်တောအုပ်ကမ္ဘာသခင်၏မူလပုံစံမှာ သစ်တောဖြစ်ပြီး သူ့နောက်လိုက်များမှာ သစ်ပင်နတ်ဆိုးများဖြစ်သည်။

နတ်ဆိုးဘိုးဘေးအားလုံးက ၎င်းတို့၏မူလပုံစံများကို ထုတ်ပြလာသောအခါတွင် ရန်ဟွမ်နယ်မြေရှိ ကျင့်ကြံသူများ၏မျက်လုံးများသည် ပို၍ပင်တောက်ပလာသည်။ လူသားများသည် နတ်ဆိုးမျိုးနွယ်စုအတွက် အစာဖြစ်သကဲ့သို့ နတ်ဆိုးမျိုးနွယ်စုသည်လည်း လူသားများအတွက် အပြည့်စုံဆုံးအရင်းအမြစ်ဖြစ်သည်။

အသားနှင့်သွေးများကို ဆေးလုံးသန့်စင်ရန်အတွက် အသုံးပြုနိုင်ကာ အရိုးများကို အင်မော်တယ်လက်နပ်သန့်စင်ရန်အတွက် အသုံးပြုနိုင်သည်။ ၎င်းတို့၏ အစိတ်အပိုင်းတိုင်းသည် အသုံးဝင်ကြ၏။

ထို့အပြင် သစ်ပင်နတ်ဆိုးများသည် အင်မော်တယ်လက်နက်သန့်စင်ခြင်းအတွက် ပို၍ပင်ကောင်းသေးသည်။ ဤနတ်ဆိုးများမှာ အလွန်တန်ဖိုးကြီးလှ၏။

လူများစွာက လောဘကြီးသောမျက်လုံးများဖြင့် စိုက်ကြည့်နေရာ နယ်ပယ်နှစ်ခုမှနတ်ဆိုးများသည် အေးစိမ့်စိမ့်နှင့် စိတ်မသက်မသာခံစားလိုက်ရသည်။ ဤလူသားများ၏ သဘောထားက ထူးဆန်းလွန်းလှသည်။

………….

အခန်း ၂၆၆ - ရန်ဟွမ်နယ်မြေ၏ ကျယ်ပြန့်သောစကြဝဠာ

ထိုအချိန်တွင် ရီရှောင်းရှောင်းကိုယ်တိုင် ရှေ့သို့ထွက်လာခဲ့သည်။ သူမသည် ကမ္ဘာ့သခင်နှစ်ယောက်ကိုငုံ့ကြည့်ပြီးနောက် အနည်းငယ်စိတ်ပျက်သွားသည်။ သူမက အင်အားကြီးသောပြိုင်ဘက်များနှင့် ရင်ဆိုင်ရမည်ဟုထင်ထားသော်လည်း လက်ရှိရန်သူမှာ အင်မော်တယ်ဘုရင်နယ်ပယ်ရှိ ကမ္ဘာ့သခင်နှစ်ယောက်သာဖြစ်နေသည်။

ရီရှောင်းရှောင်းသည် ဤတိုက်ပွဲတွင် ၎င်းတို့၏ တိုက်ခိုက်ရေးစွမ်းရည်ကိုစမ်းသပ်ရန်အတွက် အဇူရာနဂါး ကြယ်အစုအဝေးတပ်ဖွဲ့မှ တပ်သားများကိုပင် ခေါ်ဆောင်ခဲ့ကြောင်း ၎င်းတို့သိထားသင့်၏။ အင်မော်တယ်ဘုရင်နှစ်ပါးမှာ စကားထဲထည့်ပြောရအောင်ပင် မတန်ပေ။

ရီရှောင်းရှောင်း၏ စိတ်ပျက်လက်ပျက်အကြည့်က ကမ္ဘာ့သခင်နှစ်ယောက်ကို မသက်မသာ ခံစားရစေသည်။ ၎င်းတို့ ရန်ဟွမ်နယ်မြေကို စရောက်သည့်အချိန်ကစ၍ အရာရာတိုင်းက ထူးဆန်းနေသကဲ့သို့ ခံစားခဲ့ရသည်။ ဤသည်မှာ ၎င်းတို့အောင်နိုင်ခဲ့သော ကမ္ဘာများစွာတွင် မကြုံဖူးသေးသော အခြေအနေတစ်ခုဖြစ်၏။

"သူတို့ကို သတ်ပစ်!" ရီရှောင်းရှောင်း၏အမိန့်အောက်တွင် အောက်ဘက်ရှိကြယ်စုတပ်ဖွဲ့များသည် ၎င်းတို့၏ ကျင့်ကြံမှုအဆင့်ကို မဝှက်ထားကြတော့ချေ။

မဟာယာနနယ်ပယ်ရှိ တပ်သားများ၊ အနိမ့်ဆုံးတပ်မှူးက ကောင်းကင်အင်မော်တယ်နယ်မြေတွင်ရှိကာ၊ အနိမ့်ဆုံးတပ်မှူးက ကမ္ဘာအင်မော်တယ်အဆင့်ရှိသောတပ်ဖွဲ့၊ အနိမ့်ဆုံး ရွှေအင်မော်တယ်နယ်ပယ်အဆင့်ရှိ ဗိုလ်ချုပ်ကြီးများပါရှိသည်။ ရှီးထျန်း၏ ကျင့်ကြံမှုအဆင့်သည်ပင် နက်နဲအင်မော်တယ်နယ်ပယ်သို့ ဖြတ်ကျော်သွားခဲ့သည်။

တပ်ဖွဲ့၏ ကျင့်ကြံမှုအဆင့်များကို ထုတ်ဖော်လိုက်သောအခါ ကမ္ဘာ့သခင်နှစ်ယောက်သည် နောက်ဆုံးတွင် ရီရှောင်းရှောင်း၏အကြည့်က ဘာကိုဆိုလိုကြောင်း နားလည်သွားသည်။ ရန်ဟွမ်နယ်မြေ၏စစ်တပ်နှင့် နှိုင်းယှဉ်ပါက ၎င်းတို့၏ ကျင့်ကြံမှုအဆင့်မှာ အားနည်းလွန်း၏။ ကမ္ဘာ့သခင်နှစ်ဦး၏ နောက်လိုက်များမှာ မူလကကဲ့သို့ စိတ်လှုပ်ရှားမှုပင်မရှိတော့ချေ။

၎င်းတို့ရောက်ရှိလာစဉ်က စိတ်လှုပ်ရှားစွာ ဟစ်ကြွေးခဲ့ကြသော်လည်း ယခုအချိန်တွင် သူတို့လုပ်ချင်နေသည့်အရာမှာ စိတ်ပျက်လက်ပျက် ငိုကြွေးရန်သာဖြစ်သည်။ ထိုကဲ့သို့သော ရန်သူများကို သူတို့ဘယ်လိုဘယ်လိုတိုက်ကြမည်နည်း။

“သတ်ကြ!”

တိုက်ပွဲအလံကို ပြန်လည်လွှင့်ထူပြီးနောက်တွင် တပ်ဖွဲသည်ချက်ချင်းတိုက်ခိုက်ခဲ့ကြ၏။ တိုက်ပွဲတွင်မပါဝင်ကြသေးသော်လည်း ကမ္ဘာ့သခင်နှစ်ဦး၏ လက်အောက်ငယ်သားများသည် တိုက်ပွဲဝင်လိုစိတ်ပင် မရှိကြတော့ရှာချေ။

အသတ်ခံရမည်ကို သိလျက်နှင့် မည်သူကအသေခံနိုင်မည်နည်း။ အရည်အချင်းရှိသည့် လက်အောက်ငယ်သားများကို လေ့ကျင့်ပေးခြင်းက မိမိကိုယ်တိုင်၏ ကျင့်ကြံမှုအဆင့်ကို မြှင့်တင်ခြင်းထက် အလွန်ခက်ခဲသည်။

ကမ္ဘာ့သခင်နှစ်ဦးသည် နတ်ဆိုးဘုရင် နယ်ပယ်တွင်ရှိကြသော်လည်း၊ ၎င်းတို့၏လက်အောက်ငယ်သားများထဲတွင် အသန်မာဆုံးသူများမှာ ရွှေအင်မော်တယ်နယ်မြေထက်ပင် မကျော်လွန်ဘဲ ၎င်းတို့ထဲမှ တစ်ဦးစ နှစ်ဦးစ သာ ရှိကြသည်။

၎င်းတို့၏ အရည်အသွေးသည် လုံးဝပျက်ဆီးနေသည့်အပြင် အရေအတွက်အားဖြင့်လည်း အောင်နိုင်ဖွယ်ရာမရှိပေ။

တစ်ဖက်တွင် တပ်ခုနစ်ခုသာရှိသော်လည်း အဇူရာနဂါးကြယ်စုတပ်ဖွဲ့ဝင်အရေအတွက်သည် ဆယ်သန်းကျော်သွားပြီဖြစ်သည်။ နယ်ပယ်နှစ်ခု၏ ပေါင်းစပ်အင်အားစုပင်လျှင် တစ်သန်းမျှမရှိနိုင်ချေ။ အင်မော်တယ်မင်းဆက်မှလွဲ၍ ထိုကဲ့သိူ့ ကြီးမားသောစစ်တပ်ကို လေ့ကျင့်ပေးမည့်အင်အားစုဟူ၍ မရှိကြချေ။

ဤတပ်ဖွဲ့များက ဝိုင်းရံထားသောတိုက်စစ်ကို ရင်ဆိုင်ရသောအခါတွင် နတ်ဆိုးမျိုးနွယ်စုသည် ခုခံနိုင်စွမ်းမရှိတော့ကာ အလောင်းများသည်လည်း နေရာတိုင်းတွင် ပြန့်ကျဲသွား၏။ ထိုအချိန်တွင် ကမ္ဘာ့သခင်နှစ်ဦးသည် ရန်ဟွမ်နယ်မြေကို ကျူးကျော်ရန်ပစ်မှတ်အဖြစ် ရွေးချယ်လိုက်မိသောကြောင့် ချက်ချင်းပင်ဆုတ်ခွါချင်လာကြသည်။

သို့သော် ၎င်းတို့၏လက်အောက်ငယ်သားတွေကို လေ့ကျင့်ရာ၌သုံးခဲ့သည့် အရင်းအမြစ်များကို တွေးမိပြီးနောက် ၎င်းတို့နှစ်ဦးသားသည် အဇူရာနဂါးတပ်ဖွဲ့များကို အံကြိတ်ကာတွန်းလှန်ရတော့သည်။ ဤနတ်ဆိုးများအားလုံးသတ်ခံလိုက်ရပါက ၎င်းတို့ထံတွင် လက်အောက်ငယ်သားများမရှိဘဲ ကျန်ခဲ့လိမ့်မည်။

“လာထားစမ်း၊ ကျားဖြူတပ်ဖွဲ့ တိုက်ပွဲဝိညာဉ် နိုးထလော့”

နတ်ဆိုးဘုရင်နှစ်ပါး လှုပ်ရှားသည်ကိုမြင်သောအခါ နက်နဲအင်မော်တယ်ရှီးထျန်းသည် လုံးဝမကြောက်ဘဲ အနည်းငယ်ပင် ကျေနပ်နေခဲ့သည်။ အနည်းဆုံးတော့ အင်မော်တယ်ဘုရင်နယ်ပယ်ရှိ စွမ်းအားရှင်နှစ်ဦးဖြင့် အဇူရာနဂါးတပ်ဖွဲ့များကို အနည်းငယ်လေ့ကျင့်ပေးနိုင်လိမ့်မည်။

နောက်အခိုက်အတန့်တွင် အဇူရာနဂါးတိုက်ပွဲဝိညာဉ်သည် တပ်ဖွဲ့များအထက်တွင် ထွက်ပေါ်လာ၏။ ၎င်းသည် စတင်မလှုပ်ရှားသေးဘဲ နတ်ဆိုးချီစွမ်းအားအနည်းငယ် ထုတ်လွှတ်လိုက်ရုံဖြင့် နတ်ဆိုးဘုရင်နှစ်ပါးကို အရိုးထဲစိမ့်သွားစေသည်။

အဇူရာနဂါးသည် နတ်မွန်းစတားလေးကောင်၏ ခေါင်းဆောင်ဖြစ်ကာ တပ်ဖွဲ့လေးခုတွင် အသန်မာဆုံးဖြစ်သည်။ အဇူရာနဂါး၏အမြီး တစ်ချက်လွှဲယမ်းလိုက်ခြင်းက အံ့ဩဖွယ်စွမ်းအားကို ထုတ်လွှတ်ပေးသည်။

ဘမ်း!

၎င်း၏အမြီးကိုလွှဲရိုက်လိုက်ခြင်းဖြင့် ပင်လယ်သစ်တောနတ်ဆိုးဘုရင်၏ ဂုဏ်ယူဝင့်ကြွားသော ခုခံကာကွယ်မှုများကို ဖျက်ဆီးလိုက်ကာ သူ၏အစိမ်းရောင် သစ်အမြုတေထွက်ပေါ်လာသည်။ ဤသစ်အမြုတေသည် ၎င်းမှာ ပင်လယ်သစ်တောနတ်ဆိုးဘုရင်၏ နတ်ဆိုးအမြုတေဖြစ်သည်။ နတ်ဆိုးအမြုတေဖျက်ဆီးခံရပါက မုဟိုင်နတ်ဆိုးဘုရင်သည် လုံးဝပျောက်ကွယ်သွားလိမ့်မည်။

ရှီးထျန်းသည် စိတ်ပျက်လက်ပျက်ဖြင့် ခေါင်းယမ်းလိုက်သည်၊ နတ်ဆိုးဘုရင်သည် အဇူရာနဂါးတိုက်ပွဲဝိညာဉ်၏ တိုက်ခိုက်ရေးစွမ်းအားကို အပြည့်အဝ နားမလည်သေးချေ။

သူ၏သစ်သားအမြုတေသာကျန်ရစ်ခဲ့သော ပင်လယ်သစ်တောနတ်ဆိုးဘုရင်သည် ခြိမ်းခြောက်မှုမရှိတော့သောကြောင့် ရှီးထျန်းသည် နတ်ဆိုးတစ်ထောင်ဘုရင်ထံသို့ အကြည့်လွှဲလိုက်သည်။ ရှီးထျန်း၏အကြည့်ကို ခံစားလိုက်ရသော နတ်ဆိုးတစ်ထောင်ဘုရင်မှာ တုန်လှုပ်သွား၏။

အကယ်၍ ပင်လယ်သစ်တောနတ်ဆိုးဘုရင်၏ ခုခံမှုသည် တိုက်ပွဲဝိညာဉ်၏ထိုးနှက်ချက်ကို ခံနိုင်ရည်မရှိခဲ့ပါက နတ်ဆိုးတစ်ထောင်ဘုရင်သည်လည်း ၎င်းကိုခံနိုင်ရည်ရှိမည် မဟုတ်ချေ။ ပင်လယ်သစ်တောနတ်ဆိုးဘုရင်က ခံစစ်ဖြစ်လျှင်၊ သူက တိုက်စစ်အတွက်သာဖြစ်သည်။

နတ်ဆိုးတစ်ထောင်ဘုရင်သည် တုံ့ဆိုင်းခြင်းမရှိဘဲ ကမ္ဘာရေလက်ကြားဆီသို့ ပြေးထွက်လာသည်။ သူသည် နတ်ဆိုးကမ္ဘာတစ်ထောင်သို့ ပြန်သွားသရွေ့ မျှော်လင့်ချက်ရောင်ဝါများ ရှိနိုင်သေးသည်။ သူသည် နတ်ဆိုးကမ္ဘာတစ်ထောင်သို့ပြန်ရောက်သည်နှင့် သူတက်လှမ်းခဲ့သော အလယ်ကမ္ဘာတစ်ထောင်သို့ တိုက်ရိုက်ပြန်သွားနိုင်သည်။

ရန်ဟွမ်နယ်ပယ်မှလူများက သူ့ကိုနတ်ဆိုးကမ္ဘာတစ်ထောင်အထိ လိုက်ဖမ်းလိမ့်မည်ဟု သူမယုံကြည်ချေ။ ကမ္ဘာ့ရေလက်ကြားဆီသို့ရောက်ရန် လက်တစ်လှမ်းသာလိုတော့သည့်အချိန်တွင် နတ်ဆိုးတစ်ထောင်ဘုရင်၏ မျက်နှာတွင် အပြုံးတစ်ခုပေါ်လာသည်။

သို့သော်လည်း နောက်အခိုက်အတန့်တွင် တစ်စုံတစ်ခုမှားယွင်းနေကြောင်း သူသတိထားမိလိုက်၏။ ကမ္ဘာ့ရေလက်ကြားသို့ဝင်ရောက်ပြီးတိုင်အောင် နတ်ဆိုးကမ္ဘာတစ်ထောင်ဆီသို့ပြန်ပို့ခြင်းမခံရဘဲ ရန်ဟွမ်နယ်ပယ်တွင်သာ ကျန်နေခဲ့သည်ကိုတွေ့ရှိခဲ့သည်။ ကမ္ဘာ့ရေလက်ကြားအတွင်းရှိ လေဟာနယ်စွမ်းအားသည် လုံးဝအေးခဲသွားပုံရကာ မည်သည့်အကျိုးသက်ရောက်မှုမှမရှိတော့ချေ။

သေချာပေါက်ပင် ထိုအရာကို ရီဖန်ပြုလုပ်ထားခြင်းဖြစ်၏။ ရန်ဟွမ်နယ်မြေနှင့် လေဟာနယ်မဟာတာအိုကို ထိန်းချုပ်ထားခြင်းဖြင့် ကမ္ဘာရေလက်ကြားကို အေးခဲစေခြင်းသည် သူ့အတွက်လုံးဝအခက်အခဲမရှိပေ။

နတ်ဆိုးတစ်ထောင်ဘုရင်သည် လွတ်မြောက်လုနီးပါးဖြစ်သွားရာ ရှီးထျန်းကို အလွန်ထိတ်လန့်စေခဲ့သည်။ ဒေါသထွက်နေသော ရှီးထျန်းသည် အဇူရာနဂါးတိုက်ပွဲဝိညာဉ်ကို စွမ်းအားအပြည့်ဖြင့် တိုက်ရိုက်စုစည်းတိုက်ခိုက်စေခဲ့သည်။

ပင်လယ်သစ်တောနတ်ဆိုးဘုရင်သည် အနည်းဆုံး နတ်ဆိုးအမြုတေကိုချန်ထားခဲ့သော်လည်း နတ်ဆိုးတစ်ထောင်ဘုရင်၏ စိတ်ဝိညာဉ်သည် လုံးဝပျောက်ကွယ်သွားခဲ့သည်။ နတ်ဆိုးဘုရင်နှစ်ပါး သေဆုံးသွားပြီးနောက် ကျန်ရှိသောပမွှားလေးများသည် မည်သည့် ခြိမ်းခြောက်မှုမှမရှိတော့ချေ။

ရန်ဟွမ်နယ်ပယ်တွင် နတ်ဆိုးမျိုးနွယ်စုကို ချေမှုန်းပြီးနောက် စစ်တပ်များသည် အနားမယူဘဲ အုပ်စုနှစ်စုခွဲကာ ကမ္ဘာနှစ်ခုဆီသို့ တိုက်ရိုက်ဦးတည်သွားကြသည်။

ကမ္ဘာနှစ်ခုအတွင်းရှိ နတ်ဆိုးမျိုးနွယ်စုဝင်များမှာ ၎င်းတို့အသတ်ခံရလေလေ၊ ၎င်းတို့၏ မဟာတာအိုသည် ပို၍အားနည်းလေဖြစ်လာသည်။ ထိုအချိန်တွင် ရန်ဟွမ်သည်လည်း အလုပ်စလုပ်ကာ ကမ္ဘာနှစ်ခုကို ရန်ဟွမ်နယ်မြေအနီးသို့ ဆွဲယူကာ ဝါးမြိုပစ်လိုက်သည်။

ကမ္ဘာများစွာကို သိမ်းပိုက်ပြီးနောက် နတ်ဆိုးကမ္ဘာတစ်ထောင်နှင့် ပင်လယ်တောအုပ်ကမ္ဘာတို့သည် သာမန် အလယ်ကမ္ဘာတစ်ထောင်ထက် များစွာ အင်အားကောင်းခဲ့သည်။ ထို့ကြောင့် ကမ္ဘာနှစ်ခုကို စုပ်ယူပြီးနောက် ရန်ဟွမ်နယ်ပယ်သည် လျင်မြန်စွာတိုးတက်လာကာ၊ ရန်ဟွမ်နယ်မြေ၏ အရွယ်အစားသည်လည်း အဆက်မပြတ်ကြီးမားလာသည်။

အလယ်ကမ္ဘာတစ်ထောင်သည် မဟာကမ္ဘာထောင်နှင့်နှိုင်းယှဉ်ပါက အရွယ်အစားသာမက ဝိညာဉ်စွမ်းအင်၏သိပ်သည်းဆ၊ မဟာတာအို၏ စွမ်းအားနှင့် အခြားအရာများတွင်လည်း ကွာခြားသည်။ နောက်ဆုံးတွင် အနှစ်တစ်ရာကြာပြီးနောက် ရန်ဟွမ်နယ်မြေသည် အလယ်ကမ္ဘာတစ်ထောင်ကို လုံးဝဝါးမြိုသွားနိုင်ကာ အဆင့်တက်လှမ်းစပြုလာသည်။

ရန်ဟွမ်နယ်မြေတွင် အင်မော်တယ်ချီစွမ်းအားကို ပထမဆုံးဖန်တီးလိုက်သောအခါ ၎င်း၏အသွင်ကူးပြောင်းမှုမှာလည်း ပြီးဆုံးသွားခဲ့သည်။ ရန်ဟွမ်သည် ရီဖန်၏ဘေးတွင် ရပ်နေ၏။ ကောင်းကင်ဘုံသို့တက်လှမ်းသွားပြီးနောက် ထိုနှစ်များကတွေ့ခဲ့သော ကောင်ငယ်လေးသည် လူငယ်တစ်ဦးအဖြစ် ပြောင်းလဲသွားခဲ့သည်။

" ရီဖန်၊ ငါသွားငိုက်လိုက်ဦးမယ်။ ရန်ဟွမ်နယ်မြေကို မင်းလက်ထဲမှာထားခဲ့ပြီနော်"

ထိုသို့ပြောပြီးနောက် ရန်ဟွမ်သည် တစ်ဖန်ပျောက်ကွယ်သွားကာ ကမ္ဘာ့နှလုံးသားထဲသို့ ပြန်ဝင်ပြီး သွားငိုက်တော့သည်။

ကမ္ဘာ့နှလုံးသားကို ရီဖန်လုံး၀သန့်စင်ထားကာ လက်ရှိရန်ဟွမ်နယ်မြေ၏ အဆင့်တက်လှမ်းခြင်းပြီးဆုံးသွားချိန်၌ပင် ရီဖန်၏ထိန်းချုပ်မှုအောက်တွင် ရှိနေဆဲဖြစ်သည်။ ရန်ဟွမ်နယ်ပယ်အတွင်းရှိ အင်အားစုအားလုံးကို ရီဖန်အပြည့်အဝထိန်းချုပ်ထားနိုင်ခဲ့သည်။

ထိုအချိန်တွင် ရီဖန် ရုတ်တရက် ပြဿနာတစ်ခုကို စဉ်းစားမိသွားသည်။ မဟာကမ္ဘာသုံးထောင်ကို ကျောက်တုံးပေါ်တွင် တည်ထားပြီးဖြစ်သည်။ ယခုတွင် ရန်ဟွမ်နယ်မြေပေါ်လာပြီး ပုံသေနံပါတ်ကို ချိုးဖျက်လိုက်သည့်အတွက် ပြောင်းလဲခြင်းရှိတော့မည်မဟုတ်ချေ။!

ရန်ဟွမ်နယ်ပယ်သည် ယခုအခါတွင် မဟာကမ္ဘာတစ်ထောင်များကြား အားအနည်းဆုံးဖြစ်သော်လည်း၊ ၎င်းသည် အလယ်ကမ္ဘာတစ်ထောင်နှင့်အဆင့်တူညီခြင်းမရှိဘဲ မဟာကမ္ဘာတစ်ထောင်ဖြစ်နေဆဲပင်။

ရီဖန်သည် ရန်ဟွမ်နယ်မြေ၏စွမ်းအားနှင့် ရင်းနှီးသွားပြီးနောက် ရန်ဟွမ်နယ်မြေပေါ်ပေါက်လာမှုက နယ်ပယ်သုံးထောင်ကို တုန်လှုပ်စေခဲ့သည်။ မရေမတွက်နိုင်သော အကြည့်များသည် ရန်ဟွမ် နယ်မြေဆီသို့ ကျရောက်လာကြကာ ရန်ဟွမ်နယ်မြေ၏ အမြစ်များကိုတူးဖော်လိုစိတ်ဖြင့် စူးစမ်းနေကြသည်။

……………….

အခန်း ၂၆၇ - ရန်ဟွမ်နယ်မြေက ပိုင်ရှင်မရှိဘူးလို့ ဘယ်သူပြောလဲ

လူအများစုက ထိုအားနည်းသောကမ္ဘာကို များစွာဂရုမစိုက်ကြချေ။ ၎င်းတို့ ဂရုစိုက်သည်မှာ ရန်ဟွမ်နယ်မြေက နံပါတ်စဉ် ၃၀၀၀မြောက်ကို ချိုးဖျက်ကာ ကွဲလွဲမှုတစ်ခုဖြစ်လာခြင်းပင်။ ကွဲလွဲမှုတစ်ခု၏ပုံစံက အာရုံစူးစိုက်မှုများစွာကို လက်ယပ်ခေါ်နိုင်လိမ့်မည်ပင်။

အဘယ်ကြောင့်ဆိုသော် ဤကွဲလွဲမှုများက အခွင့်အလမ်းတစ်ချို့ကို ကိုယ်စားပြုသောကြောင့်ဖြစ်၏။ ရန်ဟွမ်နယ်မြေကို အာရုံစိုက်လာကြသူများမှာ ဧကရာဇ်နယ်ပယ်ရှိ သန်မာသည့်ကျင့်ကြံသူများဖြစ်သည်။ ဘိုးဘေးနယ်ပယ်မှကျင့်ကြံသူများအတွက်မူ ထိုသို့တက်လှမ်းလိူလျှင်ပင် အခွင့်အရေးမရှိတော့ချေ။

ဧကရာဇ်နယ်ပယ်မှကျင့်ကြံသူများသည် နောက်ထပ်ခြေတစ်လှမ်းတက်ကာ တာအိုဘိုးဘေးများဖြစ်လာလိူသောကြောင့် ထိုသို့သောအခွင့်အလမ်းများအတွက် ပို၍ပင်စိုးရိမ်ကြသည်။

ထို့ကြောင် စံနှုန်းများထက်ကျော်လွန်နေသော ရန်ဟွမ်နယ်မြေသည် အင်မော်တယ်ဧကရာဇ်များ၏ပစ်မှတ်ဖြစ်လာခဲ့သည်။ မကြာမီတွင် ရန်ဟွမ်နယ်မြေမှ အချို့အကြောင်းအရာများကို ရှာဖွေတွေ့ရှိခဲ့သည်။

ရန်ဟွမ်နယ်မြေသည် လူသားမျိုးနွယ်စု၏ နယ်မြေများထဲမှတစ်ခုဖြစ်သော ရှေးခေတ်က အဓိကကမ္ဘာကြီးတစ်ခုဖြစ်သည်။ ယခုတွင် ပြန်လည်မွေးဖွားလာပြီးနောက် အဓိကကမ္ဘာကြီးတစ်ခုပြန်ဖြစ်လာရာ ၎င်းကစည်းမျဉ်းများကိုချိုးဖောက်လျက် လူ့မျိုးနွယ်စုအတွက် အခွင့်အလမ်းများပေးနိုင်လိမ့်မလား။

လူသားမျိုးနွယ်စုမှ အင်မော်တယ်ဧကရာဇ်များသည် ရန်ဟွမ်နယ်မြေ၏ အခွင့်အလမ်းများ၏ သွေးဆောင်ခြင်းခံခဲ့ရကာ အခွင့်အရေးကို ဆုပ်ကိုင်လိုကြသည်။ ထို့နောက်တွင် ရီဖန်နှင့်ရီမိသားစုသည် ထိုစွမ်းအားကြီး အင်အားစုများ၏ အာရုံစိုက်မှုကိုခံလာရတော့သည်။

၎င်းတို့က ရီဖန်နှင့်ရီမိသားစုကို အလွန်စိတ်မဝင်စားချေ။ တစ်ချိန်က ရီဖန်သည် နဂါးဘိုးဘေးကိုသတ်ခဲ့ဖူးခြင်းကိုလည်း ထိုအင်မော်တယ်ဧကရာဇ်များက ဂရုမစိုက်ေပေ။ တကယ်တမ်းတွင် ရီဖန်သည် ယခုချိန်ထိ အင်မော်တယ်ဘုရင်တစ်ပါးသာ ဖြစ်နေဆဲဖြစ်၏။ ရန်ဟွမ်နယ်မြေ၏အခွင့်အရေးနှင့်ယှဉ်လျှင် အင်မော်တယ်ဘုရင်တစ်ပါးသည် ၎င်းတို့ကို တားဆီးနိုင်လိမ့်မည်မဟုတ်ချေ။

"မိတ်ဆွေရီက ရန်ဟွမ်နယ်မြေကို အရင်ဆုံးရှာတွေ့တဲ့ အခွင့်ကောင်းကြီးကို ရသွားမယ်လို့မထင်ထားဘူးဗျာ"

ဧကရာဇ်ကွမ်ဟန်သည် ထိုသတင်းကိုရရှိသောအခါ သက်ပြင်းမချဘဲမနေနိုင်ခဲ့ပေ။

“တကယ်ပဲ၊ ဒီတစ်ကြိမ်မှာ မိတ်ဆွေရီက ဦးဆောင်ပြီးတော့ အခွင့်အရေးကို ဆုပ်ကိုင်ထားပြီးဖြစ်နိုင်တယ်”

ဧကရာဇ်ချန်ပန်း ကလည်း မှတ်ချက်ပေးခဲ့သည်။

ရန်ဟွမ်နယ်မြေကို ပိုင်ဆိုင်ထားသူသည် တခြားတစ်ယောက်ဆိုပါက ၎င်းတို့ထံတွင် မတူညီသည့် အတွေးအမြင်များရှိနိုင်သော်လည်း ၎င်းကရီဖန်လက်ထဲတွင် ရှိနေသောကြောင့် ထိုအတွေးများကို ချက်ချင်းပယ်ချလိုက်သည်။

ရီဖန်သည် တာအိုဘိုးဘေး၏ တပည့်တစ်ဦးဖြစ်ကာ ကြောက်မက်ဖွယ်ကောင်းသောဗောဓိဘိုးဘေးက သူ့ကိုထောက်ခံပေးထားသည်။

၎င်းတို့သည် ရီဖန်ကို အမှန်တကယ်တိုက်ခိုက်လိုလျှင်ပင် အရည်အချင်းမပြည့်မီသေးချေ။ ရီဖန်၏ တကယ့်ပြိုင်ဖက်များမှာ အကြီးတန်းဧကရာဇ်နယ်မြေစွမ်းအားရှင်များသို့မဟုတ် ဘိုးဘေးနယ်မြေမှထွက်လာသူများသာ ဖြစ်နိုင်လိမ့်မည်။

သို့သော် ဧကရာဇ်နှစ်ပါးဖြစ်သော ကွမ်ဟန်နှင့် ချန်ပန်းတို့သည် ရီဖန်အပေါ်တွင် သိသိသာသာ ယုံကြည်ခဲ့ကြသည်။ ရီဖန်၏ပါးစပ်ထဲမှ အစာကိုလုယူရန်မှာ လွယ်ကူလိမ့်မည်မဟုတ်သောကြောင့် ၎င်းတို့လုပ်ရမည့်အရာမှာ ငြိမ်ငြိမ်ထိုင်လျက် ပြဇာတ်ကြည့်ရန်သာဖြစ်သည်။

တစ်ဖက်တွင် ရီဖန်သည် ရန်ဟွမ်နယ်မြေ၏ တက်လှမ်းခြင်းမှရရှိလာသော အကျိုးကျေးဇူးများနှင့် လုံးဝနေသားကျသွားခဲ့သည်။ ရန်ဟွမ်နယ်မြေ၏ အုပ်ချုပ်သူဖြစ်သောကြောင့် ရီဖန်သည် ၎င်းတက်လှမ်းခြင်းမှ ဆုလာဘ်အများဆုံး ရိတ်သိမ်းနိုင်ခဲ့သည်။

ယခုအခါ ရန်ဟွမ်နယ်မြေကို ရီဖန်၏ အိမ်နောက်ဖေးအဖြစ် သတ်မှတ်နိုင်ပြီဖြစ်သည်။ ရန်ဟွမ်နယ်မြေ၏ စွမ်းအားကို စုစည်းလိုက်သည်နှင့်တစ်ပြိုင်နက် မည်သည့်အင်မော်တယ်ဧကရာဇ်ကမှ ရီဖန်ကို ယှဉ်နိုင်မည်မဟုတ်ပေ။

သို့သော်လည်း ရီဖန် ရန်ဟွမ်နယ်မြေက ထွက်ခွါသွားပါက သူသည် ပုံမှန်ရီဖန်သာဖြစ်သည်။

ရန်ဟွမ်နယ်မြေအတွင်း၌သာလျှင် ရီဖန်သည် နယ်ပယ်၏ကောင်းချီးများကို ရရှိနိုင်မည်ဖြစ်သည်။ ရန်ဟွမ်နယ်မြေအဆင့်မြှင့်တင်မှုနှင့်အတူ၊ မဖွံ့ဖြိုးသေးသည့်နေရာများမှာ ပိုမိုကျယ်ပြန့်လာခဲ့သည်။ ၎င်းတို့ကို နောက်တစ်ကြိမ် ထပ်မံဖွင့်လှစ်ဖို့လိုသေး၏။

ဝိညာဉ်ရေးပစ္စည်းများ၊ ဝိညာဉ်သတ္တုတွင်းများ၊ ဝိညာဉ်ရေးဆေးပင်များ စသည်တို့သည် ရီမိသားစုရေရှည်ဖွံ့ဖြိုးတိုးတက်ရန်အတွက် လုံလောက်နိုင်သည်။ ယခုမှအဆင့်တက်လာသော ကမ္ဘာကြီးတစ်ခုကပင်လျှင် စွမ်းအားကြီးအင်အားစုကြီးအတွက် နှစ်ပေါင်းများစွာကြာအောင် အသုံးပြုနိုင်ရန် လုံလောက်လိမ့်မည်။ အနည်းဆုံး အချိန်တိုအတွင်း ရီမိသားစုသည် အရင်းအမြစ်များနှင့်ပတ်သက်၍ စိတ်ပူစရာ မလိုတော့ချေ။

ရီရှောင်းရှောင်းဘက်တွင် တာ့ယွီအင်မော်တယ်မင်းဆက်မှ ကျင့်ကြံသူအများအပြားကို ရန်ဟွမ်နယ်မြေဖွံ့ဖြိုးတိုးတက်ရေးအတွက် စေလွှတ်ခဲ့သည်။ တာ့ယွီအင်မော်တယ်မင်းဆက်သည် ရန်ဟွမ်နယ်မြေကိုဖွံ့ဖြိုးအောင်လုပ်ဆောင်ရန် အရည်အချင်းရှိကြောင်းသ်ိလိုက်ပြီးနောက် ကျင့်ကြံသူများမှာ အလွန်ပျော်ရွှင်နေခဲ့သည်။

အဓိကကမ္ဘာတစ်ခုရှိထားခြင်းဖြင့် တာ့ယွီအင်မော်တယ်မင်းဆက်၏အနာဂတ်သည် အကန့်အသတ်မရှိတော့ချေ။ တာ့ယွီအင်မော်တယ်မင်းဆက်၏အတွင်းလူများဖြစ်သည့် ၎င်းတို့၏အနာဂတ်အလားအလာများသည်လည်း ပိုမိုတောက်ပလာမည်မှာ သေချာသည်။

မူလက တာ့ယွီအင်မော်တယ်မင်းဆက်ထဲဝင်ရောက်ရန် စိတ်မဝင်စားခဲ့သည့် ကျင့်ကြံသူများပင်လျှင် ၎င်းတို့၏ကိုယ်ပိုင်ဆုံးဖြတ်ချက်အတွက် ကျေးဇူးတင်နေကြသည်။ ယခုအချိန်မှစ၍ ၎င်းတို့သည် တာ့ယွီအင်မော်တယ်မင်းဆက်နှင့်အတူ ကြီးပွါးလာလိမ့်မည်။

ရီဖန်သည် ရန်ဟွမ်နယ်မြေကိုမည်သို့ ဖွံ့ဖြိုးတိုးတက်အောင်လုပ်ရမည့်အကြောင်း တွေးနေချိန်၌ ရီဖန်ရှေ့တွင် တစ်စုံတယောက်ပေါ်လာသည်။

“ရှောင်ဖန်၊ ဒီမှာ ဆရာ့အကူအညီလိုသေးလား"

ရီဖန်သည် ဗောဓိဘိုးဘေးကို အံ့ဩဖွယ်ရာများစွာ ပေးခဲ့ဖူးသောကြောင့် သူ့ကို အလွန်လွှမ်းမိုးစေခဲ့သည်။ ဗောဓိဘိုးဘေးက ရီဖန်အတွက် ကိုယ်တိုင်ရှေ့ထွက်ကာ အခြားအင်အားစုများကို ခြောက်လှန့်ပေးရန်ပင်ဆန္ဒရှိခဲ့သည်။

ဤဆက်ဆံမှုမှာ အခြားတပည့်များ တစ်ခါမျှမရရှိခဲ့ဖူးသော အရာဖြစ်သည်။ သို့သော် ရီဖန်က ငြင်းနေဆဲပင်။ လက်ရှိအခြေအနေကို သူကိုယ်တိုင် ကိုင်တွယ်နိုင်သေး၏။

“ဆရာ အခုတော့မလိုသေးပါဘူး၊

ဘိုးဘေးတစ်ယောက်ကလှုပ်ရှားလာရင်တော့ ကျွန်တော်ဆရာ့ကို ဒုက္ခပေးရတော့မှာပဲ!"

ရီဖန်သည် ရှက်ရွံ့သည်ဟု လုံးဝမခံစားရဘဲ ပြုံးလိုက်သည်။

ဆရာဆိုသူသည် မည်သည့်အတွက်နည်း။ ဆရာ့ကို သေချာပေါက် ဒိုင်းကာလေးအဖြစ်သုံးရမည်မဟုတ်ဘူးလား။ ရှက်ရွံ့အားနာသောကြောင့် ဆရာဖြစ်သူထံမှအကူအညီကို ငြင်းဆိုမည့်ကိစ္စသည် ရီဖန်ထံတွင် လုံးဝဖြစ်မလာနိုင်သည့် အရာဖြစ်သည်။

ဗောဓိဘိုးဘေးက ရီဖန်၏ထိုသို့ရင်းနှီးမှုကို သဘောကျ၏။ သူ့တပည့်များအားလုံးထဲတွင် ရီဖန်က သူ့ကိုအပျော်ရွှင်စေနိုင်ဆုံးဖြစ်သည်။ တစ်ခါတစ်ရံတွင် သူ့ကို အနည်းငယ်စိတ်မချရသော်လည်း အချိန်အများစု၌ ဗောဓိဘိုးဘေးသည် ရီဖန်အတွက်ရပ်တည်ပေးရကျိုးနပ်သည်ဟု ခံစားမိသည်။

"ငါ မင်းကို အမှတ်အသားထားခဲ့ပြီ။ လိုအပ်ရင် ငါ့ကိုခေါ်လိုက်။ စတုရန်းလက်မတောင်က ငါ့တပည့်ကို ဘယ်သူမှအနိုင်ကျင့်လို့မရဘူး" ဗောဓိဘိုးဘေး၏စကားသည် အလွန်လွှမ်းမိုးနေခဲ့၏။ တကယ်တမ်းတွင်လည်း ဗောဓိဘိုးဘေး၌ ထိုသို့လုပ်ဆောင်နိုင်မည့် အရည်အချင်းရှိသည်။

အကယ်၍ တစ်စုံတစ်ယောက်သည် စတုရန်းလက်မတောင်မှတပည့်ကို အနိုင်ကျင့်လိုပါက ဗောဓိဘိုးဘေးသဘောတူမတူ အရင်သွားကြည့်သင့်သည်။ လက်ရှိတွင် ရီဖန်ထံ၌ အစ်ကိုမျောက်၏ဆံပင်သုံးချောင်း၊ ဗောဓိဘိုးဘေး၏အကူအညီ စသည်ဖြင့်

ဝှက်ဖဲအနည်းငယ်ပိုရှိလာပြီဖြစ်၏။

ခဏအကြာတွင် ရီဖန်သည် ဘိုးဘေးတစ်ယောက်ယောက် လှုပ်ရှားလာနိုင်ချေကို စောင့်ကြည့်နေခဲ့သည်။ ထိုအခါမှသာ သူ့ဆရာကြီးနှင့် အစ်ကိုကြီးတို့က စတင်လှုပ်ရှားကာ ကူညီပေးနိုင်လိမ့်မည်။

……………..