အခန်း ၂၈၃-၂၈၅

အခန်း ၂၈၃ - ပျက်ဆီးခြင်းဂိုဏ်း၊ ငါ ရီဖန်က မင်းတို့နဲ့ မတူဘူးကွ

‘မွန်မြတ်သောအင်မော်တယ်လက်နက်၊ နှစ်မြှောင့်ဓား သုံးဘက်’

‘မွန်မြတ်သောအင်မော်တယ်လက်နက်၊ နေခွင်း လေး’

ရီဖန်သည် နောက်ဆုံးတွင် သူ့အစ်ကိုများ၏ အထောက်အထားကို အတည်ပြုခဲ့သည်။ သူ၏အကြီးဆုံးနှင့် ဒုတိယဆရာတူညီကိုများသည် ဒဏ္ဍာရီလာပုဂ္ဂိုလ်များဖြစ်သည့် တာ့ယွီနှင့် ယန်ကျန်းတို့၏သားမြေးများဖြစ်သည်။

ရီဖန်သည် သူ၏ယခင်ဘဝက ဤနတ်ဘုရားနှစ်ပါးအကြောင်းကို သေချာပေါက်ကြားဖူးပါ၏။ ဗောဓိဘိုးဘေးက ရီဖန်ကို မွန်မြတ်သောအင်မော်တယ်လက်နက်များပြုပြင်ပေးရန် အကူအညီတောင်းသောအခါ သူသည် ဤရတနာနှစ်ပါးကို ချက်ခြင်းတွေးမိလိုက်၏။

ရီဖန်၏လက်မှုပညာသည် အလွန်တည်ငြိမ်သောကြောင့် အဆင့်နိမ့် မွန်မြတ်သောအင်မော်တယ်လက်နက် အထွတ်အထိပ်အဆင့်ကို ကျဆုံးခြင်းမရှိထုတ်လုပ်နိုင်ခဲ့သည်။

ရီဖန်သည် မွန်မြတ်သောအင်မော်တယ်လက်နက်နှစ်ခုကို ကိုင်ဆောင်လျက် စတုရန်းလက်မတောင်သို့ ပြန်လာခဲ့သည်။ သို့သော် မကြာမီတွင် တစ်စုံတစ်ခုလွဲမှားနေကြောင်း သူသတိပြုမိလိုက်၏။ စတုရန်းလက်မတောင်၏ လေထုသည် အနည်းငယ်လေးလံနေသည်။

"ဆရာ ဘာဖြစ်လို့လဲ" ရီဖန်က မေးလိုက်သည်။

"ပျက်ဆီးခြင်းဂိုဏ်း ပေါ်လာပြန်ပြီ"

ဗောဓိဘိုးဘေးက ပျက်ဆီးခြင်းဂိုဏ်း၏ဇစ်မြစ်ကို ရီဖန်အားရှင်းပြသည်။ ထိုစကားကိုကြားပြီးနောက် ရီဖန်ပင်လျှင် ကြီးမားသောဖိအားကို ခံစားလိုက်ရသည်။

ထို ပျက်ဆီးခြင်းဂိုဏ်းက၊ ဖန်ကုစကြဝဠာ၏ နောက်ဆုံး အုပ်စိုးသူများမဟုတ်လား?

ရီဖန်သည် သူ၏ကျင့်ကြံရေးအဆင့်အမြန်နှုန်းမှာ အလွန်နှေးနေသေးသည်ကို သတိထားမိသွား၏။ နောက်ဆုံးအုပ်စိုးရှင်များ ပေါ်လာပြီးဖြစ်သော်လည်း သူ၏ကျင့်ကြံမှုအဆင့်က ဆာဗာ၏အမြင့်ဆုံးအဆင့်သို့ပင် မရောက်သေးချေ။ ဤနှုန်းဖြင့် ၎င်းတို့ကိုတိုက်နိုင်မည့် နည်းလမ်းရှိလိမ့်မည်မဟုတ်။

“ရှောင်ဖန်၊ မင်း အနှစ်တစ်ထောင်အတွင်းမှာ တာအိုဘိုးဘေးနယ်မြေကို ဖြတ်ကျော်နိုင်ရင် အကောင်းဆုံးပဲ။ အဲဒါမှ မင်းကိုယ်မင်း ကာကွယ်နိုင်မှာ" ဗောဓိဘိုးဘေးက စိုးရိမ်စွာပြောလိုက်သည်။

သူ့တပည့်သည် ထူးချွန်သောစွမ်းရည်ရှိကြောင်း သိသော်လည်း အချိန်မှာနည်းလွန်းနေသည်။ အနှစ်တစ်သိန်းသာရှိပါက ဗောဓိဘိုးဘေးသည် ရီဖန် တာအိုဘိုးဘေးနယ်မြေသို့ ဖြတ်ကျော်သွားနိုင်မည်ဟု ယုံကြည်နိုင်သော်လည်း အနှစ်တစ်သောင်းတည်းနှင့် အန္တရာယ်များလွန်းသေး၏။ ပျက်တီးခြင်းခေတ်သို့ ရောက်ရှိရန် အနှစ်တစ်သောင်းသာကျန်တော့သည်။

ထိုအချိန်တွင် ပျက်ဆီးခြင်းဂိုဏ်းသည် တစ်ဖန်ပြန်လည်ပေါ်ပေါက်လာမည်ဖြစ်သည်၌ အင်မော်တယ်ဧကရာဇ်နယ်ပယ်ရှိ အင်အားကြီးသတ္တဝါများပင်လျှင် ထိုစစ်ပွဲများ၌ အမြှောက်စာလေးများဖြစ်သွားလိမ့်မည်။ စစ်မှန်သော တာအိုဘိုးဘေးနယ်ပယ်မှ စွမ်းအားရှင်များသာလျှင် ၎င်းတို့ကိုယ်ကို ကာကွယ်နိုင်လိမ့်မည်။

အနှစ်တစ်သောင်းကျန်သေးတယ်လား။ ဗောဓိဘိုးဘေး၏ စကားကိုကြားသောအခါ မူလက ဖိအားများနေသော ရီဖန်မှာ အနည်းငယ် စိတ်သက်သာရာရသွား၏။ အနှစ်တစ်ထောင်လောက်ဆို လုံလောက်ပါပြီလေ။ မူရင်းနိယာမ မဟာတာအိုကို အပြည့်အဝနားလည်ပြီးသည်နှင့် အင်မော်တယ်ဧကရာဇ် နယ်ပယ်ကို ဖြတ်ကျော်နိုင်မည်ဖြစ်သည်။

အင်မော်တယ်ဧကရာဇ်နယ်ပယ်မှ တာအိုဘိုးဘေးများနယ်မြေအထိ ဖြတ်ကျော်ရန်အတွက် ပြီးပြည့်စုံသောကျင့်ကြံမှုအဆင့်ရှိရုံသာမကဘဲ ၎င်းတို့ကိုယ်တိုင်လည်း စည်းမျဉ်းများချမှတ်ရန် လိုအပ်သည်။ စည်းမျဥ်းများသည် စကြာဝဠာ၏ အဆင့်များဖြစ်ကာ၊ စည်းမျဉ်းတစ်ခုစီသည် စကြဝဠာ၏ အဓိကစွမ်းအားဖြစ်၏။

တာအိုဘိုးဘေးတစ်ဦးစီ၏ မွေးဖွားမှုတိုင်းက ဤစကြဝဠာ၏စွမ်းအားကို မြှင့်တင်ပေးသည်။ တာအိုဘိုးဘေးများသည် ကြီးမားသောစွမ်းအားကို ပိုင်ဆိုင်ထားကာ စကြဝဠာ၏မူလရင်းမြစ်ထံမှ တုံ့ပြန်ချက်များကိုပင် လက်ခံရရှိနိုင်ပါသည်။

ရီဖန်၏ကျင့်ကြံမှုအဆင့်သည် အင်မော်တယ်ဘုရင်၏ အထွတ်အထိပ်သို့ရောက်ရှိနေသည်မှာ အချိန်အတော်ကြာပြီဖြစ်သောကြောင့် ဖြတ်ကျော်ရန် အဆင်သင့်ဖြစ်နေပြီဖြစ်သည်။ ဗောဓိဘိုးဘေး၏ စကားက ရီဖန်ကို အရေးတကြီးခံစားရစေသည်။ ဗောဓိဘိုးဘေးက အနှစ်တစ်သောင်းကျန်သေးသည်ဟု ဆိုသော်လည်း အရာအားလုံးကို လျင်မြန်စွာထိန်းချုပ်နိုင်မည့် အင်အားကိုပိုင်ဆိုင်ခြင်းကသာ တစ်ခုတည်းသော နည်းလမ်းဖြစ်သည်။

ဗောဓိဘိုးဘေးထံသို့ မွန်မြတ်သောအင်မော်တယ်လက်နက်နှစ်ခုကို လွှဲပြောင်းပေးပြီးနောက် ရီဖန်သည် ရီမိသားစုထံ ပြန်သွားကာ သူ၏အောင်မြင်မှုအတွက် ပြင်ဆင်ခဲ့သည်။

ဉာဏ်အလင်းတိုးပွားလာမှုနှင့်အတူ ကောင်းကင်ဘုံ တာအို၏မူလနိယာမ

ပျက်ဆီးခြင်းကောင်းကင်ဘုံတာအို ကြိုးမျှင်သည် ရီဖန်ကို မရပ်တန့်နိုင်တော့ပေ။ အနှစ်ငါးဆယ်အတွင်း၌ မူရင်းနိယာမပျက်ဆီးခြင်းကောင်းကင်ဘုံတာအိုက လုံးဝပြီးပြည့်စုံသွား၏။

"စနစ်၊ ပေါင်းစပ်လိုက်!"

ယခု အခြေအနေအားလုံးပြေလည်သွားသောအခါ ရီဖန်သည်မနှောင့်နှေးဘဲ သူ၏အောင်မြင်မှုကို ချက်ချင်း စတင်ခဲ့သည်။ ရီဖန်ဖြတ်ကျော်နေစဉ် နတ်ဘုရားနှင်ပ နတ်ဆိုးစစ်မြေပြင်တွင် အချိန်အတော်ကြာ ပျောက်ကွယ်သွားခဲ့သော ဟုန်ယွင်ဧကရာဇ်ပြန်ပေါ်လာသည်။

သို့သော် ယခုတစ်ကြိမ် ပေါ်ထွက်လာသော ဟုန်ယွင်ဧကရာဇ်ကို လူသားဟုမခေါ်ဆိုနိုင်တော့ပေ။

သူသည် အနက်ရောင်အကြေးခွံများဖြင့် ဖုံးလွှမ်းနေကာ သည်းမခံနိုင်လောက်သော အနံ့အသက်ကို ထုတ်လွှတ်လိုက်နေ၏။ သူသည် ကူးစက်ခံထားရသော ပျက်ဆီးခြင်းနတ်ဆိုးများနှင့် အလွန်ဆင်တူသည်။

ထိုပျက်ဆီးခြင်းနတ်ဆိုးများနှင့်မတူသည့်အရာမှာ ဟုန်ယွင်ဧကရာဇ်သည် သူ့ကိုယ်သူထိန်းချုပ်နိုင်ခဲ့သောကြောင့် လုံးဝသတိလစ်သွားခြင်းမရှိပေ။

"နတ်ဘုရားနဲ့ နတ်ဆိုးချီကူးစက်ခံရခြင်းရဲ့ ရလဒ်တွေက ဒီလောက်ပြီးပြည့်စုံမယ်လို့ မမျှော်လင့်ထားဘူး။ ဒါဟာ မမျှော်လင့်ဘဲ ငါ့ရဲ့ကျင့်ကြံမှုအဆင့်ကို တာအိုဘိုးဘေးနယ်မြေကို ဖြတ်ကျော်သွားစေတာပဲ ဟားဟား"

သူ့ကို ဟုန်ယွင်ဧကရာဇ်ဟု မခေါ်သင့်တော့ပေ။ ယခုတွင် သူ့ကို တိမ်နီနတ်ဆိုးဘိုးဘေးဟု ခေါ်ဆိုနိုင်သည်။ တိမ်နီနတ်ဆိုးဘိုးဘေးက ရူးသွပ်စွာ ရယ်မောလိုက်သည်။ အခြားသော ပျက်ဆီးခြင်း နတ်ဆိုးများသည် နတ်ဘုရားနှင့် နတ်ဆိုးချီတို့မှ ကူးစက်ခံရကာ ပျက်ဆီးခြင်းနတ်ဆိုးဖြစ်လာခြင်းဖြစ်၏။ သို့သော် တိမ်နီနတ်ဆိုးဘိုးဘေးက ပိုမိုသန်မာလာရန်အတွက် ထိုချီစွမ်းအားကို လိုလားစွာစုပ်ယူခဲ့သည်။

သူယခင်က ချန်မင်ကမ္ဘာတွင် ရှုံးနိမ့်ပြီးနောက်၊ ရီမိသားစုနှင့် တာ့ယွီအင်မော်တယ်မင်းဆက်ကို မည်သို့လက်စားချေရမည်ကို အမြဲတွေးနေခဲ့သည်။

သူ့ကိုယ်ပိုင်အားထုတ်မှု၊ ယင်ယန်တံခါးနှင့် ပူးပေါင်းခြင်းဖြင့် ချန်မင်ကမ္ဘာကို အောင်နိုင်မည်ဟု ထင်ခဲ့သော်လည်း၊ သူမေ့သွားသည်မှာ ယင်ယန်တံခါးနှင့် ရှင်သန်ခြင်းနှင့်သေဆုံးခြင်းတံခါးသည်

လုံးဝဖော်ထုတ်ခံလိုက်ရသောကြောင့် တာအို ဘိုးဘေးများသည် ထိုင်နေ၍မရတော့ချေ။

အင်မော်တယ်ဧကရာဇ်၏စွမ်းအားသည် တိမ်တိုက်နီဧကရာဇ်အတွက် လက်စားချေရန် မလုံလောက်သေးချေ။ သိူ့သော် တိမ်နီဧကရာဇ်၏ စွမ်းရည်များကိုအသုံးချ၍ တာအိုဘိုးဘေးနယ်ပယ်ကို ဖြတ်ကျော်လိုပါက ထိုအခွင့်အရေး မည်သည့်အချိန်မှရောက်လာလိမ့်မည်ကို မသိနိုင်ချေ။

နောက်ဆုံးတွင် တိမ်နီဧကရာဇ်သည် သူ၏ဆရာ တိမ်နက်တာအိုဘိုးဘေးထံမှ နည်းလမ်းကို ရှာတွေ့ခဲ့သည်။

နတ်ဘုရားနှင့် နတ်ဆိုးချီကို ကူးစက်ခံရပြီးနောက် ကျူးကျော်မခံရဘဲ ခုခံနိုင်လျှင် ၎င်းတို့သည် ပျက်ဆီးခြင်းနတ်ဆိုးနတ်ဘုရား၏ စစ်မှန်သော လက်အောက်ခံဖြစ်လာကာ အောင်မြင်မှုများ ရရှိမည်ဖြစ်သည်။ မအောင်မြင်ပါက ၎င်းတို့သည် ဉာဏ်မရှိသော ပျက်ဆီးခြင်းနတ်ဆိုးဖြစ်လာကာ ထိန်းချုပ်ခံအဖြစ် ပြောင်းလဲလိမ့်မည်။

တိမ်နီဧကရာဇ်၏ ပုံမှန်သတ္တိကိုကြည့်ပါက သူသည် ဤဆုံးဖြတ်ချက်ကို ချမှတ်ရန် ခက်ခဲလိမ့်မည်။ ကံမကောင်းစွာဖြင့် ရီရှောင်းရှောင်းက တိမ်နီဧကရာဇ်၏ အတွင်းစိတ်နတ်ဆိုးဖြစ်လာသောကြောင့် ရီရှောင်းရှောင်း မသေသေးသရွေ့၊ တာ့ယွီအင်မော်တယ်မင်းဆက် မပြိုလဲသေးသရွေ့ တိမ်နီဧကရာဇ်သည် နတ်ဆိုးအဖြစ်သို့ အချိန်မရွေးပြောင်းလဲသွားနိုင်ကြောင်း ခံစားမိသည်။

နောက်ဆုံးတွင် တိမ်နီဧကရာဇ်သည် နတ်ဘုရားနှင့် နတ်ဆိုးချီတို့၏ ကျူးကျော်မှုကို လက်ခံရန် ရွေးချယ်သွားကာ ကံကောင်းစွာဖြင့် အောင်မြင်ခဲ့သည်။ သူ၏ နတ်ဆိုးဘိုးဘေးနယ်ပယ်သည် ဘိုးဘေးများကြားတွင် အနိမ့်ဆုံးဖြစ်သော်လည်း၊ ဘိုးဘေးသည် ဘိုးဘေးဖြစ်နေဆဲပင်။ ၎င်းက ဧကရာဇ်နယ်မြေနှင့်ပင် တန်းညှိ၍မရတော့ပေ။

တိမ်နီနတ်ဆိုးဘိုးဘေးအဖြစ် အောင်မြင်မှုရရှိပြီးနောက် သူသည် သူ၏ကိုယ်ပိုင်စည်းမျဉ်းများဖြစ်သည့် တိမ်နီစည်းမျဉ်းများကို ထိန်းချုပ်နိုင်ခဲ့သည်။

"ရီရှောင်းရှောင်း မင်းအဆင်သင့်ဖြစ်ပြီလား"

တိမ်နီသည် တာ့ယွီအင်မော်တယ်မင်းဆက်သို့ဝင်ရောက်ပြီး ကြီးကြီးမားမားရုန်းရင်းဆန်ခတ်မဖြစ်ချင်ဘဲ ရီရှောင်းရှောင်းကို တိုက်ရိုက်တိုက်ခိုက်ပြီးသာ လက်စားချေလိုသည်။ သူသည် ရီရှောင်းရှောင်းကို စိတ်ပျက်အားငယ်စွာ ပြိုလဲစေချင်သည်။

…………….

အခန်း ၂၈၄ - ပျက်ဆီးခြင်း ဂိုဏ်း၊ ငါ ရီဖန်က မင်းတို့နဲ့ မတူဘူး

နတ်ဆိုးမျိုးစေ့များသည် တိမ်နီနတ်ဆိုးဘိုးဘေး၏လက်ထဲမှ ရောင်စဉ်ဖြာထွက်နေသည်။ ဤနတ်ဆိုးမျိုးစေ့များကို နတ်ဆိုးတိုက်ပွဲမြေပြင်အတွင်းရှိ စည်းမျဉ်းများကိုလိုက်နာပြီး ရှင်သန်ခြင်းနှင့် သေဆုံးခြင်းတံခါးက တီထွင်ခဲ့ခြင်းဖြစ်သည်။

နတ်ဆိုးတိုက်ပွဲမြေပြင်ရှိ သတ္တဝါအရေအတွက်သည် ၎င်း၏ကန့်သတ်ချက်သို့ရောက်ရှိသွားသောကြောင့် ပျက်ဆီးခြင်းဘုရားကျောင်း၏အဖွဲ့ဝင်များသည် ကျေနပ်မှုမရရှိကြတော့ချေ။ နတ်ဆိုးကို ပြန်လည်နှိုးထရန် စီစဉ်ထားသောသော်လည်း ၎င်းတို့၏ လူအင်အားတစ်ခုတည်းနှင့် မလုံလောက်တော့ပေ။

သို့သော် ဤနတ်ဆိုးမျိုးစေ့များဖြင့် ၎င်းတို့သည် နယ်ပယ်သုံးထောင်အနှံ့တွင် ဖြန့်ကျက်နိုင်လိမ့်မည်။ ဤနတ်ဆိုးမျိုးစေ့များ မဖော်ထုတ်ခံရသရွေ့ တာအိုဘိုးဘေးများပင်လျှင် ၎င်းတို့၏တည်ရှိမှုကို သိရှိနိုင်မည်မဟုတ်ပေ။ သို့သော်လည်း သူတို့ကွဲသွားပါက ပြန်ကောင်းလာရန် အလွန်ခက်ခဲပါလိမ့်မည်။

နောက်ဆုံးတွင် ၎င်းတို့သည် ပျက်ဆီးခြင်းဘုရားကျောင်း၏ထိန်းချုပ်မှုအောက်၌ ပျက်ဆီးခြင်းနတ်ဆိုးအဖြစ်သို့ ပြောင်းလဲသွားကြ၏။

ရှင်သန်ခြင်းနှင့် သေဆုံးခြင်းတံခါးနှင့် ယင်ယန်တံခါးမှ သူလျှိုများသည် ထိုနတ်ဆိုးမျိုးစေ့များကို မည်သူမှမသိဘဲ တိတ်တဆိတ်ကြဲချလာကြ၏။ လူတိုင်း၏ရေဒါအောက်တွင် ပျက်ဆီးခြင်းဘုရားကျောင်းသည် ၎င်း၏အကြံအစည်ကို အကောင်အထည်ဖော်လျက်ရှိသည်။

ရက်အတော်ကြာမြင့်ပြီးနောက် ရီဖန် တစ်ကိုယ်တည်းကျင့်ကြံနေချိန်တွင် နယ်မြေသုံးထောင်သည် ပျက်ဆီးခြင်းဘုရားကျောင်း ပေါ်ပေါက်လာခြင်းကြောင့် မည်သည့်သက်ရောက်မှုကိုမှမခံရဘဲ ပုံမှန်အတိုင်း ဆက်သွားနေကြသည်။

ဤအချိန်တွင် အချို့သောကမ္ဘာများရှိ သာမန်ကျင့်ကြံသူများမှာ ရုတ်တရက်ရူးသွပ်လာကြကာ အနက်ရောင်ရောင်ဝါဖြင့် ဖုံးလွှမ်းသွားပြီး နတ်ဆိုးအဖြစ်သို့ ပြောင်းလဲသွားသည်။ ၎င်းနတ်ဆိုးများက အခြားသောကျင့်ကြံသူများကို ပြင်းထန်စွာတိုက်ခိုက်လာသောကြောင့် အချို့သောကျင့်ကြံသူများလည်း ဒဏ်ရာရသွားကြသည်။

နတ်ဆိုး၏တိုက်ခိုက်မှုနှင့်အတူ အနက်ရောင်ရောင်ဝါအချို့သည် အခြားကျင့်ကြံသူများထဲသို့ စိမ့်ဝင်သွားကြ၏။ နတ်ဆိုးကို အလျင်အမြန်သတ်နိုင်ခဲ့သော်လည်း အကြောင်းရင်းစုံကို မသိရသေးသောကြောင့် ထိုကိစ္စကို ပိတ်သိမ်းလိုက်ကြသည်။ သို့သော်မကြာမီတွင် နတ်ဆိုးအသစ်များ ပေါ်လာပြန်သည်။

နတ်ဆိုးများ၏တိုက်ခိုက်ခြင်းကို ခံခဲ့ရသော ကျင့်ကြံသူများသည်လည်း လျင်မြန်စွာ ပြောင်းလဲသွားကာ ပျက်ဆီးခြင်းနတ်ဆိုးအသစ်များ ဖြစ်လာပြီး အခြားကျင့်ကြံသူများကို စတင်တိုက်ခိုက်ကြသည်။ ဤသို့ဖြင့် ပျက်ဆီးခြင်းနတ်ဆိုးအရေအတွက်သည် အဆက်မပြတ်တိုးများလာသည်။ အမည်မသိ ကူးစက်ရောဂါကြောင့် ထိုအခြေအနေသည် နတ်ဆိုးများကို သတ်လိုက်ရုံဖြင့်သာ ပြီးဆုံးသွားခဲ့၏။

ထို့ကြောက့် ပျက်ဆီးခြင်းနတ်ဆိုးအရေအတွက်သည် ဆက်လက်တိုးပွါးလာကာ၊ ကမ္ဘာငယ်တစ်ထောင်၊ အလယ်ကမ္ဘာတစ်ထောင်နှင့် မဟာကမ္ဘာတစ်ထောင်တို့၌ပင်လျှင် အခြားသောသတ္တဝါအားလုံး သေလုမြောပါးဖြစ်သွားက ပျက်ဆီးခြင်းနတ်ဆိုးများအတွက် နေရာအဖြစ် ပြောင်းလဲသွားသည်။

တာအိုဘိုးဘေးများ သိရှိသွားသောအခါတွင် အလွန်နောက်ကျနေပြီဖြစ်၏။ တာအိုဘိုးဘေးများပင်လျှင် လူသားမျိုးနွယ်စုကျင့်ကြံသူထံ ကူးစက်ခံရခြင်း ရှိ၊ မရှိ ဆုံးဖြတ်ရန် ခက်ခဲသည်။ ရောဂါဖြစ်ပွားသည့်အခါမှသာ ၎င်းတို့ကို သိရှိနိုင်မည်ဖြစ်သည်။

၎င်းတို့သည် ဖြစ်နိုင်ခြေတစ်ခုတည်းအတွက်နှင့်လည်း ကျင့်ကြံသူအားလုံးကို သတ်ပစ်၍မရချေ။ ၎င်းတို့ အခြေအနေကို ထိန်းချုပ်လိုသော်လည်း ထိန်းမနိုင်သိမ်းမရဖြစ်နေပြီဖြစ်သည်။

"ပျက်ဆီးခြင်းဘုရားကျောင်း၊ ချီးပဲ!"

မျိုးနွယ်စုအသီးသီးမှ မရေမတွက်နိုင်သော ငိုကြွေးသံများကို ကျင့်ကြံသူများ၊ တာအိုဘိုးဘေးအဆင့်ရှိ အင်အားကြီးကျင့်ကြံသူများပင်လျှင် မခံစားနိုင်တော့ချေ။

နောက်ပိုင်းတွင် ပျက်ဆီးခြင်းရောင်ဝါများ အားနည်းလာသည်နှင့်အမျှ သတ္တဝါများသည် ပျက်ဆီးခြင်းနတ်ဆိုးများအဖြစ်သို့ ပြောင်းလဲသည့်အချိန်မှာ ပို၍ပင်ရှည်ကြာလာသည်။ ထို့အပြင် ထိုအသွင်ပြောင်းမှုဖြစ်စဉ်က အနာကျင်ဆုံးဖြစ်၏။ ဤကျင့်ကြံသူများ၏ မိတ်ဆွေများနှင့် မိသားစုများသည် ၎င်းတို့ ပျက်ဆီးခြင်းနတ်ဆိုးများအဖြစ်သို့ ပြောင်းလဲသွားသည်ကိုသာထိုင်ကြည့်ရင်း အလွန်နာကျင်ခံစားခဲ့ရသည်။

ဗောဓိဘိုးဘေးသည် သူ့ရှေ့ရှိလူသားကျင့်ကြံသူမှာ တဖြည်းဖြည်းအသိစိတ်ပျောက်ဆုံးသွားပြီး ပျက်ဆီးခြင်းနတ်ဆိုးအဖြစ်သို့ ပြောင်းလဲသွားသည်ကိုကြည့်ရင်း ကူကယ်ရာမဲ့ခံစားခဲ့ရသည်။ သူသည် ပျက်ဆီးခြင်းရောင်ဝါကိုသန့်စင်ပြီး သူ့ရှေ့မှလူကို ပျက်ဆီးခြင်းနတ်ဆိုးအဖြစ်သို့ ပြောင်းလဲခြင်းမှတားဆီးနိုင်သည်။ သို့သော် သူတစ်ယောက်တည်းက မည်မျှကယ်နိုင်ပါမည်နည်း။ အခြားတာအိုဘိုးဘေးအများစုသည် အသွင်ပြောင်းခြင်းကိုပင် မရပ်တန့်နိုင်ပေ။

"နယ်ပယ်သုံးထောင်က လူတွေက အဲဒါကို ထိန်းချုပ်ဖို့ကြိုးစားကြပါစေ၊ ငါ အဖြေရှာဖို့ အကောင်းဆုံးကြိုးစားပါ့မယ်"

ဗောဓိဘိုးဘေး၏စကားကိုကြားသောအခါ အခြားတာအိုဘိုးဘေးများက တိတ်တဆိတ် ခေါင်းညိတ်ကြသည်။ ယခုအချိန်တွင် ဗောဓိဘိုးဘေးက အဖြေအမြန်ရှာတွေ့နိုင်ရန်သာ မျှော်လင့်နိုင်ကြသည်။ ဗောဓိဘိုးဘေးသာကျဆုံးသွားပါက သူတို့သည် ပို၍ပင်ကူကယ်ရာမဲ့သွားလိမ့်မည်။

…..

ချန်မင်နယ်မြေတွင် ရီရှောင်းရှောင်းသည် စစ်သားတစ်ဦး ပျက်ဆီးခြင်းနတ်ဆိုးအဖြစ် ပြောင်းလဲသွားသည်ကို ဒေါသတကြီး ကြည့်နေသည်။ အခြားသော မဟာကမ္ဘာတစ်ထောင်နှင့် နှိုင်းယှဉ်ပါက ချန်မင်နယ်မြေရှိ ပျက်ဆီးခြင်းနတ်ဆိုးအရေအတွက်က ပိုများသည်။ နောက်ဆုံးတွင် ၎င်းတို့က နတ်ဆိုးမျိုးနွယ်စု၏ အထူးအာရုံစိုက်မှုကိုပင် ရရှိခဲ့၏။ ထို့ကြောင့် ရီရှောင်းရှောင်းပင် မတားဆီးနိုင်တော့ချေ။

ရီရှောင်းရှောင်းသည် တစ်စုံတစ်ယောက်က သူတို့ကို လျှို့ဝှက်စွာကြံစည်နေသည်ဟု ယုံကြည်ခဲ့သော်လည်း သူမသည် ထိုသူများကိုရှာမတွေ့သောကြောင့် စိတ်ပျက်နေထဲ့သည်။ အဓိကပြဿနာမှာ ရီဖန်သည် ဆုတ်ခွါနေရဆဲဖြစ်သောကြောင့် ရီမိသားစုသည် ဦးခေါင်းမရှိသော နဂါးတစ်ကောင်ကဲ့သို့ ဖြစ်နေသည်။

"သူ့ကို ခေါ်သွားလိုက်၊ မထိခိုက်စေဘဲနဲ့ အခုချက်ချင်း သော့ခတ်ထားလိုက်"

သူမတားနိုင်သော်လည်း ရီရှောင်းရှောင်းသည် သူမ၏စစ်သားကို စွန့်လွှတ်ရန် ဆန္ဒမရှိပေ။ အနာဂတ်တွင် အဖြေရှာမတွေ့ဟု မည်သူပြောနိုင်မည်နည်း။ လုံးဝစိတ်ပျက်အားငယ်မသွားမီအထိ ရီရှောင်းရှောင်းသည် မည်သူ့ကိုမှ အရှုံးမပေးခဲ့ချေ။

ကူးစက်ခံရသူများသည် တာ့ယွီအင်မော်တယ်မင်းဆက်၏ စစ်သည်များမဟုတ်ဘဲ များသောအားဖြင့် သာမန်ကျင့်ကြံသူများဖြစ်သည်။ လက်ရှိတွင် ချန်မင်ကမ္ဘာ၏ သုံးပုံတစ်ပုံကို ပျက်ဆီးခြင်းနတ်ဆိုးများ၏ နယ်မြေများအဖြစ် အပြည့်အဝ သိမ်းပိုက်ထားသည်။

ရီရှောင်းရှောင်းက ကျန်နယ်မြေများကို ကာကွယ်ရန်အတွက် ကြယ်စုတပ်ဖွဲ့ မှ တပ်ဖွဲ့ဝင်အားလုံးကို စေလွှတ်လိုက်သည်။

သို့ရာတွင် ပျက်ဆီးခြင်းနတ်ဆိုးများသည် နောက်ဆုံးတွင် ခံစစ်စက်ဝိုင်းအတွင်းတွင် ပေါက်ဖွားနေသေးသောကြောင့် ဤဖြေရှင်းချက်သည် ယာယီသာဖြစ်၏။ ရီရှောင်းရှောင်းသည် ကြယ်စုံသောကောင်းကင်ကို မော့ကြည့်လိုက်ကာရေရွတ်လိုက်သည်။

"အကိုကြီး၊ မြန်မြန်ပြန်လာပါတော့!"

အခြားတစ်ဖက်တွင် ရန်ဟွမ်နယ်မြေ၌၊

ရန်ဟွမ်နယ်မြေကို ရီမိသားစုက လုံးဝချုပ်ကိုင်ထားသောကြောင့် တခြားကျင့်ကြံသူမရှိသလောက်ပင်။ ပျက်ဆီးခြင်းနတ်ဆိုးများဖြစ်ပွားနေချိန်တွင် ရန်ဟွမ် နယ်မြေသည် ပြင်ပလမ်းကြောင်းများအားလုံးကို ချက်ချင်းပိတ်လိုက်ကာ ရှားပါးသောနေရာအဖြစ်သို့ ပြောင်းလဲလိုက်သည်။

ရီမိသားစုနယ်မြေ၏ မူလနိယာမအတွင်းတွင်၊

ထိူအခိုက်အတန့်၌ ရီဖန်၏ရောင်ဝါသည် အထွတ်အထိပ်သို့ရောက်ရှိလာကာ လုံးဝငြိမ်သက်သွားသည်။ ရီဖန်၏ ကျင့်ကြံမှုအဆင့်သည် အင်မော်တယ်ဧကရာဇ်၏ အလယ်အလတ်အဆင့်သို့ ရောက်ရှိသွား၏။

ရီဖန်၏အခြေခံအုတ်မြစ်ဖြင့်၊ ဧကရာဇ်နယ်မြေသို့ ဖြတ်ကျော်ရန် လုံးဝအခက်အခဲမရှိချေ။ ထို့အပြင် အတက်အကျလှိုင်းများမရှိသောကြောင့် ၎င်းသည် အလွန်ချောမွေ့သော အောင်မြင်မှုဖြစ်သည်။

သူသည် ကျင့်ကြံမှုအဆင့် ခိုင်မာစေရန်အတွက် အချိန်များစွာ အသုံးပြုခဲ့သည်။

"နောက်ဆုံးတော့ကျော်ဖြတ်နိုင်သွားပြီ"

ရီဖန်က သက်တောင့်သက်သာ သက်ပြင်းရှူထုတ်လိုက်သည်။

ရီဖန်သည် အင်မော်တယ်ဘုရင်နယ်မြေတွင် အားအနည်းဆုံး တာအိုဘိုးဘေးကို တွန်းလှန်နိုင်ခဲ့သော်လည်း၊ ယခုအခါတွင် သာမန် တာအိုဘိုးဘေးတစ်ဦးကို အခက်အခဲမရှိဘဲ ဖြေရှင်းနိုင်လိမ့်မည်။

အင်မော်တယ်ဧကရာဇ်နယ်မြေသို့ ထိုးဖောက်ဝင်ရောက်စဉ် ရီဖန်သည် သူ၏အတိတ်ကိုယ်ကို အားမစိုက်ထုတ်ဘဲ ဖျက်ဆီးလိုက်နိုင်သည်။ ၎င်းကလည်း နယ်ပယ်အောင်မြင်မှု၏ အကျိုးကျေးဇူးတစ်ခုဖြစ်သည်။ နယ်ပယ်တစ်ခုသည် ကျင့်ကြံသူ၏အင်အားကို အကဲဖြတ်ရန် အကောင်းဆုံးစံနှုန်းဖြစ်၏။

အောင်မြင်မှုတစ်ခုစီသည် နှစ်ပေါင်းတစ်ရာကျော် တစ်ကိုယ်တည်းကျင့်ကြံရသောကြောင့် ရီဖန်သည် သူ၏ရီမိသားစုကို လွမ်းဆွတ်နေခဲ့သည်။ သူ၏ ကျင့်ကြံမှုအဆင့်ကို ပေါင်းစည်းလိုက်သည်နှင့် ရီဖန်သည် ဆက်လက်ကျင့်ကြံရန် မလိုအပ်တော့ချေ။ ထို့နောက်တွင် သူသည် ရီမိသားစုနယ်မြေအတွင်း၌ ပေါ်လာ၏။

ရီဖန်မရှိလျှင် မိသားစုအစည်းအဝေးအတွက် တာဝန်ရှိသည့်သူမှာ စုယန်ဖြစ်သည်။

"ကျင်းဟိုင်၊ မင်းနဲ့ ကျင်းထျန်က မင်းတို့အဒေါ်ကို ထောက်ပံ့ဖို့ လူတချို့ကို စေလွှတ်ရမယ်"

"ကျင်းဖန်ကတော့ မင်းရဲ့တာဝန်က ပျက်ဆီးခြင်းနတ်ဆိုးနဲ့ နတ်ဆိုးချီကို အပြည့်အဝ မချေဖျက်နိုင်ရင်တောင် အနည်းဆုံးတော့ ဖိနှိပ်နိုင်နေရမယ်"

ရီမိသားစု၏ကျင့်ကြံသူများသည် မကြုံစဖူးစည်းလုံးနေကြ၏။ တာ့ယွီအင်မော်တယ်မင်းဆက် ဒုက္ခရောက်သောအခါ၊ အခြားဌာနခွဲများကလည်း တုံ့ဆိုင်းခြင်းမရှိဘဲ ကူညီခဲ့ကြသည်။ ရီဖန်တိတ်တဆိတ် ပေါ်လာသည်ကိုပင် မည်သူမျှ သတိမထားမိချေ။

အစည်းအဝေး၏ အကြောင်းအရာကို နားထောင်ရင်း ရီဖန်သည် တဖြည်းဖြည်းမျက်မှောက်ကြုတ်လာသည်။ ‘ပျက်ဆီးခြင်း နတ်ဆိုးတွေ၊ နတ်ဆိုးချီ…. ငါ့ရဲ့ နှစ်တစ်ရာကျော် ကျင့်ကြံမှုအတွင်းမှာ ဘယ်လောက်တောင်ကြီးတဲ့ အဖြစ်အပျက်တွေ ဖြစ်သွားတာလဲ’

သို့သော်လည်း ရီဖန်သည် လက်ရှိအခြေအနေကို လျင်မြန်စွာနားလည်လိုက်သည်။ ရီဖန်၏ နတ်အာရုံသည် ရန်ဟွမ်နယ်ပယ်တစ်ခုလုံးကို ချက်ချင်းလွှမ်းမိုးသွားကာ ကြီးမားသောပြဿနာများမရှိသည်ကို သိရပြီးနောက် သက်ပြင်းချလိုက်သည်။ သို့သော် ချန်မင်နယ်မြေမှအဖြစ်အပျက်များကို မြင်လိုက်ရသောအခါ ရီဖန်လက်သီးကို တင်းကြပ်စွာဆုပ်လိုက်၏။

မိသားစုဝင်များ တစ်ယောက်ပြီးတစ်ယောက် ခွဲခွါသွားရပြီး မရေမတွက်နိုင်သော ကျင့်ကြံသူများသည် ၎င်းတို့၏သူငယ်ချင်းများနှင့် ဆွေမျိုးများက ပျက်ဆီးခြင်းနတ်ဆိုးများအဖြစ်သို့ ပြောင်းလဲသွားခြင်းကို ကြည့်ရှုရန် အတင်းအကြပ် စေခိုင်းခံရကာ၊ အချို့မှာ ကိုယ်တိုင်ပင် ရှင်းလင်းခဲ့ရသည်။

ခင်ပွန်းသည်သည် ဇနီးသည်ကိုကာကွယ်ရာတွင် ပျက်ဆီးခြင်းနတ်ဆိုးကြောင့် ထိခိုက်ဒဏ်ရာရခဲ့ပြီး ပျက်ဆီးခြင်းနတ်ဆိုးမဖြစ်စေရန်နှင့် ဇနီးဖြစ်သူကိုမထိခိုက်စေရန်အတွက် တောထဲသို့ ပြေးဝင်ခဲ့သည်။ မြင်ကွင်းတစ်ခုပြီးတစ်ခုကြောင့် ရီဖန်၏ သံမဏိနှလုံးသားပင်လျှင် မနေနိုင်တော့ဘဲတုန်လှုပ်သွားခဲ့သည်။

ရီဖန်သည် သူတော်စင်မဟုတ်သောကြောင့်၊ သူသည် ရီမိသားစုမှလူများကိုသာ ဂရုစိုက်ခဲ့သည်။ သို့သော်လည်း ဤလူများသည် ရီမိသားစု၏လက်အောက်ခံများဖြစ်သည်။ ရီမိသားစု၏ မိသားစုအကြီးအကဲအနေဖြင့် ရီဖန်သည် ၎င်းတို့ကို ကာကွယ်ရန်တာဝန်ရှိ၏။

မသိလိုက်စွာဖြင့် မဟာကမ္ဘာတစ်ထောင် နှစ်ခုသည် ရီမိသားစု၏ နယ်မြေဖြစ်လာနေပြီဖြစ်သည်။ ဤ မဟာကမ္ဘာတစ်ထောင်နှစ်ခုအတွင်း မွေးကင်းစမှသေဆုံးသည်အထိ နေထိုင်ကြသောသူများသည်လည်း ရီမိသားစုနှင့် နီးကပ်စွာ ဆက်နွယ်နေသည်။ ရီဖန်သည် ရှားရှားပါးပါး ဒေါသအလွန်ထွကိနေသော်လည်း မဖြေဖျောက်နိုင်ရှာချေ။ နာကျင်မှုအချို့ရှိသော်လည်း မည်သို့ဖြေရှင်းရမည်ကို မသိသေးပေ။

‘ပျက်ဆီးခြင်း ဂိုဏ်း? မင်းတို့ကောင်တွေ ငါ ရီဖန်ကို လာရှုပ်မိတာပဲကွ!’

…………….

အခန်း ၂၈၅ - ရီမိသားစု၏ ထူးခြားချက်များ

ရီဖန်သည် သူ့ဒေါသကြောင့် ရောင်ဝါကို အမှတ်မထင် ထုတ်လွှတ်မိခဲ့သည်။ သို့သော် ထိုရောင်ဝါကြောင့် ရီမိသားစု၏ကျင့်ကြံသူများသည် ကြောက်မက်ဖွယ်ရန်သူနှင့် ရင်ဆိုင်ရသကဲ့သို့ သတိရှိသွား၏။ သို့သော် သူတို့သည် ဤရောင်ဝါကို အလွန်ရင်းနှီးကြောင်း လျင်မြန်စွာခံစားလိုက်ရသည်။ ၎င်းမှာ ရီဖန်၏ရောင်ဝါပင်။

ထို့အပြင် ရီဖန်၏ရောင်ဝါသည် အောင်မြင်ရရှိပြီးနောက် ယခင်ကထက်ပိုမိုအားကောင်းလာသည်။

ရီဖန်၏အောင်မြင်မှုကြောင့် လူတိုင်း၏မျက်နှာပေါ်တွင် အပြုံးများပေါ်လာသည်။ ရီဖန်သည် ရီမိသားစု၏ ကျောရိုးဖြစ်သောကြောင့် ရီဖန်က ပိုသန်မာလေလေ သူတို့ပိုသက်တောင့်သက်သာခံစားရလေဖြစ်၏။

ယခုအခါ ရီဖန်သည် တစ်ကိုယ်တည်းကျင့်ကြံရာမှ ပြန်ထွက်လာပြီဖြစ်သောကြောင့် မည်သည့်ပြဿနာမှ ရှိတော့ပုံမပေါ်ပေ။ ၎င်းတို့သည် ရီဖန်အပေါ်တွင် အကြွင်းမဲ့ယုံကြည်မှုရှိသည်။ စကားတချို့ဖလှယ်ပြီးနောက် ရီဖန်သည် လက်ရှိအခြေအနေကို ပိုမိုနားလည်လာခဲ့သည်။

ချန်မင်နယ်မြေရှိ အဖြစ်အပျက်များသည် အခြားကမ္ဘာများထက် ပိုမိုပြင်းထန်သောကြောင့် အချို့လူများက ချန်မင်နယ်မြေနှင့် ရီမိသားစုကို ပစ်မှတ်ထားနေကြသည်မှာ ထင်ရှားသည်။ ပျက်ဆီးခြင်းနတ်ဆိုးကိစ္စဖြေရှင်းရန်အတွက် နောက်ကွယ်ကသူများကို ဦးစွာဖော်ထုတ်ရမည်။

ရီဖန်သည် ရီမိသားစုနှင့်အတူ ဆက်မနေခဲ့ပေ။ ထိုအစား သူသည် သက်ရှည်ဂိုဏ်းမှ စွမ်းအားရှင်များနှင့်၊ သူ့မိသားစုကိုကူညီရန် ရောက်လာသော အရွက်တစ်ထောင်ဆေးခန်းမှ စွမ်းအားရှင်များကို ကိုယ်တိုင်ကိုယ်ကျဦးဆောင်ကာ ချန်မင်နယ်မြေသို့ ရောက်ရှိလာခဲ့သည်။

ရီဖန်၏ပေါ်ထွက်လာမှုကြောင့် စိုးရိမ်စိတ်များဖြင့် ပြည့်နှက်နေသော တာ့ယွီအင်မော်တယ်မင်းဆက်၏ကျင့်ကြံသူများသည် ချက်ချင်းပင် ပြန်လည်ယုံကြည်မှုရှိလာကြသည်။ ဤနေရာတွင် ရီဖန်နှင့်အတူ တာ့ယွီအင်မော်တယ်မင်းဆက်အတွက် တန်ပြန်တိုက်စစ်ကို စတင်ရန်အချိန်တန်ပြီဖြစ်သည်။

“ကယ်ပေးပါ!”

ရီဖန်ရှေ့မှ ဗီဇပြောင်းနေသော ကျင့်ကြံသူတစ်ဦးက ရီဖန်ကို အဆက်မပြတ်တောင်းဆိုခဲ့သည်။ ရီဖန်သည် သူ့လက်ကို ဆန့်ထုတ်လိုက်ကာ တစ်ဖက်လူ၏ပခုံးပေါ် ညင်သာစွာတင်လိုက်သည်။ အနက်ရောင် ပျက်ဆီးခြင်းနတ်ဆိုးချီက ရီဖန်၏လက်တစ်လျှောက် ရွေ့လျားနေကာသူ့ခန္ဓာကိုယ်ထဲသို့ စိမ့်ဝင်နေသော သက်ရှိသတ္တဝါကဲ့သို့ပင်။

ရီဖန်သည် မခုခံဘဲ ပျက်ဆီးခြင်းနတ်ဆိုးချီကို သူ့ခန္ဓာကိုယ်ထဲသို့ ဝင်ခွင့်ပြုလိုက်သည်။ ထို့နောက် ပျက်ဆီးခြင်းနတ်ဆိုးချီဆိုသည့်အရာကို သူစတင်ခံစားလိုက်ရသည်။ ပျက်ဆီးခြင်းနတ်ဆိုးချီက သူ့ခန္ဓာကိုယ်ထဲသို့ ဝင်ရောက်လာသောအခါ ရီဖန်သည် ၎င်းနှင့်ရင်းနှီးနေသည်ဟုခံစားရသောကြောင့် အံ့ဩသွားခဲ့သည်။

ပျက်ဆီးခြင်းနတ်ဆိုးချီဟုခေါ်သော စွမ်းအားအများစုသည် ရီဖန်၏ခန္ဓာကိုယ်အတွင်းရှိ ပျက်ဆီးခြင်းစွမ်းအားနှင့် တူညီသည်။ ပျက်ဆီးခြင်းစွမ်းအား၏ အထင်ရှားဆုံးသော လက္ခဏာမှာ ၎င်း၏အသွင်ကူးပြောင်းခြင်းဖြစ်သည်။ နတ်ဆိုးချီနှင့်တွဲလျက် ၎င်းကို ဗီဇပြောင်းခြင်းဟုလည်းခေါ်၏။

ပျက်ဆီးခြင်းပုလဲကို ပိုင်ဆိုင်သော ရီဖန်သည် ပျက်ဆီးခြင်းတာအိုကို ကျွမ်းကျင်နေပြီဖြစ်သည်။ သူ၏ ပျက်ဆီးခြင်းစွမ်းအားကို ထိန်းချုပ်မှုကို တာအိုဘိုးဘေးများပင် မယှဉ်နိုင်ကြချေ။ ထို စွမ်းအားက အလွန်ရှားသည်။ ၎င်းတို့နှင့် ရင်းနှီးရန်မဆိုထားနှင့် ထိကိုင်နိုင်ရန်ပင် အခွင့်အလမ်းနည်းပါး၏။

၎င်းသည် ပျက်ဆီးခြင်းစွမ်းအားဖြစ်ပါက ရီဖန် ဖြေရှင်းရန်အတွက် ပိုလွယ်လိမ့်မည်။ ရီဖန်သည် သူ၏ပျက်ဆီးခြင်းစွမ်းအားကို အသက်သွင်းလိုက်ကာ ချက်ချင်းပင် ထိုစွမ်းအားများကိုစုပ်ယူလိုက်သည်။

နောက်ဆုံးတွင် သူသည် ကျင့်ကြံသူ၏ ခန္ဓာကိုယ်မှ နတ်ဆိုးချီကို ရှင်းလင်းနိုင်ခဲ့၏။

ထို့နောက်တွင် ဗီဇပြောင်းလုနီးဖြစ်နေသည့် ကျင့်ကြံသူမှာ ချက်ချင်းပြန်ကောင်းလာခဲ့သည်။ အားနည်းနေသည်မှလွဲ၍ အခြားပြဿနာများမရှိခဲ့ချေ။ စောင့်ကြည့်နေသော တာ့ယွီအင်မော်တယ်မင်းဆက်မှ ကျင့်ကြံသူများသည် မျက်လုံးများကို ပြူးကျယ်စွာဖွင့်ထားကြ၏။

ပျက်ဆီးခြင်း ဗီဇ-ပြောင်းလဲခြင်းကိုကုသခြင်းက မည်သည့်အချိန်မှစ၍ ဤမျှလွယ်ကူသွားရသနည်း။

သို့သော် ၎င်းက ရီဖန်ဖြစ်ကြောင်း သတိရသွားသောအခါ မထူးဆန်းတော့ကြောင်း ရုတ်တရက်ခံစားလိုက်ရသည်။

“တခြားသူတွေကို ခေါ်ခဲ့လိုုက်ပါ”

ယခုတွင် ဗီဇပြောင်းလဲခြင်းနည်းလမ်းကို ရှာတွေ့ခဲ့ပြီးဖြစ်သောကြောင့် အခြားလိုအပ်သည့်အရာမှာ အချိန်အနည်းငယ်သာဖြစ်၏။ ရီဖန်သည် ဦးစွာ တာ့ယွီအင်မော်တယ်မင်းဆက်၏ ဗီဇပြောင်းကျင့်ကြံသူများကို ဖြေရှင်းပြီးနောက်၊ အခြားသူများအတွက် နောက်ထပ်ဖြေရှင်းနည်းကို ရှာရမည်ဖြစ်သည်။

ရီဖန်က နတ်ဆိုးချီကို လျင်မြန်စွာတွန်းလှန်နိုင်သော်လည်း ဗီဇပြောင်း ကျင့်ကြံသူအရေအတွက်မှာ အလွန်များပြားခဲ့သည်။ ရီဖန်တစ်ယောက်တည်း လုပ်မည်ဆိုပါက နှစ်ပေါင်းထောင်ချီကြာလျှင်ပင် မလုံလောက်နိုင်ချေ။

ထို့ကြောင့် အစုလိုက်တစ်ခါတည်းထုတ်ပစ်ပြီး ဖြေရှင်းနိုင်မည့် နည်းလမ်းရှာရမည်။ နောက်တစ်ကြိမ်တွင် ရီဖန်သည် ကျင့်ကြံသူများ၏ နတ်ဆိုးချီကိုဖယ်ရှားနေချိန်အတွင်း ဖြေရှင်းနည်းကို ဖြည်းညှင်းစွာရှာဖွေခဲ့သည်။ တစ်ချိန်တည်းတွင် သူသည် ဤဖြစ်ရပ်နောက်ကွယ်မှတရားခံကို ရှာဖွေရန်လည်း မမေ့ခဲ့ပေ။

နောက်ကွယ်ကတရားခံကိုမရှာနိုင်လျှင် သူမည်မျှလျင်မြန်စွာ ကိုင်တွယ်နိုင်စေကာမူ ရီဖန်သည် ကျင့်ကြံသူအားလုံး၏ ဗီဇပြောင်းလဲခြင်းကို အပြီးတိုင် ဖြေရှင်းနိုင်မည်မဟုတ်ချေ။ ကျင့်ကြံသူများကို တစ်ဦးပြီးတစ်ဦး သန့်စင်ပြီးနောက် ပုံမှန်အခြေအနေသို့ ပြန်လည်ရောက်ရှိသွားကြသည်။

ရီဖန်၏ ပျက်ဆီးခြင်းနတ်ဆိုးချီကို ဖယ်ရှားနိုင်သည့်သတင်းက ချန်မင်နယ်မြေ၏ အဓိကအင်အားစုများကြားတွင် လျင်မြန်စွာ ပျံ့နှံ့သွားသည်။ ထိုသတင်းကိုကြားသောအခါ ကျင့်ကြံသူတော်တော်များများက အလွန်ဝမ်းသာကြ၏။ အဖြေရှိနေသရွေ့ အရာအားလုံးကို ကုသပေးနိုင်လိမ့်မည်။

ပျက်ဆီးခြင်းနတ်ဆိုးများကိုဖိနှိပ်ထားရသည့် တိုက်ပွဲဝင်ကျင့်ကြံသူများပင်လျှင် စိတ်သက်သာရရသွားကြ၏။ ပျက်ဆီးခြင်းနတ်ဆိုးများကို ဖိနှိပ်ထားရာတွင် သူတို့အကြောက်ဆုံးအရာမှာ ကူးစက်ခံရခြင်းဖြစ်၏။ ယခုအခါ ကူးစက်မှုအတွက် စိုးရိမ်စရာမလိုတော့ဘဲ ပျက်ဆီးခြင်းနတ်ဆိုးများကို နှိမ်နင်းရန်အတွက် ၎င်းတို့၏ လှုံ့ဆော်မှုသည် ပို၍ပင် အားကောင်းလာကြသည်။

၎င်းတို့လုပ်စရာရှိသည်ကို ဆက်လုပ်ရန်သာလိုတော့၏။ တဖြည်းဖြည်းနှင့် တာ့ယွီအင်မော်တယ်မင်းဆက်သည် ဖိနှိပ်ခံထားရရာမှ ဦးမော့ပြီး တန်ပြန်တိုက်ခိုက်လာနိုင်သည်။

ပျက်ဆီးခြင်းသားရဲများ သိမ်းယူသောကြောင့် ကျဉ်းမြောင်းသွားသော နယ်မြေများကို ပြန်လည်ချဲ့ထွင်လာနိုင်သည်။ ယခင်က တင်းမာသောလေထုသည်လည်း တဖြည်းဖြည်း တည်ငြိမ်လာ၏။

တာ့ယွီမြို့တော်၏ မြောက်ပိုင်းစစ်တပ်စခန်းအတွင်းတွင် ထိုနေရာကို ကုသရေးနယ်မြေအဖြစ် လုံးဝပြောင်းလဲခဲ့သည်။ ကူးစက်ခံထားရသောကျင့်ကြံသူများကို ရီဖန်ထံမှကုသမှုခံယူရန်အတွက် ထိုနေရာသို့ ခေါ်ဆောင်လာကြသည်။ ရီဖန်၏ လက်ရှိအင်အားဖြင့်ပင် ပင်ပန်းနွမ်းနယ်မှုကို ခံစားနေရ၏။

ဤကာလအတွင်း ကူးစက်ခံရသောကျင့်ကြံသူများကို ဆက်တိုက်ခေါ်ဆောင်လာသောကြောင့် ရီဖန်ကိုယ်တိုင်ပင် သူကုသပေးခဲ့သောကျင့်ကြံသူ မည်မျှရှိသည်ကို မေ့သွားသော်လည်း အရေအတွက်မှာ တစ်သန်းကျော်သွားခဲ့ပြီဖြစ်သည်။ ကိန်းဂဏန်းသည် အလွန်ကြီးမားပုံရသော်လည်း ကူးစက်ခံရသူအရေအတွက်နှင့် နှိုင်းယှဉ်ပါက နည်းနေသေးသည်။

“ဒီလိုဆက်သွားလို့မရဘူး။ ဒီနည်းလမ်းနဲ့ ငါကိုယ်တိုင် သေသွားရင်တောင် လူတိုင်းကို ကုပေးနိုင်မှာ မဟုတ်ဘူး။”

ရီဖန်သည် လက်လျှော့ရန် ရည်ရွယ်ချက်မရှိသော်လည်း ပိုမိုသင့်လျော်သော ကုသမှုနည်းလမ်းတစ်ခုရှိရမည်ဖြစ်ကြောင်း သူသိ၏။ ချန်မင်နယ်မြေ၏ကျင့်ကြံသူများ ကူးစက်ခံထားရရုံသာမက၊ အခြားကမ္ဘာများမှ သတ္တဝါများလည်း ကူးစက်ခံထားရနိုင်ကာ ၎င်းတို့အရေအတွက်သည် လူသားမျိုးနွယ်ထက်ပင် ပိုများနိုင်သည်။