နဂါးနှင့် ဖီးနစ်ကြားက ပဋိပက္ခ

နတ်မိမယ်တုံ့လိုင်သည် ထိုအကြောင်းကို လူအများရှေ့၌ ထပ်ပြောလိုသည့် ဆန္ဒမရှိသည်ကို မြင်သည့်အခါ မည်သူကမှ သူမကို ဆက်၍ ဖိအားမပေးတော့ပေ။ သူတို့သည် ဝမ်တု ထိပ်သီးအင်အားစုများမှ ဖြစ်သော်လည်း တုံ့လိုင်နတ်ဘုရားအကြီးအကဲ၏ မျိုးဆက်ဟူသော နတ်မိမယ်တုံ့လိုင် အဆင့်အတန်းက သူတို့နှင့် ယှဥ်လျှင် အတော်လေး မြင့်မားပေသည်။ တုံ့လိုင်နတ်ဘုရားအကြီးအကဲ ကျဆုံးသွားပြီးနောက် သူမ၏ ကံတရားက ပြောင်းလဲသွားလျှင်ပင် သူတို့၏ ဂုဏ်သတင်းက ဆက်လက်တည်တံ့နေရာ ထိုအင်အားစုများမှ အရှင်သခင်များက သူမကို တွေ့သည့်အခါ အရိုအသေပေးကြရမည်သာ ဖြစ်သည်။

ထိုပြင် ဤနေရာသည် ဝမ်ရှန့်စောင့်ကြည့်မျှော်စင်အပြင်ဘက်တွင် ဖြစ်သည်။  တုံ့လိုင်နတ်ဘုရားအကြီးအကဲနှင့် ဆေးအင်ပါယာကြားမှ ဆက်ဆံရေးက အလွန်ကောင်းသည်ကို လူတိုင်း သိကြပေသည်။

လူတိုင်း၏ အာရုံက ဝင်္ကပါအတွင်းရှိ တိုက်ပွဲကွင်းပြင်မှ ဆံပင်အဖြူနှင့် အမျိုးသားထံ စူးစိုက်နေခဲ့ကြသည်။ ကြည့်ရသည်မှာ တုံ့လိုင်နတ်မိမယ်က ရီဖူရှင်းအား ဝမ်ရှန့်စောင့်ကြည့်မျှော်စင်တွင် ကျင့်ကြံရန်တမင်သက်သက် ခေါ်ဆောင်လာခြင်း ဖြစ်ပေလိမ့်မည်။ ထို့ပြင် ရီဖူရှင်းသည် ဆေးအင်ပါယာ၏ အမွေအနှစ်ကိုလည်း ဆက်ခံရရှိနိုင်ပေသည်။ တုံ့လိုင်နတ်ဘုရားအကြီးအကဲနှင့် ရီဖူရှင်းကြားမှ ပတ်သတ်မှုအပြင် သူ၏ ခွန်အားသည်လည်း အံ့မခန်း အစွမ်းထက်လှသည်။

သူသည် တိုက်ပွဲတစ်ခုတစ်လေကို မရှုံးနိမ့်ခဲ့ရုံမျှမက အဆင့်ခုနစ်ရန်ဟောင် ပြိုင်ဘက်တစ်ယောက်ကိုပင် ရှုံးနိမ့်စေခဲ့သည်။

ရီဖူရှင်း၏ အကောင်းဆုံးပြိုင်ဘက်မှာ ရှေးဟောင်းတော်ဝင် ယန်မိသားစုမှ ပြိုင်ဘက်ကင်း မင်းသား ယန်တုန်းရန်သာ ဖြစ်နိုင်ပေသည်။

ယန်ထန်း တိုက်ပွဲ၌ ရှုံးနိမ့်သွားပြီးနောက် ရီဖူရှင်း၏ ဘေးမှ ဖီးနစ်နတ်မိမယ်ကို လူအနည်းငယ်ကသာ ယှဥ်နိုင်မည်ဖြစ်ကြောင်း သတိပြုမိကြပေသည်။ ယန်ထန်းသည် ရှေးဟောင်းတော်ဝင် ယန်မိသားစုမှ အလယ်အလတ် အထွတ်အထိပ်တန်ခိုးရှင် ဖြစ်ပြီး အလွန် အားကောင်းသော ခုခံကာကွယ်ခြင်းနှင့် တိုက်ခိုက်မှုစွမ်းအားကို ပိုင်ဆိုင်ထားသည်။ သူပင်လျှင် ဖီးနစ်၏ ရိုက်နှက်ခြင်းကို ခံရလျှင် အခြားသူများထံ၌ ခံနိုင်ရည် ရှိလိမ့်မည် မဟုတ်ပေ။

ထိုအချိန်၌ ယန်တုန်းရန်က ရှေ့သို့ လျှောက်လာခဲ့သည်။ ဝမ်ရှန့်စောင့်ကြည့်မျှော်စင်မှ တန်ခိုးရှင်အချို့က သူ့ကို ရပ်တန့်ချင်သော်လည်း သူတို့သည် သူတို့အား ဟန့်တားရန် ယန်တုန်းရန်ဘေး၌ အစွမ်းထက် ရန်ဟောင်နှစ်ပါး လိုက်ပါလာသည်ကို မြင်လိုက်ရသည်။

"ငါနဲ့ထားခဲ့လိုက်။" ယန်တုန်းရန်က လက်ကို ဝှေ့ယမ်းလိုက်လျှင် ရုတ်တရက် ထိုလူများက နောက်ဆုတ်သွားခဲ့ပြီး ယန်တုန်းရန်တစ်ယောက်တည်း ထားရစ်ခဲ့ပေသည်။ သူက ရှေ့သို့ တစ်ယောက်တည်း ဆက်သွားခဲ့သည်။

နှိုင်းယှဥ်မရအောင် ခမ်းနားထည်ဝါသည့် မဟာလမ်းစဥ်အရှိန်အဟုန်တို့ ပေါက်ကွဲထွက်လာပြီး လေဟာနယ်အတွင်း အစွမ်းထက်ဖိအားများ ပြည့်နှက်လာသည်။ ဝင်္ကပါ၏ လေဟာနယ်အတွင်းမှ ဖိအားတို့ကို တန်ခိုးရှင်တိုင်း ခံစားမိကြပေသည်။ လူတိုင်းသည် ယန်တုန်းရန်၏ မဟာလမ်းစဥ်သီးခြားနယ်မြေအတွင်း ရောက်သွားသည်ဟု ခံစားလိုက်ကြရပေသည်။

"နောက်ဆုတ်" ဝမ်ရှန့်စောင့်ကြည့်မျှော်စင်မှ အဆင့်မြင့်ရန်ဟောင်တစ်ပါးက လက်ကို ဝှေ့ယမ်းလိုက်သည်။ ရုတ်တရက် ရှေ့သို့ လှမ်းလာနေသော တန်ခိုးရှင်များက နောက်ပြန်ဆုတ်ကာ သူတို့၏ နေရာကို လက်လျှော့လိုက်သည်။ သူတို့သည် ယန်တုန်းရန်ကို ရှုံးနိမ့်စေရန်မှာ အလွန် ခက်ခဲကြောင်း သိရှိကြပေသည်။ အဆင့်မြင့်ရန်ဟောင်တစ်ပါးဝင်ပါရန် မသင့်တော်သော်လည်း အဆင့်ခုနစ်တန်ခိုးရှင် လှုပ်ရှားလာလျှင်ပင် အနိုင်ရရန် မကျိန်းသေပေ။

သည်လူက ရှေးဟောင်းတော်ဝင် ယန်မိသားစု၏ တိုက်ရိုက်မျိုးဆက် ဖြစ်သည်။ ဤတစ်ကြိမ်၌ သူ၏ ဦးဆောင်မှုအောက်မှ မြောက်ပိုင်းနယ်မြေ ရန်ဟောင်စစ်တပ်တစ်တပ် ခေါ်ဆောင်လာခဲ့သည်။ ထိုဂုဏ်သရေရှိ ရာထူးက သူ၏ အဆင့်အတန်းကို အတည်ပြုပေးထားကာ သူ၏ အစွမ်းထက်လှသော တိုက်ပွဲစွမ်းရည်က မေးခွန်းထုတ်စရာမလိုလောက်အောင်ပင် ဖြစ်လေသည်။

ထို့ပြင် ဝမ်ရှန့်စောင့်ကြည့်မျှော်စင်မှ လူတိုင်း သတိပြုမိသည်မှာ ထိုတိုက်ပွဲက သူတို့နှင့် မသက်ဆိုင်ဘဲ ရီဖူရှင်းနှင့်သာ အရာအားလုံးသက်ဆိုင်နေကြောင်းကိုပင် ဖြစ်လေသည်။

ယခု စီဖုန်း၏ အဆင့်အတန်းက ပေါ်ထွက်လာပြီဖြစ်ရာ လူတိုင်းသည် ရီဖူရှင်း၏ ဇာစ်မြစ်ကို ခန့်မှန်းနေကြသော်လည်း ရှေးဟောင်းတော်ဝင် ယန်မိသားစုနှင့် အရှေ့နတ်ဘုရားကျွန်းစုနယ်မြေကြားမှ ဆက်ဆံရေးက မည်သည်နည်း။ သူတို့က ကမ္ဘာ့ရန်များဖြစ်ကြောင်း လူတိုင်း သိကြပေသည်။

အရှေ့နတ်ဘုရားကျွန်းစုနယ်မြေသည် ရီဖူရှင်းကို ဝမ်ရှန့်စောင့်ကြည့်မျှော်စင်၌ ကျင့်ကြံရန် စေလွှတ်ခဲ့ကတည်းက သူနှင့် ယန်တုန်းရန်တို့က ပြိုင်ဘက်ဖြစ်ရန် ကြမ္မာဖန်လာခဲ့ပြီး ဖြစ်သည်။ ယခု သူတို့က ဝမ်ရှန့်စောင့်ကြည့်မျှော်စင် ဝင်္ကပါအတွင်း တွေ့ဆုံခဲ့ရာ သူတို့ တိုက်ပွဲတစ်ပွဲ ဆင်နွှဲသင့်ပေသည်။

သူတို့နှစ်ယောက်လုံးသည် အနိုင်တိုက်၍ မရနိုင်သော သူများဖြစ်ပြီး တိုက်ပွဲတစ်ပွဲမျှ မရှုံးနိမ့်ခဲ့ပေ။

ထို့ကြောင့် သူတို့က ယန်တုန်းရန် ရှေ့သို့တက်လာသည်ကို မြင်သည့်အခါ ဝမ်ရှန့်စောင့်ကြည့်မျှော်စင်မှ တန်ခိုးရှင်များက နောက်သို့ ဆုတ်ခွာ၍ ယန်တုန်းရန်နှင့် ရီဖူရှင်း တိုက်ခိုက်နိုင်ရန် နေရာပေးလိုက်ကြသည်။ ၎င်းသည် သူတို့နှစ်ယောက်ကြားမှ တိုက်ပွဲတစ်ခု ဖြစ်လေသည်။

ယန်တုန်းရန်က ရှေ့သို့ ဆက်လက်တိုးလာနေပြီး မကြာခင် ရီဖူရှင်းနှင့် မျက်နှာချင်းဆိုင်သို့ ရောက်လာခဲ့သည်။ သူတို့က ဝေးကွာနေဆဲ ဖြစ်သော်လည်း ထိုမျှအကွာအဝေးက သူတို့အဆင့်မှ တန်ခိုးရှင်များအတွက် မပြောပလောက်ပေ။

"ရီလျှို့နျန်" ယန်တုန်းရန်က ရီဖူရှင်းကို ခေါ်လိုက်သည်။ သူက ရီဖူရှင်း၏ တည်ရှိမှုကို သိနေသည်။ သူက သိရုံမျှမက သူနှင့်လည်း အတော်လေး ရင်းနှီးပေသည်။

ရီဖူရှင်းကလည်း ထိုအဖြစ်နှင့် ပတ်သတ်ပြီး မအံ့သြချေ။ သူ၏ တည်ရှိမှုက လျှို့ဝှက်ချက်ကြီး မဟုတ်ခဲ့ပေ။ ထို့ကြောင့် ရှေးဟောင်းတော်ဝင် ယန်မိသားစုက သူ့အား သိရှိနေခြင်းမှာ အံ့သြစရာမရှိပါချေ။

သို့သော် သူ့ကို ယန်တုန်းရန်၏ ကမ္ဘာ့ရန်ဟု သတ်မှတ်၍ မရနိုင်ပေ။ ယန်တုန်းရန်က ရှေးဟောင်းတော်ဝင် ယန်မိသားစုမှ မျိုးဆက်ဖြစ်သော်လည်း ရီဖူရှင်းသည် ထိုအဆင့်ရှိသော တန်ခိုးရှင်များစွာကို မူလဘုံ၌ တွေ့မြင်ခဲ့ဖူးပေသည်။ သူတို့ထဲက အချို့မှာ ထူးခြားလှသော တည်ရှိမှုများ ဖြစ်ကြသည်။ သူသည် မှော်နက်စစ်တပ်ကဲ့သို့သော အင်အားစုမျိုးကိုပင် တွေ့ကြုံခဲ့ဖူးရာ သူ၏ အတွေ့အကြုံများအရ ရှေးဟောင်းတော်ဝင် ယန်မိသားစုမှ တန်ခိုးရှင်သည်လည်း မည်သို့မှ ပို၍ ထူးခြားလိမ့်မည် မဟုတ်ကြောင်း သိရှိပေသည်။

သူ မသိသည်မှာ မည်သူက သူ၏ ကမ္ဘာ့ရန်ဖြစ်မည်ကို ဖြစ်ကာ ကျိန်းသေသည်မှာ ယန်တုန်းရန်တော့ မဟုတ်ပေ။

အရှေ့နတ်ဘုရားကျွန်းစုနယ်မြေတွင် ကျင့်ကြံစဥ် သူသည် တုံ့လိုင်နတ်ဘုရားအကြီးအကဲ၏ ဆက်ခံသူဖြစ်လာသော်လည်း ၎င်းသည် ကောင်းကင်ဒေသသို့ လာရောက်ခြင်းမှ အတွေ့အကြုံတစ်စိတ်တစ်ပိုင်းသာ ဖြစ်သည်။ သူ၏ အမြင်အရ ကျင့်ကြံခြင်းခရီးတွင် အရာအားလုံးက စမ်းသပ်မှုသာ ဖြစ်သည့်အတွက်ကြောင့် ရှေးဟောင်းတော်ဝင် ယန်မိသားစုကို ရန်သူအဖြစ် အလေးအနက် မှတ်ယူရန် မလိုအပ်ပေ။

ထို့ကြောင့် သူက ယန်တုန်းရန်ကို အမုန်းတရားမရှိဘဲ တည်ငြိမ်မှုအပြည့်နှင့် စိတ်လက်ပေါ့ပါးစွာ စောင့်ကြည့်နေခဲ့သည်။ သူသည် အလေးအနက်မထားဘဲ အလွန် အေးဆေးဟန်ပေါ်သော်လည်း တည်ငြိမ်နေသည်။

ဆန့်ကျင်ဘက်အနေနှင့် စီဖုန်းက ပို၍ လှုံ့ဆော်ခံရပုံရသည်။ သူမ၏ မျက်လုံးများက အေးစက်နေပြီး မဟာလမ်းစဥ်နတ်မီးလျှံများက ထိုလှပသော မျက်လုံးများထဲတွင် လောင်ကျွမ်းနေသည်။

အရှင်ဖီးနစ်က ထိုတိုက်ပွဲတွင် ကျဆုံးခဲ့ပေသည်။

ဝှီး...

လေဟာနယ်အတွင်း လောင်ကျွမ်းနေသော လေစီးကြောင်းက အော်မြည်ကာ ကြမ်းတမ်းသော လေပွေကဲ့သို့ စီးဆင်းနေသည်။ မဟာလမ်းစဥ်နတ်မီးလျှံက ကောင်းကင်နှင့် မြေကြီးကြားတွင် လောင်ကျွမ်းနေကာ စီဖုန်းက အတောင်များကို တဖျတ်ဖျတ် ခတ်ကာ ယန်တုန်းရန်၏ အထက် ကောင်းကင်တွင် ပေါ်ပေါက်လာ၏။ သူမက ကျယ်လောင်သော ဖီးနစ် အော်မြည်သံကို ပြုလုပ်လိုက်ကာ ကောင်းကင်အား ဖြတ်သန်း၍ ပဲ့တင်ထပ်လာသည်။ သူမက သူမ၏ သဏ္ဌာန်အမှန်ဖြစ်သော ကြီးမားသည့် နတ်ဖီးနစ်တစ်ကောင်အဖြစ် ပြောင်းလဲလိုက်သည်။ သူမ၏ မျက်လုံးများတွင် ရက်စက်ကြမ်းကြုတ်မှုတို့နှင့် ပြည့်နေပြီး လူသားသဏ္ဌာန်ဖြင့် ရှိနေစဥ်ကနှင့် ကွာခြားပေသည်။

ယန်တုန်းရန်က သူမကို ကြည့်လိုက်သည်။ ယန်တုန်းရန်၏ ခန္ဓာကိုယ်အတွင်းမှ အလွန် ပြင်းထန်သော အရှိန်အဝါတို့ ထုတ်လွှတ်လာပြီး အဆက်မပြတ် ထွက်ပေါ်လာသည့် နဂါးဟိန်းသံတို့က ကောင်းကင်ကိုပင် တုန်ခါသွားစေသည်။ မြင့်မြတ်သောနဂါးတစ်ကောင်က သူ၏ ခန္ဓာကိုယ်ကို ပို၍ မြင့်မားသော နေရာသို့ ရောက်အောင် ထောက်ပံ့ပေးနေသည်။

ထိုအချိန်တွင် နဂါးကြီး၏ မရေတွက်နိုင်သော ပုံရိပ်များက ကောင်းကင်တွင် ထွက်ပေါ်လာသည်။ အလယ်တွင် ယန်တုန်းရန်က နတ်နဂါးတို့၏ အရှင်သခင်ကဲ့သို့ ရွှေရောင်နဂါးကြီးတစ်ကောင်၏ ကျောပေါ်တွင် ရပ်နေခဲ့သည်။ ထိုပုံရိပ်က အံ့မခန်းပင်ဖြစ်သည်။

လောင်ကျွမ်းနေသောလေထုက အော်မြည်နေကာ နတ်မီးလျှံသည် ယန်တုန်းရန်ဆီသို့ တဟုန်ထိုး ပြေးဝင်လာခဲ့သည်။ အဆုံးအစမဲ့ပြီး ကြီးမားလှသော ဖီးနစ်က အလွန် လွှမ်းမိုးနိုင်လှသည်။ မဟာလမ်းစဥ်နတ်မီးလျှံတို့က လေဟာနယ်အတွင်း လောင်ကျွမ်းနေပြီး သူမ၏ ထက်ရှသော လက်သည်းများက မဟာလမ်းစဥ်ကို အပိုင်းပိုင်းဖျက်ဆီးခံရပေသည်။

ဟိန်းဟောက်သံ...

ထိုအခိုက်အတန့်တွင် စီဖုန်းက လှုပ်ရှားလိုက်ပြီး ထောင်ချီသော နဂါးများက တစ်ချိန်တည်း လှုပ်ရှားကာ နေနဂါးတေးသံကို ထုတ်လွှတ်လာသည်။ ကောင်းကင်ထက်တွင် ထောင်ချီသော နဂါးပုံရိပ်များက တစ်ချိန်တည်းတွင် ဒေါသတကြီး ဟိန်းဟောက်လာပြီး အမြင်အာရုံကို ဖမ်းစားနိုင်သော မြင်ကွင်းတစ်ခု ဖန်တီးလာသည်။ မဟာလမ်းစဥ်၏ ကြောက်မက်ဖွယ် အသံလှိုင်းများက လေဟာနယ်ကိုပင် ပြိုကျသွားစေခဲ့သည်။ ဝင်္ကပါအတွင်းရှိ လူအများသည် သူတို့ ခန္ဓာကိုယ်အတွင်းရှိ သွေးများ ဆူပွက်လာကာ စိတ်ဝိညာဥ်သည်လည်း ပြင်းထန်စွာ တုန်လှုပ်လာသည်ကို ခံစားမိကြပေသည်။ ကျင့်ကြံခြင်း၌ သိပ်အားမကောင်းသော သူများက သွေးတို့ အန်ထုတ်လိုက်ရပြီး မျက်နှာများက ဖြူဖျော့လာပေသည်။ သူတို့သည် ထိုမျှ ပြင်းထန်လှသည့် အစွမ်းထက်တိုက်ပွဲကို ကြည့်ရန် မဝံ့ရဲကြတော့ပေ။ မမြင်ရသော အသံလှိုင်းများက သူတို့ကို အဆက်မပြတ်ရိုက်ခတ်နေပြီး အဆုံးမဲ့လေဟာနယ်ကို လွှမ်းခြုံထားသည်။

ကြည့်ရှုနေသူများပင် ထိုသို့သော ဒုက္ခကို ခံစားနေရလျှင် ထိုအသံလှိုင်းတိုက်ခိုက်မှုအား ခံနေရသည့် စီဖုန်းမှာ မည်မျှ ထိခိုက်မည်ကို မှန်းဆ၍မရနိုင်အောင် ဖြစ်ပေသည်။ မဟာလမ်းစဥ်နတ်မီးလျှံများက ထိုအသံများဖြင့် ငြှိမ်းသတ်ခြင်းကို ခံလိုက်ရပြီး ဖီးနစ်၏ ကြီးမားသော ခန္ဓာကိုယ်မှာ မမြင်နိုင်သည့် မုန်တိုင်းတစ်ခုဖြင့် တားဆီးထားခြင်းအား ခံနေရပေသည်။ ထိုအချိန်တွင် စီဖုန်းသည် ယင်းတိုက်ခိုက်မှုအား သူမ၏ အမွေးအတောင်တစ်ခုချင်းစီမှနေ၍ ခံစားမိပေသည်။

သူမက ခေါင်းကို မော့ကာ ဟစ်ကြွေးလိုက်ပြီး နဂါး၏တေးသံကို ဖျက်ဆီးပစ်နိုင်လောက်အောင် ကျယ်လောင်သော ဖီးနစ်အော်မြည်သံကို ထုတ်လွှတ်လိုက်သည်။ နဂါးနှင့်ဖီးနစ်တို့၏ အော်မြည်သံတို့က သဟဇာတမဖြစ်ဘဲ ရုန်းကန်လှုပ်ရှားခြင်းကို ဖြစ်ပေါ်စေသည်။ ဖီးနစ်သည် ရှေ့သို့ ဆက်လက်ချီတက်သွားကာ ယန်တုန်းရန်ကို တိုက်ခိုက်ရန် ဦးတည်လိုက်သည်။

၎င်းကို မြင်သည့်အခါ ရီဖူရှင်းသည် စီဖုန်း ရှုံးနိမ့်တော့မည်ကို သိလိုက်ပေသည်။

နှစ်ဖက်လုံးက တူညီသော အဆင့်တွင် ရှိနေကြပြီး စီဖုန်းက မဟာလမ်းစဥ်၏ ပြီးပြည့်စုံသော စိတ်ဝိညာဥ်ကို ပိုင်ဆိုင်ထားသကဲ့သို့ ယန်တုန်းရန်သည်လည်း ပြီးပြည့်စုံသော နတ်ဝင်ရိုးကို ပိုင်ဆိုင်ထားပေသည်။ သူ၏ အသံလှိုင်းတိုက်ခိုက်မှုက တိုက်ခိုက်မှုအမျိုးအစားများစွာကို ထိန်းချုပ်ထားနိုင်ပေသည်။ မမြင်ရသော မဟာလမ်းစဥ်စွမ်းအားသည် အလွန် အစွမ်းထက်ပြီး အဓိကတိုက်ခိုက်မှုကို မထုတ်ဖော်လျှင်ပင် ၎င်း၏ စွမ်းအားက တိုက်ခိုက်မှုအား ထောက်ပံ့ပေးပြီး ပို၍ ထိခိုက်မှုကို ပေးစွမ်းပေသည်။

နေနဂါးတေးသံသည် နဂါးပေါင်းတစ်သောင်းခန့် တညီတညွတ်တည်း အော်ဟစ်မြည်တမ်းနေကြပြီး ယန်တုန်းရန်၏ တိုက်ခိုက်မှု ပထမလှိုင်း ဖြစ်လာခဲ့သည်။

သေချာသလောက်ပင် နောက်တခဏ၌ ရီဖူရှင်းက အစွမ်းထက်သော ဖိအားကို ခံစားမိပြီး ကျယ်ပြန့်သော လေဟာနယ်အား လွှမ်းခြုံထားကာ မမြင်နိုင်သော စွမ်းအား၏ ပြင်းထန်လေးလံသည့် ဖိနှိပ်မှုတို့ကို ခံစားလာရသည်ဟု ထင်မှတ်ရပေသည်။

"လေဟာနယ်မဟာလမ်းစဥ်" ရီဖူရှင်းသည် ထိုမဟာလမ်းစဥ်စွမ်းအားကို ခံစားမိသည့်အခါ စိတ်ထဲမှ တွေးလိုက်သည်။ နောက်တခဏတွင် နေနဂါးတေးသံမှ တိုက်ခိုက်မှု ထွက်ပေါ်လာကာ ယန်တုန်းရန်၏ ခန္ဓာကိုယ်က ရုတ်တရက် ထိုးဆင်းလာသည်။ ကောင်းကင်ထက်တွင် နတ်နဂါးတစ်ကောင်က အော်မြည်နေပြီး သူနှင့်အတူ ထောင်ချီသော နတ်နဂါးများလည်း ထိုးဆင်းလာပေသည်။ ထိုနဂါးပုံရိပ်တစ်ခုချင်းစီက စီဖုန်းအား တိုက်ခိုက်လိုက်သည်။ ၎င်းတို့က စီဖုန်း၏ အရှိန်အဟုန်ကို သက်ရောက်စေသည်။ ထို့နောက် ယန်တုန်းရန် ရောက်ရှိလာ၏။

လူအများက မော့ကြည့်လိုက်သည်။ ဤ တိုက်ပွဲက ယန်ထန်းနှင့်စီဖုန်းကြားမှ တိုက်ပွဲနှင့် တူညီပေသည်။ သို့သော်လည်း ယန်တုန်းရန်၏ တိုက်ခိုက်မှုက ပို၍ ပြင်းထန်လာသည်။

နဂါးနှင့် ဖီးနစ်တို့ ထိပ်တိုက် တွေ့ဆုံခဲ့သည့်အခါ လေဟာနယ် အတွင်း၌ ပြင်းထန်သော  အသံတစ်ခု ထွက်ပေါ်လာပြီး လူအများကို အသက်ရှူရ ခက်ခဲလာစေသော မွန်းကြပ်သည့် ဖိအားတို့ကို ခံစားမိကြပေသည်။

နောက်တခဏတွင် နဂါးနှင့် ဖီးနစ်တို့၏ အော်မြည်သံများက ထွက်ပေါ်လာပြီး ကောင်းကင်ကို လှုပ်ခတ်ကာ မြေပြင်ကို ကွဲအက်စေခဲ့သည်။ မဟာလမ်းစဥ်များက ပြိုကျသွားပြီး ပျက်စီးခြင်း အလင်းတို့က ကောင်းကင်တစ်ခွင်ကို လွှမ်းခြုံထား၏။ ရန်ဟောင် တန်ခိုးရှင်များသည် အရှိန်ကြောင့် နောက်သို့ လွင့်စင်သွားခဲ့ကြသည်။ နောက်တဖန် နာကျင်စွာ ငြီးငြူသည့် အသံများ ထွက်ပေါ်လာသည်။ အဆင့်နိမ့် ရန်ဟောင်များသည် သွေးအန်သွားကြပြီး အဝေးကြီးထိ လွင့်စင် သွားခဲ့ကြသည်။ သူတို့က မိုင်ပေါင်းအတော် ဝေးကွာသည့် အချိန်ထိရောက်အောင် မရပ်တန့်နိုင်ခဲ့ကြပေ။

ထိုပြင်းထန်လှသော မုန်တိုင်းသည် ရီဖူရှင်းကိုလည်း ရိုက်ခတ်ခဲ့သည်။ သူ၏ အဖြုရောင် ဝတ်ရုံက လေထဲတွင် ကခုန်နေသော်လည်း သူ့ ခန္ဓာကိုယ်က မြဲမြံစွာ ရပ်တည်နေခဲ့၏။ သူ၏ မျက်လုံးများက တိုက်ပွဲကို စိတ်ခံစားချက် ကင်းမဲ့စွာဖြင့် စူးစိုက်ကြည့်နေခဲ့သည်။

ကျယ်လောင်သော အသံနှင့်အတူ နတ်ဖီးနစ်က ပြန်ဆုတ်ခွာသွားခဲ့ရသည်ကို သူ မြင်လိုက်ရပြီး သူမ၏ နတ်အမွေးအတောင် တို့ကလည်း ကျွတ်ကျကုန်သည်။ နတ်အမွေးအတောင် တစ်ခုစီတွင် နတ်မီးလျှံများ ပါဝင်နေသော်လည်း ၎င်းတို့သည် လေထဲတွင် အားနည်းစွာ မျောလွင့်နေသည်။ စီဖုန်းသည် လေဟာနယ်မှ မြေပြင်သို့ ပြုတ်ကျသွားခဲ့ပြီး နက်ရှိုင်းသည့် တွင်းတစ်ခု ဖြစ်ပေါ်လာခဲ့သည်။ နက်ရှိုင်းသည့် တွင်းကြီးထဲတွင် မီးလျှံများ

ချက်ချင်းပြည့်နှက်သွားခဲ့ပြီး အလွန် ပူပြင်းသည့်လောင်ကျွမ်းမှုကို ဖြစ်ပေါ်စေသည်။

ယန်တုန်းရန်၏ ခန္ဓာကိုယ်သည်လည်း နောက်ဘက်သို့ လွင့်စင်သွားခဲ့သည်။ သူ၏ အရှိန်အဝါက မငြိမ်သက်ဘဲ အနည်းငယ် တုန်ရင်နေသော်လည်း သူက စီဖုန်းထက် အခြေအနေ ကောင်းမွန်ပေသည်။ သူက သူ၏ ရပ်တည်မှုကို တည်ငြိမ်သွားအောင် ပြုလုပ်ပြီးနောက် အောက်ဘက်သို့ အကြည့်များကို ရွှေ့လိုက်သည်။ သူက ရှင်းလင်းစွာပြောကြားလိုက်၏။ "မျှော်လင့်ထားတဲ့အတိုင်း အရှင်ဖီးနစ်ရဲ့ မျိုးဆက်က စိတ်မပျက်စေခဲ့ဘူးပဲ"

သူ၏ နဂါးခန္ဓာက အနည်းငယ် နီရဲနေခဲ့သည်။ ၎င်းသည် မဟာလမ်းစဥ် နတ်မီးလျှံများကြောင့် လောင်ကျွမ်းခံထားရသော်လည်း အလျှင်အမြန်ပင် ပျောက်ကွယ်သွားခဲ့သည်။

စီဖုန်းက မြေပြင်မှ ထရပ်လိုက်ပြီး သူမ၏ နှုတ်ခမ်းထောင့်တွင် သွေးတို့စီးကျလာသည်။ သူမ၏ ခန္ဓာကိုယ်က အနည်းငယ် တုန်ရီနေဆဲ ဖြစ်ကာ သူမ၏ ခန္ဓာကိုယ်အတွင်း၌ သွေးတို့က ဆူပွက်နေခဲ့သည်။

ရီဖူရှင်းက လက်ကို ဝှေ့ယမ်းလိုက်သည်။ ရုတ်တရက် စီဖုန်းထံသို့ ဆေးလုံးတစ်လုံး ပျံသန်းထွက်သွားခဲ့သည်။ သူမက ပါးစပ်ကိုဟကာ ၎င်းအား ချက်ချင်း ဝါးမြိုလိုက်သည်။ သူမ၏ ခန္ဓာကိုယ်မှ ဒဏ်ရာများသည် အလွန် လျင်မြန်လှသော အရှိန်ဖြင့် ပြန်လည် ကုစားလာခဲ့သည်။ သူမ၏ မျက်လုံးများက လေထဲတွင် ရပ်နေသော ယန်တုန်းရန်ပေါ်တွင် ရှိနေခဲ့ပြီး ဆက်လက်၍ တိုက်ခိုက်ချင်နေဆဲပင် ဖြစ်သည်။

သို့သော်လည်းသူမက ရှုံးနိမ့်လု နီးပါး ဖြစ်သွားခဲ့ရသည်ကို ကောင်းစွာ သိရှိထားပေသည်။

***