တကယ်ဖျော်ရည်လား?

နောက်တစ်နေ့ နေ့လယ်တွင် ရှန်လီက ချင်လင်ရုံးခန်းထဲ ကိုလာအိတ်လေးယူလာပြီး_

"ဥက္ကဌချင်... မြောက်ပိုင်းစီရင်စုက ကိုလာသီးတွေရောက်ပြီ... ကျွန်တော်နည်းနည်းယူလာတာ... ရေဆေးပြီးသား... မြည်းကြည့်လို့ရတယ်''

ရှန်လီကပြောရင်းဆိုရင်း ချင်လင်ရှေ့တွင်ကိုလာသီးများဖြန့်ချလိုက်သည်။

ချင်လင်ကကိုလာသီးတစ်လုံးကောက်ပြီး ပါးစပ်ထဲထည့်လိုက်သည်။ တစ်ကိုက်ကိုက်ကြည့်ရာ ကိုလာသီးအရည်ရွှမ်းရွှမ်းက လျှာပေါ်ပြန့်သွား၏။ အလွန်စစ်မှန်သည်။

အရသာက အရမ်းကောင်းသည်။

အတွေ့အကြုံအရ ကိုလာသီးကအရည်အသွေး ၁ ရှိကြောင်း ချင်လင်ချက်ချင်းဆုံးဖြတ်နိုင်သည်။ အရသာနှင့်အထိအတွေ့က ကိုလာကုမ္ပဏီနှစ်ခုမှထုတ်သောကိုလာထက်အများကြီးပိုကောင်းသည်။

"ဘယ်လိုလဲ ဥက္ကဌချင်?''

ရှန်လီကပြုံးပြုံးနှင့်မေးသည်။ တကယ်တော့ သူမြည်းကြည့်ပြီး ကိုလာထက်ပိုကောင်းမှန်းသိပြီးဖြစ်သည်။

ချင်လင်ကခေါင်းညိမ့်ပြီး_

"မဆိုးပါဘူး... အရသာ အနံ့ လုံးဝမပြောင်းဘူး!''

ထိုစဉ် ဖုန်းဝင်လာသည်။ ဝန်ကြီးလုပင်_

"သူဌေးချင်... ထပ်ပြီးအနှောင့်အယှက်ပေးရတာ အားနာတယ်ကွာ... မင်းကိုမေးစရာရှိတယ်!''

“ကိုလာသီးလား?”

ချင်လင်မှန်းကြည့်သည်။

ကိုလာဖြစ်ရပ်က အင်တာနက်တစ်ခုလုံးပြန့်နေပြီ။ ဒီတစ်ခါ သူ့ကိုမေးမှာက ကိုလာအကြောင်းပဲဖြစ်မည်။

"သူဌေးချင်... မင်းသိတယ်လား? အခု ကိုလာသီးတွေဘယ်လိုလဲ?''

ဝန်ကြီးလုလည်း လိုရင်းတန်းပြောလိုက်သည်။ ဘာပဲဖြစ်ဖြစ် ကိုလာသီးပရောဂျက်အကြောင်း သူသိထားသည်။

ချင်းလင်ဓာတ်ခွဲခန်းမှစိုက်ခွင့်ရထားသောဖျော်ရည်ကုမ္ပဏီများ ကိုလာသီးကိုတိတ်တဆိတ်စိုက်နိုင်ခြင်းမှာ အထက်လူများကသတင်းကူဖုံးပေးထားသောကြောင့်ပင်။

ကိုလာကုမ္ပဏီနှစ်ခုမှာ ကင်ဆာဖြစ်စေတဲ့ဓာတ်တွေလွန်လွန်ကဲကဲပါကြောင်းတွေ့တာ ဒါပထမဆုံးမဟုတ်။ အထက်လူများကလျှော့ပေါ့ပေးပြီး ပြန်လည်ပြင်ဆင်ဖို့သာခိုင်းခဲ့သည်။ အဓိကအကြောင်းရင်းမှာ ကိုလာကုမ္ပဏီနှစ်ခုအတိုင်းအတာကကြီးလွန်းသောကြောင့် ပြဿနာများဖြစ်စေသည်။

နောက်ပြီး ကိုလာကုမ္ပဏီနှစ်ခုနောက်ခံနိုင်ငံ၏လုပ်ရပ်များက တစ်ခါတလေ အတော်ခံပြင်းစေသည်။

အဓိကအကျဆုံးက ပြည်တွင်းမှာ ဒီကုမ္ပဏီနှစ်ခုထုတ်ကုန်များကိုအစားထိုးနိုင်မည့်ပစ္စည်းမရှိခြင်းပင်။

အားလုံးက ကိုလာကြိုက်သောကြောင့် နိုင်ငံတော်ကမတတ်နိုင်။

ယွမ်ချီတောရဲ့အမြုပ်ဖျော်ရည်စီးရီးကလောလောဆယ်တိုက်ခိုက်နေသော်လည်း အရင်အတိုင်း သူတို့အသက်ရှူပေါက်ကို ကိုလာကုမ္ပဏီနှစ်ခုကပိတ်လိုက်လျှင် အခြေအနေကောင်းမည်မဟုတ်ပေ။

ဘာပဲဖြစ်ဖြစ် အမြုပ်ဖျော်ရည်တွေက ကိုလာထက်ညံ့သည်။

သို့သော် ချင်းလင်ဓာတ်ခွဲခန်းရဲ့ကိုလာသီးကမတူ။ ကိုလာကို လုံးဝအစားထိုးနိုင်သည်။

ကျန်းမာရေးအားထားသောမော်ဒန်ခေတ်တွင် ကင်ဆာဖြစ်စေသောကိုလာထက် ကိုလာသီးကရွေးချယ်စရာအသစ်ဖြစ်လာမည်။

"ဝန်ကြီးလု''

ချင်လင်ကအမှန်အတိုင်းဖြေသည်_

"​မြောက်ပိုင်းစီရင်စုကကိုလာသီးတွေအရင်မှည့်ပါတယ်... တခြားနေရာတွေက မကြာခင်မှည့်ပါလိမ့်မယ်''

"ဒါဆို ငါစိတ်အေးသွားပြီ''

ဝန်ကြီးလုကပြုံးပြုံးနှင့်ပြောပြီး ဖုန်းချသွားသည်။

…

အင်တာနက်ပေါ်တွင်_

ကိုလာကုမ္ပဏီနှစ်ခုဖြစ်ရပ်က ပိုနာမည်ကြီးလာသည်။

ကိုလာ၏အတွင်းရေးတာဝန်ခံ Luther က ရုံးချုပ်မှလူများနှင့်အစည်းအဝေးလုပ်နေသည်။

အရင်က ဒီလောက်စိတ်မလောဖူး။

တကယ်တော့ ရုံးချုပ်၏'အရည်အသွေးနိမ့်ပစ္စည်းများနှင့်ကိုလာဆက်ထုတ်ပြီး နိုင်ငံများကိုစျေးပေါပေါရောင်းရန်အဆိုပြုချက်'က မမြင်နိုင်သောအန္တရာယ်ကြီးဖြစ်ကြောင်း သူအမြဲတွေးမိသည်။

အမှန်ပင်။ သူများနိုင်ငံတွင်သောက်နေသောကိုလာက သူတို့နိုင်ငံမှာထုတ်သောကိုလာနှင့်မတူ။

သူတို့နိုင်ငံထုတ်ကိုလာမှာ ကင်ဆာဖြစ်စေသောဓာတ်များပထမအကြိမ်ဖော်ထုတ်ခံရပြီးနောက်ပိုင်း လုံးဝပြန်လည်ပြင်ဆင်ပြီးဖြစ်သည်။

ဒီနိုင်ငံသားတွေက လှည့်စားရလွယ်နေခြင်းသာ။ နောက်ပြီး သတင်းဖုံးဖို့လည်းလွယ်သည်။ သူတို့အချိန်ဆွဲပြီး ဒီနိုင်ငံကဆယ်လီတစ်စုကိုခေါင်းစဉ်တပ်ထားရင် အရူးလုပ်နိုင်သည်။

ထို့ကြောင့် နှစ်ကြိမ်ဆက်တိုက်ဖော်ထုတ်ခံရပြီးနောက် အကျိုးအမြတ်ရပြီးကုန်ကျစရိတ်သက်သာစေရန် ပြန်လည်ပြင်ဆင်မှုကိုသိပ်အားထုတ်ခဲ့ခြင်းမရှိပေ။

အခုတော့ ဒီလိုဖြစ်လာပြီ။

ပြီးခဲ့တဲ့လေးငါးနှစ်မှာ ဒီနိုင်ငံကအင်တာနက်အချက်အလက်တွေမြန်မြန်ဆန်ဆန်ဖွံ့ဖြိုးလာကြောင်း ရုံးချုပ်လူတွေသိပုံမရ။ သူတို့နိုင်ငံထက်သာသည်။

ဒီတစ်ခါဖော်ထုတ်ခံရပြီးနာမည်ကြီးလိုက်ပုံက အရင်နဲ့မတူ။

ပြည်တွင်းလက်ရှိသတင်းအချက်အလက်ခေတ်ကိုသူနားလည်သောကြောင့် ရေပန်းစားခေါင်းစဉ်ဖြစ်လာရင်အ​ခြေအနေမကောင်းမှန်းသူသိသည်။

တကယ်တော့ ဒါကပြဿနာ။ သူတို့တတ်နိုင်သမျှကြိုးစားသော်လည်း နောက်ဆုံး ဒီကိစ္စကိုမဖုံးနိုင်တော့ဘဲ အခြေအနေပိုပြင်းထန်လာသည်။

အထူးသဖြင့် ဒီနိုင်ငံကတရားဝင်အသိပေးစာထွက်လာသည်။ ယွမ်သန်း ၁၀၀ ဒဏ်တပ်ပြီး ပြန်လည်ပြင်ဆင်ရမည်တဲ့။

ပြောင်းလဲဖို့ထပ်ပြီးဒဏ်တပ်ခံရပြန်ပြီ။

နောက်ပြီး ဒီတစ်ခါမတူသလိုခံစားရသည်။

"Luther... ဒီကိစ္စကို မင်းအမြန်ဆုံးဖြေရှင်းရမယ်!''

"အခု ဒဏ်တပ်ခံရတာအရေးမကြီးဘူး... ယွမ်သန်း ၁၀၀ တည်း... ပေးသာပေးလိုက်... အဓိကက အမြန်ဆုံးအဆက်အသွယ်ရှာပြီးပြန်ပြင်ပါ''

"ကိစ္စအားလုံးပြီးရင် အရင်နည်းအတိုင်းပဲ ကြော်ငြာဖို့ဆယ်လီတွေငှား''

"သူတို့နိုင်ငံမှာနာမည်ကြီးအင်တာနက်ဆယ်လီတွေရှိတယ်မလား? နာမည်အကြီးဆုံးဆယ်လီတွေကိုဖိတ်နော်''

“……”

ဗီဒီယိုအစည်းအဝေးပြီးသောအခါ Luther သက်ပြင်းချလိုက်သည်။

ဒီလူတွေက ဒီပြဿနာကိုဖြေရှင်းဖို့ နည်းလမ်းအဟောင်းကြီးသုံးချင်နေတုန်း။

သူတို့မျက်စိထဲမှာ ဒီနိုင်ငံကလူတွေအပေါ်အမြင်မပြောင်းသေး။ လွန်ခဲ့တဲ့ ၁၀ နှစ်လိုမှတ်နေသည်။

Luther ဘာမှမတတ်နိုင်။ ဘာပြဿနာမှထပ်မဖြစ်အောင် ရှင်းကျန့်တယ်ကထိထိရောက်ရောက်ရှိပါစေဟုသာမျှော်လင့်မိသည်။

သူအတွေးများနေစဉ် သူ့အတွင်းရေးမှူးပြေးဝင်လာပြီး_

"မစ္စတာ Luther... ချင်းလင်ကုမ္ပဏီက ကိုလာသီးဆိုတဲ့ထုတ်ကုန်အသစ်ကြေညာလိုက်ပြီ... ကြည့်ရတာ ကျွန်တော်တို့ကိုလာအပေါ်သက်ရောက်မှုကြီးမယ်ထင်တယ်''

“ချင်းလင်ကုမ္ပဏီ?”

Luther မျက်နှာထားပြောင်းသွားသည်။

ဒီနိုင်ငံမှာ ချင်းလင်ကုမ္ပဏီဘယ်လောက်အင်အားရှိလဲ သူသိသည်။ သူတို့ထုတ်ကုန်အားလုံးက စျေးကွက်ကိုသိမ်းပိုက်သွားသည်ချည်း။

“ကိုလာသီးက ဘာလဲ?”

သူက အလောတကြီးမေးလိုက်သည်။

အတွင်းရေးမှူးကတုံ့ဆိုင်းမနေရဲ။ နံရံပေါ်မှ LCD ဖန်သားပြင်ပေါ်တွင် ကြော်ငြာဗီဒီယိုတစ်ပုဒ်ချက်ချင်းဖွင့်ပြလိုက်သည်။