မဖြစ်နိုင်? သက်သက်စော်ကားတာ! ၂

"အချစ်... ကိုယ်တို့ချင်းလင်စံအိမ်ကိုခရီးထွက်ရမယ်ထင်တယ်''

ချင်းလင်စံအိမ်က ဝဂ်ယူအဖွဲ့မှ Yagyama Mashiro တို့အားပစ်မှတ်ထားပြီးလုပ်သည်ကို မာထျန်းယွီချက်ချင်းသဘောပေါက်သည်။

ဒါပေမဲ့ အဲဒါအရေးအကြီးဆုံးအချက်ပဲ။

ချင်းလင်စံအိမ်က ဆီးနှင်းအမဲသားတကယ်ပေးမှာလား?

တကယ့်ဆီးနှင်းအမဲသားသာပေးရင် ဝဂ်ယူအဖွဲ့က Yagyama Mashiro တို့အရှိုက်ထိပြီ။

ချင်းလင်စံအိမ်က အရည်အသွေးမြင့်ဆီးနှင်းအမဲသားမပေးနိုင်ရင် သူတို့နိုင်ငံကအရည်အသွေးမြင့်မြင့်မစားနိုင်လို့ သာမန်အမဲသားပေးသည်ဆိုပြီး Yagyama Mashiro တို့ကိုလှောင်ပြောင်ခွင့်ပေးလိုက်သလို​ဖြစ်မည်။

Adidas နဲ့ Nike မစီးနိုင်ဘဲ ဝယ်သောလူများလို ကိုးရိုးကားရားဖြစ်နေမည်။

ဘာပဲဖြစ်ဖြစ် တစ်နေ့ ၁၀၀၀ ဆို ငွေပမာဏအများကြီးကျမည်။

ချင်းလင်စံအိမ်နာမည်ကြီးခြင်းကြောင့် ထိုဗီဒီယိုကမြန်မြန်ဆန်ဆန်ရေပန်းစားလာသည်။ ထို့ကြောင့် အတော်များများက @မာထျန်းယွီဟုတွဲထားကြသည်။

သို့ရာတွင် တစ်ချိန်တည်း အင်တာနက်မှာထိုဗီဒီယိုကြောင့်ပွက်လောရိုက်သွားသည်။

ချင်းလင်စံအိမ်က အစီအစဉ်လှုပ်ရှားမှုမရှိတာကြာသည့်အတွက်ရော၊ ဂျပန်ဝဂ်ယူအဖွဲ့မှ Yagyama Mashiro တို့ကိုစက်ဆုပ်သည့်အတွက်ရောပင်။

"၆၆၆... ဟိုထောင်လွှားနေတဲ့နိုင်ငံခြားကောင်တွေကိုဖြေရှင်းဖို့ ချင်းလင်စံအိမ်ကအကောင်းဆုံးပဲ''

"ဆီးနှင်းအမဲသားက အရမ်းတန်ဖိုးရှိတယ်လား? ချင်းလင်စံအိမ်က တစ်ယွမ်နဲ့ပေးလိုက်မယ်''

"ဟား ဟား... တို့ဝက်သားက ယွမ် ၂၀.. သူတို့ဆီးနှင်းအမဲသားကတစ်ယွမ်တည်းတဲ့''

"လုံးဝစိတ်အေးသွားပြီကွာ... ငါမဲပေါက်ရင် ခွေးကျွေးပစ်မယ်''

"အကြံကောင်းပဲ... မနက်ဖြန် ချင်းလင်စံအိမ်သွားရင်ခွေးခေါ်သွားမယ်... ငါမဲပေါက်ရင် အမဲသားကိုခွေးကျွေးပစ်မယ်''

“……”

အင်တာနက်ပေါ်တွင်သတင်းများပွနေ၍ ဝဂ်ယူအဖွဲ့မှလူများသိသွားကြသည်။

Yagyama Mashiro က သတင်းသုံးပုဒ်ဆက်တိုက်တင်ထား၍ ဒီကိစ္စကိုအာရုံစိုက်နေကြသည်။ ပြည်တွင်းကလူတွေဒေါသထွက်မှာ၊ဆန္ဒပြမှာကိုတောင် မြင်ချင်လောက်သည်။

နောက်ပြီး နိုင်ငံတကာအမဲသားအရသာခံပွဲကို မင်စီရင်စုတွင်ကျင်းပမည်ဖြစ်၍ အတော်လူအမြင်ကပ်အောင်လုပ်ထားခြင်းပင်။

မင်စီရင်စု_

ဂျပန်ပိုင်ဟိုတယ်တစ်ခု၌_

Yagyama Mashiro က အမျိုးသမီးကိုပွေ့ပိုက်ပြီးလူးလိမ့်နေသည်။

အမျိုးသမီးက ပြည်တွင်းအင်တာနက်ဆယ်လီတစ်ဦးဖြစ်၏။ သူ့ကိုကောင်းကောင်းပြုစုဖို့ပိုက်ဆံပေးခေါ်ထားခြင်းပင်။

ဒီနိုင်ငံမှာ အမျိုးသမီးတစ်ယောက်နဲ့အတူနေရတာ ထူးထူးခြားခြားခံစားချက်ဖြစ်ပြီး ပြီးမြောက်အောင်မြင်သလိုခံစားရသည်။

စက္ကန့် ၃၀ ကြာပြီးနောက် အင်တာနက်ဆယ်လီအမျိုးသမီးကစိတ်ပျက်လက်ပျက်ကြည့်နေစဉ် တံခါးခေါက်သံကြားရသည်။

Yagyama Mashiro က စိတ်ကျေနပ်ပြီး ထ၍တံခါးသွားဖွင့်ရာ အပြင်တွင်သူ့လက်ထောက်ကိုတွေ့ရသည်။

"မစ္စတာ Yagyama Mashiro... ကျွန်တော်တင်ပြစရာရှိလို့ပါ''

တံခါးဖွင့်ဖွင့်ချင်း လက်ထောက်ကပြောသည်။

"ငါတို့ဆီးနှင်းအမဲသားပိတ်လိုက်လို့ ဒီနိုင်ငံကလူတွေဆန္ဒပြကုန်ပြီလား?''

Yagyama Mashiro ကတန်းမေးသည်။

"မစ္စတာ Yagyama Mashiro... ဒီနိုင်ငံကလူတွေဆန္ဒမပြပါဘူး... ခင်ဗျားရဲ့အမဲသားနဲ့ ဒီနိုင်ငံကိုဆန့်ကျင်ပြီးဂျပန်ကိုထောက်ပံ့ပေးတဲ့ဗျူဟာက အလုပ်ဖြစ်ပုံမပေါ်ဘူး''

လက်ထောက်ကအမြန်ပြောသည်။

"ပြီးတော့ ဒီကရှုမျှော်ခင်းနေရာတစ်ခုမှာ ဆီးနှင်းအမဲသားမဲနှိုက်ပေးမယ်လို့ကြေညာထားတယ်... ဒီဗီဒီယိုကြည့်လိုက်ပါဦး''

သူကပြောရင်းဆိုရင် Yagyama Mashiro ကိုဗီဒီယိုလှမ်းပေးသည်။ ချင်းလင်စံအိမ်တရားဝင်အကောင့်မှတင်ထားသောဗီဒီယိုပင်။

Yagyama Mashiro က ဗီဒီယိုကြည့်ပြီး ဒေါသထွက်သွားသည်။ ဘယ်လိုဟာသလဲ? ဆီးနှင်းအမဲသားကိုအလကားပေးတယ်ဆိုရင်တောင် တော်တော်ဆိုးနေပြီ။ ဒါပေမဲ့ ဆီးနှင်းအမဲသားကတစ်ယွမ်တည်း။ သူတို့ဝက်သားက ယွမ် ၂၀ တန်သတဲ့လား?

ဒါသူတို့ဝက်သားနဲ့ ဆီးနှင်းအမဲသားကမယှဉ်နိုင်တဲ့သဘောလား?

တော်တော်အရှက်ခွဲတာပဲ။

တမင်သက်သက်စော်ကားတာ။

လက်ထောက်ကလည်းသိသောကြောင့်_

"မစ္စတာ Yagyama Mashiro... ဒါသူတို့တမင်လုပ်တာ... ကျွန်တော်တို့လက်တုံ့ပြန်ရမယ်''

"ငါသိတယ်''

Yagyama Mashiro က အေးစက်စက်နှင့်_

"ဒါပေမဲ့ အဲဒီရှုမျှော်ခင်းနေရာက ယွမ် ၂၀ တန်ဝက်သားအရွယ်အစားရှိတဲ့ဆီးနှင်းအမဲသား ၁၀၀၀ တကယ်ပေးနိုင်မယ်ထင်လား? အဲတစ်တုံးကို တစ်သောင်းကျော်တန်တယ်!''

လက်ထောက်က ပြန်ပြောသည်_

"အမှန်ပဲ... ၁၀၀၀ ဆိုဘယ်လောက်ကျမလဲ? သူဘယ်လောက်ချမ်းသာချမ်းသာ ဒီလိုမဝေပေးနိုင်ဘူး... ပြီးတော့ ဆီးနှင်းအမဲသားဒီလောက်အများကြီးရဖို့လည်းမဖြစ်နိုင်ဘူး... ဒီနိုင်ငံထဲဆီးနှင်းအမဲသားမဝင်အောင် ကျွန်တော်တို့ပိတ်ထားပြီးပြီ''

“အဲဒီတော့?”

Yagyama Mashiro က ခေါင်းညိမ့်ပြီးမေးသည်။

"သာမန်အမဲသားကိုအစားထိုးဖို့များလို့ စားဖို့အခွင့်အရေးပေးတာပဲ''

လက်ထောက်ကတန်းပြောသည်။

"ဒါဆန္ဒပြနည်းတစ်မျိုးပဲမလား? ဒါငါတို့ပိတ်ပင်တာ တားမြစ်တာက သူတို့ကိုရန်စသလိုဖြစ်လို့ပေါ့''

"ဒီလိုနည်းမျိုးသုံးလာတာ သူတို့ဒေါသထွက်လို့... ဒါပေမဲ့ သူတို့ကဦးနှောက်မဲ့လွန်းတယ်... ဒီနည်းက လွယ်လွယ်လေးပေါ်သွားနိုင်တယ်... အဲဒီတော့ ငါတို့လူတွေဝင်ရောပြီး အမဲသားအကြောင်းဖော်ထုတ်ကြမယ်''

"မစ္စတာ Yagyama Mashiro... ကျွန်တော်သဘောပေါက်ပြီ''

လက်ထောက်ကပြုံးပြုံးနှင့်လျှောက်သွားသည်။ သူတို့အားနည်းချက်ကိုကိုင်ပြီး သတင်းလွှင့်လိုက်မှသူတို့်မျက်နှာဘယ်လိုဖြစ်သွားမလဲ သူသိချင်နေပြီ...

…

နောက်တစ်နေ့_

ချင်းလင်စံအိမ်နှင့်ချင်းလင်မွေးမြူရေးခြံမှာ အလွန်စည်ကားနေသည်။

ပုံမှန်ခရီးသည်အရေအတွက်က ၃၀၀၀၀ ဆိုသော်လည်း တစ်မနက်နှင့်တင် ၃၀၀၀၀ ကျော်သွားသည်။

တိုးလာသောလူများက ချင်းလင်စံအိမ်အမဲသားအတွက်လာခြင်းပင်။ တချို့ကလည်း ချင်းလင်စံအိမ်အမဲသားက အကောင်းဆုံးဆီးနှင်းအမဲသားဟုတ်မဟုတ်သိချင်၍လာကြသည်။

မာထျန်းယွီက သူ့မိန်းမနှင့်ရောက်လာသည်။ သူ့သူ့သားကျောင်းသွားနေသောကြောင့် သူ့မိဘများကိုကြိုခိုင်းခဲ့သည်။

သူ့မိန်းမနှင့်ရောက်လာသော်လည်း လူတွေဒီလောက်အများကြီးရှိနေမည်ဟုမထင်မိပေ။

မာထျန်းယွီက ချင်းလင်စံအိမ်ကားပါကင်တွင်ကားထိုးလိုက်သည်။ စံအိမ်ထဲဝင်ဝင်ချင်း ဝင်ပေါက်တွင် ဆီးနှင်းအမဲသားအစီအစဉ်ကြေညာချက်ကိုတွေ့ရသည်။