ပြိုလဲသွားသော နတ်ဆိုးကောင်းကင်မဟာသူတော်စင် ၂

"ဒီတစ်ခါတော့ နတ်ဆိုးကောင်းကင်မဟာသူတော်စင်က နေရာလွတ်နတ်ဘုရားအဆင့်ထဲ ဝင်နိုင်လောက်တယ်"

"အင်း ငါပြန်ပြီး တပည့်နည်းနည်းလောက် ထပ်ကျင့်ကြံပေးမှပဲ၊ ဒီတစ်သက်တော့ မျှော်လင့်ချက်မရှိတော့ဘူး!"

…

နတ်ဆိုးကောင်းကင်မဟာသူတော်စင်သည် အနောက်ဘက်ရှိအကြည့်များထဲမှ ဂယက်အမျိုးမျိုးကို ခံစားလိုက်ရပြီး သူ့မျက်နှာတွင် မထီမဲ့မြင်ပြုသောအပြုံးတစ်ခု ပေါ်လာသည်။

သူ့အနေဖြင့် ၎င်းတို့နှင့် လုံးဝခြားနားသည့် အဆင့်မှာရှိနေပြီဖြစ်ရာ အဘယ်ကြောင့် ၎င်းတို့၏အတွေးများကို ဂရုစိုက်ရမည်နည်း။

နောက်ဆုံးတွင် နတ်ဆိုးကောင်းကင်မဟာသူတော်စင်သည် နေရာလွတ်နတ်ဘုရားမျှော်စင်သို့ တိုက်ရိုက်ဝင်ရောက်ခဲ့သည်။ နေရာလွတ်နတ်ဘုရားမျှော်စင်အတွင်း၌ ပထမဆုံး စမ်းသပ်မှုက လျင်မြန်စွာ စတင်ခဲ့သည်။

စွမ်းရည်မှ ဉာဏ်အလင်းအထိ အရာအားလုံးကို နေရာလွတ်နတ်ဘုရားမျှော်စင်အတွင်း စမ်းသပ်ခဲ့သည်။

မကြာမီ နတ်ဆိုးကောင်းကင်မဟာသူတော်စင်သည် တစ်ခုခုလွဲနေသည်ဟု ခံစားလိုက်ရ၏။ ၎င်းက ပထမထပ်သာရှိသေးသော်လည်း သူ့စွမ်းရည်မမြင့်မားစဉ်ကပင် အဘယ်ကြောင့်ခက်ခဲနေရသနည်း။

“မဟုတ်ဘူး၊ ငါ့ရဲ့ ကျင့်ကြံမှု အဆင့်ကမြင့်လာလို့ပဲ ဖြစ်ရမယ်၊ ဒါကြောင့် စမ်းသပ်မှုမှာ အခက်အခဲတွေ တိုးလာတာပဲ”

"ငါ တခြားပါရမီရှင်တွေထက် တော်တော်နောက်ရောက်နေတယ်ထင်တယ်။ မဟာသူတော်စင်အဆင့်မှာတောင် သူတို့က စမ်းသပ်မှုကို မြန်မြတ်ကျော်ဖြတ်နိုင်တုန်းပဲ"

"ငါ့ရဲ့စွမ်းရည်ကို ပိုမြှင့်တင်ဖို့ လိုနေပြီ!"

နတ်ဆိုးကောင်းကင် မဟာသူတော်စင်သည် တစ်စုံတစ်ခုမှားယွင်းနေသည်ကို သတိပြုမိသော်လည်း သူသည် ၎င်းအပေါ်အာရုံမစိုက်ဘဲ အဆင့်များကို ကျော်ဖြတ်ရန် အာရုံစိုက်ခဲ့သည်။ သူ နေရာလွတ်နတ်ဘုရားမျှော်စင်သို့ဝင်ရောက်ပြီးနောက် မကြာမီ နောက်ထပ်တစ်ယောက်ပေါ်လာသည်။

ထိုသူသည် ဤနေရာသို့ရောက်ရန် ဝေးကွာသောခရီးကို ဖြတ်သန်းခဲ့ရသော ရီထျန်းရှင်းမှတစ်ပါး အခြားမရှိချေ။

ရီထျန်းရှင်းသည် နေရာလွတ်နတ်ဘုရားမျှော်စင်သို့ဝင်ရောက်ရန် အလျင်စလိုမလုပ်ဘဲ ထိုအစား နေရာလွတ်နတ်ဘုရားအဆင့်ကို ဦးစွာစစ်ဆေးခဲ့သည်။

အနည်းဆုံး နတ်ဘုရား သားတော်သမီးတော်များသည် အထွတ်အထိပ် နတ်ဆိုးကောင်းကင်မဟာသူတော်စင်နယ်မြေတွင် အစွမ်းထက်ဆုံး ပါရမီရှင်များဖြစ်သည်။ ဤအင်အားကြီးမားမှုက ရီထျန်းရှင်း၏ သွေးများဆူပွက်လာစေသည်။

ဤပါရမီရှင်များသာလျှင် သူ့ကိုဖိအားပေးနိုင်ပြီး သူ၏တိုးတက်မှုကို အရှိန်မြှင့်ပေးနိုင်သည်။

သူ့စွမ်းရည်က ကြီးကြီးမားမားမဟုတ်သော်လည်း သူ့အနေဖြင့် ဤပါရမီရှင်များထံ တစ်ဆင့်ပြီးတစ်ဆင့် တက်လှမ်းနိုင်သည်။ ထိုကလေူများထံတွင် ကြီးမားသောစွမ်းရည်ရှိမည်မှာ သေချာသောကြောင့် ရီထျန်းရှင်းက ထိပ်တန်းအဆင့်ထိတက်လှမ်းနိုင်ရန် ရည်ရွယ်ချက်မရှိသေးချေ။

သူသည် အနှစ်တစ်သောင်းအတွင်း သူ၏အခြေခံအုတ်မြစ်ကို ခိုင်ခံ့စေကာ ထိုပါရမီရှင်များကို ဖြည်းဖြည်းချင်း ကျော်ဖြတ်သွားမည်ဖြစ်သည်။ ထိုလုပ်ငန်းစဉ်ကို ယနေ့မှ စတင်ရမည်။ ထို့နောက် ရီထျန်းရှင်းသည်လည်း နေရာလွတ်နတ်ဘုရားမျှော်စင်သို့ ဝင်ရောက်သွား၏။

အချက်အလက်လုံးဝမရှိသော ရီထျန်းရှင်းသည် မည်သူ့ကိုမျှ အာရုံမစိုက်ဘဲ နေရာလွတ်နတ်ဘုရားမျှော်စင်သို့ ဝင်ရောက်ခဲ့သည်။

နေ့တိုင်း နေရာလွတ်နတ်ဘုရားမျှော်စင်ကိုဖြတ်ကျော်ရန် ကြိုးစားနေကြတဲ့ လူသစ်များရှိသော်လည်း အများစုက အနှောင့်အယှက်မပေးနိုင်ကြချေ။

အထူးသဖြင့် ရီထျန်းရှင်းကဲ့သို့သော ကျော်ကြားမှု မရှိသူများပင်။ နေရာလွတ်နတ်ဘုရားမျှော်စင်ကို ဖြတ်ကျော်နိုင်ခဲ့သူအများစုသည် အတော်လေးလူသိများပြီးသူများဖြစ်သည်။

နေရာလွတ်နတ်ဘုရားမျှော်စင်သို့ဝင်ရောက်ခြင်းက ၎င်းတို့၏ဂုဏ်သတင်းကို ပိုမိုပျံ့နှံ့စေသည် ။

နေရာလွတ်အတွင်း၌ စိတ်ဝိညာဉ်အာရုံတစ်ခု ရုတ်တရက် တုန်လှုပ်သွားသည်။ ဖီးနစ်နတ်ဘုရားသည် နေရာလွတ်နတ်ဘုရားမျှော်စင်သို့ မကြာသေးမီက ဝင်ရောက်သွားသောသူကို ရင်းနှီးနေသလိုခံစားရသည်။

"ဖီးနစ်လေး မင်း ကြိုးစားကြည့်လို့ရပြီ!"

ဖီးနစ်စစ်မှန်သောနတ်ဘုရားသည် သူ့ဘေးနားရှိ ဖီးနစ်ငယ်ကို ပြောလိုက်သည်။

"ဟုတ်ကဲ့ပါ အဘိုး!"

ဤသို့ဖြင့် ဖီးနစ်သည် ကလေးမလေးအဖြစ်သို့ ပြောင်းလဲကာ နေရာလွတ်နတ်ဘုရားမျှော်စင်သို့ ပျံသန်းသွားခဲ့သည်။

"အိုးထျန်း အိုးထျန်း၊ ငါတို့ ဖီးနစ်ငယ်လေးက မင့် သမီးထက် မနိမ့်ကျတာ သေချာတယ်"

"အချိန်ရောက်လာတဲ့အခါ အရွက်တစ်ထောင် မဟာသူတော်စင်နဲ့ဆက်နွှယ်နေမှာ မင်းတစ်ယောက်တည်း မဟုတ်တော့ပါဘူးကွာ"

သူမသည် ဖီးနစ်စစ်မှန်သောနတ်ဘုရား ပြင်ဆင်ထားသည့် လျှို့ဝှက်လက်နက်ဖြစ်၏။ သူမ နေရာလွတ်နတ်ဘုရားမျှော်စင်ထဲ ဝင်ပြီးသည်နှင့် ရီမိသားစုထံ အလည်အပတ်ခေါ်သွားမည်ဖြစ်သည်။

‘ဟီးဟီး… အိုးထျန်း စောင့်နေစမ်းပါဦး’

အချိန်အတော်ကြာပြီးနောက် နောက်ဆုံးတွင် နေရာလွတ်နတ်ဘုရားအဆင့် အပြောင်းအလဲအချို့ရှိလာသည်။

နှစ်ရာပေါင်းများစွာ တည်ငြိမ်နေခဲ့သော လန်ယာနတ်ဘုရာသမီးတော်၏ အဆင့်သည် တစ်ဖန်ပြောင်းလဲသွား၏။

မူလက သူမသည် အဆင့်ဆယ့်ရှစ်အဖြစ်သာ သတ်မှတ်ခံခဲ့ရသော်လည်း ယခုအခါတွင် သူမသည် အဆင့်ဆယ်သုံးသို့ ကျော်လွန်သွားခဲ့ပြီဖြစ်သည်။

လန်ယာနတ်ဘုရားသမီးတော်၏အဆင့်ကို မြင်သောအခါ လူတိုင်းထိတ်လန့်သွားကြသည်။ အဆင့်ငါးခုမျှသာဖြစ်သော်လည်း တိုးတက်လာနိုင်မည့် အခက်အခဲက အလွန်ကြီးမားသည်။၎င်းတို့၏ အခြေအနေတွင် စွမ်းရည်အနည်းကိုပင် မြှင့်တင်ရန် အလွန်ခက်ခဲသည်။ အရင်းအမြစ်အများစုက ၎င်းတို့အတွက် အသုံးမဝင်လုနီးပါးဖြစ်သည်။

"လန်ယာနတ်ဘုရားဂိုဏ်းက သူမကို လန်ယာနတ်ဘုရားကျောက်တုံး ပေးထားတယ်လို့ ကြားတယ်။ လန်ယာနတ်ဘုရားကျောက်တုံးက ပြင်းထန်တဲ့ ယင်သွေးမျိုးဆက်ကို ပိုင်ဆိုင်ထားတာမို့ သူမရဲ့စွမ်းရည်ကို ပိုတိုးတက်လာစေတာ"

နေရာလွတ်နတ်ဘုရားအဆင့်သည် အဆင့်တစ်ခုထက်မက ကိုယ်စားပြုသည်။ ၎င်းက ကံကြမ္မာကောင်းချီးများကိုပါ ယူဆောင်လာပေးသည်။

၎င်းတို့၏ကံကြမ္မာ မြင့်မားလေ၊ နတ်ဘုရားဂိုဏ်းအတွက် အကျိုးကျေးဇူးများကြီးမားလေဖြစ်သည်။

နတ်ဘုရားဂိုဏ်းအတွက် ၎င်း၏အခြေခံအုတ်မြစ်ကို ခိုင်ခံ့စေသည့် မည်သည့်လုပ်ဆောင်ချက်မဆို လိုက်လျှောက်ရကျိုးနပ်သည်။ သို့မဟုတ်ပါက ခေတ်တစ်ခုကုန်ဆုံးသွားလျှင် နတ်ဘုရားဂိုဏ်းအတွက် အန္တရာယ်ရှိနိုင်သည်။

အဆင့်အတန်းတစ်ခုသို့တက်လှမ်းရန် စစ်မှန်သောနတ်ဘုရားနယ်မြေမှ စွမ်းအားရှင်များသည် ၎င်းတို့၏တပည့်များကိုကျင့်ကြံရန်အတွက် အဖိုးတန်အရင်းအမြစ်များကို အသုံးပြုလိုစိတ်ရှိကြသည်။ သို့သော် လန်ယာနတ်ဘုရားကျောက်တုံးတစ်ခုတည်းကပင် ကျင့်ကြံသူအနည်းစုကို စိတ်မသက်မသာခံစားရစေသည်။

အထူးသဖြင့် အမှောင်ထုမူလနိယာမလမ်းကြောင်းမှ အထွတ်အထိပ် မဟာသူတော်စင်များအတွက် လန်ယာနတ်ဘုရားကျောက်တုံးက ၎င်းတို့အား စစ်မှန်သောနတ်ဘုရားနယ်မြေကိုဖြတ်ကျော်ရန် မျှော်လင့်ချက်အလင်းရောင်ကို ပေးနိုင်သည်။

လန်ယာနတ်ဘုရားကျောက်တုံးတစ်ခုတည်းကို အသုံးပြုပြီးနောက် လန်ယာနတ်ဘုရားသမီးတော်၏ အဆင့်ကို အဆင့်ဆယ့်သုံးသို့ မြှင့်တင်ခြင်းက ကန့်သတ်ချက်ရောက်နေပြီဖြစ်သည်။

မကြာမီတွင် လန်ယာနတ်ဘုရားသမီးတော်သည် နေရာလွတ်နတ်ဘုရားမျှော်စင် အပြင်ဘက်တွင်ပေါ်လာသည်။

"လန်ယာနတ်ဘုရားသမီးတော်အတွက် ဂုဏ်ယူပါတယ်"

"မင်းရဲ့စွမ်းရည်က အများကြီးတိုးလာပြီ။ပျော်စရာပဲဟေ့!"

လန်ယာနတ်ဘုရားသမီးတော်က တည်ငြိမ်နေပြီး များစွာမတုံ့ပြန်ခဲ့ပေ။ ကျင့်ကြံသူများသည်လည်း သူမက ထိုသို့သောစရိုက်ရှိမှန်း သိသောကြောင့် စိတ်ထဲမထားကြပေ။ အကယ်၍ သူမတုံ့ပြန်ခဲ့မည်ဆိုမှသာ ၎င်းတို့ကို အံ့အားသင့်စေမည်ဖြစ်သည်။

မကြာမီ ပေဟွမ်ဘုရားသားတော်သည်လည်း သူ၏စိန်ခေါ်မှု ပြီးမြောက်သွားပြီး မျှော်စင်မှထွက်လာခဲ့သည်။ ပေဟွမ်၏ စွမ်းရည်က သိသိသာသာ ပြောင်းလဲခြင်းမရှိပေ။ ရလဒ်အနေနှင့် သူ့အဆင့်က မတက်လာဘဲ တစ်ဆင့်နောက်ကျနေခဲ့သည်။

မူလက လန်ယာနတ်ဘုရားသမီးတော်ရှေ့ အဆင့်ဆယ့်ခုနစ်တွင် ရပ်တည်ခဲ့သော်လည်း သူသည် အဆင့်ဆယ့်ရှစ်နေရာသို့ ကျဆင်းသွားသည်။ ဤပြောင်းလဲမှုက ပေဟွမ်၏မျက်နှာကို အမူအရာဖတ်ရခက်သွားစေသည်။

လန်ယာနတ်ဘုရားသမီးတော်ထက် မြင့်မားသောစွမ်းရည်ရှိခြင်းကသာ သူမကို သူပိုးပန်းနိုင်သည့် အကြောင်းရင်းတစ်ခုဖြစ်သည်။

ယခုတော့ ထိုဝှက်ဖဲပင် မရှိတော့ပေ။ လန်ယာနတ်ဘုရားသမီးတော်ကို လိုက်ရန်အတွက် လုံးဝမျှော်လင့်ချက်ကင်းမဲ့သွားပုံရသည်။ ပေဟွမ်မျက်နှာပေါ်မှ ကံဆိုးမိုးမှောင်ကျသောအမူအရာကို ကျင့်ကြံသူအများအပြားက သဘောကျကြသည်။

လန်ယာနတ်ဘုရားသမီးတော်ကို ပိုးပန်းသူ အနည်းငယ်ရှိခဲ့သည်။ ၎င်းတို့က သူမကိုရရန်မျှော်လင့်ချက်မရှိသော်လည်း မျှော်လင့်ချက်အရှိဆုံးသူ ပေဟွမ်က ဤသို့ဖြစ်နေသည်ကိုမြင်ရခြင်းကြောင့် ပျော်ရွှင်နေကြဆဲဖြစ်သည်။လန်ယာနတ်ဘုရားသမီးတော်ကို မည်သူမျှမရနိုင်သရွေ့ ၎င်းတို့အတွက် ကောင်းသောအရာဖြစ်သည်။

"ဒီအချိန်ကြည့်ရတာ နေရာလွတ်နတ်ဘုရားအဆင့်မှာ တခြားဘယ်သူမှ ရှိမှာမဟုတ်ဘူးပဲ”

နေရာလွတ်နတ်ဘုရားအဆင့်တွင် ဝင်ရောက်နိုင်မည်ကို သိရှိရန် အချိန်အများကြီးမယူလိုက်ရချေ။ နေရာလွတ် နတ်ဘုရားအဆင့်တွင် မပြောင်းလဲသေးသောကြောင့် ယခုအချိန် မျှော်လင့်ချက်မရှိတော့ပေ။ ထိုအချိန်တွင် ကျင့်ကြံသူအများအပြားက ယခင်က စွမ်းအားကြီးမားသော နတ်ဆိုးကောင်းကင် မဟာသူတော်စင်ကို သတိရလိုက်သည်။

၎င်းတို့သည် မူလက နတ်ဆိုးကောင်းကင် မဟာသူတော်စင်အနေဖြင့် ဤအချိန်တွင် ခုန်တက်နိုင်မည်ဟု ထင်ခဲ့ကြသော်လည်း ယခုတော့ မဖြစ်နိုင်ပုံရသည်။ လူအများက ရုတ်တရက် ဟန်ချက်ညီသွားသလို ခံစားလိုက်ရပြီး ၎င်းတို့၏ ကြေကွဲနေသော တာအိုနှလုံးသားများသည်လည်း တဖြည်းဖြည်းတည်ငြိမ်လာသည်။

လက်ရှိတွင် နေရာလွတ်နတ်ဘုရားမျှော်စင်၌ အမြင့်ဆုံးလူနှစ်ယောက်မှာ ခုနစ်ဆယ့်ရှစ်ထပ်နှင့် ငါးဆယ့်ခြောက်ထပ်တို့တွင် အသီးသီးရှိကြသည်။ ခုနစ်ဆယ့်ရှစ်ထပ်တွင် နတ်ဆိုးကောင်းကင် မဟာသူတော်စင်ဖြစ်ပုံရသည်။

သို့သော် ထိုအချိန်တွင် ငါးဆယ့်ခြောက်ထပ်ရှိ အလင်းရောင်သည် ရုတ်တရက် ပျောက်ကွယ်သွားသည်။ လူတိုင်း၏အကြည့်အောက်တွင် တုန်လှုပ်နေသည့်သူတစ်ဦး ပေါ်လာ၏။

၎င်းက နတ်ဆိုးကောင်းကင်မဟာသူတော်စင်လား။ လူအနည်းငယ်က နတ်ဆိုးကောင်းကင်မဟာသူတော်စင်ကို သတိပြုမိကြပြီး ၎င်းတို့အမှတ်မှားသည်ဟု ထင်ကာ ၎င်းတို့၏မျက်လုံးများကို မယုံကြည်နိုင်ဖြစ်ခဲ့ကြသည်။

သူ၏နောက်ဆုံးကြိုးစားမှုအတွင်း နတ်ဆိုးကောင်းကင်မဟာသူတော်စင်သည် အထပ်ခုနှစ်ဆယ်သို့ ရောက်ရှိခဲ့သည်မလား။ ဤတစ်ကြိမ်တွင် သူဘာမှမတိုးတက်ခဲ့လျှင်ပင် ငါးဆယ့်ခြောက်ထပ်သို့ ပြန်မဆင်းသင့်ပါ။

၎င်းတို့တင်မကဘဲ နတ်ဆိုးကောင်းကင် မဟာသူတော်စင်ကိုယ်တိုင်လည်း မယုံနိုင်ဖြစ်သွားသည်။ သူ အဘယ်ကြောင့် ငါးဆယ့်ခြောက်ထပ်တွင် အပြင်သို့ပို့ခံလိုက်ရသနည်း။ ဆိုလိုသည်မှာ နတ်ဆိုးကောင်းကင်မဟာသူတော်စင်၏ စွမ်းရည်က တိုးလာသည်မဟုတ်ဘဲ ကျဆင်းသွားခြင်းဖြစ်သည်။

"ဒါကဘယ်လိုဖြစ်ရတာလဲ၊ ငါ့မှာ လေးသင်္ကေတ သွေးမျိုးဆက်ရှိတယ်လေ။ ငါ့ရဲ့စွမ်းရည်က ဘယ်လိုလုပ် လျော့သွားတာလဲ"

"မယုံပါဘူး၊ အဲဒါက နေရာလွတ်နတ်ဘုရားမျှော်စင်ရဲ့ အမှားဖြစ်ရမယ်၊ ငါထပ်ကြိုးစားရင် အတိအကျသိမှာပါ!"

ရုတ်တရတ်ထိတ်လန့်မှုက နတ်ဆိုးကောင်းကင် မဟာသူတော်စင်၏နှလုံးကို ကြေကွဲစေခဲ့ပြီး ထိန်းချုပ်မှုမရှိတော့သည့် အရိပ်အယောင်များ ပြသခဲ့သည်။ သူသည် ရလဒ်ကို လက်မခံနိုင်ဘဲ နေရာလွတ်နတ်ဘုရားမျှော်စင်ထဲ နောက်တစ်ကြိမ် ဝင်ရောက်ပြီး အောင်မြင်မှုရအောက်ကြိုးစားရန် ကြံစည်ခဲ့သည်။

ယခင်က မသက်မသာဖြစ်သော မဟာသူတော်စင်များသည်လည်း နတ်ဆိုးကောင်းကင် မဟာသူတော်စင်၏အခြေအနေကိုမြင်မှသာ စိတ်အေးသွားသည်။ ကြည့်ရသည်မှာ ၎င်းက ယုံကြည်မှုရှိခြင်းကြောင့်မဟုတ်ဘဲ သူ၏စွမ်းရည်ကျဆင်းသွားသောကြောင့်

စိတ်တ်နှလုံး ကြေကွဲသွားခြင်းဖြစ်သည်။

ဤဖြစ်ရပ်မျိုး ယခင်ကလည်း ဖြစ်ခဲ့ဖူး၏။ လူတိုင်း၏ နှလုံးသားသည် ထိုသို့သောပြိုလဲမှုကို ခံနိုင်ရည်ရှိလောက်အောင် ခိုင်မာသည်မဟုတ်ချေ။