အခန်း (၃၃၁-၃၃၃)

အခန်း ၃၃၁ - ရှေးဟောင်းအခင်းအကျင်းပုံစံများ၏ အနှစ်သာရ...

~ထိုစကားသံဆုံးသည်နှင့် စားသောက်ဆိုင်အတွင်း သက်ပြင်းချသံများ သောသောညံသွားလေ၏။ အပြန်အလှန်ပြောဆိုနေကြသည့် ကျင့်ကြံသူတို့၏ မျက်နှာများထက်တွင် လေးနက်သော အရိပ်အယောင်တို့ လွှမ်းခြုံသွားခဲ့သည်။

"လုရီဆိုတဲ့ကောင်လေးကတော့ တကယ့်ကို နဂါးတစ်ကောင်လို ထိုးထွက်သွားပြီဟေ့။"

"မှန်တယ်... မဟာယာနအဆင့် ပုဂ္ဂိုလ်ကြီးတွေတောင် သူ့အသက်ကို နှုတ်ယူလို့မရမှတော့ ကပ်ဘေးဖြတ်ကျော်အဆင့် ကျင့်ကြံသူကိုယ်တိုင် ကြွမလာမချင်း ဒီကောင့်ကို ဘယ်အရာကမှ ခြိမ်းခြောက်နိုင်တော့မှာ မဟုတ်ဘူး။"

"အခု သူ့ကျင့်ကြံမှုက နတ်ဘုရားအသွင်ပြောင်းနယ်ပယ်မှာပဲ ရှိသေးတာနော်။ နောက်ထပ် နှစ်တစ်ထောင်လောက်သာ သူ့ကို အချိန်ပေးလိုက်စမ်းပါ။ ပေါင်းစည်းခြင်းနယ်ပယ် ဒါမှမဟုတ် မဟာယာနနယ်ပယ်ကိုသာ သူရောက်သွားခဲ့ရင် တစ်လောကလုံး သူ့ကိုယှဉ်နိုင်မယ့်သူ ရှိပါတော့မလား။"

"အဲဒီလိုတော့လည်း တထစ်ချ ပြောလို့မရသေးဘူး။ မြောက်ပိုင်းနယ်မြေက ချင်းချုံးမြေခွေးမျိုးနွယ် မိစ္ဆာမလေးကိုလည်း မေ့ထားလို့မဖြစ်ဘူး။ မိစ္ဆာဧကရာဇ်ရဲ့ အမွေအနှစ်ကို ဆက်ခံထားတာ... လုရီထက် အစွမ်းမနိမ့်လောက်ဘူးလို့ ငါတော့ထင်တယ်။"

"ဒါလည်းဟုတ်တာပဲ။"

ထိုသို့သော ငြင်းခုံသံများ လေထုထဲတွင် ပျံ့လွင့်နေစဉ်၊ လူအုပ်ကြားထဲမှ လုရီမှာမူ တိတ်ဆိတ်စွာ နားစွင့်ရင်း အရေးပါသော သတင်းစကားတို့ကို စိတ်ထဲ၌ မှတ်သားနေခဲ့သည်။ သူထွက်ပြေးလွတ်မြောက်လာပြီးနောက် မိသားစုကြီးသုံးခုမှ အကြီးအကဲများ အမျက်ဒေါသထွက်ကာ သူ့အား လိုက်လံရှာဖွေရန် အင်အားကြီးသူများကို စေလွှတ်ခဲ့သော်လည်း ယနေ့ထက်ထိ သူ၏အရိပ်အယောင်ကိုပင် မတွေ့သေးသည့် အချက်ကိုလည်း သူသိလိုက်ရသည်။

စကားဝိုင်းသည် အရှိန်ရလာပြီး နောက်ထပ်သတင်းတစ်ခုဆီသို့ ဦးတည်သွားပြန်သည်။

"မင်းတို့ကြားပြီးပြီလား... ပင်လယ်မျိုးနွယ်နဲ့စစ်ပွဲမှာ မဟာမိတ်တပ်တွေဘက်က အပြောင်းအလဲကြီးကြီးမားမားလုပ်တော့မယ့်ပုံပဲ။"

"ဘာများလဲကွ... ပြောစမ်းပါဦး။"

"စစ်မြေပြင်က ငါ့မိတ်ဆွေတစ်ယောက် သတင်းပို့တာကတော့ ပင်လယ်မျိုးနွယ်တွေဘက်က အင်အားထပ်ဖြည့်လိုက်ပြန်ပြီတဲ့။ မဟာမိတ်တပ်တွေတောင် တဖြည်းဖြည်း နောက်ဆုတ်ပေးနေရတဲ့အထိပဲ။ အရှေ့ဒေသက မြင့်မြတ်နယ်မြေတချို့ဆိုရင် နေရာမှာတောင် မကပ်နိုင်တော့ဘူး။ ဒါကြောင့် ပင်လယ်မျိုးနွယ်ကို အပြတ်ချေမှုန်းဖို့ စစ်အင်အားတွေ အကြီးအကျယ် စုဆောင်းတော့မယ်တဲ့။"

"ဗုဒ္ဓေါ... ပင်လယ်မျိုးနွယ်တွေက အင်အားထပ်ဖြည့်တယ်ဟုတ်လား။ သူတို့ရဲ့ မူလတပ်အင်အားနဲ့တင် မြင့်မြတ်နယ်မြေတစ်ခုကို အလွယ်တကူ ကိုင်တွယ်နိုင်နေတာကို။ ဒီကောင်တွေက ဘယ်အချိန်မှ အတောသတ်မှာလဲ။"

"ဒီအတိုင်းသာဆိုရင် စစ်မီးက ကုန်းတွင်းပိုင်းကို ကူးစက်လာတော့မှာပေါ့။ ပင်လယ်မျိုးနွယ်တွေ ဘာစိတ်ကူးပေါက်ပြီး လူသားတွေရဲ့ နယ်မြေကို အငြိုးတကြီးနဲ့ ဝင်တိုက်နေကြတာလဲ မသိတော့ဘူး။"

ကျင့်ကြံသူအများစု၏ မျက်နှာများပေါ်တွင် စိုးရိမ်ကြောင့်ကြမှုတို့က အထင်းသား။ အကြောင်းမှာ ထိုစစ်မီးသည် သူတို့ထံသို့ အချိန်မရွေးရောက်ရှိလာနိုင်သောကြောင့် ဖြစ်သည်။ စစ်ရေစီးကြောင်းသာ ချင်းကျိုးသို့ ဦးလှည့်လာခဲ့ပါက ဤမြေတွင် မည်မျှသော ကျင့်ကြံသူတို့၏ အသက်သွေးချွေးများ စတေးရမည်ကို တွေးကြည့်ရုံဖြင့် ကြက်သီးထဖွယ်ရာပင်။

ထိုစဉ် အလယ်အလတ်အရွယ် ရွှေအူတိုင်နယ်ပယ် ကျင့်ကြံသူက စကားဆက်သည်။

"မြင့်မြတ်နယ်မြေတွေက သိမ်းပိုက်ခံနယ်မြေတွေကနေ ထွက်ပြေးလာတဲ့ ဂိုဏ်းတွေကို မဖြစ်မနေ စစ်ကူထွက်ပေးဖို့ အမိန့်ထုတ်ထားပြီ။ သူတို့ရဲ့ အင်အားအကြီးဆုံး ပုဂ္ဂိုလ်တွေကို စစ်ပွဲမှာ ပါဝင်တိုက်ခိုက်ဖို့ တောင်းဆိုနေပြီ။"

ဤစကားကိုကြား ကျင့်ကြံသူအချို့၏ မျက်နှာထက်တွင် ကျေနပ်သော အပြုံးများ ပေါ်လာ၏။

"ဟားဟား... ဒီလိုဖြစ်မှပေါ့ကွာ။ ဒီကောင်တွေက ပင်လယ်မျိုးနွယ်ကို ကြောက်လို့ ကိုယ့်နယ်မြေကိုတောင် စွန့်ပစ်ပြီး ငါတို့လို ကျင့်ကြံသူတွေရဲ့ အရင်းအမြစ်တွေကို လာလုနေတာ။ အခုတော့ သူတို့စခဲ့တဲ့ မီးကို သူတို့ကိုယ်တိုင် ပြန်ငြှိမ်းရတော့မှာပေါ့။"

"ဒါသာအမှန်ဆိုရင် ချင်းကျိုးနယ်မြေလည်း အသက်ရှူချောင်သွားမှာ သေချာတယ်။"

"ဒါပေမဲ့ အဲဒီဂိုဏ်းတွေက သူတို့ရဲ့ အင်အားအကြီးဆုံး ပုဂ္ဂိုလ်တွေကို မစေလွှတ်ရဲရင် ဘယ်လိုလုပ်မလဲ။"

"ဟွန့်... အခုချိန်မှာ ဒါက သူတို့ရွေးချယ်ခွင့်ရှိတော့တဲ့ ကိစ္စမဟုတ်ဘူး။ ရှေ့တန်းစစ်မြေပြင်က ပွက်လောရိုက်နေချိန်မှာ သူတို့က ကုန်းတွင်းပိုင်းမှာ ပြည်တွင်းစစ် လာဖန်တီးနေတာ။ သူတို့သာ စစ်ကူမပေးဘူးဆိုရင် မြင့်မြတ်နယ်မြေတွေက သူတို့ကို အလွတ်ပေးမှာမဟုတ်ဘူး။ ကပ်ဘေးဖြတ်ကျော်အဆင့် ပုဂ္ဂိုလ်တွေတောင် မဖြစ်မနေ ပါဝင်ရမယ်လို့ အမိန့်ထုတ်ထားပြီးသား။"

ထိုသူ၏ စကားအဆုံးတွင် လူအများ၏ မျက်နှာများ ပို၍ပင် ဝင်းပသွားကြသည်။

သို့သော် ထိုသူက ဆက်ပြောပြန်သည်။

"ဒါတင်ပဲ မကဘူး။ မြင့်မြတ်နယ်မြေတွေက ထွက်ပြေးလာတဲ့ ဂိုဏ်းတွေကိုသာမက ကုန်းတွင်းပိုင်းက ဂိုဏ်းတွေကိုပါ စစ်ကူတောင်းနိုင်တဲ့ အခြေအနေရှိတယ်။ ပင်လယ်မျိုးနွယ်ရဲ့ အင်အားက အားလုံးရဲ့ မျှော်မှန်းချက်ထက် အဆမတန် ကြီးမားနေတယ်။ ဒါကြောင့် အင်အားစုအားလုံး ပူးပေါင်းတိုက်မှပဲ သူတို့ကို ဟန့်တားနိုင်မှာ။"

ဤစကားသည် တကိုယ်တော် ကျင့်ကြံသူတို့၏ နားထဲတွင်မူ ပျားသကာလို ချိုမြိန်သွားစေ၏။ အကယ်၍ ဂိုဏ်းကြီးများမှ ဘိုးဘေးအဆင့် ပုဂ္ဂိုလ်များ စစ်မြေပြင်တွင် ကျဆုံးသွားပါက ဂိုဏ်းများ၏ သြဇာအာဏာ ကျဆင်းသွားမည်ဖြစ်ပြီး၊ ထိုအခါ သူတို့ကဲ့သို့သော လွတ်လပ်ကျင့်ကြံသူများအတွက် အခွင့်အလမ်းကောင်းများ ပေါ်ပေါက်လာပေလိမ့်မည်။ ရှုပ်ထွေးသောကာလများက အစွမ်းထက်သူရဲကောင်းများကို မွေးထုတ်ပေးတတ်သည် မဟုတ်ပါလော။

လုရီ၏ အတွေးတို့သည် လေးနက်သွားခဲ့သည်။ ဤအခြေအနေသည် အမှန်တကယ်ပင် ကြီးမားသော အလှည့်အပြောင်းတစ်ရပ် ဖြစ်လာပေမည်။ ဂိုဏ်းတစ်ခု၏ အုတ်မြစ်သည် အင်အားအကြီးဆုံး ပုဂ္ဂိုလ်များပင်တည်း။ သူတို့သာ စစ်မြေပြင်တွင် ကျဆုံးခဲ့ပါက ဂိုဏ်း၏ အုပ်ချုပ်မှုမှာ အမည်ခံမျှသာ ကျန်ရှိတော့မည်။ သို့ဖြစ်လျှင် အာဏာဖွဲ့စည်းပုံများ ပြန်လည်ပြောင်းလဲမည်ဖြစ်ပြီး အင်အားကြီးသူ အသစ်များ ပေါ်ထွက်လာပေလိမ့်မည်။

သို့သော် ထိုအတွေးသည် သူ့စိတ်ကို များစွာ မလှုပ်ခတ်နိုင်ခဲ့ပေ။ အမှန်စင်စစ်၊ သူကဲ့သို့သော ကျင့်ကြံသူတစ်ဦးအတွက်မူ ကိုယ်ပိုင်အစွမ်းသည်သာ ထာဝရတည်မြဲမည့် တစ်ခုတည်းသော အမှန်တရားဖြစ်သည် မဟုတ်ပါလော။

နောက်ပိုင်းတွင် ကြားသိရသော သတင်းများအရ ပင်လယ်မျိုးနွယ်စစ်ပွဲ၏ ပြင်းထန်မှုသည် လုရီ၏ စိတ်ကူးထက်ပင် ကျော်လွန်နေခဲ့သည်။ ကပ်ဘေးဖြတ်ကျော်အဆင့် ပုဂ္ဂိုလ်ကြီးများ နေ့စဉ်နီးပါး တိုက်ခိုက်နေကြပြီး၊ သူတို့၏ တိုက်ပွဲများကြောင့် နယ်မြေဒေသများစွာ ပျက်စီးကာ သက်ရှိကင်းမဲ့သော သဲကန္တာရများအဖြစ်သို့ ပြောင်းလဲသွားခဲ့သည်။

နောက်ဆုံးတွင် အခြေအနေကို ထိန်းသိမ်းရန် မဟာအင်အားကြီး ပုဂ္ဂိုလ်တို့သည် သူတို့၏ တိုက်ပွဲများကို ကောင်းကင်ယံထက်သို့ ရွှေ့ပြောင်းခဲ့ကြရသည်။ သို့တိုင်အောင် ထိုအဆင့်ပုဂ္ဂိုလ်များပင် နေ့စဉ်တိုက်ခိုက်နေရသည်ဆိုလျှင် အောက်ခြေအဆင့် ကျင့်ကြံသူများအတွက်မူ စစ်ပွဲသည် မည်မျှလောက် ကြောက်မက်ဖွယ်ကောင်းလိုက်မည်နည်း။

ယနေ့အထိ ကပ်ဘေးဖြတ်ကျော်အဆင့် ကျင့်ကြံသူ ကျဆုံးသည့်သတင်း မကြားရသေးသော်လည်း၊ မဟာယာနအဆင့် ပုဂ္ဂိုလ်များစွာ ကျဆုံးခဲ့ပြီးဖြစ်ကာ ပေါင်းစည်းခြင်းနယ်ပယ်မှ ပုဂ္ဂိုလ်များမှာမူ ရေတွက်၍ပင် မကုန်နိုင်တော့ချေ။

စစ်မြေပြင်တစ်ခုလုံးသည် အဆုံးမဲ့သတ်ဖြတ်ကွင်းကြီးအဖြစ် ပြောင်းလဲနေခဲ့ပြီး... ဟင်းလင်းပြင်ဥမင်နယ်ပယ်အောက် အဆင့်ရှိ ကျင့်ကြံသူတို့အဖို့မူ မိမိတို့၏ ကံကြမ္မာကို မိမိတို့ကိုယ်တိုင်ပင် မပိုင်ဆိုင်နိုင်တော့သည့် အခြေအနေသို့ ဆိုက်ရောက်နေခဲ့လေပြီတကား။

အခန်း ၃၃၂ - ရှေးဟောင်းအခင်းအကျင်းပုံစံများ၏ အနှစ်သာရ...

~ကမ္ဘာလောက၏ သာမန်လူသားတို့အတွက်မူ ဤသည်မှာ သမိုင်း၏ အမှောင်မိုက်ဆုံးသော ကာလတစ်ခု ဖြစ်ခဲ့သည်။ မြို့ပြများ တစ်ခုပြီးတစ်ခု ကျဆုံးပျက်စီးခဲ့ကာ နယ်မြေဒေသအနှံ့အပြား၌ မြေပြင်သည် သွေးဖြင့် ဆေးခြယ်ထားသည့်အလား နီရဲနေခဲ့သည်ဟု ဆိုစမှတ်ပြုကြ၏။

ထိုသတင်းစကားများ လုရီ၏ နားထဲသို့ စီးဝင်လာတိုင်း သူ၏ ပုခုံးထက်မှ ဖိအားတို့သည် တောင်ကြီးတစ်လုံးပိကျလာသကဲ့သို့ ပို၍လေးလံလာခဲ့သည်။

‘ငါ့ရဲ့ လက်ရှိစွမ်းအားနဲ့... ပင်လယ်မျိုးနွယ်က ချင်းကျိုးနယ်မြေထဲကိုသာ ဝင်ရောက်လာခဲ့ရင် ကိုယ့်ကိုယ်ကိုယ် ကာကွယ်ဖို့တောင် မလွယ်ဘူး။ ငါချစ်ရတဲ့သူတွေကို ကာကွယ်ပေးဖို့ဆိုတာကတော့ ဝေလာဝေးပဲ။ မဖြစ်ဘူး... ငါ့ရဲ့ ကျင့်ကြံခြင်းအပေါ်မှာပဲ အရာအားလုံးကို ပုံအပ်ရတော့မယ်။’

ထိုအခိုက်တွင် လုရီသည် သူ၏ ဆရာသခင်ကို သတိရလိုက်မိသည်။

‘ဟုတ်သားပဲ၊ ငါ့မှာ ဆရာ ရှိသေးတာပဲ။ ဆရာ့ရဲ့ စွမ်းအားကတော့ ပြောစရာမလိုအောင် တုနှိုင်းမဲ့ ကြောက်ခမန်းလိလိ ကောင်းတာပဲ။ သူရှိနေရင်တော့ ကြီးမားတဲ့ ပြဿနာ ရှိလာမှာ မဟုတ်လောက်ဘူး။ ဒါပေမဲ့...’

လုရီသည် တစ်ဖက်မှလည်း ပြန်လည်စဉ်းစားမိပြန်သည်။

‘ငါ့ဆရာက အားကောင်းသလို ပင်လယ်မျိုးနွယ်ဘက်မှာလည်း အလားတူ အင်အားကြီးတဲ့ ဘိုးဘေးအဆင့် ပုဂ္ဂိုလ်တွေ ရှိမနေဘူးလို့ ဘယ်သူက အာမခံနိုင်မှာလဲ။ တကယ်လို့သာ ရှိခဲ့ရင်... အခြေအနေက ဆိုးရွားနေတုန်းပဲ။ နောက်ဆုံးတော့ သူတစ်ပါးရဲ့ အရိပ်ကို ခိုလှုံနေတာထက် ကိုယ့်ရဲ့လက်သီးနှစ်ဖက်ကို အားကိုးတာကသာ အသေချာဆုံးပဲ မဟုတ်လား။’

ထိုသို့သော ကြီးမားလှသည့် ဖိအားကို ခံစားလိုက်ရသောအခါ လုရီသည် သူပြန်ရောက်သည်နှင့်တစ်ပြိုင်နက် ကျင့်ကြံခြင်းကို အလေးအနက်ထား ကြိုးစားရမည်ဟု ဆုံးဖြတ်ချက်ချလိုက်တော့သည်။

သိပ်မကြာမီမှာပင် လုရီသည် နောက်ထပ်သတင်းတစ်ခုကိုလည်း ကြားသိလိုက်ရသည်။

အရှေ့နယ်မြေမှ မြင့်မြတ်နယ်မြေများသည် ပင်လယ်မျိုးနွယ်စု၏ ဘိုးဘေးများနှင့် စစ်ပြေငြိမ်းရေးအတွက် ဆွေးနွေးရန် စီစဉ်နေကြပြီ ဖြစ်သည်။ အမှန်ပင်၊ ဤစစ်ပွဲကို ဆက်လက်တိုက်ခိုက်နေပါက နှစ်ဖက်စလုံးအတွက် အကျိုးမရှိသည့်အပြင် အဆုံးသတ်တွင် အတူတကွ ပျက်စီးကြရုံသာ ရှိတော့မည် ဖြစ်သည်။

ထို့ကြောင့် ကျင့်ကြံသူတိုင်းသည် ဤဆွေးနွေးပွဲမှ အလှည့်အပြောင်းတစ်ခု ဖြစ်ထွန်းလာမည်လားဟု မျှော်လင့်တကြီး စောင့်စားနေကြ၏။

စားသောက်ဆိုင်တစ်ခုအတွင်း၌ ကျင့်ကြံသူတစ်စုသည် ထိုအကြောင်းကို အပူတပြင်း ဆွေးနွေးငြင်းခုံနေကြသည်။ သူတို့၏ အမြင်များကို အသီးသီးဖလှယ်ပြီးနောက်တွင်မူ အခြားအရေးမပါသော အတင်းအဖျင်းများဘက်သို့ စကားလမ်းကြောင်း ပြောင်းသွားကြသည်။

‘ဒါတွေက ငါနဲ့ မဆိုင်တဲ့ စကားတွေပဲ။’

လုရီသည် ခေတ္တမျှ နားစွင့်ပြီးနောက် ထိုသို့သဘောပေါက်လိုက်ကာ သူ၏စားသောက်ခကို ရှင်း၍ ထထွက်လာခဲ့တော့သည်။

ရက်ပေါင်းများစွာ ခရီးနှင်ပြီးနောက်ဆုံးတွင် လုရီတစ်ယောက် ထာဝရဆောင်း၏ "အေးခဲဆောင်းရာသီတောင်ကြား" ဂိုဏ်းတည်ရှိရာသို့ ရောက်ရှိလာခဲ့သည်။

ထိုနေရာသည် နှင်းများ ထာဝရဖုံးလွှမ်းနေသော တောင်တန်းကြီးတစ်ခုပေါ်တွင် တည်ရှိပြီး ဒဏ္ဍာရီများအရ တစ်ချိန်က ရေခဲတာအိုကို ကျွမ်းကျင်သော အင်မော်တယ်တစ်ပါး ဉာဏ်အလင်းပွင့်ခဲ့သည့် မြေမြတ်ဖြစ်သည်။ ချင်းကျိုးနယ်မြေတစ်ခုလုံး၌ ရာသီဥတုတို့ မည်သို့ပင်ပြောင်းလဲနေစေကာမူ ဤနေရာမှ နှင်းများသည် နှစ်ပေါင်းတစ်သောင်း ကြာမြင့်သည့်တိုင် အရည်ပျော်သွားခြင်းမရှိဟု ဆိုကြသည်။

ထိုနေရာ၏ အေးစိမ့်လှသောဓာတ်သည် "ရေခဲနှလုံးသား" ကျင့်စဉ်ကို ကျင့်ကြံသူတို့အဖို့ အကောင်းဆုံးနေရာတစ်ခုပင် ဖြစ်တော့သည်။

မည်သူ့ကိုမျှ အသိမပေးဘဲ လုရီသည် တောင်ကြားအတွင်းသို့ တိတ်တဆိတ်ခိုးဝင်လာခဲ့ပြီး ဟန်ယွီကို ရှာဖွေလိုက်သည်။

ဟန်ယွီ၏ ဂူစံအိမ်သည် နှင်းဖုံးတောင်ထိပ်တစ်ခုပေါ်တွင် တည်ရှိကာ အဆောက်အအုံတစ်ခုလုံးကို ရေခဲများဖြင့်သာ ထုဆစ်ပုံဖော်ထား၏။

လုရီကို မြင်လိုက်ရသောအခါ ဟန်ယွီ၏ မျက်ဝန်းတို့သည် ကြယ်တာရာများကဲ့သို့ အရောင်တောက်သွားပြီး အံ့ဩဝမ်းသာသော အပြုံးဖြင့် ပြေးထွက်လာသည်။

"ညီအစ်ကိုလု... မင်း... မင်း ဘယ်လိုလုပ် ဒီကို ရောက်လာတာလဲ!"

ချင်းကျိုးနယ်မြေ ကမောက်ကမဖြစ်ပွားခဲ့ပြီးနောက် သူတို့နှစ်ဦး မတွေ့ဖြစ်ကြသည်မှာ အတော်ပင်ကြာခဲ့ပြီဖြစ်သည်။ ဆံပင်ဖြူလွှလွှနှင့် မိန်းမတစ်ဦးကဲ့သို့ နူးညံ့ချောမောသော ဟန်ယွီသည် လုရီကို နွေးထွေးစွာ ပြေးဖက်လိုက်သည်။

‘အာ... အနေရခက်လိုက်တာ။ ဟန်ယွီက မိန်းကလေးလို လှပေမဲ့ သူက ယောက်ျားလေးပဲလေ။ ယောက်ျားအချင်းချင်း ရင်းရင်းနှီးနှီး ပွေ့ဖက်ရတာတော့... မသင့်တော်ပါဘူး။’

လုရီသည် အနေခက်စွာ ပြုံးလိုက်ပြီးနောက် ဆိုလိုက်သည်။

"မင်းတို့ဂိုဏ်းအတွက် အကာအကွယ်အခင်းအကျင်း လာတည်ဆောက်ပေးတာပါ"

ထိုစကားကိုကြားသောအခါ ဟန်ယွီသည် ရယ်မောလိုက်သည်။

"ငါ ကြားပြီးသားပါ... လွန်ခဲ့တဲ့မကြာခင်ကပဲ ညီအစ်ကိုလုက 'ပန်းတစ်သောင်းဂိုဏ်း' ကို သွားပြီး သူတို့အတွက် အကာအကွယ် အခင်းအကျင်း တည်ဆောက်ပေးခဲ့တယ်ဆို။ ပေါင်းစည်းခြင်းနယ်ပယ်က မဟာအင်အားကြီး လေးယောက်ကိုတောင် တစ်ပါတည်း လက်စတုံးခဲ့သေးတယ်ဆိုပဲ။"

လုရီ ပြုံးလိုက်သည်။

"အေးခဲဆောင်းရာသီတောင်ကြားလို နေရာမျိုးအထိတောင် သတင်းက ပျံ့နေလိမ့်မယ်လို့ မထင်ခဲ့မိဘူး။"

အေးခဲဆောင်းရာသီတောင်ကြားသည် ပန်းတစ်သောင်းဂိုဏ်းနှင့် အလွန်ပင် ကွာဝေးလှသည်။

ထိုအခါ ဟန်ယွီသည် ခေါင်းကို ခါယမ်းရင်း သက်ပြင်းချလိုက်သည်။

"ဒီကိစ္စက လောကတစ်ခုလုံးကို တုန်လှုပ်စေခဲ့တာဗျ။ ငါတို့ ဘယ်လိုလုပ် မကြားဘဲ နေနိုင်မှာလဲ။ ညီအစ်ကိုလုရဲ့ စွမ်းအားကတော့ တစ်နေ့တခြား ပိုပြီး မယုံနိုင်စရာ ကောင်းလာတော့တာပဲ။ တကယ်ကို လေးစားပါတယ်။"

"နောက်မှ သိုင်းပညာဖလှယ်ရင်း စကားပြောကြတာပေါ့။"

"ကောင်းတာပေါ့!" ဟန်ယွီက ချက်ချင်းပင် ခေါင်းညိတ်လိုက်သည်။

"ညီအစ်ကိုဟန်ယွီ... အခုတော့ မင်းတို့ရဲ့ ဂိုဏ်းချုပ်နဲ့ အရင်ဆုံး တွေ့ခွင့်ပေးပါဦး။"

သူ့စကားအား ဟန်ယွီက ခေါင်းညိတ်ပြပြီး လုရီကို ဂိုဏ်းချုပ်လုရှိရာသို့ ခေါ်ဆောင်သွားခဲ့သည်။

ဂိုဏ်းချုပ်လုနှင့် အေးခဲဆောင်းရာသီတောင်ကြားမှ မဟာအကြီးအကဲတို့သည် လုရီ၏ သတင်းကို ကြားသိထားပြီးဖြစ်ရာ သူ၏အလာကို မျှော်လင့်တကြီး စောင့်ဆိုင်းနေခဲ့ကြသည်။

လုရီကို မြင်လိုက်ရသောအခါ သူတို့အားလုံး၏ မျက်နှာထက်၌ ဝမ်းမြောက်မှုတို့ ပြည့်လျှံသွားတော့သည်။

"တာအိုရောင်းရင်းလေးလု... နောက်ဆုံးတော့ မင်း ရောက်လာပြီပဲ။ ငါတို့ဘက်ကတော့ အခင်းအကျင်း အတွက် လိုအပ်တဲ့ ပစ္စည်းတွေအကုန် အဆင်သင့်ပြင်ထားပြီးပြီ။ အားလုံးက မင်းအပေါ်မှာပဲ မူတည်တော့တယ်။" ဂိုဏ်းချုပ်လုက အပြုံးတောက်ပစွာဖြင့် ပြောလိုက်၏

လုရီလည်း ယဉ်ကျေးစွာ ခေါင်းညိတ်ပြလိုက်သည်။ သူသည် ဂိုဏ်းချုပ်လုနှင့်အတူ ဂိုဏ်း၏ဘဏ္ဍာတိုက်သို့ လိုက်ပါသွားခဲ့ရာ အထဲမှ မြင်ကွင်းကြောင့် အနည်းငယ် အံ့အားသင့်သွားခဲ့သည်။

အေးခဲဆောင်းရာသီတောင်ကြား၏ ကောင်းကင်နှင့် မြေကြီး ရတနာတို့သည်

ပန်းတစ်သောင်းဂိုဏ်းထက်ပင် ပိုမိုကြွယ်ဝနေခဲ့၏။

အထူးသဖြင့် ပေါင်းစည်းခြင်းနယ်ပယ်အဆင့်ရှိ "နှစ်တစ်သောင်း ရေခဲသံမဏိ" ရတနာသည် လေးခုတိတိ ရှိနေခဲ့သည်။

"ဒီ နှစ်တစ်သောင်း ရေခဲသံမဏိ အပိုင်းအစတွေကို အေးခဲဆောင်းရာသီတောင်ကြားက သတ္တုကြောတစ်ခုကနေ တူးဖော်ရရှိခဲ့တာ။ ဒါပေမဲ့ ငါတို့ တစ်ခါမှ မသုံးရက်ခဲ့ဘူး။"

ဟု ဂိုဏ်းချုပ်လုက ရှင်းပြလေသည်။

‘ဒီအေးခဲဆောင်းရာသီတောင်ကြားက တကယ်ပဲ ထူးခြားတဲ့နေရာတစ်ခုပဲ။ ထာဝရမပျော်ဝင်တဲ့ ရေခဲတွေအပြင် ဒီလိုမျိုး ရတနာသိုက်ကိုပါ ပိုင်ဆိုင်ထားသေးတယ်။ ဒီလျှို့ဝှက်ချက်ကိုသာ တခြားသူတွေ သိသွားခဲ့ရင်... ဒီဂိုဏ်းလေးက ဒီရတနာတွေကို ကာကွယ်နိုင်မှာ မဟုတ်ဘူး။’

သူသည် ကြိတ်၍ ချီးကျူးမိသည်။

နှစ်တစ်သောင်းရေခဲသံမဏိများကို ယူဆောင်ပြီးနောက် လုရီသည် မဟာ အခင်းအကျင်းကြီးကို စတင်တည်ဆောက်ရန် ပြင်ဆင်တော့သည်။

ပန်းတစ်သောင်းဂိုဏ်းမှ အတွေ့အကြုံအရ သူသည် အဓိက အခင်းအကျင်းကြီးကို

မတည်ဆောက်မီ စွမ်းအင်စီးဆင်းမှုတို့ကို ဖုံးကွယ်ထားနိုင်မည့် အခင်းအကျင်း အသေးစားလေးများကို ဦးစွာတည်ဆောက်ခဲ့သည်။

သို့မှသာလျှင် အခင်းအကျင် ကြီးမှ ထွက်ပေါ်လာမည့် စွမ်းအင်လှိုင်းများက အခြားအင်အားကြီးအဖွဲ့အစည်းတို့၏ ထောက်လှမ်းမှုကို မခံရမည်ဖြစ်သည်။

မဟာ အခင်းအကျင်းကြီးကို တည်ဆောက်ရာ၌ လုရီသည် နှစ်တစ်သောင်းရေခဲသံမဏိိ လေးခုလုံးကို အသုံးပြုခဲ့သည့်အပြင် သူ၏ကိုယ်ပိုင်လည်း ပေါင်းစည်းခြင်းနယ်ပယ် အဆင့် ကောင်းကင်နှင့် မြေကြီးရတနာ သုံးခုကိုပါ ထပ်မံထည့်သွင်းပေးလိုက်သည်။

သို့မှသာလျှင် မဟာယာနနယ်ပယ်၏ တိုက်ခိုက်မှုကိုပင် ခံနိုင်ရည်ရှိမည့် အခင်းအကျင်းတစ်ခု ဖြစ်ထွန်းလာမည်ဖြစ်သည်။

အခင်းအကျင်း၏ အူတိုင်ပတ်ပတ်လည်၌ ရေခဲမြူများ ဝေ့ဝဲနေသည်ကိုကြည့်ရင်း ဂိုဏ်းချုပ်လုနှင့် ဟန်ယွီတို့ ဘေးချင်းကပ်ရပ်နေကြသည်။

ရုတ်တရက် ဂိုဏ်းချုပ်လုက သက်ပြင်း

တစ်ချက်ချကာ ထအော်လိုက်၏။

"ယွီအာ... မင်းသာ မိန်းကလေးတစ်ယောက် ဖြစ်ခဲ့ရင် ဘယ်လောက်ကောင်းလိုက်မလဲ။"

"ဗျာ?" ဟန်ယွီ အံ့အားသင့်သွားပြီး ရှုပ်ထွေးသော အကြည့်ဖြင့် မေးလိုက်သည်။

"ဂိုဏ်းချုပ်... ဘာဖြစ်လို့ ဒီလို ပြောရတာလဲဗျ။"

"ပန်းတစ်သောင်းဂိုဏ်းကို ကြည့်စမ်း... သူတို့ဂိုဏ်းက ယွင်ရှီးနဲ့ လုရီက တာအို စုံတွဲတွေ။ လုရီက သူတို့အတွက် အခင်းအကျင်း တည်ဆောက်ပေးတော့ သူ့ဘက်ကနေ ရတနာ စုစုပေါင်း ရှစ်ခုတောင် ထုတ်သုံးပေးခဲ့တယ်။ သူတို့ဂိုဏ်းက ပေါင်းစည်းခြင်းနယ်ပယ် ရတနာ တစ်ခုပဲ ပေးနိုင်ခဲ့တာလေ။ ငါတို့ အေးခဲဆောင်းရာသီတောင်ကြားက လေးခုတောင် ပေးနိုင်ရဲ့သားနဲ့ နောက်ဆုံးရလာမယ့် အခင်းအကျင်းက ပန်းတစ်သောင်းဂိုဏ်းလောက် အားကောင်းမှာ မဟုတ်ဘူး။ မင်းသာ မိန်းကလေးတစ်ယောက်ဖြစ်ခဲ့ရင်... ငါတို့ရဲ့ အခင်းအကျင်းက သူတို့ထက်တောင် ပိုကောင်းသွားနိုင်ခဲ့မှာပေါ့ကွာ။"

ပန်းတစ်သောင်းဂိုဏ်းသည် တံခါးပိတ်ထားသော်လည်း ဆက်သွယ်ရေးအတွက် အသုံးပြုနိုင်သော ကျင့်ကြံမှုရတနာများ ရှိနေဆဲပင်။

ဂိုဏ်းချုပ်လုသည် လုရီ၏ အခင်းအကျင်း စီစဉ်မှုနှင့်ပတ်သက်၍ အဘွားဟွားကို အသေးစိတ်မေးမြန်းစုံစမ်းထားခဲ့ရာ အခြေအနေမှန်ကို အတိအကျ သိရှိနေခဲ့ခြင်းဖြစ်သည်။

‘???’

ဟန်ယွီ၏ စိတ်ထဲတွင် ရှုပ်ထွေးမှုများဖြင့် ပြည့်နှက်သွားပြီး ခဏတာမျှ ဘာပြန်ပြောရမည်မှန်း မသိတော့ချေ။

နာရီအနည်းငယ်အကြာတွင် ကြောက်မက်ဖွယ် ဖိအားလှိုင်းကြီး ငြိမ်သက်သွားပြီး အခင်းအကျင်း တစ်ခုလုံး ချောမွေ့စွာ တည်ဆောက်ပြီးစီးသွားခဲ့သည်။ လုရီသည်

လေပူတစ်ချက်ကို မှုတ်ထုတ်လိုက်ပြီး ဂိုဏ်းချုပ်လုနှင့် ဟန်ယွီတို့ဘက်သို့ လှည့်ကာ ဆိုလိုက်၏။

"ဂိုဏ်းချုပ်လု... ခင်ဗျား အပ်နှံခဲ့တဲ့ အလုပ်ကို ကျွန်တော် ပြီးမြောက်အောင်မြင်စွာ ဆောင်ရွက်ပြီးပါပြီ။"

ထိုအခါဝယ် ဂိုဏ်းချုပ်လု၏ မျက်နှာထားသည် တည်ကြည်သွားပြီး လုရီအား နက်ရှိုင်းစွာ ဦးညွှတ်လိုက်သည်။

"တာအိုရောင်းရင်းလေးလု... ကျေးဇူးတင်ပါတယ်။ ချင်းကျိုးနယ်မြေ ကမောက်ကမဖြစ်နေတဲ့ ဒီလိုအချိန်မှာ မင်းရဲ့ မဟာ အခင်းအကျင်း သာ မရှိခဲ့ရင် ငါတို့ အေးခဲဆောင်းရာသီတောင်ကြားရဲ့ အမွေအနှစ်တွေလည်း ပျောက်ကွယ်သွားနိုင်သလို၊ ငါတို့ရဲ့ လျှို့ဝှက်ချက်ကလည်း တစ်နေ့မှာ ပေါ်ပေါက်လာမှာ သေချာပါတယ်။"

ဟန်ယွီကလည်း လုရီကို တည်ကြည်စွာ ကြည့်ရင်း ဆိုသည်။

"ကျေးဇူးတင်ပါတယ် အစ်ကိုလု။ နောက်အနာဂတ်မှာ အစ်ကိုလုသာ တစ်ခုခု တောင်းဆိုခဲ့ရင် ကျွန်တော် ဟန်ယွီက မီးပင်လယ်ဖြစ်ဖြစ်၊ ဓားတောင်ဖြစ်ဖြစ် ဖြတ်သန်းဖို့ အဆင်သင့်ပါပဲ။ ဘာကိုမှ ငြင်းဆန်မှာ မဟုတ်ပါဘူး။"

လုရီက ကြည်လင်စွာ ပြုံးလိုက်သည်။

"ဂိုဏ်းချုပ်လု... ညီအစ်ကိုဟန်ယွီ... ခင်ဗျားတို့ အရမ်း ယဉ်ကျေးနေကြတာပဲ။"

ထို့နောက် လုရီသည် ခေတ္တမျှ စဉ်းစားလိုက်ပြီးမှ ထပ်ပြောလိုက်၏။

"အေးခဲဆောင်းရာသီတောင်ကြားက ရတနာမြေတစ်ခုပဲ... လျှို့ဝှက်ချက် ပေါက်ကြားသွားရင် ဒီ မဟာ အခင်းအကျင်း ကတောင် ထိန်းထားနိုင်မှာ မဟုတ်မှာ ကျွန်တော် စိုးရိမ်တယ်။

တကယ်လို့ ဒီမြေကို ကာကွယ်လို့ မရတော့ဘူးဆိုရင် အသုံးပြုနိုင်မယ့် ထွက်ပေါက်အခင်းအကျင်း တစ်ခု ကျွန်တော့်မှာ ရှိပါသေးတယ်။ ဒါက အေးခဲဆောင်းရာသီတောင်ကြားက ကျင့်ကြံသူတွေရဲ့ အသက်ကိုတော့ အာမခံနိုင်ပါလိမ့်မယ်။"

လွန်ခဲ့သောအချိန်က လုရီသည် အရှေ့ တောအုပ် အပျက်အစီး နယ်မြေ၏ ထွက်ပေါက်တွင် နက်နဲဆန်းကြယ်လှသော ရှေးဟောင်း အခင်းအကျင်း ပုံစံများစွာကို တွေ့ရှိမှတ်တမ်းတင်ခဲ့ဖူးသည်။

ထိုစဉ်က သူ နားမလည်ခဲ့ပေ။ ယခုမူ သူ၏ အခင်းအကျင်း တာအိုနယ်ပယ် တိုးတက်လာခဲ့ပြီး ဤရှေးဟောင်းပုံစံများ၏ အနှစ်သာရအချို့ကို သူ စတင် ဆုပ်ကိုင်နိုင်ခဲ့ပြီ ဖြစ်၏။

အခန်း ၃၃၃ - သားကောင်အဖြစ် အသတ်ခံရမည့် သိုးသူငယ်...

~လွန်လေပြီးသောအခါက လုရီသည် အရှေ့တောအုပ် အပျက်အစီး၏ ထွက်ပေါက်၌ အလွန် နက်နဲ ဆန်းကြယ်လှသော အခင်းအကျင်း ပုံစံများကို တွေ့ရှိမှတ်တမ်းတင်ခဲ့ဖူးသည်။

ကောင်းကင်နန်းတော်မှ ပေးအပ်ချီးမြှင့်ခဲ့သော အခင်းအကျင်း တာအိုအမွေအနှစ်နှင့် အဆင့်အမြင့်ဆုံးသော ခွဲခြမ်းစိတ်ဖြာမှုတို့ကို စုပ်ယူပြီးနောက်မှာမှ ထိုရှေးဟောင်းပုံစံများ၏ အဓိပ္ပာယ်အချို့ကို သူ စတင်နားလည်လာခဲ့ခြင်း ဖြစ်သည်။

ထိုအခင်းအကျင်း ပုံစံများအားလုံးသည် ဟင်းလင်းပြင်နှင့် သက်ဆိုင်ပြီး ဟင်းလင်းပြင်ကို ချိတ်ဆက်ကာ ဖြတ်သန်းသွားလာနိုင်သော ရှေးဟောင်းပို့လွှတ်ရေး အခင်းအကျင်း အမျိုးအစားတစ်ခု ဖြစ်နေခဲ့သည်။

‘ငါ့အရင်ဘဝက ဝေါဟာရနဲ့ ပြောရရင် ဒါတွေကို တယ်လီပို့ အခင်းအကျင်းလို့ ခေါ်ရမှာပဲ။’

[ဒီတယ်လီပို့အခင်းအကျင်းဆိုတာ တကယ်တော့ မြန်မာလိုဆိုရင် "နေရာရွှေ့ပြောင်းဂိတ်" လို့ ပြောလို့ရတယ်။ ဒါမှမဟုတ် "တစ်နေရာကနေ တစ်နေရာကို ချက်ချင်းရောက်သွားနိုင်တဲ့ ဖွဲ့စည်းမှု" ပေါ့။

ပုံမှန်အားဖြင့်တော့ သိုင်းလောကမှာ ဒီလိုနေရာရွှေ့ပြောင်းဂိတ်တွေဟာ အခင်းအကျင်းပညာအဆင့်မြင့်တဲ့ ပညာရှင်ကြီးတွေ ဖန်တီးထားတဲ့အရာတွေ ပါ။ သူတို့က စွမ်းအားတွေ၊ မှော်ပညာတွေ ဒါမှမဟုတ် ထူးဆန်းတဲ့ကျောက်တုံးတွေ၊ အစီအရင်တွေနဲ့ ပေါင်းစပ်ပြီး ဒီလိုဂိတ်တွေကို ဖန်တီးကြတာပေါ့။

ဥပမာပြောရရင် –

* ကိုယ် သွားချင်တဲ့ နေရာတစ်ခုကို ချက်ချင်းရောက်သွားဖို့ လိုအပ်ရင် ဒီဂိတ်ထဲကို ဝင်လိုက်တာနဲ့ တစ်ဖက်က ကိုယ် ရောက်ချင်တဲ့နေရာကို တစ်ခါတည်း ရောက်သွားတာမျိုးပေါ့။ အချိန်ကုန်သက်သာပြီး မြန်ဆန်တယ်လေ။

* တချို့ကျတော့လည်း အန္တရာယ်များတဲ့နေရာတွေ၊ ထွက်ပေါက် ပိတ်နေတဲ့ နေရာတွေကနေ လွတ်မြောက်ဖို့ ဒီတယ်လီပို့အခင်းအကျင်းတွေကို အသုံးပြုကြတယ်။ ရန်သူတွေ ဝိုင်းထားလို့ ထွက်လမ်းမရှိတော့ရင် ဒီဂိတ်ကနေ လွတ်မြောက်သွားတာမျိုးပေါ့။

* ဒါ့အပြင် လျှို့ဝှက်နေရာတွေ၊ ရှေးဟောင်းဘဏ္ဍာတွေ ရှိတဲ့ နေရာတွေကို ရောက်ဖို့အတွက်လည်း ဒီလို ဂိတ်တွေကို သုံးကြပါတယ်။ ဒီဂိတ်တွေက သာမန်လူတွေ မသိနိုင်တဲ့၊ ပုံမှန်နည်းလမ်းနဲ့ သွားလို့မရတဲ့နေရာတွေကို ပို့ပေးနိုင်လို့ပါပဲ။]

ယခုအခါ သူ၏ နားလည်မှုဖြင့် လုရီသည် အရှေ့တောအုပ် အပျက်အစီး၏ ထွက်ပေါက်သည် အမှန်စင်စစ် တယ်လီပို့ အခင်းအကျင်း(နေရာရွှေ့ပြောင်းဂိတ်) တစ်ခုဖြစ်ကြောင်း အတည်ပြုနိုင်ခဲ့ပြီ ဖြစ်သည်။

သို့သော်လည်း အချိန်ကာလ ရှည်ကြာစွာ ကြာမြင့်ခဲ့သောကြောင့် ထိုတယ်လီပို့ အခင်းအကျင်း (နေရာရွှေ့ပြောင်းဂိတ်)သည် ချို့ယွင်းသွားခဲ့ပြီး နောက်ဆုံးတွင် ပြင်ပကမ္ဘာမှ အင်အားဖြင့်ဖွင့်လှစ်ကာ ကျင့်ကြံသူများကို အပြင်သို့ ထွက်ခွာစေနိုင်ခဲ့ခြင်း ဖြစ်တန်ရာသည်။

ရှေးခေတ်ကာလက ထိုတယ်လီပို့ အခင်းအကျင်း(နေရာရွှေ့ပြောင်းဂိတ်) ၏ မူလရည်ရွယ်ချက်ကို လုရီ မဆုံးဖြတ်နိုင်ခဲ့သော်လည်း ထိုရှေးဟောင်းပို့လွှတ်ရေး အခင်းအကျင်း ပုံစံများသည် အလွန်ရှေးကျနေပြီ ဖြစ်ကြောင်းကိုမူ သူ သေချာပေါက် အတည်ပြုနိုင်ခဲ့သည်။

ထိုကဲ့သို့သော အခင်းအကျင်းပုံစံအမွေအနှစ်များကို မြင့်မြတ်နယ်မြေအချို့သာလျှင် ပိုင်ဆိုင်ကြလိမ့်မည်ဖြစ်သည်။

ယခုအခါ လုရီသည် ပို့လွှတ်ရေး အခင်းအကျင်း ပုံစံအချို့၏ အနှစ်သာရကို ကောင်းစွာနားလည်ထားပြီဖြစ်သည်။ အလွန်ဝေးကွာသော အကွာအဝေးသို့ ပို့ဆောင်နိုင်သည့် တယ်လီပို့ အခင်းအကျင်း (နေရာရွှေ့ပြောင်းဂိတ်)တစ်ခုကို မဖန်တီးနိုင်သေးသော်လည်း ချင်းကျိုးနယ်မြေအတွင်း၌ အတိုင်းအတာတစ်ခုအထိ သေးငယ်သော ပို့လွှတ်ရေး အခင်းအကျင်းများကိုမူ သူ တည်ဆောက်နိုင်နေပြီ ဖြစ်သည်။

သူ ပန်းတစ်သောင်းဂိုဏ်းနှင့်အတူ ရှိနေစဉ်က တိမ်ဖြူတောင်တန်းရှိ တောင်ထွတ်တစ်ခု၏ တည်နေရာသို့ ချိတ်ဆက်နိုင်သော တယ်လီပို့ အခင်းအကျင်း (နေရာရွှေ့ပြောင်းဂိတ်)တစ်ခုကို တိတ်တဆိတ် ဖန်တီးခဲ့ပြီးဖြစ်သည်။

ပို့လွှတ်ရေး အခင်းအကျင်း သည် အလွန်အရေးပါသောကြောင့် ထိုလျှို့ဝှက်ချက်ကို ယွင်ရှီးနှင့် အဘွားဟွားတို့သာ သိရှိကြပြီး မဟာအကြီးအကဲများပင် ဤကိစ္စကို မသိရှိခဲ့ကြပေ။

ယခုမူ လုရီသည် အေးခဲဆောင်းရာသီတောင်ကြား၌လည်း အလားတူ ပို့လွှတ်ရေး အခင်းအကျင်း တစ်ခုကို တည်ဆောက်ပေးလိုသည်။ သို့မှသာ အဆိုးဆုံးအခြေအနေနှင့်ကြုံတွေ့လာပြီး ဂိုဏ်းအကာအကွယ် အခင်းအကျင်း ကြီးသည် ကျူးကျော်သူများကို မတားဆီးနိုင်ခဲ့လျှင်ပင် ဂိုဏ်းသားများသည် ဤတယ်လီပို့ အခင်းအကျင်း ကို အသုံးပြု၍ လွတ်မြောက်နိုင်ကြပေလိမ့်မည်။

‘ဘယ်လိုပဲဖြစ်ဖြစ် တောင်ကုန်းစိမ်းစိမ်းတွေ ကျန်နေသရွေ့တော့ ထင်းအတွက် ပူစရာမလိုဘူးလေ။’

လုရီက သူ၏အတွေးကို မျှဝေလိုက်သောအခါ ဂိုဏ်းချုပ်လုနှင့် ဟန်ယွီ နှစ်ဦးစလုံး အလွန်အမင်း တုန်လှုပ်သွားကြ၏။ ဂိုဏ်းချုပ်လုက လေးစားမှုအပြည့် ပါသော လေသံဖြင့် ဆိုသည်။

"တာအို ရောင်းရင်းလေးလုရဲ့ အခင်းအကျင်း တာအိုနယ်ပယ်က တကယ်ကို အံ့မခန်းပဲ... ရှေးခေတ်က ပို့လွှတ်ရေး အခင်းအကျင်းတွေကိုတောင် နားလည်တယ်ဆိုတော့... ဒီလို မဟာအခင်းအကျင်းကို တည်ဆောက်နိုင်ရင်တော့ အကောင်းဆုံးပေါ့... တာအို ရောင်းရင်းလေးလုကိုပဲ ဒုက္ခပေးရတော့မှာပဲ။"

ဂိုဏ်းချုပ်တစ်ဦးအနေဖြင့် ဂိုဏ်းချုပ်လုသည် လွတ်မြောက်ရေးလမ်းကြောင်းတစ်ခု၏ အရေးပါမှုကို ကောင်းစွာနားလည်ထားရာ မဆိုင်းမတွပင် သဘောတူလိုက်လေသည်။

ပို့လွှတ်ရေး အခင်းအကျင်းများသည် ရှုပ်ထွေးသော်လည်း ပို့လွှတ်မည့်အကွာအဝေး မဝေးပါက လိုအပ်သော ပစ္စည်းများသည် အလွန်အဆင့်မြင့်ရန် မလိုအပ်ပေ။

လုရီသည် သူ၏ ဟင်းလင်းပြင်ဥမင်နယ်ပယ်မှ ကောင်းကင်နှင့် မြေကြီး ရတနာအချို့ကိုသာ အသုံးပြု၍ တယ်လီပို့ အခင်းအကျင်း(နေရာရွှေ့ပြောင်းဂိတ်) တစ်ခုကို လျင်မြန်စွာ ဖန်တီးပေးခဲ့သည်။

ဤတယ်လီပို့ အခင်းအကျင်း(နေရာရွှေ့ပြောင်းဂိတ်) ကိုလည်း ဂိုဏ်းချုပ်လုနှင့် ဟန်ယွီတို့သာ သိရှိကြပြီး အသက်အန္တရာယ်နှင့် မကြုံမချင်း မည်သူမျှ အသုံးမပြုရန် တင်းကြပ်စွာ သတ်မှတ်ထား၏။

ဤတယ်လီပို့အခင်းအကျင်း(နေရာရွှေ့ပြောင်းဂိတ်) ကို တည်ဆောက်ပြီးနောက် လုရီသည် ဟန်ယွီထံ၌ နှစ်ရက်တာ နေထိုင်ကာ တာအိုနှင့် သိုင်းပညာ ဖလှယ်ခဲ့ပြီးနောက် အေးခဲဆောင်းရာသီတောင်ကြားမှ ထွက်ခွာခဲ့တော့သည်။

‘ဘယ်လိုပဲဖြစ်ဖြစ် ဟန်ယွီက ယွင်ရှီးမှ မဟုတ်တာ။ ငါ့အတွက်တော့ သိပ်ပြီး ဆွဲဆောင်မှုမရှိပါဘူး။’

ထို့နောက် လုရီသည် ဝမ်ကျန်း စံအိမ်သို့ နောက်ထပ် ခရီးစဉ်တစ်ခုကို သွားရောက်ခဲ့သည်။

ကျန်းရူယွီမှာမူ ပြန်လည်ရောက်ရှိလာခြင်းမရှိသေးဘဲ နှစ်ပေါင်းများစွာ သတင်းအစအနပင်

မကြားရသေးပေ။

ကျန်းရူယွီ၏ ဖခင်ဖြစ်သူ

ကျန်းကျင်းထျန်ထံမှ သိရှိရသည်မှာ သူ နတ်ဓားဂိုဏ်းမှ ထွက်ခွာပြီး မကြာမီမှာပင် နတ်ဓားဂိုဏ်း၌ ဆန်းကြယ်သောမြင်ကွင်းတစ်ခု ပေါ်ပေါက်ခဲ့ပြီး နတ်ဓားဂိုဏ်းတစ်ခုလုံးနှင့်တကွ ယခင် ဂိုဏ်းချုပ် ဆရာကြီးကိုပင် တုန်လှုပ်သွားစေခဲ့သည်ဟု ဆိုသည်။ ထိုအကြောင်းကြောင့် ကျန်းရူယွီသည် ထိုအချိန်မှစ၍ တံခါးပိတ်ကျင့်ကြံနေခဲ့ပြီး ယခင် ဂိုဏ်းချုပ် ဆရာကြီးကိုယ်တိုင်က သူမကို သင်ကြားပေးနေသည်ဟု သိရသည်။

‘ဒါကြောင့်ကိုး... ငါ ပေးခဲ့တဲ့ ဓားနှလုံးသားသစ်သီးကြောင့် ဖြစ်ရမယ်။ အစ်မရူယွီရဲ့ ဓားပါရမီက မူလကတည်းက ထူးခြားနေတာ၊ အခု ဓားနှလုံးသားသစ်သီးကို စုပ်ယူပြီးတော့ နောက်ထပ်တစ်ဆင့် အသွင်ပြောင်းသွားတာပေါ့။ ဒီလိုဆိုရင်တော့ ဂိုဏ်းတစ်ခုလုံး တုန်လှုပ်သွားတာ အံ့ဩစရာမရှိတော့ဘူး။’

လုရီသည် ကျန်းရူယွီအတွက် အနည်းငယ် ဝမ်းမြောက်မိသည်။

သူမ၏ ပါရမီများစွာ တိုးတက်လာသည်နှင့်အမျှ သူမ၏စွမ်းအားသည်လည်း လိုက်ပါ တိုးတက်လာပေလိမ့်မည်။

ကျန်းရူယွီ၏ အခြေအနေကို သိရှိပြီးနောက် လုရီသည် ထပ်မံ၍ အချိန်မဆွဲတော့ဘဲ ဝမ်ကျန်း

စံအိမ်အတွက် ဂိုဏ်းအကာအကွယ် အခင်းအကျင်းကြီးကို စတင်တည်ဆောက်ပေးခဲ့သည်။

ဝမ်ကျန်း စံအိမ်သည် နတ်ဓားဂိုဏ်း၏ လက်အောက်ခံ အင်အားစု ဖြစ်သည့်အားလျော်စွာ စင်စစ်ပင် ဘဏ္ဍာဓန ကြွယ်ဝလှသည်။ သူတို့သည် ကောင်းကင်နှင့် မြေကြီး ရတနာခြောက်ခုအထိ ထုတ်ပေးနိုင်ခဲ့ရာ လုရီကလည်း သူ၏ဘက်မှ နောက်ထပ် ကောင်းကင်နှင့် မြေကြီး ရတနာသုံးခု ထပ်မံ ပံ့ပိုးပေးရန် ဆုံးဖြတ်လိုက်သည်။

စုစုပေါင်း ကောင်းကင်နှင့် မြေကြီး ရတနာကိုးပါးဖြင့် တည်ဆောက်ထားသော ဤ ကြီးသည် ပန်းတစ်သောင်းဂိုဏ်း၏ အခင်းအကျင်း ထက်ပင် အားမလျော့သော စွမ်းအားကို ပိုင်ဆိုင်သွားခဲ့လေ၏။

နောက်ဆုံးရလဒ်သည် ဝမ်ကျန့်စံအိမ်တစ်ခုလုံးကို အလွန်အမင်း ကျေနပ်စေခဲ့သည်။ စံအိမ်သခင် ကျန်းကျင်းထျန်သည် ပုံမှန်အားဖြင့် အလွန်တည်ကြည်ပြီး အာဏာရှိန်ဝါကြီးသော ပုဂ္ဂိုလ်ဖြစ်သော်လည်း ယခုအခိုက်အတန့်တွင်မူ သူ၏မျက်နှာထက်မှ အပြုံးသည် တစ်စက္ကန့်မျှပင် ပျောက်ကွယ်မသွားတော့ပေ။

သူက လုရီ၏ပုခုံးကို ပုတ်လျက် ရင်းနှီးစွာဆိုသည်။

"လုရီ... ဒီအတွက် တကယ်ကျေးဇူးတင်ပါတယ်ကွာ... မင်းနဲ့ ယွီအာက သူငယ်ချင်းကောင်းတွေပဲ... ယွီအာ ပြန်လာရင် တိမ်ဖြူဂိုဏ်းမှာ မင်းကို ကျေးဇူးတင်စကား သွားပြောခိုင်းလိုက်မယ်။"

ထိုအခါ လုရီက ပြုံး၍ ပြန်ပြောလိုက်သည်။

"ဦးလေး... အရမ်းအားနာစရာတွေ ပြောနေတာပဲ။"

ကျန်းကျင်းထျန်သည် လုရီအား

သူတို့၏ဘဏ္ဍာတိုက်သို့ ဖိတ်ခေါ်ခဲ့ပြီး

လုရီအတွက် သင့်တော်သော ကောင်းကင်နှင့် မြေကြီး ရတနာများ ရှိ၊ မရှိ ကြည့်ရှုစေခဲ့သော်လည်း နောက်ဆုံးတွင် သူက စိတ်ကျေနပ်ဖွယ်ရာ မည်သည့်အရာကိုမျှ မရွေးချယ်ခဲ့ပေ။

အဘယ်ကြောင့်ဆိုသော် သူ၏ လက်ထဲ၌ရှိသော ပစ္စည်းများသည် အလွန်တန်ဖိုးရှိနေပြီဖြစ်ရာ နတ်ဘုရားအသွင်ပြောင်းနယ်ပယ် ဂိုဏ်းတစ်ခု၏ ဘဏ္ဍာတိုက်ရှိ ပစ္စည်းများသည် သူ၏အမြင်၌ များစွာ မထူးခြားတော့သောကြောင့် ဖြစ်သည်။

ဝမ်ကျန်း စံအိမ်၌ နှစ်ရက်တာ နေထိုင်ပြီးနောက် လုရီသည် စံအိမ်မှ ထွက်ခွာခဲ့တော့သည်။

လမ်းခရီးတစ်လျှောက်တွင် လုရီသည် သူ၏

'ပုံစံတစ်ထောင် အသွင်ပြောင်း သိုင်းစွမ်းရည်' ကို အခါအားလျော်စွာ အသုံးပြု၍ သူ၏ပုံပန်းသဏ္ဌာန်ကို ပြောင်းလဲကာ တိမ်ဖြူဂိုဏ်းဘက်သို့ ဦးတည်ရင်း လမ်းခရီးတစ်လျှောက်မှ ရှုခင်းများကို အေးအေးလူလူ ခံစားခဲ့လေ၏။

တစ်နေ့တွင် လုရီသည် ရှေးဟောင်းမြို့တစ်မြို့၌ နားနေစဉ် သတင်းအချို့ကို ကြားသိလိုက်ရသည်။

"ဟေ့ကောင်တွေ ကြားပြီးပြီလား... တောင်ဝါ ဂိုဏ်း၊ ယူလော့ဂိုဏ်း နဲ့ ငွေလမင်း တောင်ကြား... အကုန်လုံး တောင်ပိတ်ထားတာကနေ ပြန်ထွက်လာကြပြီတဲ့။"

"ဘာ... သူတို့တွေ နှစ်တစ်ထောင်လောက် တောင်ပိတ်မယ်လို့ ကြေညာထားတာ မဟုတ်ဘူးလား... ဘာလို့ ရုတ်တရက်ကြီးလဲ။"

"ငါကြားတာတော့... အဲ့ဒီဂိုဏ်းသုံးခုလုံး ပြင်ပက အင်အားကြီးဂိုဏ်းတွေကို သစ္စာခံလိုက်ကြပြီတဲ့။ တောင်ဝါ ဂိုဏ်းက မိုးကြိုးဘုရင်ခန်းမကို... ယိုလော့ဂိုဏ်းက ပေတိုဂိုဏ်းကို... ငွေလမင်း တောင်ကြားက လော့ရှင်းဂိုဏ်းကိုတဲ့။ အခု သူတို့ရဲ့ နယ်မြေဟောင်းတွေကို ပြန်သိမ်းဖို့ ပြင်နေကြပြီ ပြောတာပဲ။"