အခန်း (၃၄၉-၃၅၁)

အခန်း ၃၄၉ - ကပ်ဘေးဖြတ်ကျော် ဘိုးဘေးနှင့် စည်းကမ်းချက်များ ဆွေးနွေးခြင်း ...

~တိမ်ဖြူဂိုဏ်းကို ကပ်ဘေး ကျင့်ကြံသူက ကျောထောက်နောက်ခံ ပြုထားသော်ငြားလည်း

ဤတောင်းဆိုမှုကို ပေါ်ပေါ်တင်တင် ငြင်းဆန်ဖို့ မဝံ့ရဲပါချေ။

အကြောင်းမူကား တိမ်ဖြူဂိုဏ်းက အရှေ့နယ်မြေက ဂိုဏ်းတစ်ခုသာ ဖြစ်ပြီး ကျင့်ကြံသူအားလုံးကလည်း ကြိုးစားအားထုတ်နေကြသည်။

တိမ်ဖြူဂိုဏ်းက မိမိကောင်းစားရေး တစ်ခုတည်းကိုပဲ ကြည့်နေ၍ မရပါ။

ကပ်ဘေးဖြတ်ကျော်ဘိုးဘေးက လုရီအား ကြည့်ကာ ပြုံးလျက်၊ ထုတ်ဖော်လာသည်။

"တိမ်ဖြူဂိုဏ်းကို စစ်ပွဲထဲ ပါဝင်ဖို့ ဖိတ်ခေါ်တာအပြင် နောက်ထပ် ကိစ္စတစ်ခုလည်း ရှိသေးတယ်။ ဒီကိစ္စကတော့ မိတ်ဆွေလေး လုရီနဲ့ တိုက်ရိုက် ပတ်သက်နေတယ်။"

"စီနီယာ၊ အဲဒီကိစ္စက ဘာများပါလဲ။" ဂိုဏ်းချုပ်ဝူချင်းဖုန်းက စိတ်ထဲတွင် ထိတ်ခနဲဖြစ်သွား၏။

"မကြာသေးမီက ချင်းကျိုးမှာ ဖြစ်ခဲ့တဲ့ကိစ္စတွေ ငါ ကြားတယ်။ သွေးဝိညာဉ်ဂိုဏ်းနဲ့ ကောင်းကင်မြွေဂိုဏ်းတို့က မိတ်ဆွေလေးလုရီကို ဖယ်ရှားဖို့ ကြိုးစားခဲ့ကြတယ်။ အဲ့ဒီကနေ ကြီးမားတဲ့ စစ်ပွဲကြီးအဖြစ် တိုးချဲ့သွားတယ်လို့လည်း သိရတယ်။ အဲ့ဒါ အမှန်ပဲလား။"

ဤစကားကြောင့် လုရီ၊ ဂိုဏ်းချုပ်ဝူချင်းဖုန်းနှင့် အခြားသူများ၏ မျက်နှာထားများ အနည်းငယ် ပြောင်းလဲသွားကြတော့သည်။

"ဟုတ်ပါတယ်၊ အမှန်ပါပဲ။" လုရီက တည်ငြိမ်စွာ ခေါင်းညိတ်လိုက်သည်။

ကပ်ဘေးဖြတ်ကျော်ဘိုးဘေးက သက်ပြင်းချလျက်၊ "ဒီနေ့ ငါက ကောင်းကင်မြွေဂိုဏ်းကိုယ်စား ကြားဝင်ညှိနှိုင်းပေးပြီး တိမ်ဖြူဂိုဏ်းနဲ့ မိတ်ဆွေလေး လုရီတို့ကြားက ပြဿနာကို ပြေလည်စေချင်တယ်။ ကောင်းကင်မြွေဂိုဏ်းဆိုတာ တစ်ချိန်တုန်းက ငါတို့ ကောင်းကင်နဂါးမြင့်မြတ်နယ်မြေရဲ့ မျိုးနွယ်စုခွဲတစ်ခုပဲ။ မကြာသေးခင်ကမှ ငါတို့ ဒီအချက်ကို ဖော်ထုတ်တွေ့ရှိခဲ့ပြီး သူတို့ကို ငါတို့ဂိုဏ်းထဲကို ပြန်လည်ပေါင်းစည်းဖို့ ဆုံးဖြတ်လိုက်တယ်။ ဒီနေ့ကစပြီး ထျန်းမင်မှာ ကောင်းကင်မြွေဂိုဏ်းဆိုတာ မရှိတော့ဘူး။ ဒီကိစ္စက ကောင်းကင်မြွေဂိုဏ်းဘက်က စခဲ့တာဆိုတော့ ငါတို့ကလည်း အပြစ်ဒဏ်ပေးမှာပါ။ သူတို့ရဲ့ ရွှေအူတိုင်အဆင့်အထက် ကျင့်ကြံသူအားလုံးကို ဒီစစ်ပွဲမှာ ပါဝင်စေပြီး အရှေ့ နယ်မြေအတွက် အသက်စွန့် တိုက်ခိုက်စေမယ်။ မင်းတို့ ဘယ်လို ထင်လဲ။"

ဂိုဏ်းချုပ် ဝူချင်းဖုန်းနှင့် အခြားသူများ မျက်နှာချင်းဆိုင် ကြည့်လိုက်ကြ၏။

ကပ်ဘေးဖြတ်ကျော် ဘိုးဘေး တစ်ပါးက ဤမျှ ယဉ်ကျေးသိမ်မွေ့စွာ တောင်းဆိုလာလိမ့်မည်ဟု သူတို့ အိပ်မက်ပင် မမက်ခဲ့ကြပေ။

"စီနီယာက ဒီလောက် ယဉ်ကျေးသိမ်မွေ့နေမှတော့ ကျွန်တော်တို့ ဘာပြောနိုင်တော့မှာလဲ။ ကောင်းကင်မြွေဂိုဏ်းနဲ့ ကျွန်တော်တို့ကြားမှာ ရန်ငြိုးကြီးမားခဲ့တာ အမှန်ပါပဲ။ ဒါပေမဲ့ အခုတော့ သူတို့လည်း အပြစ်ဒဏ်ကို ခံစားခဲ့ရပြီ။

စီနီယာ ကိုယ်တိုင် ကြားဝင်ညှိနှိုင်းပေးမှတော့ ကျွန်တော်တို့ ငြင်းပယ်စရာ အကြောင်းမရှိပါဘူး။"

ဂိုဏ်းချုပ် ဝူချင်းဖုန်းက လုရီဘက်သို့ လှည့်ကာ

"တူတော်လု၊ မင်း ဘယ်လို ထင်လဲ"

မည်သို့ပင်ဆိုစေ ထိုဖြစ်ရပ်တွင် လုရီကသာ အဓိက ဇာတ်ကောင် ဖြစ်ချေ၏။

"ကျွန်တော့်အတွက်တော့ ပြဿနာမရှိပါဘူး။"

လုရီက တည်ငြိမ်စွာ ဆိုလိုက်သည်။ သူ၏ လက်ရှိစွမ်းအားဖြင့် ကောင်းကင် မြွေ ဂိုဏ်း

တစ်ခုလုံး ဝိုင်းတိုက်လျှင်ပင် သူ့အတွက် ခြိမ်းခြောက်မှု မဖြစ်နိုင်တော့ပေ။

ထို့နောက် လုရီက တစ်စုံတစ်ရာကို တွေးမိကာ မျက်နှာထား တည်သွားပြီး၊

"ဒါပေမယ့် ကျွန်တော့်မှာ အခြေအနေ တစ်ခု ရှိပါတယ်။"

"ဘယ်လို အခြေအနေမျိုးလဲ။"

ကပ်ဘေးဖြတ်ကျော် ဘိုးဘေးက လုရီအား စူးစိုက်ကြည့်ကာ မေးလိုက်သည်။

"ကျွန်တော့်ရဲ့ စီနီယာ အစ်ကိုကြီးတစ်ယောက်... သူနဲ့ ကျွန်တော်က သေအတူရှင်မကွာ ခင်မင်ခဲ့ကြပါတယ်။ စစ်ပွဲကြီးအတွင်းမှာ ကောင်းကင်မြွေဂိုဏ်းက တပည့်တစ်ယောက်ရဲ့ လက်ချက်နဲ့ သူ အသက်ဆုံးရှုံးခဲ့ရတယ်။ အဲ့ဒီစီနီယာအစ်ကိုကြီးအတွက် ကျွန်တော် ကိုယ်တိုင် လက်စားချေချင်ပါတယ်။"

ဤစကားကို ကြားသည်နှင့် ကပ်ဘေးဖြတ်ကျော်ဘိုးဘေး၏ မျက်မှောင်များ ကြုတ်သွားသည်။ ကောင်းကင်နဂါးမြင့်မြတ်နယ်မြေမှ အင်အားကြီးသူများ၏ မျက်နှာများမှာလည်း အတော်ပင် မလှမပ ဖြစ်သွားလေသည်။

"လုရီ! မင်း အရမ်း မမောက်မာနဲ့! လုံမင်ဘိုးဘေးကိုယ်တိုင် မင်းအတွက် ကြားဝင်ဆောင်ရွက်ပေးတာက မင်းအတွက် အကြီးမားဆုံး ဂုဏ်ယူစရာပဲ! အခု မင်းက ကောင်းကင်မြွေဂိုဏ်းက တပည့်တစ်ယောက်ကို သတ်ချင်သေးတယ် ဟုတ်လား!" ဟုကောင်းကင်နဂါး သူတော်စင် သားတော်က ဒေါသတကြီး ထအော်လိုက်သည်။

လုရီက ထိုကောင်းကင် နဂါးသူတော်စင်

သားတော်အား ပြုံး၍ ကြည့်လိုက်သည်။

"ညီအစ်ကို အော့ထျန်း၊ ငါတို့ သိုင်းပညာ မဖလှယ်ဖြစ်တာ အတော်လေး ကြာပြီနော်။ အခုတစ်ခေါက် ပြန်ပြီး ဖလှယ်ကြည့်ကြမလား။"

ကောင်းကင်နဂါး သူတော်စင် သားတော်၏ အသံသည် လည်ချောင်းထဲတွင်ပင် တစ်ဆို့သွားပြီး သူ၏ မျက်နှာလည်း ဖြူဖတ်ဖြူလျော် ဖြစ်သွား၏။ သူသည် အရှက်ပြေ ရန်တွေ့ဟန်ဖြင့်၊

"မင်း... မင်းသာ သတ္တိရှိရင်၊ ဝိဉာဉ် လက်နက်တွေ ဒါမှမဟုတ် သိုင်းအခင်းအကျင်း တာအိုတွေကို မသုံးနဲ့!"

ထိုအခါ ...လုံမင်ဘိုးဘေးက ကောင်းကင်နဂါး သူတော်စင် သားတော်အား စူးစိုက် ကြည့်လိုက်ပြီး၊

"တော်စမ်း! စစ်မြေပြင်မှာဆိုရင် မင်းရဲ့ ရန်သူတွေက မင်းရဲ့ တောင်းဆိုချက်ကို သဘောတူပြီး သူတို့ရဲ့ စွမ်းအားကို ကန့်သတ်ပေးမယ် ထင်နေလား!"

ထို့နောက် လုံမင်ဘိုးဘေးက လုရီအား နက်ရှိုင်းစွာ ကြည့်လျက်၊ ပြောလာသည်က

"မင်းရဲ့ တောင်းဆိုချက်ကို... ငါ သဘောတူတယ်။"

ဟူ‌၍ပင်။

ဤစကားကြောင့် ခန်းမဆောင်တစ်ခုလုံးရှိ လူအားလုံး အသက်ရှူရန်ပင် မေ့လျော့ကာ အံ့အားသင့်လျက် ပါးစပ်အဟောင်းသား ဖြစ်သွားကြတော့၏။ ကပ်ဘေးဖြတ်ကျော်ဘိုးဘေးတစ်ပါးက လုရီ၏ အခြေအနေကို သဘောတူလိုက်သည်တဲ့လား။

လုံမင်ဘိုးဘေးက ပြုံးလျက်၊ "ဒါပေမဲ့ မင်းကလည်း ငါ့ရဲ့ အခြေအနေတစ်ခုကို ပြန်သဘောတူရမယ်။"

"စီနီယာက ဘာများ အဆိုပြုချင်ပါသလဲ။ ကျွန်တော် တတ်နိုင်သမျှ သဘောတူမှာပါ။"

လုံမင်ဘိုးဘေးက ဖြည်းဖြည်းချင်း ဆို၏။

"မင်းရဲ့ ကိုယ်ခန္ဓာကျင့်ကြံတဲ့ နယ်ပယ်ကိုပဲ သုံးပြီး အော့ထျန်းနဲ့ တစ်ပွဲ တိုက်ခိုက်ပေးပါ။ မင်းရဲ့ ကိုယ်ခန္ဓာသန့်စင်ခြင်းနယ်ပယ်က ဘယ်လောက် အားကောင်းလဲဆိုတာကို ငါ ကိုယ်တိုင် မျက်မြင်တွေ့ချင်လို့ပဲ။"

ထိုစကားကို ကြားရသည်နှင့် လုရီ အနည်းငယ် အံ့ဩသွား၏။

'ဒီလောက်ပဲလား။'

သူ လုံအော့ထျန်းလိုလူမျိုးကို လက်တစ်ဖက်တည်းဖြင့်ပင် အယောက်တစ်ရာလောက် တိုက်ခိုက်နိုင်လောက်သည်။

လုရီ သက်ပြင်းချလိုက်သည်နှင့် နတ်နဂါးမြင့်မြတ်သားတော်၏ မျက်လုံးများမှာ တိုက်ခိုက်လိုစိတ်ဖြင့် တစ်ဖန်ပြန်လည် တောက်ပလာပြီး လုရီအား စိန်ခေါ်ဟန်ဖြင့် စိုက်ကြည့်နေတော့၏။

သူက အေးစက်စွာ ကြိမ်းဝါးလိုက်သည်။

"ကိုယ်ခန္ဓာကျင့်ကြံတဲ့ နယ်ပယ်တစ်ခုတည်းနဲ့ ပြိုင်တာဆိုရင် ငါ... လုံအော့ထျန်းဟာ ငါ့ဘဝမှာ ဘယ်သူ့ကိုမှ မရှုံးဖူးဘူး။ လုရီ၊ မင်း ငါ့ကို ဘယ်လိုမှ မနိုင်ဘူး! ဒီနေ့ မင်း အရှုံးရဲ့ ခါးသီးမှုကို မြည်းစမ်းရစေမယ်!"

အခန်း ၃၅၀- ကပ်ဘေးဖြတ်ကျော် ဘိုးဘေးနှင့် စည်းကမ်းချက်များ ဆွေးနွေးခြင်း ...

~"ညီအစ်ကို အော့ထျန်း... ဒီစကားမျိုး အရင်တစ်ခေါက်ကလည်း ကြားခဲ့ဖူးသလိုပဲ။

ဒါပေမယ့် ဖြစ်လာတဲ့ ရလဒ်ကတော့ ခင်ဗျားပြောသလို ဖြစ်မလာခဲ့ဘူး ထင်တယ်..."

လုရီက ခပ်ဖွဖွ ပြုံးရင်း ဆိုလိုက်သည်။

ထိုစကားကြောင့် ကောင်းကင်နဂါးသူတော်စင်သားတော်၏ ကိုယ်ခန္ဓာသည် တောင့်ခနဲ ဖြစ်သွားပြီး မျက်နှာ ကွက်ခနဲ ပျက်သွားတော့၏။ သူ၏ မျက်လုံးများက ဒေါသမီးတို့ဖြင့် ရဲရဲတောက်လာကာ အေးစက်စက် လေသံဖြင့် ကြိမ်းဝါးလိုက်သည်။

"ဒီတစ်ခါတော့ မင်းကို ငါ အနိုင်ယူမယ်!"

စကားသံဆုံးသည်နှင့် ကြောက်မက်ဖွယ်ကောင်းသော အရှိန်အဝါတို့သည် ကောင်းကင်နဂါးသူတော်စင် သားတော်၏ ကိုယ်မှ လှိုင်းလုံးကြီးများပမာ ပေါက်ကွဲထွက်လာတော့သည်။

အားကောင်းလှသော သွေးချီစွမ်းအားတို့က ဟိန်းခနဲ ထွက်ပေါ်လာပြီး၊ သူ၏ ကိုယ်ပေါ်တွင် စစ်မှန်သော နဂါးတာအိုပုံစံများ ရှုပ်ယှက်ခတ်စွာ ပေါ်ထွက်လာကာ နဂါးအကြေးခွံ သံချပ်ကာအဖြစ်သို့ ပြောင်းလဲသွားလေ၏။

ထိုအခိုက်အတန့်တွင် ကောင်းကင် နဂါးသူတော်စင် သားတော်သည် လူသားနဂါးငယ်တစ်ကောင်အလား၊ ပြိုင်ဘက်ကင်းသလောက် ဖိအားတစ်ခုကို ထုတ်လွှတ်ရင်း မားမားမတ်မတ် ရပ်တည်နေတော့သည်။

ဝူချင်းဖုန်းနှင့် အခြားသော အင်အားကြီးပုဂ္ဂိုလ်တို့၏ မျက်နှာထားများ ပြောင်းလဲသွားကြ၏။ အကြီးအကဲမင်၏ မျက်နှာပင်လျှင် အလွန်အမင်း တင်းမာသွားလေသည်။

'နတ်ဘုရားအသွင်ပြောင်းအဆင့်ပဲ ရှိသေးတယ်... ဒါပေမဲ့ ဒီကောင်လေးရဲ့ ဖိအားက ဟင်းလင်းပြင် ဥမင် အဆင့်ဖြစ်တဲ့ ငါ့ကိုတောင် ယှဉ်ပြိုင်ရခက်ခဲစေပါလား...'

အကြီးအကဲမင်၏ ရင်ထဲ၌ တစ်ချက်လှုပ်ခါသွားသည်။

လုရီကမူ ပြုံးမြဲ ပြုံးလျက်ပင်။

"ဒီလိုဆိုရင်တော့ ကောင်းကင်ပေါ်တက်ပြီးမှ သိုင်းပြိုင်ကြတာပေါ့။ ငါတို့ဂိုဏ်းက ပစ္စည်းတွေ ပျက်စီးကုန်ရင် မင်းကို လျော်ကြေးတောင်းရမှာ စိတ်မကောင်းလို့ပါ။"

ထိုစကားက ကောင်းကင် နဂါး သူတော်စင် သားတော်၏ မျက်နှာကို ချက်ချင်းမည်းမှောင်သွားစေသည်။ 'ဒီကောင်... ငါ့ကို လျော်ကြေးမပေးနိုင်ဘူးလို့ နှိမ်နေတာလား!'

တစ်ဖက်မှ လုရီသည် သူ့ စကားဆုံးသည်နှင့် အလင်းတန်းတစ်ခုအဖြစ် ပြောင်းလဲကာ မူလနေရာမှ ပျောက်ကွယ်သွား၏။ ကောင်းကင် နဂါး သူတော်စင် သားတော်ကလည်း အေးစက်စက်နှာခေါင်းရှုံ့ကာ သူ့နောက်သို့ အရိပ် တစ်ခုအဖြစ် ပျံတက်လိုက်ပါသွားလေသည်။

...

ကောင်းကင်ယံ၌ လုရီသည် လက်နောက်ပစ်ထားလျက် မလှုပ်မယှက်ရပ်နေ၏။ တဟူးဟူးတိုက်ခတ်နေသော လေနီကြမ်းများကြောင့် သူ၏ နက်မှောင်ရှည်လျားသော ဆံပင်များက

တဖားဖားလွင့်မျောနေသလို၊ သူ၏ မှော်ဝတ်ရုံဖြူလွှလွှကလည်း လေထဲတွင် ကခုန်နေတော့သည်။ သူ၏ ချောမောသော မျက်နှာထက်၌ အပြုံးတစ်ခုနှင့်အတူ ချဉ်းကပ်လာသော ကောင်းကင်နဂါးမြင့်မြတ်သားတော်ကို စိုက်ကြည့်ရင်း တိုးတိုးလေး ရေရွတ်လိုက်၏။

"ကောင်းကင် နဂါး သူတော်စင် သားတော်ကို ငါ အနိုင်ယူရမယ်..."

[အလုပ်]

ကောင်းကင်နဂါး သူတော်စင် သားတော်ကို အနိုင်ယူပါ။

ဆုလာဘ်: စစ်မှန်သော နဂါးသွေး အဆီအနှစ် (၁၀၀) စက်

အလုပ်အား လက်ခံပါ: လက်ခံမည်လား/ငြင်းမည်လား။

လုရီ၏ ကိုယ် တုံ့ခနဲရပ်သွားပြီးနောက်၊ သူ့မျက်နှာထက်တွင် ဖုံးကွယ်မရသော ပျော်ရွှင်မှုတို့က အပြုံးရိပ်အဖြစ် သီဝေလာတော့သည်။

'နတ်ဘုရားအသွင်ပြောင်းအဆင့်ကို အခုမှ

အဆင့် ချိုးဖြတ်ထားတဲ့ ကောင်းကင်နဂါးသူတော်စင် နယ်မြေက သားတော်ကို နိုင်ရုံနဲ့

ဒီလောက် များတဲ့ ဆုလာဘ်... စစ်မှန်တဲ့ နဂါးသွေးအဆီအနှစ် အစက်တစ်ရာတောင်!'

ဤအရာက သူ့အား အချိန် အတန်ကြာ ကျင့်ကြံနိုင်စေပြီး သူ၏ ရုပ်ခန္ဓာစွမ်းအားကို နောက်ထပ်အဆင့်တစ်ခုသို့ မြှင့်တင်ရန် လုံလောက်လွန်းလှချေ၏။

လုရီ၏ ပြုံးနေသောမျက်နှာကိုမြင်သောအခါ ကောင်းကင် နဂါး သူတော်စင် သားတော်၏ မျက်နှာထားမှာ ပါးလွှာသော‌ ရေခဲပြင်တစ်ခု ကပ်ထားသည့်ပမာ အေးစက်မာကျောသွားသည်။

"မင်း... နောက်ကျရင်လည်း အခုလို ပြုံးနိုင်ပါစေလို့ ငါ မျှော်လင့်တယ်!"

လုရီက ပြုံးရယ်လျက်၊ "ငါ ဆက်ပြုံးနိုင်မလားဆိုတာ မင်း မကြာခင် သိရမှာပါ" ဟု ပြန်ပြောလိုက်၏။

"ဟွန်း!"

ကောင်းကင် နဂါး သူတော်စင် သားတော်က အေးစက်စက်နှာခေါင်းရှုံ့လိုက်ပြီး သူက ရွှေရောင်နဂါးငယ်တစ်ကောင်အလား ရှေ့သို့ခြေတစ်လှမ်းတိုးကာ လုရီထံသို့ ပျံလွှားရောက်ရှိလာတော့၏။ သူ၏ ညာလက်ကို ဆန့်ထုတ်လိုက်ရာ စစ်မှန်သော နဂါးတာအိုပုံစံများရစ်သိုင်းသွားပြီး သူ၏လက်သည် ဧရာမနဂါး လက်သည်းကြီးအဖြစ်သို့ ပြောင်းလဲသွားတော့သည်။

နဂါး လက်သည်းကြီးသည် ကြောက်မက်ဖွယ် ဖိအားများနှင့်အတူ ပတ်ဝန်းကျင်လေထုကိုပင် ပုံပျက်သွားစေကာ လုရီ၏ ဦးခေါင်းထက်သို့ လေထဲမှ လျင်မြန်စွာ ထိုးဆင်းကျရောက်လာလေသည်။

ပေါက်ကွဲထွက်လာသော ဝိညာဉ်စွမ်းအင်လှိုင်းလုံးကြီးက တိမ်ဖြူဂိုဏ်းတစ်ခုလုံးကို လွှမ်းခြုံသွားရာ အတွင်းရှိ ကျင့်ကြံသူအားလုံး ထိတ်လန့်တုန်လှုပ်ကာ အပြင်သို့ ရိပ်ခနဲ ပြေးထွက်လာကြတော့၏။

"ဘာ... ဘာဖြစ်တာလဲ။ ရန်သူတွေ ကျူးကျော်တာလား!"

"မဖြစ်နိုင်တာ! လုအစ်ကိုကိုယ်တိုင် အားအကောင်းဆုံး ဂိုဏ်းကာကွယ်ရေးအခင်းအကျင်းကြီး ချထားတာလေ။ ဘယ်သူကများ ငါတို့တိမ်ဖြူဂိုဏ်းကို စော်ကားရဲမှာလဲ။"

"ကောင်းကင်ကိုကြည့်စမ်း... အဲ... အဲဒါက...!"

ထိုအခါမှသာ အားလုံးသည် သူတို့အထက် ကောင်းကင်ယံမှ လုရီနှင့် ကောင်းကင် နဂါး သူတော်စင် သားတော်ကို သတိပြုမိကြတော့သည်။

ကောင်းကင် နဂါး သူတော်စင် သားတော်၏ နဂါးလက်သည်းကြောင့် အောက်မှကျင့်ကြံသူအားလုံး၏ ရင်ထဲ၌ တုန်လှုပ်ခြောက်ခြားသွား၏။ ထိုတိုက်ကွက်မျိုးကို နတ်ဘုရားအသွင်ပြောင်းအဆင့် မဟာအကြီးအကဲတစ်ပါးပင် တစ်ချက်တည်းနှင့် ကြံ့ကြံ့ခံနိုင်မည်မဟုတ်ချေ။

သို့သော်... ကျင့်ကြံသူများအတွက် လောကငရဲတစ်ခုပမာ ထင်ရသည့် ထိုတိုက်ကွက်သည် လုရီအနားသို့ ချဉ်းကပ်လာသောအခါ...

သူက လက်တစ်ဖက်ကို ခပ်ပေါ့ပေါ့လေး မြှောက်လိုက်ရုံသာ။

ဘုန်း!!!

လုရီ၏ သာမန် လက်ဖဝါးလေးသည် ဧရာမ နဂါးလက်သည်းကြီးနှင့် ထိပ်တိုက်တွေ့ဆုံကာ ကောင်းကင်ကိုပင် တိမ်းစောင်းသွားစေမည့် စွမ်းအင်လှိုင်းများကို ဖန်တီးလိုက်လေသည်။

အဓိကကျသည်မှာ... လုရီ၏ ခန္ဓာကိုယ်သည် လေထဲတွင် ကျောက်ရုပ်တစ်ရုပ်ပမာ မလှုပ်မယှက် တည်ရှိနေဆဲ ဖြစ်ချေသည်။

ဤမြင်ကွင်းက အောက်မှ ကျင့်ကြံသူအားလုံးကို မယုံကြည်နိုင်သည့်အလား မျက်လုံးများ ပြူးကျယ်သွားစေတော့သည်။ အထူးသဖြင့် နတ်နဂါးမြင့်မြတ်နယ်မြေမှ ကျင့်ကြံသူများမှာ အံ့အားသင့်ကာ ပါးစပ်အဟောင်းသား ဖြစ်ကုန်ကြ၏။

"ဘယ်... ဘယ်လိုဖြစ်နိုင်မှာလဲ! အစ်ကို

အော့ထျန်းက စစ်မှန်တဲ့ နဂါးတာအိုပုံစံကို ကျွမ်းကျင်နေပြီ။ သူ့ရဲ့တိုက်ခိုက်ရေးစွမ်းအားက ဟင်းလင်းပြင်ဥမင် အဆင့်နဲ့တောင် ယှဉ်နိုင်တယ်။ ဒီနဂါး လက်သည်းက သူ့ရဲ့အပြင်းထန်ဆုံး သိုင်းကွက်ပဲ! လုရီကို တစ်စက်ကလေးတောင် မလှုပ်ရှားနိုင်စေဘူးလား!" ကောင်းကင်နဂါးမြင့်မြတ်နယ်မြေမှ အကြီးအကဲတစ်ဦးက

မယုံကြည်နိုင်စွာ အော်ဟစ်လိုက်၏။

"လုရီရဲ့ ရုပ်ခန္ဓာက အလွန်အမင်း သန်မာတယ်လို့ ကြားဖူးတယ်။ သူ့ရဲ့ ကိုယ်ခန္ဓာကျင့်ကြံခြင်းကလည်း မနိမ့်ဘူးဆိုတာ အမှန်ပဲဖြစ်ရမယ်။ သူ့ရဲ့ရုပ်ပိုင်းဆိုင်ရာက အောင်းထန်ထက်တောင် သာလွန်နေနိုင်တယ်!" နောက်ထပ် မဟာယာနအဆင့် အင်အားကြီးတစ်ဦးက မျက်မှောင်ကြုတ်ရင်း ဆိုသည်။

"ဒါပေမဲ့ အော့ထျန်းကျင့်ကြံတာက နတ်နဂါးကိုးပါးအသွင်ပြောင်း အင်မော်တယ်ကျမ်းလေ! လုရီရဲ့ သွေးမျိုးဆက်က ဘယ်ကလာတာလဲ။

အင်မော်တယ်ကျမ်းနဲ့ ဘယ်လိုယှဉ်နိုင်မှာလဲ။"

လူအုပ်ကြီးက ကြွက်စီကြွက်စီ..ဆွေးနွေးနေကြသည်။

လုံမင်ဘိုးဘေးကမူ တည်ငြိမ်စွာပင် လုရီကို

စူးစိုက်ကြည့်နေ၏။ သူ၏မျက်နှာထားက တည်ငြိမ်နေသော်လည်း မျက်လုံးများထဲတွင်တော့ အံ့ဩမှု အရိပ်အယောင်များ ယှက်သန်းနေသည်။ လုရီ၏ အရေပြားပေါ်တွင် မိုးကြိုးပုံစံများ ဖြည်းညင်းစွာ ပေါ်ထွက်လာသည်ကို မြင်သောအခါ သူ၏ ရင်ထဲ၌ တစ်ချက်လှုပ်ခါသွား၏။

"မိတ်ဆွေလေး လုရီ... မင်းရဲ့ ကိုယ်ခန္ဓာသန့်စင်ခြင်းနည်းစနစ်က ကောင်းကင် နဂါးကိုးပါးအသွင်ပြောင်းကို မယှဉ်နိုင်ရင်တောင်မှ၊ ဒီနည်းစနစ်အပေါ် မင်းရဲ့ ပိုင်နိုင်ကျွမ်းကျင်မှုက အော့ထျန်းထက် အများကြီး သာလွန်နေတယ်။ ဒီလောက် နက်ရှိုင်းတဲ့ နားလည်မှု... ဒီနည်းစနစ်က မင်းအတွက်ပဲ သီးသန့် ဖန်တီးထားသလိုပဲ!"

ကပ်ဘေးဖြတ်ကျော် ပုဂ္ဂိုလ်ကြီးတစ်ပါးအနေဖြင့် လုံမင်ဘိုးဘေးသည် အင်မော်တယ်မိုးကြိုး နဂါးသိုင်း၏ မူလ အစိတ်အပိုင်းတစ်ခုအား ချက်ချင်းပင် အတပ်သိလိုက်လေသည်။

ထိုစဉ် လုံမင်ဘိုးဘေး၏ စိတ်ထဲတွင် အလင်းတစ်ချက် လင်းလက်သွား၏။ မဖြစ်နိုင်သော ဖြစ်နိုင်ခြေတစ်ခုကို တွေးမိလိုက်ရာ သူ၏ မျက်နှာတစ်ခုလုံး မယုံကြည်နိုင်သည့်အလား ဖြစ်သွားတော့သည်။

"ဒါ... ဒါ ဖြစ်နိုင်ပါ့မလား... မဟုတ်ဘူး... မဖြစ်နိုင်ဘူး!" လုံမင်ဘိုးဘေးက ခေါင်းကိုခါယမ်းရင်း တီးတိုးရေရွတ်နေ၏။

"ဘိုးဘေး၊ ဘာကို မဖြစ်နိုင်ဘူးလို့ ဆိုလိုတာပါလဲ" အနားမှ မဟာယာနအဆင့် ပုဂ္ဂိုလ်ကြီးက မေးလိုက်သည်။

လုံမင်ဘိုးဘေးက လုရီကိုသာ စူးစိုက်ကြည့်နေသည်။ ထို့နောက် မယုံနိုင်သော လေသံဖြင့် ဆို၏။

"...မိတ်ဆွေလေးလုရီ ကျင့်ကြံနေတဲ့ ကိုယ်ခန္ဓာသန့်စင်ခြင်း နည်းစနစ်က... သူ့အတွက် သီးသန့်ဖန်တီးထားသလိုပဲ... ပြောရရင်... သူ ကိုယ်တိုင် ဖန်တီးထားတာနဲ့ တူနေတယ်!"

"ဘာ... ဘယ်လို"

ထိုစကားကြောင့် ကောင်းကင်နဂါးမြင့်မြတ်နယ်မြေမှ ကျင့်ကြံသူအားလုံး၏ မျက်လုံးများ ပြူးကျယ်ကုန်ပြီး ထိတ်လန့်တုန်လှုပ်စွာ အော်ဟစ်လိုက်ကြတော့သည်။

"မဖြစ်နိုင်ဘူး! လုံးဝမဖြစ်နိုင်ဘူး! လုရီက ပါရမီဘယ်လောက်ကောင်းကောင်း သူက နတ်ဘုရားအသွင်ပြောင်းအဆင့်လေးပဲ ရှိသေးတာ! ဒီလိုနည်းစနစ်မျိုးကို သူဘယ်လိုလုပ်ဖန်တီးနိုင်မှာလဲ!"

"ဟုတ်တယ်။ ဒီနည်းစနစ်က ကျုပ်တို့ရဲ့ကောင်းကင် နဂါးကိုးပါး အသွင်ပြောင်းကျမ်းလောက် မကောင်းရင်တောင် ပေါင်းစည်းခြင်းနယ်ပယ်အဆင့် ကိုယ်ခန္ဓာကျင့်ကြံခြင်းနည်းစနစ်တစ်ခုထက် မနိမ့်ကျဘူး။ နတ်ဘုရားအသွင်ပြောင်းအဆင့်လေးက ဘယ်လိုလုပ် ကိုယ်တိုင်ဖန်တီးနိုင်မှာလဲ!"

မဟာယာနအဆင့်များနှင့် ဟင်းလင်းပြင်ဥမင်အဆင့် ပါရမီရှင်များပင် တစ်ယောက်ပြီးတစ်ယောက် မယုံကြည်နိုင်ကြောင်း ပြောဆိုနေကြ၏။

အကယ်၍ လုံမင်ဘိုးဘေး ပြောသည်မှာ အမှန်ဖြစ်ပါက... ဤအဖြစ်အပျက်သည် သူတို့၏ အဆိုးရွားဆုံးအိပ်မက်ထက်ပင် ထိတ်လန့်စရာကောင်းလွန်းနေပြီ ဖြစ်သည်။

အခန်း ၃၅၁- အလျင်စလို ကုန်လွန်သွားသော ခြောက်နှစ်...

~ "မယုံနိုင်စရာပဲ!!!"

ကောင်းကင် နဂါး သူတော်စင် သားတော်သည် သူ၏ အပြင်းထန်ဆုံး တိုက်ကွက်ကို လုရီက လက်တစ်ဖက်တည်းဖြင့် ပေါ့ပေါ့ပါးပါး ပိတ်ဆို့လိုက်သည်ကိုမြင်သော် ဒေါသတကြီး အော်ဟစ်လိုက်တော့သည်။

သူ၏ မျက်လုံးများ သွေးဆာနေသည့် အရောင်တို့ဖြင့် ပြည့်နှက်နေ၏။

"ကောင်းကင်နဂါးအသွင်ပြောင်းခြင်း!"

ဝီ..ဝီ..!

စစ်မှန်သော နဂါးတာအိုပုံစံများ သူ၏ကိုယ်ထဲ စီးဝင်သွားသည်နှင့် ကောင်းကင် နဂါး သူတော်စင် သားတော်၏ ကိုယ်မှ ကျွတ်ဆတ်သံများ ထွက်ပေါ်လာသည်။ သူ၏ ကိုယ်လုံးကိုယ်ထည်သည် ချက်ချင်းပင် သုံးမီတာကျော်အထိ မြင့်တက်လာပြီး ကြောက်မက်ဖွယ် သွေးဆာနေသော အရှိန်အဝါများက ပတ်ဝန်းကျင်ကို လွှမ်းခြုံသွားတော့သည်။

သူ၏ လျှို့ဝှက်သိုင်းကို သုံးလိုက်ပြီဖြစ်ရာ ကောင်းကင် နဂါး သူတော်စင် သားတော်၏ စွမ်းအားက အဆပေါင်းများစွာ တက်လာတော့သည်။

သို့သော် လုရီကမူ မဲ့ပြုံး ပြုံးလိုက်၏။ သူ၏ ကိုယ်ခန္ဓာ ပတ်လည်တွင်လည်း စစ်မှန်သော နဂါးတာအိုပုံစံများ လည်ပတ်လာသည်ကို အားလုံးမြင်လိုက်ရသည်။ ထိုပုံစံများသည် ကောင်းကင် နဂါး သူတော်စင် သားတော်၏ ပုံစံများထက်ပင် ပိုမို ရှင်းလင်းပြီး ပိုမို နက်နဲလှပေသည်။

"ဘာ...?! စစ်မှန်တဲ့ နဂါးတာအိုပုံစံတွေ?!"

ကောင်းကင် နဂါး မြင့်မြတ် နယ်မြေမှ ကျင့်ကြံသူအားလုံး၊ လုံမင်ဘိုးဘေးအပါအဝင်၊ မျက်လုံးများ ပြူးကျယ်ကုန်ကြပြီး ထိတ်လန့်တုန်လှုပ်စွာ အော်ဟစ်လိုက်ကြတော့၏။

"လုရီက... စစ်မှန်တဲ့ နဂါးတာအိုပုံစံကို ကျွမ်းကျင်နေတယ်?! ဒါ ဘယ်လိုလုပ် ဖြစ်နိုင်မှာလဲ! အဲဒါက စစ်မှန်တဲ့ နဂါးတစ်ကောင်မှာမှ သဘာဝအတိုင်း ပါလာတဲ့ အင်မော်တယ်အဆင့် တာအိုပုံစံပဲ၊ ငါတို့တောင် ဆရာ့ရဲ့အကူအညီနဲ့မှ ကံကောင်းလို့ မြင်ဖူးပြီး နားလည်နိုင်ခဲ့တာ! သူက ဘယ်လိုလုပ်...!"

"သူလည်း တစ်နေရာရာမှာ စစ်မှန်တဲ့ နဂါးတစ်ကောင်ကို မြင်ဖူးတာများလား။"

ကောင်းကင်နဂါးမြင့်မြတ်နယ်မြေမှ ကျင့်ကြံသူများ အလွန်အမင်း တုန်လှုပ်ခြောက်ခြားနေကြလေသည်။

လုရီနှင့် ထိပ်တိုက်ရင်ဆိုင်နေရသော ကောင်းကင် နဂါး သူတော်စင် သားတော်မှာမူ အံ့ဩလွန်း၍ စကားပင်မပြောနိုင်တော့။

သူ၏ မျက်လုံးများ ပြူးကျယ်နေပြီး လုရီ၏ ကိုယ်ပေါ်မှ မှိတ်တုတ်မှိတ်တုတ် တာအိုပုံစံများကို စူးစိုက်ကြည့်ရင်း မယုံကြည်နိုင်ခြင်းများဖြင့် ပြည့်နှက်နေ၏။

"မင်း...! မင်း ဘယ်လိုလုပ်ပြီး စစ်မှန်တဲ့ နဂါး

တာအိုပုံစံကို နားလည်သွားရတာလဲ!"

လုရီက ပြုံးစစဖြင့်၊ "ကံကောင်းသွားတာပါ။ စစ်မှန်တဲ့ နဂါးပုံရိပ်ယောင်တစ်ခု မြင်လိုက်ရပြီး ပုံစံကို မှတ်ထားလိုက်တာ။"

ကောင်းကင် နဂါး သူတော်စင် သားတော်: "???"

'ဘာ... ဘာပြောတယ်! မြင်ပြီး မှတ်ထားလိုက်ရုံ?!'

သူ ဒေါသတကြီး အော်ဟစ်လိုက်တော့သည်။

"မယုံဘူး! ငါက စစ်မှန်တဲ့ နဂါးတာအိုပုံစံကို နေ့တိုင်း လေ့လာနေတာ! ငါ့ရဲ့နားလည်မှုက မင်း ခဏလေး မြင်လိုက်ရတာလောက် မကောင်းဘူးဆိုတာ လုံးဝမဖြစ်နိုင်ဘူး"

ထိုအခိုက်အတန့်တွင် ကောင်းကင် နဂါး သူတော်စင် သားတော်၏ စိတ်ဓာတ်များ ပြိုလဲစပြုလာ၏။ အမျက်ဒေါသဖြင့် အဆက်မပြတ် မာန်သွင်းရင်း သူ၏ နဂါးလက်သည်းဖြင့် လုရီအား အပြင်းအထန် ကုပ်ဆွဲလိုက်တော့သည်။

ယခုတစ်ကြိမ် နဂါးလက်သည်းသည် ယခင်ကထက် အဆပေါင်းများစွာ ပိုမိုအားကောင်းနေ၏။ ကြောက်မက်ဖွယ် လေပြင်းများက အဝေးရှိ တောင်ထိပ်များကိုပင် တိုက်စားသွားတော့သည်။

လုရီကမူ တည်ငြိမ်နေဆဲ။

သူ၏ လက်ကို မြှောက်ကာ နဂါးလက်သည်းကို ပိတ်ဆို့လိုက်သည်။ ဒုန်း ဟူသော ဟိန်းညံသည့်အသံများကြား၌ လုရီသည် တစ်လက်မမျှပင်

မလှုပ်ရှားခဲ့။

ကောင်းကင် နဂါး သူတော်စင် သားတော်၏ မျက်နှာမှာမူ အားကုန် ထုတ်ထားသဖြင့် နီရဲနေသော်လည်း လုရီကို အနည်းငယ်မျှပင် တွန်းမနိုင်ခဲ့ပေ။

ဤအဖြစ်က ကောင်းကင် နဂါး သူတော်စင် သားတော်၏ ယုံကြည်ချက်အားလုံးကို ပြိုကျသွားစေတော့သည်။

"မဖြစ်... မဖြစ်နိုင်ဘူး!"

သူ၏ မျက်လုံးများ သွေးရောင်ရဲသွား၏။ သူ့ပတ်လည်တွင် စစ်မှန်သော နဂါးပုံရိပ်ယောင်များ ဖြစ်ပေါ်လာပြီး သူ၏ မျက်နှာက ဖြူဖျော့သွားသော်လည်း သူ၏ အရှိန်အဝါမှာမူ မယုံနိုင်လောက်အောင် မြန်ဆန်စွာ တိုးတက်လာတော့သည်။

လုရီက မျက်ခုံးပင့်လိုက်သည်။

'အခြေအနေ မဟန်တော့ဘူး...'

သူ၏ အရှိန်အဝါသည် သူ၏ မူလအနှစ်သာရကို မီးရှို့နေသကဲ့သို့ တိုးတက်နေ၏။ ဤသည်မှာ ကိုယ်ခန္ဓာကျင့်ကြံသူတစ်ဦးအတွက် ပြန်လည်နာလန်ထူရန် အလွန်ခက်ခဲသော ဒဏ်ရာဖြစ်ချေသည်။

'ငါ... သူ့ရဲ့ စိတ်ဓာတ်ကိုများ ချိုးဖျက်ပစ်မိတာလား။'

လုရီ စိတ်ထဲ၌ ထူးဆန်းသကဲ့သို့ ထင်၍ ရှေ့သို့ ခြေတစ်လှမ်းတိုးလိုက်၏။ နောက်တစ်ခဏ၌ သူ၏ လက်သီးတစ်လုံးသည် ကောင်းကင် နဂါး သူတော်စင် သားတော်၏ ဝမ်းဗိုက်ဆီသို့ ပစ်သွင်လိုက်တော့သည်။

ဘုန်း!

လက်သီး၏ စွမ်းအားက သူ၏ ခန္ဓာကိုယ်ကို ထိုးဖောက်ဝင်ရောက်သွားပြီး ကီလိုမီတာ ရာပေါင်းများစွာအတွင်းရှိ တိမ်များကို ပြန့်ကျဲစေကာ ကောင်းကင်ကို ကြည်လင်ပြာလဲ့သွားစေတော့သည်။

ဤမျှ ပြင်းထန်သော ထိုးနှက်မှုကြောင့် ကောင်းကင် နဂါး သူတော်စင် သားတော်သည် သွေးများ ဝေါ့ခနဲ အန်ချလိုက်၏။

သူ၏ အတွင်းစွမ်းအင်များ ပရမ်းပတာဖြစ်ကုန်ပြီး လောင်ကျွမ်းနေသော မူလအနှစ်သာရများလည်း လုရီ၏ လက်သီးတစ်ချက်ကြောင့် ပြန့်ကျဲသွားခဲ့လေသည်။

လုရီက ပြုံးလျက်၊ "ညအစ်ကို အော့ထျန်း၊ ငါတို့က သိုင်းပညာဖလှယ်ရုံသက်သက်ပါ။ ဘာလို့ ကိုယ့်ကိုယ်ကိုယ် ဒီလောက်တောင် နှိပ်စက်ရတာလဲ။"

အောက်တွင် ကပ်ဘေးဖြတ်ကျော်ဘိုးဘေးတစ်ပါးလုံး ရှိနေသည်။

ကောင်းကင် နဂါး သူတော်စင် သားတော်သာ စိတ်ဓာတ်ကျပြီး ပြင်းပြင်းထန်ထန် ဒဏ်ရာရသွားပါက အောက်မှ ပုဂ္ဂိုလ်ကြီးက သူ့ကို အပြစ်တင်မည်ကို လုရီ စိုးရိမ်မိ၏။

သူ့ဆရာ၏ စောင့်ရှောက်မှု ရှိနေသော်ငြား

ပြဿနာတစ်ခု ပိုတာထက် နည်းတာက ပိုကောင်းသည် မဟုတ်လော။ သူ လုရီသည်

ပြသနာကို ဖိတ်ခေါ်တတ်သူ မဟုတ်ပါချေ။

ထိုအခိုက်အတန့်၌ လုံမင် ဘိုးဘေးသည်လည်း အခြေအနေကို သတိပြုမိကာ ကောင်းကင် နဂါး သူတော်စင် သားတော်၏ ဘေးသို့ ပျံလွှားရောက်ရှိလာ၏။ သူ၏ မျက်နှာထား အနည်းငယ်ပြောင်းလဲသွားပြီး လက်ကို ဆန့်တန်းကာ အတွင်းအခြေအနေကို စစ်ဆေးလိုက်သည်။

ကောင်းကင် နဂါး သူတော်စင် သားတော်၏ မူလအနှစ်သာရ အနည်းငယ်သာ ဆုံးရှုံးသွားသည်ကို မြင်မှ သူ သက်ပြင်းချနိုင်တော့သည်။ လုံမင်ဘိုးဘေးက ပြင်းထန်စွာ အော်ငေါက်လိုက်၏။

"အော့ထျန်း! မင်း ငါ့ကို တကယ်ပဲ စိတ်ပျက်စေတာပဲ! စစ်မှန်တဲ့ နဂါးသွေးရဲ့ မူလအနှစ်သာရက ဘယ်လောက်တန်ဖိုးရှိလဲ မင်းမသိဘူးလား!

အဲ့ဒါကို ဒီလို အလဟဿ စွန့်ပစ်ရဲတယ်!"

ကောင်းကင် နဂါး သူတော်စင် သားတော်၏ မျက်နှာမှာ ဝမ်းနည်းအားငယ်မှုတို့ဖြင့် ပြည့်နှက်နေသည်။ ယခင်က တိုက်ခိုက်လိုစိတ်ပြင်းပြနေသော အမူအရာနှင့် လုံးဝ မတူတော့ချေ။

သူ၏ အားအသာဆုံးဖြစ်သော ကိုယ်ခန္ဓာသန့်စင်ခြင်းတွင်ပင် ပြားပြားဝပ် ရှုံးနိမ့်ခဲ့ခြင်းက သူ၏ ယုံကြည်ချက်အားလုံးကို တုန်လှုပ်သွားစေခဲ့ပြီလေ။

ကောင်းကင် နဂါး သူတော်စင် သားတော်၏ စိတ်ပျက်အားငယ်နေဟန်ကို မြင်သောအခါ

လုံမင် ဘိုးဘေး မျက်မှောင်ကြုတ်သွား၏။

သူပင်လျှင် ဘာဆက်ပြောရမှန်း မသိတော့။

ယခုမူ... သူတို့၏ သူတော်စင် သားတော်မှာ

လုရီ၏ လက်ချက်ဖြင့် စိတ်ဓာတ်ကျကာ

မသန်မစွမ်းနီးပါး ဖြစ်နေချေပြီ။

လုရီသည် စိတ်ဓာတ်ကျနေသော ကောင်းကင် နဂါး သူတော်စင် သားတော်ကို ကြည့်ရင်း ရင်ထဲတွင် အနည်းငယ် ထိတ်လန့်သွား၏။

'သေစမ်း! ဒီကောင်လေး တကယ်ပဲ စိတ်ဓာတ်ပြိုကွဲသွားပြီး နောက်ထပ် မသန်မာနိုင်တော့ရင်... ငါ ဘယ်ကနေ ကိုယ်ခန္ဓာကျင့်ကြံမှု ဆုလာဘ်တွေ သွားယူရတော့မှာလဲ!'

မဖြစ်ဘူး! လုံးဝမဖြစ်ဘူး!

လုရီ ထိုသို့ တွေးဆကာ ချောင်းတစ်ချက်ဟန့်လိုက်ပြီး အားယူ၍ ပြောလိုက်သည်။

"ညီအစ်ကို အော့ထျန်း၊ ဒါက တစ်ကြိမ်ရှုံးနိမ့်ရုံလေးပါပဲ။ ဘာလို့ ဒီလောက်တောင် စိတ်ဓာတ်ကျနေရတာလဲ။ ဒါက ညီအစ်ကို့ပုံစံနဲ့မတူပါဘူး။ မင်း ငါ့ကို နောက်တစ်ခေါက် ထပ်စိန်ခေါ်မှာကို ငါ စောင့်နေတုန်းပဲ!"

'ဟေး! ဒီလိုမနေပါနဲ့! ရွှင်လန်းစမ်းပါ! မင်း သန်မာလာမှ ငါ့ဆုလာဘ်တွေက ပိုကောင်းလာမှာကွ!'

လုရီက စိတ်ပျက်နေသော ကောင်းကင် နဂါး သူတော်စင် သားတော်ကို ကြည့်ရင်း အတွင်းစိတ်မှ အော်ဟစ်နေတော့သည်။

နတ်ဘုရားအသွင်ပြောင်းအဆင့်မှာပင် သူ့ကို

အနိုင်ရရုံဖြင့် နဂါးသွေးအဆီအနှစ် အစက်

တစ်ရာရသည်။

ဟင်းလင်းပြင်ဥမင်၊ ပေါင်းစည်းခြင်း၊ မဟာယာန သို့မဟုတ် ကပ်ဘေးဖြတ်ကျော်အဆင့်ကို သူရောက်သွားရင်ရော...။

သူ့ကိုသာ ဒီလို စိတ်ဓာတ်ကျသွားစေခဲ့မိမှန်း သိခဲ့လျှင်... သူ နည်းနည်းလောက် ညှာတာပေးလိုက်မှာ...။

နောင်တများက လုရီ၏ ရင်ထဲတွင် ပြည့်နှက်နေ၏။

လုရီ၏ စကားကို ကြားသောအခါ ကောင်းကင် နဂါး သူတော်စင် သားတော်၏ ကိုယ်ခန္ဓာ အနည်းငယ် တုန်ယင်သွားသည်။

သူက ရှုပ်ထွေးသော အမူအရာဖြင့် လုရီကို မော့ကြည့်ရင်း ကိုယ့်ကိုယ်ကိုယ် သရော်သည့်လေသံဖြင့် ဆို၏။

"လုရီ! မင်းရဲ့ ကြင်နာဟန်ဆောင်မှုတွေကို ရပ်လိုက်စမ်း! မင်းရဲ့စွမ်းအားက ဒီလောက်တောင် သန်မာနေတာ၊ ငါ့လိုကောင်နဲ့ သိုင်းပညာဖလှယ်ဖို့ ဘာလို့ လိုအပ်နေရမှာလဲ။ ငါက မင်းရဲ့ပြိုင်ဘက်တောင် မဟုတ်တော့ဘူး ထင်တယ်!"

လုရီက ချက်ချင်းပင် တင်းမာသော မျက်နှာထားဖြင့် ပြန်ပြောလိုက်သည်။

"အဲ့လို မမြင်သင့်ဘူးလေ! စကားပုံ တစ်ခု ရှိတယ်၊ 'သုံးယောက်သွားရင် ဆရာတစ်ယောက်တော့ ပါတယ်' တဲ့။ မင်းရဲ့ စွမ်းအားက ငါ့လောက် မရှိသေးရင်တောင်၊ အစ်ကို အောင်းထန်၊ မင်းဆီမှာ ငါ့မှာ မရှိတဲ့ အားသာချက်တွေ အများကြီးရှိတယ်။ ငါ စစ်မှန်တဲ့ နဂါးတာအိုပုံစံအတွက် ရခဲ့တဲ့ ဉာဏ်အလင်း အများစုက မင်းနဲ့ သိုင်းပြိုင်နေတုန်း အလင်းပွင့်ခဲ့တာတွေချည်းပဲ။ ညီအစ်ကိုနဲ့ တိုက်ခိုက်ရလို့ ငါ အများကြီး အကျိုးရှိခဲ့တယ်။ မင်းက ငါ့အတွက် တကယ်ကို ထိုက်တန်တဲ့ ပြိုင်ဘက်တစ်ယောက်ပါ! အခုလို အရှုံးပေးလိုက်မယ်ဆိုရင်တော့... ငါ့အတွက် အရမ်းကို စိတ်ပျက်စရာ ကောင်းလိမ့်မယ်!"

'ဒီအတိုင်းကြီး လက်လျှော့လိုက်ရင် ငါ့ရဲ့ အလုပ်ဆုလာဘ်တွေ ဘယ်လိုလုပ်တော့မလဲကွ!'

လုရီက ကောင်းကင် နဂါး သူတော်စင် သားတော် သူ့ကို မယုံမည်စိုး၍ အလွန်အမင်း စိတ်ရင်းမှန်ဟန်ဖြင့် စူးစိုက်ကြည့်နေ၏။

လုရီ၏ စကားကို ကြားရသောအခါ ကောင်းကင် နဂါး သူတော်စင် သားတော်သာမက အနီးရှိ

လုံမင်ဘိုးဘေးပင် တောင့်ခနဲ ဖြစ်သွားတော့သည်။

လုရီ၏ အဖြူရောင်ဝတ်ရုံများ လေထဲတွင် တဖျပ်ဖျပ်လွင့်နေပုံ၊ သူ၏ အေးချမ်းတည်ငြိမ်သော အမူအရာကို မြင်သောအခါ လုံမင်ဘိုးဘေး၏ မျက်နှာတွင် ဖော်မပြနိုင်သော ခံစားချက်တစ်ခု ဖြတ်ပြေးသွားသည်။ ထို့နောက် သူက ချီးကျူးလိုက်တော့၏။

"'သုံးယောက်သွားရင် ဆရာတစ်ယောက်တော့ ပါတယ်' တဲ့လား... ကောင်းလိုက်တဲ့ စကား... အင်မော်တယ် မဖြစ်သေးခင်ကတည်းက မင်းမှာ အင်မော်တယ်တစ်ယောက်ရဲ့ စိတ်နှလုံးသား ရှိနေပြီပဲ။ မိတ်ဆွေလေးလုရီ၊ မင်းဟာ တကယ်ပဲ တာအိုရဲ့ အချစ်တော်တစ်ယောက်ပါတကား..."