တောင်ပိုင်းကြယ်ဒေသ၏ အဆင့် ၅၃....

Vol. 33 Ch. 496

" သွေးမျိုးဆက်ကျင့်ကြံခြင်းလမ်းစဉ်က ကောင်းမှုအမှတ် သန်းတစ်ရာတောင် ရတာလား။ " လင်းယွမ်က အနည်းငယ် အံ့အားသင့်သွားသည်။

သိုင်းတာအိုနဝမအလွှာကဏ္ဍက ကောင်းမှုအမှတ် သန်းတစ်ရာရှိလျှင်တောင် ၎င်းက အနည်းငယ် ပိုများခြင်းသာဖြစ်ပြီး မျှော်လင့်ချက်အတွင်း ရှိလေသည်။ သို့သော် သွေးမျိုးဆက်ကျင့်ကြံခြင်းလမ်းစဉ်က လူတစ်ယောက်၏ သွေးမျိုးဆက် ကန့်သတ်ချက်ပေါ်တွင် မူတည်နေပြီး အတွင်းကမ္ဘာကို ဖွင့်လှစ်ရန် အလွန်ခက်ခဲသောကြောင့် သတ္တမအလွှာ အထွတ်အထိပ်သို့သာ ရောက်နိုင်သည်ဟု ပြောနိုင်လေသည်။ သို့သော် ၎င်းက သိုင်းတာအိုနဝမအလွှာကဏ္ဍ၏ တန်ဖိုးချင်းတူညီလေသည်။

" အဲ့ဒါက လူကြိုက်များနိုင်လို့လား။ " လင်းယွမ်က စဉ်းစားလိုက်သည်။

သိုင်းတာအိုနဝမအလွှာကဏ္ဍက သိုင်းတာအိုဆင့်ကဲပြောင်းလဲသူများအတွက်သာဖြစ်သည်။ ထို့အပြင် နဝမအလွှာကို ရောက်မှသာ အသုံးဝင်လေသည်။ လူသားမျိုးနွယ်တွင် နဝမအလွှာ ဆင့်ကဲပြောင်းလဲသူများနည်းပါးနေဆဲ ဖြစ်သည်။

အထွတ်အထိပ်မျိုးနွယ်၊ စွမ်းအားကြီးမျိုးနွယ်၊ အထူးသက်ရှိများ၊ သီခြားဆင့်ကဲပြောင်းလဲသူများ အားလုံးကို ခြုံကြည့်လိုက်လျှင် နဝမအလွှာများက ရှားပါးခြင်းမရှိပေ။

သို့သော် သွေးမျိုးဆက်ကျင့်ကြံခြင်းလမ်းစဉ်က သိုင်းတာအိုဆင့်ကဲပြောင်းလဲခြင်းလမ်းစဉ်၏ အခွဲတစ်ခုဖြစ်သော်လည်း သူတစ်ခုတည်းလည်း ရပ်တည်နိုင်လေသည်။

အင်မော်တယ်တာအိုကမ္ဘာမှ ရုပ်ခန္ဓာကျင့်ကြံခြင်းလမ်းစဉ်ကဲ့သို့ဖြစ်သည်။ တာအိုအင်မော်တယ်ဂိုဏ်း၏ တပည့်များက ရုပ်ခန္ဓာကျင့်ကြံခြင်းကို ကျင့်နိုင်ရုံသာမက နတ်ဆိုးကျင့်ကြံသူများကလည်း ရုပ်ခန္ဓာကျင့်ကြံခြင်းကို ကျင့်ကြံနိုင်လေသည်။

" သူ့ရဲ့ ကျယ်ပြန့်မှုနဲ့တောင် သန်းတစ်ရာက မထိုက်တန်သေးဘူး။ " လင်းယွမ်က အနည်းငယ် မျက်မှောင်ကြုတ်နေသည်။

သွေးမျိုးဆက်ကျင့်ကြံခြင်းလမ်းစဉ်က သူ၏ ထူးခြားသော ဖန်တီးမှုတစ်ခုမဟုတ်ပေ။ လူသားမျိုးနွယ်တွင် အချိန်အကြာကြီးရပ်တည်နေကြသော သွေးမျိုးဆက်ဆင့်ကဲပြောင်းလဲခြင်းမိသာစုများရှိလေသည်။ သို့သော် သူတို့၏ သွေးမျိုးဆက်အပေါ် အသုံးပြုမှုက လင်းယွမ် အနှစ်ချုပ်ထားသော သွေးမျိုးဆက်ကျင့်ကြံခြင်းလမ်းစဉ်ကဲ့သို့ ပြည့်စုံခြင်းမရှိပေ။

" ဒါရဲ့ တန်ဖိုးကို သက်ရောက်စေတဲ့ အခြားအရာတွေ ရှိလိမ့်မယ်။ " လင်းယွမ်က ခန့်မှန်းလိုက်သည်။

နတ်ဘုရားသုံးပါး၏ အကဲဖြတ်မှုအရ သွေးမျိုးဆက်ကျင့်ကြံခြင်းလမ်းစဉ်က ကောင်းမှုအမှတ် သန်းငါးဆယ်သာ ရှိသည်ကို သူမသိပေ။ ၎င်း၏ တန်ဖိုးကို အတင်းအကျပ် မြှင့်တင်ခဲ့သူများမှာ ကြီးမြတ်သူများသာ ဖြစ်သည်။ လင်းယွမ်၏ တိုးတက်မှုအတွက် အထောက်အကူဖြစ်စေရန် အနည်းငယ် ပိုပေးခြင်းက သူတို့အတွက် အရေးမကြီးပေ။

" ငါ့ရဲ့ စုစုပေါင်း ကောင်းမှုအမှတ်က ၂၀၈သန်း...."လင်းယွမ်က ကျေနပ်မိသွားသည်။

" ငါ ဟွမ်ယိကို သတ်ပြီးတဲ့နောက်မှာ နဝမအလွှာ မျိုးနွယ်ခြားတွေက ပုန်းအောင်းနေကြတာ နှမြောစရာပဲ။ " လင်းယွမ်က ခေါင်းခါလိုက်သည်။

ရွှမ်ဟွမ်လျို့ဝှက်နယ်မြေက ကျယ်ပြောလှပြီး နတ်ဘုရားကမ္ဘာထက် အဆပေါင်းများစွာ ပို၍ ကြီးမားလေသည်။ ထိုနဝမအလွှာ မျိုးနွယ်ခြားများက ပုန်းနေခဲ့လျှင် လင်းယွမ်က ရည်ရွယ်ချက်ရှိရှိ ရှာဖွေလျှင်တောင် တွေ့နိုင်ရန် ခက်ခဲလှသည်။

" ထားလိုက်တော့။ ခေါ်သံရဲ့ အရင်းအမြစ်ကို ရှာဖွေတာက ပိုအရေးကြီးတယ်။ "

လင်းယွမ်၏ အမြင်တွင် ထိုက်ယန်မူလစိတ်ဝိညာဉ်က ရွှမ်ဟွမ်လျို့ဝှက်နယ်မြေ၏ အတွင်းပိုင်းသို့ သွားနေခဲ့သည်။ လမ်းတစ်လျှောက်တွင် ဒေသခံသက်ရှိများကို ဆွဲဆောင်ပြီး သူတို့ကို အလွယ်တကူ သတ်ဖြတ်က ရွှမ်ဟွမ်သလင်းကျောက်များ ယူသွားလေ့ရှိသည်။

" ဟုတ်သားပဲ။ သိုင်းတာအိုဆင့်ကဲပြောင်းလဲခြင်းလမ်းစဉ်ရဲ့ လက်ရှိအဆင့်သတ်မှတ်ချက်ကို ကြည့်ရမယ်။ " လင်းယွမ်က တွေးလိုက်သည်။

အဋ္ဌမအလွှာတွင် ရှိနေစဉ် သိုင်းတာအိုဆင့်ကဲပြောင်းလဲခြင်းလမ်းစဉ်က ချီခွန်ဆင့်ကဲပြောင်းလဲခြင်းအဆင့်တွင် အဆင့်တစ်၊ အန်နန်ဆင့်ကဲပြောင်းလဲခြင်းအဆင့်တွင် အဆင့်တစ် ဖြစ်ခဲ့ပြီး အဋ္ဌမအလွှာနှင့် နဝမအလွှာဆင့်ကဲပြောင်းလဲခြင်းလမ်းစဉ်များကို ကျော်တက်သွားခဲ့သည်။

ယခု သိုင်းတာအိုဆင့်ကဲပြောင်းလဲခြင်းလမ်းစဉ်၏ နဝမအလွှာကို တင်ခဲ့ပြီး နတ်ဘုရားသုံးပါးကလည်း ကောင်းမှုအမှတ် သန်းတစ်ရာကို တန်ဖိုးဖြတ်ခဲ့လေသည်။ လင်းယွမ်က သိုင်းတာအိုဆင့်ကဲပြောင်းလဲခြင်းလမ်းစဉ်၏ အဆင့်များကို မျှော်လင့်နေဆဲ ဖြစ်သည်။

" ကန်လန်ကြယ်မှာ အဆင့်တစ်၊ ချီခွန်ကြယ်နယ်မြေမှာ အဆင့်တစ်၊ အန်နန်ကြယ်မဟာမိတ်မှာ အဆင့်တစ်.... တောင်ပိုင်းကြယ်ဒေသမှာ အဆင့် ၅၃လား။ " လင်းယွမ်က အဆင့်သတ်မှတ်ချက်များကို ကြည့်လိုက်သည်။

" တောင်ပိုင်းကြယ်ဒေသရဲ့ ဆင့်ကဲပြောင်းလဲခြင်းအဆင့်မှာ အဆင့် ၅၃။ " လင်းယွမ်က တောင်ပိုင်းကြယ်ဒေသ၏ ဆင့်ကဲပြောင်းလဲခြင်းလမ်းစဉ်များကို ကြည့်လိုက်သည်။

တောင်ပိုင်းကြယ်ဒေသက လူသားမျိုးနွယ်၏ အဓိကကြယ်ဒေသငါးခုထဲမှ တစ်ခုဖြစ်ပြီး အလင်းနှစ်များစွာကျယ်ဝန်းလေသည်။ ထိုကြယ်ဒေသမှ ဆင့်ကဲပြောင်းလဲခြင်းပညာရှင်များ၊ နဝမအလွှာ၊ ဒသမအလွှာနှင့် အထက်အဆင့် ဆင့်ကဲပြောင်းလဲသူများပင် သမိုင်းမှ ထွက်ပေါ်ခဲ့ဖူးသည်။

တောင်ပိုင်းကြယ်ဒေသ၏ ဆင့်ကဲပြောင်းလဲခြင်းအဆင့်ထဲသို့ ဝင်ရောက်ခဲ့သော ဆင့်ကဲပြောင်းလဲခြင်းလမ်းစဉ်တိုင်းက လူသားမျိုးနွယ်၏ အထွတ်အထိပ်တွင် ရှိနေသည့် လမ်းစဉ်များဖြစ်သည်။ ယခင် အဋ္ဌမအလွှာ သိုင်းတာအိုဆင့်ကဲပြောင်းလဲခြင်းလမ်းစဉ်က တောင်ပိုင်းကြယ်ဒေသ၏ ဆင့်ကဲပြောင်းလဲခြင်းအဆင့်သို့ ဝင်ရောက်နိုင်ခြင်းမရှိခဲ့ပေ။

" အလွှာဆယ့်တစ် ဆင့်ကဲပြောင်းလဲခြင်းလမ်းစဉ်အချို့က သိုင်းတာအိုဆင့်ကဲပြောင်းလဲခြင်းလမ်းစဉ်ရဲ့ နောက်ကို ရောက်သွားတာလား။ " လင်းယွမ်က စိတ်ထဲမှ အံ့အားသင့်သွားမိသည်။

သူက သိုင်းတာအိုဆင့်ကဲပြောင်းလဲခြင်းလမ်းစဉ်၏ အလားအလာကို လျှော့တွက်နေဆဲ ဖြစ်သည်။ နဝမအလွှာသိုင်းတာအိုဆင့်ကဲပြောင်းလဲခြင်းလမ်းစဉ်က အလွှာဆယ့်တစ် ဆင့်ကဲပြောင်းလဲခြင်းလမ်းစဉ်ကို ကျော်တက်သွားသည်မှာ မယုံကြည်နိုင်စရာကောင်းလှသည်။

၎င်းက အလွှာဆယ့်တစ် ဆင့်ကဲပြောင်းလဲခြင်းလမ်းစဉ်တစ်ခုဖြစ်သည်။ တိုးတက်ရန်အတွက် အလားအလာက သုညဖြစ်လျှင်တောင် ၎င်းက အလွှာဆယ့်တစ်သို့ တည်ငြိမ်စွာ ကျင့်ကြံနိုင်သော လမ်းစဉ်တစ်ခုဖြစ်သည်။

" နတ်ဘုရားသုံးပါးရဲ့အမြင်မှာ သိုင်းတာအိုဆင့်ကဲပြောင်းလဲခြင်းလမ်းစဉ်က အမြင့်ဆုံးဆင့်ကဲပြောင်းလဲခြင်းလမ်းစဉ်တစ်ခုဖြစ်ဖို့ အလားအလာရှိပုံရတယ်။ " လင်းယွမ်က စိတ်ထဲမှ တွေးလိုက်သည်။

၎င်းက သိုင်းတာအိုဆင့်ကဲပြောင်းလဲခြင်းလမ်းစဉ်၏ အဆင့်သတ်မှတ်ချက်ကို ရှင်းပြနိုင်သော တစ်ခုတည်းသောအရာဖြစ်သည်။

လက်ရှိလူသားမျိုးနွယ်မှ ထိန်းချုပ်ထားသော အလွှာဆယ့်တစ် ဆသ့်ကဲပြောင်းလဲခြင်းလမ်းစဉ်များက သူတို့၏ အလားအလာများ ကုန်ဆုံးခဲ့ပြီး အမြင့်ဆုံးဆင့်ကဲပြောင်းလဲခြင်းလမ်းစဉ်တစ်ခုဖြစ်ရန် မျှော်လင့်ချက်မရှိကြတော့ပေ။ ထို့ကြောင့် သိုင်းတာအိုဆင့်ကဲပြောင်းလဲခြင်းလမ်းစဉ်က ၎င်းတို့ကို ကျော်တက်သွားခြင်းဖြစ်သည်။

" အမြင့်ဆုံးဆင့်ကဲပြောင်းလဲခြင်းလမ်းစဉ်

.." လင်းယွမ်က စိတ်လှုပ်ရှားသွားသည်။

လွန်ခဲ့သော ဆယ်စုနှစ်အချို့က မျိုးနွယ်ခြားများ၏ စစ်မြေပြင်ရှိ လေဟာနယ်အက်ကြောင်းမှ ကြီးမြတ်သူတစ်ယောက်၏ ရုပ်အလောင်းထွက်ပေါ်လာသောအခါ ကြီးမြတ်သူများစွာကို ပြင်းထန်စွာ တိုက်ခိုက်စေခဲ့သည်။ ထိုတစ်ချက်နှင့်ပင် အမြင့်ဆုံးဆင့်ကဲပြောင်းလဲခြင်းလမ်းစဉ်၏ တန်ဖိုးကို ကြည့်နိုင်လေသည်။

၎င်းက သေဆုံးသွားသော ကြီးမြတ်သူတွင် အမြင့်ဆုံးဆင့်ကဲပြောင်းလဲခြင်းလမ်းစဉ်တစ်ခု ပါဝင်နိုင်သည်ဟု ခန့်မှန်းချက်တစ်ခုသာ ဖြစ်သည်။

" လူသားမျိုးနွယ်ရဲ့ ဆင့်ကဲပြောင်းလဲခြင်းအဆင့်..."လင်းယွမ်က နောက်ဆုံးစာရင်းကို ကြည့်လိုက်သည်။

လူသားမျိုးနွယ်ဆင့်ကဲပြောင်းလဲခြင်းအဆင့်တွင် လူသားမျိုးနွယ်၏ အစွမ်းထက်ဆုံး ဆင့်ကဲပြောင်းလဲခြင်းလမ်းစဉ်တစ်ရာ ပါဝင်လေသည်။ အမြင့်ဆုံးဆင့်ကဲပြောင်းလဲခြင်းလမ်းစဉ်ကိုးခုအပါအဝင်ဖြစ်သည်။

" တစ်ရာထဲတောင် မဝင်ဘူး။ " လင်းယွမ်က အံ့ဩခြင်းမရှိပေ။

လူသားမျိုးနွယ်ဆင့်ကဲပြောင်းလဲခြင်းအဆင့်ပေါ်ရှိ ဆင့်ကဲပြောင်းလဲခြင်းလမ်းစဉ်အများစုက အမြင့်ဆုံးဆင့်ကဲပြောင်းလဲခြင်းလမ်းစဉ်ဖြစ်လာရန် မျှော်လင့်ပြီး ကြီးမားသော အလားအလာများကို ပိုင်ဆိုင်ထားလေသည်။ ၎င်းတို့က အလွှာဆယ့်တစ် ဆင့်ကဲပြောင်းလဲခြင်းလမ်းစဉ်များပင်ဖြစ်သည်။

သိုင်းတာအိုဆင့်ကဲပြောင်းလဲခြင်းလမ်းစဉ်က ကြီးမားသော အလားအလာများ ရှိနေလျှင်တောင် ၎င်းက နဝမအလွှာ ဆင့်ကဲပြောင်းလဲခြင်းလမ်းစဉ်တစ်ခုသာ ဖြစ်သည်။ ၎င်းက လူသားမျိုးနွယ်ဆင့်ကဲပြောင်းလဲခြင်းအဆင့်ထဲသို့ ရောက်နေမှသာ ထူးဆန်းနေပေလိမ့်မည်။

အားလုံးကို စစ်ဆေးပြီးနောက် လင်းယွမ်က ဘူးသီးခြောက်ကို ထုတ်ယူလိုက်သည်။

" မိုင်နှစ်ဘီလီယံနီးပါး ကျယ်ဝန်းတဲ့ အတွင်းကမ္ဘာကို ဖန်တီးဖို့ အချိန်ကျပြီ။ " လင်းယွမ်က စိတ်ထဲမှ တွေးလိုက်သည်။

ကိုးကြိမ်မြောက် ဆင်းသက်မှုမတိုင်မီ လင်းယွမ်က ဘူးသီးခြောက်မှ ပဉ္စမမြောက်အရည်ကိုသာ စုပ်ယူရပြီး သူ၏ အတွင်းကမ္ဘာက မိုင် ၁.၆ ဘီလီယံကျော်သာ ရှိခဲ့သည်။ မိုင်နှစ်ဘီလီယံနီးပါးက မိုင်သန်းသုံးဆယ်သာ ထည့်ပေါင်းခြင်းဖြစ်သော်လည်း လေဟာနယ်အလွှာ နှစ်ဘီလီယံကျော်ကို ပေါင်းစပ်လိုက်သောအခါ ကြောက်စရာကောင်းသော တိုးတက်မှုတစ်ခုဖြစ်သွားသည်။

" မူလစိတ်ဝိညာဉ်နှစ်ခုရဲ့ အတွင်းကမ္ဘာက ရွှမ်ဟွမ်လျို့ဝှက်နယ်မြေက ပြန်လာမှစီစဉ်ရမယ်။ " လင်းယွမ်က သူ၏ မူလခန္ဓာကိုယ်ကို အဓိကအာရုံစိုက်ထားလေသည်။

ထိုက်ယန်မူလစိတ်ဝိညာဉ်က ရွှမ်ဟွမ်လျို့ဝှက်နယ်မြေတွင် ရှိနေသောကြောင့် သူ၏ တိုးတက်မှုက အရေးမကြီးပေ။

အန်နန်ကြယ်မဟာမိတ် VR ကမ္ဘာရှိ အလယ်ပိုင်းဧရိယာတွင်။

ဆင့်ကဲပြောင်းလဲသူများနှင့် အဆင့်မြင့်နိုင်ငံသားများက ဆင့်ကဲပြောင်းလဲခြင်းအဆင့်ကို ကြည့်နေကြသည်။ ထို့နောက် အထက်မှ သိုင်းတာအိုဆင့်ကဲပြောင်းလဲခြင်းလမ်းစဉ်ကို ကြည့်မိချိန်တွင် သူတို့၏ မျက်နှာက တုန်လှုပ်သော အမူအရာများကို ဖော်ပြနေကြသည်။