ဝါးမျိုခြင်း

ချန်လွေ့ နောက်ထပ် စမ်းကြည့်ရာ ဖန်တီးခြင်းစွမ်းအား ပါဝင်သည့် [နွေဦးပိုင်နက်]က သွေးရောင်ပိုးအိမ် အပေါ် ထူးခြားသော ပျော်ဝင် စေနိုင်သည့် အာနိသင် ရှိသည်ကို တွေ့ရှိခဲ့၏။ ထိုအချိန် ရေရိပ်ပုလဲ၏ အပြာရောင် အလင်းအောက်တွင် ရင်ပြား လိုလီနှင့် မာယာရှင် မင်းသမီးလေးတို့ ထုံထိုင်းနေရာမှ ပြန်လည်ကောင်းမွန်လာခဲ့သည်။

“ရှင်ပဲ! ရှင်ပဲ ခုနက ကျွန်မတို့ကို ကယ်ခဲ့တာ!” လာလာရီယာ၏ စွမ်းအားက နတ်ဘုရား တစ်ပိုင်း ဖြစ်ရာ သူက အမြန်ဆုံး နိုးထခဲ့သည်။ ချန်လွေ့က သူနှင့် ဟယ်လင်ကို ခုနက နောက်ဆုံးအချိန်တွင် ချန်လွေ့ ကယ်ခဲ့ကြောင်းကို သေချာခဲ့သည်။ အိုလစ်ဖီးရက်စ် ကဲ့သို့မဟုတ်ဘဲ နိုးတဝက်၊ သတိလက်ခြင်း တဝက် ဖြစ်နေခဲ့ပုံရသည်။

“ဗက်ဇယ်နာသေသွားပြီ! အိုလစ်ဖီးရက်စ်နဲ့ အယ်ဒီလိုင်းကို သွားကယ်တော့!” ရင်ပြားလိုလီက အတွေ့အကြုံရှိပြီး ချက်ချင်းဆိုသလို အခြေအနေကို အတိုးချုံး ရှင်းပြခဲ့၏။

“အိုလစ်ဖီးရက်စ် ဘာမှ မဖြစ်ဘူး။ အယ်ဒီလိုင်း ဘယ်မှာလဲ”

“သူက အိုလစ်ဖီးရက်စ် နောက်မှာ ရှိတာ မှတ်မိတယ်…”

ထိုသို့ပြောနေရင်း ဟယ်လင်လည်း နိုးလာခဲ့သည်။ “ချန်လွေ့…”

ထိုအချိန် သတိပေးသည့် နိမိတ် တစ်ခုသည် ချန်လွေ့၏ စိတ်ထဲတွင် လှိမ့်တက်လာခဲ့သည်။ တစ်ချိန်တည်း မှာပင် ဟယ်လင်နှင့် လာလာရီယာ တို့၏ အာမေဍိတ်သံများ ထွက်ပေါ် လာခဲ့သည်။ “သတိထား!”

ဧရာမ’ဝဲကတော့’က ကြောက်စရာ ကောင်းသော မျက်နှာ အဖြစ် ပြောင်းသွားကြောင်း မြင်လိုက်ရ၏။ သွေးနီရောင် အကြည့်က ချန်လွေ့ကို တင်းကျပ်စွာ စိုက်ကြည့်နေသည်။

ချန်လွေ့ မတုံ့ပြန် နိုင်ခင်မှာပင် ကြောက်မက်ဖွယ်ကောင်းသော ဝိညာဉ် စွမ်းအားလှိုင်း တစ်ခု လှိမ့်တက် သွားကြောင်းကို သူ ခံစားလိုက်ရသည်။ သူ၏ စိတ်ထဲသို့ အချွန်တစ်ခုဖြင့် ထိုးသွင်းခံရသကဲ့သို့ ခံစားလိုက်ရပြီး၊ ဖော်ပြ၍ မရသော နာကျင်မှုက သူ့ဝိညာဉ် တစ်ခုလုံးကို ချက်ချင်း ပျံ့နှံ့သွားခဲ့သည်။ သူ၏ အသိစိတ်တစ်ခုလုံး ကွဲကြေလုနီးပါး ဖြစ်သွားခဲ့ရသည်။

ဧရာမဖိအားတစ်ခုက အတွင်းမှ အပြင်သို့ ရောက်လာခဲ့လေသည်။ ကြယ်ချပ်ကာက ကလစ်ခနဲ အမှန်ပင် အက်ကွဲသွားခဲ့သည်။

ဝိညာဉ်ကွဲကြေ...

ထိုအရာက ဒီလော့စ်ရို၏ ပါရမီပင်။

ထိုဝိညာဉ် တုန်လှုပ်မှု စွမ်းအားက ယခင် တစ်ကြိမ်က ဒီလော့စ်ရို၏ ပုံရိပ်ယောင်ထက် အနည်းငယ် ပို၍ အစွမ်းထက်ခဲ့သည်။ ချန်လွေ့ အလစ်ငိုက်မိ သွားသောကြောင့် သူ အကြီးအကျယ် ဒဏ်ရာရခဲ့သည်။

ဒီလော့စ်ရိုက တခြားတစ်ဖက်တွင် စေတန်နှင့် တိုက်ခိုက် နေရပြီး စိတ်မပျံ့လွင့်ပါက၊ ထိုတိုက်ခိုက်မှု ပို၍ အစွမ်းထက်ပေလိမ့်မည်။

သို့သော် ထိုထိုးနှက်ချက်နောက် မျက်နှာက ပြင်းထန်သော တုန်လှုပ်မှု တစ်ခုကို လက်ခံရရှိ ခဲ့သလိုပင် ပြင်းထန်သော တုန်လှုပ်မှု ရှိခဲ့သည်။

၎င်းက စူပါစနစ် အထူးဂုဏ်သတ္ထိ [ပြစ်ဒဏ်] ဖြစ်သည်။ ခံစားရသည့် ထိခိုက်မှုအားလုံးကို တန်ပြန်နိုင်သော အခွင့်အရေးရှိသည်။ ဓူဝံကြယ်ခရမ်း အဆင့်တွင် အသက်ဝင်နိုင်နှုန်းက ၅၀% ခန့်ရှိပြီး၊ တန်ပြန်ခြင်း၏ စွမ်းအားသည် တိုက်ခိုက်မှု၏စွမ်းအား ၅၀% မှ ၈၀% အထိ ဖြစ်သည်။

ဝိညာဉ်ပျက်စီးခြင်း၏စွမ်းအား တန်ပြန်လာမည်ဟု ဒီလော့စ်ရို လုံးဝ မထင်ထားခဲ့ပေ။ ထိုထိုးနှက်ချက်၏ အာနိသင်က ချန်လွေ့၏ တိုက်ရိုက် တိုက်ခိုက်မှုထက် ပိုအစွမ်းထက်ခဲ့ပြီး၊ သူ၏ အသိစိတ်သည် ခဏတာ တုံ့ပြန်နိုင်စွမ်း ဆုံးရှုံးသွားခဲ့သည်။

ဒီလော့စ်ရို၏ စိတ်ဆန္ဒ အများစုက စေတန်နှင့်တိုက်ပွဲတွင် ရှိနေခဲ့ပြီး၊ ထို မတော်တဆမှုက သူ၏ကိုယ်ခန္ဓာကို ရပ်တန့်စေခဲ့သည်။ သူ၏ ရန်သူက ထိုအခွင့်အရေးကို လက်လွှတ်ခံမည် မဟုတ်ပေ။ အစွမ်းထက် [ပြိုလဲပျက်သုဉ်း] ကို စတင်လိုက်ရာ ဒီလော့စ်ရို၏ အရိုးချပ်ကာက အပိုင်းအစများအဖြစ် ကွဲကြေသွားခဲ့သည်။

စေတန်က အတွေ့အကြုံများ ရင့်ကျက်ပေသည်။ အချိန် အရှိန်အဝါကို အသက်သွင်းပြီးနောက် အရိုးချပ်ကာ ပြန်မကောင်းလာခင် သူက နောက်ထပ် ‘ဖြတ်တောက်’ ကို စတင်လိုက်သည်။

ထိုတိုက်ခိုက်မှုက သေစေနိုင်၏။ ဒီလော့စ်ရို မရှောင်နိုင်ခဲ့ဘဲ သူ၏ ချော်ရည်ကဲ့သို့ ဘယ်ဘက်လက်က ခုတ်ဖြတ်ခံလိုက်ရသည်။ ပြတ်နေသောလက်က ရေတွက်၍ မရနိုင်သော အပိုင်းအစကွဲများအဖြစ် ပြောင်းလဲသွားပြီး၊ အရှိန်အဝါထဲတွင် ပြန့်ကျဲသွားခဲ့သည်။ အရိုးချပ်ကာက ပြန်လည် စုစည်းသွားပြီးနောက်တွင် ပြတ်နေသောလက်က ပြန်မကောင်း လာတော့ပေ။ ဖြည်းဖြည်းချင်းသာ တစ်စစီ ပြန်လည်စုစည်းနေခဲ့သည်။

ဒီလော့စ်ရိုက အတွင်းပိုင်းရော အပြင်ပိုင်းပါ ထိခိုက်သွားခဲ့ရာ သူ၏ အငွေ့အသက်က နောက်ဆုံးတွင် ကျဆင်းလာတော့သည်။

ခဏအကြာတွင် ချန်လွေ့က သူ၏ ဝိညာဉ်အပေါ်တွင် ပြင်းထန်သော ထိုးနှက်ချက်မှ သတိပြန်ဝင်လာခဲ့ပြီး၊ ပါးစပ်နှင့် နှာခေါင်း တစ်ခုလုံးတွင် သွေးများရှိနေကြောင်း သူ ခံစားလိုက် ရလေသည်။ ကံကောင်းစွာပင် ဒီလော့စ်ရိုလည်း ပြင်းထန်သော ထိုးနှက်ချက်ကို ခံစားခဲ့ရသည်ဖြစ်ရာ လိုက်လံဖမ်းဆီးရန် အချိန်မရခဲ့ပေ။

ဟယ်လင်က သူ၏ နှာခေါင်းနှင့် ပါးစပ်ထဲမှ သွေးများကို ကြည့်ပြီး ခဏတာ စကားမပြောနိုင်အောင် ဖြစ်နေခဲ့သည်။

“ရှင် အမြန် ထွက်သွားသင့်တယ်!” လာလာရီယာက ပုံမှန်အားဖြင့် ဒုက္ခပေးတတ်သော်လည်း သူက စေတနာနှင့် အမုန်းတရားကို ရှင်းရှင်း လင်းလင်း ခွဲခြားနိုင်သူ ဖြစ်သည်။ ချန်လွေ့က လူကယ်ရန် ထိုနေရာသို့ အစွမ်းကုန်သုံးကာ ရောက်လာခဲ့၏။ သူ့ကို အတူတူ မသေစေသင့်ပေ။

“စိတ်အေးအေးထား…” ချန်လွေ့က အသက်ကိုပြင်းပြင်းရှူပြီး ဒဏ်ရာကို ကြယ်စွမ်းအား သုံးပြီး အတင်းအကျပ် ထိန်းချုပ်လိုက်သည်။ “မင်းတို့ကို ဒီကနေ ငါ သေချာပေါက် ခေါ်ထုတ်သွားပေးမယ်!”

ဝဲကတော့ ထဲတွင် ပြန်လည် စုစည်းလာသော ဧရာမမျက်နှာသည် ပြင်းထန်သော ဟိန်းဟောက်သံကို ထုတ်လွှတ်လိုက်သည်။ မျက်နှာက ပြောင်းလဲစ ပြုလာသည်။ နဖူးတွင် ချိုများ ရှည်ထွက်လာပြီး ပုံပန်း သွင်ပြင်က ပို၍ပင် ကြောက်မက်ဖွယ် ကောင်းလာခဲ့သည်။ နေရာလွတ်ထဲမှ စိတ်ဓာတ်ကျမှုသည် ရုတ်တရက် သုံးလေးဆ တိုးလာခဲ့သည်။

တစ်ချိန်တည်းမှာပင် စေတန်၏ ရှေ့မှ ဒီလော့စ်ရိုလည်း ပြောင်းလဲ သွားခဲ့သည်။ ဧရာမကိုယ်ခန္ဓာသည် ၂မီတာ အထိ အလျင်အမြန် ကျုံ့သွား၏။ သူက ကိုယ်တစ်ခြမ်း အရိုးစုကို ဝတ်ထားပြီး ခန္ဓာကိုယ် တစ်ခုလုံးတွင် အရိုးအဖုများ ရှိနေကာ နောက်တွင် အမြီးရှည်တစ်ခု ရှိသည်။ သူ၏ကိုယ်တစ်ခုလုံးက ပူလောင်ပြီး သွေးရောင် အငွေ့အသက်များကို ထုတ်လွှတ်နေခဲ့သည်။

၎င်းက အသူရာ ချောက်နက် အုပ်စိုးသူများ၏ စစ်မှန်သော ပုံစံ ဖြစ်ရပေမည်။ ကိုယ်ခန္ဓာ ကျုံ့သွားသော်လည်း အရှိန်အဟုန်က မူရင်းဧရာမထက် အများကြီး ပို၍ အစွမ်းထက်ပေသည်။ ထိုလက်၏ အသစ်ပြန်ဖြစ်ခြင်းကလည်း အရှိန် မြန်လာခဲ့ပြီး မျက်စိတစ်မှိတ် အတွင်း မှာပင် လုံးဝ ပြန်ကောင်းလာခဲ့သည်။

သို့သော် အသွင်ပြောင်းပြီးနောက် သွေးပင်လယ်တစ်ခုလုံး၏ အငွေ့အသက်က သိသိသာသာ ကျဆင်းသွားခဲ့ပြီး ချော်ရည်က ၃ပုံ ၂ပုံခန့် ကျဆင်းသွားခဲ့သည်။ ၎င်းက ထို အသွင်ပြောင်းခြင်းမှာ အဓိက ယဇ်ပလ္လင်မှ စွမ်းအင်အတော်များများ လိုအပ်နေသည်ကို ပြသနေသည်။ ဒီလော့စ်ရိုက ၎င်းကို အရင်က အသုံးမပြုခဲ့သည်မှာ မဆန်းပေ။

သွေးမြူနှင့် မွန်းကျပ်စေသည့် စွမ်းအင်က စေတန်ကို မျက်လုံး ကျဉ်းသွားစေခဲ့သည်။ ဒီလော့စ်ရိုက လျှပ်စီးလို သူ့အရှေ့တွင် ပေါ်လာခဲ့ပြီး လက်သည်းများသည် အရင်ကထက် ပိုမြန်သောအရှိန်ဖြင့် တိုက်ခိုက်ခဲ့သည်။

စေတန်က လက် နှစ်ဖက်လုံးကို လျင်မြန်စွာရွှေ့ပြီး လက်သည်းများကို ဆုပ်ကိုင်ထားခဲ့သည်။ ဒီလော့စ်ရို၏ လက်များသည် ပူလောင်နေသည့် အနီရောင် သတ္တုကဲ့သို့ တောက်ပ နေပြီး စေတန်၏ လက်များကမူ မီးခိုးရောင်နှင့် ဆန်းကြယ်နေသည်။

စွမ်းအား နှစ်ခု၏ မလှုပ်မယှက် အခြေအနေအောက် ပင်လယ်ပြင် တစ်ခုလုံး ပြင်းထန်စွာ တုန်ခါနေ၏။

စေတန်က သူ၏ စွမ်းအားကို တိုးရန် လုပ်နေစဉ် ရုတ်တရက် အန္တရာယ်ကို ခံစားလိုက်ရသည်။ သူတုံ့ပြန်နိုင်ခင်မှာပင် ဒီလော့စ်ရို၏ အမြီးဖြင့် ရိုက်ထုတ်ခံလိုက်ရသည်။ ၎င်းသည် လက်မောင်း ကဲ့သို့ပင် အမှန်တကယ် ပျော့ပျောင်းနေ၏။

ဒီလော့စ်ရို စေတန်ကို ရိုက်ထုတ် ပြီးနောက်တွင် လက်သည်းများကို အဆက်မပြတ် လှုပ်ရှားလိုက်သည်။ မျှော်လင့်ချက်မဲ့ခြင်း အငွေ့အသက် ပါဝင်သည့် အပူချိန်မြင့် မီးတောက် ရာပေါင်းများစွာက ကြယ်ကြွေ သလိုမျိုးပင် သူ့ကို လိုက်သွားခဲ့သည်။ ‘ကြယ်ကြွေ’ က စေတန်၏ ပုံရိပ်ကို ဝန်းရံပြီး ပြင်းထန်စွာ လောင်ကျွမ်း နေခဲ့သည်။ ဒီလော့စ်ရို မပြီးသေးပေ။ သူက လက်များကို ခေါက်လိုက်ရာ အနီးအနားရှိ နေရာလွတ်က ပြောင်းပြန် ဖြစ်သွားပြီး လောင်ကျွမ်း နေသည့် ဗဟိုချက်ကို ဝန်းရံထား ခဲ့လေသည်။

ချွန်ထက်သော လက်သည်းများက နေရာလွတ်နှင့် မီးတောက်များကို တုန်ခါစေပြီး ကွဲကြေစေခဲ့သည်။ ပုံရိပ်တစ်ခုက နောက်ဘက်သို့ အမြန် ဆုတ်ခွာသွားခဲ့ပြီး အကြီးအကျယ် ဒဏ်ရာရသွားပုံရသည်။

ဒီလော့စ်ရို၏ ကိုယ်ခန္ဓာက လင်းလက်သွားပြီး လေထဲတွင် ပြန်ဆုတ်နေသည့် ပုံရိပ်ကို မှီသွားခဲ့သည်။ သေစေနိုင်သည့် ထိုးနှက်ချက် စတင်ရန် ပြင်လိုက်စဉ် သူ၏ရှေ့ ကောင်းကင်တွင် အထူး အစွမ်းတစ်မျိုးနှင့် အေးစက်သော မျက်လုံး နှစ်လုံး ပေါ်လာသည်ကို သူ ခံစားလိုက်ရသည်။ သူက ရပ်တန့် သွားခဲ့သည်။

ဒီလော့စ်ရို အလျင်အမြန် တုံ့ပြန် လိုက်ရာ ကောင်းကင်မှ မျက်လုံးများ ပျောက်သွားကြောင်း တွေ့ရှိခဲ့သည်။ ၎င်းက ထင်ယောင်ထင်မှား ဖြစ်ခဲ့ခြင်း လိုမျိုးပင်။ သို့သော် ပစ်မှတ်ထား ခံရသည့် အန္တရာယ် ခံစားချက်က ရှိနေခဲ့သည်။ စေတန်က သူ့ကို အေးစက်စွာကြည့်နေ၏။

ထိုအချိန် စေတန်၏ ခန္ဓာကိုယ် အပေါ်တွင် အနက်ရောင် ချပ်ကာ တစ်ခု ဝတ်ဆင်ထားသည်။ သူ၏ ကိုယ်တစ်ခုလုံးက မှောင်မိုက်ပြီး ရေခဲကဲ့သို့ အေးစက်နေပုံရသည်။

နောက်စက္ကန့်တွင် ဒီလော့စ်ရို၏ ပခုံးကို လက်တစ်ခု ဆုပ်ကိုင်ထားပြီး သူက ဧရာမ စွမ်းအားအောက်တွင် အလိုလို လေပေါ် ပျံတက်သွား၏။ ကိုယ်ခန္ဓာကို မထိန်းချုပ်နိုင်ခင်မှာပင် ထိုအေးစက်သော မျက်လုံးများက အောက်ဘက်တွင် ပေါ်လာခဲ့ပြီး ဝမ်းဗိုက်ကို လက်သီး တစ်ချက် ထိုးလိုက်လေသည်။

ထိုးနှက်ချက်က ထိုးဖောက်သည့် စွမ်းအားတစ်မျိုး သယ်ဆောင်ထား လေသည်။ ဗိုက်ပေါ်တွင် ခပ်ပါးပါး လက်သီး အရာလေး တစ်ခုသာ ရှိသော်လည်း အရိုး ချပ်ကာ၏ အနောက်ဘက် ပေါက်ကွဲသွားသည်။

ဒီလော့စ်ရို နှာခေါင်း ရှုံ့လိုက်ပြီး လက်သည်းများကို ဝှေ့ယမ်းလိုက်၏။ သို့သော် စေတန်က လက်သည်းကို ဆုပ်ကိုင်ပြီး ဒီလော့စ်ရိုကို လွှင့်ပစ်လိုက်သည်။

ထိုတစ်ကြိမ် စေတန် အနီးကပ် မသွားတော့ပေ။ သူ၏ လက်ကို လှုပ်လိုက်သည်နှင့် အနက်ရောင် လျှပ်စီးက ဒီလော့စ်ရိုကို ဖုံးလွှမ်း သွားခဲ့သည်။ ထို့နောက် ရေတွက်၍ မရနိုင်သော ပေါက်ကွဲမှုများ ထွက်ပေါ်လာပြီး ကြောက်မက်ဖွယ် စွမ်းအားက ဒီလော့စ်ရိုကို ချက်ချင်း နစ်မွန်းသွားစေခဲ့သည်။

ဒီလော့စ်ရိုက ခန္ဓာကိုယ်ကို အလုံးတစ်လုံးအဖြစ် လှိမ့်လိုက်ပြီး အရိုးချပ်ကာက ကြီးမားသည့် အလုံးတစ်လုံးလို အဆက်မပြတ် ထူထဲလာကြောင်းကို စေတန်က အသေအချာ မြင်ခဲ့ရသည်။ ထိုသို့ အရိုးချပ်ကာက အဓိက ယဇ်ပလ္လင် တစ်ခုလုံး၏ စွမ်းအားနှင့် ပေါင်းစည်း ထားသည်။ အနက်ရောင်လျှပ်စီးက ၎င်းကို လုံးဝ ဖိနှိပ်ထားသော်လည်း အရိုးချပ်ကာကို ချက်ချင်း မချိုးဖျက် နိုင်ခဲ့ပေ။

ဒုက္ခအပေးဆုံး အရိုးချပ်ကာကိုသာ ချိုးဖျက် လိုက်နိုင်ပြီး အဓိက ယဇ်ပလ္လင်၏ အကာအကွယ် စွမ်းအားကို လုံးဝ ဖျက်ဆီးလိုက် နိုင်ပါက စေတန်သည် ဒီလော့စ်ရိုကို အချိန်တိုအတွင်း အနိုင်ယူနိုင်မည်ဟု ယုံကြည်နေခဲ့သည်။

တစ်ချိန်တည်းမှာပင် ဒီလော့စ်ရို၏ ‘ကိုယ်ခန္ဓာ’ ထဲတွင် ဒီလော့စ်ရို၏ ဧရာမမျက်နှာက ကြောက်မက်ဖွယ် ဟိန်းသံကို ထုတ်လွှတ်လိုက်၏။ ယခင် တုန်လှုပ်မှုထက် အများကြီး သာလွန်သော ဝိညာဉ် တုန်လှုပ်မှု လှိုင်းတစ်ခုက အဘက်ဘက်မှနေ၍ ချန်လွေ့ဆီ အရူးအမူး ပြေးလာခဲ့၏။

စေတန်က အလွန်အစွမ်းထက်ပြီး သူသည် ဒီလော့စ်ရို၏ နံပါတ်၁ ရန်သူ ဖြစ်သည်။ ထို့ကြောင့် စေတန်နှင့် တိုက်ခိုက်ရန် သူ အာရုံမစိုက်မီမှာပင် ချန်လွေ့၏ အတွင်းပိုင်း အန္တရာယ်ကို သူ ဖယ်ရှားရပေမည်။

ကြောက်မက်ဖွယ်ကောင်းသော ဝိညာဉ်ကွဲကြေကို ရင်ဆိုင်ရာတွင် ချန်လွေ့ မလှုပ်ရှားခဲ့ပေ။ သူက ဖန်တီးခြင်း စွမ်းအားကို အသုံးချပြီး သွေးရောင် ပိုးအိမ်များကို အမြန် ပျော်ဝင်စေခဲ့သည်။ ဝိညာဉ် တုန်လှုပ်မှုက မျက်စိတ်တစ်မှိတ် အတွင်း ချဉ်းကပ်လာခဲ့သော်လည်း ချန်လွေ့၏ အရှေ့ ၅မီတာအကွာတွင် ရပ်သွားပြီး ထပ်မံ၍ ဖောက်မသွား နိုင်တော့ပေ။

၎င်းက သိဒ္ဓိအလင်း ဝတ်ရုံ၏ အစွမ်း [အကြွင်းမဲ့အတားအဆီး] ပင်။ ၎င်းက အချင်း ၅မီတာရှိသည့် အတားအဆီး စွမ်းအား နယ်ပယ်ကို ဖန်တီးနိုင်ပြီး၊ ပုံစံနှင့် ပြင်းထန်မှု မည်သို့ပင် ရှိစေကာမူ တိုက်ခိုက်မှု အားလုံးကို ကာကွယ်ပေးနိုင်သည်။ သို့သော် ၎င်းက ၁၀စက္ကန့်သာ ကြာပြီး သူ လှုပ်ရှား၍ မရပေ။

၁၀စက္ကန့်က မျက်စိ တစ်မှိတ် အတွင်းမှာပင် ကုန်ဆုံးသွားခဲ့သည်။ သို့သော် သွေးရောင်ပိုးအိမ်များက မပျော်ဝင်သေးပေ။ ထိုတစ်ကြိမ်တွင် ၎င်းသည် ပစ်မှတ် တစ်ခုတည်း တိုက်ခိုက်မှု မဟုတ်ဘဲ ဧရိယာ တိုက်ခိုက်မှု တစ်ခု ဖြစ်သည်။ သူက [ကြေးမုံခန္ဓာ] သို့မဟုတ် [နတ်ဆိုးယင်ကောင် အသွင်ပြောင်းလဲခြင်း] ကို ထိုအချိန် အသုံးပြုခဲ့ပါက အသက်ရှင် ပေလိမ့်မည်။ သို့သော် ဟယ်လင်နှင့် လာလာရီယာတို့က ထိုတိုက်ခိုက်မှု အောက်တွင် သေချာပေါက် ပျက်စီး သွားပေလိမ့်မည်။

“[တောင်လိုမတုန်မလှုပ်]!” ကြောက်မက်ဖွယ်ကောင်းသော ဝိညာဉ်တုန်လှုပ်မှုကို ရင်ဆိုင်ရာတွင် ချန်လွေ့ အံကြိတ်ပြီး ညည်းလိုက်၏။ ပတ်ဝန်းကျင် နေရာလွတ် ရုတ်တရက် ခိုင်မာသွားပြီး အတားအဆီးတစ်ခုကို ဖန်တီးခဲ့သည်။ ၎င်းက ကျက်သရေမျှော်စင်၏ အစွမ်းနှင့် အတူ ပေါင်းစပ်ပြီး အသက်သွင်း ခဲ့သည့် အကာအကွယ်ပင်။

ပုံမှန်တိုက်ခိုက်မှုသာဆိုလျှင် [တောင်လိုမတုန်မလှုပ်]ဖြင့် တားဆီးပြီး လမ်းလွှဲနိုင်ပေသည်။ သို့သော် ဒီလော့စ်ရို၏ စွမ်းအားက သူ့ထက် အများကြီး ပိုသာလွန်၏။ ထို့ပြင် သူ့တွင် နေရာလွတ် ပါရမီ ကလည်း ရှိသေးသည်။

အေးခဲသွားသည့် နေရာလွတ် တစ်ခုလုံး ပြင်းထန်စွာတုန်ခါသွားပြီး ရေတွက်မရသော အက်ကြောင်းများ ပေါ်လာခဲ့သည်။ သို့သော် ၎င်းတို့ ချက်ချင်း မပေါက်ကွဲ ခဲ့ကြပေ။ ချန်လွေ့က ပြင်းထန်စွာ ဒဏ်ရာရရှိ ခဲ့လေသည်။ ယခု တစ်ကြိမ်တွင် နှာခေါင်းတင် မကဘဲ မျက်လုံးနှင့် နားမှလည်း သွေးများထွက်နေ၏။

ကံကောင်းစွာပင် ထိုကဲ့သို့ ကြန့်ကြာမှုပြီးနောက်တွင် လာလာရီယာနှင့် ဟယ်လင်တို့ပေါ်မှ သွေးရောင်ပိုးအိမ်များ လုံးဝပျော်ဝင် သွားခဲ့ပြီး သူတို့ နှစ်ယောက်လုံးကို ကျက်သရေမျှော်စင်ထဲ ထိန်းသိမ်း နိုင်ခဲ့လေသည်။

နောက်စက္ကန့်မှာပင် [တောင်လိုမတုန်မလှုပ်]၏ အကာအကွယ် နေရာလွတ်က လုံးဝ ကွဲကြေသွားခဲ့သည်။ ကြောက်မက်ဖွယ်ကောင်းသော ဝိညာဉ်တုန်လှုပ်မှုအောက်တွင် ချန်လွေ့၏ ကိုယ်ခန္ဓာက စုတ်ပြဲ သွားခဲ့သည်။ အမှန်တကယ်တမ်းတွင် သူက ရေတွက်၍ မရနိုင်သော ပြန့်ကျဲနေသည့် ယင်ကောင်များ အဖြစ် ကွဲသွားခြင်း ဖြစ်သည်။ သူက ထိုထိုးနှက်ချက်ကို ရှောင်ရန်အတွက် နတ်ဘုရားဝါးမျိုမျက်နှာဖုံး၏ စွမ်းရည်ကို အသုံးပြုခဲ့လေသည်။

ယင်ကောင်များက သွေးရောင်ပိုးအိမ်များဆီသို့ ပျံသွားခဲ့သည်။ လာလာရီယာ၏ ပြောကြားချက်အရ အယ်ဒီလိုင်းက အိုလစ်ဖီးရက်စ်၏နောက်တွင်ရှိနေပြီး ထိုနေရာက အနောက်ဘက်တွင် အများကြီး ဝေးသည်။ ၎င်းက သူဝါးမျိုခံရသေးကြောင်း ပြသနေ၏။

ခန့်မှန်းခြေ အကွာအဝေးကို မှတ်ပြီးနောက်တွင် ချန်လွေ့က အယ်ဒီလိုင်းကို အကျဉ်းချထားသည့် သွေးရောင်ပိုးအိမ်ကို နောက်ဆုံး တွေ့ရှိခဲ့သည်။ ထိုအချိန်တွင် [နတ်ဆိုးယင်ကောင်အသွင်ပြောင်းလဲခြင်း]၏ ကြာချိန်က ကုန်ဆုံးသွားခဲ့ပြီး သူ၏ ကိုယ်ခန္ဓာက လူပုံစံအတိုင်း ပြန်ဖြစ်လာခဲ့သည်။

သူက မတ်မတ် ရပ်တည်နိုင်ခင်ပင် ဒီလော့စ်ရို၏ ဝိညာဉ် တုန်လှုပ်မှု နောက်တစ်ကြိမ် ရောက်လာခဲ့သည်။ ထိုအချိန်တွင် ရေတွက်မရနိုင်သော ဝိညာဉ် တုန်လှုပ်မှုက တစ်ခုတည်း အဖြစ် ပေါင်းစည်းသွားပြီး မကြုံစဖူး စွမ်းအားဖြင့် တိုက်ခိုက်လာခဲ့သည်။

ချန်လွေ့၏ ကိုယ်ခန္ဓာ ချက်ချင်း ဖောင်ထွင်းမြင်ရ သွားခဲ့သည်။ ထိုသို့ အလွန် အစွမ်းထက်သော ဝိညာဉ် တုန်လှုပ်မှုက ကြေးမုံ အလင်းနှင့် တွေ့ပြီး ပြန်လည် ရောင်ပြန်ဟပ် သွားသကဲ့သို့ ဖြစ်သည်။

[ကြေးမုံခန္ဓာ]!

ထို တန်ပြန်ခြင်းကြောင့် ဖြစ်သည့် ပျက်စီးမှုက ယခင် တန်ပြန်ခြင်းထက် ပိုအစွမ်းထက်သည်။ ဒီလော့စ်ရိုက ပြင်းထန်စွာ ဟိန်းဟောက်ရင်း သူ၏ မျက်နှာသွင်ပြင်များ မှုန်ဝါးလာပြီး မူရင်း ဝဲကတော့ ပုံစံသို့ ပြန်ရောက် သွားခဲ့လေသည်။