အခန်း (၈၁၁)

မိုးသောက်ယံ...

ယန်ကျန့်သည် အိပ်ရာမှ မျက်လုံးဖွင့်ကာ နိုးထလာခဲ့သည်။

ဒီကမ္ဘာကြီးမှာ သူနောက်ထပ်တစ်ရက် အသက်ရှင်ခွင့်ရခဲ့ပြန်ပြီ။ သို့သော် နေ့သစ်တစ်နေ့ကို ကြိုဆိုရမည့်လန်းဆန်းတက်ကြွမှုမျိုး သူ့မှာမရှိခဲ့။ အကြောင်းမှာ ဒါဟာ သူ့အသက်ရှင်သန်ရမည့် အချိန်တွေ လျော့နည်းသွားခြင်းကို ဆိုလိုနေသောကြောင့်ပင်။

သူ့ဘဝရဲ့ နောက်ပြန်ရေတွက်ချိန်ဟာ ရပ်တန့်မသွားခဲ့ဘူး။

ကံကောင်းသည်မှာ သေခြင်းတရား၏ ကြီးမားသောဖိအားဒဏ်ကို သူ ကြံ့ကြံ့ခံနိုင်ခြင်းပင်။ ဒီလိုဖိအားမျိုးအောက်မှာသာဆိုလျှင် တခြားလူများ စိတ်ဓာတ်ကျကာ ရူးသွပ်သွားနိုင်သော်လည်း သူကတော့ မပြိုလဲခဲ့ပေ။

"အခု ငါ့ခန္ဓာကိုယ်ထဲက တစ္ဆေတွေရဲ့ အပြန်အလှန်ထိန်းချုပ်ဟန်ချက်ညီမှုက အတိုင်းအတာတစ်ခုထိ ရောက်လာပြီထင်တယ်။ အရင်က ပျောက်ဆုံးသွားတဲ့ စိတ်ခံစားချက်တချို့တောင် ပြန်ရလာသလိုပဲ။"

ယန်ကျန့်က တိုးတိုးရေရွတ်လိုက်ရင်း သူ့မျက်လုံးထဲတွင် အနီရောင်အလင်းတစ်ချက် လက်သွားကာ ဘေးဘက်သို့ လှည့်ကြည့်လိုက်သည်။

ရင့်ကျက်ပြီး နူးညံ့လှပသော အမျိုးသမီးတစ်ဦးသည် သူ့ရင်ခွင်ထဲတွင် ခွေခေါက်ကာ နှစ်နှစ်ခြိုက်ခြိုက် အိပ်မောကျလျက်ရှိသည်။

ယန်ကျန့်က ဘာစကားမှမဆိုဘဲ ထိုအမျိုးသမီးကို ညင်သာစွာဘေးသို့တွန်းဖယ်လိုက်ပြီး အိပ်ရာပေါ်တွင် ထထိုင်ကာ ပြတင်းပေါက်အပြင်ဘက်သို့ ကြည့်လိုက်သည်။

နေရောင်ခြည်နွေးနွေးက အခန်းတွင်းသို့ ဖြာကျနေပြီး အနည်းငယ်အေးစိမ့်နေသော အခန်းကို နွေးထွေးမှုအချို့ ယူဆောင်ပေးနေသည်။

ဒီနေ့ ရာသီဥတု သာယာသည်။

"အစောကြီးပဲ... ဘာလို့နည်းနည်းလောက် ဆက်မနားသေးတာလဲ။"

ကျန်းလီချင် နိုးလာခဲ့သည်။ သူမက ဖြူဖွေးဝင်းမွတ်သော လက်တစ်ဖက်ကို ထိုယောကျာ်း၏ ကိုယ်ပေါ်သို့တင်ကာ သူ့ကို ပြန်ဆွဲလှဲရန် ကြိုးစားလိုက်သည်။

ယန်ကျန့်က ပြောသည်။

"ငါ့ခန္ဓာကိုယ်က သာမန်လူတွေနဲ့မတူဘူး။ အများကြီး အိပ်စရာမလိုဘူး။"

ကျန်းလီချင်က ကိုယ်ကိုမတ်လိုက်ပြီး သူမ၏ ရွှန်းလဲ့နေသောမျက်နှာလေးဖြင့် ယန်ကျန့်၏ကျောပြင်ကို မှီကာ သူ့ကို နောက်မှ သိုင်းဖက်ထားလိုက်သည်။ သို့သော် သူမခန္ဓာကိုယ်၏ နွေးထွေးမှုဖြင့်ပင် မဖယ်ရှားနိုင်သော အရိုးထဲစိမ့်အောင်အေးစက်မှုကို ခံစားနေရသည်။

"ဒါဆိုလည်း ကျွန်မနဲ့ အချိန်နည်းနည်းလောက် မနေပေးနိုင်ဘူးလား။ ဘယ်လိုပဲဖြစ်ဖြစ် ကျွန်မက ရှင့်အပိုင်ပဲလေ။"

သူမ၏လေသံက ပျင်းရိပျင်းတွဲနိုင်သော ဆွဲဆောင်မှုနှင့်အတူ နူးညံ့နေခဲ့သည်။

"မင်းက အခုလောလောဆယ်အတွက်ပဲ ငါ့အပိုင်ဖြစ်တာ။ ငါသေသွားတာနဲ့ မင်းမှာ ဘဝသစ်၊ ခံစားချက်အသစ်တွေ၊ နောက်ပြီး ယောကျာ်းအသစ်တွေတောင် ရှိလာမှာပဲ။ အဲ့ဒီနေ့က သိပ်မဝေးတော့ဘူး။ ဖြစ်နိုင်ရင် နောက်နှစ်လောက်ပဲနေမှာ။ ဘာလို့လဲဆိုတော့ တစ္ဆေဆရာအများစုက အသက်တိုကြတယ်။ ငါလည်း ခြွင်းချက်မဟုတ်ဘူး။ ငါကိုယ်တိုင် ရပ်ချင်ရင်တောင်မှ ဒါက မဖြစ်နိုင်တော့ဘူး။"

ယန်ကျန့်က ခက်ထန်ပြီး ခံစားချက်ကင်းမဲ့စွာ ပြောလိုက်သည်။

ကျန်းလီချင်က ယန်ကျန့်ကို ပိုပြီးတင်းကျပ်စွာ ဖက်ထားလိုက်ရင်း...

"ကျွန်မက အဲ့ဒီလိုလူစားမျိုး မဟုတ်ပါဘူး။ ရှင့်အတွက်ဆို ကျွန်မ ဘာမဆိုလုပ်ပေးဖို့ အသင့်ပဲ။"

"အချိန်က အရာရာကို ဖျော့တော့စေတယ်။ မင်းရော ကျန်းယန်ရော အတူတူပဲ။ မင်းတို့က နွေးထွေးမှုအတွက် အတူပေါင်းဖက်ကြတဲ့ သာမန်လူတွေပဲ။ မင်းတို့မှီခိုနေတာက ငါ့ဆီကရတဲ့ ရှင်သန်ခြင်းမီးတောက်လေးတစ်ခုပဲ။ ဒီမီးတောက်လေး ငြိမ်းသွားတာနဲ့ မင်းတို့လည်း သဘာဝအတိုင်း ထွက်သွားပြီး မှီခိုစရာ နွေးထွေးမှုအသစ်ကို ရှာကြမှာပဲ။"

ယန်ကျန့်က သူမဘက်သို့ လှည့်ကြည့်လိုက်သည်။

"ဒါကြောင့် တိတိကျကျပြောရရင် ငါတို့ဆက်ဆံရေးက အပြန်အလှန်အသုံးချမှုသက်သက်ပဲ။ အရောင်းအဝယ်တစ်ခုလိုပေါ့။ ဒါ့အပြင် အရမ်းကို တိုတောင်းတဲ့ အရောင်းအဝယ်တစ်ခုပဲ။"

"သာမန်လူတွေ နှစ်ပေါင်းများစွာ တွဲနိုင်ကြပေမဲ့ ငါတို့ရဲ့ 'အရောင်းအဝယ်' က အဲ့ဒီလောက်တောင် ကြာချင်မှ ကြာမှာ။"

"မင်း ငါ့အတွက် ဘာမှလုပ်ပေးစရာမလိုဘူး။ ငါအသက်ရှင်နေတုန်း မင်းအလုပ်ကိုပဲ ကောင်းကောင်းလုပ်။ ငါသေသွားရင် မင်း ပိုက်ဆံအများကြီးရလိမ့်မယ်။ အဲ့ဒီနောက်မှာ မင်းဘဝကို အစကပြန်စလို့ရပြီ။ ကျန်းယန်လည်း ဒီအတိုင်းပဲ။"

ကျန်းလီချင် တစ်ယောက် မှင်တက်သွားသည်။ ယန်ကျန့်က ဒီလိုတွေးလိမ့်မည်ဟု သူမ မထင်ထားခဲ့ပေ။

ပြီးခဲ့တဲ့ခြောက်လလုံး ကျန်းယန်က သူ့အပေါ်မှာ ဘာကြောင့် အေးတိအေးစက်နိုင်ခဲ့သလဲဆိုတာ အံ့ဩစရာမရှိတော့ပေ။

ဘာကြောင့်လဲဆိုတော့ ယန်ကျန့်၏ စိတ်ထဲတွင် သူတို့နှင့်သူ၏ဆက်ဆံရေးသည် ရေရှည်တည်တံ့မည် မဟုတ်ဘဲ သေခြင်းတရားကြောင့် မကြာမီအဆုံးသတ်ရမည်ဟု ယုံကြည်နေသောကြောင့်ပင်။ ထို့ကြောင့် သူက သူမနှင့် ကျန်းယန်အပေါ်တွင် အချိန်နှင့် ခံစားချက်များစွာ ဘယ်တုန်းကမှ မရင်းနှီးမြှုပ်နှံခဲ့ပေ။

အုတ်မြစ်ကပင် မမှန်နေမှတော့...အနာဂတ်ဆိုတာ ဘယ်လိုလုပ်ရှိနိုင်တော့မှာလဲ။

"ရှင်က တကယ်ပဲ မိန်းမတွေအကြောင်း ဘာမှနားမလည်တာပဲ။"

ကျန်းလီချင် နာကျင်သွားသည်။ သူမ ငိုချင်စိတ်ပေါက်လာသော်လည်း ငိုပိုင်ခွင့်မရှိမှန်း သဘောပေါက်လိုက်သည်။

သူမသည် ထာဝရသူ့အမျိုးသမီးအဖြစ် ရှိနေနိုင်မည်ဟု ယန်ကျန့်ကို ယုံကြည်လာအောင် မလုပ်နိုင်သောကြောင့် ဖြစ်သည်။

"ငါနားလည်သည်ဖြစ်စေ၊ မလည်သည်ဖြစ်စေ အရေးမကြီးဘူး။ အရေးကြီးတာက ငါအသက်သိပ်ရှည်မှာ မဟုတ်ဘူး။ ငါ့ရဲ့အန္တရာယ်က မကြာခင်ရောက်လာတော့မယ်ဆိုတာ ငါခံစားနေရတယ်။ 'ပြိတ္တာ' ဖြစ်ရပ်ကို မင်း ကောင်းကောင်းမှတ်မိမှာပါ။ အဲ့ဒီတုန်းက ငါသေခါနီးပါးပဲ။ ကံကောင်းလို့ လွတ်လာခဲ့တာ။ ဒီလိုအန္တရာယ်မျိုးတွေက တစ်ခါမက ကြုံခဲ့ရပြီးပြီ။ ဒါပေမဲ့ ငါအမြဲတမ်း ကံကောင်းနေမှာ မဟုတ်ဘူး။"

"တစ်ကြိမ်ကြိမ်မှာတော့ ငါဟာ လုံးဝပျောက်ကွယ်သွားလိမ့်မယ်။"

ယန်ကျန့်က တည်ငြိမ်စွာပြောလိုက်သည်။

"ရှင့်ရဲ့အခက်အခဲနဲ့ နာကျင်မှုတွေကို ကျွန်မသိပါတယ်။ ကျွန်မ ရှင့်ကို တစ်ခုပဲမေးချင်တယ်။ ရှင် ကျွန်မကို မုန်းလား။"

ကျန်းလီချင်က မေးလိုက်သည်။

"မင်းတို့က သာမန်မိန်းမတွေပဲ။ မင်းတို့မှာ အားသာချက်တွေရှိတယ်။ ကိုယ်လုံးကိုယ်ပေါက်လှတယ်၊ ဆွဲဆောင်မှုရှိတယ်၊ တာဝန်ကျေတယ်၊ ရည်မှန်းချက်ကြီးတယ်။ ဒါပေါ့၊ အားနည်းချက်တွေလည်း ရှိတာပေါ့။ လုံခြုံမှုမရှိတာ၊ ပိုက်ဆံမက်တာ၊ မာနကြီးတာ၊ နည်းနည်းပရိယာယ်များတာ... ဒါပေမဲ့ ဒါတွေအားလုံးက သိပ်ကို သာမန်ပါပဲ။"

"ဘာလို့လဲဆိုတော့ ဒါတွေကပဲ မင်းတို့ကို လူသားတစ်ယောက်ဖြစ်စေတာကိုး။"

"အပြစ်အနာအဆာမရှိတဲ့ ပြီးပြည့်စုံတဲ့မိန်းမဆိုတာ စိတ်ကူးယဉ်ထဲမှာပဲ ရှိတယ်။ လက်တွေ့မှာ မဖြစ်နိုင်ဘူး။ ဒါကြောင့် ငါမင်းတို့ကို မမုန်းဘူး။"

ကျန်းလီချင်က နှုတ်ခမ်းကိုတင်းတင်းစေ့လိုက်ပြီး သတ္တိမွေးကာ ပြောလိုက်သည်။

"ယန်ကျန့်... ကျွန်မ ဆုံးဖြတ်ချက်တစ်ခု ချလိုက်ပြီ။"

"ဘာဆုံးဖြတ်ချက်လဲ။"

"ကျွန်မ ရှင့်အတွက် ကလေးမွေးပေးချင်တယ်။"

ကျန်းလီချင်က ရဲရဲဝံ့ဝံ့ ကြေညာလိုက်သည်။ ထိုစကားကိုပြောလိုက်စဉ် သူမ၏ပါးပြင်များ နီရဲတက်လာပြီး နှလုံးခုန်သံများ ဗြောင်းဆန်သွားသည်။

ယန်ကျန့်၏ မျက်နှာအမူအရာ အနည်းငယ်ပြောင်းလဲသွားသည်။ သူက သူမဘက်လှည့်ကြည့်ကာ သူမကို အကဲခတ်နေသလို၊ တစ်ခုခုကိုလည်း ပြန်လည်စဉ်းစားနေပုံရသည်။

ကျန်းလီချင်၏စကားနောက်ကွယ်က ခံစားချက် (သို့) ရည်ရွယ်ချက်က ဘာပဲဖြစ်နေပါစေ၊ ထိုစကားများက သူ့ကို တစ်ခုခုကိုတော့ သတိရသွားစေခဲ့သည်။

"မင်း တကယ်လုပ်နိုင်တဲ့အခါကျမှ အဲ့စကားကိုပြော။"

ယန်ကျန့်က ငြင်းပယ်ခြင်းမပြုဘဲ ပေါ့ပေါ့ပါးပါးပင် ပြန်ပြောလိုက်ပြီးနောက် ထရပ်ကာ ထွက်သွားလေသည်။

သူ ကုမ္ပဏီသို့မသွားဘဲ ပထမလုံခြုံရေးအိမ်သို့ ပစ္စည်းအချို့ယူရန် သွားခဲ့သည်။

သူသည် လာမည့် ရှင်သန်ခြင်းတိုက်ပွဲအတွက် ကြိုတင်ပြင်ဆင်ရန် လိုအပ်သည်။

ပထမလုံခြုံရေးအိမ်သည် သေးငယ်ပြီး သဘာဝလွန်ပစ္စည်းအမျိုးမျိုးနှင့် ဖမ်းဆီးထားသော ကလဲ့စားချေလိုသည့် တစ္ဆေများကို သိုလှောင်ထားသည်။

ထိုနေရာတွင် 'တစ္ဆေမှန်'၊ ဝမ်ရှောင်ချန်၏ခန္ဓာကိုယ်မှရသော 'တစ္ဆေအရိုးစု'၊ ဖုန်းချွမ်းထံမှ ခွဲထုတ်ထားသော 'သင်္ချိုင်းမြေ' တို့ ရှိသည်။ ဟုတ်ပေသည်၊ သွေးစွန်းနေသော သတင်းစာဟောင်းများ၊ ထူးဆန်းသော 'အသံရှစ်ခု ဂီတသေတ္တာ'၊ အနီရောင်ပန်းထိုးဖိနပ်၊ အသက်ကယ်အရုပ်များ၊ 'တစ္ဆေဖယောင်းတိုင်'၊ 'တစ္ဆေကြွေရုပ်' နှင့် အထူးပြုလုပ်ထားသော လက်နက်အချို့လည်း ရှိသေးသည်။

ထိုအရာများအပြင် သူ့လက်ထဲတွင် ကြောက်မက်ဖွယ် 'ထင်းခုတ်ဓား' နှင့် 'အလောင်းကောင် သံချောင်း' တို့လည်း ရှိနေသည်။

တိတိကျကျပြောရလျှင် သူ၏ကိုယ်ပိုင်အရင်းအမြစ်များက ရှားပါးသည်မဟုတ်၊ အမှန်တကယ်တော့ အတော်လေး ပေါများလှသည်။

သို့သော် ပစ္စည်းတစ်ခုစီတိုင်းသည် ယန်ကျန့် ကြုံတွေ့ခဲ့ရသော ကြောက်မက်ဖွယ် သဘာဝလွန် ဖြစ်ရပ်တစ်ခုစီကို ကိုယ်စားပြုနေသည်။

ထိုပစ္စည်းများကို ရရှိခဲ့ခြင်းတွင် ပေးဆပ်ခဲ့ရသော တန်ဖိုးများရှိသည်။

"'တစ္ဆေမျက်လုံး'က ပြန်လည်ရှင်သန်ထကြွဖို့ တာစူနေပြီ။ 'တစ္ဆေစာတိုက်'ရဲ့ သံတော်ဆင့် တာဝန်တွေကလည်း ဆက်ရှိနေတုန်းပဲ။ ဒါကြောင့် စိတ်ချရအောင် 'အသံရှစ်ခု ဂီတသေတ္တာ'ကို ယူသွားဖို့လိုလိမ့်မယ်။"

ယန်ကျန့်၏အကြည့်များ ရွေ့လျားသွားပြီး ရွှေရောင်သေတ္တာတစ်လုံးကို ယူချလိုက်သည်။

ဖွင့်လိုက်သောအခါ အနီရောင်ဆေးသုတ်ထားသော 'အသံရှစ်ခု ဂီတသေတ္တာ' အဟောင်းတစ်လုံး သူ့မျက်စိရှေ့တွင် ပေါ်လာသည်။

မဖွင့်ရသေးခင်မှာပင် အေးစိမ့်သောဓာတ်ငွေ့များက ပတ်ဝန်းကျင်ကို လွှမ်းခြုံသွားသည်။

ယန်ကျန့်၏စိတ်ထဲတွင် ထိုဂီတသေတ္တာ၏ ကြောက်မက်ဖွယ်ကောင်းပြီး ထူးဆန်းသော တေးသံကို အလိုလို ပြန်လည်ကြားယောင်လာသည်။

'အသံရှစ်ခု ဂီတသေတ္တာ'၏ ကျိန်စာသည် အလွန်ပင်ဒုက္ခများလှသည်။

သူ တာဟိုင်မြို့သို့ အရင်တစ်ခေါက်သွားစဉ်က ၎င်းကို ယူမသွားခဲ့ခြင်းမှာ မတော်တဆ အသုံးမပြုမိအောင် ထိန်းချုပ်နိုင်မည်မဟုတ်ဟု စိုးရိမ်သောကြောင့် ဖြစ်သည်။

အကယ်၍ သူသာ ဒီအရာကို နောက်တစ်ကြိမ်ဖွင့်လိုက်မိပါက အသက်ရှင်နိုင်ဦးမည်ဟု ယန်ကျန့် မယုံကြည်တော့ပေ။

ဝိညာဉ်ကမ္ပည်းပြားက မရှိတော့ပြီ။ တစ္ဆေငယ်က စားသုံးပစ်ခဲ့သည်။

ဝမ်ရှောင်မင်၏ စမ်းသပ်မှုကို ပြန်လုပ်ရန်မှာ လုံးဝနီးပါး မဖြစ်နိုင်တော့ပေ။

'တစ္ဆေငယ်'တွင် အသိစိတ်လွှဲပြောင်းနိုင်စွမ်းရှိသော်လည်း၊ မမေ့သင့်သည်မှာ 'တစ္ဆေငယ်' ကိုယ်တိုင်က ပုံမှန်မဟုတ်သော အရာတစ်ခုဖြစ်သည်— လွှဲပြောင်းစရာ ပစ္စည်းမရှိဘဲ ယန်ကျန့်က 'အသံရှစ်ခု ဂီတသေတ္တာ'ကို နောက်တစ်ကြိမ်ဖွင့်လိုက်လျှင် သူ့အတွက် ခိုကပ်စရာအရာ မရှိတော့ဟု အဓိပ္ပာယ်ရသည်။

ထိုခိုကပ်စရာအရာအတွက်မူ သဘာဝလွန်ဓာတ်ပုံတစ်ပုံ လိုအပ်လိမ့်မည်။

တစ်နည်းအားဖြင့် ယန်ကျန့်သည် 'တစ္ဆေကင်မရာ'ဖြင့် အသက်ရှင်နေသော လူတစ်ဦးကို ဓာတ်ပုံရိုက်ပြီး 'အသံရှစ်ခု ဂီတသေတ္တာ'၏ ကျိန်စာကို ခံနိုင်ရန် ယဇ်ပူဇော်ခံအဖြစ် အသုံးပြုရန် လိုအပ်သည်။

ပြီးလျှင် သူ့ကိုယ်ထဲက တစ္ဆေများကိုလည်း ဖိနှိပ်ထားရန် လိုအပ်သေးသည်။

သို့သော် ထိုအခြေအနေများ ပြည့်စုံလျှင်ပင် ပြဿနာမှာ 'အသံရှစ်ခု ဂီတသေတ္တာ'၏ ကျိန်စာကို ဖြေရှင်းနိုင်ပြီး 'တစ္ဆေမျက်လုံး' ပြန်ရှင်သန်လာလျှင်တောင်မှ၊ ရှင်သန်ထကြွခြင်းပြဿနာက ကျန်ရှိနေသေးသည်။

ဒါကလည်း အကျပ်အတည်းတစ်ခုပင် ဒါမှမဟုတ်ရင်... ယန်ကျန့်က သံချေးတက်နေသော 'အလောင်းကောင် သံချောင်း'ကို တစ်ချက်လှမ်းကြည့်လိုက်သည်။

နောက်ဆုံးမှာ 'အလောင်းကောင် သံချောင်း'ကိုသုံးပြီး သူ့ကိုယ်သူ စိုက်ထားလိုက်ကာ သူ့ခန္ဓာကိုယ်ထဲက 'အသံရှစ်ခု ဂီတသေတ္တာ'၏ ကျိန်စာအပါအဝင် တစ္ဆေအားလုံးကို အိပ်စက်စေခြင်းသာ...

အတွေးပေါင်းစုံက သူ့စိတ်ထဲတွင် ပေါ်ပေါက်လာသည်။

ယန်ကျန့်က အစီအစဉ်တိုင်းသည် မဖြစ်နိုင်ဟု ခံစားနေရပြီး တစ်ခုချင်းစီတွင် သေစေနိုင်သော အားနည်းချက်များ ရှိနေသည်။

ထိုအားနည်းချက်၏ အရင်းခံမှာ ကလဲ့စားချေလိုသောတစ္ဆေများ ပြန်လည်ထကြွလာခြင်းကြောင့်ပင် ဖြစ်သည်။

"'အသံရှစ်ခု ဂီတသေတ္တာ'၊ သွေးစွန်းသတင်းစာဟောင်းတွေ၊ ပြီးတော့ အသက်ကယ်အရုပ်တစ်ရုပ်... အဖြူရောင် 'တစ္ဆေဖယောင်းတိုင်' တစ်တိုင်... 'တစ္ဆေကြွေရုပ်'ကလည်း အရေးကြီးတဲ့အချိန်မှာ တော်တော်အသုံးဝင်တယ်၊ အဲ့ဒါကိုလည်း ယူသွားမယ်။ အခု ငါ့ရဲ့ ကိုယ်ပိုင်စွမ်းရည်တွေ မလုံလောက်တော့တဲ့အတွက် အသက်ဆက်ရှင်နိုင်ဖို့ ဒီပစ္စည်းတွေအပေါ်ပဲ မှီခိုရတော့မှာပဲ။"

ယန်ကျန့်က သူ့စိတ်ထဲတွင် မချင့်မရဲဖြင့် သက်ပြင်းချလိုက်သည်။

ဒါဟာ အရင်းအမြစ်တွေကို အများအပြား သုံးစွဲရတော့မည်ဟု ဆိုလိုသည်။

တစ်နေ့တာလုံး ထင်းခုတ်ပြီး တစ်ရက်တည်းနဲ့ အကုန်မီးရှို့ပစ်လိုက်ရသလို သူခံစားနေရသည်။

"ဌာနချုပ်က ငါ့ကို အနီရောင် 'တစ္ဆေဖယောင်းတိုင်' သုံးတိုင်နဲ့ 'တစ္ဆေကတ်ကြေး' တစ်လက် အကြွေးကျန်နေသေးတယ်။ အဲ့ဒါတွေ အမြန်ပို့ပေးဖို့ သတိပေးရဦးမယ်။"

ယန်ကျန့်က ပြန်မတောင်းရသေးသော အကြွေးတစ်ခုကိုလည်း သတိရလိုက်သည်။

အရာအားလုံး စီစဉ်ပြီးနောက် သူ လုံခြုံရေးအိမ်မှ ထွက်ခွာရန် ပြင်ဆင်လိုက်သည်။

သို့သော် နောက်ဆုံးအချိန်တွင် သူ 'တစ္ဆေမှန်'ကို ဖုံးအုပ်ထားသော အနက်ရောင်အဝတ်စကို မဖယ်ရှားဘဲ မနေနိုင်ခဲ့ပေ။

ကြည်လင်သော မှန်တစ်ချပ် ယန်ကျန့်ရှေ့တွင် ပေါ်လာသည်။

ထိုမှန်ပေါ်တွင် အက်ရာတစ်ခုရှိနေသည်။ သူကြိုးဆွဲချစဉ်က 'တစ္ဆေမှန်'နှင့် ပဋိပက္ခဖြစ်ရာမှ ကျန်ခဲ့သော အရာဖြစ်သည်။

သို့သော် ယန်ကျန့်က ထိုအရာကို စိတ်မဝင်စားဘဲ မှန်ထဲသို့ ကြည့်လိုက်သည်။

သူ့အရိပ်ကို မမြင်ရပေ။

ဘာထူးခြားမှုမှ မရှိ။

အတွင်းပိုင်းသည် ဗလာနတ္ထိဖြစ်ပြီး ဘာကိုမှ ရောင်ပြန်ဟပ်ခြင်းမရှိပေ။

"ထင်တဲ့အတိုင်းပဲ... အရိပ်တစ်ခု ချန်ထားလို့မရတော့ဘူး။ လူတစ်ယောက်က တစ်ခါပဲ ပြန်ရှင်သန်ခွင့်ရတာလား။ ဒီပစ္စည်းက ဖုန်းချွမ်းနဲ့ ထုံချန်တို့ပဲ သုံးလို့ရတော့မယ်ထင်တယ်။"

ယန်ကျန့်က စိတ်ထဲတွင် တွေးလိုက်သည်။

ဤသဘာဝလွန်ပစ္စည်းက သူ့အတွက် ချက်ချင်းအသုံးမဝင်တော့သော်လည်း၊ သူ့အဖွဲ့သားများကိုတော့ နောက်ထပ် ရှင်သန်ခွင့်တစ်ကြိမ် ပေးနိုင်သေးသည်။

"ဒါကိုထုတ်သွားပြီး ကုမ္ပဏီရုံးခန်းထဲမှာထားကာ 'တစ္ဆေမှန်'ရဲ့တည်ရှိမှုကို ထုတ်ဖော်ပြလိုက်တော့မယ်။"

ယန်ကျန့်က ဒီပစ္စည်းကို ဆက်ပြီး ဖုံးကွယ်မထားသင့်တော့ဟု ခံစားလိုက်ရသည်။

အသုံးချရမည့်အချိန် ရောက်ပြီ။

အသင်းခေါင်းဆောင်တစ်ယောက်အနေဖြင့် သူက သူ့အဖွဲ့၏ ရှင်သန်မှုအတွက် ထည့်သွင်းစဉ်းစားရမည်။

အရင်က လျှို့ဝှက်ထားခဲ့ရခြင်းမှာ သူတို့ မကာကွယ်နိုင်မည်ကို စိုးရိမ်သောကြောင့်ဖြစ်သည်။ ယခု ရဲကျန့်နှင့် တိုက်ခိုက်ပြီးနောက်တွင်တော့ သူ့ကို ပစ်မှတ်ထားပြီး လာလုရဲမည့်သူ မရှိလောက်တော့ဟု သူ တွက်ဆလိုက်သည်။

သူ 'တစ္ဆေမှန်'ကို အနက်ရောင်အဝတ်စဖြင့် ဖုံးအုပ်လိုက်သည်။

ထို့နောက် ယန်ကျန့်က ၎င်းကို လုံခြုံရေးအိမ်မှ ယူဆောင်ထွက်လာခဲ့သည်။

နေ့လယ်ခင်းတွင် ယန်ကျန့် ကုမ္ပဏီသို့ ပြန်ရောက်သောအခါ အဖွဲ့ဝင်များကို 'တစ္ဆေမှန်'၏ တည်ရှိမှုကို ထုတ်ဖော်ပြောကြားလိုက်သည်။

"သေသွားတဲ့လူကို အရိပ်ချန်ထားရုံနဲ့ ပြန်ရှင်အောင်လုပ်ပေးနိုင်တဲ့ ထူးဆန်းတဲ့မှန် ဟုတ်လား။ ခေါင်းဆောင်၊ ခင်ဗျားမှာ ဒီလိုပစ္စည်းမျိုး တကယ်ရှိနေတာလား။"

ဟွမ်ကျီယာသည် ထိုသို့သော သဘာဝလွန်ပစ္စည်းအကြောင်း ပထမဆုံးအကြိမ်ကြားရသောကြောင့် အလွန်တုန်လှုပ်သွားသည်။

သူမတစ်ယောက်တည်းသာမက...

ဖုန်းချွမ်း၊ ထုံချန်၊ လီယောင်နှင့် အခြားသူများလည်း မယုံနိုင်စွာ မျက်လုံးများ ပြူးကျယ်သွားကြသည်။

"အမှန်တရားက အဲ့ဒီအတိုင်းပဲ။ ဒါပေမဲ့ အရာရာတိုင်းမှာ ပေးဆပ်ရတဲ့တန်ဖိုးရှိတယ်။ 'တစ္ဆေမှန်'ထဲမှာ အရေအတွက်မရေတွက်နိုင်တဲ့ ကြောက်မက်ဖွယ် မကောင်းဆိုးဝါးတစ္ဆေတွေ အများကြီးရှိတယ်။ လူတစ်ယောက်က 'တစ္ဆေမှန်'ကနေ ပြန်ရှင်သန်လာတဲ့အခါ၊ အပြန်အလှန်အနေနဲ့ တစ္ဆေတစ်ကောင် လွတ်မြောက်သွားလိမ့်မယ်။ ဒါ့အပြင် ပြန်ရှင်လာတဲ့လူရဲ့ မှတ်ဉာဏ်နဲ့ အခြေအနေက သူတို့မှန်ကိုကြည့်ခဲ့တဲ့ အချိန်မှာပဲ ရပ်တန့်နေလိမ့်မယ်။"

သူက ရှင်းပြသည်။

"ဆိုလိုတာက ကြားထဲမှာဖြစ်ခဲ့တဲ့ အရာအားလုံး ပျောက်ဆုံးသွားလိမ့်မယ်။"

ယန်ကျန့်က ဆက်ပြောသည်။

"ဒါက ငါအခုထိတွေ့ရှိထားတဲ့ ပုံစံပဲ။ တခြားထူးဆန်းတဲ့စွမ်းရည်တွေ ရှိမရှိဆိုတာတော့ ငါမသိသေးဘူး။ ငါတို့ တဖြည်းဖြည်း ရှာဖွေသွားရမှာပဲ။"

"ယန်ကျန့်... မင်း အရင်က သုံးဘူးလား။"

ဖုန်းချွမ်းက မေးလိုက်သည်။

"ငါ အထူးအခြေအနေတစ်ခုအောက်မှာ တစ်ခါသုံးခဲ့ဖူးတယ်။ အော်... ဟုတ်သားပဲ၊ ငါ့သူငယ်ချင်း ကျန်းဝေ့လည်း သုံးခဲ့ဖူးတယ်။"

"ကျန်းဝေ့ ဟုတ်လား။"

ဟွမ်ကျီယာ၏ မျက်လုံးများက လှုပ်ရှားသွားသည်။

"တစ်နေကုန် လျှောက်သွားနေတာကလွဲပြီး ဘာမှမလုပ်တဲ့ ကုမ္ပဏီထဲက အဲ့ဒီ ကောင်လေးကို ဆိုလိုတာလား။"

"အာဝေ့က ငါ့အတန်းဖော်ပဲ။ ပြီးတော့ အရင်က သူငါ့ကို အများကြီးကူညီခဲ့ဖူးတယ်။ သူ့ကို အဲ့ဒီလိုမပြောပါနဲ့။ သူ မအပါဘူး၊ ဆော့ရတာကြိုက်တာပဲ။ တချို့အချိန်တွေမှာဆို သူက ဘယ်သူ့ထက်မဆို ပိုထက်မြက်တယ်။"

ယန်ကျန့်က လေးနက်စွာပြောလိုက်သည်။

"တောင်းပန်ပါတယ်။"

ဟွမ်ကျီယာက ချက်ချင်း တောင်းပန်လိုက်သည်။

ယန်ကျန့်က အကြောင်းအရာပြောင်းလိုက်သည်။

"'တစ္ဆေမှန်'ကို အသုံးပြုတာမှာ သူ့အန္တရာယ်နဲ့သူရှိတယ်။ မှန်ရှေ့မှာ အကြာကြီးရပ်မနေရဘူး။ မဟုတ်ရင် အထဲကို စုပ်သွင်းခံရလိမ့်မယ်။ နောက်ပြီးတော့ မှန်ထားတဲ့နေရာနားမှာ ရောင်ပြန်ဟပ်နိုင်တဲ့ ဘာပစ္စည်းမှ မရှိသင့်ဘူး။"

"မဟုတ်ရင် အထဲက တစ္ဆေတွေက တခြားရောင်ပြန်ဟပ်တဲ့ ပစ္စည်းတွေကနေတစ်ဆင့် လွတ်မြောက်သွားနိုင်တယ်။"

"ဘယ်အချိန်၊ ဘယ်လိုသုံးမလဲဆိုတာတော့ ငါဝင်မစွက်ဖက်ဘူး။ လူတိုင်း သူ့ဘာသာသူ ဂရုစိုက်ဖို့ပဲလိုတယ်။"

ထုံချန်က မှတ်ချက်ပေးသည်။

"ဒီလိုအန္တရာယ်များတဲ့ပစ္စည်းကို ထုတ်လာတာက အကြံကောင်းတစ်ခု ဟုတ်ချင်မှဟုတ်လိမ့်မယ်။ လူတစ်ယောက်ကို ပြန်ရှင်အောင်လုပ်တိုင်း တစ္ဆေတစ်ကောင် လွတ်သွားတယ်ဆိုတာ ပေးဆပ်ရတာ အရမ်းများလွန်းတယ်။ ပြီးတော့ တစ္ဆေဆရာတစ်ယောက်ကို သူ့စွမ်းအားတွေမပါဘဲ ပြန်ရှင်အောင်လုပ်နိုင်တယ်ဆိုတဲ့ ဖြစ်ရပ်မျိုးလည်း မရှိသေးဘူး။ လူတစ်ယောက် ပြန်အသက်ရှင်လာပေမဲ့ သူ့ကိုယ်ထဲက တစ္ဆေက ဖယ်ရှားခံလိုက်ရရင် သာမန်လူတစ်ယောက်ကို ပြန်ခေါ်လာဖို့က အဲ့ဒီလောက် အရေးမကြီးလောက်ဘူး။"

"ဒါ့အပြင် 'တစ္ဆေမှန်'ကို စောင့်ရှောက်ဖို့ လူတစ်ယောက်လိုလိမ့်မယ်။ မဟုတ်ရင် အထဲမှာ ပြန်ရှင်လာတဲ့လူက အထဲက တစ္ဆေတွေရဲ့ သတ်ဖြတ်ခြင်းကို မကြာခင် ခံရလိမ့်မယ်။"

သူမက အားနည်းချက်များစွာကို ထောက်ပြပြီး 'တစ္ဆေမှန်'၏ အကျိုးထက် အပြစ်က ပိုများနိုင်သည်ဟု ယုံကြည်နေသည်။

ဖုန်းချွမ်းက ထုံချန်ကို တစ်ချက်ကြည့်လိုက်ပြီး ပြောသည်။

"ထုံချန်... ဒါက ရှင်သန်ထမြောက်ခြင်းနော်။ သေရာကနေ တကယ်ပြန်အသက်ရှင်လာတာ။ ဘယ်လိုပေးဆပ်ရပါစေ၊ ငါ့အမြင်မှာတော့ အရေးမကြီးဘူး။ ရှင်သန်ခြင်းနဲ့သေခြင်းကို ပြောင်းပြန် လှန်တယ်ဆိုတာက သူ့ဘာသာသူ တားမြစ်ချက်တစ်ခုပဲ။ 'တစ္ဆေမှန်'မှာ ဒီလိုထူးဆန်းတဲ့ စွမ်းရည်ရှိနေတာက တန်ဖိုးမဖြတ်နိုင်ဘူး။"

ဒီကမ္ဘာမှာ သေဖို့က လွယ်သည်။

တကယ်ပြန်အသက်ရှင်လာဖို့ဆိုတာက ထိပ်တန်းတစ္ဆေဆရာတွေတောင် မလုပ်နိုင်တဲ့အရာ ဖြစ်သည်။

တိတိကျကျပြောရရင် မနေ့က ရှုန်ဝမ်ဝမ်ရဲ့ကိစ္စက ရှင်သန်ထမြောက်ခြင်းလို့ မသတ်မှတ်နိုင်ဘဲ နိုးထလာခြင်းလို့သာ ပြောနိုင်သည်။

ဘာကြောင့်လဲဆိုတော့ ရှုန်ဝမ်ဝမ်ရဲ့ အသိစိတ်က ရှိနေသေးလို့ပဲ။

သို့သော် 'တစ္ဆေမှန်'က သေဆုံးသွားသူကို ဗလာနတ္ထိကနေ တကယ်ပြန်ခေါ်လာနိုင်သည်။

"ဒါဆိုရင်တော့ ငါတို့ သတိထားပြီးသုံးရမယ်။ အဓိပ္ပာယ်မရှိတဲ့လူတွေအပေါ်မှာ မသုံးသင့်ဘူး။ လူတစ်ယောက်ကိုကယ်ပြီး တစ္ဆေတစ်ကောင်လွှတ်လိုက်လို့ နောက်ထပ်လူတွေ အများကြီးသေတာမျိုး မဖြစ်စေရဘူး။"

ထုံချန်က ထိုကိစ္စကို အလွန်ဂရုစိုက်စွာ သတိပေးလိုက်သည်။

"ယန်ကျန့်... 'တစ္ဆေမှန်'ကို ငါ့ကို တာဝန်ပေးထားရင် မင်းအဆင်ပြေရဲ့လား။ ရိုးရိုးသားသားပြောရရင် တခြားဘယ်သူ့ကိုမှ စီမံခန့်ခွဲဖို့ ငါစိတ်မချဘူး။"

"သာမန်လူတစ်ယောက်ယောက်ကို မှန်ထဲကြည့်ခွင့်ပေးလိုက်ရင် ကမောက်ကမတွေ ဖြစ်ကုန်မှာမဟုတ်ဘူးလား။"

သူမက အများအကျိုးကို ဦးစားပေးပြီး 'တစ္ဆေမှန်'၏ ရှင်သန်ခြင်းစွမ်းရည်က အထိန်းအကွပ်မဲ့ဖြစ်ကာ သဘာဝလွန်ဖြစ်ရပ်တွေ တစ်ခုပြီးတစ်ခု ဖြစ်ပေါ်စေမှာကို မလိုလားပေ။

အလွန်အရေးကြီးသောသူများသာ ကြီးမားသော ပေးဆပ်မှုဖြင့် ပြန်လည်ရှင်သန်ထိုက်သည်။

သို့သော် ရှင်သန်ထမြောက်ခြင်း၏ သွေးဆောင်မှုက အလွန်ကြီးမားသည်။

ကိုယ်ကျိုးဆန္ဒရှိသူများက အပြင်လောကအပေါ် သက်ရောက်နိုင်သည့် အကျိုးသက်ရောက်မှုကို မစဉ်းစားဘဲ သူတို့၏ အိမ်မွေးတိရစ္ဆာန်များကိုပင် မှန်ထဲသို့ ကြည့်ခိုင်းနိုင်သည်။

သမ္မတနိုင်ငံခေတ် အိမ်တော်ဟောင်း၏ ယခင်ပိုင်ရှင်က 'တစ္ဆေမှန်'ကို အခန်းတစ်ခုထဲတွင် သော့ခတ်သိမ်းဆည်းထားခဲ့သည့် အကြောင်းရင်းရှိသည်။

သူက မျှော်လင့်ချက်နှင့် အကူအညီအနည်းငယ် ချန်ထားလိုသော်လည်း နောင်လာနောက်သားများက အလွဲသုံးစားလုပ်မည်ကို စိုးရိမ်ခဲ့သည်။

"ကောင်းပြီလေ။ 'တစ္ဆေမှန်'ကို မင်းပဲ တာဝန်ယူလိုက်။"

ယန်ကျန့်က ခဏစဉ်းစားပြီးနောက် ခေါင်းညိတ်သဘောတူလိုက်သည်။

သူ ထုံချန်၏ စာရိတ္တကို ယုံကြည်သည်။

"ခေါင်းဆောင်... ကျွန်မ မှန်ထဲကို ပထမဆုံးကြည့်ချင်တယ်။ ကျွန်မရဲ့အလှကို ထိန်းသိမ်းထားချင်လို့ပါ။ သေပြီး ပြန်ရှင်လာတဲ့အခါ ကျွန်မခန္ဓာကိုယ်က တစ္ဆေတွေ ဖယ်ရှားခံလိုက်ရရင်တောင် ကမ္ဘာပေါ်မှာ အလှဆုံးမိန်းမတစ်ယောက် ဖြစ်နေနိုင်သေးတာပေါ့။"

ဟွမ်ကျီယာက အလျင်စလို ပြောလိုက်သည်။

သူမက သူမ၏အလှအတွက်ဆိုလျှင် အစွန်းရောက်သည့်တိုင် လုပ်ဆောင်လိမ့်မည်။

"နင် အဲ့ဒီလောက် အရည်အချင်းမရှိသေးဘူးလို့ ငါထင်တယ်။"

ထုံချန်က သူမ၏တောင်းဆိုမှုကို တာဝန်အရ ပယ်ချလိုက်သည်။

ဟွမ်ကျီယာက ချက်ချင်းပင် ယန်ကျန့်ဘက်သို့ သနားစရာမျက်နှာလေးဖြင့် လှည့်ကြည့်လိုက်သည်။

ယန်ကျန့်က ပြောသည်။

"အသုံးပြုခွင့်ကိုတော့ အဖွဲ့ဝင်တွေအတွက်ပဲ ထားသင့်တယ်။"

ဒါက အဖွဲ့၏စည်းလုံးမှုကို တိုးမြှင့်ရန် နည်းလမ်းတစ်ခုဖြစ်သည်။ သူက အဖွဲ့ကို တည်ငြိမ်စေရန် ၎င်းကို ထုတ်ယူလာခဲ့ခြင်း ဖြစ်သည်။

အကျိုးစီးပွားစည်းလုံးမှုကို မနေ့က ရရှိခဲ့ပြီးပြီ။ ယခု ရှင်သန်မှုစည်းလုံးရေးအတွက် အချိန်တန်ပြီ။

'တစ္ဆေမှန်'က အဓိကသော့ချက်ဖြစ်သည်။

အရာအားလုံးကို ထည့်သွင်းစဉ်းစားပြီးဖြစ်၍ သူက လက်လွတ်စပယ် ပြုမူနေခြင်းမဟုတ်ပေ။

ထုံချန်က မျက်မှောင်ကြုတ်ကာ ခဏစဉ်းစားပြီးနောက် နောက်ဆုံးတွင် ခေါင်းညိတ် သဘောတူလိုက်သည်။

"မင်းပြောတာလည်း ဟုတ်တယ်။ သူ့ကို စမ်းကြည့်ခိုင်းလိုက်ပါ။ လူတိုင်းကိုလည်း ဒီအန္တရာယ်ရှိတဲ့ပစ္စည်းနဲ့ ရင်းနှီးအောင်လုပ်ပေးလိုက်တာပေါ့။ မင်းဘယ်လိုထင်လဲ ယန်ကျန့်။"

"ငါလည်း အဲ့လိုပဲ စဉ်းစားထားတာ။"

ယန်ကျန့်က ဆိုသည်။

"ချစ်လိုက်တာ ခေါင်းဆောင်ရယ်။"

ဟွမ်ကျီယာက ယန်ကျန့်ကို ချစ်စဖွယ်အကြည့်တစ်ချက် ပို့လိုက်ပြီးနောက် 'တစ္ဆေမှန်'ကို အသုံးပြုရန် စိတ်အားထက်သန်နေတော့သည်။

အခြားသူများကတော့ 'တစ္ဆေမှန်'က ဘယ်လိုအရာမျိုးလဲဆိုတာ လေ့လာကြည့်ရှုရန် စီစဉ်ထားကြသည်။

မကြာမီ...

မှောင်မိုက်သော လုံခြုံရေးအိမ်အတွင်း...

'တစ္ဆေမှန်'ကို အတွင်းတွင် ထားရှိလိုက်သည်။

၎င်းကို ဖုံးအုပ်ထားသောအဝတ်ကို ဖယ်ရှားလိုက်ပြီး ဟွမ်ကျီယာက အနည်းငယ်စိတ်လှုပ်ရှားစွာဖြင့် 'တစ္ဆေမှန်' ရှေ့တွင် ရပ်လိုက်သည်။

မှောင်မိုက်သောပတ်ဝန်းကျင်မှာပင် မှန်၏မျက်နှာပြင်သည် ကြည်လင်ပြီး အနည်းငယ် တောက်ပနေသည်။

မှန်ထဲတွင် ဟွမ်ကျီယာ၏ အရိပ်မရှိပေ။

"မအောင်မြင်ဘူးလား။"

ဟွမ်ကျီယာက သံသယဖြင့် မေးလိုက်သည်။

"မဟုတ်ဘူး... ရောက်လာပြီ။"

ယန်ကျန့်က လေးနက်စွာပြောလိုက်သည်။ သူ့၏ အနည်းငယ်နီနေသောမျက်လုံးများသည် မှောင်မိုက်သောအလင်းရောင်တွင် အထူးပင် ထင်ရှားနေသည်။

လူတိုင်း မြင်လိုက်ရသည်။

မှန်၏နက်ရှိုင်းသောနေရာတွင် ထူးဆန်းသော ပုံရိပ်တစ်ခု ပေါ်လာသည်။

ငရဲ၏နက်ရှိုင်းသောနေရာမှ ကြောက်မက်ဖွယ်တစ္ဆေတစ်ကောင်က မှန်ကို ကြားခံအဖြစ်အသုံးပြုကာ လက်တွေ့ကမ္ဘာသို့ ကျူးကျော်ဝင်ရောက်ရန် ကြိုးစားရင်း တဖြည်းဖြည်း နီးကပ်လာနေသကဲ့သို့ပင်။

အစပိုင်းတွင် ထိုပုံရိပ်သည် မရင်းနှီးဘဲ ဟွမ်ကျီယာနှင့်မတူပေ။

သို့သော် နီးကပ်လာသည်နှင့်အမျှ ပုံရိပ်သည် ပုံပျက်ကာ ပုံစံပြောင်းသွားသည်။

ဟွမ်ကျီယာ၏ ပုံသဏ္ဌာန် ပေါ်လာပြီးနောက် သူမ၏ ထူထဲနက်မှောင်သော ဆံပင်အပြည့်က မှန်ထဲတွင် ပေါက်ထွက်လာသည်— ထိုမတိုင်ခင်က မှန်ထဲရှိ ကြောက်မက်ဖွယ်တစ္ဆေအရိပ်တွင် ဆံပင်မရှိခဲ့ပေ။

ဟွမ်ကျီယာ 'တစ္ဆေမှန်'ရှေ့တွင် ရပ်နေသည့်အတွက် အရာအားလုံး ပြောင်းလဲသွားသည်။

"မယုံနိုင်စရာပဲ။"

ဖုန်းချွမ်း၏ မျက်လုံးများက ကျဉ်းမြောင်းသွားသည်။

ဒါဟာ မှန်ထဲကတစ္ဆေက အပြင်ကလူကို အတုခိုး၊ ကူးယူနေသလိုပင်။

အလွန်လျင်မြန်စွာ မှန်ထဲကလူသည် တဖြည်းဖြည်း နီးကပ်လာပြီး နောက်ဆုံးတွင် ဟွမ်ကျီယာ၏ ပြီးပြည့်စုံသော ပုံသဏ္ဌာန်ကို ဖွဲ့စည်းလိုက်သည်။

သို့သော် မှန်ထဲက ဟွမ်ကျီယာသည် လမ်းလျှောက်နေသော လူသေကောင်တစ်ကောင်ကဲ့သို့ ခံစားချက်ကင်းမဲ့၊ ထုံထိုင်းအေးစက်ပြီး တောင့်တင်းသော ခန္ဓာကိုယ်နှင့် ဖြစ်နေသည်။

အအေးစက်ဆုံးအရာမှာ မှန်ထဲက ဟွမ်ကျီယာသည် အပြင်က အလွန်စိတ်လှုပ်ရှားနေသော ဟွမ်ကျီယာ၏ ပုံစံနှင့် လုံးဝကွဲပြားခြားနားနေခြင်းပင်။

မှန်အတွင်းနှင့် အပြင်က လူနှစ်ဦးတွင် မတူညီသော မျက်နှာအမူအရာနှစ်ခု ရှိနေသည်။

သို့သော် မကြာမီ မှန်ထဲက ဟွမ်ကျီယာသည် နောက်တစ်ကြိမ် ပြောင်းလဲလာပြန်သည်။

ထုံထိုင်းအေးစက်သော မျက်နှာအမူအရာက တဖြည်းဖြည်းပြောင်းလဲလာပြီး ပါးပြင်များက တောင့်တင်းစွာ လှုပ်ခါလာကာ အလွန်ထူးဆန်းနေသော်လည်း မကြာမီမှာပင် ထိုတောင့်တင်းမှု ပျောက်ကွယ်သွားသည်။

အသက်ရှင်သော လူတစ်ဦး၏ မျက်နှာအမူအရာ ပေါ်ထွက်လာသည်။

ဟွမ်ကျီယာနှင့် မှန်အတွင်းက ပုံရိပ်သည် တဖြည်းဖြည်း ပို၍တူလာသည်။

အသေးစိတ်အချို့က ဆက်တိုက် ထပ်တူကျလာနေသည်။

"တော်ပြီ။"

ယန်ကျန့်က ရုတ်တရက် အော်လိုက်သည်။

ထုံချန်က ချက်ချင်းတုံ့ပြန်ကာ မြေပြင်ပေါ်က အနက်ရောင်အဝတ်စကို လျင်မြန်စွာကောက်ယူပြီး 'တစ္ဆေမှန်'ကို ဖုံးအုပ်လိုက်သည်။

ထူးဆန်းသော ပြောင်းလဲမှုများ ရပ်တန့်သွားသည်။

"ဒီကမ္ဘာမှာ ထပ်တူကျတဲ့လူနှစ်ယောက်ဆိုတာ မရှိဘူး။ 'တစ္ဆေမှန်'ထဲက အရိပ်က မင်းရဲ့လက်တွေ့နဲ့ တစ်ထပ်တည်းကျသွားတာနဲ့ မင်း 'တစ္ဆေမှန်'ထဲကို ဆွဲသွင်းခံရပြီး မှန်ထဲကတစ္ဆေက ဒီကမ္ဘာမှာ မင်းနေရာကို အစားထိုးဝင်ရောက်လာလိမ့်မယ်။"

ယန်ကျန့်က လေးနက်စွာ ပြောလိုက်သည်။

"တကယ်ပဲ အန္တရာယ်များတယ်။ ဒီ 'တစ္ဆေမှန်'မှာ တားမြစ်ချက်တွေ အရမ်းများတယ်။ ခြေတစ်လှမ်းမှားတာနဲ့ သေနိုင်တယ်။"

ထုံချန်က သူမဘေးက မှန်ကို လေးလံသောစိတ်ဖြင့် ကြည့်ကာ ပြောလိုက်သည်။

ထိုအရာသည် ရှင်သန်ထမြောက်ခြင်း၏ သွေးဆောင်မှုကို ဆောင်ယူလာသော်လည်း သဘာဝလွန်ဖြစ်ရပ်များကို ထုတ်လွှတ်နိုင်သည့် ကြောက်မက်ဖွယ်ရာကိုလည်း သယ်ဆောင်လာသည်။

ဒါဟာ ပန်ဒိုရာရဲ့သေတ္တာတစ်ခုလိုပင်။

အခြားသူများလည်း စိတ်ထဲတွင် စိုးရိမ်ကြောက်ရွံ့မှုများ ကျန်ရှိနေကာ တိတ်ဆိတ်သွားကြသည်။

ထိုအခိုက်...

ကျန်းဟန်က ရုတ်တရက် ထပြောသည်။

"ခေါင်းဆောင်ယန်၊ ကျွန်တော်လည်း 'တစ္ဆေမှန်'ကို သုံးလို့ရမလား။ ကျွန်တော့်ကလေးက တစ်နှစ်ပဲ ရှိသေးတယ်။ တကယ်လို့ ရှင်သန်ခွင့်ရမယ်ဆိုရင် သူ့နဲ့အတူ အချိန်ပိုကုန်ဆုံးချင်လို့ပါ။"

"ရပါတယ်။ အရင်ကပြောခဲ့သလိုပဲ အဖွဲ့မှာ အသုံးပြုခွင့်ရှိတယ်။ ဒါက ခေါင်းဆောင် တစ်ယောက်အနေနဲ့ လူတိုင်းကိုပေးတဲ့ အခွင့်အရေးပဲ။ ဒါပေမဲ့ ထုံချန်ပြောသလိုပဲ ငါတို့ အလွဲသုံးစား လုပ်လို့မရဘူး။ ဒါကြောင့် အသုံးပြုခွင့်က ငါတို့တစ်သိုက်အတွက်ပဲ ကန့်သတ်ထားတယ်။"

ယန်ကျန့်က ခေါင်းညိတ်ကာ ပြောလိုက်သည်။

"ကျွန်တော် နားလည်ပါတယ်၊ ကျေးဇူးတင်ပါတယ် ခေါင်းဆောင်ယန်။"

ကျန်းဟန်က ကျေးဇူးတင်စွာ ပြောလိုက်သည်။

သူ ယန်ကျန့်ကို သိကျွမ်းခဲ့သည်မှာ ကြာပြီဖြစ်သည်။ ရှောင်ချန်ဖျော်ဖြေရေးကလပ်တွင် စတွေ့ခဲ့ကြပြီး ဟွမ်ကန်းရွာမှ 'တစ္ဆေခေါင်းတလား' ဖြစ်ရပ်နှင့် 'ပြိတ္တာ' ဖြစ်ရပ်တို့ကို အတူတူ ရှင်သန်ကျော်ဖြတ်ခဲ့ကြသည်။

အကြိမ်အနည်းငယ် ယန်ကျန့်၏ စောင့်ရှောက်မှုသာမရှိခဲ့လျှင် သူ သေသွားခဲ့လောက်ပြီ။

ထို့ကြောင့် သူ ဆုံးဖြတ်ချက်ချပြီးဖြစ်သည်။ ရှင်သန်ခွင့်အခွင့်အရေး လက်ထဲတွင်ရှိနေသည့်အတွက် သူ ဘာကိုမှ မကြောက်တော့ပေ။

ထုံချန်က စိတ်ထဲတွင် သက်ပြင်းချလိုက်သည်။

သေချာပါတယ်၊ ဘယ်သူမှ ရှင်သန်ထမြောက်ခြင်းရဲ့ သွေးဆောင်မှုကို မတွန်းလှန်နိုင်ဘူး။

မတတ်နိုင်တော့ဘူး။ ယန်ကျန့်က ဒီပစ္စည်းကို ထုတ်ယူလာမှတော့ သူတို့ အသုံးပြုရတော့မည်။ နောင်အနာဂတ်မှာ ဒီနေ့ရဲ့အခွင့်အရေးနဲ့ ထိုက်တန်အောင် သဘာဝလွန်ဖြစ်ရပ်တွေကို လုံလောက်စွာ ကိုင်တွယ်ဖြေရှင်းနိုင်ဖို့ လူတိုင်း စည်းလုံးညီညွတ်ကြလိမ့်မည်ဟု သူမ မျှော်လင့်မိသည်။

အနက်ရောင်အဝတ်စကို နောက်တစ်ကြိမ် ဖယ်ရှားလိုက်ပြီး 'တစ္ဆေမှန်'ကို ဒုတိယအကြိမ် အသုံးပြုခဲ့သည်။

မှန်သည် ယခု ဗလာဖြစ်နေပြီး အတွင်းတွင် ဘာမျှမရှိတော့ပေ။

အရိပ်မရှိသရွေ့ ထူးခြားမှုများ ဖြစ်ပေါ်မည်မဟုတ်။

"ငါ့အရိပ် ပျောက်သွားပြီ။"

ဟွမ်ကျီယာက ပြောသည်။

ယန်ကျန့်က ဆိုသည်။

"မင်းသေတဲ့အခါကျရင် ပေါ်လာလိမ့်မယ်။ ပြီးတော့ စကားမစပ် ကျန်းဟန်က လူနှစ်ယောက်ရဲ့အရိပ်ကို တစ်ပြိုင်နက် သိမ်းထားနိုင်မလားဆိုတာ စမ်းကြည့်ရအောင်။"

"နေဦး... အဲ့ဒါဘာလဲ။"

ရုတ်တရက်...

ထုံချန်၏ မျက်လုံးများက လှုပ်ရှားသွားပြီး 'တစ္ဆေမှန်'၏ မထင်မရှားထောင့်တစ်နေရာကို ညွှန်ပြလိုက်သည်။

မှန်အတွင်း၌ မဆိုင်သောအရာတစ်ခု ပေါ်ထွက်လာသည်။

ခြေထောက်တစ်ချောင်းနှင့်တူသော်လည်း သက်ရှိလူတစ်ဦး၏ ခြေထောက်မဟုတ်ဘဲ အနက်ရောင်အမွေးအမှင်များဖြင့် ဖုံးလွှမ်းနေသည်။

"မှန်ထဲမှာ တစ်ခုခုရှိနေတယ်။"

ထုံချန်က ပြောသည်။

"မဟုတ်ဘူး။ တစ်ခုခုကို 'တစ္ဆေမှန်'က ထုတ်ဖော်ပြနေတာ။ ဒါက မှန်ထဲကအရာမဟုတ်ဘူး။"

ယန်ကျန့်က ဆိုသည်။

"ဘယ်သူမှ 'တစ္ဆေမှန်'ကို မသုံးနေရင် သဘာဝလွန်ဖြစ်ရပ် ပေါ်ပေါက်လာမှာမဟုတ်ဘူး။ ငါအကြိမ်ပေါင်းများစွာ စစ်ဆေးပြီးပြီ။"

ဖုန်းချွမ်းက ချက်ချင်း လျှောက်သွားပြီး မှန်ကို နောက်ဘက်မှလှည့်ကာ 'တစ္ဆေမှန်'၏ ဦးတည်ရာကို ညှိလိုက်သည်။

'တစ္ဆေမှန်'က တဖြည်းဖြည်းလှည့်သွားပြီး အခြားသူများအားလုံးက ရောင်ပြန်ဟပ်ခြင်းမခံရစေရန် ဘေးသို့ရှောင်လိုက်ကြသည်။

မကြာမီ...ထောင့်က မထင်မရှားဖြစ်နေသော အရာဝတ္ထုသည် အပြည့်အဝ ပေါ်ထွက်လာသည်။

ချက်ချင်းပင်...လူတိုင်း တုန်လှုပ်သွားကြသည်။

အမွေးအမှင်မည်းမည်းတွေနဲ့ ထူထပ်စွာဖုံးလွှမ်းနေတဲ့ ဝံပုလွေခွေးတစ်ကောင်ဟာ မှန်ထဲမှာ ဝပ်တွားနေခဲ့တယ်။

ခွေးတစ်ကောင်။

သို့သော် ထိုခွေးသည် အိပ်ပျော်နေပြီး မလှုပ်မယှက်ဖြင့် သေနေသော အရာဝတ္ထုတစ်ခုလို ဖြစ်နေသည်။

"ယန်ကျန့်... မှန်က အခန်းထဲက ခေါင်းတလားကို မျက်နှာမူထားတယ်။"

ဖုန်းချွမ်းက အော်ပြောလိုက်သည်။

ခေါင်းတလားက အလင်းမပြန်သောကြောင့် မှန်ထဲတွင် မပေါ်ပေ။ ၎င်းသည် သေနေသောအရာဖြစ်၍ မှန်ထဲတွင် အရိပ်ချန်ထားနိုင်ခြင်းမရှိပေ။ သို့သော် ခေါင်းတလားအတွင်းက အရာဝတ္ထုကမူ မှန်ထဲတွင် ပုံပေါ်နေသည်။

မဟုတ်ဘူး... ထုတ်ဖော်ပြသခံနေရသည်ဟု ဆိုသင့်သည်။

ခွေးသည် မှန်ထဲတွင်လည်း မရှိ၊ အပြင်တွင်လည်း မရှိ။ ၎င်း၏အရိပ်သည် မှန်၏မျက်နှာပြင်ပေါ်တွင်သာ ပျံဝဲနေသည်။

'တစ္ဆေမှန်'သည် မျက်စိဖြင့်မမြင်နိုင်သော ဝိညာဉ်များကို ပြသနိုင်စွမ်းရှိပုံရသည်။

ဒါက နောက်ထပ်အသစ်တွေ့ရှိရသော စွမ်းရည်တစ်ခုပင်။

"ခေါင်းဆောင်... ခင်ဗျား ခေါင်းတလားထဲမှာ ခွေးတစ်ကောင် ထည့်ထားတာလား။"

ဟွမ်ကျီယာက အံ့ဩစွာ မေးလိုက်သည်။

ယန်ကျန့်လည်း စိတ်ထဲတွင် အလွန်အံ့ဩသွားသည်။

သူ့ခေါင်းတလားထဲတွင် ထည့်ထားသောအရာသည် ခွေးတစ်ကောင်လုံးဝမဟုတ်ဘဲ 'တစ္ဆေအိပ်မက်'ဟု အမည်ပေးထားသော မကောင်းဆိုးဝါးဝိညာဉ်၏ ရုပ်အလောင်းတစ်လောင်းသာ ဖြစ်သည်။

ရုပ်အလောင်းက ဘာကြောင့် ခွေးတစ်ကောင်ဖြစ်သွားရတာလဲ။

ပြီးတော့ ဒါက သူအရင်က မြင်ဖူးသော ခွေးတစ်ကောင်ဖြစ်သည်။

"ကွယ်လွန်သွားတဲ့ ငါ့အဖေရဲ့ ကျန်ရစ်ခဲ့တဲ့မှတ်ဉာဏ်က ဒီဖြေရှင်းမရနိုင်တဲ့အဆင့်ရှိတဲ့ 'တစ္ဆေအိပ်မက်'ကို ခွေးတစ်ကောင်နဲ့ ထိန်းချုပ်စေချင်တဲ့ ရည်ရွယ်ချက် တကယ်ပဲရှိနေပုံရတယ်။"

ယန်ကျန့်၏ မျက်နှာအမူအရာက ပြောင်းလဲသွားပြီး မကြာမီဖြစ်ပေါ်လာမည့် အဖြစ်အပျက်များကို သဘောပေါက်သွားပုံရသည်။

လောလောဆယ်တွင် ထိုခွေးသည် အိပ်ပျော်နေဆဲဖြစ်ပြီး၊ အိပ်မက်ထဲတွင် မကောင်းဆိုးဝါးဝိညာဉ်နှင့် တိုက်ခိုက်နေသည်။။

အကယ်၍ သူသာ တိုက်ပွဲတွင် အောင်နိုင်ခဲ့လျှင်...

ထိုခွေးသည် နိုးထလာလိမ့်မည်။

ထိုအခါ ထိုခွေးသည် ဝိညာဉ်များကို စိုးမိုးသူဖြစ်လာပြီး 'တစ္ဆေအိပ်မက်'ကို ထိန်းချုပ်ကာ မကောင်းဆိုးဝါးတစ္ဆေ တစ်ကောင်အဖြစ် ပြောင်းလဲသွားလိမ့်မည်။

ထို့အပြင် ကြောက်မက်ဖွယ်အကောင်းဆုံးအချက်မှာ ခွေးသည် လက်တွေ့ကမ္ဘာတွင် တည်ရှိနေခြင်း မရှိခြင်းပင်။

၎င်းသည် မမြင်ရသော ခွေးတစ်ကောင်ဖြစ်သည်။

"အဲ့ဒါကို စိတ်မပူနဲ့။ မှန်ကို လှည့်လိုက်။ ခေါင်းတလားဘက်ကို မျက်နှာမမူစေနဲ့။ ထူးခြားမှုက အခုမှ သန္ဓေတည်နေတုန်းပဲ။ အဲ့ဒါ နိုးထလာတဲ့အခါ မင်းတို့နားလည်လာလိမ့်မယ်။"

ယန်ကျန့်က သူ့အတွေးစုံကို ပြန်ရုပ်သိမ်းလိုက်သည်။

"အလန့်တကြားဖြစ်ရုံပဲဆိုတော့ စိတ်ပူစရာမရှိတော့ဘူးပေါ့။"

ဖုန်းချွမ်းက 'တစ္ဆေမှန်'ကို ထိုခေါင်းတလားဘက်သို့ မျက်နှာမမူစေရန် နေရာရွှေ့လိုက်သည်။

ကျန်းဟန်က သက်ပြင်းချကာ ဟွမ်ကျီယာ ယခင်ပြသခဲ့သောပုံစံအတိုင်း သူ၏အရိပ်ကို ဆက်လက်ထိန်းသိမ်းခဲ့သည်။

ရှင်သန်ခွင့်အခွင့်အရေးတစ်ခုကို ထိန်းသိမ်းရန်...

သူ ရှင်သန်လာပြီးနောက် သာမန်လူတစ်ယောက်ဖြစ်လာပြီး ပုံမှန်ဘဝသို့ပြန်ကာ သူ၏ကလေးများ ကြီးပြင်းလာသည်ကို စောင့်ကြည့်ရန် မျှော်လင့်နေသည်။

'တစ္ဆေမှန်'ကို ရှင်သန်ရန်အသုံးပြုခြင်းတွင် တားမြစ်ချက်အချို့ပါဝင်သော်လည်း သူဂရုမစိုက်ခဲ့ပေ။

မကြာမီ ကျန်းဟန်သည် သူ၏အရိပ်ကို အောင်မြင်စွာ ချန်ထားနိုင်ခဲ့သည်။

စည်းမျဉ်းများနှင့် တားမြစ်ချက်များကို သိရှိထားသောအဖွဲ့သည် အကျပ်အတည်းများစွာကို ရှောင်ရှားနိုင်ခဲ့ပြီး ထိန်းချုပ်မှုလွတ်သွားနိုင်ခြေကို တားဆီးနိုင်ခဲ့သည်။

"တခြားဘယ်သူ သုံးချင်သေးလဲ။ မရှိရင်တော့ ငါဒီမှန်ကို ဒီမှာပဲ ချိပ်ပိတ်ထားတော့မယ်။"

ယန်ကျန့်က ပြောသည်။

အခြားသူများက ခေါင်းခါလိုက်ကြသည်။

ဖုန်းချွမ်းက ရှက်ကိုးရှက်ကန်းပြုံးကာ...

"ငါတော့ စောင့်ကြည့်ချင်သေးတယ်။ စိတ်မဆိုးပါနဲ့ ယန်ကျန့်ရာ။ ဒီကိစ္စက နည်းနည်းတော့ ထူးဆန်းနေလို့။"

သူ့မှာ သံသယများရှိနေပြီး ဟွမ်ကျီယာနှင့် ကျန်းဟန်တို့ အောင်မြင်စွာ ရှင်သန်နိုင်မလားဆိုတာကို ကြည့်ချင်နေသည်။

တစ်ခုခုမှားယွင်းသွားလျှင်...

ဒါဟာ ဒုက္ခရှာခြင်းသက်သက်သာ ဖြစ်ပေလိမ့်မည်။

ထိုသို့သော သဘာဝလွန်ပစ္စည်းများတွင် ပေးဆပ်ရမှုများရှိပြီး ဘေးထွက်ဆိုးကျိုးမရှိဘဲ မနေနိုင်ပေ။

"ရပါတယ် သတိထားတာက မှန်ကန်တဲ့ ချဉ်းကပ်မှုပဲ"

ယန်ကျန့်က စိတ်မညိုညင်ပေ။

ဒါဟာ သာမန်တွေးခေါ်ပုံတစ်ခုသာ ဖြစ်သည်။

အလှတရားအတွက် အရာရာကိုစွန့်စားနိုင်သော ဟွမ်ကျီယာကဲ့သို့သောသူသာ ကြောက်ရွံ့မှုကင်းမဲ့ပေလိမ့်မည်။

ကျန်းဟန်ကတော့ အနာဂတ်အတွက် လောင်းကြေးထပ်နေခြင်းဖြစ်သည်။ သူက 'တစ္ဆေမှန်'ကို အသုံးပြု၍ သူ့အတွင်းက တစ္ဆေကို ဖယ်ရှားပြီးနောက် သူ့မိသားစုနှင့်အတူ ပုံမှန်ဘဝကို ပြန်လည်စတင်ကာ အိမ်မှာ သူ့မိန်းမနှင့် ကလေးများနှင့်အတူ နေထိုင်ရန် မျှော်လင့်နေသည်။

'တစ္ဆေမှန်'ကိစ္စ ယာယီပြီးဆုံးသွားပြီးနောက်...

နောက်ရက်များတွင် ယန်ကျန့်သည် အနည်းငယ် အားလပ်နေပြီး အဖွဲ့၏ အသေးအဖွဲကိစ္စအချို့ဖြင့်သာ အလုပ်ရှုပ်နေခဲ့သည်။

ဥပမာအားဖြင့် သူ့အဖွဲ့အတွင်း ပိုမိုကောင်းမွန်သော ပူးပေါင်းဆောင်ရွက်မှုအတွက် ဂြိုဟ်တု တည်နေရာပြဖုန်း ဒါဇင်အနည်းငယ် ပို့ပေးရန် ဌာနချုပ်ကို ဆက်သွယ်ခြင်း၊ ပြီးတော့ 'တစ္ဆေဖယောင်းတိုင်' သုံးတိုင်နှင့် 'တစ္ဆေကတ်ကြေး'ကို ချက်ချင်းပို့ပေးရန် ဌာနချုပ်ကို တိုက်တွန်းခြင်း— သူက ၎င်းတို့ရောက်လာမည်ကို စောင့်နေဆဲဖြစ်သည်။

ထို့နောက် သူက အဖွဲ့ဝင်များကို တစ်ယောက်၏နောက်ကြောင်းကို တစ်ယောက်သိရှိစေခဲ့သည်။

တစ်ယောက်၏ စွမ်းရည်များကို တစ်ယောက် ရင်းနှီးကျွမ်းဝင်စေရန်...

သုံးရက်ကြာပြီးနောက်...

ချန်ရှူမေ့က ယန်ကျန့်ကို ဆက်သွယ်ပြီး ဒုတိယလုံခြုံရေးအိမ်သို့ လာရောက်လည်ပတ်ရန် တောင်းဆိုခဲ့သည်။

အကြောင်းမှာ လွန်ခဲ့သောသုံးရက်အတွင်း ရှုန်ဝမ်ဝမ်သည် စက္ကူလူသားခန္ဓာကိုယ်နှင့် ကျင့်သားရလာပြီး ယခုအခါ စကားပြောနိုင်ပြီ ဖြစ်သောကြောင့်ပင်။

ယန်ကျန့်က တစ်ယောက်တည်း ဗီလာရှေ့သို့ ရောက်လာခဲ့သည်။

ချန်ရှူမေ့က ထိုနေရာတွင် စောစီးစွာ စောင့်နေနှင့်သည်ကို သူတွေ့လိုက်ရသည်။

ယနေ့ ချန်ရှူမေ့သည် အဖြူရောင်ဂါဝန်ရှည်ကို ဝတ်ဆင်ထားပြီး လည်ပင်းတွင် ပိုးပဝါတစ်ထည်ကို ချည်နှောင်ထားကာ နူးညံ့သိမ်မွေ့သောအလှကို ပေးစွမ်းနေပြီး တာဝန်ကျေသောဇနီးနှင့် ချစ်ခင်တတ်သောမိခင်တစ်ဦးကဲ့သို့ ထင်ဟပ်နေသည်။

"ခေါင်းဆောင်ယန်။"

သူမသည် ယနေ့တွင် အလွန်စိတ်ရွှင်လန်းနေပြီး သူမ၏လှပသောမျက်လုံးများသည် တက်ကြွမှုဖြင့် တောက်ပနေကာ လွန်ခဲ့သောရက်အနည်းငယ်က ပင်ပန်းနွမ်းနယ်မှု အရိပ်အယောင်များ လုံးဝမရှိတော့ပေ။

"အန်တီချန်။"

ယန်ကျန့်က နှုတ်ဆက်လိုက်သည်။

"ရှုန်ဝမ်ဝမ် ပုံမှန်ပြန်ဖြစ်သွားပြီလား။"

"ဟုတ်ကဲ့၊ ဝမ်ဝမ် အားလုံးအဆင်ပြေသွားပါပြီ။ ခေါင်းဆောင်ယန်ရဲ့ အကူအညီကြောင့်သာ ဝမ်ဝမ် ဘေးကင်းလုံခြုံနိုင်ခဲ့တာပါ။"

ချန်ရှူမေ့က ယဉ်ကျေးစွာ ပြောလိုက်သည်။

ယန်ကျန့်က ဆိုသည်။

"ဒါဆို သူ့ကို သွားကြည့်ကြရအောင်။ ရှုန်ဝမ်ဝမ် တကယ်ပဲ လုံးဝပြန်ကောင်းသွားပြီဆိုရင်တော့ သူ့ကို အပြင်ထုတ်ပေးသင့်ပြီ။"

ချန်ရှူမေ့၏ လာရောက်လည်ပတ်ခြင်းသည် အလွမ်းပြေရန်မဟုတ်ဘဲ ရှုန်ဝမ်ဝမ်၏ အခြေအနေကို အတည်ပြုစေပြီး သူ့ကို လွှတ်ပေးရန်ဖြစ်သည်။

"ခေါင်းဆောင်ယန်။"

ဗီလာအတွင်းတွင် ကျန်းဟန်က အခြေအနေကို စောင့်ကြည့်ရန် တာဝန်ယူထားသည်။ ယန်ကျန့်နှင့် ချန်ရှူမေ့ ဝင်လာသည်ကိုမြင်သောအခါ သူ နှုတ်ဆက်လိုက်သည်။

"ငါသူနဲ့အတူ ရှုန်ဝမ်ဝမ်ကို သွားစစ်ဆေးလိုက်ဦးမယ်။ မင်း ဒီရက်ပိုင်း ပင်ပန်းသွားပြီ။ အားလုံးတကယ်ပဲ ဘေးကင်းလုံခြုံတယ်ဆိုရင်တော့ ငါတို့ သတိထားစောင့်ကြည့်နေတာကို ရပ်လို့ရပြီထင်တယ်။"

ယန်ကျန့်က ပြောသည်။

စိတ်ချရစေရန် သူက ကျန်းဟန်ကို ဒီရက်များတွင် စောင့်ကြည့်ရန် စီစဉ်ထားခဲ့သည်။

သဘာဝလွန်ဖြစ်ရပ်တစ်ခုခု ဖြစ်ပွားခဲ့လျှင်...

သူက ထိုဖြစ်နိုင်ခြေများကို အစပျိုးကတည်းက နှိမ်နင်းရမည်။

ကျန်းဟန်သည် ဤကာလအတွင်း အိမ်တွင်းအောင်းနေခဲ့သည်။ သူက အိမ်ရာဝင်းအပြင်သို့ သိပ်မထွက်ဘဲ အိမ်တွင်နေ၍ သူ့မိန်းမနှင့် ကလေးနှင့် အချိန်ကုန်ဆုံးခြင်းကို ပိုနှစ်သက်သောကြောင့် ဤတာဝန်သည် သူ့အတွက် အံကိုက်ဖြစ်နေသည်။

"ကောင်းပါပြီ ခေါင်းဆောင်ယန်၊ ကျေးဇူးပြုပြီး ဂရုစိုက်ပါ။ တစ်ခုခုဖြစ်ရင် ကျွန်တော့်ကို ချက်ချင်းခေါ်လိုက်ပါ။"

ကျန်းဟန်က ပြောသည်။

ယန်ကျန့်က ခေါင်းညိတ်ပြီးနောက် ချန်ရှူမေ့နှင့်အတူ မြေအောက်လုံခြုံရေးခန်း၏ တတိယအဆင့်သို့ ဆက်သွားခဲ့သည်။

ရှုန်ဝမ်ဝမ်ကို ထားရှိသော အခန်းတံခါးသည် တင်းကျပ်စွာ သော့ခတ်ထားဆဲဖြစ်သည်။

ဒါက ရှုန်ဝမ်ဝမ်သည် ဒီရက်များတွင် အပြင်ထွက်ရန် မကြိုးစားခဲ့ကြောင်း ညွှန်ပြနေသည်။

အလွန်ပူးပေါင်းဆောင်ရွက်တတ်သည်။

သူ ဒီလိုဖြစ်လေလေ၊ သူ၏အခြေအနေ ပုံမှန်ဖြစ်ကြောင်း ပိုသက်သေပြလေလေပင်။

"ဝမ်ဝမ်၊ မေမေပါ၊ သားကို လာတွေ့တာ။"

ချန်ရှူမေ့က တံခါးခေါက်ကာ ခေါ်လိုက်သည်။

"မေမေ... မေမေ။"

အတွင်းမှ လှုပ်ရှားမှုရှိလာပြီး ထူးဆန်းသောအသံတစ်ခု ထွက်ပေါ်လာသော်လည်း လေသံအရ ရှုန်ဝမ်ဝမ်ဖြစ်ကြောင်း ခွဲခြားသိရှိနိုင်သေးသည်။

ချန်ရှူမေ့က ဆိုသည်။

"ခေါင်းဆောင်ယန်လည်း ဒီမှာရှိတယ်။ သား လုံးဝပုံမှန်ဖြစ်ပြီဆိုရင် သားကို အပြင်ထုတ်ပေးမယ်တဲ့။"

"ယန်ကျန့်၊ မြန်မြန်ငါ့ကို အပြင်ထုတ်ပေးစမ်း၊ နှလုံးသားမရှိတဲ့လူ! ငါမင်းနဲ့အတူ တိုက်ပွဲတွေ ဖြတ်သန်းခဲ့ရတာကို အခုတော့ မင်းကငါ့ကို လှောင်ထားတယ်ပေါ့လေ။"

ရှုန်ဝမ်ဝမ်က အော်ပြောလိုက်သည်။

"တော်တော်လန်းဆန်းနေတာပဲ။ မဆိုးဘူး။"

ယန်ကျန့်က အတည်ပြုသည့်အနေဖြင့် ခေါင်းညိတ်လိုက်သည်။

ရှုန်ဝမ်ဝမ်က ထပ်အော်သည်။

"မင်း ငါ့ကို တစ်ပေါင်းတစ်က ဘယ်လောက်လဲလို့ ထပ်မေးဦးမှာတော့ မဟုတ်ဘူးမလား။ ငါပြောထားမယ်၊ နောက်တစ်ခါမေးမယ်ဆိုရင် အနည်းဆုံး ဂဏန်းသုံးလုံးမြှောက်တာ ဒါမှမဟုတ် စားတာ၊ ဒါမှမဟုတ် ရောနှောတွက်ချက်တာမျိုးလောက်တော့ မေး။ အဲ့ဒါမှ ငါတော်တယ်ဆိုတာ ပြနိုင်မှာ။"

"မူလတန်းကျောင်းသားလေးတစ်ယောက်ကများ ခက်တာကြိုက်နေသေးတယ်။ ယုံချင်ယုံ မယုံချင်နေ၊ ငါမင်းကို ညီမျှခြင်းတွေ ရှင်းခိုင်းပစ်လိုက်မယ်။"

ယန်ကျန့်က ပြောသည်။

ထိုအခိုက်အတန့်တွင် သူက အထက်တန်းကျောင်းသားတစ်ဦး၏ သြဇာအာဏာကို ထုတ်ဖော်ပြသနေသည်။

ရှုန်ဝမ်ဝမ် ရုတ်တရက် စကားမပြောနိုင်တော့ပေ။

သူ အဲ့ဒီပုစ္ဆာတွေ မတွက်တတ်ဘူး...

"ကျစ်... ငါအဲ့ဒါတွေ မသင်ရသေးဘူးကွ။ ငါသင်ပြီးသွားရင် မင်းငါ့ကို ခက်အောင်လုပ်နိုင်ဦးမှာ မလို့လား။"

ရှုန်ဝမ်ဝမ်က မကျေမနပ် ပြောလိုက်သည်။

သူနှင့်စကားပြောရာတွင် ယန်ကျန့်က သူသည် မကောင်းဆိုးဝါးတစ္ဆေတစ်ကောင်မဟုတ်ဘဲ အမှန်တကယ်ပင် ရှုန်ဝမ်ဝမ်ဖြစ်ကြောင်း အတည်ပြုနိုင်ခဲ့သည်။

"ကောင်းပြီ၊ ငါမင်းကို အပြင်ထုတ်ပေးမယ်။ ဒါပေမဲ့ ဒီနေ့ကစပြီး မင်းငါ့စကားကို နာခံရမယ်။ အပြင်ကအခြေအနေတွေ ပြောင်းလဲသွားပြီ။ မင်းလို ကလေးတစ်ယောက်ကို စောင့်ရှောက်မယ့်သူမရှိရင် သေတာ ပိုမြန်တတ်တယ်။"

ယန်ကျန့်က ဆိုသည်။

"ဒါပေမဲ့ ငါက အမြဲတမ်း စိတ်ကောင်းနှလုံးကောင်းရှိတဲ့သူတစ်ယောက်ဆိုတော့ မင်းကို ဒုက္ခခံပြီး စောင့်ရှောက်ပေးလိုက်မယ်။"

ထိုသို့ပြောပြီး သူ တံခါးကို ဖွင့်လိုက်သည်။

ချက်ချင်းပင် ရှုန်ဝမ်ဝမ်က မကျေမနပ်ဖြင့် ထွက်လာသည်။

"မင်းက အဲ့လောက် စိတ်ကောင်းနှလုံးကောင်းရှိမယ်တဲ့လား။ ငါမယုံဘူး။ မေမေ၊ အခု မေမေက သူနဲ့တွဲနေတာလား။"

"မဟုတ်... မဟုတ်ပါဘူး ဝမ်ဝမ်၊ လျှောက်မပြောနဲ့။"

ချန်ရှူမေ့က သူ့ကို မျက်စောင်းထိုးလိုက်သည်။

ရှုန်ဝမ်ဝမ်က ယန်ကျန့်ကို မထီမဲ့မြင်ကြည့်လိုက်သည်။

"မင်း မလုပ်နိုင်မှန်း ငါသိသားပဲ။ ငါမင်းကို အခွင့်အရေးတောင် ပေးခဲ့သေးတယ်၊ ဒါတောင် မင်း သူ့ကို မလိုက်နိုင်ဘူး။ အသုံးမကျတဲ့ကောင်၊ အခုထိ လူပျိုကြီးလုပ်နေတုန်း မဟုတ်လား။"

"ဒီကောင်စုတ်လေးက လူကြီးတစ်ယောက်ရဲ့ ဆုံးမမှု လိုနေပြီထင်တယ်။"

ယန်ကျန့်က လက်သီးဆုပ်လိုက်ပြီး သူ့ပါးစပ်က တွန့်သွားကာ ထိုကောင်လေးကို ထိုးကြိတ်ချင်စိတ်ကို မထိန်းနိုင်တော့ပေ။

"မင်း သူ့ကိုလိုက်နိုင်သည်ဖြစ်စေ၊ မလိုက်နိုင်သည်ဖြစ်စေ ငါဂရုမစိုက်ဘူး။ ဒါပေမဲ့ မင်း ငါ့မေမေ့ကို သေချာဂရုစိုက်ပေးရမယ်။ မဟုတ်ရင် နောင်အနာဂတ်မှာ ငါမင်းစကားကို လုံးဝနားထောင်မှာ မဟုတ်ဘူး။"

ရှုန်ဝမ်ဝမ်က မာနကြီးစွာ ပြောလိုက်သည်။

"ဝမ်ဝမ်၊ လျှောက်မပြောနဲ့လေ။ ခေါင်းဆောင်ယန်က မေမေ့ကို အရမ်းဂရုစိုက်ပေးခဲ့တာပါ။ ပြီးတော့ ဒီတစ်ခါ သားကို ကယ်ဖို့လည်း အများကြီး အားထုတ်ခဲ့ရတာ။"

ချန်ရှူမေ့က သူ့သားက သူမကို မျက်နှာပျက်စေသည့်အတွက် ရှက်ရွံ့စွာ ပြောလိုက်သည်။

ထို့နောက် သူမက ယန်ကျန့်ကို တောင်းပန်လိုက်သည်။

"တောင်းပန်ပါတယ် ခေါင်းဆောင်ယန်။ ကလေးတွေက ဘာမှမသိဘဲ ပါးစပ်ထဲရှိတာ လျှောက်ပြောတတ်ကြလို့ပါ။ အိမ်ပြန်ရောက်ရင် သူ့ကို သေချာဆုံးမလိုက်ပါ့မယ်။"

"မေမေ၊ သားအမှန်အတိုင်း ပြောနေတာ။ ယန်ကျန့်တစ်ယောက်ပဲ မေမေ့ကို စောင့်ရှောက်ပေးနိုင်တဲ့ အရည်အချင်းရှိတာ။"

ရှုန်ဝမ်ဝမ်က ယုံကြည်မှုအပြည့်ဖြင့် အခိုင်အမာပြောလိုက်သည်။

သူက နည်းနည်း ကလေးဆိုးတစ်ယောက်ဖြစ်သော်လည်း အချို့အရာများကိုတော့ နားလည်သည်။

သူကလည်း သူ့အမေ နောင်အနာဂတ်တွင် ကောင်းမွန်သောဘဝကို ဖြတ်သန်းပြီး တစ်စုံတစ်ယောက်၏ ကာကွယ်စောင့်ရှောက်မှုအောက်တွင် နေထိုင်စေချင်သည်။

ပတ်ချာလည်သွားပြီးနောက် ရှုန်ဝမ်ဝမ်က ယန်ကျန့်ကို အသိအမှတ်ပြုလိုက်ပြီဖြစ်သည်။

"သားကတော့ ပြောနေတုန်းပဲ။"

ချန်ရှူမေ့က ယခုအခါ အနည်းငယ် ရှက်ရွံ့နေပြီဖြစ်သည်။ မိခင်တစ်ဦးဖြစ်သော်လည်း သူမက အမျိုးသမီးတစ်ဦးလည်း ဖြစ်သည်။

တစ်ပါးသူရှေ့တွင် အမြဲတမ်း ဖူးစာရေးနတ်လုပ်ပေးနေရသည်မှာ အလွန်အကျွံဖြစ်ပြီး တကယ်ပင် ယဉ်ကျေးမှုမရှိရာကျသည်။

ယန်ကျန့်က ပြောသည်။

"ငါ မင်းအမေကို စောင့်ရှောက်ပေးနိုင်ပါတယ်။ ဒါပေမဲ့ အရင်ဆုံး မင်းငါ့ကို 'အဖေ'လို့ အခေါက်အနည်းငယ် ခေါ်တာကြားပါရစေဦး။"

"ခွေးမသား...!"

ရှုန်ဝမ်ဝမ်၏ မျက်လုံးများ ပြူးကျယ်သွားပြီး မိုးကြိုးအကြိမ်တစ်ထောင်အပစ်ခံလိုက်ရသလို ခံစားလိုက်ရသည်။

ဒီတစ်ခါတော့ သူတူးတဲ့တွင်း သူကိုယ်တိုင် ပြန်ကျမလိုဖြစ်သွားပြီ။

"ရှင်က ဘာလို့ ကလေးရဲ့ပေါက်ကရစကားထဲ လိုက်ပါနေရတာလဲ။"

ချန်ရှူမေ့က လက်သီးဆုပ်ကာ အနည်းငယ်စိတ်တိုစွာဖြင့် ယန်ကျန့်ကို ဖွဖွလေးထိုးလိုက်သည်။

အဲ့ဒါက အားမပါတဲ့ ထိုးချက်လေးတစ်ခုသာ ဖြစ်ပြီး၊ အပြစ်တင်တာထက် ရင်းနှီးကြင်နာတဲ့ပုံ ပိုပေါက်နေခဲ့တယ်။

ထိုအချက်ကို သဘောပေါက်သွားပြီးနောက် ချန်ရှူမေ့၏ ပါးပြင်များ ချက်ချင်းနီရဲသွားပြီး သူမ၏မျက်လုံးများက ပုတ်ခတ်ပုတ်ခတ်ဖြစ်ကာ ယန်ကျန့်ကို တည့်တည့်မကြည့်ဝံ့တော့ပေ။

ပြောသူက ရည်ရွယ်ချက်မရှိသော်လည်း ကြားသူက စိတ်ထဲမှတ်ထားသွားနိုင်သည်။

ထိုအခိုက်အတန့်တွင် သူမလည်း ဒီကိစ္စကို စဉ်းစားမိသွားသည်... ကံကောင်းစွာဖြင့် ရှုန်ဝမ်ဝမ်က ခေါင်းဆောင်ယန်ကို မဆန့်ကျင်ဘဲ သူ၏ဆုံးမမှုကို နာခံတတ်သည်။

ထို့အပြင် ခေါင်းဆောင်ယန်က သူမအပေါ် အလွန်ဂရုစိုက်သည်။

တကယ်တမ်းတော့ အတူပေါင်းဖက်လိုက်လျှင်လည်း လက်မခံနိုင်စရာမရှိပေ။

သူမ တွေးလေလေ၊ ချန်ရှူမေ့၏ နှလုံးသားက ပိုမိုဗြောင်းဆန်လာပြီး ထိန်းမနိုင်သိမ်းမရ ခုန်ပေါက်နေတော့သည်။

အကယ်၍ ခေါင်းဆောင်ယန်က တကယ်ပဲ ချဉ်းကပ်လာခဲ့လျှင် သူမ ငြင်းပယ်သင့်သလား၊ လက်ခံသင့်သလား။

သူမ... ငြင်းပယ်နိုင်မည်မထင်။

"ကျွန်တော်က ရှုန်ဝမ်ဝမ်ကို လူတွေကို အမြဲတမ်း စိတ်အနှောင့်အယှက်မဖြစ်စေဖို့ သေချာဆုံးမဖို့ လိုတယ်လို့ ထင်လို့ပါပဲ။ အန်တီချန် ဘယ်လိုထင်လဲ။"

ယန်ကျန့်က ပြောသည်။

ချန်ရှူမေ့က သတိပြန်ဝင်လာပြီး ပါးပြင်ပေါ်တွင် ရှက်သွေးဖြန်းနေဆဲပင်။

"တကယ်... တကယ်လို့ ခေါင်းဆောင်ယန်က သူ့ကို ဆုံးမပေးချင်တယ်ဆိုရင်တော့ အကောင်းဆုံးပေါ့။ ဘယ်လိုပဲဖြစ်ဖြစ် ဝမ်ဝမ်က ခေါင်းဆောင်ယန်ရဲ့စကားကို ပိုနားထောင်တာကိုး။"

"အန်တီချန် စကားတစ်ခွန်းပဲပြောလိုက်ပါ။ ကျွန်တော် အန်တီ့အတွက် သူ့ကို သေချာဆုံးမပေးပါ့မယ်။"

ယန်ကျန့်က ရှုန်ဝမ်ဝမ်ဘက်သို့ ကြည့်ကာ ပြုံးလျက် ကမ်းလှမ်းလိုက်သည်။

"မေမေ၊ ဒီလိုလုပ်လို့မရဘူးလေ။ သားက မေမေ့ရဲ့အရင်းအချာသားနော်။ ယန်ကျန့်က သားကို သေအောင်ရိုက်မှာ သေချာတယ်။"

ရှုန်ဝမ်ဝမ်က သူ့အနာဂတ်ဘဝကို မှောင်မိုက်စွာ မြင်ယောင်ရင်း ထိတ်လန့်တကြား အော်လိုက်သည်။

ဒါဟာ ဓာတ်ပုံထဲမှာ နောက်တစ်ကြိမ် ပိတ်မိနေသလိုပင်။

သို့သော် ချန်ရှူမေ့က ဒီတစ်ခါ ရှုန်ဝမ်ဝမ်ဘက်မှ မရပ်တည်ဘဲ အနည်းငယ် ဆူပူသံဖြင့် ပြောလိုက်သည်။

"အခု သေချာမဆုံးမထားရင် နောက်ကျရင် သားဘယ်လိုဖြစ်သွားမလဲ။ ခေါင်းဆောင်ယန်က သားကို ရိုက်ရမယ်ဆိုရင်တောင် မေမေ လုံးဝတားမှာမဟုတ်ဘူး။"

"ကျွန်တော် အခု စာပဲအာရုံစိုက်ပြီးကျက်တော့မယ်ဆိုရင် ဖြစ်နိုင်သေးလား။"

ရှုန်ဝမ်ဝမ်က သတိထားကာ မေးလိုက်သည်။

မေမေနဲ့ ယန်ကျန့်က တစ်ဖက်တည်းဖြစ်သွားပြီ။

ငါတော့ သွားပြီထင်တယ်။

သူ စာကျက်ချင်သည်၊ ကျောင်းသွားချင်သည်၊ သူ့သူငယ်ချင်းဟောင်းများကို ပြန်တွေ့ချင်သည်။

သို့သော် အဖြစ်ဆိုးမှာ ထိုလွန်လေပြီးသော လူငယ်ဘဝသည် ဘယ်တော့မှ ပြန်မလာတော့ခြင်းပင်။

"ခေါင်းဆောင်ယန်၊ ရှင်ဘာမှမစားရသေးဘူးမလား။ ကျွန်မအိမ်ကို ထမင်းလာစားဖို့ ဖိတ်ချင်လို့ပါ။ ရှင်က ဝမ်ဝမ်နဲ့ ကျွန်မကို အများကြီးကူညီခဲ့တာ၊ ကျွန်မ ရှင်ကို သေချာကျေးဇူးမတင်ရသေးဘူး။"

ချန်ရှူမေ့က ထိုအခါ ဖိတ်ကြားလိုက်သည်။

ယန်ကျန့်က မငြင်းပယ်ဘဲ...

"ကောင်းတာပေါ့။ အန်တီချန်ရဲ့ ဖိတ်ကြားမှုကို လက်ခံပါတယ်။"

"အဲ့လောက် အားမနာပါနဲ့။ ရှင်က ဝမ်ဝမ်နဲ့ကျွန်မကို အများကြီးကူညီခဲ့တာပါ။ နောင်လည်း ရှင့်အကူအညီကို ဆက်လိုနေဦးမှာပါ။"

ချန်ရှူမေ့က အားနာစွာ ပြောလိုက်သည်။

"ဒါတွေက အသေးအဖွဲကိစ္စတွေပါ။ ဒီလိုအချိန်တွေမှာ အသက်ရှင်နေရတာကိုက မလွယ်ဘူး။ ဒီလိုအရာတွေအတွက် အရေးတကြီးလုပ်နေစရာမလိုပါဘူး။"

ယန်ကျန့်က ခေါင်းခါလိုက်သည်။

"အခု ရှုန်ဝမ်ဝမ် အဆင်ပြေပြီဆိုတာ သေချာသွားပြီ အပြင်ထွက်ကြရအောင်။ ဝမ်ဝမ် ပြန်အသက်ရှင်လာပြီဆိုတာ တခြားသူတွေကို ကျွန်တော် အသိပေးလိုက်မယ်။ သူက ငါတို့အဖွဲ့ရဲ့ အရမ်းအရေးကြီးတဲ့ အဖွဲ့ဝင်တစ်ယောက် ဖြစ်လာတော့မှာ။"

"ဟုတ်ကဲ့။"

ချန်ရှူမေ့က ညင်သာစွာ ခေါင်းညိတ်လိုက်သည်။

"စကားမစပ် ခေါင်းဆောင်ယန်က ပုံမှန်ဘာကြိုက်တတ်လဲ မသိဘူးနော်..."

"ကျွန်တော်က အစားမရွေးပါဘူး။ ဘာမဆိုစားနိုင်ပါတယ်။"

သူက ပြောသည်။

ရှုန်ဝမ်ဝမ်က ဝင်ပြောသည်။

"ကျွန်တော် ကြက်ပေါင်ကြော်စားချင်တယ်။"

စကားစမြည်ပြောရင်း သူတို့သုံးဦးသား လုံခြုံရေးအိမ်မှ ထွက်ခွာသွားကြသည်။

သူတို့ကို မသိသော အပြင်လူများအမြင်တွင်တော့ သူတို့သည် သုံးယောက်သားမိသားစုတစ်ခုနှင့် အတော်လေးတူနေပေသည်။