မိခင်ရှေးဟောင်းသစ်ပင်....

လင်းယွမ်က လေဟာနယ်ထဲတွင် ရပ်နေပြီး ထွက်ပြေးနေကြသော နဝမအလွှာ မျိုးနွယ်ခြားများကို ကြည့်နေသည်။ သူထုတ်ဖော်ထားသော လေဟာနယ်အလွှာ သန်းနှစ်ရာနှင့် သူတို့အားလုံးကို သတ်ရန် ခက်ခဲလေသည်။ ထို့အပြင် သူတို့က အတွင်းပိုင်းဒေသသို့ ထွက်ပြေးနေကြသောကြောင့် သူ့အတွက် တိုက်ခိုက်ရန်ပင် မလိုအပ်ပေ။

" နဂါးငွေ့တန်းကြယ်သခင် အဲ့ဒီနဝမအလွှာ မျိုးနွယ်ခြားတွေက အတွင်းဘက်ဒေသမှာ ပုန်းအောင်နေရင် ငါတို့ ဘာမှမတတ်နိုင်တော့ဘူး။ " သော်ခဲက လင်းယွမ်၏ နောက်သို့ ရောက်လာပြီး အားနာစွာ ပြောလိုက်သည်။

အတွင်းဘက်ဒေသက ကျယ်ပြောလှပြီး အင်းအားကြီးသော ဒေသခံသက်ရှိများစွာ ရှိလေသည်။ အကယ်၍ လူသားမျိုးနွယ်က အတွင်းဘက်ဒေသကို ထပ်မံပိတ်ဆို့ခဲ့လျှင် နဝမအလွှာ မျိုးနွယ်ခြားများအစား ဒေသခံသက်ရှိများကို ရင်ဆိုင်ရပေလိမ့်မည်။

" ကိစ္စမရှိဘူး။ " လင်းယွမ်က ခေါင်းခါပြီး ပြောလိုက်သည်။

၎င်းကို ကြားသောအခါ သော်ခဲက စိတ်သက်သာရာရသွားသည်။ သူက နဂါးငွေ့တန်းကြယ်သခင် မကျေမနပ်ဖြစ်မည်ကို စိုးရိမ်နေခဲ့သည်။ သူတို့က လင်းယွမ်ကို အကျိုးအမြတ်များ၏ ၉၅ ရာခိုင်နှုန်း ပေးမည်ဟု ပြောခဲ့သော်လည်း ယခု နဝမအလွှာ မျိုးနွယ်ခြားအားလုံးက အတွင်းဘက်ဒေသသို့ ထွက်ပြေးသွားကြပြီဖြစ်သည်။ မျိုးနွယ်ခြား အနည်းငယ်သာ သေဆုံးခဲ့သည့်အတွက် နဂါးငွေ့တန်းကြယ်သခင်က အများကြီးရမည်မဟုတ်ပေ။

" ဒါပေမယ့် နဂါးငွေ့တန်းကြယ်သခင်ရဲ့ ခွန်အားနဲ့ဆို အနည်းဆုံး မျိုးနွယ်ခြားတစ်ရာကျော်လောက်ကို လိုက်သတ်နိုင်တာပဲ။ " သော်ခဲက တွေးလိုက်သော်လည်း ထုတ်မေးခြင်းမရှိပေ။

" အဲ့ဒီမျိုးနွယ်ခြားတွေ အတွင်းဘက်ဒေသထဲ ထွက်ပြေးသွားပြီဆိုတော့ သူတို့ကို အပြင်မထွက်နိုင်အောင် လုပ်ကြစို့။ " လင်းယွမ်က လက်နောက်ပစ်၍ ပြောလိုက်သည်။

" ကောင်းပြီ။ " သော်ခဲက ခေါင်းညိမ့်လိုက်သည်။

သူကလည်း နဝမအလွှာ မျိုးနွယ်ခြားများ၏ ရည်ရွယ်ချက်ကို နားလည်လေသည်။ သူတို့ သေဆုံးရလျှင်တောင် လူသားမျိုးနွယ်ကို အကျိုးအမြတ်များ မပေးနိုင်ပေ။ ထို့ကြောင့် သူတို့က လျို့ဝှက်နယ်မြေအတွင်း သေချင်လျှင် သူတို့က ဖြည့်ဆည်းပေးရမည်ဖြစ်သည်။

အတွင်းဘက်ဒေသတွင် ပုန်းအောင်းခြင်းက လူသားမျိုးနွယ်အတွက် အကျိုးအမြတ်များ မရရှိရုံသာဖြစ်ပြီး မျိုးနွယ်ခြားများအတွက် ကြီးမားသော ဆုံးရှုံးမှုဖြစ်လေသည်။ သူတို့က ယခုတစ်ကြိမ် လျို့ဝှက်နယ်မြေထဲသို့ ဝင်ရာမှ ဘာမှမရရှိသည့်အပြင် သူတို့၏ ကိုယ်ပွားကိုလည်း ဆုံးရှုံးရပေလိမ့်မည်။

အဝေးမှ ကြည့်နေကြသော နဝမအလွှာ အင်အားကြီးသူများက အံ့ဩနေကြသည်။ သူတို့က သစ်ပင်ကမ္ဘာ၏ သားတော်၊ နဂါးဘုရင်နှင့် အခြားဒဏ္ဍာရီလာ နဝမအလွှာနှစ်ယောက်တို့ ပေါ်လာချိန်တွင် သူတို့က အခြေအနေ ပြောင်းလဲသွားလိမ့်မည်ဟု တွေးခဲ့ကြသည်။ သို့သော် ထိုလေးယောက်က နဂါးငွေ့တန်းကြယ်သခင်ကို ခုခံနိုင်စွမ်းပင် မရှိကြပေ။

" နဂါးငွေ့တန်းကြယ်သခင်က ဘယ်လိုတောင် လေ့ကျင့်ခဲ့တာလဲ။ "

" တကယ်ကြောက်စရာကောင်းတယ်။ ငါတို့မျိုးနွယ်က လူသားမျိုးနွယ်နဲ့ ရန်ငြိုးမရှိလို့ တော်သေးတယ်။ "

" အထွတ်အထိပ်မျိုးနွယ်အချို့က အခုချိန် စိတ်ဒုက္ခရောက်နေလောက်ပြီ။ "

နဝမအလွှာ အင်အားကြီးသူများက အံ့ဩမှု၊ ထိတ်လန့်မှုနှင့် မယုံကြည်နိုင်မှုတို့ ရောထွေးနေကြသည်။

ကြယ်စကြာဝဠာ၏ လေဟာနယ်အလွှာတစ်ခုအတွင်း အလွန်ကျယ်ပြန့်သော စကြာဝဠာလျို့ဝှက်နယ်မြေတစ်ခု ရှိနေသည်။ လျို့ဝှက်နယ်မြေ၏ အလယ်တွင် မြင့်မားသော ရှေးဟောင်းသစ်ပင်တစ်ပင်ရှိနေသည်။ ရှေးဟောင်းသစ်ပင်က ကောင်းကင်သို့ ရောက်နေပြီး ၎င်း၏ အမြစ်များက လျို့ဝှက်နယ်မြေတစ်ခုလုံးကို ဝန်းရံထားသည်။ ၎င်း၏ ဘေးတွင် အနည်းငယ် သေးငယ်သော ရှေးဟောင်းသစ်ပင်တစ်ပင်လည်း ရှိနေသည်။

ထိုရှေးဟောင်းသစ်ပင်၏ မျက်နှာပြင်ပေါ်မှ အချိန်စီးဆင်းမှုက ပင်မစကြာဝဠာ၏ အချိန်စီးဆင်းမှုနှင့် ကွဲပြားနေသည်။ ပင်မစကြာဝဠာတွင် နှစ်ပေါင်းသောင်းချီ သိန်းချီကြာမြင့်လျှင်တောင် ထိုရှေးဟောင်းသစ်ပင်အတွက် တစ်ရက် သို့မဟုတ် တစ်လသာ ဖြစ်နိုင်လေသည်။

ရုတ်တရက် သေးငယ်သော ရှေးဟောင်းသစ်ပင်၏ အော်ရာက အနည်းငယ် ပြောင်းလဲသွားသည်။

" ကလေး ဘာဖြစ်လို့လဲ။ " မြင့်မားသော ရှေးဟောင်းသစ်ပင်က ချက်ချင်း သတိထားမိသွားသည်။ ၎င်း၏ မျက်နှာပြင်ပေါ်မှ အချိန်စီးဆင်းမှုကို ပုံမှန်ပြန်ဖြစ်စေပြီး စိတ်ဝိညာဉ်လှိုင်းများ ထုတ်လွှတ်လိုက်သည်။ ၎င်းက အလွှာဆယ့်တစ်ဖြစ်သော သစ်ပင်ကမ္ဘာ၏ မိခင်ပင် ဖြစ်သည်။

မိခင်သစ်ပင်က သစ်ပင်ငယ်ကို ကြည့်လိုက်သည်။ စကြာဝဠာထဲမှ အလွှာဆယ့်တစ်သို့ ရောက်နေသော ရှေးဟောင်းသစ်ပင်အနေဖြင့် ၎င်းက ခံစားချက်များစွာ မရှိတော့ပေ။

သို့သော် ၎င်းက ရှေးဟောင်းသစ်ပင်ငယ် မမွေးဖွားခင်အထိ ဖြစ်သည်။ ရှေးဟောင်းပင်ငယ်ကို မိခင်ရှေးဟောင်းသစ်ပင်မှ မွေးဖွားခဲ့ခြင်းမဟုတ်ဘဲ သစ်ပင်ကမ္ဘာမှ မွေးဖွားခဲ့ခြင်းဖြစ်သည်။

" အမေ..." ရှေးဟောင်းသစ်ပင်ငယ်က ရှုပ်ထွေးသော စိတ်ဝိညာဉ်လှိုင်းများ ထုတ်လွှတ်လိုက်သည်။ " ကျွန်တော်တို့ သစ်ပင်ကမ္ဘာရဲ့ မျိုးနွယ်က စကြာဝဠာထဲက သက်ရှိတွေထက် ကျော်လွန်တဲ့ အရည်အချင်းတွေ ရှိတယ်လို့ ပြောခဲ့တယ်မဟုတ်လား။ "

" ဒါက သဘာဝအတိုင်းပဲ။ " မိခင်ရှေးဟောင်းသစ်ပင်က ပြောလိုက်သည်။ " စကြာဝဠာက ကျယ်ပြန့်ပြီး အဆုံးမဲ့ သက်ရှိတွေကို ပျိုးထောင်ပေးတယ်။ ဒါပေမယ့် ငါတို့ သစ်ပင်ကမ္ဘာရဲ့ မျိုးနွယ်က ထူးခြားပြီး တစ်ခုတည်းပဲ။ ဒါကြောင့် အခြားသက်ရှိတွေထက် အရည်အချင်းက သာလွန်တယ်။ "

" ကြီးမြတ်သူတွေကရော " ရှေးဟောင်းသစ်ပင်ငယ်က မေးလိုက်သည်။

ကြီးမြတ်သူများက သစ်ပင်ကမ္ဘာ၏ မိခင်အပေါ် မလှုပ်ရှားခြင်းမှာ မည်သည့် အကျိုးအမြတ်မှ မရရှိနိုင်သောကြောင့် ဖြစ်သည်။ သို့သော် ခွန်အားနှင့် အခြားရှုထောင့်များတွင် မိခင်ရှေးဟောင်းသစ်ပင်က ကြီးမြတ်သူများထက် နိမ့်ကျလေသည်။

" ကြီးမြတ်သူတွေ..." မိခင်ရှေးဟောင်းသစ်ပင်က တိတ်ဆိတ်သွားသည်။

" ကြီးမြတ်သူတွေက ခြွင်းချက်တစ်ခုပဲ။ " သူမက ပြောလိုက်သည်။ " ကြီးမြတ်သူတစ်ယောက်ဖြစ်လာတာက ပါရမီ၊ အရည်အချင်းတွေနဲ့ နည်းနည်းပဲ သက်ဆိုင်တယ်။ "

" ဒါပေမယ့် ကြီးမြတ်သူတွေ အောက်မှာ ငါတို့ သစ်ပင်ကမ္ဘာရဲ့ မျိုးနွယ်က သေချာပေါက် အင်အားကြီးတယ်။ အထူးသက်ရှိအချို့ကပဲ ငါတို့ထက် ပါရမီနဲ့ အရည်အချင်း ပိုရှိကြလိမ့်မယ်။ " မိခင်ရှေးဟောင်းသစ်ပင်က ယုံကြည်မှုရှိစွာ ပြောလိုက်သည်။

" ဒါပေမယ့် အမေ မကြာသေးခင်က အင်းဆက်မျိုးနွယ်ရဲ့ သံတမန်က ရွှမ်ဟွမ်လျို့ဝှက်နယ်မြေမှာ နဂါးငွေ့တန်းကြယ်သခင်ကို ရင်ဆိုင်ဖို့ ကိုယ်ပွားတစ်ခု စေလွှတ်ပေးဖို့ တောင်းဆိုခဲ့တယ်။ "

" အင်း " မိခင် ရှေးဟောင်းသစ်ပင်က ခေါင်းညိမ့်လိုက်သည်။ သူမက သဘာဝအတိုင်း နဂါးငွေ့တန်းကြယ်သခင်အကြောင်းမသိပေ။

အချိန်အများစုကို သူမ၏ သက်တမ်းတိုးမြင့်မှုအတွက် ပြင်ပစကြာဝဠာနှင့် အချိန်ခွဲခြားမှုကို ထိန်းသိန်းရန် ကုန်ဆုံးခဲ့သည်။ သစ်ပင်ကမ္ဘာ မျိုးနွယ်၏ သက်တမ်းက ရှည်လျားသော်လည်း ကြီးမြတ်သူတစ်ယောက်မဖြစ်သေးဘဲ နောက်ဆုံးတွင် အချိန်မြစ်ထဲမှ သက်ရှိများသာဖြစ်သည်။

" ကျွန်တော်ရဲ့ ကိုယ်ပွားက နဂါးငွေ့တန်းကြယ်သခင်ရဲ့ လက်ထဲမှာ သေဆုံးခဲ့ရတယ်။ ပြီးတော့ ပြိုင်ဘက်က ပြင်ပစွမ်းအား ဘာမှအသုံးမပြုခဲ့ဘူး။ " ရှေးဟောင်းသစ်ပင်ငယ်က စိတ်ရှုပ်ထွေးစွာ ပြောလိုက်သည်။

သူက နဂါးငွေ့တန်းကြယ်သခင်ကို ရင်ဆိုင်ချိန်တွင် သံသယများ ဝင်လာခဲ့သည်။ အထူးသက်ရှိက သူလား နဂါးငွေ့တန်းကြယ်သခင်လား။

" နဂါးငွေ့တန်းကြယ်သခင်ရဲ့ လက်ထဲမှာ သေဆုံးခဲ့တာလား။ " မိခင် ရှေးဟောင်းသစ်ပင်က တိတ်ဆိတ်သွားသည်။ " ပြင်ပစွမ်းအားကို အသုံးမပြုခဲ့ဘူး။ "

ပြင်ပစွမ်းအားဆိုသည်မှာ အဆင့်မြင့် စကြာဝဠာရတနာများ သို့မဟုတ် အသက်ကယ်ပစ္စည်းများကို ဆိုလိုလေသည်။ ဥပမာ မာဒိုခရီးသည်၏ အချိန်တွင်းနက်ဖြစ်သည်။

" နဂါးငွေ့တန်းကြယ်သခင် " မိခင်ရှေးဟောင်းသစ်ပင်က သူမ၏ စိတ်အသိကို သစ်ပင်ကမ္ဘာ၏ အပြင်ဘက်သို့ ဖြန့်ကျက်လိုက်ပြီး နဂါးငွေ့တန်းကြယ်သခင်အကြောင်း လေ့လာလိုက်သည်။

" ကလေး " အချိန်ကြာပြီးနောက် မိခင်ရှေးဟောင်းသစ်ပင်က စိတ်ဝိညာဉ်လှိုင်းများ ထုတ်လွှတ်လိုက်သည်။

" နဂါးငွေ့တန်းကြယ်သခင်ကို စိတ်မပူနဲ့။ သူ့ရဲ့ မြင့်မားတဲ့ ပါရမီနဲ့ အရည်အချင်းက ဘာအသုံးဝင်လို့လဲ။ သူက ကြီးမြတ်သူတစ်ယောက် မဖြစ်လာသရွေ့ မင်းလောက် အသက်ပိုရှည်မှာမဟုတ်ဘူး။ "

မိခင်ရှေးဟောင်းသစ်ပင်က ခဏစဉ်းစားပြီး အကြောင်းပြချက်တစ်ခုပေးလိုက်သည်။ နဝမအလွှာ ရှေးဟောင်းသစ်ပင်ငယ်ကပင် အခြားသက်ရှိများထက် များစွာအသက်ပိုရှည်နိုင်လေသည်။

" နဂါးငွေ့တန်းကြယ်သခင်က ကျွန်တော့်ထက် အသက်ပိုရှည်မှာမဟုတ်ဘူး..." ရှေးဟောင်းသစ်ပင်ငယ်က တိတ်ဆိတ်သွားသည်။

ထျန်းယုမျိုးနွယ်တွင် အလွှာတစ်ဆယ်နှင့် အလွှာဆယ့်တစ်များက သူတို့၏ ရှေ့မှ မြင်ကွင်းတစ်ခုကို ကြည့်နေကြသည်။ ၎င်းက နဂါးငွေ့တန်းကြယ်သခင် ဒဏ္ဍာရီလာနဝမအလွှာလေးယောက်ကို သတ်ဖြတ်ခဲ့သော မြင်ကွင်းများဖြစ်သည်။

" ဒီတိုက်ပွဲမှာ နဂါးငွေ့တန်းကြယ်သခင် ထိန်းချုပ်ထားတဲ့ လေဟာနယ်အလွှာက ဟွမ်ယိကို သတ်တုန်းကလို သန်းနှစ်ရာပတ်လည်မှာ ရှိနေတယ်။ " သူတို့ထဲမှ တစ်ယောက်က ပြောလိုက်သည်။

" ပြီးတော့ နဂါးငွေ့တန်းကြယ်သခင်က အချိန်တိုအတွင်း သူ့ရဲ့ ခွန်အားကို နှစ်ဆတိုးစေနိုင်တဲ့ နည်းစနစ်တစ်ခုကို အသုံးပြုခဲ့တယ်။ "

" အဲ့ဒီလျို့ဝှက်နည်းစနစ်က အားနည်းချက်လည်း ရှိလိမ့်မယ်။ မဟုတ်ရင် သူက ဆက်ပြီးလိုက်သတ်မှာပေါ့။ ဒါပေမယ့် သူမလုပ်ဘဲ ငါတို့မျိုးနွယ်ဝင်တွေ အတွင်းဘက်ဒေသထဲ ထွက်ပြေးတာကို ရပ်ကြည့်နေခဲ့တယ်။ "

သူတို့က တိုက်ပွဲကို ပြန်ကြည့်ပြီး နဂါးငွေ့တန်းကြယ်သခင်၏ အချက်အလက်များကို နုတ်ယူနေကြသည်။ သူတို့က ဒဏ္ဍာရီလာနဝမအလွှာတစ်ယောက်ကို ဖိတ်ခေါ်ခဲ့ခြင်းမှာ နဂါးငွေ့တန်းကြယ်သခင်၏ ခွန်အားကို စမ်းသပ်ကြည့်ချင်သောကြောင့် ဖြစ်သည်။

အနာဂတ် စစ်မြေပြင်ကြီးများတွင် အားသာချက်များ ရယူရန် ဖြစ်သည်။ သူတို့၏ အမြင်တွင် နဂါးငွေ့တန်းကြယ်သခင်က အနာဂတ်တွင် စစ်မြေပြင်ကြီးများကို လွှမ်းမိုးနိုင်ပေလိမ့်မည်။ ယခု နဂါးငွေ့တန်းကြယ်သခင်၏ ကန့်သတ်ချက်များကို မလေ့လာခြင်းက အနာဂတ်တွင် ကြီးမားသော ဆုံးရှုံးမှုများ ဖြစ်ပေါ်စေနိုင်လေသည်။

" နဂါးငွေ့တန်းကြယ်သခင်ရဲ့ လက်ရှိခွန်အားအရ သူက အလွှာတစ်ဆယ်ကို တက်လှမ်းသွားရင် သူ့ရဲ့ ခြိမ်းခြောက်မှုက နှစ်တစ်ထောင်အတွင်း အဆင့်ဘီကို ရောက်သွားလိမ့်မယ်။ အချိန်ကိုတွက်ကြည့်ရင် နှစ်ငါးထောင်အတွင်း အဆင့်အေကို ရောက်ဖို့ ဖြစ်နိုင်ခြေများတယ်။ " နောက်တစ်ယောက်က ပြောလိုက်သည်။