ပေါ်ကုန်တော့မယ်! ၂
Vol. 69 Ch. 1035
ချီးကျူးခံရလေလေ လူလိမ်လိုခံစားရလေလေပင်။ သူ့ဗဟုသုတတွေက ဒီလိုယုံကြည်မှုချက်မျိုးရအောင်လုံးဝမလုပ်ပေးနိုင်။
ဒါပေမဲ့ သူဘာတတ်နိုင်လဲ? အစ်ကိုလီကိုဓားစာခံဖြစ်စေချင်သည်။
အစ်ကိုလီကလည်း အခုဉာဏ်ကောင်းလာပြီ။ သူ့ဆက်တိုက်လှုပ်ရှားမှုတွေကြောင့် ပြန်ခုခံနိုင်စွမ်းမရှိပေ။
လက်ဖက်ပင်ကိုပျိုးထောင်သူက သူဖြစ်သည်ဟုအတည်ပြုပြီးကြပြီ။
ဒီလက်ဖက်ပင်ကဂိမ်းထဲမှဖြစ်သောကြောင့် ဘယ်ကရလဲပြောလို့မရ။ ဒီတစ်ခါအိုးမည်းက သူဖြစ်တော့မည်။
"သူဌေးချင်က နှိမ့်ချလွန်းနေပြီ''
ဝန်ကြီးလုကပြုံးပြုံးနှင့် သူ့ဘေးမှလူကြီးကို ချင်လင်နှင့်မိတ်ဆက်ပေးသည်_
"သူဌေးချင် ပါမောက္ခလီခိုင်... ဒါတော်ဝင်ပညာရှင်ယွမ်ရှန်ပဲ... ဆေးသုတေသီပေါ့''
"တော်ဝင်ပညာရှင်ယွမ်!''
ချင်လင်ကလည်း ချက်ချင်းလက်ဆွဲနှုတ်ဆက်သည်။
ယွမ်ရှန်က ချင်လင်ငယ်ရွယ်ပုံကိုကြည့်ပြီး သက်ပြင်းမချဘဲမနေနိုင်တော့_
"သူဌေးချင်ကဒီလိုငယ်ရွယ်ပြီးအလားအလာရှိတာကိုး... ဒီတစ်ခါ တို့ဆေးသုတေသနဌာနကိုရှက်အောင်လုပ်လိုက်တာပဲ''
သူမလာခင် တစ်ဖက်လူအနေအထားကိုသိထားသော်လည်း ကိုယ်တိုင်တွေ့ပြီးအံ့ဩရသေးသည်။
ငယ်လိုက်တာ!
ဒါပေမဲ့ ဒီလူငယ်လေးက သူတို့ နှစ် ၂၀ ကျော်သုတေသနလုပ်ပြီးတိုးတက်မှုမရှိတဲ့ပြဿနာကိုဖြေရှင်းပေးလိုက်ပြီ။
သူကံကောင်းတာဖြစ်ဖြစ်ဘာဖြစ်ဖြစ် ဒီအပိုင်းမှာ ဒီလူငယ်ကြောင့်သူတို့အရှိုက်ထိသွားပြီ။
"သူဌေးချင်... လက်ဖက်ပင်လိုက်ပြပါဦး''
ဝန်ကြီးလုက စူးစမ်းချင်နေပြီ။
ဒါကလည်း ဒီတစ်ခါလာရင်းကိစ္စပင်။
"ဝန်ကြီးလု တော်ဝင်ပညာရှင်ယွမ် ဒီဘက်ကြွပါ!''
ချင်လင်လည်းပြုံးပြုံးနှင့် အပန်းဖြေစံအိမ်ထဲကြိုဆိုပြီး လက်ဖက်ပင်လိုက်ပြသည်။
ဝန်ကြီးလုနှင့်ယွမ်ရှန်က လက်ဖက်ပင်သုံးပင်ကိုမြင်သည်နှင့် ခပ်သုတ်သုတ်လျှောက်သွား၏။
နှစ်ယောက်သား လက်ဖက်ပင်ကိုပတ်စစ်ဆေးပြီး စိတ်လှုပ်ရှားပုံပေါက်နေကြသည်။
ဒီလက်ဖက်ပင်သုံးပင်ကြည့်ရတာ ဘာမှထူးခြားပုံမရ။ သာမန်လက်ဖက်ပင်နဲ့တူပေမဲ့ ထွက်လာတဲ့လက်ဖက်တွေမှာ ဒီလောက်ထူးခြားတဲ့အာနိသင်မျိုးရှိနေမယ်လို့ဘယ်သူထင်မလဲ?
အကြာကြီးကြည့်ပြီးနောက် ချင်လင်လည်းလက်ဖက်ရည်သောက်ဖိတ်လိုက်သည်_
"ဝန်ကြီးလု တော်ဝင်ပညာရှင်ယွမ်... မျှော်စင်ထဲသွားထိုင်ပြီး ဒီလက်ဖက်ရည်သောက်ကြရအောင်''
ဝန်ကြီးလုနှင့်ယွမ်ရှန်က ချင်လင်နောက်လိုက်ပြီး မျှော်စင်ထဲရောက်လာသည်။ လီခိုင်နှင့်တော်ဝင်ပညာရှင်လီက နောက်ကလိုက်လာ၏။
"သူဌေးချင်ရဲ့မျှော်စင်ကမဆိုးဘူး... လမ်းလျှောက်ရုံနဲ့ စိတ်အေးချမ်းသွားတယ်''
ဝန်ကြီးလုကမျှော်စင်ထဲဝင်လာပြီးထိုင်သည်။ မျှော်စင်ကထူးခြားကြောင်း သူသတိထားမိသည်။
"အနံ့လည်းရတယ်''
ယွမ်ရှန်ကဖြည့်ပြောသည်_
"အရမ်းကောင်းတာပဲ... သာမန်သစ်တော့မဟုတ်ဘူးမလား?''
တော်ဝင်ပညာရှင်လီက ကူရှင်းပြသည်_
"တော်ဝင်ပညာရှင်ယွမ်ပြောတာမှန်တယ်... ဒီမျှော်စင်ကသစ်မွှေးနဲ့လုပ်ထားတာ... ဒီသစ် ၅၀၀ ဂရမ်ကိုသောင်းချီတန်တယ်လို့ သူဌေးချင်ပြောဖူးတယ်''
"၅၀၀ ဂရမ်ကိုသောင်းချီ?''
ယွမ်ရှန်မှာအတော်များများမြင်ဖူးသူဖြစ်သော်လည်း မျှော်စင်နှင့်စင်္ကြံအရွယ်အစားကိုကြည့်ပြီး အံ့ဩရသေးသည်။
"ဒီသစ်ဘယ်လောက်တန်တန် သုံးဖို့ပဲလေ... လက်ဖက်ရည်သောက်ရအောင်!''
ချင်လင်လည်း လက်ဖက်ရည်အိုးနှင့်ပန်းကန်များယူလာခိုင်းလိုက်သည်။ သူကအသစ်လှော်ထားသောလက်ဖက်ခြောက်ကိုထုတ်ပြီး အလုပ်စသည်။
လက်ဖက်ရည်အိုးရသောအခါ ဝန်ကြီးလု၊ယွမ်ရှန်၊တော်ဝင်ပညာရှင်လီတို့အတွက် တစ်ခွက်စီငှဲ့ပေးလိုက်ပြီး_
"ဒါကင်ဆာအတွက်အာနိသင်ရှိတဲ့လက်ဖက်ခြောက်ပဲ... အားလုံးမြည်းကြည့်ပါဦး''
ဝန်ကြီးလုနှင့်ယွမ်ရှန်က တောက်လျှောက်စူးစမ်းချင်နေသောကြောင့် လက်ဖက်ခွက်ယူပြီးတစ်ငုံသောက်လိုက်သည်။
လက်ဖက်နံ့နှင့်အရသာက အရည်အသွေး ၁ သာဖြစ်သော်လည်း သူတို့နှစ်ယောက်ကသောက်ပြီးစွဲသွားသည်။
"ဒီလက်ဖက်ရည်မဆိုးဘူး... ကင်ဆာအပေါ်အာနိသင်မရှိရင်တောင် အရမ်းကောင်းတဲ့လက်ဖက်ရည်ပဲ''
ဝန်ကြီးလုအံ့ဩနေသည်။
တော်ဝင်ပညာရှင်လီကခေါင်းညိမ့်ပြီး_
"ဟုတ်တယ်... ကင်ဆာအပေါ်အာနိသင်ရှိတယ်... အရသာလည်းအရမ်းကောင်းတယ်... သူဌေးချင် ဒီလက်ဖက်ပင်ကိုကြော်ငြာရင် တစ်နိုင်ငံလုံးခေတ်ထသွားလိမ့်မယ်... လက်ဖက်ရည်ယဉ်ကျေးမှု ပြန်ပြီးဦးမော့လာမှာ''
ယွမ်ရှန်ကတစ်ခွက်သောက်ပြီး မျှော်လင့်ချက်နှင့်_
"သူဌေးချင်... ဒီလက်ဖက်ပင်ရဲ့အချက်အလက်တွေကြည့်လို့ရမလား?''
"အစ်ကိုလီ!''
ချင်လင်က လီခိုင်ကိုကြည့်လိုက်သည်။ အချက်အလက်ကလျှို့ဝှက်ချက်မဟုတ်။
ဒါပေမဲ့ အချက်အလက်က အစ်ကိုလီဆီမှာ။ သူ့မှာမရှိ။
"အင်း!''
လီခိုင်ကခေါင်းညိမ့်ပြီး ကွန်ပျူတာယူကာ သူ့အကောင့်ထဲဝင်လိုက်သည်။ လက်ဖက်စမ်းသပ်ချက်များကိုဆွဲထုတ်ပြီး ယွမ်ရှန်ဆီပေးရင်း_
"တော်ဝင်ပညာရှင်ယွမ် ကြည့်ပါ!''
ယွမ်ရှန်က ပညာရှင်ဖြစ်သည်။ စမ်းသပ်ချက်နှင့်ပါဝင်ပစ္စည်းနှိုင်းယှဉ်ချက်ကိုတစ်ချက်ကြည့်ရုံနှင့် ဒီလက်ဖက်ကကင်ဆာအပေါ်အာနိသင်ရှိမှန်းသူသိသည်။
သူကဖတ်ပြီးနောက် ချင်လင်ကိုစူးစိုက်ကြည့်ကာ_
"သူဌေးချင်... ဒီလက်ဖက်ပင်ကိုပျိုးထောင်ပြီးကြော်ငြာရမယ်''
အချိန်ကျရင် ဒီလက်ဖက်ပင်ကြောင့် ပြည်သူတွေအကျိုးရှိရုံသာမက ကမ္ဘာတလွှားမှဆေးပညာအဖွဲ့အစည်းများကလည်း သူတို့ကိုအရာသွင်းကြမည်။
ဝန်ကြီးလု ယွမ်ရှန်ကိုခေါ်လာခြင်းက ဒီအပိုင်းမှာပညာရှင်ဖြစ်သောကြောင့်ပင်။
အခုကြားလိုက်ရသောစကားအရ လက်ဖက်ရဲ့ကင်ဆာအပေါ်ထိရောက်တဲ့အာနိသင်က သူထင်ထားတာထက်မြင့်နေသောကြောင့်ဖြစ်ရမည်။
ကောင်းပြီ!
နောက်ပြီး ဒါကိုပျိုးထောင်ကြော်ငြာလိုက်ရင် သူတို့ကိုမော့ကြည့်ရမှာ ဆေးပညာအဖွဲ့အစည်းတင်မဟုတ်။
တို့မှာကင်ဆာကုနိုင်တဲ့လက်ဖက်ရှိပြီ။ ကင်ဆာက တို့အတွက်ပြဿနာမဟုတ်တော့။ တခြားနိုင်ငံကလူတွေဘယ်လိုဖြစ်သွားမလဲ?
ကင်ဆာရှိတဲ့သူ ဘယ်နှစ်ယောက်ရှိပြီး ဘယ်နှစ်ယောက်ကကင်ဆာကြောက်ကြသလဲ?
အထူးသဖြင့် သူတို့လက်ဖက်ကိုရှုတ်ချခဲ့ကြတဲ့နိုင်ငံတွေ ကြက်သေသေသွားမည်။
ဒီလက်ဖက်က အတိုင်းအတာတစ်ခုအထိ နည်းဗျူဟာအရင်းအမြစ်ဖြစ်နိုင်သည်။
"အကောင်းဆုံးပါပဲ ဝန်ကြီးလု''
ချင်လက်ကပြောလိုက်သည်_
"အဓိကရည်ရွယ်ချက်က ကင်ဆာကုဖို့ပါပဲ''
ဝန်ကြီးလုက ခေါင်းညိမ့်ပြီး_
"ကောင်းပြီ... ငါစီစဉ်ပေးမယ်... တည်နေရာက ရုံချန်းဆေးရုံဖြစ်မယ်... ငါရုံချန်းနဲ့ဆက်သွယ်ပြီး လက်တွေ့စမ်းသပ်မယ့်နေရာကိုသီးခြားခွဲခိုင်းထားမယ်''