သွေးနတ်ကျမ်းစာ၊ သွေးနတ်ဆိုး နယ်မြေ၏ လျှို့ဝှက်ချက်

စုရှင်း၏ မျက်ခုံးများ ပို၍ပင် တွန့်ကွေးသွားသည်။

“ဝိညာဉ်စွမ်းအင်မလို၊ ဝိညာဉ်အမြစ်ကိုလည်း မသန့်စင်ဘဲ... သွေးအားနဲ့ပဲ ကျင့်ကြံရတယ်ပေါ့”

“ဒါက တကယ်ကြီး ကောင်းကင်ဘုံကို စိန်ခေါ်တဲ့ ကျင့်စဉ်တစ်ခုပဲ!”

ခေတ္တမျှ ငြိမ်သက်ပြီးနောက် စုရှင်းသည် သူ စိတ်ရှုပ်ထွေးနေသည့် အရာကို ဖွင့်ဟလိုက်သည်။

“ဒါဆို ဒီ သွေးနတ်ဆိုး ဆိုတာက ဘယ်သူလဲ... ဒီလို ကောင်းကင်ဘုံကို စိန်ခေါ်တဲ့ ကျင့်စဉ်ကို တကယ် ဖန်တီးနိုင်တယ်ဆိုတော့ တကယ်ကြီး အမတတစ်ပါး ဖြစ်နိုင်သလား”

“ဒါဆို... သွေးနတ်ဆိုး ဆိုတာ အဲ့ဒီ နဂါးစောင့်ရှောက်သူလား”

စုရှင်း၏ ရင်ထဲတွင် တင်းကြပ်သွားသည်။ သို့သော်လည်း သူသည် ချက်ချင်း ခေါင်းယမ်းကာ ငြင်းပယ်လိုက်သည်။

“မဖြစ်နိုင်ဘူး၊ နဂါးစောင့်ရှောက်သူရဲ့ ကျင့်စဉ်အဆင့်က လွတ်မြောက်ခြင်း ပြန်လည်ရောက်ရှိခြင်း အဆင့်ဘဲ ရှိသေးတာ၊ ဒီလို ကောင်းကင်ဘုံကို စိန်ခေါ်တဲ့ ကျင့်စဉ်ကို ဖန်တီးနိုင်မှာ မဟုတ်ဘူး!”

“ဒီလို ကျင့်စဉ်မျိုးကို ဖန်တီးဖို့ဆိုရင် တာအိုကို နက်နက်နဲနဲ သဘောပေါက်နားလည်ဖို့ လိုတယ်၊ အနည်းဆုံးတော့ အမတအဆင့် ဒါမှမဟုတ် အာ့ထက်တောင် မြင့်မားမှရမယ်!”

တာအိုကို အပြည့်အဝ နားလည်ရန် လိုအပ်သည့် ကျင့်စဉ်အဆင့်ကို စုရှင်း မသိပေ။ သို့သော်လည်း၊ ၎င်းသည် အမတတစ်ပါးပင် လက်လှမ်းမမီသည့် အရာတစ်ခု ဖြစ်ရမည်ဟု သူ ထင်ခဲ့သည်။

သာမန် အမတများသည်ပင် တာအိုကို ဤမျှ နက်နက်နဲနဲ နားလည်နိုင်လိမ့်မည် မဟုတ်ပေ။

“သွေးနတ်ဆိုးက အဲ့ဒီ နဂါးစောင့်ရှောက်သူ မဖြစ်နိုင်ဘူး... ဒါပေမယ့် သူတို့ကြားမှာ အရေးပါတဲ့ ဆက်နွယ်မှု တစ်ခုတော့ ရှိရမယ်...”

“ဒါဆို... သွေးနတ်ဆိုးက ဆင်းသက်ဂိုဏ်းရဲ့ ခေါင်းဆောင်၊ နဂါးစောင့်ရှောက်သူရဲ့ အထက်လူကြီးလား”

ထိုသို့ စဉ်းစားမိသောအခါ စုရှင်းသည် သက်ပြင်း ချလိုက်သည်။

“ဘယ်လိုလုပ် ဖြစ်နိုင်မှာလဲ... ဆင်းသက်ဂိုဏ်းရဲ့ ခေါင်းဆောင်က အမတ တစ်ပါးတဲ့လား!?”

စုရှင်းသည် အနည်းငယ် ခေါင်းခါယမ်းလိုက်သည်။

လက်ရှိ အချက်အလက်များနှင့် ယခုကဲ့သို့ အလျင်စလို ဆုံးဖြတ်ချက်မျိုးကို သူ မချရဲပေ။

သို့သော် သွေးနတ်ဆိုးနဲ့ ဆင်းသက်ဂိုဏ်းကြားတွင် ဆက်နွယ်မှုတစ်ခု သေချာပေါက် ရှိရမည်…

“ကောင်းပြီ၊ ဆက်ဖတ်ကြည့်လိုက်တာပေါ့...”

သူ့အကြည့်သည် သရုပ်ပြခြင်း ဖန်သားပြင်ပေါ်သို့ ပြန်လည် ရောက်ရှိသွားသည်။

[သင်သည် ရွှေအမြုတေ ကျင့်ကြံသူများ၏ ရုပ်အလောင်းများကို စုဆောင်းကာ ၎င်းတို့၏ သိုလှောင်အ်ိတ်များကို ဂရုတစိုက် စစ်ဆေးလိုက်သည်။]

[သိုလှောင်အိတ်များ အတွင်းတွင် ထူးဆန်းသော ဆေးလုံးများစွာကို တွေ့ရသည်။]

[ထိုဆေးလုံးများသည် လုံးဝန်းပြီး အနီရောင်ဖြစ်ကာ တစ်လုံးစီသည် လက်သီးတစ်ဆုပ်ခန့် ရှိသည်။]

[သင်သည် ဆေးတစ်လုံးကို ထုတ်ယူပြီး ဂရုတစိုက် ကြည့်လိုက်သည်။ ထိုအခါ ထိုဆေးလုံးသည် သွေးများဖြင့် ဖော်စပ်ထားပြီး အမုန်းတရားနှင့် ပြင်းထန်သော စွမ်းအားများဖြင့် ပြည့်နေသည်ကို တွေ့လိုက်ရသည်။]

[သင်သည် ၎င်းကို နှာခေါင်းနားသို့ ကပ်ကာ ရှုကြည့်လိုက်ရာ သင့်မျက်နှာသည် ရုတ်တရက် ပြောင်းလဲသွားသည်။ ဆေးလုံးပေါ်ရှိ သွေးရနံ့ပြင်းပြင်းသည် တိရစ္ဆာန်သွေးမှ လာခြင်းမဟုတ်ဘဲ လူ့သွေးမှ ဖြစ်နေသည်ကို သ်ိလိုက်ရသည်။]

[ဆေးလုံးအတွင်းရှိ စွမ်းအင်သည် ဝိညာဉ်စွမ်းအင်နှင့် အလွန် ဆင်တူသော်လည်း ၎င်းသည် ပြင်းထန်သော သွေးအားကို သယ်ဆောင်လာသည်။ ရေရှည် သောက်သုံးပါက ကျင့်စဉ်အဆင့်ကို တိုးမြှင့်ပေးနိုင်သည်။ သို့သော်လည်း၊ အသက်ကို ထိခိုက်စေနိုင်ဖွယ် ရှိသည်...]

[သင်က ဤဆေးလုံးသည် ဤနယ်မြေရှိ ကျင့်ကြံသူများ၏ ကျင့်စဉ်အတွက် လိုအပ်သော ဆေးဖြစ်ကြောင်းကို လျင်မြန်စွာ နားလည်လိုက်သည်။]

[ဆေးလုံးများကို သိမ်းဆည်းပြီးနောက် သင်သည် ထိုနေရာမှ လျင်မြန်စွာ ထွက်ခွာရန် ကြိုးစားလိုက်သည်။]

[သို့သော် သင် မိုင်အနည်းငယ် ထွက်ပြေးပြီးသည်နှင့် သွေးနတ်ဆိုးဂိုဏ်းမှ ကျင့်ကြံသူများ၏ လိုက်လံနှောင့်ယှက်ခြင်းကို ခံရသည်။]

[သန္ဓေတည် ဝိညာဉ်အဆင့် ကျင့်ကြံသူများစွာနှင့်အတူ နတ်ဘုရား အသွင်ပြောင်းခြင်း ကျင့်ကြံသူတစ်ဦးက သင့်ဆီသို့ တိုက်ခိုက်လာသည်။]

[သင်သည် နေရာ၌ ရပ်နေရင်း အနည်းငယ် မျက်မှောင်ကြုတ်လိုက်သည်။ ထို့နောက် လက်တစ်ချက် ဝှေ့ယမ်းကာ ကျင့်ကြံသူအားလုံးကို ရှင်းလင်းလိုက်သည်။]

[တစ်ဦးတည်း ကျန်ရစ်သည့် နတ်ဘုရား အသွင်ပြောင်း ကျင့်ကြံသူသည် ထွက်ပြေးရန် ကြိုးစားနေသည်။]

[သို့သော် သင်သည် ဤ နတ်ဘုရား အသွင်ပြောင်း ကျင့်ကြံသူကို အလွယ်တကူ ဖမ်းဆီးပြီး စတင် စစ်ဆေး မေးမြန်းလိုက်သည်။]

[ပြင်းထန်စွာ မေးမြန်းမှုအောက်တွင် သင်သည် သွေးနတ်ဆိုးဂိုဏ်း၏ တိကျသော တည်နေရာနှင့် ခွန်အားကို မကြာမီ သိရှိခဲ့သည်။]

[ဤ နတ်ဘုရား အသွင်ပြောင်း ကျင့်ကြံသူ၏ အဆိုအရ သွေးနတ်ဆိုးဂိုဏ်း အတွင်း၌ လွတ်မြောက်ခြင်း ပြန်လည်ရောက်ရှိခြင်း အဆင့်ရှိ ကျင့်ကြံသူများ ရှိပြီး၊ သင့်ကို လွှတ်ပေးရန် ခြိမ်းခြောက်ခဲ့သည့် သွေးနဂါး အကြီးအကဲ ရှိကြောင်းလည်း သိရသည်။ ထိုသို့မဟုတ်ပါက သင်သည် အမှန်ပင် သေဆုံးရမည်ဟု ဆိုသည်။]

[သင်သည် ၎င်းကို ပြုံးရုံသာ ပြုံးပြလိုက်သည်။ သင်သည် ဝိညာဉ်ရှာဖွေရေး ကျင့်စဉ်အား ကျင့်ကြံထားခြင်း မရှိသည်ကို နှမြောမိသည်။ သို့မဟုတ်ပါက ဤ နတ်ဘုရား အသွင်ပြောင်း ကျင့်ကြံသူ၏ ဝိညာဉ်မှတစ်ဆင့် ပိုမိုသော အချက်အလက်များကို အလွယ်တကူ ထုတ်ယူနိုင်မည် ဖြစ်သည်။]

[သို့သော် ထိုအချိန်တွင် သင် လုပ်နိုင်သည်မှာ သူ၏ နတ်အာရုံကို ဖိနှိပ်ပြီး သူ့ထံမှ အချက်အလက်များကို ပိုမို ထုတ်ယူခြင်းသာ ဖြစ်သည်။]

[သူ၏ နတ်အာရုံကို ဖိနှိပ်လိုက်စဉ်တွင် ဤ နတ်ဘုရား အသွင်ပြောင်း ကျင့်ကြံသူ၏ စွမ်းအင် ပေါ့ပါးနေသည်ကို သင် သတိပြုမိသည်။ သူသည် နတ်ဘုရား အသွင်ပြောင်း အလယ်ပိုင်းအဆင့်တွင် ရှိသော်လည်း၊ သူ၏ ခွန်အားသည် တူညီသော အဆင့်၏ အစောပိုင်း အဆင့်နှင့်သာ ညီမျှမည် ဖြစ်သည်။]

[ထို့အပြင် ကျင့်ကြံသူ၏ အသက်ရှုသံသည် နက်ရှိုင်းပြီး သူ၏ သက်တမ်းသည် မှေးမှိန်နေသည်။]

[သို့တိုင် ကျင့်ကြံသူ၏ မျက်နှာတွင် မဖျက်နိုင်သော သေဆုံးခြင်း အမှတ်အသားကို သင် မြင်ရသည်။ သူ၏ သက်တမ်း အများစုသည် ကုန်ဆုံးပြီးသား ဖြစ်ပြီး သူ၏ နေ့ရက်များသည် ကုန်ဆုံးနေပြီ ဖြစ်ပုံရသည်။]

[သင်သည် သူမည်မျှကြာအောင် ကျင့်ကြံခဲ့ကြောင်း မေးသည်။ သင်၏ ဖိအားပေးမှုကြောင့် သူသည် အမှန်တရားကို မဖုံးကွယ်ရဲဘဲ အသက် တစ်ရာ့ခုနစ်ဆယ်ရှိပြီ ဖြစ်ပြီး နှစ်ပေါင်း တစ်ရာ့ခြောက်ဆယ်ကျော် ကျင့်ကြံခဲ့ကြောင်း ရိုးသားစွာ ဖြေကြားခဲ့သည်။]

[ဤသည်ကို ကြားလိုက်ရသော် သင်သည် မျက်မှောင်ကြုတ်သွားသည်။ ဤ နတ်ဘုရား အသွင်ပြောင်း ကျင့်ကြံသူ၏ စွမ်းအင်သည် ယိုယွင်းနေပြီး သူ၏ သက်တမ်းသည် အများဆုံး နှစ်နှစ်ဆယ် သို့မဟုတ် သုံးဆယ်သာ ကျန်ရှိတော့မည်... ပုံမှန်အားဖြင့် နတ်ဘုရား အသွင်ပြောင်း ကျင့်ကြံသူတစ်ဦး အတွက် နှစ်ပေါင်းတစ်ထောင် အသက်ရှင် နေထိုင်ခြင်းသည် ပြဿနာ မဟုတ်ပေ။ အသက်ကို ရှည်စေသော ဆေးများဖြင့်ဆိုလျှင် တစ်ထောင့်ငါးရာနှစ် အထိ နေထိုင်ရန် မခက်ခဲပေ။]

[သင့်အတွက် ရှင်းလင်းသွားသည်။ ဤဆိုးယုတ်သော ကျင့်စဉ်သည် အသက်ကို ပြင်းထန်စွာ ကုန်ဆုံးစေသည်။ သူ၏ သက်တမ်းသည် တူညီသော အဆင့်ရှိ ကျင့်ကြံသူများ၏ ငါးပုံတစ်ပုံပင် မပြည့်မီပေ!]

[တစ်ချိန်တည်းတွင် သင်သည် အံ့အားသင့်သွားသည်။ ဝိညာဉ်အမြစ် မရှိသော လူတစ်ဦးသည် နှစ်ပေါင်း တစ်ရာ့ခြောက်ဆယ်ကျော် အတွင်း နတ်ဘုရား အသွင်ပြောင်း အလယ်ပိုင်းအဆင့်သို့ ရောက်ရှိနိုင်ခြင်းသည် ကောင်းကင်ဝိညာဉ်အမြစ် ကျင့်ကြံသူနှင့် နီးစပ်သော ကျင့်ကြံခြင်း အရည်အချင်း တစ်ခုပင် ဖြစ်သည်။]

[သင်သည် ဤ နတ်ဘုရား အသွင်ပြောင်း ကျင့်ကြံသူကို ဆက်လက် မေးမြန်းလိုသည်။ သို့သော်လည်း၊ သူသည် သေးငယ်သော ခြိမ်းခြောက်မှုကို ဆက်လက် ပေးနေသေးသည်။ နောက်ဆုံးတွင် သူသည် ကြောက်မက်ဖွယ် ကောင်းသော အရာတစ်ခုကို မြင်လိုက်ရသကဲ့သို့ နာကျင်သော အမူအရာကို ပြသလာသည်။ မိနစ်ပိုင်း အတွင်းမှာပင် သူသည် မြေပြင်ပေါ်သို့ အသက်မဲ့စွာ လဲကျသွားသည်။]

[ဤ နတ်ဘုရား အသွင်ပြောင်း ကျင့်ကြံသူ သေဆုံးပြီးနောက် သူ၏ မျက်နှာသည် လျင်မြန်စွာ အိုမင်းသွားပြီး ပိန်ပိန်ခြောက်ခြောက် ဖြစ်သွားသည်... သူ၏ အသက်၊ ဝိညာဉ်နှင့် အနှစ်သာရတို့သည် စုပ်ယူခံလိုက်ရပုံ ရသည်။]

[အသက်ရှုချိန် အနည်းငယ် အတွင်းမှာပင် သူသည် အလယ်အလတ်အရွယ်ရှိ အမျိုးသားတစ်ဦးမှ အိုမင်းသော ရုပ်ဆိုးဆိုး လူအိုကြီးအဖြစ်သို့ ပြောင်းလဲသွားပြီး နောက်ဆုံးတွင် သွေးခြောက်ရုပ် အဖြစ်သို့ ပြောင်းလဲသွားသည်။]

[သွေးခြောက်ရုပ်ပေါ်တွင် ရန်ငြိုးနှင့် ကံတရားများ ရောယှက်နေပြီး သူ၏ မူလဝိညာဉ်ပင် လုံးဝ ရှင်းလင်းခံခဲ့ရသည်။]

[သင်သည် အံ့သြသွားပြီး သင်၏နတ်အာရုံကို အသုံးပြု၍ ချက်ချင်းပင် ရုပ်အလောင်းကို စစ်ဆေးလိုက်သည်။]

[ထိုအခါ ရုပ်အလောင်းအောက်တွင် လက်မအရွယ်ရှိ ပိုးကောင်တစ်ကောင်ကို သင် တွေ့ရှိလိုက်သည်။]

[ယင်းသည် ဂူပိုးကောင်ပင်!]

[၎င်းသည် လုံးဝ အနီရောင်ဖြစ်ပြီး၊ ရန်ငြိုးနှင့် သွေးရနံ့ဖြင့် ဖုံးလွှမ်းထားသည်။ ၎င်းသည် အလွန်ဆိုးယုတ်သော စွမ်းအင်ကို ဖြစ်ပေါ်စေသည်။]

[သင်၏ ထင်မြင်ချက် မမှားလျှင် ဤ နတ်ဘုရား အသွင်ပြောင်း ကျင့်ကြံသူ၏ ခန္ဓာကိုယ် လျင်မြန်စွာ ခြောက်သွေ့သွားခြင်းမှာ ဂူပိုးကောင်ကြောင့် ဖြစ်ပြီး၊ ဂူပိုးကောင်က သူ၏ သွေးအား၊ ကျင့်စဉ်၊ နှင့် သူ၏ နတ်ဝိညာဉ် အားလုံးကို စုပ်ယူလိုက်ခြင်းကြောင့် ဖြစ်သည်။]

[သင်သည် သင်၏ ဝိညာဉ်စွမ်းအားကို လမ်းကြောင်းပြောင်းပြီး ဂူပိုးကောင်ကို ဖမ်းယူလိုက်သည်။]

[ဖမ်းမိသည်နှင့် တစ်ပြိုင်နက် ဂူပိုးကောင်သည် သင့်အား အငြိုးတကြီးနှင့် ဆိုးယုတ်စွာ စိုက်ကြည့်နေသည်။ နှမ်းစေ့အရွယ် မျက်လုံးများသည် သွေးနီရောင်ဖြစ်သည်။ ၎င်းသည် အလွန် ဉာဏ်ကောင်းပုံရသည်။]

…