သွေးနတ်ဆိုး ကျမ်းစာ၊ သွေးနတ်ဆိုးနယ်မြေ၏ လျှို့ဝှက်ချက်

[သင်သည် စိတ်ထဲမှ တွေးလိုက်ပြီး ဝိညာဉ်ပေါက်ကွဲခြင်း နည်းစနစ်အား သွေးနတ်ဆိုး ဂိုဏ်း၏ အလယ်ဗဟိုသို့ ပစ်သွင်းလိုက်သည်။]

[ဘုန်း! ချက်ချင်းဆိုသလိုပင် ကြောက်မက်ဖွယ် ကောင်းသော စွမ်းအင်ပေါက်ကွဲမှုသည် ဂိုဏ်း၏ တစ်ဝက်ကျော်ကို ဖုံးလွှမ်းသွားသည်။]

[အသက်ရှုချိန် အနည်းငယ် ကြာပြီးနောက် မီးခိုးများ တဖြည်းဖြည်း ကင်းစင်သွားရာ သင့်လက်ချက်ကြောင့် ပုရွက်ဆိတ်များကဲ့သို့ သေဆုံးသွားသည့် အနိမ့်ဆုံးအဆင့် ကျင့်ကြံသူ ထောင်ပေါင်းများစွာကို တွေ့လိုက်ရသည်။]

[ကြောက်ရွံ့မှုနှင့် နာကျင်စွာ အော်ဟစ်သံများသည် သွေးနတ်ဆိုး ဂိုဏ်း တစ်ခုလုံးကို ချက်ချင်း လွှမ်းမိုးသွားသည်။]

[သို့သော်လည်း သင်သည် လေပြေကဲ့သို့ အေးဆေးတည်ငြိမ်စွာပင် ဝိညာဉ်အရည်ကို ထုတ်ယူကာ တစ်ငုံ သောက်လိုက်သည်။ ပြီးနောက် စွမ်းအင်လေဆင်နှာမောင်းကို နောက်တစ်ကြိမ် စုစည်း၍ ဝိညာဉ်ပေါက်ကွဲခြင်း နည်းစနစ်ကို အောက်ဘက်သို့ ထပ်မံ ထုတ်လွှတ်လိုက်သည်။]

[ဤနည်းဖြင့် သင်သည် ဝိညာဉ်‌ ပေါက်ကွဲခြင်း နည်းစနစ်အား သုံးကြိမ်ဆက်တိုက် ထုတ်လွှတ်ခဲ့သည်။]

[ဆယ့်ငါးမိနစ်ပင် မကြာခင် အချိန်တွင် ကျင့်ကြံသူ ထောင်ပေါင်းများစွာမှ အသက်ရှင်ကျန်ရစ်သူ အယောက်ငါးဆယ်ခန့်သာ ကျန်တော့သည်။]

[ထိုသို့ဖြင့် နတ်ဘုရား အသွင်ပြောင်းခြင်း အဆင့်အောက်ရှိ ကျင့်ကြံသူ အားလုံးသည် ဝိညာဉ်ပေါက်ကွဲခြင်း နည်းစနစ်ဖြင့် အကုန်အစင် သတ်ဖြတ်ခြင်း ခံလိုက်ရသည်။]

[နတ်ဘုရား အသွင်ပြောင်းခြင်း အဆင့်ရှိသူများပင် ပြင်းထန်စွာ ဒဏ်ရာရရှိပြီး ၎င်းတို့၏ စွမ်းအင်များ အားနည်းသွားသည်။]

[နေရာကို ရှင်းလင်းပြီးနောက် သင်သည် သွေးနတ်ဆိုးဂိုဏ်း၏ ပင်မခန်းမသို့ တဖြည်းဖြည်း ဆင်းသက်လာရာ ၎င်းတို့ အတူတကွ စုစည်းကာ ကာကွယ်နေကြသည့် ကျင့်ကြံသူ ဒါဇင်အနည်းငယ်ကို တွေ့လိုက်ရသည်။]

[တစ်ချက် ကြည့်လိုက်ရုံနှင့် လွတ်မြောက်ခြင်း ပြန်လည်ရောက်ရှိခြင်း အဆင့် ကျင့်ကြံသူ နှစ်ဦးမှလွဲ၍ ကျန်သည့် နတ်ဘုရား အသွင်ပြောင်းခြင်း အဆင့်ရှိသူများသည် သင့်အတွက် ဘာမှ မထူးခြားချေ။]

[သင်သည် ပင်မခန်းမထဲသို့ တဖြည်းဖြည်း ဝင်ရောက်လာပြီး ပေါ့ပါးသော ဓားချက်တစ်ချက်တည်းဖြင့် နတ်ဘုရား အသွင်ပြောင်းခြင်း အဆင့် ကျင့်ကြံသူ တစ်ဦးကို သတ်လိုက်သည်။]

[ထို့နောက် သင့်၏ နတ်အာရုံကို အလောင်းပေါ်သို့ ဖြန့်ကျက်လိုက်ရာ သင် အရင်က တွေးထားသည့် အတိုင်းပင် ထိုကိုယ်ခန္ဓာသည် လျင်မြန်စွာ ပုပ်ဆွေးသွားပြီး မကြာမီ ဂူပိုးကောင် တစ်ကောင်သည် အလောင်းမှ တဖြည်းဖြည်း တွားထွက်လာသည်။]

[သင်သည် သင့်၏ စွမ်းအင်ကို ထုတ်လွှတ်၍ ဂူပိုးကောင်ကို ဖမ်းဆီးလိုက်ရာ ၎င်းသည် သင့်ကို ချက်ချင်း အံကြိတ်၍ ကြည့်လာသည်။]

[သင် အနည်းငယ် မျက်မှောင်ကြုတ်လိုက်မိသည်။ သင် အရင်က သတ်ခဲ့သော ကျင့်ကြံသူနှင့် ယခု သတ်လိုက်သော အလောင်းတင်မကဘဲ အုတ်မြစ် တည်ဆောက်ခြင်း အဆင့်မှ သန္ဓေတည် အဆင့်အထိ ဂိုဏ်းတစ်ခုလုံးရှိ ကျင့်ကြံသူ အားလုံးသည် သေဆုံးပြီးနောက် အလောင်းများ အဖြစ်သို့ ပြောင်းလဲသွားသည်။]

[သင်သည် သင့်ရှေ့ရှိ ကျင့်ကြံသူများကို ကြည့်လိုက်ရာ ၎င်းတို့သည် ကြောက်လန့် တုန်လှုပ်နေကြသည်။]

[သင်၏ နတ်အာရုံသည် လွတ်မြောက်ခြင်း ပြန်လည်ရောက်ရှိခြင်း အဆင့် ကျင့်ကြံသူနှစ်ဦးထံ ရောက်ရှိသွားသည်။]

[အမှန်ပင်။ ထိုလွတ်မြောက်ခြင်း ပြန်လည်ရောက်ရှိခြင်းအဆင့် ကျင့်ကြံသူ နှစ်ဦးစလုံး၏ သက်တမ်းများသည် ပျက်စီးနေပုံရပြီး စွမ်းအင်များလည်း အားနည်းနေသည်။]

[အရပ်ရှည်ရှည်နှင့် လွတ်မြောက်ခြင်း ပြန်လည်ရောက်ရှိခြင်း ကျင့်ကြံသူတစ်ဦးက အနည်းငယ် ပိုကောင်းမွန်သည်။ သို့သော်လည်း ကျန်တစ်ဦးကိုမူ မည်းမှောင်သော စွမ်းအင်များဖြင့် ဖုံးအုပ်ထားသည်။ သူ၏ သက်တမ်းမှာ နှစ်ငါးဆယ်ထက် ပို၍ ကျန်တော့မည် မဟုတ်ချေ။]

လက်တွေ့ကမ္ဘာတွင် စုရှင်းသည် သူ့ရှေ့ရှိ စာသားများကို ကြည့်၍ အနည်းငယ် မျက်မှောင်ကြုတ်ကာ ရေရွတ်လိုက်သည်။

“ဒါဆိုရင် လွတ်မြောက်ခြင်း ပြန်လည်ရောက်ရှိခြင်း အဆင့် ကျင့်ကြံသူတွေတောင် သက်တမ်းနည်းနည်းပဲ ကျန်တော့တာလား?”

“ပုံမှန်ဆိုရင်တော့ လွတ်မြောက်ခြင်း ပြန်လည်ရောက်ရှိခြင်း အဆင့် ကျင့်ကြံသူတစ်ဦးက နှစ်နှစ်ထောင် သုံးထောင်လောက် အသက်ရှင်နိုင်တယ်… ဒါပေမဲ့ ဒီဂိုဏ်းက ကျင့်ကြံသူတွေမှာကျ သက်တမ်းက နှစ် လေးငါးရာလောက်ပဲ ရှိနိုင်တာလား?”

“ဒါ သွေးနတ်ဆိုး ကျမ်းစာကြောင့်လား?”

စုရှင်းသည် သက်ပြင်းချကာ တိတ်တဆိတ် ရွတ်ဆိုလိုက်သည်။

“မြှုပ်နှံသရုပ်ပြခြင်း လုပ်ဆောင်ချက်ကို ၂၄ နာရီကြာ ဖွင့်ပါ!”

[ဒင်… သင်သည် မြှုပ်နှံသရုပ်ပြခြင်း လုပ်ဆောင်ချက်ကို အောင်မြင်စွာ အသုံးပြုနိုင်ခဲ့ပါသည်။ စွမ်းအင် ၂.၄ သန်း ကုန်ကျပါမည်။ ကျန်ရှိသော စွမ်းအင် ၁.၀၄၇၉၃ ဘီလျံ။]

သရုပ်ပြစက်၏ အသိပေးချက်အသံ ပေါ်လာသည်နှင့်အမျှ စုရှင်း၏ အမြင်အာရုံသည် ခဏတာ မှုန်ဝါးသွားခဲ့သည်။

နောက်တစ်စက္ကန့် အကြာတွင် စုရှင်းသည် ရင်းနှီးမှုမရှိသော ပတ်ဝန်းကျင် တစ်ခုတွင် သူ့ကိုယ်သူ တွေ့လိုက်ရသည်။

ပထမဆုံး ခံစားရသည်မှာ ပြင်းထန်သော သွေးနံ့နှင့် လေထဲတွင် မသက်မသာ ကပ်တွယ်နေသော ခံစားချက်ပင်။

စုရှင်းသည် အနည်းငယ် မျက်မှောင်ကြုတ်လိုက်ပြီး သူ့ရှေ့ရှိ ဧရိယာကို လှည့်ပတ် ကြည့်ရှုလိုက်သည်။

သူသည် သူ့နှင့် ကိုက်အနည်းငယ် အကွာတွင် ကျင့်ကြံသူ ဒါဇင်အနည်းငယ်ကို မြင်တွေ့လိုက်ရသည်။ တစ်ဦးစီတွင် မတူညီသော အမူအရာများ ရှိကြပြီး လက်နက်များနှင့် ပဉ္စလက် ပစ္စည်းများကို ကိုင်ဆောင်ထားကာ တိုက်ခိုက်ရန် အသင့် ပြင်ဆင်ထားကြသည်။

ကျင့်ကြံသူတိုင်း၏ မျက်လုံးတွင် ပြင်းပြသော ကြောက်ရွံ့မှုများ ရှိနေသည်။

စုရှင်းသည် သူ့အနီးအနားရှိ ပုပ်ဆွေးနေသော အလောင်းအဖြစ်သို့ ပြောင်းလဲသွားသည့် ကျင့်ကြံသူကို ကြည့်လိုက်သည်။ ပြီးနောက် သူ၏ နတ်အာရုံသည် အသက်ရှင်နေသော ကျင့်ကြံသူ ဒါဇင်အနည်းငယ်စီ ဖြန့်ကျက်သွားကာ ရေရွတ်လိုက်သည်။

“သရုပ်ပြစက်ထဲက စာသားတွေမှာ ဖော်ပြထားတဲ့ အတိုင်းပဲ… သူတို့ရဲ့ သက်တမ်းတွေက ပျက်စီးနေတာပဲ၊ ကျင့်ကြံသူတစ်ဦးနဲ့ကို ဘယ်လိုမှ မတူဘူး!”

စုရှင်းသည် အနည်းငယ် ခေါင်းခါလိုက်သည်။

ဤဂိုဏ်းရှိ ကျင့်ကြံသူများ လေ့ကျင့်နေသည့် လမ်းစဉ်သည် ကျင့်ကြံသူ၏ အနှစ်သာရမှ သွေဖည်သွားပြီး အစွန်းရောက်သော လမ်းတစ်ခုဆီသို့ ရောက်ရှိနေသည်။

ကျင့်ကြံခြင်း၏ လမ်းစဉ်ဆိုသည်မှာ အဘယ်နည်း။

စုရှင်း ကျင့်ကြံခြင်း လောကသို့ ဝင်ခဲ့သည်မှာ နှစ်နှစ်ပင် မပြည့်သေးပေ။ သို့သော်လည်း နတ်ဘုရား အသွင်ပြောင်းခြင်း၏ စိန်ခေါ်မှု ငါးရပ်ကို ရင်ဆိုင်ခဲ့ရပြီး ဖြစ်သောကြောင့် သူ့၏ စိတ်နေစိတ်ထားနှင့် ကျင့်ကြံခြင်း လမ်းစဉ်ကို ရှာဖွေမှုသည် အတော်အတန် ခိုင်မာသည်။

စုရှင်း၏ အမြင်တွင် မည်သည့် ကျင့်ကြံသူအတွက်မဆို အဆုံးစွန် ပန်းတိုင်တစ်ခုသာ ရှိသည်။ ၎င်းမှာ ထာဝရ ရှင်သန်ခြင်းပင် ဖြစ်သည်။

ထာဝရ မသေနိုင်သောသူများသည် ကောင်းကင်နှင့် မြေကြီးကဲ့သို့ပင် အသက်ရှည်ကြပြီး နေနှင့်လကဲ့သို့ပင် တောက်ပကြသည်။

ထို့အပြင် အချို့ ကျင့်ကြံသူများသည် မတရားမှုကို တရားမျှတမှုဖြင့် ချက်ချင်း လက်စားချေလိုကြသည်။ အချို့က လွတ်လပ်မှုနှင့် ပေါ့ပေါ့ပါးပါး နေထိုင်လိုကြသည်… သို့မဟုတ် ရည်မှန်းချက်ကြီးသော ကျင့်ကြံသူများသည် ကမ္ဘာလောက၏ အစွမ်းကို ကိုင်စွဲရန် ရည်ရွယ်ပြီး အလှတရားများကြားမှ ပျော်ရွှင်မှုကို ရှာဖွေကြသည်။

မည်သို့ပင်ဖြစ်စေ၊ ၎င်းတို့သည် ကျင့်ကြံခြင်း၏ အဆုံးစွန်ပန်းတိုင်ဖြစ်သော ထာဝရရှင်သန်ခြင်းမှ ဘယ်တော့မှ သွေဖည်၍ မရနိုင်ချေ။

သို့သော်လည်း ဤဂိုဏ်းမှ ကျင့်ကြံသူများသည် လွတ်မြောက်ခြင်း ပြန်လည် ရောက်ရှိခြင်းအဆင့်သို့ ရောက်ရှိသည့်တိုင် သက်တမ်းမှာ သာမန် ရွှေအမြုတေအဆင့် နှင့် သန္ဓေတည် ဝိညာဉ်အဆင့် ကျင့်ကြံသူများနှင့်ပင် နှိုင်းယှဉ်၍ မရချေ။

ထိုကဲ့သို့သော ကျင့်ကြံမှုသည် ကျင့်ကြံခြင်း၏ အနှစ်သာရကို ဆန့်ကျင်နေသည်။

“ဖြတ်လမ်းနည်းတွေက တကယ်ကို စိတ်ပျက်စရာ ကောင်းတာပဲ…”

စုရှင်းသည် ခေါင်းခါလိုက်သည်။ တစ်ခုတည်းသော အားသာချက်မှာ သွေးနတ်ဆိုးကျမ်းသည် လေ့ကျင့်သူများကို ရွေးချယ်မှု မရှိခြင်းပင်။

စုရှင်း စဉ်းစားနေစဉ်တွင် သူ့ရှေ့ရှိ ကျင့်ကြံသူ ဒါဇင်အနည်းငယ်သည် တုန်ယင်နေသော အသံများဖြင့် ပြောလာသည်။

“ဆရာကြီး… ကျွန်တော်တို့နဲ့ ဘယ်လိုရန်ငြိုး၊ ရန်စ ရှိလို့ ကျွန်တော်တို့ရဲ့ သွေးနတ်ဆိုးဂိုဏ်းကို ဖျက်ဆီးပစ်ရတာလဲ?”

“ဟုတ်တယ်… ဆရာကြီး၊ ဆရာကြီးက အနိမ့်ဆုံးအဆင့် ကျင့်ကြံသူတွေကို သတ်ပစ်ပြီးပြီ… ဒါပေမဲ့ ကျွန်တော်တို့လို နတ်ဘုရား အသွင်ပြောင်းအဆင့် အထက်မှာရှိတဲ့ ကျင့်ကြံသူတွေ အတွက် ကျင့်ကြံရတာ လွယ်ကူတာ မဟုတ်ဘူး!”

စုရှင်းသည် တောင်းပန်နေသော ကျင့်ကြံသူများကို အေးစက်စွာ ကြည့်ကာ တိတ်ဆိတ်နေခဲ့သည်။

စုရှင်းထံမှ တုံ့ပြန်မှု မရှိသည်ကို မြင်သောအခါ ထိုကျင့်ကြံသူများသည် ခြိမ်းခြောက်လာကြသည်။

“ဆရာကြီး၊ ဆရာကြီးက အစွမ်းထက်တယ်ဆိုပေမဲ့… ကျွန်တော်တို့ရဲ့ သွေးနတ်ဆိုးဂိုဏ်းကို လွယ်လွယ်နဲ့ မစော်ကားသင့်ဘူး!”

“ဒီတစ်ခါ ဆရာကြီး ကျွန်တော်တို့ရဲ့ သွေးနတ်ဆိုးဂိုဏ်းကို ထိုးဖောက်နိုင်တာက ကျွန်တော်တို့ရဲ့ သွေးနဂါး အကြီးအကဲ အိမ်မှာမရှိလို့ပါ!”

“အခု ဆရာကြီးက အစီအရင်ကို ဖျက်လိုက်ပြီဆိုတော့ သွေးနဂါး အကြီးအကဲက မကြာခင် ပြန်လာတော့မှာ သေချာတယ်။ ဆရာကြီး အခုထွက်သွားရင် ဘာမှမဖြစ်ခဲ့သလို ကျွန်တော်တို့ လုပ်နိုင်ပါတယ်… ဒါပေမဲ့ နောက်ကျမှ ထွက်ပြေးဖို့ ကြိုးစားရင်တော့ အချိန် နောက်ကျသွားပါလိမ့်မယ်!”

ဤလွတ်မြောက်ခြင်း ပြန်လည်ရောက်ရှိခြင်း အဆင့် ကျင့်ကြံသူနှစ်ဦး၏ စကားကို ကြားသောအခါ စုရှင်း၏ စိတ်ဝင်စားမှု တိုးပွားလာသည်။ ထို့ကြောင့် သူက ပြန်လှန်ပြောလိုက်သည်။

“အော်…ငါက မင်းတို့ရဲ့ သွေးနတ်ဆိုးဂိုဏ်းက ကျင့်ကြံသူတွေ သောင်းနဲ့ချီပြီး သတ်ခဲ့တာကို ဘာမှမဖြစ်ခဲ့သလို ထားပေးနိုင်တယ်ပေါ့?”

“ငါက မိုက်မဲမယ်လို့ ထင်နေတာလား?”

ဤလွတ်မြောက်ခြင်း ပြန်လည်ရောက်ရှိခြင်း အဆင့် ကျင့်ကြံသူနှစ်ဦးသည် တစ်ဦးကိုတစ်ဦး ကြည့်လိုက်ကြသည်။

အနည်းငယ် ပို၍ သန်မာသော ကျင့်ကြံသူ တစ်ဦးသည် ရှေ့သို့ တက်လာပြီး စုရှင်းကို ပြောလိုက်သည်။

“ဆရာကြီး၊ လိမ်တာ မဟုတ်ပါဘူး… သွေးနဂါး အကြီးအကဲက ကျွန်တော့်ရဲ့ အဖေပါ!”

“ဆရာကြီးသာ ကျွန်တော်တို့ကို အသက် ချမ်းသာပေးမယ်ဆိုရင် ကျွန်တော်တို့ အမှန်တကယ်ပဲ ဘာမှမဖြစ်ခဲ့သလို ထားနိုင်ပါတယ်… အရေးပါတဲ့ လက်ဆောင်တစ်ခုတောင် ပေးဖို့ ကျွန်တော်တို့ ဆန္ဒရှိပါတယ်!”

…