အခန်း (၄၁၆)

တစ်ခါတစ်ရံမှာ အကြည့်တစ်ချက်က စကားအခွန်းတစ်ရာထက် အရာအားလုံးကို ဖော်ပြနိုင်တယ်။

အခုလိုပဲ။

ယဲ့ယွီဟာ ဂိုဏ်းခေါင်းဆောင် ရှန်ဘီက သူ့ကို ကြည့်နေတာကို ရှင်းရှင်းလင်းလင်း ခံစားနိုင်ခဲ့တယ်။

ပြီးတော့ အကြည့်က အတော်လေး ရှုပ်ထွေးနေတယ်။

သံသယ၊ ရှုပ်ထွေးမှုနဲ့ စူးစမ်းလိုစိတ်တို့ ပါဝင်နေတယ်။

ရှင်းရှင်းပြောရရင်-

အရင်က ဂိုဏ်းခေါင်းဆောင် ရှန်ဘီရဲ့ ယဲ့ယွီအပေါ် အကြည့်က သာမန်ဂိုဏ်းသားတယောက်ကို ကြည့်တာထက်မပိုပဲ လုံးဝလျစ်လျူရှုထားခဲ့တာ။

ယဲ့ယွီက စုရှင်းဂိုဏ်း ရဲ့အပြင်ဘက်မှာ နတ်ဘုရားအပါး ၂၀ ကျော် သေဆုံးသွားပြီလို့ သူ့ကို ပြောခဲ့တုန်းကတောင်-

ဂိုဏ်းခေါင်းဆောင် ရှန်ဘီရဲ့ စိတ်မကောင်းဖြစ်နေတဲ့အကြည့်က အသက်ဝင်တာသိပ်မရှိသလို သိပ်မပြောင်းလဲခဲ့ဘူး။

ဒါပေမယ့် အခုတော့ အရာအားလုံး တစမကျန် ပြောင်းလဲသွားပြီ။

သူ သိတယ်။

ဂိုဏ်းခေါင်းဆောင် ရှန်ဘီက ကျူချင်ဟာ ဒီရက်ပိုင်းအတွင်းမှာ သူ့ကို ပိုပြီးရင်းနှီးလာခဲ့တယ်ဆိုတာ သေချာပေါက် သိနေတာကြောင့် ဒီအကြည့်မျိုး ပေါ်လာခဲ့တာ။

သဝန်တိုတဲ့အကြည့် ၊ ရန်သူဆိုတဲ့အကြည့်

ကျွတ်၊ အဲဒီ ကျူချင်ဆိုတဲ့ကောင်မလေးက နောက်ဆုံးတော့ ငါ့ကို သူ့ရဲ့ စစ်တုရင်ကွက်ထဲက နယ်ရုပ်လေးတစ်ခုအဖြစ် အသုံးချဖို့ ဆုံးဖြတ်လိုက်တာလား။

ယဲ့ယွီ မျက်မှောင်ကြုတ်လိုက်တယ်။

ဒါပေမယ့် ပြီးတော့မှ သူ ဒီအတွေးက နည်းနည်းလွဲနေနိုင်တယ်လို့ ခံစားလိုက်ရတယ်။

ဂိုဏ်းခေါင်းဆောင် ရှန်ဘီက သူ့ကို တကယ်ပဲ ထိခိုက်စေချင်တယ်ဆိုရင်

သူ အကြည့်တစ်ချက်ကိုပဲ အသုံးချမှာ မဟုတ်ဘူး။

သူ သူ့ကို လျှို့ဝှက်စွာ လုပ်ကြံဖို့ထိ ချဉ်းကပ်လိမ့်မယ်။

ဒါပေမယ့် အခုတော့ ဒါက ပေါ့ပေါ့ပါးပါး အကြည့်တစ်ချက်ပဲ ဖြစ်နေတယ်။

အစွန်းရောက်တဲ့ ရန်စွယ်ငေါငေါလုပ်ရပ်တွေ မရှိသေးဘူး။

ဒါဆို ဘာလို့လဲ။

ယဲ့ယွီက နားမလည်နိုင်ခဲ့ဘူး။

ဂိုဏ်းခေါင်းဆောင် ရှန်ဘီ သူ့ရဲ့မိန့်ခွန်းကို ပြီးတဲ့အခါ ထန်းတိ ဂိုဏ်း က နတ်ဘုရားတွေအားလုံးဟာ စုရှင်းဂိုဏ်း ဘက်ကို စစ်ချီနေတဲ့ဆာမူရိုင်းတွေလို စတင်ဦးတည်သွားခဲ့တယ်။

ယဲ့ယွီ ခဏရပ်ပြီး တုံ့ဆိုင်းနေခဲ့ပေမယ့် ချက်ချင်းပဲ သူတို့နောက်ကို ထပ်ချပ်မကွာ လိုက်ခဲ့တယ်။

သူ ဂိုဏ်းခေါင်းဆောင် ရှန်ဘီက သူ့ကို ထိခိုက်စေဖို့ ရည်ရွယ်ချက်မရှိဘူးလို့ ယုံကြည်ခဲ့တယ်။

အနည်းဆုံးတော့ အခုအချိန်မှာ လုပ်ဦးမှာ မဟုတ်ဘူး။

နတ်ဘုရားဘုရင်တစ်ပါးရဲ့ ခွန်အားနဲ့

သူက တကယ်ပဲ သူ့ကို သတ်ချင်ခဲ့ရင် အတွေးတချက်နဲ့တင် သူကို ဘာဘီကျူးကင်သလိုမျိုး ဒီနေရာမှာတင် လုပ်နိုင်တယ်။

ပြီးတော့ စုရှင်းဂိုဏ်း ရဲ့ လျှို့ဝှက်သူလျှိုတစ်ယောက်ဖြစ်တယ်ဆိုတဲ့ အကြောင်းပြချက်တစ်ခုခုကို ဖန်တီးလိုက်ရုံပဲ။

ဒါပေမယ့် ဂိုဏ်းခေါင်းဆောင် ရှန်ဘီက အဲဒီလို မလုပ်ခဲ့ဘူး၊ သူ့ကိုပဲ စောင့်ကြည့်နေခဲ့တယ်။

ဒါကြောင့် ယဲ့ယွီ ရပ်တန့်ဖို့ မလိုအပ်ဘူး။

ဒါ့အပြင် ဒီနတ်ဘုရားဂိုဏ်းစစ်ပွဲဟာ သေချာပေါက် တစ်သက်မှာတစ်ခါ ကြုံရခဲတဲ့ အခွင့်အရေးတစ်ခုပဲ။

သူသာ ဒီအခွင့်အရေးကို ဆုပ်ကိုင်ပြီး အတူတူတိုးတက်ခဲ့ရင်

သူ နတ်ဘုရားဘုရင်အဆင့်ကိုတောင် ရောက်ရှိနိုင်တယ်။

ဒီလိုအခြေအနေမျိုးမှာ နောက်ဆုတ်ဖို့ လုံးဝမဖြစ်နိုင်ဘူး။

ယဲ့ယွီရဲ့ လှုပ်ရှားမှုတွေက လျင်မြန်တယ်။

သူ့ရှေ့မှာရှိတဲ့ ရိုးသားပီးချစ်ဖို့ကောင်းတဲ့သူငယ်ချင်း ကျိလင်ချင်းကို အမြန်လိုက်မီခဲ့တယ်။

အသံလှိုင်းကို အသုံးပြုပြီး 'မသေစေနဲ့၊ မင်းနဲ့အတူ သောက်ဖို့ ငါ စောင့်နေတယ်' လို့ အရမ်းရင်းနှီးတဲ့အသံနဲ့ ပြောလိုက်တယ်။

ကျိလင်ချင်းက နွေးထွေးမှုနဲ့အတူ အနည်းငယ် တုန်ယင်သွားပြီး မော့ကြည့်လိုက်တယ်။

နွေးထွေးတဲ့ခံစားချက်က သူ့ရဲ့နှလုံးသားထဲမှာ လှိုက်တက်လာခဲ့တယ်။

သူ ယဲ့ယွီက သူ့ကို ဒီလိုနည်းနဲ့ အားပေးနေတယ်ဆိုတာ သိခဲ့တယ်။

ဒီလို အကူအညီမဲ့ဆုံး အချိန်မှာ

ကျိလင်ချင်းက တကယ်ပဲ ကျေးဇူးတင်ခဲ့တယ်။

ဒါကြောင့် သူက အသံလှိုင်းကနေ 'ကောင်းပြီ၊ အစ်ကို၊ မူးအောင်မသောက်မချင်း ငါတို့ ပြန်မလာကြဘူး။ အချိန်ကျရင် အကြီးအကဲ ကျူကိုပါ ခေါ်လိုက်မယ်' လို့ တုံ့ပြန်ခဲ့တယ်။

ကျွန်တော်တို့ သုံးယောက်အတူတူ သောက်ကြမယ်။

'ဘယ်လိုပဲဖြစ်ဖြစ် ကျွန်တော်က ထန်းတိ ဂိုဏ်း မှာ ခင်ဗျားရဲ့အချစ်ဇာတ်လမ်းကို ပထမဆုံး မြင်ရမယ့်သူဖြစ်သင့်တယ်'။

'အဲဒီအခါကျရင် နတ်ဘုရားဝိုင်နဲ့ခွက်ချင်းတိုက်ရင်း အတူတူခင်ဗျားတို့နှစ်ဦးဟာ နတ်ဘုရားပင်လယ်ရေခန်းခြောက်ပြီး ကျောက်တုံးတွေ ပုပ်ပွသည်အထိ ဘယ်တော့မှ မကွဲကွာအောင် ကျွန်တော် ဆုတောင်းပေးမယ်။

ဒီစကားတွေကို ကြားတော့

ယဲ့ယွီရဲ့ မျက်နှာက မှောင်သွားခဲ့တယ်။

'ဆုတောင်းပေးတာ ကောင်းပါတယ်။ ဒါပေမယ့် အနာဂတ်မှာ ထပ်မလုပ်နဲ့။

'ငါ မင်းကို သတ်ပစ်ဖို့ ဒေါသတွေမထိန်းနိုင် ဖြစ်သွားလိမ့်မယ်။'

ယဲ့ယွီက အသက်ပြင်းပြင်း ရှူလိုက်ပြီး ရှင်းပြဖို့ မကြိုးစားတော့ဘူးလို့ ဆုံးဖြတ်လိုက်တယ်။

ဘာလို့လဲဆိုတော့ သူ ဘယ်လောက်ပဲ ရှင်းပြရှင်းပြ

ကျိလင်ချင်းက သူ့ကို ယုံမှာမဟုတ်ဘူး။

ဒီလိုဖြစ်နေမယ့်အစား သူ့ရဲ့စွမ်းအင်ကို ချန်ထားတာ ပိုကောင်းတယ်။

မကြာခင်မှာပဲ

ထန်းတိ ဂိုဏ်း က နတ်ဘုရား ၃၀၀ ကျော်ဟာ စုရှင်းဂိုဏ်း ရဲ့အပြင်ဘက်ကို စစ်ပွဲစတင်ဖို့ အသင့်အနေထားနဲ့ ရောက်ရှိလာခဲ့တယ်။

ဒီအချိန်မှာ

စုရှင်းဂိုဏ်း က နတ်ဘုရား ၁၀၀ နီးပါးဟာ ပတ်လည်မှာ အသင့်အနေအထားနဲ့ ခံစစ်အနေထားကို ခင်းကျင်းကာ စောင့်ဆိုင်းနေခဲ့တယ်။

သူတို့ နတ်ဘုရားဖွဲ့စည်းမှုတစ်ခုကို ဖွဲ့စည်းထားပြီး ရှေ့ကရန်သူတွေကို ရေခဲတုံးတွေလို အေးစက်စက်နဲ့ စိုက်ကြည့်နေကြတယ်။

အဖွဲ့ရဲ့ခေါင်းဆောင်ဟာ စုရှင်းဂိုဏ်း ရဲ့ အကြီးအကဲ တိုက်ရည်ခိုက်ရည်ကောင်းတဲ့ ရန်ကျားလူးပဲ။

ဂိုဏ်းခေါင်းဆောင် ရှန်ဘီဟာ သူငယ်နှပ်စားလေးတွေကိုကြည့်တဲ့ သနားသလိုအကြည့်နဲ့ အခင်းအကျင်းတစ်ခုလုံးကို လှည့်ပတ်ကြည့်လိုက်တယ်။

သူက ညင်သာစွာ 'အကြီးအကဲ ရန်၊ မင်းတို့ရဲ့ စုရှင်းဂိုဏ်း က ဒါက ဘာအဓိပ္ပာယ်လဲ' လို့ ပြောလိုက်တယ်။

'ဒီလူအုပ်စုလေးနဲ့ ထန်းတိ ဂိုဏ်း က လေလိုမိုးလိုတိုက်ခိုက်မဲ့ သူရဲကောင်းတွေကို ရပ်တန့်နိုင်မယ်လို့ မင်းတို့ ထင်နေတာလား။'

နတ်ဘုရားစွမ်းအင်ရဲ့ လွှမ်းမိုးမှုအောက်မှာ

ဂိုဏ်းခေါင်းဆောင် ရှန်ဘီရဲ့အသံက ကောင်းကင်ဘုံရဲ့ မိုးခြိမ်းသံလို ထွက်ပေါ်လာပြီး

စုရှင်းဂိုဏ်း က နတ်ဘုရားတွေရဲ့ မျက်နှာကို ဖြူဖျော့သွားစေခဲ့တယ်။

ဒါက ဂိုဏ်းခေါင်းဆောင် ရှန်ဘီက စုရှင်းဂိုဏ်း ကို တမင်တကာ အရှက်ခွဲဖို့ ကြိုးစားတာမဟုတ်ဘူး။

ဒါက စုရှင်းဂိုဏ်း ရဲ့ ဖွဲ့စည်းမှုက တကယ်ကို ရယ်စရာကောင်းနေလို့ပဲ။

ရွှေနတ်ဘုရားအဆင့်ရဲ့ အထွတ်အထိပ်မှာရှိတဲ့ အကြီးအကဲ ရန်ကျားလူးအပြင်

နတ်ဘုရားအပါး ၁၀၀ နီးပါးထဲက နှစ်ပါးသာ ကောင်းကင်နတ်ဘုရားအဆင့်မှာ ရှိတယ်။

ကျန်တာတွေကတော့ လျှို့ဝှက်ဆန်းကြယ်တဲ့နတ်ဘုရားနဲ့ စစ်မှန်တဲ့နတ်ဘုရားအဆင့်မှာပဲ။

ဒီခွန်အားနဲ့ ထန်းတိ ဂိုဏ်း က နတ်ဘုရားအများကြီးကို ရပ်တန့်ဖို့ မပြောနဲ့

ဂိုဏ်းခေါင်းဆောင် ရှန်ဘီ တစ်ယောက်တည်းတောင် သူတို့ကို လုံးဝ အနိုင်ယူနိုင်တယ်။

အကြောင်းရင်းက ရိုးရှင်းတယ်။

ကြီးမားတဲ့ ကျင့်ကြံမှုအဆင့် ကွာခြားချက်ကို အရေအတွက်နဲ့ ဖြည့်ဆည်းလို့မရနိုင်ဘူး။

ဒါက အဲဒီနေရာမှာရှိတဲ့ လူတိုင်း ရှင်းရှင်းလင်းလင်း သိနေတဲ့အရာပဲ။

အကြီးအကဲ ရန်ကျားလူးရဲ့ မျက်နှာအမူအရာက တည်ငြိမ်နေခဲ့တယ်။

သူက အသံနက်ကြီးနဲ့ 'ကျွန်တော် သိပါတယ်၊ ဒီလူတွေနဲ့ ကျွန်တော်တို့ နတ်ဘုရားဘုရင် ရှန်ရဲ့ ခြေလှမ်းတွေကို မရပ်တန့်နိုင်ပါဘူး' လို့ ပြောလိုက်တယ်။

'ဒါပေမယ့် ဒါဟာ ကျွန်တော်တို့ရဲ့ တာဝန်ပဲ။ သေရမယ်ဆိုရင်တောင် ကျွန်တော်တို့ စုရှင်းဂိုဏ်း အတွက် တိုက်ခိုက်နေရဦးမှာပဲ။

သူ့ရဲ့ တည်ငြိမ်တဲ့အသံက သေခြင်းတရားကို လက်ခံတဲ့အရိပ်အမြွက်တစ်ခုကို ဖော်ပြနေတယ်။

လူအုပ်ထဲမှာ ရပ်နေတဲ့ ယဲ့ယွီက မျက်ခုံးပင့်လိုက်တယ်။

'သေခြင်းဆီကို ချီတက်ဖို့ရဲရင့်တယ်တဲ့သူကြီးဖြစ်နေတာ၊ စိတ်ဝင်စားဖို့ကောင်းတယ်'

'အဘိုးကြီး၊ ခင်ဗျားရဲ့ရုပ်အလောင်းကို ကျွန်တော် ယူလိုက်မယ်။'

'ခင်ဗျားရဲ့ ခံယူချက်ကိုကြိုက်လို့ ကျုပ်ရဲ့နည်းစနစ်နဲ့ နောက်ပိုင်းမှာ ကျွန်တော် ပထမဆုံး မြေမြှုပ်ရမယ့်သူက ခင်ဗျား ဖြစ်လာလိမ့်မယ်။'

သို့သော် ဂိုဏ်းခေါင်းဆောင် ရှန်ဘီရဲ့ စကားတစ်ခွန်းက

ယဲ့ယွီကို ချက်ချင်းပဲ စိတ်မပျော်မရွှင်ဖြစ်စေခဲ့တယ်။

'အကြီးအကဲ ရန်၊ ကျွန်တော်တို့က မိတ်ဆွေဟောင်းတွေပဲ။ မင်းရဲ့စရိုက်ကို ကျွန်တော် သိပါတယ်။

'ဒါပေမယ့် မျက်ကန်းသစ္စာစောင့်တာက အလိုချင်ဆုံးအပြုအမူ မဟုတ်ဘူး။'

'ယန်ချန်ဆောင်းဟာ မင်းတို့ ခစားပီး သူခိုင်းသမျှတွေ လိုက်လုပ်ဖို့ မထိုက်တန်ဘူး။'

'ဒီလိုဆိုရင်ကော။ ထန်းတိ ဂိုဏ်း က နတ်ဘုရား ၂၃ ပါးရဲ့ ရုပ်အလောင်းတွေကို မင်း ပေးအပ်ပြီး ငါတို့အတွက် လမ်းရှင်းပေးလိုက်ပါ။'

'မင်းတို့အားလုံးကို ထွက်သွားဖို့ ငါ ခွင့်ပြုမယ်။'

ယဲ့ယွီက သူ့ရဲ့နှုတ်ခမ်းတွေကို နဲနဲထော်လိုက်တယ်။

'ကျွတ်၊ မင်းက အခု လူကောင်းလုပ်ဖို့ ကြိုးစားနေတာလား။'

'မသတ်ဘူး၊ လွှတ်ပေးလိုက်တယ်၊ ဘယ်လောက်တောင် ရက်ရောလိုက်လဲ။'

'မင်းက မသတ်ရင် ကျွန်တော် ဘယ်လိုလုပ် ရုပ်အလောင်းတွေကို ယူရမှာလဲ။'

'ရုပ်အလောင်းတွေ မယူရင် ကျွန်တော် ဘယ်လိုလုပ် ပိုအားကောင်းလာမှာလဲ။'

'ပိုအားကောင်းမလာရင်... ခဏ၊ ဘာလို့ ရုပ်အလောင်းတွေအကြောင်း ပြောနေတာလဲ။'

အကြီးအကဲ ရန်ကျားလူး မျက်မှောင်ကြုတ်လိုက်တယ်။

သူက အသံနက်ကြီးနဲ့ 'နတ်ဘုရား ၂၃ ပါးရဲ့ ရုပ်အလောင်းတွေက ဘာလဲ။ ကျွန်တော်ကတော့ ကျွန်တော်တို့ရဲ့ စုရှင်းဂိုဏ်း က နတ်ဘုရား ၃၅ ပါး ဘယ်မှာလဲဆိုတာကိုပဲ မေးချင်တယ်။'

'သူတို့အားလုံး သေဆုံးသွားခဲ့ရင်တောင် သူတို့ရဲ့ရုပ်အလောင်းတွေကို ကျွန်တော်တို့ဆီ ပြန်ပေးသင့်တယ် မဟုတ်လား။'

ဒီစကားပြောဆိုမှုကို ကြားတော့

ယဲ့ယွီဟာ သူ့ရဲ့နှလုံးသားထဲမှာ ရုတ်တရက် ထိတ်လန့်သွားခဲ့တယ်။

'ကျွတ်၊ ဒီနှစ်ယောက် ရုပ်အလောင်းတွေအကြောင်း စပြောနေပြီ။'

'ဘာလို့ အခုမှ ဒီအကြောင်းတွေ ပေါ်လာရတာလဲ။'

'အဲဒီရုပ်အလောင်းတွေကို ငါ မြေမြှုပ်ပြီးသားပဲ။'

'နောက်ပိုင်းမှာ အရာအားလုံး မကိုက်ညီခဲ့ရင်'၊

ဂိုဏ်းခေါင်းဆောင် ရှန်ဘီက တခြားသူတွေကို သေချာပေါက် သံသယဝင်လိမ့်မယ်၊ အထူးသဖြင့် ကျိလင်ချင်းကို။

ဘာလို့လဲဆိုတော့ ငါတို့ ဂိုဏ်းကစေလွှတ်လိုက်တဲ့ နတ်ဘုရားတွေထဲမှာ ဒီနှစ်ယောက်ပဲ အသက်ရှငလျက် ပြန်လာခဲ့တာ။

'အခု သံသယမဝင်ဖို့ ခက်လိမ့်မယ်။'

'ဒီလိုအခြေအနေမျိုးမှာ ငါ ဘာလုပ်သင့်လဲ။'

ယဲ့ယွီရဲ့ အတွေးတွေက ပြေးလွှားနေပြီး ဖြေရှင်းနည်းတစ်ခုကို အမြန်ရှာဖွေချင်နေခဲ့တယ်။

သို့သော် အဲဒီအချိန်မှာပဲ

နူးညံ့တဲ့အသံတစ်ခုက သူ့ရဲ့စိတ်ထဲမှာ ပေါ်လာခဲ့တယ်။

'ဘယ်လိုလဲ။ နည်းနည်း စိုးရိမ်နေသလား။'

ယဲ့ယွီ မျက်လုံးတွေ ပြူးသွားခဲ့တယ်။

ဒါက ကျူချင်ရဲ့အသံပဲ။

သူမ တစ်ခုခု သိနေတာလား။

ယဲ့ယွီဟာ ကျူချင်ရဲ့ ပုံရိပ်ကို ရှာဖို့ ပတ်ပတ်လည်ကို ကြည့်လိုက်ပေမယ့် သူမကို ဘယ်နေရာမှ မတွေ့ခဲ့ဘူး။

၄၁၇ ဆက်ရန်