ညီအစ်ကိုဝမ်နဲ့ တွေ့ပြီးမှ ငါတို့ကံကောင်းလာတာ

ကျိုးကွေ့ချန်နှင့် လီဖူချန်တို့ အတူတကွထွက်ခွာသွားသည်ကို ကြည့်ရင်း ချန်ယွမ်ကျိုးက သူ့ဘေးရှိ ချန်ချင်းဟန်ဘက်သို့ လှည့်ပြီး မေးလိုက်သည်။

"ဒုခေါင်းဆောင် ဒီကျိုးကွေ့ချန်ကလည်း ဒုက္ခပေးတတ်တဲ့ ဇာတ်ကောင်တစ်ယောက်ပဲ။ ကျွန်တော် သူ့ကိုအရင်ဆုံး စောင့်ကြည့်ဖို့ တစ်ယောက်ယောက်လွှတ်ထားရမလား"

သို့သော် ချန်ချင်းဟန်၏ အတွေးများမှာ တခြားနေရာသို့ ရောက်နေပြီဖြစ်သည်။ အကြောင်းမှာ သူက သူ့ရှေ့မှ ကောက်ရိုးဦးထုပ်ဆောင်းထားသော လူငယ်မှာ မည်သူဖြစ်သည်ကို နောက်ဆုံးတွင် သတိရသွားသောကြောင့်ပင်။

"တတိယအစ်ကို မင်းကိုယ်တိုင် သူ့ကို ဒီမှာစောင့်ကြည့်နေ။ ငါခဏနေ ပြန်လာခဲ့မယ်"

ဒီစကားများပြောပြီးနောက် ချန်ချင်းဟန်မှာ ထိုနေရာမှ ပျောက်ကွယ်သွားသည်။

'အင်း။ ဒုခေါင်းဆောင်က ဒီလောက်ပြင်းပြင်းထန်ထန် တုံ့ပြန်တယ်ဟုတ်လား။ ငါတို့ငါးကြီးတစ်ကောင် မိလိုက်တာများလား'

ချန်ယွမ်ကျိုးက စူးစမ်းလိုစိတ်ဖြင့် တွေးလိုက်သည်။

လက်ဖက်ရည်တစ်ခွက်သောက်စာ အချိန်ခန့် ကုန်ဆုံးပြီးနောက် ချန်ယွမ်ကျိုးက ကျိုးကွေ့ချန်နှင့် လီဖူချန်တို့နောက်သို့ အရက်ဆိုင်တစ်ခုထဲသို့ လိုက်သွားတော့မည်အပြု ချန်ချင်းဟန် ရုတ်တရက် သူ့ရှေ့တွင် ပေါ်လာသည်ကို တွေ့လိုက်ရသည်။ သူ့ဘေးတွင် ရင်းနှီးသော်လည်း မရင်းနှီးသော ပုံရိပ်တစ်ခု ပါလာသည်။

"ဂိုဏ်းခေါင်းဆောင်"

ချန်ယွမ်ကျိုး ထိတ်လန့်သွားသည်။

သူ၏မှတ်ဉာဏ်ထဲတွင် သူတို့၏ဂိုဏ်းခေါင်းဆောင်မှာ နတ်နဂါးတစ်ကောင်လို အမြဲတမ်း တွေ့ရခဲသည်။ အဖွဲ့ဝင်များစွာမှာ ဂိုဏ်းထဲတွင် နှစ်ပေါင်းများစွာ နေထိုင်ခဲ့ပြီးသည့်တိုင် သူ၏မျက်နှာအမှန်ကိုပင် မမြင်ဖူးကြပေ။

သူကိုယ်တိုင်ပင်လျှင် ခေါင်းဆောင်နှင့် သုံးကြိမ်သာ တွေ့ဆုံခဲ့ဖူးသည်။

သူဒီနေ့ ရုတ်တရက်ကြီး ပေါ်လာလိမ့်မည်ဟု ဘယ်တုန်းကမှ မမျှော်လင့်ထားခဲ့ပေ။

ခဏအကြာတွင် ချန်ချင်းဟန်က ချန်ယွမ်ကျိုးနှင့် အခြားသူများဘက်သို့ ပြန်လှည့်လိုက်သည်။

"နောက်ဆုတ်ကြ"

"ဟုတ်ကဲ့"

နောက်တစ်ခွန်းမပြောဘဲ ချန်ယွမ်ကျိုးနှင့် အခြားသူများမှာ ချန်ချင်းဟန်၏ ဆုတ်ခွာရန်အမိန့်ကို နာခံပြီး လူအုပ်ထဲသို့ အလျင်အမြန် ပျောက်ကွယ်သွားကြသည်။

ခဏအကြာတွင် အဝါရောင်ဂိုဏ်းခေါင်းဆောင် ရှန်လင်းဝမ်က စကားပြောလိုက်သည်။

"သူက တကယ်ပဲ သွေးမီးလျှံဂိုဏ်းခေါင်းဆောင်ရဲ့ တတိယသခင်လေးပဲ။ ငါသူနဲ့ မနှစ်က ခြင်္သေ့လှုပ်ရှားမှုညီလာခံမှာ စကားပြောခဲ့ဖူးတယ်၊ ငါဘယ်လိုမှ မှားနိုင်မှာမဟုတ်ဘူး"

"ဒါပေမဲ့ တတိယသခင်လေးက ငါတို့ရဲ့နယ်မြေငယ်လေးမှာ ဘာလာလုပ်တာလဲ။ ဘယ်သူမှ ငါတို့ကို သတင်းမပို့ခဲ့ဘူး။ ငါတို့လူတွေက ကပ်ဘေးကြီးတစ်ခုကို ဖြစ်စေတော့မလို့"

ချန်ချင်းဟန်က ကြောက်စိတ်များ ကျန်ရှိနေသေးစွာဖြင့် ပြောလိုက်သည်။

ရှန်လင်းဝမ်က ခဏစဉ်းစားပြီး ပြန်ဖြေလိုက်သည်။

"တစ်စုံတစ်ယောက်က ငါတို့ကို မယုံကြည်တော့ဘဲ တတိယသခင်လေးရဲ့လက်ကိုသုံးပြီး ငါတို့ကို ရှင်းလင်းချင်နေပုံပဲ"

"ဘာ"

ချန်ချင်းဟန် အလွန်အမင်း ထိတ်လန့်သွားသည်။

"အဲ့ဒီကိစ္စက ပေါက်ကြားသွားတာများလား။ ဒါပေမဲ့ ငါတို့ ရှင်းရှင်းလင်းလင်းပဲ..."

သူ၏စကားတစ်ဝက်မှာပင် ချန်ချင်းဟန်က ရှန်လင်းဝမ်၏ စူးရှသောအကြည့်ကို သတိပြုမိပြီး သူ့ပါးစပ်ကို ချက်ချင်းပိတ်လိုက်သည်။

"ဒါပေမဲ့ ဒီတတိယသခင်လေးက ငါတို့ကို ဆန့်ကျင်ဖို့ ရည်ရွယ်ပုံမပေါ်ဘူး။ မဟုတ်ရင် မင်းအစီရင်ခံစာထဲမှာ ဖော်ပြထားသလို အဲ့ဒီမိုက်မဲတဲ့အရာတွေအားလုံးကို သူလုပ်ခဲ့မှာမဟုတ်ဘူး။ သူက သူ့တည်ရှိနေတာကိုငါတို့ကို သိမ်မွေ့စွာ သတိပေးနေတာ ဖြစ်နိုင်တယ်... ဒါမှမဟုတ် တခြားတစ်ခုခုကို အရိပ်အမြွက်ပြနေတာလည်း ဖြစ်နိုင်တယ်"

"ဒါဆို... ကျွန်တော် ဒီတတိယသခင်လေးနဲ့ သွားဆက်သွယ်ရမလား"

"မလိုဘူး။ သူက ငါတို့ကို သတိပေးဖို့ ဒီနည်းလမ်းကို ရွေးချယ်မှတော့ သူက ငါတို့ကို တိုက်ရိုက် တွေ့ဆုံချင် စိတ်မရှိဘူးဆိုတဲ့ သဘောပဲ။ သူအရင် ငါတို့ကို ချဉ်းကပ်လာတဲ့အထိ စောင့်လိုက်။ ဘယ်လိုပဲဖြစ်ဖြစ် ရန်ချန်ခရိုင်က ငါတို့အစီအစဉ်တွေကို အရှိန်မြှင့်လိုက် တတိယသခင်လေး အတွက်ကတော့... သူ့ကိုကာကွယ်ဖို့ ပါးနပ်တဲ့လူတချို့ကို တာဝန်ပေးလိုက်။ ငါတို့နယ်မြေထဲမှာ သူ့ကို ဘာမှလုံးဝဖြစ်ခွင့်မပြုနိုင်ဘူး"

"နားလည်ပါပြီ။ ကျွန်တော် ချက်ချင်းစီစဉ်လိုက်ပါ့မယ်"

ဒီလိုပြောပြီးနောက် ချန်ချင်းဟန်က အလျင်အမြန် လှည့်ထွက်သွားသည်။

အရက်ဆိုင်ထဲတွင် အားရပါးရရယ်မောနေသော လီဖူချန်ကို ကြည့်ရင်း ရှန်လင်းဝမ်မှာ နက်ရှိုင်းသော အတွေးထဲသို့ နစ်မြုပ်သွားသည်။

'ငါတို့ ဘယ်နေရာမှာများ ချော်ထွက်သွားတာလဲ...'

'သစ္စာဖောက်တစ်ယောက်များ ရှိနေမလား။ ကြည့်ရတာ ငါတို့ သေသေချာချာ စုံစမ်းစစ်ဆေးရတော့မယ်ထင်တယ်'

ဒီအတွေးနှင့်အတူ ရှန်လင်းဝမ်မှာ သူထိုနေရာတွင် ဘယ်တုန်းကမှ မရှိခဲ့သကဲ့သို့ ချက်ချင်းပင် ပျောက်ကွယ်သွားသည်။

......

ထိုညတွင် လီဖူချန်က အိပ်ရာထဲတွင် လဲလျောင်းရင်း "နန်းတော်ရှစ်ဆောင်နှင့် မြစ်လေးစင်းကျမ်း" ကို လေ့လာနေစဉ် ထန်ထင်ရွှမ်းက သူ့ဘေးမှ မေးလိုက်သည်။

"အစ်ကိုကြီး ရှင်ဒီစာအုပ်ကို ညတိုင်း ရက်တော်တော်ကြာ ဖတ်နေပြီနော်။ ဒီစာအုပ်က တကယ်ပဲ အဲ့လောက်စိတ်ဝင်စားဖို့ကောင်းလို့လား"

"စိတ်ဝင်စားဖို့ကောင်းတာထက်ကို ပိုတယ်၊ မယုံနိုင်လောက်အောင် နက်ရှိုင်းတယ်။ ငါတို့ ညီအစ်ကိုဝမ်နဲ့ ပြန်တွေ့တဲ့အခါ သူ့ကို သေသေချာချာကျေးဇူးတင်ရမယ်။ ဦးလေးသုံးက ခရီးသွားရင်း မြင့်မြတ်တဲ့ပုဂ္ဂိုလ်တွေနဲ့ တွေ့ဆုံရမယ်လို့ ပြောခဲ့တာက ညီအစ်ကိုဝမ်လို လူမျိုးကို ဆိုလိုတာဖြစ်မယ်"

လီဖူချန်၏ မျက်လုံးများထဲမှ တောက်ပနေသော စိတ်လှုပ်ရှားမှုကို မြင်သောအခါ ထန်ထင်ရွှမ်းက သူမ၏ပါးစပ်ကို အုပ်ပြီး ရယ်မောမနေဘဲ မနေနိုင်ခဲ့ပေ။

"ဒါပေမဲ့ အဲ့ဒီအစ်ကိုကြီးဝမ်နဲ့ တွေ့ပြီးမှ ငါတို့ကံကြမ္မာက တကယ်ပဲ ပြောင်းလဲလာသလိုပဲ။ ငါတို့ နေဝင်ချိန်မြို့ကို ဘာအဖြစ်အပျက်မှမရှိဘဲ ခရီးနှင်ခဲ့ကြတယ်။ ပြီးတော့ ဒီနေ့ ဟိုလူတွေကို ကူညီခဲ့တဲ့အခါမှာလည်း ဒုက္ခမရောက်ဘဲ အဲဒီအစား သိုင်းသမားတစ်ယောက်နဲ့ မိတ်ဆွေဖြစ်ခဲ့တယ်"

"ဟုတ်တယ်"

လီဖူချန်က အထပ်ထပ်ခေါင်းညိတ်လိုက်သည်။

"ငါတို့ဒီမှာ အခြေကျပြီး ကိုယ့်နာမည်နဲ့ကိုယ် အတော်အသင့်အောင်မြင်မှုတွေ ရလာတဲ့အခါ ညီအစ်ကိုဝမ်ကို သေသေချာချာကျေးဇူးတင်ဖို့ စိတ်နှလုံးပြန်ဂိုဏ်းကို သေချာပေါက် သွားလည်ရမယ်"

......

"ဟပ်ချိုး"

ကျန်းပေရန်က နောက်ကျောတောင်တန်းများတွင် ဆေးဖော်စပ်နေစဉ် နှာချေလိုက်သည်။

'တကယ်ပဲ ဘာလို့လူတွေက အခုတလော ငါ့နောက်ကွယ်မှာ ငါ့ရုပ်ချောတာကို ပြောနေကြရတာလဲ'

ဒီစိတ်တွင်းမှ သက်ပြင်းချသံနှင့်အတူ ကျန်းပေရန်က ဆေးမီးဖိုအောက်မှ ခရမ်းပြာရောင်မီးတောက်များကို ဆက်လက်ထိန်းချုပ်နေသည်။

ဒီနေ့ သူ၏ "နေ့စဉ်တောင်ကို ပတ်လျောက်ခြင်း" အတွင်း သူက [ဆေးဖော်စပ်ခြင်း]+၁ ဆိုသော သတိပေးချက်ကို ငါးကြိမ်ဆက်တိုက် ကြုံတွေ့ခဲ့ရပြီး ရုတ်တရက် ဉာဏ်အလင်းရသွားခဲ့သည်။

သူက နီလာနှလုံးခန်းမနောက်မှ ဒီ "လျှို့ဝှက်အခြေစိုက်စခန်း" သို့ ချက်ချင်းပြေးလာခဲ့သည်။

ပုံသွင်းပြီးသားမီးတောက်များကို တည်ငြိမ်အောင်လုပ်ရင်း ကျန်းပေရန်က သူ၏သိုလှောင်လက်စွပ်ထဲမှ ပစ္စည်းအမျိုးမျိုးကို ထုတ်ယူပြီး မီးဖိုထဲသို့ ပစ်ထည့်လိုက်သည်။

သူမိုးလင်းသည်အထိ ဆက်လက်ဖော်စပ်နေခဲ့သည်။

ဖိုထဲမှ ထွက်ပေါ်လာသော ဆေးပင်ရနံ့ကို ရှူရှိုက်ရင်း ကျန်းပေရန်က ကျေနပ်စွာ ခေါင်းညိတ်လိုက်သည်။

"ဒေါင်" "ဒေါင်" "ဒေါင်"

ရုတ်တရက် နက်ရှိုင်းသော ခေါင်းလောင်းထိုးသံများက စိတ်နှလုံးပြန်ဂိုဏ်း၏ တောင်ထွတ်အားလုံးကို ဖြတ်သန်းပြီး ပဲ့တင်ထပ်သွားသည်။

'အင်း စုဝေးခေါင်းလောင်းပဲ၊ ဘာဖြစ်တာလဲ ထားလိုက်ပါတော့ ငါနဲ့မဆိုင်ပါဘူး'

ကျန်းပေရန်က တံခါးပိတ်ကျင့်ကြံခြင်းအတွက် လျှောက်ထားပြီးဖြစ်သည်။

ဒီကာလအတွင်း ဂိုဏ်း၏အသက်ရှင်သေဆုံးမှုနှင့် သက်ဆိုင်ခြင်းမရှိလျှင် သူက ဘာကိုမှ ပါဝင်ရန်မလိုအပ်ပေ။

လောလောဆယ်တော့ ဒီ [ပိုးကောင်အဆိပ်ဆေးလုံး] အသုတ်ကို အောင်မြင်စွာ ဖော်စပ်နိုင်ခြင်းမှာ သူ၏အဓိကဦးစားပေးဖြစ်သည်။

......

တစ်ချိန်တည်းမှာပင် ခေါင်းလောင်းထိုးပြီးမကြာမီ စိတ်နှလုံးပြန်ဂိုဏ်းမှ လူငယ်တပည့်အားလုံးမှာ ကြာပန်းတောင်ထွတ်တွင် စုရုံးရောက်ရှိနေကြပြီး စနစ်တကျတန်းစီနေကြသည်။

တပည့်များက သူတို့ကို ဒီနေ့ဘာကြောင့်ခေါ်ယူသည်ကို ထင်ကြေးပေးနေစဉ် သူတို့က အမွှေးတိုင်သခင်ဦးဆောင်သော ပုံရိပ်ငါးခု ကျောက်စင်မြင့်ပေါ်သို့ တက်လာသည်ကို ရုတ်တရက် သတိပြုမိလိုက်ကြသည်။

"ဒါ အစ်ကိုကြီးဝူနဲ့ တခြားသူတွေ ပြန်လာတာပဲ။ ဒီစီစဉ်ပုံကို ကြည့်ရတာ ငါတို့ဂိုဏ်းက ဒီနှစ်မှာ ကောင်းကောင်းစွမ်းဆောင်ခဲ့ပုံပဲ"

"ဘယ်အစ်ကိုကြီးဝူလဲ"

"မင်းအစ်ကိုကြီးဝူကို မသိဘူးလား။ မင်းအသစ်ဖြစ်ရမယ်။ ယမမင်း ဆူး ဝူချင်းစစ်လေ လွန်ခဲ့တဲ့နှစ်နှစ်အတွင်းမှာ..."

"အိုး။ ဒါဆို သူက ဟိုယမမင်း ဆူးကိုး။ ကျွန်တော်သူ့ဂုဏ်သတင်းကို ကြားဖူးပါတယ်။ လွန်ခဲ့တဲ့လအနည်းငယ်က တောင်အောက်ဆင်းတုန်းက ပုံပြောဆရာတွေတောင် သူ့အကြောင်း ပြောနေကြတာ။ သူတို့ပြောတာက သူသေစေချင်တဲ့ဘယ်သူမဆို လူတစ်သောင်းကြားမှာ ပုန်းနေရင်တောင် မလွတ်နိုင်ဘူးတဲ့။ ဘာလို့လဲဆိုတော့ သူတို့နာမည်ကို ယမမင်းကိုယ်တိုင်က မှတ်တမ်းတင်ပြီးသားဖြစ်နေလို့တဲ့"

"အနည်းဆုံးတော့ မင်းတစ်ခုခုသိသားပဲ"

"အစ်ကိုကြီး အစ်ကိုကြီးဝူဘေးမှာ ရပ်နေတဲ့ အစ်မကြီးက ဘယ်သူလဲဆိုတာ သိလား"

အစ်ကိုကြီးက သူ့ခေါင်းနောက်စေ့ကို ချက်ချင်းရိုက်ချလိုက်သည်။

"အား ဘာလို့ကျွန်တော့်ကို ရိုက်တာလဲ"

"မင်းမျက်လုံးတွေ မင်းမျက်ခွက်ထဲက ကျွတ်ထွက်တော့မလို့ပဲ"

ပတ်ဝန်းကျင်မှ အကြည့်များကို လှမ်းကြည့်ပြီးနောက် သူတီးတိုးပြောလိုက်သည်။

"ဒါပြီးရင် ငါမင်းကို ပိုပြောပြမယ်။ အခုတော့ တိတ်တိတ်နေ"

"ဟုတ်ကဲ့..."

......

တီးတိုးသံများကြားတွင် အမွှေးတိုင်သခင် ဝူချိုးဖန်းက စင်မြင့်ပေါ်သို့ ရှေ့တိုးလာပြီး ကြေညာလိုက်သည်။

"ဒီနှစ်ရဲ့ ဂျေဘီရပ်ကွက် ဂိုဏ်းပေါင်းစုံသိုင်းပြိုင်ပွဲမှာ ငါတို့စိတ်နှလုံးပြန်ဂိုဏ်းက တပည့်ငါးဦးက ထူးထူးချွန်ချွန် စွမ်းဆောင်ပြီး ကောင်းမွန်တဲ့ရလဒ်တွေကို ရရှိခဲ့ကြတယ်။ ကြယ်တာရာရှုပ်ထွေးခန်းမက တပည့်ဝူချင်းစစ်က ပထမနေရာကိုတောင် ရယူနိုင်ခဲ့တယ်"

"ဝိုး"

အောက်မှ တပည့်အားလုံးမှာ အံ့ဩတကြီး မအော်ဟစ်ဘဲမနေနိုင်ခဲ့ပေ။

ဂျေဘီရပ်ကွက် ဂိုဏ်းပေါင်းစုံသိုင်းပြိုင်ပွဲမှာ ဂိုဏ်းကြီးအားလုံးက အလွန်အရေးထားသော နှစ်စဉ်ကျင်းပမြဲ ကြီးကျယ်ခမ်းနားသည့်ပွဲတော်တစ်ခုဖြစ်သည်။ နောက်ဆုံးတော့ ၎င်းမှာ ဂုဏ်သတင်းနှင့်သက်ဆိုင်ပြီး ဂုဏ်သတင်းဆိုသည်မှာ တပည့်သစ်စုဆောင်းရေးကို ဆိုလိုသည်။

ကျန်းပေရန်ပြောသလိုဆိုလျှင် ဒီပြိုင်ပွဲမှာ ဂျေဘီရပ်ကွက်၏ "တော်ဝင်စာမေးပွဲ" ဖြစ်သည်။

မည်သည့်ဂိုဏ်း၏တပည့်က ချန်ပီယံဆုကို ဆွတ်ခူးသည်ဖြစ်စေ ၎င်းမှာ "ပထမကျော်" အဆင့်ကို ရရှိခြင်းနှင့် ညီမျှပြီး ဂိုဏ်းအတွက် အဆုံးမရှိသော အကျိုးကျေးဇူးများကို ယူဆောင်လာသည်။