ပထမဆုံးတိုက်ပွဲသည် အဆုံးအဖြတ်တိုက်ပွဲ

ဝူကျန်းဝမ်၏ တောင်းဆိုမှုကို ကြားသောအခါ လုချန်း ချက်ချင်း ငြင်းပယ်လိုက်သည်။ ဝူကျန်းဝမ်သည် ယခုအခါ ကလေးတစ်ယောက်ကို ကိုယ်ဝန်ဆောင်ထားသည်။ စစ်မြေပြင်တွင် သူမ၏အသက်ကို စွန့်စားရန် မည်သို့မှ ခွင့်မပြုနိုင်ပေ။ စွမ်းအားရှင်များ၏ တိုက်ပွဲများသည် ဘေးနားရှိလူများကို မတော်တဆ အန္တရာယ်ပြုလေ့ရှိသည်။

ဝူကျန်းဝမ်သည် လုချန်းက သူမအား ခွင့်ပြုမည် မဟုတ်ကြောင်း သိသော်လည်း သူမ၏ စိတ်နှလုံးက ပူပန်နေဆဲဖြစ်သည်။ တစ်ဖက်တွင် လုချန်း အန္တရာယ်နှင့် ကြုံတွေ့ရမည်ကို သူမ စိုးရိမ်သည်။ အကယ်၍ လုချန်း အန္တရာယ်ဖြစ်ပါက သူမ သူ့ဘက်မှ ရပ်တည်နိုင်ပြီး ယွဲ့ဧကရာဇ်အား လုချန်း၏အသက်ကို ချမ်းသာပေးရန် တောင်းပန်နိုင်သည်။

အခြားတစ်ဖက်တွင်မူ ယွဲ့ဧကရာဇ် အတွက်လည်း စိုးရိမ်ပြန်သည်။ သူမသာ ထိုနေရာတွင် ရှိနေမည်ဆိုပါက လုချန်းသည် သူမ၏ မျက်နှာကို ထောက်ထားပြီး ယွဲ့ဧကရာဇ်ကို ခက်ခဲသော အခြေအနေမျိုး မပေးလောက်ဟု သူမ ယူဆသည်။

နောက်ထပ် အကြောင်းပြချက်တစ်ခုလည်း ရှိသေးသည်။ သူမသာ ထိုနေရာတွင် ရှိနေပါက ယွဲ့ဧကရာဇ်သည် အသက်ကိုစွန့်၍ တိုက်ခိုက်တော့မည် မဟုတ်ပေ။

ယွဲ့ဧကရာဇ်တွင် ပြင်းထန်သော စိတ်နေသဘောထားရှိပြီး လက်နက်ချခြင်းထက် သေရခြင်းကို ပို၍ ရွေးချယ်နိုင်သည်။ သူမသာ ထိုနေရာတွင် ရှိပါက သူမ၏ ချစ်ရသော သူငယ်ချင်းကို အသက်ရှင်ဖို့ ရွေးချယ်ရန် ဆွဲဆောင်နိုင်လိမ့်မည်ဟု ဝူကျန်းဝမ် ယုံကြည်သည်။

လုချန်းလည်း ဝူကျန်းဝမ်၏ တွေးခေါ်ပုံကို သိသည်။ သို့သော်လည်း ဝူကျန်းဝမ်နှင့် သူမ၏ ဝမ်းဗိုက်တွင်းရှိ ကလေးငယ်၏ ဘေးကင်းရေးအတွက် သူမကို စစ်မြေပြင်သို့ လိုက်ပါခွင့် မပြုနိုင်ပေ။

လုချန်းက သူမကို မလိုက်စေလိုသည်ကို ဝူကျန်းဝမ် ကောင်းကောင်းသိသော်လည်း လုချန်းနှင့် ယွဲ့ဧကရာဇ်အတွက် သူမ ယွဲ့ဧကရာဇ်နှင့် တွေ့ဆုံရန် လိုအပ်သည်ဟု ယူဆသည်။

ထိုအချိန်တွင် မြင်းပေါ်မှ လုချန်းက

“ကျန်းဝမ်။ မင်း ဘာကို စိုးရိမ်နေလဲဆိုတာ ကိုယ် သိတယ်။ ဒါပေမဲ့ စိတ်ချပါ။ ဒီကိစ္စကို ကိုယ် ကိုင်တွယ်ပါ့မယ်။”

“တကယ်လို့ မင်းအရမ်းစိုးရိမ်နေရင် စစ်ပွဲပြီးသွားရင် ယွဲ့ဧကရာဇ်နဲ့ တွေ့ဖို့ ကျူးနိုင်ငံတော်ကို လူလွှတ်ပြီး ခေါ်လိုက်ပါ့မယ်။”

လုချန်း၏ စကားကို ကြားသောအခါ ဝူကျန်းဝမ်က

“နားလည်ပါပြီ။ မင်းကြီး အောင်ပွဲခံပြီး ပြန်လာနိုင်ပါစေ။ မင်းကြီးရဲ့ သတင်းကောင်းကို ရန်ခရိုင်မှာ စောင့်မျှော်နေပါ့မယ်”

ဟုသာ ပြန်ပြောနိုင်တော့သည်။

လုချန်းက ခပ်ဖွဖွ ပြုံးလိုက်ပြီး ချူးယုချင်ဘက်သို့ လှည့်ကာ

“ဒေါ်လေးချူး ကျွန်တော် ထွက်သွားပြီးတဲ့နောက် နန်းတော်ကို ဒေါ်လေးလက်ထဲ စိတ်ချလက်ချ ထားခဲ့ပါတယ်။”

ချူးယုချင်က

“မင်းကြီး စိတ်အေးချမ်းသာစွာ ချီတက်ပါ။ ကျန်းဝမ်နဲ့ ဒေါ်လေး ရန်ခရိုင်ကို ကာကွယ်ပါ့မယ်။”

လုချန်း၏ အကြည့်သည် သူ၏ မိဖုရားများ တစ်ဦးပြီးတစ်ဦးပေါ်သို့ ရောက်ရှိသွားသည်။ ဤတစ်ကြိမ် ကိုယ်တိုင်စစ်ချီပြီးနောက် နောက်ထပ် ဆယ်စုနှစ် တစ်ခုခန့်အတွင်း ယခုလို ထွက်ခွာရန် လိုတော့မည် မဟုတ်ဟု သူ့စိတ်ထဲ ထင်မြင်မိသည်။

နောက်ပိုင်း သူတို့နှင့်အတူ ပျော်ရွှင်သောဘဝကို နေ့တိုင်း ခံစားနိုင်တော့မည် ဖြစ်သည်။ သူ၏ ကြိုးစားမှုများသည် ပိုမိုကောင်းမွန်သော အနာဂတ်ကို ပျော်ရွှင်စွာ ခံစားနိုင်ရန်အတွက်သာ ဖြစ်သည်။

အရာအားလုံး အဆင်ပြေချောမွေ့ပါစေဟု မျှော်လင့်ရင်း လုချန်းလည်း

“ချီတက်ကြ”

ဟု အသံကျယ်ကျယ်ဖြင့် အမိန့်ပေးလိုက်သည်။

သူ၏ စကားသံ ပြတ်သွားသည်နှင့် လုချန်းသည် မြင်းစီး၍ လမ်းမကြီးပေါ်သို့ တည့်တည့်တက်လိုက်သည်။ ရန်ခရိုင်မှ သာမန်ပြည်သူများက မြင်းပေါ်မှ ဧကရာဇ်ကို မြင်သောအခါ ချက်ချင်း ဒူးထောက်လိုက်ကြပြီး

“မင်းကြီး ကျန်းမာပါစေ။ အသက်ရှည်ပါစေ”

ဟု အော်ဟစ်လိုက်ကြသည်။

ထိုအချိန်တွင် တစ်စုံတစ်ဦးက

“မင်းကြီး စစ်အောင်နိုင်ပါစေ”

လူများကလည်း

“မင်းကြီး စစ်အောင်နိုင်ပါစေ”

ဟု လိုက်လံအော်ဟစ်ကြသည်။

ပြည်သူများ၏ အသံများသည် လမ်းမကြီးတစ်ခုလုံး ပဲ့တင်ထပ်သွားတော့သည်။ လုချန်းနောက်မှ လိုက်ပါလာသော စစ်သည်များ၏ သွေးသားများလည်း ဆူပွက်လာတော့သည်။ တစ်မြို့လုံးရှိ လူထုက စစ်ထွက်မည့်သူများကို ဤမျှထူးခြားစွာ လိုက်လံပို့ ဆောင်ခြင်းမှာ ယခင်က တစ်ခါမှ မကြုံဖူး‌သော မြင်ကွင်းဖြစ်သည်။

စစ်သည်အများအပြားအတွက် ထိုကဲ့သို့သော မြင်ကွင်းကို ပထမဆုံးအကြိမ် မြင်ဖူးခြင်း ဖြစ်သည်။ ရန်ခရိုင်မှ ပြည်သူများသည် အနည်းငယ် အော်ဟစ်ပြီး ရပ်မသွားကြပေ။ ၎င်းတို့သည် ဆက်တိုက် အော်ဟစ်နေခဲ့ကြသည်။

လုချန်းတို့ မြို့တံခါးများကို ကျော်လွန်သွားသည့်တိုင် မြို့တစ်ခုလုံးမှ ပြည်သူများ၏ အသံများသည် ရန်ခရိုင် ကောင်းကင်ယံတွင် ပဲ့တင်ထပ်နေဆဲပင်။

ထိုသူများထဲတွင် အချို့မှာ အခြားသူများကို အော်ဟစ်၍ လိုက်လံအော်ဟစ်ခဲ့သော်လည်း ရန်ခရိုင်မှ ပြည်သူအများစုသည် လုချန်းကို ချစ်ခင်ကြပြီး သူ အောင်ပွဲခံ၍ ပြန်လာနိုင်ဖို့ စိတ်ရင်းမှန်ဖြင့် ဆန္ဒရှိကြသည်။

လမ်းတစ်လျှောက်လုံးတွင် လူများ၏ အသံများကို ကြားရသောအခါ လုချန်း၏ စိတ်ထဲတွင် ထူးဆန်းသော ခံစားမှုတစ်ခု ဖြစ်ပေါ်လာသည်။ နက်ရှိုင်းသော တာဝန်သိစိတ်တစ်မျိုးကို သူ့ခံစားနေရခြင်းဖြစ်သည်။ သူသာ ကျူးနိုင်ငံတော်ကို အနိုင်မယူနိုင်ပါက ရန်ခရိုင်၊ မြောက်ပိုင်းပြည်နယ်နှင့် ရှနိုင်ငံတော်တို့မှ သာမန်ပြည်သူများကို စိတ်ပျက်စေလိမ့်မည်ဟု တွေးလိုက်မိသည်။

မကြာမီတွင် လုချန်းသည် မြင်းစီးပြီး ရထားဘူတာရုံသို့ ရောက်ရှိပြီး ကျူးနိုင်ငံတော်နှင့် နယ်နိမိတ်ချင်း ထိစပ်နေသော နယ်စပ်မြို့သို့ ဦးတည်သည့် ရထားပေါ်သို့ တက်လိုက်သည်။

လုချန်းနှင့် သူ၏တပ်မ လှုပ်ရှားမှုများ ပြုလုပ်လာကြောင်း ကျူးနိုင်ငံတော်က သတင်းရသည်နှင့် ယွဲ့ဧကရာဇ်ကလည်း ကျူးတပ်အင်အားများကို ချက်ချင်း ပြန်လည်နေရာချထားခဲ့သည်။ လုချန်း အစောပိုင်းက တွေးခဲ့သကဲ့သို့ ယွဲ့ဧကရာဇ်သည် ထောက်လှမ်းရန်အတွက်ပင် တပ်များစေလွှတ်ရန် အစီအစဉ်မရှိခဲ့ပေ။ ရှနိုင်ငံတော်နှင့် နယ်နိမိတ်ထိစပ်နေသော ဒေသများမှ တပ်ဖွဲ့များအားလုံးကိုပင် ရုပ်သိမ်းခဲ့သည်။

နှစ်ဖက်စလုံးအတွက် ပထမဆုံးတိုက်ပွဲသည် အဆုံးအဖြတ်ပေးသော တိုက်ပွဲဖြစ်၏။ နောက်ဆုံးတိုက်ပွဲပင် ဖြစ်နိုင်သည်။

လုချန်း ရှနိုင်ငံတော် နယ်စပ်မြို့သို့ ရောက်ရှိပြီးနောက် ယွဲ့ဧကရာဇ်က ကျူးတပ်များကို ဆုတ်ခွာစေခဲ့ကြောင်း သတင်းကို ကြားလိုက်ရသည်။ သူ အံ့အားမသင့်ခဲ့သလို တိုက်ခိုက်ရန်လည်း အလျင်စလို မလုပ်ခဲ့ပေ။ သူသည် နဂါးနက် နိုင်ငံကို အချက်ပြလိုက်ပြီဖြစ်သည်။ သူတို့ လှုပ်ရှားနိုင်ပြီဖြစ်ကြောင်း အမိန့်ပေးလိုက်သည်။

လုချန်း၏ အမိန့်ကို ရရှိသောအခါ နဂါးနက်၏ ဘုရင် လျှိုကျိန့်ချူသည် သေချာရွေးချယ်ထားသော လက်‌ရွေးစင် စစ်သား တစ်သိန်းကို ဦးဆောင်ကာ ကျူးနိုင်ငံတော်၏ နယ်စပ်ဘက်သို့ တိုက်ရိုက်ဦးတည်လာသည်။

……….

ကျူးနိုင်ငံတော်။

နန်းတော်။

ညအချိန်။

စာကြည့်ခန်းတွင် ဖယောင်းတိုင်မီးရောင်များဖြင့် လင်းထိန်နေသည်။ ဖယောင်းတိုင်မီးရောင်သည် စာကြည့်ခန်းရှိ အရာရှိတိုင်း၏ ပါးပြင်များပေါ်သို့ ကျရာက်နေသည်။ သူတို့ တစ်ဦးချင်းစီတွင် လေးနက်နေသော အမူအရာများ ရှိနေကြသည်။

အရာရှိများ၏ အလယ်တွင် စားပွဲကြီးတစ်လုံးရှိပြီး ထိုစားပွဲပေါ်တွင် ကမ္ဘာ့မြေပုံကြမ်းတစ်ခု တင်ထားသည်။

ထိုအချိန်တွင် ယွဲ့ဧကရာဇ်သည် စာကြည့်ခန်းရှိ အရာရှိများနှင့် ခပ်လှမ်းလှမ်းရှိ သူမ၏စားပွဲတွင် ထိုင်နေသည်။ သူမက အေးစက်သော လေသံဖြင့်

“ရှနိုင်ငံတော်က သူတို့ရဲ့တပ်တွေကို ချထားလိုက်ပြီ။ ကျွန်မရဲ့ ချစ်ခင်ရတဲ့ အမတ်များ။ ဒီအဆုံးအဖြတ်တိုက်ပွဲအတွက် ဘယ်နေရာကို စစ်မြေပြင်အဖြစ် ရွေးချယ်သင့်တယ်လို့ ထင်ပါသလဲ။”

ကျူးနိုင်ငံတော်နှင့် ရှနိုင်ငံတော်တို့၏ နောက်ဆုံးတိုက်ပွဲကို တိုက်ပွဲကြီး တစ်ခုအဖြစ် မှတ်ယူနိုင်သည်။ ထိုကဲ့သို့သော တိုက်ပွဲကြီးတစ်ခုအတွက် သင့် တော်သော နေရာတစ်ခုကို ရွေးချယ်ရန် လိုအပ်သည်။

ယွဲ့ဧကရာဇ်၏ စကားကိုကြားသောအခါ စာကြည့်ခန်းရှိ အရာရှိများ တစ်ဦးကိုတစ်ဦး ကြည့်လိုက်ကြသည်။

ထိုစဉ် စစ်သားတစ်ဦး၏ အသံက စာကြည့်ခန်းအပြင်ဘက်မှ ရုတ်တရက် ထွက်ပေါ်လာသည်။

“နဂါးနက် နိုင်ငံဘက်က လှုပ်ရှားမှု ရှိပါတယ် အရှင်မ။”

ဤအသံကိုကြားသောအခါ ခန်းမထဲရှိ လူတိုင်း အသက်ရှူရပ်သွားကြတော့သည်။ နဂါးနက် နိုင်ငံက လှုပ်ရှားမှုရှိသည်ဟု ဆိုသည်။ အဘယ်ကြောင့် နဂါးနက် နိုင်ငံက ယခုအချိန်တွင် လှုပ်ရှားလာရသနည်း။

နဂါးနက် နိုင်ငံက အခြေအနေကို အခွင့်ကောင်းယူရန် ကြိုးစားနေတာလား။

မကြာမီ စစ်သားတစ်ဦးသည် စာကြည့်ခန်းသို့ ဝင်ရောက်လာပြီး အနောက်အရပ်မှ အရေးပေါ် စစ်ရေးအစီရင်ခံစာကို သူ၏ခေါင်းပေါ် မြှောက်ကိုင်ထားရင်း ကြမ်းပြင်ပေါ်တွင် ဒူးထောက်လိုက်သည်။

သူမ၏ လက်တစ်ဖက်ကို ဝှေ့ယမ်းလိုက်သည်နှင့် စစ်ရေးအစီရင်ခံစာသည် ယွဲ့ဧကရာဇ်၏ လက်ထဲသို့ တည့်တည့်ပျံသန်းလာသည်။ ထို့နောက် စာလိပ်ကို ဖွင့်ပြီး စစ်ရေးအစီရင်ခံစာပါ အကြောင်းအရာများကို ဖတ်လိုက်သည်။

စစ်ရေးအစီရင်ခံစာပါ အကြောင်းအရာများကို ဖတ်ပြီးနောက် ယွဲ့ဧကရာဇ်၏ လက်ထဲတွင် မီးဘောလုံးတစ်ခု ရုတ်တရက် ပေါ်လာပြီး မျက်တောင်တစ်ခတ်အတွင်း အစီရင်ခံစာကို ပြာကျသွားစေခဲ့သည်။

ထိုအရာကို မြင်သောအခါ စာကြည့်ခန်းရှိ အရာရှိများလည်း အသက်ပင် ပြင်းပြင်းရှူဖို့ မဝံ့ရဲကြတော့ပေ။ ထိုအချိန်တွင် အရာရှိတစ်ဦးက သတ္တိကို စုစည်းကာ

“ အနောက်ဘက်က အခြေအနေကို မေးမြန်းခွင့်ပြုပါ အရှင်မ။”

ပုံမှန်အားဖြင့် ထိုသို့သော အရေးကြီးသည့် စစ်ရေးအစီရင်ခံစာကို ပြန်လည်သုံးသပ်ရန် အရာရှိများနှင့် မျှဝေပေးသင့်သည်။ သို့သော် ယွဲ့ဧကရာဇ်က ၎င်းကို တိုက်ရိုက် မီးရှို့လိုက်သည်။ ထို့ကြောင့် အနောက်ဘက်ရှိ အခြေအနေကို အရာရှိများ မည်သို့သိရှိနိုင်မည်နည်း။

ဟုတ်ပါသည်။ ဤအရာက ယွဲ့ဧကရာဇ် မည်မျှ ဒေါသထွက်နေသည်ကိုလည်း ပြသနေသည်။

ထိုအချိန်တွင် ယွဲ့ဧကရာဇ်က အေးစက်စွာဖြင့်

“နဂါးနက် နိုင်ငံရဲ့ အုပ်စိုးရှင်က လက်ရွေးစင် စစ်သည် တစ်သိန်းကို ကိုယ်တိုင်ဦးဆောင်ပြီး ကျူးနိုင်ငံတော်ရဲ့ နယ်မြေကို ကျူးကျော်ဝင်ရောက်လာတယ်။ သူတို့ဟာ ရှနိုင်ငံတော်နဲ့ ပူးပေါင်းဆောင်ရွက်မှု တစ်ခုခု ရရှိပြီးသား ဖြစ်ပုံရတယ်။”

ယွဲ့ဧကရာဇ်သည် လူအ သို့မဟုတ် မိုက်မဲသူ မဟုတ်ပေ။ ယခင်က သတိမထားမိခဲ့သော်လည်း ဤတစ်ကြိမ်တွင်မူ နဂါးနက်နိုင်ငံသည် ရှနိုင်ငံတော်နှင့် တစ်ချိန်တည်းလှုပ်ရှားခဲ့သည်။ ထို့ကြောင့် ယခင်ဖြစ်ရပ်များ၏ အသေးစိတ် အချက်များကိုလည်း ယွဲ့ဧကရာဇ် တွေးမိလာသည်။

အတိတ်က ကျူးနိုင်ငံတော်က ရှနိုင်ငံတော်ကို ဒုက္ခပေးရန် ရည်ရွယ်တိုင်း နဂါးနက် နိုင်ငံသည် ကျူးနိုင်ငံတော်အပေါ် ဖိအားပေးရန် ပေါ်ထွက်လာလေ့ရှိသည်။ ယခင်က နဂါးနက် နိုင်ငံအခွင့်အရေးယူလိုသည်ဟု သူတို့တွေးခဲ့ကြသည်။

ဤတစ်ကြိမ်နှင့် ပတ်သက်၍လည်း ကျူးနိုင်ငံတော်ရှိ လူအများအပြားကတော့

နဂါးနက် နိုင်ငံသည် မငြိမ်မသက်မှုများကို အခွင့်ကောင်းယူရန် ကြိုးစားနေသည်ဟု တွေးခဲ့ကြသည်။

သို့သော် သေချာစဉ်းစားကြည့်ပါက

နဂါးနက် နိုင်ငံသည် အခြေအနေကို အမှန်တကယ် အခွင့်ကောင်းယူလိုပါက ယခင် အကြိမ်များ ကတည်းက တက်တက်ကြွကြွ လှုပ်ရှားခဲ့မည်ဖြစ်သည်။ သို့သော် ဤတစ်ကြိမ်တွင်မှ နဂါးနက် နိုင်ငံမှ စွမ်းအားရှင်တစ်ဦးပင် လှုပ်ရှားမှုထဲ ပါဝင်လာသည်။

ယင်းက နဂါးနက် နိုင်ငံနှင့် ရှနိုင်ငံတော်ကြား ဆက်ဆံရေးတစ်ခု ရှိနေကြောင်း ရှင်းလင်းစွာ ဖော်ပြနေသည်။ ထိုဆက်ဆံရေး၏ အသေးစိတ်အချက်အလက်များကို မသိရသော်လည်း နဂါးနက် နိုင်ငံ ရှနိုင်ငံတော်ဘက်မှ ရပ်တည်နေသည် ဆိုတာက ငြင်းမရပေ။

………………..