လက်သီးတစ်ချက်၏ စွမ်းအား၊ အထွတ်အထိပ် ကောင်းကင်ဥမင်သိုင်း နည်းစနစ်_၃...

~သူ့အတွက် စမ်းသပ်ကြည့်ဖို့ လုံလောက်နေပြီဖြစ်သည်။

နောက်ထပ် ဆုလာဘ်တစ်ခုကို အသုံးပြုပြီးနောက်၊ လုရီသည် သူ၏စိတ်ထဲတွင် ကောင်းကင်ဥမင်သိုင်းနှင့် ပတ်သက်သော ကြီးမားကျယ်ပြန့်သည့် ဉာဏ်အလင်းများ ပေါ်ပေါက်လာသည်ကို ရုတ်တရက် ခံစားလိုက်ရလေ၏။

သူသည် ထိုဉာဏ်အလင်းများကို အလွန်လျင်မြန်သောနှုန်းဖြင့် စုပ်ယူလိုက်ရာ သူ၏နားလည်နိုင်စွမ်းအရှိန်သည် ယခင်ကထက် နှစ်ဆကျော် ပိုမိုမြန်ဆန်လာသည်ကို လုရီ တွေ့ရှိလိုက်ရသည်။

ယင်းက အမှန်ပင်။

လုရီ၏ မျက်လုံးများ အရောင်တောက်သွားတော့၏။ အစွမ်း အာနိသင်များကို ထပ်ဆင့်နိုင်ပါပေသည်။

လုရီသည် ဆက်လက်၍ နားလည်သဘောပေါက်အောင် ကြိုးစားလေ၏။

လေးလကြာပြီးနောက်၊သူသည် ဉာဏ်အလင်းအားလုံးကို စုပ်ယူနိုင်ခဲ့ပြီး သူ၏ ကောင်းကင်ဥမင်သိုင်းသည် အဆင့် ၅ သို့ တိုးတက်သွားခဲ့သည်။

လုရီသည် ထိုမျှဖြင့်မရပ်တန့်ဘဲ အင်မော်တယ်သိုင်းကျမ်းတစ်မျိုးလျှင် အဆင့် +၄ ပေါင်းထည့်ပေးနိုင်သည့် ကျန်ဆုလာဘ်နှစ်ခုကိုပါ အသုံးပြုရန် ဆုံးဖြတ်လိုက်တော့သည်။

ဤတစ်ကြိမ်တွင်မူ ဉာဏ်အလင်းများကို စုပ်ယူရန် သူ့အတွက် အချိန်ခြောက်လကြာမြင့်ခဲ့ပြီး ကောင်းကင်ဥမင်သိုင်းကို အဆင့် ၉ သို့ မြှင့်တင်နိုင်ခဲ့လေသည်။

အထွတ်အထိပ်အဆင့်သို့ ရောက်ရန် တစ်ဆင့်သာ လိုတော့သည့်အခါ၊ လုရီသည် သူ့ထံတွင် အင်မော်တယ်သိုင်းကျမ်းတစ်မျိုးလျှင် အဆင့် +၃ ပေါင်းထည့်ပေးနိုင်သော ဆုလာဘ်နှစ်ခု ကျန်ရှိနေသေးသည်ကို စစ်ဆေးတွေ့ရှိလိုက်ရသည်။

သူသည် ခဏမျှ တုံ့ဆိုင်းသွားခဲ့သော်လည်း နောက်ဆုံးတွင်တော့ ၎င်းတို့ကို အသုံးပြုရန် ရွေးချယ်လိုက်လေ၏။

မည်သို့ပင်ဆိုစေကာမူ အဆင့် ၉ အင်မော်တယ်သိုင်းနည်းစနစ်နှင့် အထွတ်အထိပ်အဆင့် အင်မော်တယ်သိုင်းနည်းစနစ်ကြားက ကွာခြားချက်မှာ အလွန်ကြီးမားလှသည်။ ကျိုယိုစစ်မြေပြင်သည် အန္တရာယ်များလှပြီး မိမိအသက်ကို ထိန်းသိမ်းရေးက အရေးကြီးဆုံးပင် ဖြစ်ပေသည်။

ဆုလာဘ်များကား နောင်တစ်ချိန်တွင် ထပ်မံရရှိလာဦးမည်သာ။ ယခုအရေးကြီးသည်မှာ ကောင်းကင်ဥမင်သိုင်းကို အထွတ်အထိပ်အဆင့်သို့ မြှင့်တင်ရန်ဖြစ်လေသည်။

သုံးလအကြာတွင် လုရီသည် နောက်ဆုံးအဆင့်မြှင့်တင်မှုကို အပြီးသတ်နိုင်ခဲ့ပြီး ကောင်းကင်ဥမင်သိုင်းအပေါ် သူ၏နားလည်နိုင်စွမ်းသည် အထွတ်အထိပ်အဆင့်သို့ ရောက်ရှိသွားခဲ့တော့သည်။

ကောင်းကင်ဥမင်သိုင်းက အထွတ်အထိပ်အဆင့်သို့ ရောက်ရှိသွားသည်နှင့်အမျှ၊ လုရီသည် နေရာလပ်မျှင်များနှင့် ပိုမိုလွယ်ကူစွာ ပေါင်းစည်းနိုင်စွမ်းရှိလာသည်ကို တွေ့ရှိလိုက်ရ၏။

အမှန်တကယ်တွင် သူဆန္ဒရှိပါက နေရာလပ်မျှင်များ၏ ဖွဲ့စည်းပုံကို အချိန်မရွေး ပြောင်းလဲနိုင်ပြီး၊ နေရာလပ်ဝင်္ကပါတစ်ခုကိုပင် ဖန်တီးကာ သိုးမွှေးဘောလုံးတစ်လုံးလို ရှုပ်ထွေးအောင် ချည်နှောင်၍ မည်သည့်ကျင့်ကြံသူကိုမျှ လွတ်မြောက်နိုင်ခြင်းမရှိအောင် တားဆီးနိုင်စွမ်းရှိလေသည်။

ထို့အပြင် ကောင်းကင်ဥမင်သိုင်းကို အသုံးပြုသည့်အခါ အင်မော်တယ်ဝိညာဉ်စွမ်းအင် သုံးစွဲမှုမှာလည်း သဘာဝအတိုင်း များစွာ လျော့ကျသွားခဲ့လေ၏။ လုရီသည် တိကျသောအစွမ်းအာနိသင်များကို နောက်မှ စမ်းသပ်ကြည့်ရန် စီစဉ်လိုက်သည်။ မူလက ကျန်ရှိနေသော နိယာမအဆင့်မြှင့်တင်ခြင်း ဆုလာဘ်နှစ်ခုကိုပါ အသုံးပြုရန် စီစဉ်ထားခဲ့သည်။ သို့သော် မမျှော်လင့်ဘဲ ယွင်ရှီးနှင့် သုန်းကုန်းမင်ယွဲ့တို့ထံမှ ပြင်းထန်သော အရှိန်အဝါလှိုင်းများက သူ့ထံသို့ ရောက်ရှိလာခဲ့လေ၏။

ထင်ရှားစွာပင်၊ သူမတို့နှစ်ဦးသည်လည်း တက်လှမ်းခြင်းအဆင့်ကို စတင်နေကြပြီ ဖြစ်သည်။ သူမတို့နှစ်ဦးသည် ကောင်းကင်သို့ ပျံတက်သွားကာ အလင်းတန်းများအဖြစ် ပြောင်းလဲသွားပြီး၊ သူမတို့၏ မူလနေရာမှ ပျောက်ကွယ်သွားလေသည်။

ကောင်းကင်ကပ်ဘေးများ စုဝေးရာ ကျောက်စိမ်းကြယ်တာရာအထက်သို့ ရောက်ရှိသွားကြရာ၊ ယွီမိသားစုမှ တပည့်များစွာကို ကြည့်ရှုရန် ဆွဲဆောင်လိုက်သကဲ့သို့ ဖြစ်သွားတော့သည်။

နုပျိုပြီး အလွန်အမင်းလှပသော အမျိုးသမီးကျင့်ကြံသူနှစ်ဦးကို မြင်တွေ့ရသောအခါ၊ ယွီမိသားစုတပည့်များအားလုံးမှာ ဤနှစ်ဦးသည် မည်သူမည်ဝါဖြစ်သည်ကို နားမလည်နိုင်ဘဲ အနည်းငယ် အံ့အားသင့်သွားကြ၏။ သို့သော်လည်း အကြောင်းသိသူများက သူတို့သည် လုရီ၏ တာအို လက်တွဲဖော်များ ဖြစ်ကြောင်း မကြာမီပင် ရှင်းပြလိုက်ကြသည်။

ယွီမိသားစု တပည့်များသည် ယွင်ရှီးနှင့် သုန်းကုန်းမင်ယွဲ့တို့ကို အံ့အားတကြီးဖြင့် ကြည့်လိုက်ကြ၏။

လုရီသည် ယခင်က ယွီယွမ်ဝူကို လက်သီးတစ်ချက်တည်းဖြင့် အနိုင်ယူခဲ့ကြောင်း သူတို့ သိထားကြသည်။ ထိုသတင်းစကားသည် ယွီမိသားစုတစ်ခုလုံးသို့ ပျံ့နှံ့သွားခဲ့ပြီး မိသားစု၏ အဆင့်မြင့်အကြီးအကဲများပင် လုရီ၏ ထူးခြားလှသော ပါရမီကို အံ့ဩလေးစားခဲ့ကြရသည်။

ယွီမိသားစု၏ မျိုးဆက်သစ်များမှာမူ လုရီ၏ ဂုဏ်သတင်းကို သဘာဝအတိုင်း ကြားဖူးကြပြီးသား ဖြစ်ပေသည်။

ဤအမျိုးသမီးနှစ်ဦးသည် လုရီ၏ တာအို လက်တွဲဖော်များ ဖြစ်လိမ့်မည်ဟု သူတို့ မမျှော်လင့်ထားခဲ့ကြပေ။

“တကယ့်ကို ငါတို့ရဲ့ မရီးလောင်း ဖြစ်ဖို့ ထိုက်တန်တာပဲဗျာ၊ အရမ်းတော်ကြတာပဲ။ နှစ်ယောက်လုံးက အင်မော်တယ်ခန္ဓာကိုယ်တွေ ဟုတ်တယ်မလား။ ပြီးတော့ သူတို့ရဲ့ အခြေခံအုတ်မြစ်ကလည်း အရမ်းခိုင်မာတာပဲ။ ကောင်းကင်ကပ်ဘေးကို ကြည့်ရတာ တော်တော်လေး အားမနည်းဘူး ထင်တယ်၊” ဟု လုရီ၏ဘေးတွင်ရပ်နေသော ယွီယွမ်ဝူက မရပ်မနား စကားပြောနေလေသည်။

အနီးအနားတွင် လင်းလောင်တောင်ထိပ် သခင်မလည်း ရှိနေ၏။

ထိုအခိုက်အတန့်တွင် လင်းလောင်တောင်ထိပ် သခင်မ၏ မျက်နှာမှာ အလွန်တည်တင်းနေလေသည်။

သူမသည် လုရီကို သွားကြိတ်မတတ် အကြည့်ဖြင့် တစ်ချက်ကြည့်ကာ စိတ်ချင်းဆက်သွယ်၍ ပြောလိုက်သည်။

“နင်… လူလည်လေး၊ ငါ့အဘိုးကြီးကို ကွယ်ရာမှာ သွားပြောထားသေးတယ် ဟုတ်လား။”

လုရီမှာမူ နားမလည်နိုင်သော အမူအရာဖြင့် ပြန်ဖြေလိုက်၏။

“မပြောပါဘူး။ ဘာဖြစ်လို့လဲ ဆရာ”

လင်းလောင်တောင်ထိပ် သခင်မမှာ ဒေါသထွက်လွန်း၍ စကားပင် မပြောနိုင် ဖြစ်သွားပြီး စိတ်ချင်းဆက်သွယ်၍ ပြောလေသည်။

“အဲ့ဒီအဘိုးကြီးက ငါ့ကို နင့်ရဲ့ တာအိုလက်တွဲဖော်လုပ်ဖို့ နေ့တိုင်းနီးပါး လာပြီး ပူညံပူညံလုပ်နေတယ်လေ။ ငါရူးတော့မှာပဲ၊ ငါက နင့်ဆရာဟဲ့။”

လုရီ: “???”

သူ့စိတ်ထဲတွင် မေးခွန်းအမှတ်အသားများ ပြည့်နှက်သွားတော့သည်။

ဤအကြောင်းကို သူ တကယ်မသိခဲ့ပေ။

လုရီမှာ မိမိကိုယ်ကို လုံးဝအပြစ်မရှိဟု ခံစားနေရသည်။

ခဏမျှ စဉ်းစားပြီးနောက် လုရီက ပြန်ပြောလိုက်၏။

“ဆရာ လက်မထပ်နိုင်မှာကို စိတ်ပူနေလို့များလား ခင်ဗျာ။”

လင်းလောင်တောင်ထိပ် သခင်မ: “???”

သူမသည် လုရီကို မျက်စောင်းတစ်ချက်ထိုးလိုက်ပြီး ပြောလာသည်။

“ဒါတွေ အားလုံး နင် အစွမ်းပြလွန်းလို့ဖြစ်ရတာ။ ယွမ်ဝူနဲ့ သိုင်းပညာဖလှယ်တုန်းက ဘာလို့ အားနည်းချင်ယောင် မဆောင်ခဲ့တာလဲ။ နင်ကိုယ်တိုင် မပြောခဲ့ရင်တောင် အဲ့ဒီသိုင်းပညာဖလှယ်မှုကြောင့်ဆိုတာ သေချာတယ်။”

ထိုနေ့မှစ၍ သူမ၏ အဖေက အိမ်ထောင်ရေးနှင့်ပတ်သက်ပြီး ပို၍ပင် မကြာခဏ ပူညံပူညံလုပ်လာသည်ကို လင်းလောင်တောင်ထိပ် သခင်မ ပြန်သတိရသွားသည်။

လုရီမှာ စကားဆွံ့အသွားပြီး စိတ်ချင်းဆက်သွယ်၍ ပြန်ပြောလိုက်သည်။

“ကျွန်တော် အရင်ကတည်းက တော်တော်လေး အားလျှော့ပြီး ပြခဲ့တာပါ ခင်ဗျာ။”

မည်သို့ပင်ဆိုစေကာမူ ယခင်တိုက်ပွဲတွင် သူသည် သူ၏ လျှို့ဝှက်ချက်တစ်ခုကိုမျှ မသုံးခဲ့သလို၊ အင်မော်တယ်တက်လှမ်းခြင်းသိုင်းကိုပင် အသုံးမပြုခဲ့ဘူး‌လေ။

လင်းလောင်တောင်ထိပ် သခင်မ: “…”

ထိုနေရာတွင် တစ်ခဏမျှ တိတ်ဆိတ်ငြိမ်သက်သွားလေတော့သည်။