လူသာမန်ဘဝဖြတ်ကျော်အဆင့်ကို စိန်ခေါ်ခြင်း
Vol. 3 Ch. 32
လင်ချန်လန်သည် ထုံရွှမ်တတိယနယ်ပယ်အဆင့်ရှိ သိုင်းပညာရှင်တစ်ဦး ဖြစ်သည်။ သူလက်တစ်ချက်လှုပ်လိုက်သည်နှင့် ကွင်းပြင်တစ်ခုလုံး လေပြင်းများ တိုက်ခတ်လျက် မငြိမ်မသက် ဖြစ်သွားသည်။
လှည်းခင်းအရွယ်ရှိ အပြာရောင်လက်ဖဝါးရာတစ်ခုသည် လေထဲတွင် ပေါ်ထွက်လာကာ လော့ချန်ကို ဖိနှိပ်လိုက်သည်။ ထိုလှုပ်ရှားမှုမှ ဖြစ်ပေါ်လာသော လေပြင်းလှိုင်းများက လော့ချန်ကို အနောက်သို့ ဆက်လက် ဆုတ်ခွာစေသည်။
အန္တရာယ်ကျရောက်လာချိန်တွင် ရုတ်တရက် အရိပ်တစ်ခုပေါ်ထွက်လာပြီး လော့မင်ရှန်သည် လော့ချန်ရှေ့တွင် ရောက်ရှိလာသည်။
လော့မင်ရှန်၏နောက်တွင် ကျောက်ကျားသစ်တစ်ကောင် ပေါ်ထွက်လာပြီး လက်သီးတစ်ချက်ဖြင့် အပြာရောင်လက်ဖဝါးရာကို လော့မင်ရှန်က ဖျက်ဆီးပစ်လိုက်သည်။
“လင်မိသားစု မင်းတို့ လူကိုအလွန်အမင်း မနှိပ်စက်နဲ့... ငါတို့လော့မိသားစုမှာ ဘယ်သူမှ မရှိဘူးလို့ ထင်နေလား…”
လင်ချန်လန်သည် အနောက်သို့ ခြေလှမ်းအနည်းငယ် ဆုတ်ခွာသွားပြီး အံ့အားသင့်စွာဖြင့် လော့မင်ရှန်ကိုကြည့်ကာ ဆိုသည်။ “ထုံရွှမ်တတိယနယ်ပယ်အထွတ်အထိပ်... မင်းကို ကျိမိသားစု သိုင်းပညာရှင်တစ်ဦးက ဒဏ်ရာပြင်းထန်အောင်ထိခိုက်စေခဲ့တာ မဟုတ်ဘူးလား…”
လင်ချန်လန်၏ အံ့အားသင့်မှုမှာ မထူးဆန်းချေ။ သူသည် လော့မင်ရှန်အား ကျိမိသားစု၏ သိုင်းပညာရှင်တစ်ဦးက ဒဏ်ရာပြင်းထန်စွာ ထိခိုက်စေခဲ့ပြီး စွမ်းအားများ ဆုတ်ယုတ်သွားသည်ဟု ကြိုတင် သိရှိထားခဲ့သည်။ ထို့ကြောင့်ပင် ချီမိသားစုနှင့် ပူးပေါင်းကာ အမဲလိုက်ပြိုင်ပွဲကို စောစီးစွာ ကျင်းပပြီး လော့မိသားစုကို တဖြည်းဖြည်း ချေမှုန်းရန် ကြံစည်ခဲ့သည်။
ယခုမူ လော့မင်ရှန်သည် သွေးစွမ်းအင်ပြည့်ဝလျက် ရှိရုံသာမက စွမ်းအားမှာလည်း ထုံရွှမ်တတိယနယ်ပယ်အထွတ်အထိပ်သို့ တက်လှမ်းနိုင်ခဲ့ပြီ ဖြစ်သည်။
လော့မင်ရှန်က အေးစက်စွာ သည်းညူလိုက်ပြီး ဆို၏။
“ဒီကိစ္စက မင်းနဲ့မဆိုင်ဘူး... ဒီလောက်လူအများရှေ့မှာ မင်းက လူငယ်တစ်ယောက်ကို အလွတ်မဲ့တိုက်ခိုက်ဖို့ ကြိုးစားနေတာ… မင်းတို့ လင်မိသားစုက ဒီလောက်ရှက်မရှိတာလား…”
လင်ချန်လန်သည် ဒေါသထွက်လွန်းသဖြင့် အနည်းငယ် ဆင်ခြင်တုံတရား ပျောက်ဆုံးသွားပြီး ဟောက်သံပြုကာ ဆိုသည်။
“လင်ယွမ်က ခန္ဓာသန့်စင်မှုအဆင့်ကိုး ရောက်ရှိထားပြီး ကြယ်သုံးပွင့်သိုင်းပညာ လှိုင်းခွဲလက်ဖဝါးကို ကြီးကျယ်တဲ့အောင်မြင်မှုအဆင့်ထိ လေ့ကျင့်ပြီးပြီ... လူသာမန်ဘဝဖြတ်ကျော်အဆင့်မရောက်ရင် သူ့ကို အနိုင်ယူဖို့ မဖြစ်နိုင်ဘူး... လက်သီးတစ်ချက်နဲ့ အနိုင်ယူတယ်ဆိုတာ ပိုလို့တောင်မဖြစ်နိုင်ဘူး...”
လော့မင်ရှန်က တည်ငြိမ်စွာ အကြည့်တစ်ချက်ပေးလိုက်ပြီး ဆိုသည်။
“လူတိုင်းသိထားတဲ့အတိုင်း လူသာမန်ဘဝဖြတ်ကျော်အဆင့်တစ်ထပ်ကို ရောက်ရှိသူဟာ ခန္ဓာကိုယ်ထဲမှာ စွမ်းအင်အိမ်တော်တစ်ခုကို ဖြစ်ပေါ်စေပြီး စွမ်းအင်ဟာ ခန္ဓာပေါ်မှာ ပြည့်လျှံလာတယ်... တိုက်ပွဲမှာ စွမ်းအင်လှိုင်းကို ခံစားမိမှာ သေချာတယ်... မင်းက လော့ချန်ဆီက စွမ်းအင်လှိုင်းတစ်ခုခုကို ခံစားမိခဲ့လို့လား…”
“ဒါ…”
လင်ချန်လန်သည် စကားတစ်ခွန်းမှ မပြောနိုင်သဖြင့် ဒေါသထွက်လျက် ဆိုသည်။
“ဒါဆို သူရဲ့ အစွမ်းအစက ဘာကြောင့်လဲ…”
လော့မင်ရှန်က မထီမဲ့မြင်ပြုဟန်ဖြင့် ဆိုသည်။
“မင်းက ထုံရွှမ်တတိယနယ်ပယ်သိုင်းပညာရှင်ဖြစ်နေတာတောင် အထွတ်အထိပ်အဆင့်အကြောင်း မကြားဖူးဘူးလား…”
“အထွတ်အထိပ်အဆင့်...”
ထိုစကား ထွက်လာသည်နှင့် ကွင်းပြင်တစ်ခုလုံး ဆူညံပွက်လောရိုက်သွားသည်။
လူအားလုံး၏ အကြည့်များက လော့ချန်ထံသို့ စုစည်းရောက်ရှိသွားပြီး မယုံကြည်နိုင်သော အမူအရာများဖြင့် ပြည့်နှက်နေသည်။
လင်ချန်လန်သည် ခဏတာ အံ့အားသင့်သွားပြီး ချက်ချင်းပင် ဟောက်သံပြုကာ ဆို၏။
“မဖြစ်နိုင်ဘူး... လင်ယွမ်က ကြယ်ခြောက်ပွင့်သိုင်းဝိညာဉ်နိုးကြားထားပြီး လွန်ခဲ့တဲ့ ခြောက်လကတည်းက ခန္ဓာသန့်စင်မှုအဆင့်ကိုးကို ဖြတ်ကျော်ခဲ့တယ်... သူ့မှာ ထူးချွန်တဲ့အရည်အချင်းရှိပေမယ့် ခန္ဓာသန့်စင်မှုအထွတ်အထိပ်အဆင့်ရဲ့ အစွမ်းအစကိုတော့ မရောက်ရှိနိုင်သေးတာမှန်တယ်... ဒါပေမဲ့ ဒီအသုံးမကျတဲ့ကောင်က ဘယ်လိုလုပ်ပြီး…”
လင်ချန်လန် တစ်ယောက်တည်း မယုံကြည်နိုင်သည်မဟုတ် ထိုနေရာရှိ လူအများစုလည်း မယုံကြည်နိုင်ကြချေ။
အထွတ်အထိပ်အဆင့်ဆိုသည်မှာ ဘာဖြစ်မည်နည်း။ အဆုံးစွန်သောအဆင့်ပင် ဖြစ်သည်။
အထွတ်အထိပ်အဆင့်သို့ ရောက်ရှိနိုင်သူများက ထူးချွန်သော အရည်အချင်းရှိသူများသာဖြစ်ပြီး သောင်းပေါင်းများစွာထဲမှ တစ်ယောက်သာလျှင် ဖြစ်နိုင်သည့် သိုင်းပညာဉာဏ်ရည်ထူးချွန်သူများ ဖြစ်သည်။
လော့ချန်သည် ကြယ်တစ်ပွင့်မှမရှိသော မပြည့်စုံသောသိုင်းဝိညာဉ်နိုးကြားထားသူ အသုံးမကျသူတစ်ဦး ဖြစ်သည်။
သိုင်းပညာရှင်များ၏ အိပ်မက်ဖြစ်သော အထွတ်အထိပ်အဆင့်သို့ မည်သို့လျှင် ရောက်ရှိနိုင်မည်နည်း။
“အားလုံးပဲ ခဏလောက် စိတ်အေးအေးထားပါ…”
တည်ငြိမ်သော အသံတစ်ခုက စင်မြင့်တစ်ခုလုံးတွင် ပဲ့တင်ထွက်ပေါ်လာသည်။ ယွမ်တော့ကျန်းသည် ထရပ်လိုက်ပြီး လင်ချန်လန်ကို ကြည့်ကာ ကျယ်လောင်စွာ ပြောလိုက်သည်။ “လင်မိသားစုရဲ့ အိမ်တော်သခင် လော့ချန်ဟာ တကယ်ပဲ ခန္ဓာသန့်စင်မှုအထွတ်အထိပ်အဆင့်ကို ရောက်ရှိခဲ့ပြီ... ဒီကိစ္စကို ကျွန်တော် အာမခံပါတယ်…”
ဤစကားကို ကြားလိုက်ရသဖြင့် လင်ချန်လန်၏ မျက်နှာမှာ သွေးဆုတ်ဖြူဖျော့သွားသည်။
ပရိသတ်ထိုင်ခုံများလည်း ဆူညံပွက်လောရိုက်သွားကြသည်။
“တကယ်ပဲ ခန္ဓာသန့်စင်မှုအထွတ်အထိပ်အဆင့်တဲ့လား...”
“ယွမ်မြို့စားကိုယ်တိုင် အတည်ပြုပြောဆိုတာဆိုတော့ မမှားနိုင်ဘူး...”
“ဒီကောင်က အသုံးမကျသူ မဟုတ်ဘူးလား… ဘယ်လိုလုပ်ပြီး ခန္ဓာသန့်စင်မှုအထွတ်အထိပ်အဆင့်ကို ထိတွေ့နိုင်ရတာလဲ…”
“ဒါ ကျိမိသားစုရဲ့ ဝိညာဉ်ဆေးလုံးတွေကြောင့်ပဲ ဖြစ်ရမယ်... ကျိမိသားစုရဲ့ ဝိညာဉ်ဆေးလုံးတွေက ဒီလောက်ဆန်းကြယ်နေမယ်လို့ မထင်ထားခဲ့ဘူး... အသုံးမကျသူတစ်ယောက်ကိုတောင် သိုင်းပညာဉာဏ်ရည်ထူးချွန်သူအဖြစ် ပြောင်းလဲပေးနိုင်တယ်တဲ့... ဒီဆေးလုံးကို ငါရခဲ့မယ်ဆိုရင် ငါလည်း ခန္ဓာသန့်စင်မှုအထွတ်အထိပ်အဆင့်ကို အလွယ်တကူ ရောက်နိုင်မှာပဲ...”
လူအချို့က အံ့အားသင့်ကြသည်။ အချို့က သက်ပြင်းချကြသည်။ သို့သော် အများစုမှာ မနာလိုဖြစ်နေကြသည်။
လူတိုင်းသိထားသည်မှာ လော့ချန်က ကြယ်တစ်ပွင့်မှမရှိသော မပြည့်စုံသောသိုင်းဝိညာဉ်နိုးကြားထားသူ၊ အသုံးမကျသူတစ်ဦး ဖြစ်သည်။
ယခုမူ ထိုအသုံးမကျသူသည် သူတို့၏ခေါင်းပေါ်သို့ ရုတ်တရက် တက်လှမ်းလာခဲ့သည်။ မည်သို့ မနာလို မဖြစ်ဘဲ ရှိနိုင်မည်နည်း။
“ခန္ဓာသန့်စင်မှုအထွတ်အထိပ်အဆင့် ဒါကြောင့်ပဲ မန်လီ… မင်းက ဒါကို သိပြီးသားမဟုတ်လား…”
အဋ္ဌမမင်းသား ကျင်းမင်သည် မျက်လုံးများတွင် အေးစက်သော အရိပ်အယောင်များဖြင့် ယွမ်မန်လီကို လှည့်ကြည့်လိုက်သည်။
ယွမ်မန်လီ၏ အကြည့်များသည် ရေကဲ့သို့ တည်ငြိမ်အေးဆေးလျက် ဖြည်းညင်းစွာ ဆိုလိုက်၏။ “ငါမင်းကို သတိပေးခဲ့ပြီးသားပဲ…”
ကျင်းမင်က အေးစက်စွာ ဟည်းညံလိုက်ပြီး ဆိုသည်။ “ခန္ဓာသန့်စင်မှုအထွတ်အထိပ်အဆင့်ဆိုလည်း ဘာဖြစ်လဲ... သူက ဒီတိုက်ပွဲမှာ သေချာပေါက် ရှုံးမှာပဲ...”
ကျင်းမင်၏စကားသံမဆုံးမီ…
ဒေါသတကြီး အော်ဟစ်သံတစ်ခုက စင်မြင့်တစ်ခုလုံးတွင် ပဲ့တင်ထွက်ပေါ်လာသည်။
လူအားလုံး၏ အကြည့်များက ထိုအသံဘက်သို့ လှည့်သွားကြပြီး မျက်လုံးများ ပြူးကျယ်သွားကြသည်။
ကွင်းပြင်အလယ်တွင် လော့ချန်၏ လက်သီးတစ်ချက်ဖြင့် လက်တစ်ဖက် ပျက်စီးသွားသော လင်ယွမ်သည် ထပ်မံထရပ်လာသည်။
လင်ယွမ်၏ သွေးကြောများက အရေပြားအောက်တွင် တစ်ချောင်းပြီးတစ်ကြောင်း ပေါ်ထွက်လာကာ ခန္ဓာကိုယ်တစ်ခုလုံးကို ဖုံးလွှမ်းသွားသည်။ နောက်ဆုံးတွင် သူ၏မျက်လုံးများထဲတွင်လည်း ထူထဲသော သွေးကြောများ ပြည့်နှက်လာပြီး ခန္ဓာကိုယ်တစ်ခုလုံးမှာ မှုန်ရီဝေဝေသော သွေးစွမ်းအင်ဖြင့် ဖုံးလွှမ်းလျက် ရူးသွပ်သောအရိပ်အယောင်များ ပြည့်နှက်နေသည်။
“စွမ်းအင်လှိုင်း လူသာမန်ဘဝဖြတ်ကျော်အဆင့်...”
“လင်ယွမ်က လူသာမန်ဘဝဖြတ်ကျော်အဆင့်ကို ဖြတ်ကျော်နိုင်ခဲ့ပြီ...”
“မဟုတ်ဘူး… လင်ယွမ်ရဲ့စွမ်းအင်လှိုင်းက မငြိမ်မသက်ဖြစ်နေတယ်… သူကိုယ်တိုင် ဖြတ်ကျော်နိုင်ခဲ့တာမဟုတ်ဘူး... ပြင်ပအရာတစ်ခုကို အားကိုးပြီး အတင်းလုပ်ကြံဖန်တီးထားတာပဲ...”
ပရိသတ်ထိုင်ခုံများထဲတွင် မျက်စိထက်မြက်သူများလည်း ရှိနေသဖြင့် တစ်ချက်ကြည့်ရုံဖြင့် အခြေအနေကို သိရှိသွားကြသည်။
“ပေါက်ကွဲသွေးဆေးလုံး...”
ယွမ်မန်လီက ကျင်းမင်ကို အနက်ရှိုင်းစွာ တစ်ချက်ကြည့်လိုက်သည်။
ကျင်းမင်က မျက်နှာမပြောင်းလဲသော်လည်း စိတ်ထဲတွင်မူ အလွန်ကျေနပ်နေသည်။ နောက်ဆုံး အရန်အစီအစဉ်တစ်ခုကို ထားရှိထားသည်မှာ ကောင်း၏။
"ခန္ဓာသန့်စင်မှုအထွတ်အထိပ်အဆင့်ဆိုလည်း ဘာဖြစ်လဲ... ဘယ်လိုပဲဖြစ်ဖြစ် ရှုံးရမှာပဲ..."
ကွင်းထဲတွင် လင်ချန်လန်က အံ့အားသင့်စွာဖြင့် လင်ယွမ်ကို စူးစိုက်ကြည့်ကာ ဆိုလိုက်သည်။ “လင်ယွမ်… မင်း… မင်း လူသာမန်ဘဝဖြတ်ကျော်အဆင့်ကို ဖြတ်ကျော်နိုင်ခဲ့ပြီလား…”
လင်ယွမ်က ခေါင်းအနည်းငယ် ညိတ်ပြလိုက်ပြီး ဓားသဖွယ်စူးရှသော အကြည့်များဖြင့် လော့ချန်ကို ကြည့်ကာ ဆိုသည်။ “လော့ချန်… ဒူးချိုးပြီး တောင်းပန်လိုက်... လက်နဲ့ခြေထောက်တွေကို ကိုယ့်ဘာသာဖြတ်လိုက်ရင် မင်းကို ငါအသက်ချမ်းသာပေးမယ်…”
“ဒူးချိုးပြီး တောင်းပန်ရမယ်... လက်နဲ့ခြေထောက်တွေကို ကိုယ့်ဘာသာဖြတ်ရမယ်တဲ့လား… မင်းတစ်ယောက်တည်းနဲ့လား…”
လော့ချန်က အေးစက်စွာ ပြုံးလိုက်သည်။
လင်ယွမ်သည် လူသာမန်ဘဝဖြတ်ကျော်အဆင့်သို့ ရောက်ရှိသွားသည်မှာ မမျှော်လင့်ထားသည့်အရာဖြစ်သည်။ သို့သော် ၎င်းကပင် လော့ချန်၏ သွေးသားများကို ဆူပွက်စေသည်။
ယခုအချိန်ထိ သူသည် အမှန်တကယ် အားထုတ်တိုက်ခိုက်ခြင်း မရှိခဲ့ပေ။ ယခုအခါ လင်ယွမ်သည် သူ့အား စိတ်ဝင်စားမှု ဖြစ်ပေါ်စေခဲ့သည်။
“ဟင့်အင်း… လော့ချန်က ထပ်တိုက်မယ်တဲ့လား…”
လော့ချန်၏စကားကို ကြားလိုက်ရသဖြင့် တစ်ဦးတစ်ယောက်က အံ့အားသင့်စွာ အော်ဟစ်လိုက်သည်။
အဖွဲ့အစည်းအသီးသီးမှ လူများသည် အလွန်အံ့အားသင့်ကြပြီး ခေါင်းခါကာ လော့ချန်သည် အလွန်မာန်တက်လွန်းသည် အလွန်မဆင်ခြင်လွန်းသည်ဟု ထင်မြင်ကြသည်။ ဤအခြေအနေအထိရောက်နေပြီးမှ ထပ်မံစိန်ခေါ်ရဲသည်ဟူသည့် အခြေအနေကို လုံးဝမမြင်ဖူးခဲ့ကြချေ။
လော့ယောင်၏ ကျောက်စိမ်းသဖွယ် နီရဲသောနှုတ်ခမ်းများက အနည်းငယ် ကွေးညွတ်လာပြီး ဆိုလိုက်၏။ “စိတ်ဝင်စားစရာပဲ… ဒါက မိုက်မဲတဲ့မာနကြီးမှုလား… ဒါမှမဟုတ်…”
အနီးအနားတွင် ကျင်းမင်က မထီမဲ့မြင်ပြုဟန်ဖြင့် ပြုံးလိုက်ပြီး ဆိုသည်။ “အသက်ရှင်သန်ခြင်းနဲ့ သေဆုံးခြင်းကို မခွဲခြားနိုင်တဲ့အရာပဲ… ခန္ဓာသန့်စင်မှုအထွတ်အထိပ်အဆင့်ကို တက်လှမ်းလိုက်လို့ ဘယ်သူ့မှ အနိုင်မယူနိုင်ဘူးလို့ ထင်နေတာလား…”
ခန္ဓာသန့်စင်မှုအထွတ်အထိပ်အဆင့်သည် ခန္ဓာသန့်စင်မှုအဆင့်တွင် ပြိုင်ဘက်ကင်းသည်မှန်သော်လည်း ယခုအခါ လော့ချန် ရင်ဆိုင်ရမည့်သူမှာ လူသာမန်ဘဝဖြတ်ကျော်အဆင့်ရှိ သိုင်းပညာရှင်တစ်ဦး ဖြစ်သည်။
“ချန်လေး…”
ကွင်းထဲတွင် လော့မင်ရှန်က လော့ချန်အား အရှုံးပေးရန် တိုက်တွန်းလိုက်သည်။ တောင်ဖက်ဈေးကွက်ကို စွန့်လွှတ်ရလျှင်တောင်မှ အရေးမကြီးပေ။
လင်ချန်လန်က စကားဖြတ်ပြောလိုက်ပြီး ကျေနပ်စွာဖြင့် ရယ်မောကာ ဆိုသည်။ “လော့မင်ရှန်… လူငယ်တွေရဲ့တိုက်ပွဲထဲ ဝင်မပါဖို့ ဘယ်သူကပြောခဲ့တာလဲ… ဒီတိုက်ပွဲမှာ အနိုင်အရှုံးမပြတ်သေးဘူး... ငါတို့ ဝင်မပါသင့်ဘူးမဟုတ်လား…”
လော့မင်ရှန်၏ မျက်နှာမှာ အလွန်မသာယာဖြစ်သွားသည်။
လော့ချန်က ဆိုသည်။ “အဘိုး… ဒါ ကျွန်တော့ကို လွှဲပေးလိုက်ပါ... ကျွန်တော့မှာ သတိရှိပါတယ်…”
လော့ချန်၏ ခိုင်မာသော ဆုံးဖြတ်ချက်ကို မြင်လိုက်ရသဖြင့် လော့မင်ရှန်သည် သက်ပြင်းချလိုက်ပြီး ဆိုလိုက်၏။ “အလွန်အကျွံ မဖြစ်နဲ့… မင်းက ငါတို့လော့မိသားစုရဲ့ အရေးအကြီးဆုံး ရတနာပဲ...”
ထို့ကြောင့် မကြာမီ ကွင်းပြင်ထဲတွင် လော့ချန်နှင့် လင်ယွမ်သာ ကျန်ရှိတော့သည်။
“မင်း အသက်ရှင်ဖို့ တစ်ခုတည်း အခွင့်အရေးကို စွန့်လွှတ်လိုက်ပြီ... အခုဆို နောင်တရလို့လည်း မမီတော့ဘူး...”
လင်ယွမ်သည် သွေးနီရဲသော မျက်လုံးများဖြင့် လော့ချန်ကို စူးစိုက်ကြည့်ကာ ရက်စက်ကြမ်းကြုတ်စွာ ဆိုသည်။ ထို့နောက် သူ၏သိုင်းဝိညာဉ်ကို တိုက်ရိုက် ထုတ်လွှတ်လိုက်သည်။
ကင်းမြီးကောက်ကျားတစ်ကောင် ပေါ်ထွက်လာပြီး လင်ယွမ်၏ အရှိန်အဝါသည် နတ်ဆိုးတစ်ကောင်ကဲ့သို့ ဖြစ်လာသည်။
“လှုပ်ရှားစမ်း… ငါ့ရဲ့စွမ်းအားက လူသာမန်ဘဝဖြတ်ကျော်အဆင့်တစ်ထပ်ရှိသူနဲ့ ဘယ်လိုနှိုင်းယှဉ်မလဲဆိုတာ ငါလည်းသိချင်တယ်…”