လူတစ်ဦး၏ လမ်းစဉ်အတွက် လောကတစ်ခုလုံး၏ ကျင့်ကြံမှုအဆင့်ကို စတေးခြင်း!_၃

“ဟက် သွေးနတ်ဆိုး ကျမ်းစာက ကျင့်ကြံတဲ့ စွမ်းအင်တွေက တကယ်ကို အပေါ်ယံဆန်ပြီး အားနည်းလွန်းတယ်!”

စုရှင်းသည် ခပ်အေးအေး ပြောလိုက်ပြီး ကျန်ရှိနေသေးသော လွတ်မြောက်ခြင်း ပြန်လည်ရောက်ရှိခြင်း ကျင့်ကြံသူ နှစ်ယောက်၏နောက်သို့ ပြေးလိုက်သွားခဲ့သည်။

ပထမဆုံးအနေနှင့် စုရှင်းသည် အသက် အနည်းငယ် ကြီးသော လွတ်မြောက်ခြင်း ပြန်လည်ရောက်ရှိခြင်း ကျင့်ကြံသူကို မှီသွားပြီး ချက်ချင်းဆိုသလိုပင် ပြင်းထန်သော တိုက်ပွဲတစ်ခု ဖြစ်ပွားခဲ့သည်။

ထိုကျင့်ကြံသူတွင်လည်း လှည့်ကွက်အချို့ ရှိနေပြီး စုရှင်းကို ဆယ်ချီလောက်ထိအောင် ခုခံနိုင်ခဲ့သည်။

သို့သော် နောက်ဆုံးတွင် စုရှင်းသည် သူ့၏ တန်းထျန်ကို ဖျက်ဆီးကာ ဝိညာဉ်စွမ်းအင် အားလုံးကို ပိတ်လှောင်လိုက်သည်။

ထို့နောက် စုရှင်းသည် လွတ်မြောက်ခြင်း ပြန်လည်ရောက်ရှိခြင်း ကျင့်ကြံသူအပေါ် ဝိညာဉ်ရှာဖွေခြင်း နည်းစနစ်ကို အသုံးပြုခဲ့သည်။

နတ်ဘုရားအသွင် ပြောင်းလဲခြင်းအဆင့်မှ ကျင့်ကြံသူများကို ဝိညာဉ်ရှာဖွေခြင်းထက် အဆင့်တူညီသည့် ကျင့်ကြံသူများ၏ ဝိညာဉ်ကို ရှာဖွေရခြင်းသည် ပိုမိုခက်ခဲသည်မှာ ထင်ရှားသည်။

သို့သော်လည်း စုရှင်း၏ နတ်အာရုံသည် အလွန် အားကောင်းနေသဖြင့် ဝိညာဉ်ကို နှစ်ကြိမ်တိုက်ခိုက်လိုက်ရုံဖြင့် ထိုကျင့်ကြံသူ၏ ကာကွယ်မှုများ လုံးဝ ပြိုလဲသွားခဲ့သည်။

သူသည် စုရှင်း၏ သဘောအတိုင်းသာ ဖြစ်တော့သည်။

ခဏအကြာတွင် စုရှင်းသည် သတိလစ်ပြီး ပျော့ခွေနေသော လွတ်မြောက်ခြင်း ပြန်လည်ရောက်ရှိခြင်း ကျင့်ကြံသူ အဖိုးအိုအား မြေပြင်ပေါ်သို့ ပေါ့ပေါ့ပါးပါး ပစ်ချလိုက်သည်။

စုရှင်းသည် နားထင်ကို အနည်းငယ် ပွတ်သပ်ရင်း တီးတိုးရေရွတ်လိုက်သည်-

“ဝိညာဉ်ရှာဖွေခြင်း နည်းစနစ်က အရာအားလုံးကို တကယ်ပဲ မလုပ်နိုင်ပါလား!”

“ဒီနည်းက ကိုယ့်ထက် အဆင့်တစ်ဆင့်နိမ့်တဲ့ ကျင့်ကြံသူတွေပေါ် အသုံးပြုဖို့ အကောင်းဆုံးပဲ… အောင်မြင်ဖို့အတွက်ဆို နတ်အာရုံတွေရဲ့ ကွာခြားချက်က ကြီးမားနေမှရမယ်!”

“ဒါပေမဲ့ တူညီတဲ့အဆင့် ကျင့်ကြံသူဆိုရင်တော့ ဝိညာဉ်က အပြန်အလှန် တုံ့ပြန်တိုက်ခိုက်တဲ့ အန္တရာယ်တစ်ခု ရှိနိုင်တယ်!”

“ဒါပေမယ့်လည်း ငါ့နတ်အာရုံရဲ့ စွမ်းအား အခုလို အားကောင်းနေချိန်မှာတော့ အပြန်အလှန် တုံ့ပြန်တိုက်ခိုက်တာက မဖြစ်နိုင်ဘူး… အများဆုံးဖြစ်မှ အနည်းငယ် စိတ်အနှောင့်အယှက် ဖြစ်ရုံလောက်ပါပဲ!”

စုရှင်းက သွေးနတ်ဆိုး ကျမ်းစာအား ကျင့်ကြံသူများသည် အပေါ်ယံဆန်သည့် စွမ်းအင်မျိုးသာမက ၎င်းတို့၏ နတ်အာရုံပင်လျှင် တူညီသောအဆင့်ရှိ ကျင့်ကြံသူများထက် အတော်လေး နိမ့်ကျနေသည်ကို တွေ့ရှိခဲ့သည်။

“ထင်တဲ့ အတိုင်းပဲ၊ ဖြတ်လမ်းတွေမှာ အားနည်းချက်တွေ အများကြီး ရှိတတ်တယ်!”

စုရှင်း၏ စိတ်ထဲတွင် သတင်းအချက်အလက်များစွာ ရှိနေပြီ ဖြစ်သော်လည်း အရေးအကြီးဆုံးသော အချက်အလက်များကိုတော့ မရသေးပါ။

“ဟက်… သန်မာတဲ့ လွတ်မြောက်ခြင်း ပြန်လည်ရောက်ရှိခြင ကျင့်ကြံသူက သူ့ကိုယ်သူ သွေးနဂါး အကြီးအကဲရဲ့သားလို့ ပြောခဲ့တာပဲ။ သူ့ဆီကနေ သတင်းအချက်အလက် ပိုရနိုင်လိမ့်မယ်!”

စုရှင်းသည် ထိုသို့တွေးပြီး နောက်ဆုံးကျန်သည့် လွတ်မြောက်ခြင်း ပြန်လည်ရောက်ရှိခြင်း ကျင့်ကြံသူနောက်သို့ လျင်မြန်စွာ လိုက်သွားခဲ့သည်။

ထိုသန်မာသော လွတ်မြောက်ခြင်း ပြန်လည်ရောက်ရှိခြင်းအဆင့် ကျင့်ကြံသူသည် အဝေးဆုံးနှင့် အလျင်မြန်ဆုံး ထွက်ပြေးခဲ့ရာ ယခုအခါ စုရှင်းနှင့် မိုင်တစ်ရာကျော် ကွာဝေးနေခဲ့ပြီ ဖြစ်သည်။

သို့သော် စုရှင်းသည် ဓားထိန်းချုပ်ခြင်း နည်းစနစ်ကို လေ့ကျင့်ထားသောကြောင့် ရိုးရှင်းသော လွတ်မြောက်ခြင်း ပြန်လည်ရောက်ရှိခြင်း ကျင့်ကြံသူကို လိုက်ဖမ်းရန် လုံလောက်သည်။

ခဏအကြာတွင် စုရှင်းသည် ထိုသန်မာသော ကျင့်ကြံသူကို ပိတ်ဆို့လိုက်သည်။

သန်မာသော ကျင့်ကြံသူ၏ မျက်နှာတွင် ကြောက်ရွံ့မှု အရိပ်အယောင် ပေါ်လာပြီးနောက် အံများကို တင်းတင်းကြိတ်ကာ ပြောလိုက်သည်-

“မင်းက ငါတို့အားလုံးကို တကယ် သတ်တော့မှာလား?”

“ငါ့အဖေက သွေးနဂါး အကြီးအကဲနော်! ငါ့ကိုသတ်လိုက်ရင် မင်းအတွက် ဇာတ်သိမ်းက လှမှာ မဟုတ်ဘူး…”

စုရှင်းသည် မျက်လုံးများကို ကူကယ်ရာမဲ့သလို လှန်ကြည့်ပြီး ပြန်ပြောလိုက်သည်-

“မင်းအဖေက ကျန်းအာဟဲ ဖြစ်နေရင်တောင် အရေးမစိုက်ဘူး!”

ထိုသို့ပြောရင်း စုရှင်းသည် ဓားကိုကိုင်ကာ သန်မာသော ကျင့်ကြံသူအနားသို့ ရှေ့တိုးလာခဲ့သည်။

နှစ်ဦးသားသည် လျင်မြန်စွာပင် အချီပေါင်းများစွာ တိုက်ခိုက်ခဲ့ကြသည်။

စုရှင်းသည် အစွမ်းကုန် အသုံးမပြုဘဲ ထိုသန်မာသော ကျင့်ကြံသူအား သေချာစောင့်ကြည့်ရင်း တိုက်ခိုက်နေခဲ့သည်။

တကယ်လည်း ယခင် လွတ်မြောက်ခြင ပြန်လည်ရောက်ရှိခြင်း ကျင့်ကြံသူနှင့် နှိုင်းယှဉ်လျှင် သွေးနဂါး အကြီးအကဲ၏ သားဟုဆိုသူသည် ပိုမိုအားကောင်းနေသည်။

သူ၏ ကျင့်ကြံမှုအဆင့်သည် အပေါ်ယံဆန်ခြင်း မရှိဘဲ တူညီသော အဆင့်ရှိ ကျင့်ကြံသူများနှင့် သာမန်အားဖြင့် တူညီနေသည်။

ထို့ပြင်၊ ဤသန်မာသော ကျင့်ကြံသူသည် အထူး လျှို့ဝှက်နည်းစနစ် တစ်ခုကို ပိုင်နိုင်ထားပြီး ယင်းမှာ မျိုးရိုးလိုက်သည့် အမွေအနှစ်ပုံစံမျိုး ဖြစ်ပုံရသည်။

သူ၏ အရေပြားပေါ်တွင် အနီနှင့်အနက်ရောင် အကြေးခွံများ စတင်ပေါ်လာသည်။ ၎င်းက သူ့အား ဒဏ္ဍာရီထဲက နဂါးတစ်ကောင်ကဲသို့ ပုံရိပ်ပေါ်စေသည်။

မည်သို့ပင်ဆိုစေ သူသည် စုရှင်း၏ ယှဉ်ပြိုင်ဖက် မဟုတ်ခဲ့ပေ။

စုရှင်းက အနည်းငယ် ပို၍ အလေးအနက်ထား တိုက်ခိုက်လိုက်သောအခါ သန်မာသော ကျင့်ကြံသူအား အရှင်ဖမ်းနိုင်ခဲ့သည်။

ထို့နောက် သူသည် ကျင့်ကြံသူ၏ နတ်အာရုံကို ရက်ရက်စက်စက် တိုက်ခိုက်ခဲ့သည်။

ထိုကျင့်ကြံသူ၏ နတ်အာရုံ ပျက်စီးသွားသောအခါ စုရှင်းသည် ဝိညာဉ်ရှာဖွေခြင်း နည်းစနစ်ဖြင့် အလွယ်တကူ ကျူးကျော် ဝင်ရောက်ခဲ့သည်။

ခဏအကြာတွင် စုရှင်းသည် ထိုသန်မာသော ကျင့်ကြံသူကို ခွေးသေကောင် တစ်ကောင်လို ပစ်ချလိုက်ပြီး နားထင်များကို အနည်းငယ် ပွတ်သပ်လိုက်သည်။

“ဒီလိုဖြစ်တာကိုး… သွေးနတ်ဆိုး ကျမ်းစာနဲ့ သွေးနတ်ဆိုးဂိုဏ်းရဲ့ ကျင့်ကြံမှုတွေက ဒီလိုမျိုး အလုပ်လုပ်တာလား?”

စုရှင်းသည် သေဆုံးသွားသော ကျင့်ကြံသူများထံမှ ယူလာခဲ့သည့် သိုလှောင်လက်စွပ်များမှ ပစ္စည်းလေးခုကို ထုတ်ယူလိုက်သည်။

၎င်းတို့မှာ အနီရောင် ဆေးလုံးတစ်လုံး၊ အနီရောင် ကျောက်တုံးတစ်တုံး၊ သွေးဝိညာဉ် အရည်တစ်ပုလင်းနှင့် ဂူပိုးကောင် တစ်ကောင်တို့ဖြစ်သည်။

“အနီရောင် ဆေးလုံးက သွေးခဲဆေးလုံးပဲ… ဒါက သွေးနတ်ဆိုးဂိုဏ်းရဲ့ အဆင့်နိမ့် ကျင့်ကြံသူတွေ အတွက် အရင်းအမြစ် တစ်ခုပဲ!”

“အများအားဖြင့်တော့ အုတ်မြစ် တည်ဆောက်ခြင်းအဆင့်၊ ရွှေအမြုတေ နဲ့ သန္ဓေတည်ဝိညာဉ် အဆင့်တွေကို ကျော်လွန်တဲ့ ကျင့်ကြံသူတွေက အသုံးပြုကြတာ!”

“ဒီအနီရောင် ကျောက်တုံးကတော့ သွေးဝိညာဉ် ကျောက်တုံး… သွေးနတ်ဆိုးတွေနဲ့ မကောင်းဆိုးဝါး ဝိညာဉ်တွေ ပြည့်နှက်နေတဲ့ နေရာတွေမှာ ဖြစ်ပေါ်လာတဲ့ဟာ! ဒါကို နတ်ဘုရားအသွင် ပြောင်းလဲခြင်းအဆင့်နဲ့ လွတ်မြောက်ခြင်း ပြန်လည်ရောက်ရှိခြင်းအဆင့် ကျင့်ကြံသူတွေ… ဒါမှမဟုတ် အလားအလာ ကောင်းတဲ့ သန္ဓေတည် ဝိညာဉ်အဆင့် ကျင့်ကြံသူတွေလည်း အသုံးပြုနိုင်တယ်!”

“သွေးဝိညာဉ်အရည်နဲ့ ပတ်သက်ရင်တော့… ဒီအရည်ကို လွတ်မြောက်ခြင်း ပြန်လည်ရောက်ရှိခြင်း ကျင့်ကြံသူနှစ်ဦးနဲ့ သွေးနတ်ဆိုးဂိုဏ်းရဲ့ သွေးနတ်ဆိုး အကြီးအကဲတို့က သုံးစွဲနိုင်တယ်!”

ထိုသို့ပြောရင်း စုရှင်းသည် အံ့သြမှု အရိပ်အယောင်ပြကာ တီးတိုးပြောလိုက်သည်-

“ဒီမကောင်းဆိုးဝါး ကျင့်ကြံသူတွေမှာ ဒီလို စနစ်တကျ လေ့ကျင့်တဲ့ပုံစံ ရှိလိမ့်မယ်လို့ ငါမမျှော်လင့်ထားခဲ့ဘူး… သွေးနတ်ဆိုးဂိုဏ်းက အချိန်အကြာကြီး ရှိခဲ့တာလို့ ထင်တယ်!”

ခဏရပ်ပြီးနောက် စုရှင်းသည် နောက်ဆုံး ဂူပိုးကောင်ကို ထုတ်ယူလိုက်သည်။

“ဒီအကောင်ကို သွေးဝိညာဉ်ဂူပိုးလို့ ခေါ်တယ်!”

“ဒီသွေးဝိညာဉ်ဂူပိုးက အရာအားလုံးရဲ့ အရင်းအမြစ်ပဲ!”

“သွေးနတ်ဆိုး ကျမ်းစာကို ကျင့်ကြံတဲ့ ကျင့်ကြံသူတိုင်းဟာ အုတ်မြစ် တည်ဆောက်ခြင်း အဆင့်ကို ရောက်ရှိပြီးနောက်မှာ ဒီသွေးဝိညာဉ်ဂူပိုးကို ခန္ဓာကိုယ်ထဲ ထည့်သွင်းထားကြရလိမ့်မယ်!”

“ကျင့်ကြံတဲ့အခါတိုင်း ကျင့်ကြံသူရဲ့ ဝိညာဉ်စွမ်းအင် တစ်စိတ်တစ်ပိုင်းကို သွေးဝိညာဉ်ဂူပိုးက စားသုံးလိမ့်မယ်… သူတို့ရဲ့ ကိုယ်ခန္ဓာ အနှစ်သာရနဲ့ အသက်ကိုပါ စားသုံးလိမ့်မယ်!”

“ကျင့်ကြံသူ သေဆုံးပြီးတဲ့အခါ သွေးဝိညာဉ်ဂူပိုးက ကျင့်ကြံသူရဲ့ စွမ်းအင်အားလုံးကို လျင်မြန်စွာ စားသုံးပြီး သွေးနတ်ဆိုးဂိုဏ်း အတွက် နောက်ထပ် သားကောင်အသစ် တစ်ခုရှာဖို့ ပြန်လည် ရယူမှာ ဖြစ်တယ်!”

ထိုသို့ပြောရင်း စုရှင်း၏ မျက်လုံးများတွင် အေးစက်မှုတစ်ခု ပေါ်လာပြီး သူက ပြောလိုက်သည်-

“ဆိုလိုတာကတော့ ကျင့်ကြံသူအားလုံးက ပုံးအခွံတွေ သက်သက်ပဲ!”

“သူတို့တွေက ဒီသွေးဝိညာဉ်ဂူပိုးကို အစာကျွေးဖို့ အတွက်ပဲ တည်ရှိနေတာ!”

“လုံလောက်တဲ့ ဝိညာဉ်စွမ်းအင်ကို စုပ်ယူပြီးရင် သွေးဝိညာဉ်ဂူပိုးက သွေးနတ်ဆိုးဂိုဏ်းရဲ့ လျှို့ဝှက်နယ်မြေကို ဝင်ရောက်ပြီး သွေးဝိညာဉ်အရည်ကို ထုတ်ပေးလိမ့်မယ်!”

“ကျင့်ကြံသူတွေရဲ့ ရုပ်ပိုင်းဆိုင်ရာ ခန္ဓာကိုယ်နဲ့ သွေးဝိညာဉ်ဂူပိုး ဆင့်ကဲ ပြောင်းလဲပြီးတဲ့နောက်မှာ ဒီသွေးဝိညာဉ်အရည်က အရင်လို ဘေးထွက်ဆိုးကျိုးတွေ မရှိတော့ဘဲ အဆင်ပြေလာပြီး အသက်ရှည်မှုကိုလည်း သိသိသာသာ မလျော့ကျစေတော့ဘူး!”

“နောက်ဆုံးအချက်က သွေးနတ်ဆိုးဂိုဏ်းရဲ့ ခေါင်းဆောင်တွေက သွေးနတ်ဘုရား ဒါမှမဟုတ် သွေးနဂါး အကြီးအကဲတို့ဘဲ!”

“ဒါကြောင့် ကျင့်ကြံသူ အားလုံးက သွေးနဂါး အကြီးအကဲ တစ်ဦးတည်းရဲ့ ကျင့်ကြံမှုကို ကူညီနေတာပေါ့! သူတို့တွေက နောက်ဆုံးမှာ ဝိညာဉ်အရည်တွေ အဖြစ် ပြောင်းလဲသွားလိမ့်မယ်…”

ဤအကြောင်းကို တွေးလိုက်သောအခါ စုရှင်းသည် ကျောချမ်းသွားခဲ့သည်။

ရှင်းရှင်းပြောရလျှင် သွေးနတ်ဆိုးဂိုဏ်းနှင့် သွေးနတ်ဆိုး နယ်မြေတစ်ခုလုံးက ကျင့်ကြံသူ အားလုံးသည် သွေးနဂါး အကြီးအကဲ တစ်ဦးတည်းကိုသာ အစေခံနေခြင်း ဖြစ်သည်။

၎င်းတို့သည် ဝိညာဉ်အရည်ကို စစ်ထုတ်ပေးသည့် ပုံးများ သက်သက်သာ ဖြစ်သည်။

စုရှင်းသည် သက်ပြင်းချကာ တီးတိုးပြောလိုက်သည်-

“ပြီးတော့… အဆင့်နိမ့် ကျင့်ကြံသူတွေ မွေးဖွားလာတဲ့ပုံက ပိုပြီး မနှစ်မြို့စရာ ကောင်းတယ်!”

…