လျှို့ဝှက် ဆန်းကြယ်သော တိုက်ခိုက်သူ၊ မူလ မွေးရာပါ ဘဏ္ဍာ ဖူဆန်း နတ်ဘုရား သစ်ကိုင်း!

လက်တွေ့ကမ္ဘာတွင် စုရှင်းသည် သူ့ရှေ့ရှိ သရုပ်ပြခြင်း စာသားများကို စဉ်းစားဟန်ဖြင့် ကြည့်နေခဲ့သည်။

“ဝိညာဥ်သွေးကြော နဂါးက တကယ်ကို လောကရဲ့ ရှားပါးတဲ့ အံ့ဖွယ်အရာပဲ… ပေါ်သွားရင် သေစေနိုင်တဲ့ ကံဆိုးခြင်းကို ဆောင်ကြဉ်းလာနိုင်တယ်!”

ခဏတာ ရပ်နားပြီးနောက် စုရှင်းက ရေရွတ်လိုက်သည်။

“ဝိညာဥ်သွေးကြော နဂါးကို ရပြီးရင် ဝိညာဉ်စိုက်ခင်းဂူထဲမှာ ထားလိုက်ရင် ချက်ချင်း ပြဿနာ တက်တာကို ရှောင်နိုင်လိမ့်မယ်…”

“မဟုတ်ရင် နဂါး စောင့်ရှောက်သူသာ သိသွားရင် ငါ နောက်ထပ် အလိုက်ခံရတာကို ရှောင်နိုင်မှာ မဟုတ်ဘူး။”

“ဒါ့အပြင် သရုပ်ပြခြင်းထဲက ငါ့ရဲ့ လှုပ်ရှားမှုတွေက ဖုံးကွယ်ထားလို့ ရတော့မှာ မဟုတ်ဘူး။ နဂါးစောင့်ရှောက်သူက တိုက်ပွဲရဲ့ သဲလွန်စတွေကနေ လိုက်ပြီး ငါ့ရဲ့ အချက်အလက်ကို သေချာပေါက် ရှာတွေ့လိမ့်မယ်!”

စုရှင်းသည် အနည်းငယ် ခေါင်းခါလိုက်သည်။

သူတော်စင် ဝမ်မူနှင့် တိုက်ခိုက်ရာတွင် ရှောင်လွှဲ၍ မရသော သဲလွန်စများ ကျန်ခဲ့သည်။ သူတို့၏ တိုက်ခိုက်မှုများသည် မိုင်တစ်ထောင်အထိ ကျယ်ပြန့်သောကြောင့် စုရှင်း ဖုံးကွယ်ရန် အတွက် သဲလွန်စများမှာ များပြားလွန်းနေသည်။

“ဒီလိုဆိုရင်… လက်တွေ့မှာ ဝိညာဉ်သွေးကြော နဂါးကို ရချင်ရင် သဲလွန်စတွေ အနည်းဆုံး ဖြစ်အောင် အပျက်အစီးတွေကြားမှာဘဲ သူတော်စင် ဝမ်မူကို ရှင်းတာက ပိုလုံခြုံလိမ့်မယ်…”

စုရှင်း ဤသို့ တွေးလိုက်သည်။

ထို့ပြင် ဤသို့ ပြုလုပ်ရန် အတွက်ဆိုလျှင် စုရှင်းသည် ဝမ်မူကို လုံးဝ ဖိနှိပ်နိုင်ရန် ပေါင်းစည်းခြင်း အဆင့်သို့ ထိုးဖောက်ဖို့ရန် လိုလိမ့်မည်။

သူသည် သရုပ်ပြခြင်း ဖန်သားပြင်သို့ ကြည့်လိုက်သည်။

[ဝိညာဉ်စိုက်ခင်းဂူတွင် သင်သည် မူးနေသည့် ဝိညာဉ်သွေးကြော နဂါးကို ကြည့်နေသည်။ နဂါးငယ်လေးသည် ဝိညာဉ်စိုက်ခင်းဂူတွင် ရှိနေခြင်းက အလုံခြုံဆုံး ဖြစ်ကြောင်း သိသည်။]

[နဂါးသည် မူးယစ်နေပြီးနောက် လပေါင်းများစွာ အိပ်ပျော်နေခဲ့သော်လည်း နိုးလာခြင်း မရှိသေးပေ။]

[ဤနဂါးသည် အဘယ်ကြောင့် ဤမျှ အိပ်ပျော်နေသည်ကို စဉ်းစားရင်း သင် အံ့အားသင့်ခဲ့သည်။]

[သင့်ကို အံ့အားသင့်စေဆုံး အရာမှာ ဝိညာဉ်စိုက်ခင်းဂူထဲတွင် နဂါးရှိနေခြင်းဖြင့် မည်သည့်အရာမျှ မလုပ်ဆောင်သော်လည်း ဂူအတွင်းရှိ စွမ်းအင်သည် တည်ငြိမ်စွာ တိုးလာနေခြင်း ဖြစ်သည်။]

[လအနည်းငယ် အတွင်းမှာပင် ဝိညာဉ်စိုက်ခင်းဂူသည် အလယ်အလတ်အဆင့် ဝိညာဉ်အရည်များကို ထုတ်လုပ်လာသည်။]

[သင့်၏ တွက်ချက်မှုအရ နဂါးငယ်လေးသည် ဂူထဲတွင် ဘာမှမလုပ်ဘဲ နေမည်ဆိုလျှင်တောင် ဆယ်နှစ်ပင် မကြာသေးခင် အချိန်မှာပင် ဂူသည် အလယ်အလတ်အဆင့်မှ အထက်တန်းအဆင့်သို့ တိုးတက်လာလိမ့်မည် ဖြစ်သည်။]

[သင်သည် လတိုင်း ဝိညာဉ် စုဆောင်းခြင်း အစီအရင် အတွင်းရှိ ဝိညာဉ်အရည် ပမာဏကို စစ်ဆေးသည်။ လတိုင်းတွင် ၎င်းသည် အနိမ့်ဆုံးအဆင့် ဝိညာဉ်အရည် အစက်နှစ်သောင်း ထုတ်လုပ်ရုံသာမက အလယ်အလတ်အဆင့် ဝိညာဉ်အရည် အစက်တစ်ထောင်ပါ ထုတ်လုပ်ပေးခဲ့သည်။]

[ဤအချိန်အတွင်း သင်သည် သူတော်စင် ဝမ်မူ၏ သိုလှောင်လက်စွပ်ကို စူးစမ်းရန် အခွင့်အရေး ယူခဲ့သည်။]

[လက်စွပ်ထဲတွင် ဝိညာဉ်ကျောက်များစွာ မတွေ့ရသော်လည်း ပဉ္စလက်ဘဏ္ဍာများ၊ ဆေးရည်များနှင့် ဆေးဖော်စပ်ရန် အတွက် ပစ္စည်းများစွာကို တွေ့ခဲ့သည်။]

[ထို့ပြင် သင် အလိုချင်ဆုံး အရာမှာ… ဝမ်မူ၏ စိတ်နှလုံးကျင့်စဉ်ပင်!]

[ဤကျင့်စဉ်ဖြင့် သင်သည် ကျင့်စဉ်သုံးခုကို တစ်ခုတည်း ပေါင်းစည်းကာ နတ်ဘုရားအဆင့် ကျင့်စဉ်ဖြစ်သည့် ဝမ်မူကျင့်စဉ် အဖြစ်သို့ ပေါင်းစပ်နိုင်သည်။]

[ဝမ်မူကျင့်စဉ်သည် နတ်ဘုရားအဆင့်အထိ လေ့ကျင့်နိုင်သည့် အစွမ်းထက်သော ကျင့်စဉ်တစ်ခု ဖြစ်သည်။]

[ထိုဆေးရည်များနှင့် ပဉ္စလက်ဆေးများ၏ ရည်ရွယ်ချက်ကို ယာယီအားဖြင့် သင် မသိသေးပေ။]

[သို့သော်လည်း သင့်ကို အထူးဆန်းဆုံး ဖြစ်စေသည့် အရာမှာ သင် အရင်က ရရှိခဲ့သော မီးလောင်ထားသည့် သစ်သားအပိုင်းအစပင် ဖြစ်သည်။]

[သစ်သားသည် သာမန်ဟု ထင်ရသော်လည်း အတွင်းတွင် တာအို၏ အနှစ်သာရ အချို့ ပါဝင်နေသည့်ပုံ ပေါ်သည်။ သို့သော်လည်း ရက်များစွာ စဉ်းစားပြီးချိန်အထိ မည်သည့်အရာမှ မသိနိုင်ခဲ့သဖြင့် သင်သည် ၎င်းကို ယာယီ ဘေးဖယ်ထားခဲ့သည်။]

လက်တွေ့ကမ္ဘာတွင် ဤစာသားကို မြင်သောအခါ စုရှင်း၏ မျက်လုံးများ လင်းလက်သွားသည်။

“တန်ဖိုးရှိလိုက်တာ! ဝိညာဉ် သွေးကြော နဂါး ပေါ်လာတာနဲ့… လအနည်းငယ် အတွင်းမှာပဲ အလယ်အလတ်အဆင့် ဝိညာဉ်အရည် ထုတ်ပေးတယ်…”

“အချိန်ကြာလာတာနဲ့အမျှ ဝိညာဉ်စိုက်ခင်းဂူထဲက စွမ်းအင်တွေ ပိုပြီး သိပ်သည်းလာပြီး အလယ်အလတ်အဆင့် ဝိညာဉ်အရည်တွေလည်း ပိုများလာလိမ့်မယ်…”

စုရှင်းသည် ကျေနပ်စွာ ခေါင်းညိတ်လိုက်သည်။

“အလယ်အလတ်အဆင့် ဝ်ိညာဉ်အရည်ရဲ့ တန်ဖိုးက အနိမ့်ဆုံးအဆင့် ဝိညာဉ်အရည်ရဲ့ ဆယ်ဆပဲ! အလယ်အလတ်အဆင့် ဝိညာဉ်အရည် တစ်စက်တည်း သောက်သုံးတာကတောင် အနိမ့်ဆုံးအဆင့် ဝိညာဉ်ကျောက် တိုက်ရိုက် ကျင့်ကြံတာနဲ့ ညီမျှတယ်… ဒါက စွမ်းအင် ကျင့်ကြံမှုကို အများကြီး အရှိန်မြှင့်ပေးလိမ့်မယ်!”

စုရှင်းသည် အနည်းငယ် စိတ်လှုပ်ရှားနေသည်။ သူသည် ဝိညာဉ်သွေးကြော နဂါးကို အပိုင်သိမ်းရန် မစောင့်နိုင်တော့ပေ။

“မူးနေတဲ့ ဝိညာဉ်သွေးကြောနဂါးက ဘယ်လောက်ကြာကြာ အိပ်ပျော်နေမလဲတော့ သိချင်မိတယ်?”

စုရှင်းသည် အနည်းငယ် သိချင်စိတ် ပြင်းပြစွာဖြင့် ရေရွတ်လိုက်သည်။

“ပြီးတော့ သူတော်စင် ဝမ်မူရဲ့ သိုလှောင်လက်စွပ်ထဲမှာ ဘဏ္ဍာတွေက မမျှော်လင့်ဘဲ အများကြီး ဖြစ်နေတယ်!”

“အထူးသဖြင့် အဲ့ဒီသစ်သားအပိုင်းအစ၊ တာအိုအနှစ်သာရ ပါဝင်နေတာဆိုတော့ ဘယ်လို ဇာစ်မြစ်လဲ?”

“ပြီးတော့ ဝမ်မူရဲ့ စိတ်နှလုံးကျင့်စဉ်… ပေါင်းစည်းခြင်း အဆင့်နောက်ပိုင်း ကျင့်ကြံဖို့ လမ်းကြောင်းက ရှင်းလင်းနေပြီ!”

စုရှင်း၏ မျက်နှာတွင် ဝမ်းမြောက်မှုများသည် အတိုင်းသား ပေါ်လွင်နေသည်။ သူသည် သရုပ်ပြခြင်း ဖန်သားပြင်သို့ ကြည့်လိုက်သည်။

[သင်သည် ဝိညာဉ်စိုက်ခင်းဂူတွင် နေ့စဉ်နေထိုင်ပြီး ဝိညာဉ်သွေးကြော နဂါး၏ ပြောင်းလဲမှုများကို စောင့်ကြည့်ခဲ့သည်။]

[မကြာမီတွင် သင်သည် နဂါးက အိပ်ပျော်နေစဉ် ရံဖန်ရံခါတွင် နာကျင်သည့် အမူအရာများ ပြသနေသည်ကို သတိပြုမိခဲ့သည်။]

[ရံဖန်ရံခါတွင် ဝိညာဉ်သွေးကြော နဂါးသည် အနက်ရောင် ဓာတ်ငွေ့များကို ထုတ်လွှတ်သည်။ ၎င်းက ဝိညာဉ်စိုက်ခင်းများတွင် ညစ်ညမ်းစေသောအခါ ဝိညာဉ်အပင်များကို ညှိုးနွမ်းစေပြီး ပတ်ဝန်းကျင်ရှိ စွမ်းအင်များ၏ သန့်ရှင်းမှုကို လျှော့ချစေသည်။]

[သင်သည် ရင်ထဲတွင် မွန်းကြပ်မှုကို ခံစားလိုက်ရပြီး ဝိညာဉ်သွေးကြော နဂါး၏ အခြေအနေကို ဂရုတစိုက် စစ်ဆေးရန် သင့်၏ ဝိညာဉ်စွမ်းအင်ကို အသုံးပြုခဲ့သည်။]

[နောက်ဆုံးတွင် သင်သည် နဂါး၏ အခြေအနေ အတွက် အနက်ရောင် ဓာတ်ငွေ့သည် အကြောင်းရင်း ဖြစ်ကြောင်း တွေ့ရှိခဲ့သည်။]

[သင်၏ ခန့်မှန်းချက်အရ အနက်ရောင် ဓာတ်ငွေ့သည် ဝမ်မူဂိုဏ်း၏ အပျက်အစီးများမှ စတင်ခဲ့သည်။ ဝိညာဉ်သွေးကြော နဂါးသည် အစီအရင်ထဲတွင် နှစ်ပေါင်းများစွာ ပိတ်မိနေစဉ်အတွင်း စုဆောင်းခဲ့သည့် ကြီးမားသော အငြိုးအတေးများမှ ဖြစ်ပေါ်လာခြင်း ဖြစ်သည်…]

[သို့သော်လည်း ဤသည်မှာ သာမန် အငြိုးအတေးနှင့် မတူဘဲ ကောင်းကင်နှင့် မြေကြီး၏ ဝိဉာဉ်မှ မွေးဖွားလာပုံရသည်။ ထိုစဉ်က ဝိညာဉ်သွေးကြော နဂါး၏ နာကျင်မှုကို မမြင်လိုခြင်းကြောင့် ဖြစ်သည်။]

[ဤအနက်ရောင် ဓာတ်ငွေ့ကို မရှင်းလင်းနိုင်ခဲ့သဖြင့် သင်သည် ဝိညာဉ်သွေးကြောနဂါး တစ်ကောင်တည်း အိပ်စက်ရန် အတွက် နေရာလေး တစ်ခုကို ဖန်တီးခဲ့ပြီး ပတ်ဝန်းကျင်ကို ကာကွယ်ရန် အတွက် အစီအရင် အချို့ကို တည်ဆောက်ခဲ့သည်။]

[သင်သည် အနက်ရောင် ဓာတ်ငွေ့က အနီးအနားရှိ ဝိညာဉ်အပင်များနှင့် ဝိညာဉ်များကို ညစ်ညမ်းစေခြင်းမှ တတ်နိုင်သမျှ တားဆီးရန် ကြိုးစားခဲ့သည်။]

[လပေါင်းများစွာ ကုန်ဆုံးသွားသော်လည်း ဝိညာဉ်သွေးကြော နဂါးသည် ဆက်လက် အိပ်ပျော်နေခဲ့သည်။]

[နှစ်ဆယ်နှစ်ကြာပြီးနောက် ဝိညာဉ်သွေးကြော နဂါးသည် နောက်ဆုံးတွင် အိပ်ပျော်ခြင်းမှ နိုးလာခဲ့သည်။ သင် သတိပြုမိသည်မှာ နဂါး၏ ကိုယ်ပေါ်ရှိ အနက်ရောင် ဓာတ်ငွေ့သည် အနည်းငယ် လျော့နည်းသွားခြင်းပင်။ သို့သော်လည်း ၎င်းသည် နဂါးကို ရံဖန်ရံခါ နာကျင်စေဆဲပင်။]

[ဝိညာဉ်သွေးကြော နဂါးသည် သူ့မျက်လုံးများကို ဖွင့်လိုက်ပြီး ပတ်ဝန်းကျင်ကို ကြည့်လိုက်သည်။ လေထဲရှိ ကြွယ်ဝသော စွမ်းအင်များသည် သူ့ကို အလွန် နှစ်သက်စေသည်။]

[ဆော့ကစားလိုသော ငါးကလေး တစ်ကောင်ကဲ့သို့ ဝိညာဉ်သွေးကြော နဂါးသည် ဝိညာဉ်စိုက်ခင်းဂူ တစ်ခွင်တွင် ဝမ်းမြောက်စွာ ခုန်ပေါက်နေပြီး ဝိညာဉ်အပင် များစွာကို ဖျက်ဆီးပစ်လိုက်သည်။]

[သင်သည် အကူအညီမဲ့နေပြီး ဝိညာဉ်သွေးကြော နဂါးကို ထပ်ခါတလဲလဲ ပြောဆိုဆုံးမရုံသာ တတ်နိုင်တော့သည်။]

[ရာပေါင်းများစွာ သို့မဟုတ် ထောင်ပေါင်း များစွာသော နှစ်များအတွင်း သေးငယ်သော အစီအရင်ထဲတွင် ပိတ်မိနေခဲ့သော ဝိညာဉ်သွေးကြော နဂါးသည် မူလကပင် သိလိုစိတ်ပြင်းပြပြီး တက်ကြွနေခဲ့သည်။ ထို့ကြောင့် ၎င်းသည် သင်၏ စကားများကို ဆန့်ကျင်ပြီး လျစ်လျူရှုနေခဲ့သည်။]

…