လက်နက်သန့်စင်ခြင်းစွမ်းရည် အဆင့်တက်လှမ်းမှု

ထိုနတ်လက်နက်က သူမပိုင်သောလက်နက်ထက် သာလွန်သည်ဖြစ်ရာ ၎င်းကို မည်သူကမလိုချင်ဘဲနေလိမ့်မည်နည်း။ သို့သော် ၎င်းက စိတ်ကူးယဉ်ဆန်သည့် အတွေးသက်သက်သာဖြစ်သည်။ သူမက ၎င်းနှင့် မထိုက်တန်ပေ။

သူမကို ဆရာအဖြစ် သတ်မှတ်ခံရသော်လည်း ရီဖန်ကဲ့သို့ ဘိုးဘေးများနှင့် နှိုင်းယှဉ်လျှင် သူမက အရည်အချင်းမမီချေ။ နောက်ဆုံးတွင် ရီဖန်သည်သာ နေရာလွတ်နတ်ဘုရားမျှော်စင်ကိုလက်ခံခဲ့သည်။

ချန်ရီ စစ်မှန်သောနတ်ဘုရား၏အမည်သည် ဤတိုက်ပွဲအပြီးတွင် ကောင်းကင်ဘုံချိတ်ဆက်နယ်မြေတစ်ခုလုံး၌ ကျယ်ပြန့်စွာလူသိများလာခဲ့၏။

အလယ်အလတ်အဆင့် စစ်မှန်သောနတ်ဘုရားတစ်ဦးကို ချေမှုန်းနိုင်စွမ်းရှိခြင်းကြောင့် သူသည် ကောင်းကင်ဘုံချိတ်ဆက်နယ်မြေအတွင်းရှိ ထိပ်တန်းစွမ်းအားရှင်အဖြစ် သတ်မှတ်ခံရသည်။

နှောင်းပိုင်းအဆင့် စစ်မှန်သောနတ်ဘုရားပင်လျှင် အလယ်အလတ်အဆင့် စစ်မှန်သောနတ်ဘုရားကို သတ်ပစ်နိုင်မည်မဟုတ်ပေ။ အလွန်ဆုံးမှ ၎င်းတို့ကို အနိုင်ယူနိုင်ရုံသာရှိလိမ့်မည်။ အချိန်မြစ်အတွင်းရှိ စစ်မှတ်သောနတ်ဘုရားဝိညာဉ်ကို ဖျက်ရန်နည်းလမ်းမရှိဘဲ စစ်မှန်သောနတ်ဘုရားကို အမှန်တကယ်သတ်ပစ်မည်မဟုတ်ချေ။

စစ်မှန်သောနတ်ဘုရားများသည် မတုံးအကြသောကြောင့် ၎င်းတို့သာ သေချာပေါက်မအနိုင်ယူနိုင်လျှင် နောက်ဆုတ်ကြလိမ့်မည်။ လွန်ခဲ့သောနှစ်သန်းအနည်းငယ်အတွင်း ပေဟွမ်စစ်မှန်သောနတ်ဘုရားသည် အလယ်အလတ်အဆင့်ထက် သာလွန်သည်ဟုဆိုနိုင်သည်။

၎င်းက အချိန်အတော်ကြာ သက်တောင့်သက်သာရှိခဲ့သော စစ်မှန်သောနတ်ဘုရားများစွာကို ဖိအားဖြစ်စေခဲ့သည်။

စစ်မှန်သောနတ်ဘုရားများများပင်လျှင် သေသွားနိုင်သည် မဟုတ်လား။

ကြာရှည်စွာ ပျောက်ကွယ်နေခဲ့သော ဖိအားခံစားမှုသည် ဤစစ်မှန်သောနတ်ဘုရားများအား ၎င်းတို့၏ ကျင့်ကြံမှုတွင် တိုးတက်စေရန် လှုံ့ဆော်ပေးခဲ့ပြီး ကောင်းကင်ဘုံချိတ်ဆက်နယ်မြေတစ်လျှောက် အောင်မြင်မှုများ တိုးလာစေသည်။

အမွေဆက်ခံသော ကျင့်ကြံနည်းစနစ်နှင့်ပတ်သက်၍ ရီထျန်းရှင်းသည် ၎င်းကို နယ်ပယ်တစ်ခုသို့ မရောက်သေးမီ ကျင့်ကြံနိုင်ဦးမည်မဟုတ်ချေ။ ရီဖန်က ထိုကိစ္စအတွက် စိတ်မပူခဲ့ပေ။ ရီထျန်းရှင်းက သူ၏ကျင့်ကြံမှုကို အောင်မြင်စတင်လိုက်သည်နှင့် ရီဖန်သည် ရိုးရှင်းစွာပင် ဖြေရှင်းပေးနိုင်လိမ့်မည်။

ရီထျန်းရှင်းသည် အစောပိုင်းက ရီဖန်နှင့်အတူ အရှေ့နယ်မြေသို့ပြန်လာရန် စဉ်းစားခဲ့သော်လည်း ရီဖန်က လန်ယာနတ်ဘုရား၏ဂိုဏ်းတွင်ဆက်နေရန် စည်းရုံးခဲ့သည်။ လန်ယာနတ်ဘုရားဂိုဏ်းသည် ကောင်းကင်ဘုံချိတ်ဆက်နယ်မြေရှိ အမျိုးသမီး ကျင့်ကြံသူများအတွက် နေရာဖြစ်သည်။

အရင်းအမြစ်များစွာလဲရှိသဖြင့် ရီထျန်းရှင်းအတွက် သူ၏လက်တွဲဖော်ကိုရှာဖွေရန် ထိုထက် ပိုမိုကောင်းမွန်သောနေရာကို ရှာတွေ့တော့မည်မဟုတ်ပေ။

သို့သော် အလွန်စိတ်အားထက်သန်သော လန်ယာနတ်ဘုရားသမီးတော်ကိုရင်ဆိုင်ရသောအခါ ရီထျန်းရှင်းသည် အနည်းငယ်ကူကယ်ရာမဲ့ ခံစားခဲ့ရပြီး လန်ယာနတ်ဘုရားဂိုဏ်းသို့ဝင်ရန် သူ၏ဆုံးဖြတ်ချက်ကို နောင်တရခဲ့သည်။

ရီဖန်သည် ရီမိသားစုထံပြန်ရောက်သည်နှင့် စုယန်ထံမှ အရင်းအမြစ်များစွာကို ရရှိခဲ့သည်။ ဤရင်းမြစ်များသည် စစ်မှန်သောနတ်ဘုရား ဂိုဏ်းများထံမှ တောင်းပန်မှုဖြစ်သည်။ ၎င်းတို့အထဲတွင် စစ်မှန်သောနတ်ဘုရားအဆင့် အရင်းအမြစ်များပင် ရှိသည်။ ထို့ကြောင့် ရီဖန်သည်လည်း ထိုဂိုဏ်းများကို နှောက်ယှက်ရန် အစီအစဉ်မရှိတော့ပေ။

သူသည် ပေဟွမ်နတ်မင်းဆက်ထံမှ အရင်းအမြစ်များကိုတော့ ရယူရန်ရည်ရွယ်ထား၏။

ယခုတစ်ကြိမ်တွင် ပေဟွမ်နတ်မင်းဆက်၏ အရင်းအမြစ်များကို မည်သူမျှမထိဝံ့ကြပေ။

ရီဖန်သာရောက်လာလျှင် သူတို့အတွက် ဒုက္ခကြီးရောက်နိုင်သည်မဟုတ်လား။ သူတို့အသက်နှင့်ယှဉ်လျှင် အရင်းအမြစ်များက ထိုမျှ အဖိုးမတန်ပေ။

တစ်ချိန်တည်းတွင် မဟာယွီနတ်မင်းဆက်သည် ပေဟွမ်နတ်မင်းဆက်၏နယ်မြေတွင် စတင်လှုပ်ရှားခဲ့သည်။ ပေဟွမ်နတ်မင်းဆက်သည် အလယ်အလတ်အဆင့်စစ်မှန်သောနတ်ဘုရားရှိသောကြောင့် တောင်ပိုင်းဒေသအတွင်းရှိ အကောင်းဆုံးနယ်မြေများကို သိမ်းပိုက်ထားနိုင်သည်။

ပေဟွမ်စစ်မှန်သောနတ်ဘုရားသည် ရီဖန်၏ အလွယ်တကူသတ်ခံရခြင်းကြောင့် သူ အားနည်းသည်ဟု မဆိုနိုင်ပေ။ ပေဟွမ်က အားနည်းခြင်းကြောင့် မဟုတ်ဘဲ ရီဖန်က အလွန်အမင်းသန်မာနေခြင်းဖြစ်သည်။

သူ့ထံမှအရင်းအမြစ်များက အလွန်အဖိုးတန်လွန်းသောကြောင့် အခြားသူများကို အကျိုးခံစားခွင့်ပေးမည့်အစား တာ့ယွီနတ်မင်းဆက်က ၎င်းကိုသိမ်းပိုက်ရန် ဆုံးဖြတ်ခဲ့သည်။ ထိုအချိန်တွင် တာ့ယွီနတ်မင်းဆက်သည် အရှေ့နယ်မြေတွင် စတင်ရှင်သန်လာပြီး ကောင်းကင်ဘုံချိတ်ဆက်နယ်မြေတစ်ခုလုံးကို စတင်ဖြန့်ကြက်ခဲ့သည်။

ထိုအချိန်တွင် ရီဖန်သည် နေရာလွတ်နတ်ဘုရားမျှော်စင် ကို စတင်သန့်စင်နေ၏။ သူသည် နေရာလွတ်နတ်ဘုရားမျှော်စင်အတွင်းရှိ နတ်ဘုရားလမ်းကြောင်းများကို စတင်သန့်စင်ခဲ့သည်။ နေရာလွတ်နတ်ဘုရားမျှော်စင်အတွင်း အံ့ဩဖွယ်ကောင်းသည့် နတ်ဘုရားလမ်းကြောင်း ရှစ်သန်းရှိသည်။

ပုံမှန်မဟာသူတော်စင်အတွက် နတ်ဘုရားလမ်းကြောင်းတစ်ခုတည်းကို ပြုပြင်ရန်ပင် နှစ်ရာနှင့်ချီ၍ ကြာမြင့်နိုင်သည်။

သန်းပေါင်းများစွာသော နတ်ဘုရားလမ်းကြောင်းများကြောင့် ရီဖန်ပင်လျှင် အံ့သြထိတ်လန့်သွားခဲ့သည်။

ဤအရာသည် အမှန်တကယ်ပင် ထိပ်တန်းနတ်ဘုရားလက်နက်ဖြစ်ကာ မယုံနိုင်လောက်အောင်ကောင်းမွန်သည်။ ရီဖန်သာ စစ်မှန်သောနတ်ဘုရားနယ်ပယ်ကို ဖြတ်ကျော်မသွားခဲ့လျှင် ၎င်းကိုအသုံးပြုရန်နေနေသာသာ နေရာလွတ်နတ်ဘုရားမျှော်စင်ကို သန့်စင်နိုင်ဦးမည်မဟုတ်ချေ။

သို့သော် ရီမိသားစုအတွက် နတ်ဘုရားမျှော်စင်၏အသုံးအဝင်ဆုံး ကဏ္ဍသည် ၎င်း၏ကြီးမားသော စွမ်းအားမဟုတ်ပေ။

၎င်းက ရီမိသားစုမှ လက်နက်သန့်စင်သူများ လေ့လာသင်ယူရန် အခွင့်အရေးပေးနိုင်သည်။

ရီဖန်သည် ရီမိသားစုအတွင်းမှ လက်နက်သန့်စင်သူအားလုံးကို ချက်ခြင်းဆင့်ခေါ်လိုက်ကာ နေရာလွတ်နတ်ဘုရားမျှော်စင်အတွင်းရှိ နတ်ဘုရားလမ်းကြောင်းများကို လေ့လာစေခဲ့သည်။

နေရာလွတ်နတ်ဘုရားမျှော်စင်အတွင်းရှိ နတ်ဘုရားလမ်းကြောင်းများက လက်နက်သန့်စင်သူများအတွက် အဖိုးတန်ရတနာများဖြစ်ကြသည်။ နတ်ဘုရားလမ်းကြောင်းများ၏အဆင့်သည် ၎င်းတို့၏ လက်ရှိကျွမ်းကျင်မှုအတွက် အနည်းငယ် မြင့်မားသော်လည်း အပိုင်းအနည်းငယ်ကို နားလည်ထားလျှင်ပင် များစွာအကျိုးရှိမည်ဖြစ်သည်။ ရီဖန်သည် ၎င်းတို့ မကြာမီ ဖြတ်ကျော်နိုင်မည်ဟု ယုံကြည်ထား၏။

ထိုအတောအတွင်း ပင်ကိုပျက်ဆီးခြင်းပင်လယ်၏ ပင်မနေရာတွင် ကောင်းကင်ဘုံချိတ်ဆက်နယ်မြေမှ ပျောက်ကွယ်သွားသော နတ်ဆိုးကမ္ဘာ စစ်မှန်သောနတ်ဘုရားသည် ပင်ကိုပျက်ဆီးခြင်း ပင်လယ်အတွင်း ရုတ်တရက်ပေါ်လာသည်။

"ထျန်းရှု မင်းဘက်က ဘယ်လိုအခြေအနေရှိလဲ"

နတ်ဆိုးကမ္ဘာ စစ်မှန်သောနတ်ဘုရာ၏ဘေးတွင် နောက်ထပ်စစ်မှန်သောနတ်ဘုရားတစ်ပါး ရှိသေးသည်။

ထို့အပြင် သူ၏ရောင်ဝါက နတ်ဆိုးကမ္ဘာ စစ်မှန်သောနတ်ဘုရားထက် အားနည်းပုံမပေါ်ပေ။

အပေါ်ယံကြည့်လျှင် ပင်မနယ်မြေကို သိမ်းပိုက်ထားသော အထွတ်အထိပ်မဟာသူတော်စင် အနည်းငယ်မျှသာရှိသော်လည်း၊ ယခုအခါ ပင်မနယ်မြေတွင် သာမန် စစ်မှန်သော နတ်ဘုရားများသာမက အလယ်အလတ်အဆင့်ရှိ စစ်မှန်သောနတ်ဘုရားများလည်းရှိသည်။

ရီမိသားစုတည်ရှိမှုကြောင့်သာ မဟုတ်လျှင် ဤစစ်မှန်သောနတ်ဘုရားများကို ခုခံနိုင်မည့်အင်အားစု ပင်ကိုပျက်ဆီးခြင်းပင်လယ်ကြီးတစ်ခုလုံးတွင် ရှိတော့မည်မဟုတ်ပေ။

“လောလောဆယ်တော့ နယ်မြေရဲ့ ဆယ်ပုံတစ်ပုံလောက်ကိုပဲ ထိန်းချုပ်ထားနိုင်သေးတယ်၊ ဘယ်လိုမှ မလုံလောက်သေးဘူး”