ခင်ဗျားမှာ ဒီလောက်ကြီးတဲ့ နောက်ခံအရှိန်အဝါကြီး ရှိနေမှန်းသိရင် ဘယ်သတ္တိနဲ့ လာစမ်းရဲမှာလဲ ... စောစောကတည်းက ပြောပါ့လားဗျာ …

~ကျယ်ပြောလှသော ဟင်းလင်းပြင်ထဲတွင် ကောင်းကင် လှေပျံတစ်စင်းသည် လေဟာနယ်ကို လျင်မြန်စွာ ဖြတ်ကျော်ကာ ထျန်းမင်ကြယ်တာရာစနစ်၏ အစွန်အဖျားသို့ ဆိုက်ရောက်လာခဲ့သည်။

အတွင်း၌မူ မျက်လုံးသုံးလုံး မျိုးနွယ် ကြယ်တာရာနယ်မြေတွင် အလွန်ကျော်ကြားသော အဖွဲ့အစည်း တစ်ခု ဖြစ်သည့် ဘိုလော့စ် ကုန်သည်ကြီးများ အသင်းမှ ရုပ်ရည် အသွင်အပြင် အမျိုးမျိုးရှိသော ကျင့်ကြံသူအချို့ ရှိနေကြ၏။

ခေါင်းဆောင်မှာ အရပ်မြင့်ပြီး သွယ်လျသော မျက်လုံး သုံးလုံး မျိုးနွယ်မှ လူငယ်တစ်ဦး ဖြစ်သည်။ သူသည် လက်နှစ်ဖက်ကို နောက်ပစ်ထားရင်း အဝေးမှ စကြဝဠာကို ငေးမောကြည့်နေကာ သူ၏ မျက်လုံးသုံးလုံးစလုံးမှာ ထက်ရှသော အလင်းရောင်များဖြင့် တောက်ပနေသည်။

သူကား နုခ် ဖြစ်၏။ ဘိုလော့စ်မိသားစု၏ ပဉ္စမမြောက် အမွေဆက်ခံသူဖြစ်ပြီး မျက်လုံး သုံးလုံး ကြယ်တာရာ နယ်မြေတစ်ခုလုံးတွင် ကျော်ကြားသော ပါရမီရှင်တစ်ဦးလည်း ဖြစ်၏။ အသက် သုံးသိန်းမျှသာ ရှိသေးသော်လည်း သူ၏ကျင့်ကြံမှုအဆင့်မှာ အစစ်အမှန်အင်မော်တယ် အထွတ်အထိပ်အဆင့်သို့ ရောက်ရှိနေခဲ့ပြီဖြစ်သည်။

မျက်လုံးသုံးလုံး မျိုးနွယ် ကြယ်တာရာနယ်မြေမှ ကောလာဟလများအရ နုခ်သည် နောင်နှစ်တစ်သိန်းအတွင်း သူ၏အတားအဆီးကို ချိုးဖြတ်ကာ တန်ခိုးကြီးမားသော နက်ရှိုင်းခြင်းအင်မော်တယ်တစ်ပါး ဖြစ်လာနိုင်ဖွယ်ရှိသည်ဟုပင် ဆိုကြလေသည်။

အကယ်၍ နုခ်သာ ဤသို့ အမှန်တကယ် စွမ်းဆောင်နိုင်ခဲ့ပါလျှင် အမွေဆက်ခံသူများကြားတွင် သူ၏ရပ်တည်ချက်မှာ ပိုမိုမြင့်မားလာနိုင်ဖွယ် ရှိနေ၏။

နုခ်၏ ဘေးတွင် အရပ်မြင့်မားပြီး ရွှေရောင်အမွေးများဖြင့် ဖုံးလွှမ်းနေသော လူအိုကြီးတစ်ဦး ရပ်နေသည်။ သူ၏ပုံစံမှာ မတ်တပ်ရပ်နေသော ရွှေရောင်မျောက်ဝံကြီးတစ်ကောင်နှင့် တူလှ၏။ ဤသူကား သုံးလုံးမျက်စိ ကြယ်တာရာနယ်မြေတွင် အလွန်အင်အားကြီးသော မျိုးနွယ်တစ်ခုဖြစ်သည့် ရွှေမျောက်ဝံမျိုးနွယ်မှ အဖွဲ့ဝင်တစ်ဦး ဖြစ်သည်။

ရွှေမျောက်ဝံမျိုးနွယ်သည် အလွန်ကြံ့ခိုင်သော ကာယစွမ်းရည်ပါရမီများ ရှိကြပြီး နာမည်ကျော် ခန္ဓာကိုယ်ကျင့်ကြံသူများစွာကို မွေးထုတ်ပေးခဲ့သည်။ သူတို့သည် မျက်လုံး သုံးလုံး မျိုးနွယ်၏ အခိုင်မာဆုံး မဟာမိတ်မျိုးနွယ်များထဲမှ တစ်ခုလည်း ဖြစ်ပါ၏။

ဤရွှေမျောက်ဝံ မျိုးနွယ်ဝင်၏ အမည်မှာ ယွမ်ဝူ ဖြစ်ပြီး သူသည် နုခ်၏ အစောင့်အရှောက်ပင် ဖြစ်သည်။ မျက်လုံး သုံးလုံး ကြယ်တာရာနယ်မြေမှ အင်အားကြီး အဖွဲ့အစည်း တစ်ခုအနေဖြင့် ဘိုလော့စ်ကုန်သည်ကြီးများ အသင်းသည် သူတို့၏ အမွေဆက်ခံသူများကို ကောင်းမွန်သော အကာအကွယ်များ ပေးအပ်ထားသည်မှာ သဘာဝကျလှသည်။

အထူးသဖြင့် နုခ်ကဲ့သို့ ပါရမီရှင်တစ်ဦးသည် သူ၏ ကျင့်ကြံမှုတွင် မဟာအောင်မြင်မှု မရရှိသေးမီအချိန်၌ အလွန်မြင့်မားသော အစောင့်အရှောက် အဆင့်ကို ရရှိထား၏။

ယွမ်ဝူသည် ထိုသို့သော အစောင့်အရှောက်တစ်ဦးဖြစ်ပြီး သူ၏ကျင့်ကြံမှုအဆင့်မှာ နက်ရှိုင်းခြင်းအင်မော်တယ် သတ္တမအလွှာ၊ နှောင်းပိုင်းအဆင့်သို့ ရောက်ရှိနေပြီဖြစ်သည်။ သူသည် မျက်လုံး သုံးလုံး ကြယ်တာရာနယ်မြေတစ်ခုလုံးတွင် အင်အားကြီး ပုဂ္ဂိုလ်တစ်ဦးအဖြစ် သတ်မှတ်ခံထားရလေသည်။

မည်သို့ပင်ဆိုစေကာမူ မျက်လုံး သုံးလုံး ကြယ်တာရာနယ်မြေတွင် ရွှေအင်မော်တယ်အဆင့်ထက် မြင့်သောသူများမှာ ယေဘုယျအားဖြင့် အဓိကအင်အားစုကြီးများ၏ အမှန်တကယ် ထိန်းချုပ်သူများ ဖြစ်ကြသည်။ နက်ရှိုင်းခြင်း အင်မော်တယ်တစ်ပါးသည် နယ်မြေတစ်ခုကို စိုးမိုးရန် လုံလောက်သော အင်အားပင် ဖြစ်၏။

သူတို့နှစ်ဦး၏ နောက်တွင်မူ အခြားကျင့်ကြံသူများ ရှိနေကြပြီး အချို့မှာ လူသားမျိုးနွယ်၊ အချို့မှာ သုံးလုံးမျက်စိမျိုးနွယ်နှင့် အခြားမျိုးနွယ်အမျိုးမျိုးမှ ဖြစ်ကြသည်။

သူတို့သည် နုခ်၏ နောက်လိုက်များ သို့မဟုတ် ရင်းနှီးသော ကိုယ်ရံတော်များ သို့မဟုတ် အစေခံများ ဖြစ်ကြလေသည်။

နုခ်သည် မူလက နက်ရှိုင်းခြင်းအင်မော်တယ်အဆင့်သို့ ချိုးဖြတ်ရန် အခွင့်အလမ်းများ ရှာဖွေရင်း အပြင်သို့ ခရီးထွက်နေခြင်းဖြစ်သည်။ အလွန်ဝေးကွာသော ကြယ်တာရာနယ်မြေတစ်ခုမှ တာအိုစွမ်းအင်ကို ခံစားမိလိုက်ရသောအခါ သူသည် နှစ်ခါမစဉ်းစားဘဲ ဤဦးတည်ရာသို့ တိုက်ရိုက်လာခဲ့ခြင်း ဖြစ်သည်။

ဤအကြောင်းကြောင့်ပင် သူသည် အမြန်ရောက်ရှိရန်အတွက် နေရာလပ်ကူးပြောင်းရေး အခင်းအကျင်းတစ်ခုကို အသက်သွင်းရန် အရင်းအမြစ်များကိုပင် နှမြောခြင်းမရှိဘဲ သုံးစွဲခဲ့လေ၏။ မည်သို့ပင်ဆိုစေကာမး ဤတာအိုခံစားမှုသည် သူ၏ နက်ရှိုင်းခြင်းအင်မော်တယ် အဆင့်သို့ ချိုးဖြတ်ရန်အတွက် အလွန်အရေးပါသော သော့ချက်ဖြစ်လာနိုင်ရာ အလွန်အရေးကြီးလှပါသည်တကား။

ထိုအခိုက်အတန့်တွင် နုခ်သည် ပြတင်းပေါက်ရှေ့၌ ရပ်နေရင်း ထျန်းမင်ကြယ်တာရာစနစ်တစ်ခုလုံးကို မျက်လုံးဝေ့ကြည့်လိုက်ပြီးနောက် ဆိုလိုက်သည်။

"အဲ့ဒီအရှိန်အဝါက ဒီဒေသကနေ စတင်ခဲ့တာ ဖြစ်ရမယ်... ဒီအရှိန်အဝါထဲမှာ ဒဏ္ဍာရီထဲက တာအိုစွမ်းအားတွေ ပါဝင်နေတယ်။ ဒါပေမဲ့ အဲ့ဒါက ဘာဖြစ်နိုင်မလဲ။"

ဤသည်မှာ ဤခရီးစဉ်အတွင်း နုခ် အကြိမ်များစွာ မေးခဲ့ပြီးသော မေးခွန်းတစ်ခုဖြစ်သည်။ သူသည် သူ့ဘေးမှ ယွမ်ဝူ၊ အခြားသူများနှင့် သူ့ကိုယ်သူထံမှ အဖြေကို ရှာဖွေနေခြင်း ဖြစ်သည်။

ယွမ်ဝူကလည်း အဝေးမှ ဂြိုဟ်များကို စူးစိုက်ကြည့်နေ၏။ သူ၏ မျက်လုံးများက

တဖျပ်ဖျပ်လင်းလက်သွားပြီးနောက် တုံ့ပြန်လိုက်သည်။

"ဒီလောက်ပြင်းထန်တဲ့ အရှိန်အဝါအရဆိုရင် ရတနာတစ်ခုခု ပေါ်ထွက်လာတာ ဒါမှမဟုတ် အင်အားကြီးပုဂ္ဂိုလ်တစ်ယောက်ယောက် အဆင့်ချိုးဖြတ်နေတာပဲ ဖြစ်ရမယ်။"

ထိုအခါ နုခ်သည် လေကို ဖြည်းညင်းစွာ ရှူထုတ်လိုက်ပြီးနောက် ပြောလိုက်သည်။

"တကယ်လို့သာ ရတနာတစ်ခု ပေါ်ထွက်လာခဲ့ရင် ဒါဟာ ငါ နုခ်အတွက် အခွင့်အရေးပဲ။"

သူသည် လက်သီးကို ကျစ်ကျစ်ပါအောင် ဆုပ်လိုက်ပြီး မည်သို့ပင်ဖြစ်စေ ဤအခွင့်အရေးကို သူ ရအောင်ယူမည်ဟု သန္နိဋ္ဌာန်ချလိုက်တော့သည်။

သူ၏နောက်မှ လူသားမျိုးနွယ်ဝင် လူလတ်ပိုင်းတစ်ဦးက စိုးရိမ်သံဖြင့် ဆိုလာ၏။

"သခင်လေး... တကယ်လို့များ အင်အားကြီးပုဂ္ဂိုလ်တစ်ယောက် အဆင့်ချိုးဖြတ်နေတဲ့ အရှိန်အဝါသာ ဖြစ်နေခဲ့ရင် ဘယ်လိုလုပ်မလဲ။"

သုံးလုံးမျက်စိမျိုးနွယ်ဝင် လူငယ်တစ်ဦးကလည်း စိုးရိမ်စွာဖြင့် ထပ်ပြောသည်။

"ဟုတ်တယ်၊ ဒီလောက်ကျယ်ပြောတဲ့ တာအိုကို လှုပ်ခတ်စေနိုင်တယ်ဆိုတော့... ဒီကျင့်ကြံမှုက အနည်းဆုံးတော့ ရွှေအင်မော်တယ်အဆင့် ဖြစ်ရမယ်၊ ဒါမှမဟုတ် အင်မော်တယ် ဧကရာဇ်တစ်ပါးတောင် ဖြစ်နိုင်တယ်။"

အင်မော်တယ် အရှင်သခင် တစ်ပါးအကြောင်းကိုတော့ မည်သူမျှ ထည့်မတွေးရဲကြပေ။

အကြောင်းမူကား ကျယ်ပြောလှသော ကောင်းကင် ကြယ်တာရာနယ်မြေတွင်

အင်မော်တယ်အရှင်သခင်အရေအတွက်မှာ အလွန်နည်းပါးပြီး ယွီမိသားစုတွင်သာ ထိုသို့သော အင်အားကြီးပုဂ္ဂိုလ်များ ရှိသောကြောင့် ဖြစ်၏။

ထိုသို့သော တန်ခိုးကြီးပုဂ္ဂိုလ်များသည် ကျိုယိုချီနှင့် ပဋိပက္ခတွင်သာ အဓိကပါဝင်ကြပြီး ဤသို့သော ဝေးလံခေါင်ဖျားသည့် နေရာတွင် ပေါ်လာဖွယ်မရှိပေ။ အမှန်တကယ်တွင် အင်မော်တယ်ဧကရာဇ်များသည်ပင် မျက်လုံးသုံးလုံး မျိုးနွယ် ကြယ်တာရာ နယ်မြေတစ်ခုလုံးအတွက် ဒဏ္ဍာရီလာ ပုဂ္ဂိုလ်များ ဖြစ်ကြသည်။

ဤတစ်ကြိမ် လှုပ်ခတ်မှုမှာ အလွန်ကြီးမား၏။ အလင်းနှစ်ရာပေါင်းများစွာ ဝေးကွာနေသည့်တိုင် သူတို့ ရှင်းလင်းစွာ ခံစားမိခဲ့ရသည် မဟုတ်ပါက အင်မော်တယ်ဧကရာဇ် တစ်ပါး ဟူသော ဖြစ်နိုင်ခြေကို ထည့်သွင်းစဉ်းစားကြမည်ပင် မဟုတ်ပေ။

ထိုသို့သော အင်အားကြီးပုဂ္ဂိုလ်များကို နှောင့်ယှက်မိပါက ကပ်ဘေးဆိုက်ရောက်နိုင်ပြီး ဘိုလော့စ်ကုန်သည်ကြီးများအသင်းကပင် သူတို့ကို ကယ်တင်နိုင်မည် မဟုတ်ပါ။

ယွမ်ဝူပင်လျှင် နုခ်ကို စိုးရိမ်သော အကြည့်ဖြင့် ကြည့်လိုက်သည်။

နုခ်က မျက်မှောင်ကြုတ်လိုက်ပြီး

"ဘာပဲဖြစ်ဖြစ်... ဒီအခွင့်အရေးကို ကျွန်တော် လက်လွှတ်မခံနိုင်ဘူး"

ဤစကားကို ကြားသောအခါ အခြားသူများအားလုံး တိတ်ဆိတ်သွားကြပြီး ဆက်လက်မပြောဆိုကြတော့ပေ။

မည်သို့ပင်ဆိုစေ နုခ်သည် သူတို့၏ ခေါင်းဆောင်ဖြစ်ပြီး သူတို့သည် သူ၏ဆန္ဒကိုသာ အဓိကထားကြသည် မဟုတ်ပါလား။

ယွမ်ဝူက ဆိုသည်။

"သခင်လေး၊ ဒီလိုဆိုမှတော့ ကျွန်တော်တို့ သတိကြီးကြီးနဲ့ ချင့်ချင့်ချိန်ချိန် လုပ်ဆောင်ရပါမယ်။ တကယ့်အင်အားကြီးပုဂ္ဂိုလ်တစ်ယောက်ကို မလိုအပ်ဘဲ သွားမနှိုးဆွမိအောင် ဆူညံသံတွေ သိပ်မထွက်အောင် ကြိုးစားရပါလိမ့်မယ်။"

နုခ်သည် ကန့်ကွက်ခြင်းမရှိဘဲ ခေါင်းအသာငြိမ့်ပြလိုက်သည်။

"ဒီကြယ်တာရာစနစ်ထဲကို ဝင်ပြီး ဂြိုဟ်တွေကို စုံစမ်းကြရအောင်။"

ကောင်းကင်လှေပျံသည် အလင်းတန်းများအဖြစ်သို့ ပြောင်းလဲကာ ထျန်းမင်ကြယ်တာရာစနစ်ထဲသို့ ပျံသန်းဝင်ရောက်သွားသည်။

မကြာမီမှာပင် သူတို့သည် ထိုစနစ်အတွင်းမှ ဂြိုဟ်အများအပြားမှာ သိသိသာသာ ပျက်စီးယိုယွင်းနေသည်ကို တွေ့ရှိလိုက်ရ၏။ အချို့ဂြိုဟ်များမှာမူ အရင်းအမြစ်အများအပြား ထုတ်ယူခံထားရသည့်အလား ဂြိုဟ်မျက်နှာပြင်များပင် ကွာကျနေပုံရသည်။

ထိုအချက်က နုခ်နှင့် သူ၏အဖော်များကို မျက်မှောင်ကြုတ်သွားစေပြီး ပိုမို၍ပင် သတိကြီးစွာ ထားရှိလာကြသည်။

ဤသည်မှာ ဤကြယ်တာရာစနစ်တွင် လူများရှိနေသည်ကို ဆိုလိုခြင်းဖြစ်သည်။ ကျင့်ကြံသူများ ရှိသောနေရာတွင်သာ အရင်းအမြစ်များ ထုတ်ယူခြင်း ရှိပေမည်။

ထိုကျင့်ကြံသူသည် တာအိုဒီလှိုင်းနှင့် ပတ်သက်နေနိုင်ဖွယ် ရှိနေသည်။

သိပ်မကြာလိုက်ခင်မှာပင် သူတို့သည် တစ်စုံတစ်ခု မူမမှန်ကြောင်း ခံစားမိလိုက်ကြသည်။

"ဟင်... ဒီလောက် ခေါင်တဲ့နေရာမှာ ဘာလို့ ဝိညာဉ်စွမ်းအင်ချီက ဒီလောက်သိပ်သည်းနေရတာလဲ။ ဒါ နည်းနည်းတော့ မမှန်သလိုပဲ။"

နုခ်က မျက်မှောင်ကြုတ်ကာ နားမလည်နိုင်စွာ ဆိုလိုက်သည်။

နုခ်တစ်ဦးတည်းသာ ထိုသို့ခံစားမိသည်မဟုတ်ဘဲ ကျင့်ကြံသူအားလုံးလည်း ထိုအတိုင်းပင် ခံစားမိကြသည်။

ယွမ်ဝူက ကောက်ချက်ချလာသည်။

"လေဟာနယ်ထဲမှာတောင် ဝိညာဉ်စွမ်းအင်ချီက ဒီလောက်သိပ်သည်းနေတယ်ဆိုရင် ဒီကြယ်တာရာစနစ်ထဲမှာ အင်မော်တယ်ကြယ်တစ်လုံး ရှိရမယ်။ ဖြစ်နိုင်တာက အဆင့်အတော်လေးမြင့်တဲ့ တစ်လုံးပဲ။"

ဤသည်မှာ နုခ်နှင့် အခြားသူများ၏ ခန့်မှန်းချက်လည်း ဖြစ်ပါ၏။

အခန်း ၆၅၈- ခင်ဗျားမှာ ဒီလောက်ကြီးတဲ့ နောက်ခံအရှိန်အဝါကြီး ရှိနေမှန်းသိရင် ဘယ်သတ္တိနဲ့ လာစမ်းရဲမှာလဲ ... စောစောကတည်းက ပြောပါ့လားဗျာ…

~"ဒါ ဘယ်လိုဖြစ်နိုင်မှာလဲ။ ဒီလိုအစွန်အဖျားနေရာမှာ အင်မော်တယ်ကြယ်တစ်လုံး ရှိနေလိမ့်မယ်လို့ ဘယ်ထင်ပါ့မလဲ။ ပြီးတော့ ဒီဝိညာဉ်စွမ်းအင် သိပ်သည်းဆကို ကြည့်ရတာ... ဘိုလော့စ်မိသားစုရဲ့ ကြယ်စနစ်ထက်တောင် မလျော့ဘူးထင်တယ်"

နုခ်၏ မျက်မှောင်များ ကြုတ်သွားလေ၏။

"ဒါဆိုရင် ဒီနေရာမှာ တန်ခိုးကြီးတဲ့ ကျင့်ကြံသူတွေ ရှိနိုင်တယ်လို့ ဆိုလိုတာပေါ့ သခင်လေး။ ကျွန်တော်တို့ ဆက်ပြီးစူးစမ်းသင့်ရဲ့လား"

နုခ်သည် တစ်ခဏမျှ တုံ့ဆိုင်းသွားပြီးနောက် အံကို ကြိတ်ကာ အမိန့်ပေးလိုက်သည်။

"ဆက်သွား!"

အခြားသူများမှာ အချင်းချင်း မျက်နှာပင့်ပြကာ ဘာမှမပြောဘဲ ကောင်းကင်ယာဉ်ပျံကို ဆက်လက်မောင်းနှင်ရင်း စတင်စူးစမ်းကြလေတော့၏။

မကြာမီပင် သူတို့သည် ထျန်းမင်ကြယ်အနီးသို့ ရောက်ရှိလာခဲ့သည်။

ဧရာမ ထျန်းမင်ကြယ်ကြီးကို မြင်လိုက်ရသည့်အခါ နုခ်၏ မျက်ဝန်းများ ကျုံ့သွား၏။ ယွမ်ဝူနှင့် အခြားသူများကဲ့သို့ပင် သူသည်လည်း ထိုကြီးမားလှသော ဂြိုဟ်ကြီးကို တင်းမာစွာ စိုက်ကြည့်နေမိသည်။

"ဒါက အင်မော်တယ် ကြယ်တစ်လုံးဆိုတာ သေချာတယ်၊ အဆင့်လည်း မနိမ့်လောက်ဘူး" ယွမ်ဝူ၏ ရွှေရောင်အမွေးအမှင်များ ထောင်ထလာလေသည်။ ထိုဂြိုဟ်ကြီးထဲတွင် အင်မော်တယ် ဝိညာဉ်စွမ်းအင် အမြောက်အမြားရှိနေသည်ကို သူအာရုံခံမိနေ၏။

"ဘယ်လိုလုပ်ကြမလဲ သခင်လေး၊ ကျွန်တော်တို့ အဲ့ဒီကို သွားမှာလား"

နုခ် ချီတုံချတုံဖြစ်သွားသည်။ အင်မော်တယ် ဝိညာဉ်စွမ်းအင်များ ပြည့်နှက်နေသော အင်မော်တယ်ကြယ်တစ်လုံးသည် ဧကန်မုချ တန်ခိုးကြီးအဖွဲ့အစည်းတစ်ခု၏ ပိုင်နက်ဖြစ်ရမည်ဖြစ်ပြီး အထဲတွင်လည်း စွမ်းအားကြီးကျင့်ကြံသူများ ရှိနေမည်မှာ သေချာသည်။ သို့သော် ဤသို့သော အစွန်အဖျားဒေသတွင် ထိုကဲ့သို့ အင်မော်တယ်ကြယ်တစ်လုံး ဘယ်တုန်းက ရှိနေခဲ့ပါသနည်း။

'တာအိုဒီလှိုင်းကြောင့်များလား'

'ဒီအင်မော်တယ်ကြယ်ပေါ်မှာ ရတနာတွေ ရှိနေတာလား၊ ဒါမှမဟုတ် အလွန်တရာ တန်ခိုးကြီးတဲ့ ပုဂ္ဂိုလ်တစ်ဦးဦး ရှိနေတာလား'

သွားသင့်၊ မသွားသင့်ကို နုခ်တစ်ယောက် ဝေခွဲမရဖြစ်နေခဲ့၏။

ခဏအကြာတွင်မှ သူက "ယွမ်ဝူ... အပြင်ကနေပြီးတော့ နှုတ်ဆက်စကားပြောလိုက်၊ အထဲမှာ ဘယ်သူတွေရှိလဲဆိုတာ မေးစမ်းကြည့်" ဟု ဆို၏။

ထို့နောက် "ရိုရိုသေသေဆက်ဆံနော်" ဟုလည်း ထပ်လောင်းမှာကြားလိုက်သည်။

ယွမ်ဝူက သွားဖြဲကာ ရယ်လိုက်ပြီး

"ကောင်းပါပြီ"

ယွမ်ဝူသည် ကောင်းကင်ယာဉ်ပျံထဲမှ ပျံထွက်လာပြီး ထျန်းမင်ကြယ်၏ အထက်သို့ ရောက်ရှိလာ၏။ သူအောက်သို့ အနည်းငယ် ဆင်းသက်မည်ပြုစဉ်မှာပင် ထျန်းမင်ကြယ်၏ ကောင်းကင်ယံ၌ ထူထပ်သော အခင်းအကျင်းအင်းကွက်များ ရုတ်တရက် ပေါ်ထွက်လာတော့သည်။

ထိုအင်းကွက်များသည် နက်နဲရှုပ်ထွေးပြီး ဂြိုဟ်တစ်ခုလုံးကို လွှမ်းခြုံထား၏။

ယွမ်ဝူသည် ထိုအင်းကွက်များမှ အလွန်အမင်း အန္တရာယ်ကြီးမားသော အငွေ့အသက်တစ်ခုကို ခံစားလိုက်ရသည်။ သူ၏တစ်ကိုယ်လုံးရှိ အမွေးအမှင်များ ထောင်ထလာပြီး အရှိန်ပြင်းစွာဖြင့် အလျင်အမြန် နောက်သို့ဆုတ်ခွာခဲ့ရသည်။

"ဂြိုဟ်ကာကွယ်ရေး မဟာအခင်းအကျင်းကြီးပဲ!"

ကောင်းကင်လှေပျံအတွင်းမှ နုခ်နှင့် အခြားသူများလည်း ဤမြင်ကွင်းကို မြင်လိုက်ရသောအခါ မျက်လုံးများ ပြူးကျယ်သွားကြ၏။ နက်ရှိုင်းခြင်း အင်မော်တယ်အဆင့်နှောင်းပိုင်း ကျင့်ကြံသူဖြစ်သည့် ယွမ်ဝူကိုပင် တွန်းလှန်နိုင်သော အခင်းအကျင်းဖြစ်ရာ ၎င်း၏စွမ်းအားမှာ သာမညမဟုတ်သည်မှာ ထင်ရှားလှသည်။

ဤဂြိုဟ်ပေါ်တွင် အလွန်တရာ စွမ်းအားကြီးမားသော အဖွဲ့အစည်းတစ်ခု အမှန်ပင် ရှိနေပါတကား။

လင်းလောင်တောင်ထိပ်၌ လုရီသည် အခင်းအကျင်းတာအိုကို ခံစားလေ့လာနေစဉ် ထျန်းမင်ကြယ်၏ မဟာအခင်းအကျင်းကြီး အသက်ဝင်လာသည်ကို ရုတ်တရက် ခံစားမိလိုက်သည်။

သူ၏ မျက်ခုံးများ ပင့်တက်သွားပြီး သူရှိနေရာမှ ပျောက်ကွယ်ကာ လင်းလောင်တောင်ထိပ်အထက်သို့ ရောက်ရှိလာ၏။ ထူထပ်သော အခင်းအကျင်းအင်းကွက်များကို ကြည့်ရင်း လုရီက နှုတ်ခမ်းထောင့်ကို ကွေးလိုက်မိသည်။

"ဧည့်သည်တွေများ... ရောက်လာပြန်ပြီလား"

လုရီ ပေါ်ထွက်လာပြီး မကြာမီမှာပင် လျိုနင်ရွှမ်း၊ လင်းလောင်တောင်ထိပ်သခင်မနှင့် အခြားအင်မော်တယ်အဆင့် စွမ်းအားရှင်များလည်း ကောင်းကင်ယံသို့ ပျံတက်ရောက်ရှိလာကြသည်။

"သခင်!"

ငွေလမင်းနှင့် အခြားသူများက ရိုသေစွာ နှုတ်ဆက်ကြ၏။

"အရိုအသေတွေ လုပ်မနေကြနဲ့"

လုရီက ခေါင်းခါပြရင်း ကောင်းကင်သို့ မော့ကြည့်ကာ "သွားကြည့်ရအောင်" ဟု ဆိုလိုက်‌လေသည်။

လူတစ်စုလုံးသည် အလင်းတန်းများအဖြစ် ပြောင်းလဲကာ ကောင်းကင်သို့ ပျံတက်သွားကြလေ၏။ မကြာမီ သူတို့သည် အခင်းအကျင်းအစွန်သို့ ရောက်ရှိသွားကြသည်။ လုရီသည် အခင်းအကျင်းအပြင်ဘက်တွင် ပျံဝဲနေသော ရွှေရောင်အမွေးများဖြင့် မျောက်ဝံတစ်ကောင်နှင့် အဝေးတွင်ရှိနေသော ကောင်းကင်လှေပျံတစ်စီးကို တွေ့လိုက်ရသည်။ ထိုကောင်းကင်ယာဉ်ပျံမှာ ခမ်းနားထည်ဝါစွာ တည်ဆောက်ထားပြီး တန်ဖိုးကြီးမားလှ၏။

ထိုအချိန်မှာပင် ဝမ်ကျန်းယွမ်နှင့် အခြားသူများလည်း ချင်းကျိုးနယ်ပယ်အသီးသီးမှ ပျံသန်းထွက်ခွာလာပြီး လုရီတို့နှင့် လာရောက်ပူးပေါင်းကြသည်။

ထိုကောင်းကင်ယာဉ်ပျံကို မြင်သောအခါ ဝေ့ခန်းက အံ့ဩတကြီးဖြင့်

"ဒါက... ဘိုလော့စ် ကုန်သည်ကြီးများအသင်းရဲ့ ကောင်းကင်ယာဉ်ပျံပဲ။ ဒီပုံစံအရဆိုရင် ဘိုလော့စ်ကုန်သည်ကြီးများအသင်းက အဆင့်မြင့်ပုဂ္ဂိုလ်တစ်ဦးဦး ရောက်လာတာ" ဟု ဆိုလိုက်၏။

အခြားသော ကျင့်ကြံသူများကလည်း ထိုယာဉ်ပျံကို မှတ်မိကြသည်။

"ဒါက... ဘိုလော့စ်ကုန်သည်ကြီးများအသင်းရဲ့ ပဉ္စမမြောက် အမွေဆက်ခံသူ

နုခ်ရဲ့ ယာဉ်ပျံနဲ့တူတယ်။ သူတောင် ဒီနေရာကို ရောက်လာပါလား"

"ဘိုလော့စ်ကုန်သည်ကြီးများအသင်းဆိုတာ ဘယ်လိုအဖွဲ့အစည်းလဲ။ နုခ်ဆိုတာကရော ဘယ်သူတုန်း" လုရီက အနည်းငယ် စပ်စုလိုက်သည်။

"ဘိုလော့စ်ကုန်သည်ကြီးများအသင်းက မျက်လုံးသုံးလုံး ကြယ်တာရာနယ်မြေရဲ့ ထိပ်တန်းအင်အားစုတွေထဲက တစ်ခုဖြစ်ပြီး ကျင့်ကြံသူ အသုံးအဆောင်ပစ္စည်းအမျိုးမျိုးကို အဓိကရောင်းဝယ်ဖောက်ကားပါတယ်။ သူတို့ရဲ့ အင်အားရော ငွေကြေးအင်အားပါ တော်တော်လေးကို ထူးခြားပါတယ်။ နုခ်ကတော့ ဘိုလော့စ်ကုန်သည်ကြီးများအသင်းရဲ့ ပါရမီရှင်တစ်ယောက်ပေါ့... ဒါပေမဲ့ လုရီရဲ့ ရှေ့မှာတော့ သူက သာမန်လူတစ်ယောက်လောက်ပဲ ဖြစ်သွားမှာပါ"

ပုယွင်ကျန့်က သူ့ရှေ့မှပုဂ္ဂိုလ်၏ စွမ်းဆောင်ချက်များကို ပြန်အမှတ်ရရင်း နှုတ်ခမ်းတွန့်ကာ ပြောလိုက်သည်။

အခြားသူများလည်း ထောက်ခံသည့်အနေဖြင့် ခေါင်းညိတ်ကြသည်။ နုခ်သည် မျက်လုံးသုံးလုံး ကြယ်တာရာနယ်မြေတစ်ခုလုံးတွင် တော်တော်လေး ကျော်ကြားသော်လည်း လုရီနှင့်တော့ ဘယ်လိုယှဉ်နိုင်ပါ့မလဲ။

"ဪ... မျက်လုံးသုံးလုံး ကြယ်တာရာနယ်မြေက အဖွဲ့အစည်းကိုး" လုရီက ဖြည်းညင်းစွာ သဘောပေါက်သွားလေသည်။

ထိုအခါ သူစိတ်မပူတော့ပေ။ သူ့ဘေးမှ အမျိုးသမီးသည် ကောင်းကင်ကြယ်တာရာနယ်မြေ၏ အင်အားအကြီးဆုံး မျိုးနွယ်ဖြစ်သော ယွီမိသားစု၏ တိုက်ရိုက်မျိုးဆက်ဖြစ်ပြီး သူကိုယ်တိုင်မှာလည်း ယွီမိသားစုသခင်နှင့် ဘိုးဘေးတို့က သမက်တော်ချင်နေကြသူဖြစ်သည်။

သည်အဆင့်အတန်းက နုခ်ဆိုသူထက် ဘယ်မှာ နိမ့်ကျနိုင်ပါ့မလဲ။

ဟင်းလင်းပြင်အထက်မှ ယွမ်ဝူသည် အခင်းအကျင်းအတွင်းမှ ကျင့်ကြံသူများ ပျံတက်လာသည်ကို မြင်သောအခါ ချက်ချင်း လက်သီးများ အုပ်မိုးကာ

ပြောလာလေသည်။

"ကျင့်ကြံသူများခင်ဗျာ၊ ကျုပ်က မျက်လုံးသုံးလုံး ကြယ်တာရာနယ်မြေက ဘိုလော့စ်ကုန်သည်ကြီးများအသင်းက ကျင့်ကြံသူတစ်ယောက်ပါ။ ဒီနေရာကို ဖြတ်သွားရင်း ဒီလို ကောင်းကင်ဘုံလို နေရာလေးကို တွေ့ရှိတာနဲ့ အထူးတလည် လာရောက်လည်ပတ် နှုတ်ဆက်တာပါ"

ထိုစကားကို ကြားသောအခါ လုရီက မျက်ခုံးပင့်လိုက်ပြီး မယုံသင်္ကာဖြစ်သွားသည်။

'ဖြတ်သွားရင်းတဲ့လား... ဟား၊ တာအိုဒီလှိုင်းကြောင့် ဆွဲဆောင်ခံရတာ ဖြစ်မှာပေါ့'။

သို့သော် မဟာအခင်းအကျင်းကြီး ရှိနေသဖြင့် လုရီလည်း မကြောက်ပေ။ ထို့အပြင် သူ၏ဆရာဖြစ်သူကလည်း ယွီထျန်းဖုန်း၏ ဆဋ္ဌမတပ်မတော်ကြီး လမ်းခရီး၌ ရှိနေပြီး မကြာမီ ရောက်ရှိလာတော့မည်ဟု ပြောထားသည် မဟုတ်ပါလော။

လုရီ စကားပြောမည် အပြုတွင် ရုတ်တရက် ပါးစပ်ပိတ်လိုက်ပြီး အနီးအနားရှိ ဟင်းလင်းပြင်ကို လှမ်းကြည့်ကာ "တယ်လည်း တိုက်ဆိုင်ပါလား" ဟု ရေရွတ်လိုက် တော့သည်။

သူ၏ အမြင်အာရုံထဲတွင် နေရာလပ်မျဉ်းကြောင်းများ လိမ်ယှက်ကာ ကြီးမားသော ဟင်းလင်းပြင်ကြီးတစ်ခု ဖြစ်ပေါ်လာသည်ကို တွေ့မြင်နေရ၏။ ၎င်းမှာ နေရာလပ် ကူးပြောင်းရေး မဟာအခင်းအကျင်းကြီးပင်တည်း။ ထိုဟင်းလင်းပြင်အတွင်းမှ ကြယ်တာရာနယ်မြေတပ်မတော်၏ ကောင်းကင်လှေပျံများ တစ်စီးပြီးတစ်စီး ပျံထွက်လာကြသည်။

ဤလှုပ်ရှားမှုကို အခြားသူများအားလုံးလည်း သတိပြုမိသွားကြသည်။ ယွမ်ဝူသည် အရင်ဆုံး သတိအနေအထားဖြစ်သွားပြီး ကောင်းကင်လှေပျံဆီသို့ နောက်ဆုတ်သွားသည်။ သို့သော် ကောင်းကင်လှေပျံပေါ်မှ အမှတ်တံဆိပ်ကို မြင်သောအခါ သူနေရာမှာပင် ကြက်သေသေသွားပြီး မျက်လုံးများ အံ့ဩမှုဖြင့် ပြူးကျယ်သွားတော့၏။

ကောင်းကင်လှေပျံအတွင်း၌ နုခ်နှင့် အခြားသူများလည်း ထိုအမှတ်တံဆိပ်ကို မြင်လိုက်ရသောအခါ တုန်လှုပ်စွာဖြင့် မျက်လုံးများ ပြူးကျယ်သွားကြလေသည်။

"ကြယ်တာရာနယ်မြေ တပ်မတော်!"

နုခ်က တအံ့တဩဖြင့် တိုးတိုးလေး ရေရွတ်လိုက်သည်။

"ကြယ်တာရာနယ်မြေ တပ်မတော်က ဒီနေရာကို ဘယ်လိုရောက်နေတာလဲ"

ကြယ်တာရာနယ်မြေ တပ်မတော်သည် ယွီမိသားစု၏ အင်အားအကြီးဆုံး တပ်မတော်ဖြစ်သည်ကို သိထားရပေမည်။ တပ်မတော်တစ်ခုတည်း ထွက်လာလျှင်ပင် မျက်လုံးသုံးလုံး ကြယ်တာရာနယ်မြေရှိ အင်အားစုအားလုံးကို အောင်နိုင်ချေမှုန်းနိုင်စွမ်းရှိသည်။

ဟင်းလင်းပြင်ကြီး ပွင့်ထွက်သွားပြီး ကောင်းကင်ယာဉ်ပျံ စုစုပေါင်း ငါးစင်း ထွက်ပေါ်လာ၏။ ထို့နောက် ယာဉ်ပျံများသည် ထျန်းမင်ကြယ်အပြင်ဘက် ဟင်းလင်းပြင်၌ ရပ်တန့်သွားကြသည်။

နောက်တစ်ခဏတွင် ကောင်းကင်ယာဉ်ပျံများအတွင်းမှ လူအချို့ ပျံထွက်လာကြသည်။ ခေါင်းဆောင်မှာ ကြယ်တာရာနယ်မြေ တပ်မတော်စစ်ဦးစီးချုပ်၏ သီးသန့်စစ်ချပ်ဝတ်တန်ဆာကို ဝတ်ဆင်ထားသော ယွီထျန်းဖုန်းဖြစ်၏။

နုခ်နှင့် ယွမ်ဝူတို့က သူ့ကို ချက်ချင်း မှတ်မိလိုက်ကြသည်။

သူတို့သည် ယွီထျန်းဖုန်းကို မျက်လုံးပြူးကာ ကြည့်ရင်း လည်ချောင်းများ ခြောက်ကပ်လာသလို ခံစားလိုက်ရသည်။

"စစ်... စစ်ဦးစီးချုပ်! အဲ့ဒါ ကြယ်တာရာနယ်မြေ တပ်မတော်ရဲ့ စစ်ဦးစီးချုပ် မဟုတ်လား။ စစ်ဦးစီးချုပ် ကိုယ်တိုင် ရောက်လာတာလား" အလွန်အမင်း တုန်လှုပ်သွားသောကြောင့် နုခ်၏အသံမှာ အနည်းငယ် တုန်ယင်နေခဲ့သည်။

ယွီထျန်းဖုန်း၏ အကြည့်က ယွမ်ဝူထံသို့ တစ်ချက်ဝေ့ကြည့်ပြီးနောက် အဝေးမှ ကောင်းကင်လှေပျံဆီသို့ ရောက်ရှိသွား၏။ သူ၏အကြည့်ကြောင့် ယွမ်ဝူတစ်ယောက် ရေခဲတမျှ အေးစက်သွားပြီး နေရာမှာပင် တောင့်တောင့်ကြီး ဖြစ်သွားလေသည်။

ထိုအခိုက်မှာပင် ထျန်းမင်ကြယ်ကို လွှမ်းခြုံထားသော အခင်းအကျင်းအင်းကွက်များ ရုတ်တရက် လှုပ်ရှားသွားပြီး ပျောက်ကွယ်သွားရာ မဟာအခင်းအကျင်းကြီး ပွင့်သွားကြောင်း သိသာလှ၏။

လုရီနှင့် လင်းလောင်တောင်ထိပ်သခင်မတို့သည် ယွီထျန်းဖုန်းကို ကြိုဆိုရန် ပျံထွက်သွားကြသည်။ လုရီနှင့် လင်းလောင်တောင်ထိပ်သခင်မကို မြင်သောအခါ မူလက တင်းမာနေသော ယွီထျန်းဖုန်း၏ မျက်နှာသည် ရုတ်ခြည်း နူးညံ့သော အပြုံးတစ်ခုသို့ ပြောင်းလဲသွားသည်။

"ဦးလေးထျန်းဖုန်း၊ တပ်မှူးချုပ် လျိုဟိုင်ချင်း၊ တပ်မှူးချုပ် ခဲမင်လော့... မတွေ့ရတာကြာပြီဗျ" လုရီက ပြုံးကာ နှုတ်ဆက်လိုက်သည်။

"ရီအာ... လင်းလောင်၊ ငါနောက်ကျမသွားဘူး မဟုတ်လား" ယွီထျန်းဖုန်းက ပြုံးရင်းမေး၏။

"ဘယ်ဟုတ်မှာလဲ ဦးလေးထျန်းဖုန်း... စောတောင်စောသေးတယ်"

"ဒါနဲ့... ဟိုဘက်က ဘိုလော့စ်ကုန်သည်ကြီးများအသင်းက ကောင်တွေက ဘာဇာတ်လမ်းလဲ" ယွီထျန်းဖုန်းက မေးလိုက်သည်။

နုခ်: "..."

ယွမ်ဝူ: "..."

ဘိုလော့စ်ကုန်သည်ကြီးများအသင်းမှ လူများမှာ ကိုယ်တစ်ကိုယ်လုံး ထုံကျင်သွားသလို ခံစားလိုက်ရသည်။

ခင်ဗျားမှာ ဒီလောက်ကြီးတဲ့ နောက်ခံအရှိန်အဝါကြီး ရှိနေမှန်းသိရင် ဘယ်သတ္တိနဲ့ လာစမ်းရဲမှာလဲ... စောစောကတည်းက ပြောပါ့လားဗျာ။