ကြယ်တာရာထောင်မှူး ... ။

ပိုလျှံမှုကို လျော့ချရန်ဟူသည် ၎င်းတို့ဖမ်းဆီးရမိထားသော အကျဉ်းသားများ အပေါ် ရည်ရွယ်သည်။

သို့သော် အားနည်းသူများဟူသည် မည်သူနည်း။ နကျယ်ကောင်သည် ၎င်းတို့၏ သားစဉ်မြေးဆက်အတွက် အာဟာရအဖြစ် ပိုးကောင်များကို ဖမ်းယူ၏။

ဆိုလိုသည်မှာ ကြယ်တာရာ ထောင်မှူးများသည် အကျဉ်းသားများကို ဖမ်းမိသည့်အခါ ၎င်းတို့၏ သားစဉ်မြေးဆက် အကျိုးအတွက် အသုံးချ လိုနေသည်ဟု ဆိုလိုသည်လော။

“ ဟမ့် ... သူတို့က ကောင်းကင်ဘုံကို ဘယ်လိုကိုယ်စားပြုနိုင်မှာလဲ ကျင့်ကြံသူတွေကို ဆေးဝါးသက်သက် ဆက်ဆံ ရိတ်သိမ်းချင် နေကြတာပါ ...

... ဒါက ကောင်းကင်တာအိုဆိုတဲ့ အမည်အောက်မှာ ရှင်းရှင်းလင်းလင်း ကိုယ်ကျိုး ရှာနေကြတဲ့ လူတွေပဲ။ ”

ခေါင်းကိုးလုံးငှက်မိစ္ဆာမှ ဒေါသဖြင့် အော်ဟစ်လိုက်၏။ စုရီက ခေါင်းညိတ်လိုက် လေသည်။ ကောင်းကင်တာအိုအရ ပိုလျှံမှု အပေါ် လျှော့ချချင်သည်လော။

ချို့တဲ့သူများအပေါ်သို့ ဖြည့်ဆည်းခြင်း ဟူသည့် စကားစုသည် စကြဝဠာ၏နိယာမကို ရိုးရှင်းစွာ ဆန့်ကျင်နေသည်။

တစ်စုံတစ်ဦးသည် ကောင်းကင်ဘုံ ကိုယ်စားတရားမျှတမှု ဖော်ဆောင်ခြင်းဟူသည် လုံးဝလုံးဝ အဓိပ္ပါယ်မရှိချေ။

“ ဒီတောင်ပုဒ်ကို ရေးထိုးဖို့ ဘယ်လိုအက္ခရာတွေသုံးလဲ။ ”

“ ရှေးခေတ် လူသားဘာသာစကား။ ”

စုရီက မျက်ခုံးပင့်လိုက်လေသည်။ ကြယ်တာရာထောင်မှူးများသည် နတ်ဆိုးများ မဟုတ်ဘဲ လူသား ဖြစ်နေပုံရ၏။

သို့ဆိုလျှင် ဤအင်အားစုသည် ချို့ယွင်းချက်များကို ပြုပြင်ရန် ဧကရာဇ်တစ်ပါး ကိုပင် ပိုလျှံမှုအဖြစ် ရည်ရွယ်နေသည်မှာ အလွန်အစွမ်းထက်ကြောင်း ညွှန်ပြနေသည်။

သည့်ပြင် ထိုအင်အားစုသည် အမှောင်တားမြစ်စွမ်းအားအပေါ် ထိန်းချုပ် နိုင်ဖွယ် ရှိ၏။

ယင်းကြောင့် လွန်ခဲ့သည့်နှစ်ပေါင်း (၃၀၀၀၀)က မိုးပြာတိုက်ကြီးထံ ရောက်ရှိသည့် အမှောင်တားမြစ်စွမ်းအားသည် ထိုအင်အားစု၏ လက်ချက် ဖြစ်နိုင်မည်။

“ ငါအဲဒီသွေးလှိုဏ်ဂူထဲမှာ နှစ်ပေါင်းထောင်ချီကြာအောင် ပိတ်မိလာချိန်မှာ ဖမ်းမိခဲ့တဲ့ တခြားသူတွေကိုလည်း တွေ့ခဲ့ရပါတယ် ...

... သူတို့ဟာ ကမ္ဘာအသီးသီးကနေ ခေါ်လာခဲ့ကြတာပဲ ဒါပေမယ့် ကံမကောင်းစွာနဲ့ ကျင့်ကြံမှုနိမ့်ပါးတာကြောင့် ဖမ်းမိပြီး မကြာခင်မှာပဲ သေဆုံးကုန်တယ် ...

... သူတို့နဲ့ စကားပြောကြည့်တဲ့အခါ ကြယ်တာရာထောင်မှူးက ဘယ်လိုတန်ခိုး ရှိနေမှန်း သူတို့လည်း မသိခဲ့တာကို သိလိုက်ရတယ် ...

... ကောင်းကင်တာအိုကို ကိုယ်စားပြုတယ်လို့သာ ကြားသိရတဲ့အတွက် ကောင်းကင်တာအိုဂိုဏ်းလို့ ခေါ်ခဲ့ကြတယ်။ ”

“ ကောင်းကင်တာအိုဂိုဏ်း ... ။ ”

စုရီက ခေါင်းခါလိုက်သည်။ ဤကမ္ဘာကြီးပေါ်တွင် ကောင်းကင်ဘုံ၏ သားစဉ်မြေးဆက်များအဖြစ် ခံယူဝံ့သော အင်အားစုမည်သို့ ရှိနိုင်မည်နည်း။

ယင်းသည် တားမြစ်ချက်ကို ချိုးဖောက်ရုံသာမက သဘာဝတရားကြီးနှင့် အခြားသော အင်အားစုများ၏ ရန်လိုမှု သည်လည်း မလွဲမသေခံရပေလိမ့်မည်။

အဆုံးတွင် ​ကျင့်ကြံခြင်းဟူသည် ကောင်းကင်ဘုံ၏ အလိုတော်ကို ဆန့်ကျင်ခြင်း မည်ချေ၏။

သည့်နောက်တွင် ခေါင်းကိုးလုံး ငှက်မိစ္ဆာသည် အာကာသစွမ်းအားကို မွေးရာပါ နားလည်သောသားရဲဖြစ်ကြောင်း ထပ်မံ သိရှိလိုက်ရသည်။

အဆုံးမဲ့နှစ်များ တစ်လျှောက်တွင် သူသည်မိုးပြာတိုက်ကြီးထံ ဦးတည်နိုင်သော အာကာသဆုံမှတ်တစ်ခုဖန်တီးကာ တပည့်များ စုဆောင်းလျက် မင်လုံဂိုဏ်းကို တည်ထောင် နိုင်ခဲ့၏။

ဤနည်းဖြင့် ယုံကြည်သူများထံမှ ယဇ်ပူဇော်မှုများကို လက်ခံရယူကာ ဝိညာဉ်ရေး ပစ္စည်းများနှင့် ဆေးရည်အချို့ရရှိပြီး လက်ရှိ အချိန်အထိ ရှင်သန်နိုင်နေခြင်းပေပင်။

‘မဟာကရုဏာတော်’ဟူသော ဘွဲ့အမည်ကိုလည်း သူကိုယ်တိုင် ပေးအပ်ခြင်း ဖြစ်သည်။

အချိန်အကြာကြီး အကျဉ်းချခံရပြီး မလွတ်မြောက်နိုင်သော အခြေအနေမျိုးသည် သဘာဝအတိုင်း သူ့ဘဝအတွက် အကြီးမားဆုံး ကြေကွဲစရာဖြစ်လာ၏။

“ ဘရူး ... ။ ”

ရုတ်တရက် သွေးရေဝဲကြီး တုန်ခါလျက် စုရီနှင့် ခေါင်းကိုးလုံးငှက်မိစ္ဆာတို့ကြား စကား ပြောဆိုမှုကို အနှောင့်အယှက်ပေးလာ၏။

“ တာအိုစု ... ဒီအာကာသဆုံမှတ် ပြိုကျတော့မယ် ... အဲဒါကို ပြန်ဖွင့်ဖို့ လနဲ့ချီပြီး ငါ အချိန်ယူရလိမ့်မယ်။ ”

“ ကောင်းပြီ ... ဒီမှာ ဝိညာဉ်ပြန်လည်သန့်စင်ခြင်း နည်းစနစ်ရဲ့ ဒုတိယအပိုင်း အားလပ်ချိန်မှာ မင်းလေ့ကျင့်ထားပါ။ ”

“ ဝှစ် ... ။ ”

စုရီက ပြင်ဆင်ထားပြီးသော ကျောက်စိမ်းပြားကိုထုတ်ယူပြီး သွေးရေဝဲထဲ ပစ်သွင်းလိုက်၏။

“ ကျေးဇူးပါ တာအိုစု။ ”

ခဏအကြာတွင် သွေးရေဝဲ ပျောက်ကွယ်သွားသည်။ စုရီတစ်ယောက် ကုလားထိုင်ပေါ်တွင် တစ်ယောက်တည်း အတွေးပွားနေမိ၏။

ဤစကားဝိုင်းသည် အဖိုးတန်သော သဲလွန်စများ ပေးစွမ်းခဲ့သည်။ ဥပမာအားဖြင့် အာကာသအတွင်းတွင် နဝမမြောက် ကြယ်အပျက်အစီးသာမက အခြားသော ကြယ်အပျက်အစီးများ ရှိနေ၏။

တရားမျှတမှုကို လက်ကိုင်ပြုနေသည့် ကောင်းကင်တာအိုဂိုဏ်း၏ ထောင်မှူးများသည် ဧကရာဇ်အဆင့်ပုဂ္ဂိုလ်များကို အကျဉ်းသား အဖြစ် သတ်မှတ်ကာ လိုက်လံဖမ်းဆီး၏။

ဆိုလိုသည်မှာ ကောင်းကင်ထက်တွင် ကောင်းကင်တာအိုဂိုဏ်းမှ အကျဉ်းထောင်ဟု ယူဆနေသည့် ပိုးဖလံသွေးလှိုဏ်ဂူရှိသည်။

နောက်ဆုံး ခွဲခြမ်းစိတ်ဖြာမှုတွင် အရာအားလုံးမှာ အမှောင်တားမြစ်စွမ်းအင်နှင့် သက်ဆိုင်နေ၏။ ၎င်းကို ကောင်းကင်တာအို ဂိုဏ်းမှ ထိန်းချုပ်ထားနိုင်မည်။

သို့သော် အထက်ပါအချင်းအရာများသည် မှန်းဆချက်ဖြစ်၏။ ကောင်းကင်တာအိုဂိုဏ်းမှ ထိုထောင်မှူးများကို ဖမ်းနိုင်မှသာလျှင် အဖြေကို သိရပေမည်။

စုရွှမ်ကြွယ်ဘဝတွင် ကြယ်ရောင်စုံ ကောင်းကင်ကြီးကို အလွန် စိတ်ဝင်စားခဲ့သည်။ အဆုံးတွင် လူဝင်စားခြင်းဖြင့် ပိုမိုမြင့်မားသော တာအိုကိုရှာဖွေရန် ရွေးချယ်ဖြစ်၏။

ယခုဆိုလျှင် ကြယ်ရောင်စုံ ကောင်းကင်ကြီးရှိ အချို့သောအချင်းအရာများ အပေါ် အနည်းငယ် သိရှိလာပြီဖြစ်သည်။

များကြာခင် ငွေရောင်ဝတ် လူငယ်၊ မုတ်ဆိတ်မွေး အဘိုးကြီးနှင့် ရှောမင်တို့သုံးဦး ပြန်လည်ရောက်ရှိလာ၏။

သူတို့အားလုံးသည် လိမ္မာပါးနပ်ကြပြီး စုရီနှင့်ခေါင်းကိုးလုံးငှက်မိစ္ဆာတို့ စကားဝိုင်းကို မေးမြန်းခြင်းမပြုကြချေ။

“ မင်းတို့ပြန်လို့ရပြီ။ ”

စုရီက မတ်တပ်ထရပ်ကာ ကြိမ်ကုလားထိုင်ကို သိမ်းလျက် ပြင်ဆင်မှုအချို့ ပြုလုပ်ရန် အတွေးပေါ်လာ၏။

“ တာအိုစု မနေ့ညက ... ခြောက်သွေ့နေတဲ့ရေတွင်းတစ်ခုဟာ သွေးညှီ ရနံ့တွေ ထွက်လာတယ် ... အဲဒီနေရာက အန္တရာယ်ဖြစ်မှာ စိုးရိမ်ပြီး စီနီယာရင်ချုံးကို စောင့်ကြည့်ခိုင်းထားရတယ်။ ”

နောက်နှစ်ရက်အကြာတွင် နင်စစ်ဟွာတစ်ယောက် အလျင်လိုနေသော အသွင်ဖြင့် ရောက်ရှိလာခဲ့သည်။

“ ငါ့ကို ခေါ်သွားပါ ... ။ ”

စုရီမှ ချက်ချင်းပင် လမ်းပြခိုင်းလိုက်၏။ များမကြာခင် စွန့်ပစ်ထားသော ဘုံကျောင်းရှိ ခမ်းခြောက်နေသော ရေတွင်းကြီးကို မြင်လိုက်ရတော့သည်။

ခမ်းခြောက်နေသော ရေတွင်းသည် အကျယ်အဝန်း ဆယ်ပေခန့်သာရှိ၏။ အတွင်းမှ နီမြန်းသော သွေးအမှုန်အမွှားများ တိုးထွက်ကာ ပတ်ဝန်းကျင်ကို သွေးနီရောင်များဖြင့် ဆေးဆိုးထားသည်။

ရင်ချုံးသည် အနီးအနားတွင် ရပ်နေ၏။ စုရီတို့ ရောက်ရှိလာသည်ကို မြင်သောအခါတွင်၊

“ ဆရာစု ... ဒီနေရာက အရမ်းထူးဆန်းတယ် သွေးအခိုးအငွေ့တွေက ပိုပိုများလာနေပြီ။ ”

-ဟု ပြောကြားလာသည်။

စုရီက ခေါင်းညိတ်ပြပြီး ရှေ့ကိုလှမ်းကာ လေထဲဖမ်းဆုပ်ကြည့်လိုက်၏။ သူ့ လက်ဖဝါးထဲ သွေးမှုန်များ ပါလာသည်။

“ ဒါ လူသေကောင်ရဲ့ အငွေ့အသက်ပါ ... ကြည့်ရတာ အလောင်းကောင်မိစ္ဆာတွေ ဖြစ်ဖို့ အလားအလာရှိတယ်။ ”

သူ့မှတ်ချက်ကြောင့် ရင်ချုံးနှင့် နင်စစ်ဟွာတို့နှစ်ယောက်သည် ထိတ်လန့်စွာ အချင်းချင်း ပြန်ကြည့်လိုက်ကြသည်။

“ အလောင်းကောင်မိစ္ဆာ ... ။ ”

ဤသည်မှာ အလွန်ကြောက်စရာ ကောင်းသော အလောင်းကောင်များဖြစ်သည်။ အစွမ်းထက်သော တစ်စုံတစ်ယောက် အသတ် ခံရချိန်တွင် နာကြည်းဖွယ်စိတ်ဝိညာဉ်များ ကျန်ရှိနေခဲ့၏။

၎င်းတို့သည် ဝိညာဉ်စွမ်းအင်များ၏ အာဟာရဖြည့်တင်းမှုအောက်တွင် အလောင်း မိစ္ဆာများအဖြစ်သို့ ပြောင်းလဲသွားနိုင်မည်။

ယင်းသည် သရဲတစ္ဆေများနှင့် ဆင်တူသော်လည်း လူသေကောင်များစွာမှ အသွင်ပြောင်းလာသည့် သက်ရှိသတ္တဝါဖြစ်၏။ ဖုတ်ကောင်ဟုလည်း ခေါ်သည်။

“ မင်း ... ဒီမှာစောင့်နေပါ ငါသွားကြည့်ဦးမယ်။ ”

စကားဆုံးသည်နှင့် စုရီသည် ခမ်းခြောက်နေသောရေတွင်းထံ လျှောက်လှမ်း သွားတော့၏။

“ ဟမ့် ... တားမြစ်ဝင်္ကပါတစ်ခုကို ခင်းထားတာလား။ ”

ရေတွင်းအဝတွင် တားမြစ်ဝင်္ကပါကို ခံစားမိသဖြင့် တစ်ခုခုမှားယွင်းနေပြီဖြစ်ကြောင်း သတိထားမိလာသည်။

ခမ်းခြောက်နေသည့် ရေတွင်းထဲ၌ အန္တရာယ်ရှိနေသော် ၎င်းကိုနှိမ်နှင်းရန်အတွက် အလုံပိတ်ထားသင့်ချေပြီ။ ယခုကဲ့သို့ ဝင်္ကပါဖြင့် ပိတ်ဆို့ထားခြင်း မပြုသင့်ချေ။

သို့သော် ဤတားမြစ်ဝင်္ကပါသည် အပြင်လူများ ဝင်ရောက်ခြင်းမှ တားဆီးရန်သာ ရည်ရွယ်ကြောင်း ထင်ရှားသည်။

“ သတိထား ... ။ ”

စုရီက မျက်ခုံးပင့်ကာ သတိပေးလိုက်၏။ ရုတ်တရက် သွေးစွန်းနေသော လေထုအတွင်းမှ စူးရှသောအသံကို ကြားလိုက်ရသည်။

စုရီက ကြေးမီးခွက်တစ်ခွက်ကို ထုတ်လိုက်၏။ မီးခွက်သည် ကြာပန်းနှင့်တူပြီး မီးစာသည် မြွေတစ်ကောင်လို တွန့်လိန်နေသည်။

ထူးဆန်းပြီး ကြောက်စရာကောင်းသော အစိမ်းရောင်မီးတောက်သည်လည်း ထွက်ပေါ် နေတော့၏။

“ မြွေတစ္ဆေအမှောင်မီးအိမ်။ ”

ဤကမ္ဘာပေါ်ရှိ သရဲတစ္ဆေများကို ထိန်းချုပ်နှိမ်နင်းရန် အထူးထုတ်လုပ်ထားသည့် အစွမ်းထက်သော ရတနာဖြစ်သည်။

ရန်သူကို တိုက်ခိုက်ရာတွင် အသုံးပြုနိုင်သကဲ့သို့ ရန်သူ့ဝိညာဉ်အပေါ်လည်း ဖျက်စီးပစ်နိုင်၏။

ဤရတနာသည် စကြာဝဠာကျွန်းတွင် မိုရှင်းဇီထံမှရရှိသော ဆုလက်ဆောင် ဖြစ်သည်။ မြွေမီးအိမ်၏ အလင်းရောင်ကြောင့် အရိပ်များ အဝေးသို့ ထွက်ပြေးကုန်၏။

“ ဝူး ... ။ ”

တစ်ချိန်တည်းမှာပင် ပြင်းစွာသော အော်ငေါက်သံထွက်လာသည်။ ပေဒါဇင်နှင့် ချီသော အကွာအဝေးတွင် လွင့်မျောနေသည့် တစ်စုံတစ်ခုကို မြင်လိုက်ရ၏။

ယင်းသည် ခန္ဓာကိုယ်ပေါ်၌ အစိမ်းရောင်မီးတောက်များ တောက်လောင် နေပြီး ဝမ်းနည်းစွာ အော်ဟစ်နေခဲ့၏။

“ ဒါက ... ။ ”

ထိုအရိပ်သည် လုံးဝပုပ်နေပြီး လည်ပင်းရိုးကျိုးနေကာ ခန္ဓာအနှံ့ပျက်စီးခြင်း လက္ခဏာများ ပြသနေ၏။

၎င်းသည် မည်ကဲ့သို့ ရက်စက် ကြမ်းကြုတ်သော သားရဲအမျိုးအစားဖြစ်မည်ကို ဖော်ထုတ်ရန် ခက်ခဲနေခဲ့သည်။

***